Te ʼu Fehuʼi ʼa Te Kau Lautohi

ʼI te faikole ʼo te Tāmai ʼe ʼi selo, neʼe ʼui koa e Sesu neʼe kua hoko te finegalo ʼo te ʼAtua ʼi te lagi logola neʼe mole heʼeki kapu ifo ia te kau ʼaselo agakovi?

Ohage ko tona fakamatala ia Mateo 6:​10, neʼe ʼui fēnei e Sesu: “Ke fai tou finegalo i te kelekele o hage ko Selo.” ʼI te faikole ʼaia, ʼe feala pe ke tou maʼu he ʼu faʼahiga fakamahino e lua. ʼE feala pe ke tou ʼuluaki mahino, ʼe ko he kole ke fakahoko ia te finegalo ʼo te ʼAtua ʼi te kele ohage ko tona kua hoko ʼi te lagi, pea lua leva, ʼe feala pe ke faka ʼuhiga ohage ko he kole ke fakahoko katoa ia te finegalo ʼo te ʼAtua ʼi te lagi pea mo te kele. Ko te ʼu palalau ʼaē neʼe fai e Sesu ʼi muʼa atu ʼo tana ʼui ʼaē “ke aumai tau pule,” ʼe fakahā ai ko te lua fakamahino ʼe ʼalutahi mo te manatu tāfito ʼo te Tohi-Tapu. Pea ʼe ʼiloga ʼi te ʼu palalau ʼaia te ʼaluʼaga ʼo te temi ʼaē neʼe nofo ai ia Sesu ʼi te kele pea mo te temi loaloaga ʼaē ki muli age. ʼO feafeaʼi?

ʼE fakahā e te tohi ʼo te Apokalipesi te ʼu ikuʼaga kehekehe e lua ʼo te fakatuʼu ʼo te Puleʼaga ʼo te ʼAtua ʼi te lagi. Ko tona ʼuluaki ikuʼaga ʼe ʼi ai tona ʼu fua ki te lagi, pea ko tona lua, ki te kele. ʼE ʼui fēnei e Apokalipesi 12:​7-9, 12: “Pea nee fai he tau i te lagi, ko Mikaele mo tana kau aselo e natou taui te talakone. Pea nee tau te talakone mo tana kau aselo, kae nee mole malo: nee mole mau honatou nofoʼaga i te lagi. Pea nee li ifo te talakone lahi, te gata afea, iaʼia e higoa ko ‘Tiapolo mo Satana’ te Fakahalahala o te malama-nei katoa, nee li ifo iaʼia ki te kelekele fakatahi mo ana aselo. Koia, koutou fiafia, ia koutou e i selo pea mo koutou e mau nofoaga i ai! Malaia ki te kelekele pea mo te tai, koteuhi kua hifo ifo kia koulua te tiapolo mo he hauhau fakamataku, i tana iloi ko te temi siʼi kei toe kia te ia.”

Ko te kapu ifo ʼo Satana mo te kau temonio mai te lagi ʼi te taʼu 1914 neʼe fakamaʼa ai te lagi mai te ʼu laumālie agatuʼu fuli, ʼo fiafia lahi ai te kau ʼaselo, te ʼu foha agatonu ʼo Sehova, ʼaē neʼe nātou kaugamālie age. (Sopo 1:​6-​12; 2:​1-7; Apokalipesi 12:10) Koia neʼe hoko ia te kole ʼa Sesu ʼi te faikole ʼo te Tāmai ʼe ʼi selo, ke fakahoko ia tona finegalo ʼi selo. Ko nātou fuli ʼaē ʼe kei nonofo ʼi selo ʼe nātou agatonu kia Sehova pea mo nātou fakalogo katoa ki tana pule faʼitaliha.

Tou tokagaʼi te puani maʼuhiga ʼaenī: logola neʼe kei feala ki te kau ʼaselo agakovi ke nātou hū ki te lagi, kae ʼi te temi ʼaia neʼe kua kapu ia nātou mai te famili ʼo te ʼAtua pea neʼe ʼi ai te ʼu tuʼakoi neʼe tonu ke nātou mulimuli kiai. Ohage la, ʼe fakahā ia Suta ʼi te vaega 6 ʼi te ʼuluaki sēkulō ʼo totatou temi, “i te hili o tonatou seiniʼi o talu ai i te fakapouli [fakalaumālie], e ina taupau natou ki te fakamau o te Aho Fakamuli.” ʼO toe feiā pe, ʼe ʼui fēnei e 2 Petelo 2:4 (MN ): “Neʼe mole tuku feiāʼi e te ʼAtua te ʼu ʼaselo ʼaē neʼe agahala, kae neʼe ina tautea nātou, ʼo lī nātou ki te Taletale [tonatou ʼuhiga ʼaē kua fakatō laloʼi ia nātou], neʼe na tuku nātou ki te ʼu luo fakapōʼuli mātolu [fakalaumālie], koteʼuhi ke tāʼofi nātou ki te fakamāu.”a

ʼI tonatou kehekehe mo te temi ʼaē neʼe kua fakatō laloʼi ai ia nātou kae neʼe kei nātou nonofo ʼi selo, ko te kau ʼaselo agakovi kua lahi tanatou pule ki te kele. ʼI tona fakahagatonu, ʼe fakahigoaʼi e te Folafola ʼa te ʼAtua ia Satana ko “te pule o te malama-nei” pea ʼe ina fakahigoaʼi te kau temonio, ʼe ko “te u aliki pule o te malama aeni o te fakapouli.” (Soane 12:31; Efeso 6:​11, 12; 1 Soane 5:​19) ʼAki tana tuʼulaga ʼaia, neʼe lava foaki age e te Tevolo kia Sesu “ia te puleaga o te malama-nei mo onatou kololia,” mo kapau neʼe ina fai age kia ia he atolasio e tahi. (Mateo 4:​8, 9) Koia ʼe mahino mai, mokā “aumai” anai, peʼe hoko mai anai te Puleʼaga ʼo te ʼAtua ki te kele, pea ʼe hoko ai anai he ʼu fetogi katoa.

Ko te “aumai,” peʼe ko te hoko mai ʼo te Puleʼaga ʼo te ʼAtua ki te kele ʼe iku ai anai ki he fakatuʼu ʼo he malamanei foʼou. Ko te Puleʼaga ʼaia ʼe ina laliki anai te ʼu puleʼaga fakatagata fuli pea ʼe liliu anai ko te puleʼaga pe ʼaia e tahi ʼe pule ki te kele. ʼI te temi ʼaia, ʼe faʼufaʼu anai “he kele foou” e tana hahaʼi fakalogo, ia te hahaʼi ʼaē ʼe manavasiʼi ki te ʼAtua. (2 Petelo 3:​13; Taniela 2:​44) ʼE toe molehi anai e te Puleʼaga mo te agahala mai te hahaʼi fakalogo, pea mo fakaliliu ai te kele katoa ko he palatiso, ʼo pulihi fuli te ʼu faʼahiga pule kehekehe ʼa Satana.​—Loma 8:​20, 21; Apokalipesi 19:⁠17-​21.

ʼI te fakaʼosi ʼo Te ʼu Taʼu e Afe, mokā fakahoko katoa anai te finegalo ʼo te ʼAtua e te Puleʼaga Faka Mesia, “pea e tukuʼage anai e te Alo iaʼia totonu kia Ia ae nee ina tuku ki ai te meafuape, koteuhi ke afio katoa te Atua i te meafuape.” (1 Kolonito 15:28) Pea hoa anai kiai ia he ʼahiʼahi fakaʼosi, pea hili ʼaia ko Satana, mo tana kau temonio, pea mo te kau agatuʼu fuli pe ʼaē neʼe fakahēʼi, ʼe pulihi anai ia nātou ʼo talu ai ʼi “te lua mate.” (Apokalipesi 20:​7-​15) Hili ʼaia, pea ko nātou fuli ʼaē ʼe maʼuʼuli ʼi te lagi pea mo te kele, ʼe nātou fakalogo fakafiafia anai ʼo talu ai ki te pule faʼitaliha pea mo ʼofa ʼa Sehova. ʼE feala ai leva ke ʼui, kua hoko katoa te ʼu palalau ʼa Sesu ʼaē neʼe ina fai ʼi te faikole ʼo te Tāmai ʼe ʼi selo.​—1 Soane 4:​8.

[Kiʼi nota]