Te ʼu Fehuʼi ʼa Te Kau Lautohi

ʼE kovi koa te matehi ʼo he manu kua mahaki kovi peʼe kua matuʼa?

Tokolahi te hahaʼi ʼe nātou leleiʼia pea mo nātou maʼu te fiafia ʼaki te ʼu manu kehekehe. Ko ʼihi ʼu manu lalata ʼe nātou liliu ko he ʼu kaumeʼa lelei. Ohage la kua tou ʼiloʼi ko te ʼu kuli ʼe nātou fakalogo lelei pea mo nātou leleiʼia tonatou ʼu pule. Koia ʼe tou mahino ai ki te ʼofa lahi ʼa te hahaʼi ki he manu ʼe nātou leleiʼia, tāfito la mo kapau kua fualoa tanatou nonofo mo ia.

Kae ʼe lahi te ʼu manu feiā ʼe mole maʼuʼuli fualoa. Ko te ʼu kuli ʼe feala ke nātou maʼuʼuli taʼu e 10 peʼe 15 peʼe laka atu, ohage ko he ʼu faʼahiga pusi. ʼI te kua matuʼa ʼo te ʼu manu ʼaia, ʼe feala ke nātou mahahaki, pea ʼe feala ke mamahi ai te hahaʼi ʼaē ʼe nātou taupau heʼe nātou manatuʼi te temi ʼaē neʼe kei liliki ai tanatou ʼu manu pea mo gaoʼi. ʼE kovi koa te matehi ʼo te ʼu manu ʼaia ʼaē kua matutuʼa peʼe kua mahahaki?

ʼE fia mulimuli anai he Kilisitiano ki te finegalo ʼo te ʼAtua ʼo ʼuhiga mo te gaohi ʼo te ʼu manu. ʼE mahino ia ko te gaohi koviʼi ʼo te ʼu manu ʼaia ʼe mole ʼalutahi mo te finegalo ʼo te ʼAtua, heʼe ʼui fēnei e tana Folafola: “ ʼE tokaga ia ia ʼe faitotonu ki te nefesi ʼo tana manu lalata.” (Tāʼaga Lea 12:10) Kae ʼe mole faka ʼuhiga ʼe tatau kia mata ʼo te ʼAtua te ʼu manu pea mo te tagata. ʼI te fakatupu e te ʼAtua te tagata, neʼe ina fakahā ʼe kehekehe ʼaupito te tagata mo te ʼu manu. Ohage la, neʼe ina foaki ki te tagata te ʼamanaki ki te maʼuli heʼegata, kae neʼe mole ina foaki te ʼamanaki ʼaia ki te ʼu manu. (Loma 6:​23; 2 Petelo 2:​12) Mai tona ʼaluʼaga ʼaē neʼe ina fakatupu ia meʼa fuli, ʼe ko ia ʼaē ʼe tonu ke ina fakahā peʼe feafeaʼi te felogoi ʼa te tagata mo te ʼu manu.

ʼE fakahā mai ia Senesi 1:​28 te faʼahiga felogoi ʼaia. Neʼe ʼui fēnei e te ʼAtua ki te ʼuluaki taumatuʼa: “Koulua pule ki te ʼu ika ʼo te tai, pea mo te ʼu manulele ʼo te lagi pea mo te ʼu meʼa maʼuli fuli pe ʼaē ʼe maʼuli ʼi te kele.” ʼO toe feiā pe, ʼe ʼui fēnei ia Pesalemo 8:​6-8: “Neʼe ke tuku [te ʼAtua] ia meʼa fuli ki ʼona vaʼe [ʼo te tagata]: te faga pipi liliki mo te ʼu pipi tagata matuʼa, ʼo fakatahiʼi, pea mo te faga manu ʼo te vao, te faga manulele ʼo te lagi pea mo te ʼu ika ʼo te tai.”

Neʼe fakahā lelei e te ʼAtua neʼe feala ki te tagata ke ina fakaʼaogaʼi lelei pea mo matehi te ʼu manu. Ohage la, neʼe feala ke fai ʼaki tonatou ʼu kili he ʼu mutuʼi meʼa. Neʼe toe fakagafua e te ʼAtua ki te tagata ke ina kai te kanoʼi manu ʼi te hili ʼo te Tulivio ʼo te temi ʼo Noe, moʼo fakakatoa te mole lahi ʼo te lauʼakau ʼaē neʼe foaki age kia nātou ʼi muʼa atu.​—Senesi 3:​21; 4:4; 9:3.

ʼE mole fakagafua e te faʼahi ʼaia ke matehi te ʼu manu ʼi te ʼu faigaoʼi. Ia Senesi 10:9, ʼe palalau te Tohi-Tapu ki te tagata ko Nimelote neʼe ko “he tagata kapu manu mālohi.” Kae ʼe ʼui ʼi te vaega ʼaia “neʼe fakafeagai kia Sehova.”

Koia, logola ʼe pule te tagata ki te ʼu manu, kae ʼe mole tonu ke ina fakaʼaogaʼi kovi tana pule ʼaia kae ke ina fakaʼaogaʼi ʼo mulimuli ki te ʼu pelesepeto ʼa te Folafola ʼa te ʼAtua. ʼE kau kiai te mole tuku ʼaē ke mamahi noa he manu ʼe tou leleiʼia, he kua matuʼa peʼe lavea peʼe kua mahaki kovi. ʼI te ʼu ʼaluʼaga ʼaia, ʼe maʼua ke filifili e te Kilisitiano te meʼa ka ina fai. Kapau maʼa ia ʼe ko he manavaʼofa hana mole tuku ke mamahi tana manu he mole he faitoʼo kiai, pea ʼe feala ke ina filifili ke ina matehi.