Ako 4
Ko Ai Te Tevolo?
Ko Satana te Tevolo—neʼe haʼu koa maifea? (1, 2)
ʼE ina fakahēʼi feafeaʼi te hahaʼi? (3-7)
He koʼe ʼe tonu ke koutou fakafeagai ki te Tevolo? (7)
1. Ko te kupu “tevolo” ʼe faka ʼuhiga ki he tahi ʼe ina fai he ʼu loi, ʼe fakatupu kovi ki he tahi. Ko te kupu “Satana” ʼe faka ʼuhiga ki he fili peʼe ki he tahi ʼe fakafeagai. Ko te ʼu kupu ʼaia neʼe foaki ki te fili tāfito ʼo te ʼAtua. ʼI te kamata, neʼe ko te ʼaselo haohaoa ia neʼe maʼuli tahi mo te ʼAtua ʼi te lagi. Kae, ki muli age, neʼe liliu ia ʼo fialahi pea neʼe holi ia ke fai age kia ia te tauhi ʼaē ʼe tonu ke fai ki te ʼAtua.—Mateo 4:8-10.
2. Neʼe palalau te ʼaselo ʼaia, ia Satana, kia Eva ʼo ina fakaʼaogaʼi te gata. Neʼe ina loiʼi ia ia ke talagataʼa ki te ʼAtua. Neʼe tauʼi ai e Satana te meʼa ʼaē ʼe fakahigoaʼi ko te “pule faʼitaliha” ʼa te ʼAtua, peʼe ko tona tuʼulaga Māʼoluga ʼAupito. Neʼe fakafihiʼi e Satana peʼe lelei koa te pule ʼa te ʼAtua, pea mo fua lelei koa ki Tana hahaʼi? Neʼe toe fakafihiʼi foki e Satana te nofo agatonu ʼa te tagata ki te ʼAtua. ʼI tana fai te ʼu meʼa ʼaia, neʼe fakaliliu e Satana ia ia totonu ko te fili ʼo te ʼAtua. Ko te tupuʼaga la ʼaia ʼo tona fakahigoaʼi ko Satana te Tevolo.—Senesi 3:1-5; Sopo 1:8-11; Fakahā 12:9.
3. ʼE faigaʼi e Satana, ʼaki he aga fakakākā, ke atolasio te hahaʼi kia ia. (2 Kolonito 11:3, 14) Ko te meʼa ʼaē ʼe ina fakaʼaogaʼi moʼo fakahēʼi te hahaʼi, ʼe ko te lotu hala. Kapau ʼe akonakiʼi e he lotu he ʼu loi ʼo ʼuhiga mo te ʼAtua, ʼe tauhi moʼoni ia ki te ʼu fakatuʼutuʼu ʼa Satana. (Soane 8:44) Ko te hahaʼi ʼaē ʼe nātou kau ki te ʼu lotu hala, ʼe lagi nātou tui fakamalotoloto ʼe nātou tauhi ki te ʼAtua moʼoni. Kae, ʼi tona fakahagatonu, ʼe nātou tauhi kia Satana. Ko ia ‘te ʼatua ʼo te mālama ʼaenī.’—2 Kolonito 4:4.
4. Ko te faifakalauʼakau ʼe ko te tahi ʼaia meʼa ʼe fakaʼaogaʼi e Satana moʼo puleʼi ʼo te hahaʼi. ʼE feala ke nātou pāui ki te ʼu laumālie moʼo puipui ʼo nātou, ke nātou fakahoko he ʼu meʼa ʼe kovi ki ʼihi, pea mo fakakikite te temi ka haʼu, peʼe nātou fakahoko he ʼu milakulo. Ko Satana ia te mālohi agakovi ʼaē ʼe ina fakahoko te ʼu meʼa ʼaia. Kapau ʼe tou loto ke leleiʼia tatou e Sehova, pea ʼe mole tonu ke tou fai he ʼu meʼa ʼe pipiki ki he faifakalauʼakau.—Teutalonome 18:10-12; Gāue 19:18, 19.
5. ʼE toe fakahēʼi e Satana te hahaʼi ʼaki te faka maʼuhigaʼi fau ʼo te lanu ʼo te hahaʼi pea mo te tauhi ʼaē ki te ʼu kautahi faka politike. Ko ʼihi ʼe nātou ʼui ʼe lelei age tonatou fenua peʼe lelei age tonatou lanu ʼi ʼihi age. Kae ʼe mole moʼoni te faʼahi ʼaia. (Gāue 10:34, 35) Ko ʼihi hahaʼi ʼe nātou haga ki te ʼu kautahi faka politike, heʼe kia nātou ʼe ko te puleʼaki pe ʼaia ki te ʼu fihifihia ʼo te tagata. ʼI tanatou fai te meʼa ʼaia, ʼe nātou fakafisi ai ki te Puleʼaga ʼo te ʼAtua. Ko te puleʼaki pe ʼaia e tahi ki totatou ʼu fihifihia.—Taniela 2:44.
6. Ko te tahi faʼahi ʼe fakaʼaogaʼi e Satana moʼo fakahēʼi ʼo te hahaʼi, ko te fakahalaʼi ʼo nātou ʼaki te ʼu holi kovi. ʼE ʼui mai e Sehova ke tou tekeʼi te ʼu aga ʼaē ʼe kovi, heʼe ina ʼiloʼi ʼe fua kovi anai kia tatou. (Kalate 6:7, 8) ʼE lagi loto e ʼihi ke koutou kau mo nātou ʼo fai te taʼi ʼu aga ʼaia. Kae, koutou manatuʼi ko Satana totonu ʼaē ʼe loto ke koutou fai te ʼu meʼa ʼaia.—1 Kolonito 6:9, 10; 15:33.
7. ʼE feala ke fakaʼaogaʼi e Satana te ʼu fakataga peʼe ko te ʼu fakafeagai ke koutou lītuʼa kia Sehova. Ko ʼihi ia nātou ʼaē ʼe koutou ʼoʼofa ai ʼe feala ke nātou ʼiʼita ʼaupito kia koutou heʼe koutou ako te Tohi-Tapu. Ko ʼihi ʼe feala ke nātou vāʼi koutou. Kae ko ai ʼaē neʼe ina foaki atu te maʼuli? ʼE fakamatakuʼi koutou e Satana ke koutou fakagata takotou ako ʼo ʼuhiga mo Sehova. ʼAua naʼa koutou tuku ke mālo ia Satana! (Mateo 10:34-39; 1 Petelo 5:8, 9) ʼI tatatou tauʼi te Tevolo, ʼe feala ke tou fakafiafia ia Sehova pea mo tou fakahā ʼe tou lagolago ki Tana pule faʼitaliha.—Tāʼaga Lea 27:11.
[Paki ʼo te pasina 9]
ʼE fakatupu hēʼia te lotu hala, te faifakalauʼakau, te tauhi ki te fenua
[Paki ʼo te pasina 9]
Koutou tauʼi ia Satana ʼo koutou haga ako ʼo ʼuhiga mo Sehova