ʼE Tonu Ke Tou Feafeaʼi Ki Te Hahaʼi ʼi Muʼa ʼo Te Hoko Mai ʼo Te ʼAho ʼo Sehova?

“Ko Sehova ʼe mole tuai ʼo ʼuhiga mo tana fakapapau, . . . kae ʼe faʼa kātaki kia koutou heʼe mole ina loto ke fakaʼauha he tahi kae ʼe loto ia ke aʼu te hahaʼi fuli ki te fakahemala.”​—⁠2 Petelo 3⁠:​9, MN.

1, 2. (a) Koteā te manatu ʼa Sehova ʼo ʼuhiga mo te hahaʼi? (b) Koteā te ʼu fehuʼi ʼe feala ke tou fai takitokotahi?

ʼE FAKATOTONU ki te ʼu kaugana ʼa Sehova ke nātou “fai ni ʼu tisipulo ʼi te hahaʼi ʼo te ʼu fenua fuli pe.” (Mateo 28⁠:​19, MN ) ʼI tatatou fakahoko te gāue ʼaia pea mo fakatalitali ki “te ʼaho lahi ʼo Sehova,” ʼe tonu ke tou manatu ohage ko ia ʼo ʼuhiga mo te hahaʼi. (Sofonia 1⁠:14) E feafeaʼi te manatu ʼa Sehova ʼo ʼuhiga mo te hahaʼi? ʼE ʼui fēnei e te ʼapositolo ko Petelo: “Ko Sehova ʼe mole tuai ʼo ʼuhiga mo tana fakapapau, ohage ko te faka ʼuhiga e ʼihi ia te tuai, kae ʼe faʼa kātaki kia koutou heʼe mole ina loto ke fakaʼauha he tahi kae ʼe loto ia ke aʼu te hahaʼi fuli ki te fakahemala.” (2 Petelo 3⁠:​9, MN ) Maʼa te ʼAtua ko te hahaʼi ʼe feala ke nātou fakahemala. Ko tona “loto ke hāofaki te faʼahiga tagata fuli pe, pea ke nātou aʼu ki te ʼatamai mālama totonu ʼo te moʼoni.” (1 Timoteo 2⁠:​4, MN ) Koia la ʼaē ʼe fiafia ai Sehova “ki he tahi ʼe agakovi ʼe toe liliu mai tona ala pea ke maʼuli”!​—Esekiele 33⁠:⁠11.

² ʼE tou maʼu koa te manatu ʼa Sehova ʼo ʼuhiga mo te hahaʼi? Ohage ko ia, kia tatou ʼe feala koa ki te hahaʼi ʼo te ʼu lanu pea mo te ʼu puleʼaga kehekehe ke nātou liliu ko ni “ ʼu ōvi ʼo tana gāueʼaga”? (Pesalemo 100⁠:3; Gaue 10⁠:​34, 35) Tou vakaʼi te ʼu faʼifaʼitaki e lua ʼo te maʼuhiga ʼaē ke tou maʼu te manatu ʼa te ʼAtua ki te faʼahi ʼaia. ʼI te ʼu faʼifaʼitaki ʼaia e lua, neʼe ʼamanaki hoko mai te fakaʼauha, pea neʼe foaki te fakatokaga fakatomuʼa ki te ʼu kaugana ʼa Sehova ʼo ʼuhiga mo te faʼahi ʼaia. ʼE maʼuhiga tāfito te ʼu faʼifaʼitaki ʼaia heʼe tou fakatalitali nei ki te ʼaho lahi ʼo Sehova.

Neʼe Maʼu e Apalahamo Te Manatu ʼa Sehova

3. Neʼe koteā te manatu ʼa Sehova ʼo ʼuhiga mo te hahaʼi ʼo Sotoma pea mo Komola?

³ Ko te ʼuluaki faʼifaʼitaki ʼe ko te pateliaka agatonu ko Apalahamo pea mo te ʼu kolo agakovi ko Sotoma mo Komola. ʼI te logo ʼa Sehova ki “te tagi mamahi ʼo ʼuhiga mo Sotoma pea mo Komola,” neʼe mole ina foimo tauteaʼi te ʼu kolo ʼaia pea mo te hahaʼi ʼaē neʼe nonofo ai. Neʼe ina fai muʼa tana ʼu kumi. (Senesi 18⁠:​20, 21) Neʼe ina fekauʼi te ʼu ʼaselo e toko lua ki Sotoma, pea neʼe nā nonofo ʼi te ʼapi ʼo te tagata agatonu ko Lote. ʼI te po ʼaē neʼe tau atu ai te ʼu ʼaselo, ko “te ʼu tagata ʼo te kolo . . . neʼe nātou ʼatakai te ʼapi, mai te tamasiʼi tagata ki te matuʼa, ko te hahaʼi fuli kua maʼopoʼopo,” he neʼe nātou fia fai ni ʼu felāveʼi fakasino heʼeʼaoga mo te ʼu ʼaselo. ʼE mahino ia, neʼe tonu ke fakaʼauha te hahaʼi ʼo te kolo, ʼuhi ko tonatou maʼuli fakalialia. Kae neʼe ʼui fēnei e te ʼu ʼaselo kia Lote: “ ʼE kei ʼi ai koa he tahi ʼi tou ʼapi? Ko tou foha, tau ʼu tama pea mo tou ʼu ʼofafine, pea mo nātou fuli ʼo tou loto fale ʼi te kolo, fakamavae nātou ʼi te koga meʼa ʼaenī!” Neʼe fakatuʼutuʼu e Sehova ke ina fakahāo ʼihi ʼi te kolo ʼaia, kae neʼe gata pe kia Lote pea mo tona ʼu ʼofafine e toko lua neʼe hāo ʼi te fakaʼauha ʼaia.​—Senesi 19⁠:​4, 5, 12, 16, 23-26.

4, 5. He koʼe neʼe fakakolekole e Apalahamo ʼo ʼuhiga mo te hahaʼi ʼo Sotoma, pea neʼe ʼalutahi koa tana manatu ʼo ʼuhiga mo te hahaʼi ohage ko Sehova?

⁴ Koia, tou toe vakaʼi age te temi ʼaē neʼe fakahā ai e Sehova tana ʼamanaki ʼaē ke ina fakaʼauha te ʼu kolo ko Sotoma mo Komola. ʼI te lakaga ʼaia neʼe kolekole fēnei age e Apalahamo: “Kapau la ʼe ʼi ai he toko nimagofulu agatonu ʼi te lotolotoiga ʼo te kolo. ʼE ke matehi anai koa ia nātou ʼaia pea ʼe mole ke fakamolemole anai ki te koga meʼa ʼaia ʼuhi ko te toko nimagofulu agatonu ʼaia ʼe nonofo ai? Kailoa ia, ʼe mole ko he meʼa ʼe tau mo koe ke ke fai te aga ʼaenī, ke ke matehi fakatahi te tagata faitotonu pea mo ia ʼaē ʼe agakovi, ke tatau te gaohi ʼa te tagata faitotonu pea mo te tagata agakovi. Kailoa ia, ʼe mole ko he meʼa ʼe tau mo koe. Ko te Tuʼi Fakamāu ʼo te kele katoa ʼe mole ina fai anai koa te meʼa ʼaē ʼe totonu?” Neʼe fakaʼaogaʼi tuʼa lua e Apalahamo te palalau ʼaenī, “ ʼe mole ko he meʼa ʼe tau mo koe.” ʼAki te ʼu meʼa ʼaē neʼe kua sio kiai ʼi tona maʼuli, neʼe ʼiloʼi e Apalahamo ko Sehova ʼe mole ina fakaʼauha fakatahi anai te tagata faitotonu pea mo te tagata agakovi. ʼI te temi ʼaē neʼe ʼui ai e Sehova ʼe mole ina fakaʼauha anai Sotoma mo kapau ʼe ʼi ai he “toko nimagofulu agatonu ʼi te lotolotoiga ʼo te kolo,” neʼe faka hifohifo māmālie e Apalahamo te kaugamālie ʼo te hahaʼi ʼo aʼu ki te toko hogofulu.​—Senesi 18⁠:​22-33.

⁵ Kanapaula neʼe mole ʼalutahi te ʼu kolekole ʼa Apalahamo mo te manatu ʼa Sehova, ʼe fakalogo anai koa ia Sehova ki ai? Kailoa ia. ʼI tona ʼuhiga “kaumeʼa ʼo Sehova,” neʼe lagi mahino pea mo manatu tahi ia Apalahamo mo Ia. (Sakopo 2⁠:​23, MN ) ʼI te sivisivi ʼaē e Sehova ia Sotoma mo Komola, neʼe ina tali leleiʼi te ʼu kolekole ʼa Apalahamo. Koteā tona tupuʼaga? Koteʼuhi ko tatatou Tāmai ʼe “mole ina loto ke fakaʼauha he tahi kae ʼe loto ia ke aʼu te hahaʼi fuli ki te fakahemala.”

Neʼe Fefeka Te Manatu ʼa Sonasi ʼo ʼUhiga Mo Te Hahaʼi

6. Neʼe koteā ʼaē neʼe fai e te kau Ninive ʼi tanatou logo ki te fai faka mafola ʼa Sonasi?

⁶ Ko te lua faʼifaʼitaki ʼe ko Sonasi. ʼI te faʼifaʼitaki ʼaia neʼe tonu ke fakaʼauha ia te kolo ko Ninive. Neʼe tonu ke ʼalu te polofeta ko Sonasi ʼo faka mafola neʼe kua ‘aʼu kia muʼa ʼo Sehova’ ia te agakovi ʼo te kolo ʼaia. (Sonasi 1⁠:⁠2) Ko Ninive neʼe ko te kolo lahi, he neʼe “ ʼaho tolu tona haʼeleʼi.” ʼI te temi leva ʼaē neʼe fakalogo ai Sonasi pea neʼe hū ki Ninive, neʼe ina tala fēnei: “ ʼE kei toe pe ʼaho e fāgofulu, pea ʼe fakaʼauha anai ia Ninive.” ʼOsi ʼaia, “ko te ʼu tagata ʼo Ninive neʼe nātou kamata tui ki te ʼAtua, pea neʼe nātou fakatuʼutuʼu ke fai he sesunio pea neʼe nātou kofuʼi ia nātou ʼaki te ʼu taga.” Māʼiape la mo te hau ʼo Ninive neʼe fakahemala.​—Sonasi 3⁠:​1-6.

7. Neʼe koteā te manatu ʼa Sehova ʼo ʼuhiga mo te fakahemala ʼa te kau Ninive?

⁷ Neʼe kehekehe ʼosi ia mo te tali ʼaē neʼe fai ki Sotoma! Neʼe tali feafeaʼi e Sehova ia te fakahemala ʼa te kau Ninive? ʼE ʼui fēnei ia Sonasi 3⁠:10: “Neʼe fakahemala ia te ʼAtua moʼoni ʼo ʼuhiga mo te tautea ʼaē neʼe ina fakatuʼutuʼu ke ina fakahoko kia nātou; pea neʼe mole ina fakahoko.” Neʼe “fakahemala” Sehova, ko tona faka ʼuhiga neʼe ina fetogi tana fakatuʼutuʼu ʼo ʼuhiga mo te kau Ninive, koteʼuhi neʼe nātou fetogi tonatou ʼu ala. Ko te ʼu lekula fakaʼatua neʼe mole fetogi, kae ko Sehova neʼe ina fetogi tana fakatuʼutuʼu ʼi tana sio ʼaē neʼe fakahemala te kau Ninive.​—Malakia 3⁠:⁠6.

8. He koʼe neʼe lotomamahi ia Sonasi?

⁸ ʼI te sio ʼa Sonasi ʼe mole fakaʼauha anai ia Ninive, neʼe tatau koa tana manatu mo te manatu ʼa Sehova? Kailoa, heʼe tou lau fēnei: “Kae neʼe mamahi ʼaupito ai ia Sonasi pea neʼe ʼita lahi.” Koteā te tahi meʼa neʼe fai e Sonasi? ʼE ʼui fēnei e te hisitolia: “Neʼe faikole kia Sehova pea mo ʼui maʼana: ‘Ê Sehova, neʼe mole lelei age koa taku nofo ʼi toku fenua? Ko te tupuʼaga la ʼaia ʼo taku hola ki Talesi; koteʼuhi neʼe ʼau ʼiloʼi ko koe ko te ʼAtua agaʼofa, manavaʼofa, tuai ʼi te ʼita pea mo mahu ʼi te ʼofa, pea ʼe ke fakahemala ʼo ʼuhiga mo te malaʼia.’ ” (Sonasi 4⁠:​1, 2) Neʼe ʼiloʼi e Sonasi te ʼu kalitate ʼo Sehova. Kae ʼi te lakaga ʼaia, neʼe lotomamahi te polofeta pea neʼe mole ina maʼu te manatu ʼa te ʼAtua ʼo ʼuhiga mo te fakahemala ʼa te hahaʼi ʼo Ninive.

9, 10. (a) Koteā te ako neʼe foaki e Sehova kia Sonasi? (b) He koʼe ʼe tou lava ʼui neʼe tali ki muli age e Sonasi te manatu ʼa Sehova?

⁹ Neʼe mavae ia Sonasi ʼi Ninive, pea neʼe ina faʼu tona kiʼi malumaluʼaga, pea neʼe nofo ai “ ʼo aʼu ki tana sio pe koteā anai te meʼa ka hoko ki te kolo.” Neʼe fakahomo e Sehova te kiʼi fuʼu ʼakau moʼo fakamalumaluʼi ia Sonasi. Kae ʼi te ʼaho ake, neʼe moamoa te kiʼi fuʼu ʼakau. ʼI te temi ʼaē neʼe ʼita ai Sonasi ki te faʼahi ʼaia, neʼe ʼui fēnei age e Sehova: “Ko koe neʼe ke ʼofa mamahi ki te kiʼi fuʼu ʼakau . . . Kae kia te ʼau, ʼe mole tonu koa la ke ʼau ʼofa mamahi ki Ninive, te kolo lahi ʼaē ʼe nonofo ai te toko teau ʼuafulu afe tupu, ʼaē ʼe mole nātou ʼiloʼi te kehekehe ʼo tonatou nima mataʼu pea mo tonatou nima hema, ʼo mole lau ia te ʼu tuʼula manu lalata?” (Sonasi 4⁠:​5-11) ʼE ko he ako lelei kia Sonasi ʼo ʼuhiga mo te manatu ʼaē ʼe maʼu e Sehova ki te hahaʼi!

¹⁰ ʼE mole tou ʼiloʼi te tali ʼaē neʼe fai e Sonasi ki te ʼu palalau ʼa te ʼAtua ʼo ʼuhiga mo tona ʼofa ʼaē ki te hahaʼi ʼo Ninive. Kae ʼe mahino ia neʼe fakatonutonuʼi e te polofeta tana manatu ʼaē ki te kau Ninive ʼaē neʼe fakahemala. ʼE feala ke tou manatu feiā, he neʼe fakaʼaogaʼi e Sehova ia ia ke ina tohi te hisitolia ʼaia.

Koteā Takotou Manatu?

11. E feafeaʼi ʼapē te manatu ʼa Apalahamo ki te hahaʼi ʼo te temi ʼaenī?

¹¹ Ia ʼaho nei, ʼe tou ʼamanaki ki te tahi fakaʼauha​—te fakaʼauha ʼo te tuʼu ʼo te ʼu faʼahiga meʼa agakovi ʼaenī ʼi te ʼaho lahi ʼo Sehova. (Luka 17⁠:​26-30; Kalate 1⁠:4; 2 Petelo 3⁠:10) E feafeaʼi ʼapē te sio ʼa Apalahamo ki te hahaʼi ʼo te mālama ʼaenī ʼaē ka vave fakaʼauha? ʼE lagi faiga anai ke ina maʼu ia nātou ʼaē ʼe heʼeki nātou logo ki “te logo lelei . . . ʼo te puleʼaga.” (Mateo 24⁠:​14, MN ) Neʼe kole liuliuga e Apalahamo ki te ʼAtua ke hāofaki te kau faitotonu ʼaē neʼe nonofo ʼi Sotoma. ʼE tou tokaga koa ke hāofaki te hahaʼi ʼo te malamanei ʼaē ʼe puleʼi e Satana pea mo nātou līaki tonatou ʼu ala mo kapau ʼe nātou maʼu te fealagia ʼaē ke nātou fakahemala pea mo tauhi ki te ʼAtua?​—1 Soane 5⁠:19; Apokalipesi 18⁠:​2-4.

12. He koʼe ʼe faigafua hatatou manatu ohage ko Sonasi ʼo ʼuhiga mo te hahaʼi ʼaē ʼe tou felāveʼi mo nātou ʼi te minisitelio, pea koteā ʼaē ʼe tonu ke tou fai ʼo ʼuhiga mo te manatu ʼaia?

¹² ʼE mole kovi hatatou fakaʼamu ki te fakagata ʼo te agakovi. (Hapakuke 1⁠:​2, 3) Kae ʼe faigafua hatatou manatu ohage ko Sonasi, ʼo mole tou tokaga ki te maʼuli ʼo te hahaʼi ʼaē ʼe feala ke nātou fakahemala. ʼE moʼoni tāfito te faʼahi ʼaia mo kapau ʼe tou faka mafola te logo ʼo te Puleʼaga ki ni ʼu hahaʼi ʼe mole nātou fia logo, ʼe nātou fakafeagai, peʼe nātou agamālohi. ʼE lagi mole tou tokakaga ki te hahaʼi ʼaē ʼe fia fakamavae mai e Sehova mai te tuʼu agakovi ʼaenī. (Loma 2⁠:⁠4) Kapau ʼe tou fakatokagaʼi ʼe tou hage ko Sonasi ʼo ʼuhiga mo te kau Ninive, pea tou faikole ke tou faka ʼalutahi ia tatatou manatu mo ʼaē ʼa Sehova.

13. He koʼe ʼe feala hatatou ʼui ko Sehova ʼe ʼofa ki te hahaʼi ʼo totatou temi?

¹³ ʼE ʼofa Sehova ki te hahaʼi ʼaē ʼe heʼeki tauhi kia te ia, pea ʼe fakalogo ki te ʼu faikole ʼo tana hahaʼi ʼaē kua kaugana kia te ia. (Mateo 10⁠:11) Ohage la, “ ʼe ina fai anai he [meʼa] ʼe totonu” moʼo tali ki tanatou ʼu faikole. (Luka 18⁠:​7, 8, MN ) Tahi ʼaē meʼa, ʼi tona temi totonu ʼe fakahoko anai e Sehova tana ʼu fakapapau fuli pea mo tana ʼu fakatuʼutuʼu. (Hapakuke 2⁠:⁠3) ʼE ina molehi anai te kau agakovi fuli ʼi te kele, ohage ko tana fakaʼauha ia te hahaʼi ʼo Ninive ʼuhi ko tanatou toe agakovi.​—Naume 3⁠:​5-7.

14. Koteā ʼaē ʼe tonu ke tou fai ʼi muʼa ʼo te hoko mai ʼo te ʼaho ʼo Sehova?

¹⁴ ʼO aʼu ki te pulihi ʼo te tuʼu agakovi ʼaenī ʼi te ʼaho lahi ʼo Sehova, ʼe tou faʼa kātaki koa ʼo fakatalitali, ʼo tou maʼumaʼua ʼo fai tona finegalo? ʼE mole tou ʼiloʼi te ʼu ʼaluʼaga fuli ʼo te fai faka mafola ʼaē kei toe ke fakahoko ʼi muʼa ʼo te hoko mai ʼo te ʼaho ʼo Sehova, kae ohage ko tona fakatotonu mai e te ʼAtua, ʼe tou ʼiloʼi ko te logo lelei ʼo te Puleʼaga ʼe tonu ke faka mafola ʼi te kele katoa ʼi muʼa ʼo te hoko mai ʼo te fakaʼosi. Pea ʼe mahino papau ia ʼe tonu ke tou tokaga ʼo ʼaumai te “ ʼu meʼa manakoʼia” ke hoko atu e Sehova tana faka kolōliaʼi ʼo tona ʼapi.​—Asea 2⁠:⁠7.

ʼE Tou Fakahā ʼi Tatatou ʼu Gāue Tatatou Manatu

15. Koteā ʼaē ʼe ina lava fakatuputupu tatatou faka maʼuhiga te gāue fai faka mafola?

¹⁵ ʼE lagi tou nonofo ʼi he koga meʼa ʼe mole heʼeki tali leleiʼi ai te gāue fai faka mafola, pea ʼe faigataʼa hatatou ʼalu ki he potu ʼe ʼaoga tāfito kiai ni ʼu kaugā fagona ʼo te Puleʼaga. Koutou fakakaukauʼi age muʼa mo kanapaula ʼe ko he toko hogofulu ʼe maʼu ʼi totatou telituale ʼi muʼa ʼo te fakaʼosi. ʼE tou manatu koa ʼe tau mo feʼauga ke tou kumi ia nātou? Ko Sesu neʼe “ ʼofa mamahi” ki te hahaʼi “he neʼe nātou ʼāhua pea mo mavetevete, ohage he faga ōvi ʼe mole honatou tagata tauhi.” (Mateo 9⁠:​36, MN ) Ka tou ako te Tohi-Tapu pea mo lau fakalelei te ʼu alatike ʼo Te Tule Leʼo pea mo te Réveillez-vous !, ʼe feala ai ke tou maʼu he fakasiosio loloto ʼi te mālama fakaʼofaʼofa ʼaenī. Pea ko te faʼahi ʼaia, ʼe ina lava fakatuputupu tatatou faka maʼuhigaʼi te maʼua ʼaē ke faka mafola te logo lelei. Tahi ʼaē meʼa, ko te fakaʼaogaʼi lelei ʼo te ʼu tohi faka Tohi-Tapu ʼaē ʼe tufa mai e “te tagata kaugana agatonu mo poto,” ʼe toe kau ki te fakalotoʼi ʼo te hahaʼi ʼo te ʼu telituale ʼaē ʼe tou tau fai.​—Mateo 24⁠:​45-47, MN; 2 Timoteo 3⁠:​14-17.

16. ʼE tou lava hikihiki feafeaʼi totatou minisitelio?

¹⁶ Ko tatatou tokaga ki te hahaʼi ʼaē kei feala ke nātou tali te logo ʼo te Tohi-Tapu, ʼe ina uga tatou ke tou vakavakaʼi te ʼu temi kehekehe pea mo te ʼu ʼaluʼaga ʼaē ʼe ʼaoga moʼo faka mafola ki te hahaʼi ʼi totatou minisitelio. Ka tou fai faka mafola, ʼe lahi koa te hahaʼi ʼaē ʼe mole tou maʼu atu kiō nātou? Kapau koia, ʼe lagi feala ke tou hikihiki te lelei ʼo totatou minisitelio, ʼo fetofetogi te ʼu temi pea mo te ʼu faʼahi ʼaē ʼe tou fai fagonogono ai. Ko te kau tautai ʼe nātou ʼolo ʼo gelu ʼi te ʼu temi ʼaē ʼe feala ai ke nātou maʼu he ʼu ika. ʼE feala koa ke tou fai feiā ʼi tatatou gelu fakalaumālie? (Maleko 1⁠:​16-18) He koʼe ʼe mole tou ʼahiʼahi te fagonogono ʼi te ʼu afiafi, pea mo fai fagonogono ʼi te telefoni, mokā ko he ʼu ʼaluʼaga ʼe fakagafua e te puleʼaga? Ko ʼihi neʼe nātou ʼui ʼe lelei tanatou gāue fai faka mafola ʼi te ʼu taulaga motokā, te ʼu taulaga kā, te ʼu ʼutuʼaga penesini, pea mo te ʼu fale koloā. Ka tou fagonogono faigamālie, pea ʼe tou fakahā ai ʼe tou maʼu te manatu ʼa Apalahamo ʼo ʼuhiga mo te hahaʼi.

17. Koteā ʼaē ʼe feala ke tou fai moʼo fakaloto mālohiʼi te kau misionea pea mo ʼihi ʼaē ʼe gāue ʼi te ʼu fenua tai?

¹⁷ Ko te tokolahi ʼaupito ʼe mole heʼeki nātou logo ki te Puleʼaga. ʼO hilifaki ki tatatou fai faka mafola, ʼe feala koa ke tou tokakaga ki te hahaʼi ʼo totatou famili ʼaē kua mavae ʼi totatou loto fale? ʼE tou ʼiloʼi koa he ʼu misionea peʼe ko ni ʼu minisi gāue temi katoa ʼe nātou gāue ʼi te ʼu fenua tai? Kapau ʼe tou ʼiloʼi hotatou ʼu tēhina pea mo tuagaʼane feiā, tou faitohi kia nātou ʼo fakahā kia nātou ia tatatou fakafetaʼi ki tanatou gāue. ʼE koutou lava fakahā feafeaʼi hakotou tokaga feiā ki te hahaʼi? ʼE feala ki tatatou ʼu tohi fakaloto mālohi pea mo fakavikiviki ke nātou fakaloto mālohiʼi te kau misionea ke hoko atu tanatou ʼu gāue, ʼo nātou tokoni ki te hahaʼi tokolahi ke nātou ako te moʼoni. (Kau Fakamāu 11⁠:40) ʼE toe feala pe foki ke tou faikole maʼa te kau misionea pea mo te hahaʼi ʼaē ʼe nātou fia ʼiloʼi te moʼoni ʼi he tahi ʼu fenua. (Efeso 6⁠:​18-20) ʼE tou toe fakahā tatatou tokaga ʼaki te ʼu meʼa ʼofa ʼaē ʼe tou foaki ki te gāue faka malamanei ʼa te kau Fakamoʼoni ʼa Sehova.​—2 Kolonito 8⁠:​13, 14; 9⁠:​6, 7.

ʼE Feala Koa Hakotou ʼOlo Ki He Tahi Fenua?

18. Koteā ʼaē neʼe fai e ʼihi Kilisitiano moʼo fakatuputupu te ʼu gāue ʼo te Puleʼaga ʼi te ʼu fenua ʼaē ʼe nātou nonofo ai?

¹⁸ Neʼe tapuakina ia nātou ʼaē neʼe ʼolo ki te ʼu koga meʼa ʼe ʼaoga lahi kiai he kau fai faka mafola, ʼuhi ko te ʼu sakilifisio ʼaē neʼe nātou fai moʼo fakahoko ia te faʼahi ʼaia. Kae ko ʼihi Fakamoʼoni ʼa Sehova logola neʼe mole nātou mavae ʼi tonatou ʼu fenua, kae neʼe nātou ako he tahi lea ke feala hanatou tokoni ki te hahaʼi ʼaē ʼe feholaki mai ʼihi fenua. ʼE mahino ia neʼe fakapale te ʼu taʼi faiga ʼaia. Ohage la, ko te ʼu Fakamoʼoni e toko fitu neʼe nātou tokoni ki te kau Siaina ʼi te kolo ʼi Texas, ʼi Amelika, neʼe nātou fakaafe te toko 114 ki te ʼAho Fakamanatu ʼo Te ʼAliki ʼi te taʼu 2001. Ko nātou ʼaē neʼe nātou fai te taʼi tokoni ʼaia, neʼe nātou sio ai kua lelei tonatou telituale ki te taʼukai.​—Mateo 9⁠:​37, 38.

19. Koteā ʼaē ʼe lelei ke tou fai mo kapau ʼe tou fakatuʼutuʼu ke tou ʼolo ki he tahi fenua moʼo lagolago ki te gāue faka mafola ʼo te Puleʼaga?

¹⁹ Lagi ko koutou pea mo tokotou famili ʼe koutou sio ʼe feala hakotou ʼolo ki he koga meʼa ʼe ʼaoga lahi ai he kau fai faka mafola ʼo te Puleʼaga. ʼUluaki, tou “nofo ifo muʼa ki lalo ʼo lau te paʼaga ka puli anai kiai.” (Luka 14⁠:​28, MN ) ʼE moʼoni tāfito te faʼahi ʼaia mo kapau ʼe fia ʼalu he tahi ki he tahi fenua. Ko he tahi ʼe ina fia fakahoko he fakatuʼutuʼu feiā, ʼe feala ke ina fai te ʼu fehuʼi ʼaenī: ‘ ʼE feala anai koa ke ʼau taupau toku famili? ʼE feala koa ke ʼau maʼu hoku pepa fakagafua ke ʼau nofo ʼi te fenua ʼaia? ʼE ʼau ʼiloʼi koa te lea ʼo te fenua, peʼe ʼau fia ako koa te lea ʼaia? ʼE ʼau feafeaʼi ʼo ʼuhiga mo te ʼaele ʼo te fenua pea mo tana agaʼi fenua? ʼE ʼau liliu anai koa ko “he tokoni ʼe fakaloto mālohi”, peʼe ʼau liliu anai ko he kavega ki toku ʼu tēhina mo tuagaʼane ʼo te fenua ʼaia?’ (Kolose 4⁠:​10, 11, MN ) ʼE tonu ke tou fai he ʼu kumi ke lahi ʼo ʼuhiga mo te fenua ʼaē ʼe tou fia ʼolo kiai, pea ʼe lagi lelei ke tou faitohi ki te filiale ʼa te kau Fakamoʼoni ʼa Sehova ʼo te koga meʼa ʼaia.a

20. Koteā ʼaē neʼe fai e te Kilisitiano kei tūpulaga moʼo tokoni ki tona ʼu tēhina mo tuagaʼane ʼi te tahi fenua?

²⁰ Neʼe kau te Kilisitiano ki te laga ʼo te ʼu Fale ʼo Te Puleʼaga ʼi Saponia, pea neʼe logo ʼe ʼaoga he kau gāue faiva moʼo laga he fale tauhi ʼi Palakuai. Neʼe ʼalu ki te fenua ʼaia he neʼe kei ʼeva pea mo mālohi, pea logola tana tokotahi ʼi tona ʼuhiga tagata gāue temi katoa, kae neʼe gāue ai ia māhina e valu. ʼI tana nofo ai, neʼe ina ako te lea faka Sepania, pea mo fai ia te ʼu ako Tohi-Tapu. Neʼe toe mahino kia ia neʼe ʼaoga ki te fenua ʼaia he ʼu kaugā fagona ʼo te Puleʼaga. Logola tana toe liliu ki Saponia, kae mole tuai pea neʼe toe liliu ki Palakuai ʼo tokoni ki te ʼaumai ʼo te hahaʼi ki te Fale ʼo Te Puleʼaga ʼaia.

21. Koteā ʼaē ʼe tonu ke tou tokakaga tāfito kiai, pea koteā tatatou manatu mo kapau ʼe tou talitali ki te ʼaho lahi ʼo Sehova?

²¹ ʼE sio anai te ʼAtua ʼe fakahoko katoa ia te fai faka mafola, ʼo mulimuli ki tona finegalo. Ia ʼaho nei, ʼe ina fakavaveʼi te fakaʼosi ʼo te taʼukai fakalaumālie. (Isaia 60⁠:22) Koia kapau ʼe tou talitali ki te ʼaho ʼo Sehova, tou faʼafai ʼo kau ki te taʼukai, ʼo tou manatu ki te hahaʼi, ohage ko totatou ʼAtua ʼofa.

[Kiʼi nota]

Kei Koutou Manatuʼi Koa?

• Kapau ʼe tou fakatalitali ki te ʼaho ʼo Sehova, e feafeaʼi anai tatatou sio ki te hahaʼi?

• Neʼe koteā te manatu ʼa Apalahamo ʼo ʼuhiga mo te kau faitotonu ʼaē neʼe feala ke hāofaki ʼi Sotoma?

• Neʼe feafeaʼi te manatu ʼa Sonasi ʼo ʼuhiga mo te kau Ninive ʼaē neʼe fakahemala?

• ʼE tou lava fakahā feafeaʼi ʼe tou maʼu te manatu ʼa Sehova ʼo ʼuhiga mo te hahaʼi ʼaē heʼeki nātou logo ki te logo lelei?

[Paki ʼo te pasina 16]

Neʼe tatau te sio ʼa Apalahamo ki te hahaʼi ohage ko Sehova

[Paki ʼo te pasina 17]

Neʼe maʼu leva e Sonasi te sio ʼa Sehova ʼo ʼuhiga mo te kau Ninive ʼaē neʼe fakahemala

[Paki ʼo te pasina 18]

Ka tou tokaga ki te hahaʼi pea ʼe ko he faʼahi ʼe ina uga anai tatou ke tou vakavakaʼi te ʼu temi pea mo te ʼu ʼaluʼaga ʼaē ke tou faka mafola ai te logo lelei