Ke Kotou Nonofo ʼAlaʼala ʼe Loto e Satana Ke Ina Kai Koutou

1. Kotou fakamahino pe neʼe liliu feafeaʼi he ʼaselo ko Satana.

ʼI TE kamata, neʼe maʼu e Satana ia he ʼu felogoʼi lelei mo Sehova. Kaʼe ki muli age, neʼe loto e te ʼaselo ʼaia ke atolasio age te hahaʼi ki ai. Neʼe mole ina foimo tekeʼi atu aipe ia te holi ʼaia, kaʼe neʼe ina tuku ke tuputupu ia ia ʼo kaku ki tana agahala. (Sakopo 1:14, 15) ʼE mole tou iloʼi tona higoa totonu kaʼe ʼe tou fakahigoa ia ia ʼi te temi nei ko Satana. Neʼe “mole nofo ia ia i te mooni.” Neʼe agatuʼu kia Sehova pea neʼe liliu “ko te tamai ia o te loi.”—Soane 8:44.

2, 3. Kotea ia te fakaʼuhiga ʼo te ʼu kupu “Satana,” mo “Tiapolo,” mo “gata” pea mo “talakone” ʼo ʼuhiga mo te fili lahi ʼo Sehova?

² Talu mai tana agatuʼu, neʼe liliu ia Satana ko te fili lahi ʼo Sehova pea mo te fili ʼo te malamanei katoa. ʼE feala ke tou mahino pe neʼe aga fakakakā feafeaʼi ia Satana ʼaki tatatou vakaʼi te fakamatala ʼo tona agaaga ʼi te Tohi-Tapu. Ko Satana ʼe fakaʼuhiga “Ko he tahi ʼe fakafeagai,” ʼe fakaha ai ʼe fehiʼa ia te ʼaselo agakovi ʼaia ki te takitaki ʼa te ʼAtua pea ʼe fakafeagai malohi ki tana takitaki. Ko te faʼahi ʼae ʼe loto moʼoni ki ai Satana, ʼe ko tana sio ki te fakaʼosi ʼo te takitaki ʼa Sehova.

³ Ia Apokalipisi 12:9, ʼe fakahigoaʼi ai ia Satana ko te Tiapolo ko tona fakaʼuhiga “Ko he tahi ʼe fasituʼu.” Neʼe fakalainoaʼi e Satana ia Sehova ʼo ina ui ʼe ko he tahi ʼe gutuloi. ʼE fakamanatuʼi mai kia tatou ia te kupusiga palalau ʼae “gata afea” pe neʼe fakaʼaogaʼi feafeaʼi e Satana ia he gata moʼo fakahalaʼi ia Eva. Ko te kupusiga palalau ʼae “gata [peʼe talakone] lahi” ʼe ko he tahi fealagia lelei ʼaia ke tou iloʼi ai te agaaga ʼo Satana. ʼE ko he tahi ʼe agakovi mo agamalohi. ʼE mole ina loto ke fakahoko ia te fakatuʼutuʼu ʼa Sehova pea ʼe ina loto ke fakaʼauha ia te hahaʼi ʼa te ʼAtua.

4. Kotea ʼae ka tou vakaʼi anai ʼi te alatike ʼaeni?

⁴ ʼE mahino ia, ko Satana ʼe ko he tahi ʼe fakamataku ʼaupito pea ʼe fakatupu tuʼutamaki ki tatatou nofo agatonu. Ko te tupuʼaga la ʼaia ʼo te fakatokaga fenei mai ʼi te Tohi-Tapu: “Ke koutou fakapotopoto, mo alaala! Koteuhi ko tokotou fili, te tiapolo, e taka o hage ko he laione gugulu, o kumi pe ko ai ae e ina kai anai.” (1 Petelo 5:8) Koia, ʼe tou vakaʼi anai ʼi te alatike ʼaeni ia te ʼu faʼahi ʼe tolu ʼo ʼuhiga mo Satana. Pea ʼe ha ai pe koʼe ʼe maʼuhiga ke puipui tatou mai te fili agakovi ʼaia ʼo Sehova pea mo Tana hahaʼi.

ʼE MALOHI IA SATANA

5, 6. (1) Kotou tuku mai he ʼu faʼifaʼitaki ʼe ha ai ko te ʼu ʼaselo ʼe ‘malolohi.’ (2) Kotea ia te fakaʼuhiga ʼo te ui ʼae ʼe maʼu ʼe Satana “te puleʼaki moʼo fakatupu te mate”?

⁵ ʼE ‘malolohi’ ia te kau ʼaselo. (Pesalemo 103:20) ʼE natou popoto mo malolohi age ʼi te tagata. ʼE mahino ia, ʼe fakaʼaogaʼi e te kau ʼaselo agatonu ia tonatou malohi moʼo fakahoko ʼaki he ʼu meʼa lelei. Ohage la, neʼe matehi e te tahi ʼaselo ʼa Sehova ia te toko 185 000 kau solia Asilia. Neʼe lagi mole fealagia ia te faʼahi ʼaia e he tagata ʼe tahi ʼo toe feia pe ki he foʼi kautau solia. (2 Hau 19:35) ʼI te tahi temi, neʼe fakaʼaogaʼi e he ʼaselo ia tona poto mo tona malohi moʼo fakaʼateainaʼi ia te kau apositolo ʼa Sesu mai te pilisoni. Logo la neʼe nonofo ovi age te ʼu tagata leʼo, kaʼe neʼe mole natou tokagaʼi ia te avahi ʼo te ʼu matapa e te ʼaselo, mo te fakamavae ʼo te kau apositolo ki tuʼa pea mo te toe pupunu ʼo te ʼu matapa.—Gaue 5:18-23.

⁶ ʼE fakaʼaogaʼi e te kau ʼaselo agatonu tonatou malohi moʼo fai he ʼu meʼa ʼe lelei, kaʼe ʼe fakaʼaogaʼi e Satana tona malohi moʼo fai he ʼu meʼa ʼe kovi. ʼE mahino ia, ʼe maʼu e Satana ia he toe malohi pea ʼe toe faiva ʼi te fakahalaʼi ʼo te hahaʼi. ʼE ui ʼi te Tohi-Tapu ʼo ʼuhiga mo ia ko “te pule o te malama aeni” pea mo “te ʼatua ʼo te tuʼu ʼo te ʼu faʼahiga meʼa ʼaeni.” (Soane 12:31; 2 Kolinito 4:4, MN) Neʼe toe maʼu e Satana ia “te puleʼaki moʼo fakatupu te mate.” (Hepeleo 2:14, MN) ʼE mole fakaʼuhiga leva ʼe ina matehi fakahagatonu ia te hahaʼi fuli. Kaʼe kotea ia tona fakaʼuhiga? ʼUluaki, ʼe fonu ia te malama ʼaeni ʼi te fehiʼa mo te agamalohi ʼo Satana. Lua, ko te tagata fuli ʼe natou agahala pea mo mamate koteʼuhi neʼe tui ia Eva ki te loi ʼa Satana pea neʼe talagataʼa ia Atama ki te ʼAtua. (Loma 5:12) Neʼe fakahigoaʼi e Sesu ia Satana ko he tahi ʼe “fakapo.” (Soane 8:44) ʼE ko he toe fili malohi ia.

7. ʼE fakaha feafeaʼi e te kau temonio ʼe natou malolohi?

⁷ Moka tou fakafeagai kia Satana, ʼe tou toe fakafeagai ai kia natou ʼae ʼe lagolago ki ai pea mo agatuʼu ki te takitaki ʼa te ʼAtua. ʼE kau ai ia te kau ʼaselo agatuʼu ʼae ʼe fakahigoaʼi ko te kau temonio. (Apokalipisi 12:3, 4) Neʼe tuʼa lahi ia tanatou fakaha ʼe natou malolohi age ʼi te tagata, ʼaki ia tanatou fakamamahiʼi ia natou. (Mateo 8:28-32; Maleko 5:1-5) ʼAua naʼa galo kia koutou ko te kau temonio mo tonatou pule, ʼe natou malolohi. (Mateo 9:34) Kapau ʼe mole tou maʼu ia te tokoni ʼa Sehova, ʼe mole feala anai ke tou malo ʼi tatatou tau ʼae mo Satana.

ʼE AGAKOVI IA SATANA

8. (1) Kotea te fakatuʼutuʼu ʼa Satana? (Vakaʼi te ʼuluaki pāki.) (2) Kotea ʼe ha ʼaki mai ai ko te malama ʼaeni ʼe agakovi ohage ko Satana?

⁸ Neʼe fakatatau e te apositolo ko Petelo ia Satana ki “he laione gugulu.” ʼE fakamahino ʼi te tohi, ʼe fakaʼuhiga ia te kupu Fakakeleka ʼae neʼe fakaliliu ʼaki te kupu “gugulu” ki “he gugulu ʼa he manu fekai ʼe fia kai.” ʼE fakaha lelei ai ia te agakovi ʼa Satana. Kua ina puleʼi ia te malamanei katoa, kaʼe ʼe mole feʼauga ki ai. ʼE hage ia Satana ko he laione ʼe fia kai tuʼumaʼu pe ia. (1 Soane 5:19) ʼE ina fakahagahaga tafitō ʼana ʼohofi ki te kau fakanofo ʼae ʼe kei ʼi te kele, ʼae ʼe fakatahi kia natou ia te tahi ʼu “ovi.” (Soane 10:16; Apokalipisi 12:17) Ko te fakatuʼutuʼu ʼa Satana ko te fakaʼauha ʼo te hahaʼi ʼa Sehova. Ko te fakatagaʼi ʼo te kau Kilisitiano moʼoni talu mai te temi ʼo te kau apositolo ʼo kaku mai ki te temi nei, ʼe fakamoʼoni ai ko Satana ʼe agakovi.

9, 10. (1) Neʼe ʼohofi feafeaʼi e Satana ia te puleʼaga ʼo Iselaele? (Kotou tuku mai he ʼu faʼifaʼitaki.) (2) He koʼe neʼe maʼu e Satana he tupuʼaga tafitō moʼo ʼohofi te Iselaele ʼafeā? (3) Kotea ia takotou manatu ʼo ʼuhiga mo te ʼu faʼahi ʼae ʼe logoʼi e Satana moka fai e he kaugana ʼa Sehova ia he agahala mamafa ia ʼaho nei?

⁹ Neʼe fakaha e Satana ia tana agakovi ʼi hona tahi age aluʼaga. Ko he laione ʼe fia kai, ʼe mole ʼofa ia kia ia ʼae ka ina kai. ʼE mole ina logoʼi hona ʼofa ʼi muʼa ʼo tana matehi he tahi, pea ʼe mole ina tukugakoviʼi ia ia hili ia tana matehi. ʼO toe feia pe, ʼe mole toe logoʼi e Satana hona ʼofa kia natou ʼae ʼe ina ʼohofi. Ohage la, ʼi takotou manatu, kotea ʼae neʼe logoʼi e Satana ʼi te temi fuli pe ʼae neʼe to ai ia te kau Iselaele ki te agahala, ohage ko te ʼu aga heʼe ʼaoga pea mo te manumanū? ʼE kotou fakakaukauʼi age koa ia te fiafia ʼa Satana ʼi tana malo, ʼi tana sio ʼae ki te ʼu fua kovi ʼo te aga heʼe ʼaoga ʼa Simeli pea mo te manumanū ʼa Keasi?—Numelo 25:6-8, 14, 15; 2 Hau 5:20-27.

¹⁰ Neʼe ʼi ai te tupuʼaga tafitō ʼo te ʼohofi e Satana ia te Iselaele ʼafeā. Tou manatuʼi ʼe haʼu anai ia te Mesia mai te puleʼaga ʼaia, pea ko ia tokotahi pe anai ʼae ka ina fakaʼauha ia Satana pea mo fakamoʼoni ko Sehova ʼae ʼe tonu ke pule. (Senesi 3:15) Neʼe mole loto e Satana ke maʼu e te kau Iselaele ia te ʼofa ʼo te ʼAtua, koia neʼe ina fai ai ia meʼa fuli moʼo fakahalaʼi natou ke natou agahala. ʼE mahino ia, neʼe mole lotomamahi ia Satana ʼi te temi ʼae neʼe tono ai ia Tavite. ʼAua naʼa kotou manatu neʼe fakaʼofaʼofa kia Moisese ʼi te temi ʼae neʼe mole kei feala ai ke hu ki te Kele ʼo Te Fakapapau. ʼE fiafia lahi ia Satana moka sio ʼe fai e he kaugana ʼa te ʼAtua ia he agahala mamafa. Koia ʼe fakaʼaogaʼi e te Tiapolo ʼana malo moʼo fakalainoaʼi ia Sehova.—Taaga Lea 27:11.

11. He koʼe neʼe lagi fakahagahaga tafitō te ʼohofi ʼa Satana kia Sala?

¹¹ Neʼe fehiʼa tafitō ia Satana ki te hologa ʼae neʼe hifo mai ai ia te Mesia. Ohage la, kotou manatuʼi te aluʼaga ʼae neʼe hoko hili te ui ʼae ʼa Sehova kia Apalahamo, ʼe liliu anai ko “he puleaga lahi.” (Senesi 12:1-3) Lolotoga ia te maʼuʼuli ʼa Apalahamo mo Sala ʼi Esipito, neʼe ʼaumai e Falaone ia Sala ki tona fale hau ke liliu ko tona ʼohoana. Kaʼe neʼe puipui e Sehova ia Sala pea neʼe ina haofaki mai te aluʼaga faigataʼa ʼaia. (Lau ia Senesi 12:14-20.) Neʼe toe hoko ia he aluʼaga feia ʼi te kolo ko Kela ʼi muʼa ʼo te tupu ʼa Isaake. (Senesi 20:1-7) ʼE feala koa ke tou ui ko Satana ia te tupuʼaga ʼo te ʼu aluʼaga ʼaia? Kotou manatuʼi, neʼe mavae ia Sala ʼi te kolo koloaʼia ko Ule ʼo maʼuli ʼi te ʼu fale la. Koia neʼe faigaʼi koa e Satana ke ina fakahalaʼi ia Sala ʼaki te ʼu fale hau matalelei ʼo Falaone pea mo Apimeleke? Neʼe manatu koa ia Satana ʼe kakāʼi anai koa e Sala ia tona ʼohoana pea mo Sehova ʼaki ia tana ʼohoana mo he tahi ʼi te ʼu hau ʼaia? ʼE mole fakaha mai ʼi te Tohi-Tapu ia te faʼahi ʼaia, kaʼe neʼe lagi feala ke fiafia lahi ia Satana mo ka na pau la neʼe mole maʼu e Sala te pilivilesio ʼae ke kau ki te hologa ʼo te Mesia. ʼE mole tukugakoviʼi e Satana ia ia mo kapau neʼe maumauʼi ia te ʼohoana, mo te matagafua pea mo te ʼu felogoʼi ʼa te fafine ʼaia mo Sehova. ʼE ha ai ʼe agakovi ia Satana.

12, 13. (1) Neʼe fakaha feafeaʼi e Satana ia tana agakovi hili pe te tupu ʼa Sesu? (2) Kotea ʼae ʼe logoʼi e Satana mo kapau ʼe ʼoʼofa ia te kau tupulaga kia Sehova pea mo faiga ke natou tauhi kia te Ia ia ʼaho nei?

¹² Neʼe tupu ia Sesu hili ki ai ni taʼu ʼe lauʼi teau ia Apalahamo. ʼE kotou fakakaukauʼi age muʼa ia te sio ʼae ʼa Satana ki te tamasiʼi matalelei ʼaia. Neʼe iloʼi e Satana ʼe tonu anai ki te tamasiʼi ʼaia ke lahilahi ake pea ke liliu ko te Mesia ʼae neʼe fakapapauʼi mai. Ko Sesu ʼe ko te koga tafitō ʼaia ʼo te hologa ʼo Apalahamo, pea ʼe ko ia anai ʼae ka ina “maumaui te u gaue a te tiapolo.” (1 Soane 3:8) ʼE kotou manatu koa ʼe kovi kia Satana ia te matehi ʼo he kiʼi tamasiʼi? Kailoa. ʼE mole ina tokagaʼi ia te meʼa ʼae ʼe lelei peʼe kovi. Neʼe foimo faiga atu aipe ke ina matehi ia Sesu ʼi tana kei veliveli. ʼO feafeaʼi?

¹³ ʼI te temi ʼae neʼe logo ai ia te Hau ko Helote ki te ui ʼae e te kau masi kua tupu “te hau o te kau Sutea,” neʼe kovi ʼosi tona ita pea neʼe ina loto ke matehi ia te tamasiʼi. (Mateo 2:1-3, 13) Koia, neʼe ina fakatotonu ai ke matehi ʼi Petelehemi pea mo tona telituale katoa ia te ʼu tamaliki tagata fuli mai te taʼu lua ʼo fai ki lalo. (Lau ia Mateo 2:13-18.) Neʼe hao ia Sesu mai te fakapo ʼaia, kaʼe kotea te ako ʼe tou maʼu mai totatou fili ko Satana? ʼE mole maʼuhiga kia Satana ia te maʼuli ʼa te tagata. ʼE mole pe ina tokagaʼi ia te ʼu fanau. Ko Satana ʼe ko he “laione gugulu” moʼoni ia. Kotou manatuʼi ʼe ko he tahi ʼe agakovi.

ʼE KAKĀ IA SATANA

14, 15. Neʼe feafeaʼi ia te “fakakiviʼi . . . te ʼatamai ʼo natou ʼae ʼe mole tui” e Satana?

¹⁴ Ko te faʼahiga puleʼaki pe ʼe feala ke fai e Satana moʼo fakamaliu te hahaʼi mai tonatou ʼofa ʼae kia Sehova tonatou ʼAtua, ʼe ko te fakahalaʼi ʼo natou. (1 Soane 4:8) ʼE fakahalaʼi e Satana ia te hahaʼi ke mole natou “iloʼi tonatou masiva fakalaumalie,” pea ke natou iloʼi ʼe mole ʼaoga ke natou maʼu he ʼu felogoʼi mo te ʼAtua. (Mateo 5:3, MN) Ko te Tiapolo ʼae neʼe ina “fakakiviʼi . . . te ʼatamai ʼo natou ʼae ʼe mole tui” ke mole natou sisio ki te moʼoni ʼo ʼuhiga mo Sehova.—2 Kolinito 4:4, MN.

¹⁵ Ko te tahi puleʼaki ʼe fai e Satana moʼo fakahalaʼi ia te hahaʼi, ʼe ko te lotu hala. ʼE ina iloʼi ko Sehova ‘ ʼe ina fakamaʼua ki te hahaʼi ke natou tauhi ʼateaina pe kia te ia.’ (Ekesote 20:5) Kotou fakakaukauʼi age ia te fiafia ʼe maʼu e Satana moka ʼe atolasio te hahaʼi ki ʼanatou kui, peʼe ki te natula, peʼe ki te ʼu manu kaʼe mole kia Sehova. Meʼa fakaʼofaʼofa foki, tokolahi ʼe natou manatu ko tanatou tauhi ʼe tali e te ʼAtua, kaʼe ʼe puleʼi tanatou tauhi e te ʼu lotu hala pea mo te ʼu toʼotoʼoga fakalotu. Neʼe ko te faʼahi ʼaia neʼe fai e te kau Iselaele ʼi te temi ʼo Esaia. Neʼe ui fenei age e Sehova kia natou: “Kotea e koutou maumaui ai te paaga ki te mea ae e mole ina fafaga koutou? Kotea e koutou gaue ai ki te mea ae e mole koutou makokona ai? Koia koutou fakalogo mai kia au, pea e koutou kai anai te mea ae e lelei, pea e fiafia anai okotou laumalie i ni meakai lelei osi.”—Esaia 55:2.

16, 17. (1) He koʼe neʼe ui fenei e Sesu kia Petelo: “Haʼu ʼi ʼoku tuʼa, Satana!”? (2) ʼE lava fakahalaʼi feafeaʼi tatou e Satana ke mole tou nonofo ʼalaʼala?

¹⁶ ʼE feala pe kia Satana ke ina fakahalaʼi te ʼu kaugana faʼafai ʼa Sehova. Ohage la, kotou manatuʼi te temi ʼae neʼe ui age ai e Sesu ki ʼana tisipulo ʼe kua vave mate. Neʼe ui fenei e te apositolo ko Petelo ʼae neʼe ʼofa kia Sesu: “Agalelei kia te koe, ʼAliki; kailoa, ʼe mole hoko anai kia te koe he meʼa feia.” Neʼe ui fenei e Sesu kia Petelo: “Haʼu ʼi ʼoku tuʼa, Satana!” (Mateo 16:22, 23, MN) He koʼe neʼe fakahigoaʼi e Sesu ia Petelo ko “Satana”? Koteʼuhi neʼe iloʼi e Sesu pe kotea ia te aluʼaga ʼae ka hoko. Neʼe kua vave mate ia Sesu ʼaki ia tana foaki he sakilifisio faitotogi pea mo fakamoʼoni ko te Tiapolo ʼe ko he tahi ʼe gutuloi. Neʼe ko he temi maʼuhiga ʼi te hisitolia ʼo te tagata pea neʼe mole ko he temi ke “agalelei” ai ia Sesu kia ia totonu. Neʼe loto e Satana ke mole nofo ʼalaʼala ia Sesu.

¹⁷ Kua fakaovi mai te fakaʼosi ʼo te tuʼu ʼo te u faʼahiga meʼa ʼaeni, pea ʼe tou toe maʼuʼuli foki ʼi he temi maʼuhiga. ʼE loto e Satana ke tou “agalelei” kia tatou totonu ke tou haga maʼuli fiafia ʼi te malama ʼaeni. ʼE ina loto ke mole tou manatuʼi ʼe tou maʼuʼuli ʼi te ʼu ʼaho fakamuli pea ke mole tou nonofo ʼalaʼala. Ke ʼaua naʼa hoko kia koutou te aluʼaga ʼaia! Kaʼe, kotou nonofo “alaala.” (Mateo 24:42) ʼAua naʼa kotou tui ki te loi ʼae ʼe ui e Satana, ʼe kei mamaʼo te fakaʼosi peʼe mole hoko mai anai ia.

18, 19. (1) ʼE faiga feafeaʼi e Satana ke ina fakahalaʼi tatou pea ke tou tui ʼe mole tou tuha mo te ʼofa ʼo Sehova? (2) ʼE tokoni feafeaʼi mai Sehova ke tou nonofo ʼalaʼala?

¹⁸ ʼE faigaʼi e Satana ke ina fakahalaʼi tatou ʼi hona tahi age aluʼaga. ʼE ina loto ke tou tui ʼe mole tou tuha mo te ʼofa ʼo Sehova pea ʼe mole fakamolemole anai e te ʼAtua ʼatatou agahala. Kaʼe ʼe ko te ʼu loi ʼaia ʼa Satana. ʼI takotou manatu, ko ai ʼae ʼe mole tuha moʼoni mo te ʼofa ʼo Sehova? Ko Satana. Ko ai ʼae ʼe mole fakamolemole ki ai Sehova? Ko Satana. ʼE ui fenei ʼi te Tohi-Tapu ʼo ʼuhiga mo tatou: “E mole hee agatonu te Atua ke ina galoi takotou gaue pea mo te ofa nee koutou fakaha ki tona huafa.” (Hepeleo 6:10) ʼE leleiʼia e Sehova ia te ʼu meʼa fuli ʼae ʼe tou fai moʼo fakafiafiaʼi ia ia, pea ʼe mole he temi ʼe vaʼiganoa ai tatatou tauhi ʼae kia te ia. (Lau ia 1 Kolinito 15:58.) Koia, ʼaua naʼa kakāʼi koutou e te ʼu loi ʼa Satana.

¹⁹ Ohage pe ko tatatou vakaʼi, ko Satana ʼe malohi, mo agakovi pea mo kakā. ʼE tou lava malo feafeaʼi ʼi te fili ʼaeni? ʼE tokoni mai Sehova kia tatou. ʼE akoʼi mai ʼi tana Folafola ia te ʼu faʼahiga fai ʼa Satana ke “mole pouli kia tatou ana fakatuutuu.” (2 Kolinito 2:11) Moka tou iloʼi ia te ʼu faʼahiga fakahala ʼae ʼe fai e Satana mo ʼotatou ʼohofi, ʼe faigafua anai kia tatou hatatou nonofo ʼalaʼala. Kaʼe ʼe mole feʼauga pe tatatou iloʼi ia te ʼu faʼahiga fakahala ʼa Satana. ʼE ui fenei ʼi te Tohi-Tapu: “Koutou tekeia te tiapolo, pea e hola mamao anai ia ia maia koutou.” (Sakopo 4:7) ʼE tou vakaʼi anai ʼi te alatike ka hoa mai ia faʼahi ʼe tolu ʼe feala ai tatatou tauʼi ia Satana pea mo malo ʼi ai.