Te ʼu Fehuʼi ʼa Te Kau Lautohi

Koteā te faka ʼuhiga ʼo te ʼu palalau ʼaenī ʼa Sesu ki tana kau tisipulo: “Nee au mamata ki te to ifo a Satana o hage he hila mai te lagi”?

ʼI te ʼosi filifili e Sesu ia te toko 70 kau tisipulo, neʼe ina “fekaui taki toko lua natou ke natou muamua kia kolo fuape mo te u nofoaga nee amanaki haeleʼage ki ai.” ʼI te liliu age ʼa te toko 70, neʼe nātou fiafia he neʼe fua lelei tanatou gāue. Neʼe nātou tala fēnei age: “ ‘Aliki, mo te faga temonio nee natou fakalogo kia matou i tou huafa.’ Pea nee folafolaʼage kia natou: ‘Nee au mamata ki te to ifo a Satana o hage he hila mai te lagi.’ ”​—Luka 10:​1, 17, 18.

ʼI te kamata, ʼe hage mai neʼe palalau ia Sesu ki he meʼa kua ʼosi hoko ia. Kae neʼe hoki hili te ʼu taʼu e 60 ʼo te fai e Sesu ia te ʼu palalau ʼaia ʼaē ʼe tuʼu ʼi ʼoluga, pea neʼe tohi fēnei e te ʼapositolo ko Soane ʼaē kua matuʼa ʼaki he ʼu palalau ʼe tatau: “Neʼe lī ifo ai te talakone lahi, te gata olisinale, ia ia ʼaē ʼe fakahigoaʼi ko te Tevolo mo Satana, ia ia ʼaē ʼe ina fakahēʼi te kele katoa; neʼe lī ifo ki te kele, pea mo tana kau ʼaselo neʼe lī fakatahi ifo mo ia.”​—Apokalipesi 12:9, MN.

ʼI te temi ʼaē neʼe tohi ai e Soane ia te ʼu palalau ʼaenī, neʼe kei nofo ia Satana ʼi te lagi. ʼE tou ʼiloʼi feafeaʼi te faʼahi ʼaia? Koteʼuhi ko te tohi ʼo Apokalipesi ʼe ko te tohi ʼo te ʼu fakakikite kae mole ko he tohi faka hisitolia. (Apokalipesi 1:1) Koia ʼi te temi ʼaē neʼe fai e Soane ia te tohi ʼo Apokalipesi, neʼe mole heʼeki lī ifo ia Satana ki te kele. ʼI tona fakahagatonu, ʼe ʼasi lelei neʼe hoki hoko pe te faʼahi ʼaia ʼi te ʼosi fakanofo ʼo Sesu ke Hau ʼi te Puleʼaga ʼo te ʼAtua ʼi te taʼu 1914.a​—Apokalipesi 12:​1-​10.

Kae he koʼe koa neʼe palalau ia Sesu ki te kapu ifo ʼo Satana mai te lagi ohage ko he meʼa kua ʼosi hoko? ʼE ʼui e ʼihi hahaʼi popoto ko Sesu neʼe ina fakatotonu ki tana kau tisipulo ke ʼaua naʼa nātou fialahi. ʼE nātou ʼui, neʼe fēnei te ʼu palalau ʼa Sesu: ‘Neʼe koutou mālo ʼi te kau temonio, kae ʼaua naʼa koutou fiameamea. Neʼe liliu ia Satana ʼo fialahi, ʼo iku ai ki tona tō fakavilivili.’

ʼE mole feala ke tou tukupau ʼaki te manatu ʼaia. Kae ʼe hage mai neʼe fiafia ia Sesu mo tana kau tisipulo pea neʼe fia palalau ki te ʼamanaki pulihi ʼo Satana. Ko Sesu neʼe mahino lelei age ʼi tana ʼu tisipulo ki te fehiʼa lahi ʼa te Tevolo. Koutou fakafuafua age muʼa ki te fiafia ʼa Sesu ʼi tana logo ʼaē ko te kau temonio neʼe nātou fakalogo ki tana kau tisipulo, ʼaē ko te ʼu tagata heʼe haohaoa! Ko te taʼi puleʼi ʼaia ʼo te kau temonio neʼe ko he fakamelomelo ʼo te temi ʼaē ka haga ai ia Sesu, ʼi tona ʼuhiga Mikaele te alekaselo, ʼo tauʼi ia Satana pea mo ina lī ifo mai te lagi ki te kele.

ʼI te temi ʼaē neʼe ʼui ai e Sesu neʼe mamata ko Satana kua “to ifo,” neʼe ina fia fakahā ʼe hoko moʼoni anai te kapu ifo ʼo Satana. ʼE tatau te palalau ʼaia mo te tahi ʼu fakakikite ʼa te Tohi-Tapu ʼe palalau ki te ʼu meʼa ka ʼamanaki hoko ohage ko he ʼu meʼa kua hoko ia. Ohage la, koutou fakatokagaʼi te ʼu faʼahiga palalau fakakikite ʼo ʼuhiga mo te Mesia ia Isaia 52:⁠13–​53:12. Neʼe lagi fakahā e Sesu tana falala ʼaē ʼe hoko anai te kapu ifo ʼo Satana mai te lagi ʼo mulimuli ki te finegalo ʼo Tana Tāmai. Neʼe toe ʼiloʼi papau pe foki e Sesu, ʼi te temi ʼaē kua fakatuʼutuʼu kiai e te ʼAtua, ʼe lī anai ia Satana mo tana kau temonio ki te vanu pea ki muli age ʼe fakaʼauha anai ia nātou ʼo talu ai.​—Loma 16:20; Hepeleo 2:​14; Apokalipesi 20:​1-3, 7-​10.

[Kiʼi nota]