Te ʼu Fehuʼi ʼa Te Kau Lautohi
ʼE nonofo anai ia ʼifea te kau temonio lolotoga te ʼAfio ʼa Kilisito ia Taʼu e Afe?
ʼE mole maʼu he tali fakahagatonu ki te fehuʼi ʼaia. Kae ʼe feala pe ke tou ʼiloʼi ia te koga meʼa ʼaē ka nonofo ai ia te kau temonio lolotoga te ʼAfio ʼa Kilisito ia Taʼu e Afe.
ʼI te sio fakatomuʼa ʼa te ʼapositolo ko Soane ki te meʼa ʼaē ka hoko ʼi te kamataʼaga pea mo te fakaʼosi ʼo te ʼu Taʼu ʼaia e Afe, neʼe ina ʼui fēnei: “Nee au mamata ki he aselo nee hifo mai te lagi. Nee ina toʼo i tona nima te kalavi o te vanu pea mo he seini lahi. Nee kapa ia ki te talakone, te gata afea, ia te Tiapolo pea ko Satana, pea nee ina seiniʼi kia taù e afe. Nee ina atufi ia ki te vanu, nee ina tapunu pea mo fakamaù ia i ai, ke aua naa ina toe fakahalai te u puleaga o kaku ki te katoa o taù e afe. Pea hili ia, e maua ke vetekiʼage i he temi siʼi.” (Apokalipesi 20:1-3) ʼE fakamatala ʼi te ʼu vaega ʼaenī te lī ʼo Satana ki te vanu pea mo tona toe tuku age ki muli mai ʼi he kiʼi temi nounou. Logola ʼe mole talanoa ai ʼo ʼuhiga mo te kau temonio, kae ʼe mahino mai ko te ʼaselo ʼaē ʼe nofo mo te kalavi ʼo te vanu, ia Sesu Kilisito ʼaē kua faka kolōliaʼi, ʼi te temi ʼaē ka ina puke ai pea mo ina lī ia te Tevolo ki te vanu, ʼe ina toe fai feiā anai ki te kau temonio.—Apokalipesi 9:11.
ʼI tona fakanofo Hau ʼi te taʼu 1914, neʼe fai e Sesu Kilisito ia te gāue neʼe fua kovi kia Satana mo tana kau temonio. ʼE ʼui fēnei ia Apokalipesi 12:7-9: “Nee fai he tau i te lagi, ko Mikaele mo tana kau aselo e natou taui te talakone. Pea nee tau te talakone mo tana kau aselo [te kau temonio], kae nee mole malo: nee mole mau honatou nofoʼaga i te lagi. Pea nee li ifo te talakone lahi, te gata afea, iaʼia e higoa ko ‘Tiapolo mo Satana’ te fakahalahala o te malama-nei katoa, nee li ifo iaʼia ki te kelekele fakatahi mo ana aselo.” Talu mai ai, kua fakatuʼakoi kia Satana mo tana kau temonio ke nātou nonofo ʼi te ʼu tafaʼaki ʼo te kele. ʼE mahino mai kia tatou, ʼi te temi ʼaē ka fakasiʼisiʼi ai anai e Sesu Kilisito ia te gāue ʼa Satana moʼo faka ʼāteaina ia te kele mai tana ʼu fakahala, ʼe Ina toe fai feiā pe anai ki te kau temonio.
Koutou tokagaʼi ia te ʼuluaki lea faka polofeta ʼi te Tohi-Tapu. ʼE tou lau fēnei ai: “ ʼE au [te ʼAtua] tuku anai he fehiʼa ia koe [ia Satana] mo te fafine [te kautahi ʼa Sehova ʼi selo], ʼi tou hāko [ʼo Satana] pea mo tona hāko [ia Sesu Kilisito]. Pea ʼe ina maumauʼi anai koe ʼi tou ʼulu pea ʼe ke maumauʼi anai ia ia ʼi tona muliʼi vaʼe.” (Senesi 3:15) Ko te maumauʼi ʼo te ʼulu ʼo te gata, ʼe fakapipiki kiai mo te lī ʼo Satana ki te vanu lolotoga te ʼAfio ʼa Kilisito ia Taʼu e Afe. ʼE toe ʼui e te lea faka polofeta, ʼe ʼi ai te fehiʼa ia Ia ʼaē ʼe ina maumauʼi te ʼulu ʼa te gata pea mo te hāko ʼo Satana. ʼI te hāko ʼaia, peʼe ko te kautahi ʼaia, ʼe kau ai te kau ʼāselo agakovi, peʼe ko te kau temonio. Koia ʼe feala hatatou ʼui, ʼi te temi ʼaē ka lī ai e Sesu ia Satana ki te vanu, ʼe ina toe lī kiai mo te kau temonio. ʼE ʼasi mai ʼi te tuʼaniaʼi e te kau laumālie kovi ia te vanu, ʼe nātou ʼiloʼi lelei ia te tūʼā ʼaē ka hoko kia nātou ʼi te ka haʼu.—Luka 8:31.
ʼI te mole maʼu he fakamatala ia Apokalipesi 20:1-3 ʼo ʼuhiga mo te kau temonio, koia ʼe tonu ai koa ke ʼui kua fakaʼauha nātou ʼi Halamaketone mo te koga ʼo te hāko ʼo Satana ʼaē ʼe maʼuʼuli ʼi te kele? ʼE mole ko te manatu ʼaia ʼa te Tohi-Tapu. ʼO ʼuhiga mo te fakaʼauha ʼo Satana, ʼe ʼui fēnei: “Ko te tiapolo, tanatou fakahalahala, nee li ki te vai afi mo efuiʼafi, e i ai te manufekai mo te polofeta lohi. Pea e natou tali anai te mamahi, po mo aho, ki te u sekulo mo te u sekulo.” (Apokalipesi 20:10) Ko te manu fekai pea mo te polofeta loi ʼe nā fakatātā ia te ʼu faʼahi faka politike fuli, pea ʼe ko he koga ʼaia ʼo te kautahi ʼa Satana ʼaē ʼi te kele. (Apokalipesi 13:1, 2, 11-14; 16:13, 14) ʼE fakaʼauha anai nāua ʼi Halamaketone mokā haga anai ia te Puleʼaga ʼo te ʼAtua ʼo laliki pea mo fakagata ia te ʼu puleʼaga fuli ʼo te malamanei. (Taniela 2:44) ʼE fakamatala ʼi te Tohi-Tapu “te afi heegata nee teuteui ki te [Tevolo, MN ] mo tana kau aselo.” (Mateo 25:41) Ko Satana mo tana kau temonio ʼe lī anai nātou “ki te vai afi mo efuiʼafi,” ʼaē ka ʼi ai anai ia te manu fekai pea mo te polofeta loi, pea ʼe fakaʼauha ai anai ia nātou ʼo talu ai. Kapau neʼe fakatuʼutuʼu ke fakaʼauha ʼi Halamaketone te kau temonio ʼa Satana, kanaʼauala ʼe fakahā mai ʼi te Tohi-Tapu ʼe nātou nonofo fakatahi mo te manu fekai pea mo te polofeta loi ʼi te ano fakatātā. ʼI te mole talanoa ia Apokalipesi 20:10 ki te faʼahi ʼaia, koia ko tona faka ʼuhiga ʼe mole fakaʼauha te kau temonio ʼi Halamaketone.
ʼE mole tuʼu fakahagatonu ʼi te Tohi-Tapu ʼe lī te kau temonio ki te vanu, pea mo faka ʼāteaina nātou mai ai. Kae ko te meʼa ʼaē ka hoko kia nātou ʼe tatau mo te meʼa ʼaē ka hoko ki te Tevolo. ʼI tonatou ʼosi fakaʼāteaina mo te Tevolo ʼo nātou gāue tahi lolotoga te ʼahiʼahi fakaʼosi ʼo te malamanei ʼi te fakaʼosi ʼo te ʼu taʼu e afe, pea ʼe lī anai te kau temonio ki te ano ʼo te afi pea ʼe hoko anai kia nātou te fakaʼauha heʼegata.—Apokalipesi 20:7-9.
Koia, tatau aipe peʼe ʼui pe ia Apokalipesi 20:1-3 ʼe puke ia Satana pea mo lī ki te vanu ʼo mole feala hana toe fai he meʼa, kae ʼe tou mahino ʼe toe haʼihaʼi foki mo tana kau ʼaselo pea mo lī ia nātou ki te vanu. Ko Satana peʼe ko tana faga temonio ʼe mole nātou lava tāʼofi anai te fakahoko ʼo te fakatuʼutuʼu ʼa te ʼAtua, ʼaē ko te fakaliliu ʼo te kele ko he palatiso, pea mo fakaliliu ia te tagata ke ina maʼu ia te maʼuli haohaoa lolotoga te ʼAfio ʼa Kilisito ia Taʼu e Afe.