Koutou Tokakaga Ki Te Aga Kākā
“Koutou tokakaga, heʼe lagi feala ke ʼi ai he tahi ʼe ina toho anai koutou ki he hele, ʼaki . . . te ʼu kākā ʼaē ʼe vaʼiganoa.”—Kolose 2:8, MN.
1-3. (a) Koteā te ʼu faʼifaʼitaki ʼe nātou fakahā ai ʼi te temi nei, kua mafola te aga kākā ʼi te ʼu ʼaluʼaga fuli ʼo te maʼuli? (b) He koʼe ʼe mole tonu ke tou punamaʼuli ʼo ʼuhiga mo te kākā ʼi te malamanei?
KUA hili kiai ni ʼu taʼu, ko te polofesea ʼo te lao neʼe ina fai te sivi ʼo ina fai te fehuʼi ʼaenī: “Ko te tokofia ia koutou kua loiʼi e he tahi neʼe haʼu ʼo kole atu ke koutou gāue maʼa ia?” Neʼe koteā te ʼu tali? ʼE ina fakamahino fēnei: “ ʼI te ʼu lauʼi afe kau avoka, neʼe ko te tokotahi pe neʼe mole loiʼi e he tahi.” Koteā tona tupuʼaga? “Neʼe ko te hoki gāue ʼaia ʼa te tagata avoka maʼa he sosiete lahi kae neʼe mole heʼeki gāue maʼa he tahi.” ʼE fakahā e te faʼahi ʼaia te moʼoni fakaʼofaʼofa—ko te loi pea mo te kākā kua hoko māhani ʼi te malamanei ia ʼaho nei.
2 ʼE lahi te ʼu agaaga ʼo te kākā pea kua mafola ʼi te ʼu teitei ʼaluʼaga fuli ʼo te maʼuli ʼi te temi nei. ʼE lahi te ʼu ʼaluʼaga feiā ʼe talanoaʼi ʼi te televisio, peʼe ko te lātio, peʼe ko te ʼu sulunale—ko te kau fai politike ʼe nātou loi ʼo ʼuhiga mo te ʼu meʼa ʼaē ʼe nātou fai, ʼe lahi ʼaupito te maʼu paʼaga ʼa te kau tānaki falā pea mo te kau avoka ʼaki tanatou ʼu loi, mo te ʼu publicités ʼe nātou kākāʼi te hahaʼi, pea mo te ʼu fale assurances ʼaē ʼe ʼave ʼo fakamāuʼi ʼuhi ko tanatou ʼu kākā. Pea ʼe toe ʼi ai mo te kākā ʼi te faʼahi ʼo te lotu. Ko te kau takitaki lotu ʼe nātou loiʼi te tokolahi ʼaki te ʼu akonaki hala, ohage ko te maʼuli tuputupua ʼo te nefesi, mo te ʼifeli, pea mo te Tahitolu.—2 Timoteo 4:3, 4.
3 ʼE tonu koa ke tou punamaʼuli ʼi te ʼatu ʼu kākā ʼaia? Kailoa ia. ʼO ʼuhiga mo “te ʼu ʼaho fakamuli,” neʼe fai mai te fakatokaga ʼaenī ʼa te Tohi-Tapu: “Ko te ʼu tagata agakovi pea mo te ʼu hahaʼi kākā ʼe nātou tuputupu anai ki te kovi ʼaupito, ʼo nātou fakahēʼi pea mo nātou hēʼia.” (2 Timoteo 3:1, 13, MN ) ʼI totatou ʼuhiga kau Kilisitiano, ʼe tonu ke tou tokakaga ki te ʼu manatu hala ʼaē ʼe feala ke nātou fakahēʼia tatou mai te moʼoni. ʼE tou fai ai te ʼu fehuʼi ʼaenī e lua: He koʼe kua mafola feiā te kākā ia ʼaho nei, pea koteā ʼaē ʼe tonu ke tou fai ke mole kākāʼi tatou?
He Koʼe Kua Lahi Te Kākā Ia ʼAho Nei?
4. ʼE fakamahino feafeaʼi e te Tohi-Tapu te tupuʼaga ʼo te mafola ʼo te kākā ʼi te malamanei?
4 ʼE fakamahino lelei e te Tohi-Tapu te tupuʼaga ʼo te kua mafola ʼo te kākā ʼi te mālama ʼaenī. Neʼe tohi e te ʼapositolo ko Soane “ko te malamanei katoa ʼe takoto ia ʼi mālohi ʼo te agakovi.” (1 Soane 5:19, MN ) Ko te “agakovi” ʼe ko Satana te Tevolo. ʼO ʼuhiga mo ia, neʼe ʼui fēnei e Sesu: “Neʼe mole haga nofo ia ʼi te moʼoni, koteʼuhi heʼe mole ia te ia te moʼoni. Ka ina tala te loi, pea ʼe palalau ia ʼo mulimuli pe ki te ʼu ʼulugaaga ʼo ia totonu, heʼe gutuloi, pea ʼe ko te tāmai ʼo te loi.” Koia ʼe mole tou punamaʼuli ai ki te maʼu e te malamanei ia te manatu, mo te ʼu aga pea mo te kākā ʼo ia ʼaē ʼe ina puleʼi.—Soane 8:44, MN; 14:30; Efeso 2:1-3.
5. ʼI te temi fakaʼosi ʼaenī, e feafeaʼi te fakaʼāsili e Satana tana ʼu faiga ʼi te kākā, pea ko ai ʼaē ʼe ina kākāʼi tāfito?
5 ʼI te temi ʼaenī ʼo te fakaʼosi, ʼe fakaʼāʼāsili e Satana tana ʼu faiga. Neʼe kapu ifo ki te kele. ʼE ina ʼiloʼi ko tona temi ʼe nounou, pea ʼe nofo mo tona “ ʼita lahi.” ʼE ina “fakahēʼi te kele katoa,” heʼe ina faiga mālohi ke ina fakaʼauha te hahaʼi tokolahi. (Apokalipesi 12:9, 12, MN ) Ko Satana ʼe mole kākā faka temi pe. Kailoa, kae ʼe ina faiga tuʼumaʼu pe ke ina fakahēʼi te malamanei.a ʼE ina fakaʼaogaʼi te ʼu kākā fuli pe—ʼo kau kiai te loi—moʼo fakakiviʼi te ʼatamai ʼo nātou ʼaē ʼe mole tui pea mo fakamamaʼo nātou mai te ʼAtua. (2 Kolonito 4:4) ʼE faiva Satana ʼi te kākā, heʼe ina faiga tāfito ke ina kai ia nātou ʼaē ʼe atolasio ki te ʼAtua “i te mooni mo te laumalie.” (Soane 4:24; 1 Petelo 5:8) ʼAua naʼa galo kia tatou, neʼe lau fēnei e Satana: ‘ ʼE ʼau lava fakamaliu te hahaʼi fuli mai te ʼAtua.’ (Sopo 1:9-12) Tou vakaʼi ʼihi “kākā [ʼa Satana]” ʼe ina fai ki te hahaʼi pea mo tou vakaʼi peʼe feafeaʼi hatatou fakafeagai ki te ʼu kākā ʼaia.—Efeso 6:11, MN.
Tou Tokakaga Ki Te ʼu Kākā ʼa Te Kau ʼAposita
6, 7. (a) Koteā ʼaē ʼe ʼui e te kau ʼaposita? (b) ʼE fakahā feafeaʼi e te Tohi-Tapu te fakatuʼutuʼu moʼoni ʼa te kau ʼaposita?
6 Kua fualoa te fakaʼaogaʼi e Satana te kau ʼaposita moʼo kākāʼi te ʼu kaugana ʼa te ʼAtua. (Mateo 13:36-39) Ko te kau ʼaposita ʼe nātou lau ʼe nātou tauhi kia Sehova pea mo tui ki te Tohi-Tapu, kae ʼe nātou fakafisi ki tana kautahi ʼaē ʼi te kele. Pea ʼe toe liliu ʼihi ki te ʼu akonaki ʼaē ʼe nātou fakalainoaʼi te ʼAtua ʼi te “Papiloni Lahi,” te puleʼaga faka malamanei ʼo te lotu hala. (Apokalipesi 17:5, MN; 2 Petelo 2:19-22) ʼAki te takitaki ʼo te laumālie ʼo te ʼAtua, ko te ʼu tagata faitohi ʼo te Tohi-Tapu neʼe nātou fakaʼaogaʼi he ʼu kupu mālohi moʼo fakahā te ʼu manatu pea mo te ʼu faʼahiga gāue ʼa te kau ʼapositasia.
7 Koteā te fakatuʼutuʼu ʼa te kau ʼaposita? ʼE ʼi ai te faʼahi ʼe fia fai e te tokolahi ʼaē ʼe mavae ʼi te lotu moʼoni ʼaē neʼe nātou faka tui kiai. ʼI te agamāhani, ʼe nātou fia toho ʼihi ke ʼolo ia nātou. ʼE mole nātou ʼolo ki tuʼa pea mo nātou kumi he ʼu tisipulo maʼa nātou, kae tokolahi te kau ʼaposita ʼe nātou kumi ke nātou “toho te kau tisipulo [ʼa Kilisito] ke mulimuli ia nātou.” (Gaue 20:29, 30, MN ) ʼO ʼuhiga mo te kau faiako loi, neʼe fai e te ʼapositolo ko Paulo te fakatokaga maʼuhiga ʼaenī: “Koutou tokakaga, heʼe lagi feala ke ʼi ai he tahi ʼe ina toho anai koutou ki he hele.” (Kolose 2:8, MN ) ʼE mole feiā koa la te ʼu faiga ʼa te tokolahi ʼo te kau ʼaposita? Ohage ko he tagata kaihaʼa ʼe ina kaihaʼa ʼi he famili he tahi ʼe mole nofo tokaga, ko te kau ʼaposita ʼe nātou kākāʼi te hahaʼi ʼo te kokelekasio ʼaē ʼe tui kia nātou, ʼo nātou faigaʼi ke nātou fakamamaʼo ia nātou mai te faga ōvi.
8. Koteā ʼaē ʼe fakaʼaogaʼi e te kau ʼaposita moʼo fakahoko tanatou fakatuʼutuʼu?
8 ʼE fakahoko feafeaʼi e te kau ʼaposita tanatou fakatuʼutuʼu? Ko te meʼa ʼe nātou tau fai, ko te fakaʼaogaʼi ʼo te ʼu fasituʼu, mo te ʼu akonaki ʼe mole moʼoni katoa, pea mo te ʼu loi. Neʼe ʼiloʼi e Sesu ʼe kākāʼi anai tana kau tisipulo e te hahaʼi ʼaē ʼe nātou “tala te ʼu fasituʼu fuape.” (Mateo 5:11, Bible de Jérusalem) Ko te kau fakafeagai kākā ʼaia ʼe nātou tala anai te loi heʼe nātou fia kākāʼi te hahaʼi. Neʼe fai te fakatokaga e te ʼapositolo ko Petelo ʼo ʼuhiga mo te kau ʼaposita, ʼo ina ʼui ʼe nātou fakaʼaogaʼi anai “he ʼu palalau kākā,” mo faka mafola “he ʼu akonaki loi,” pea mo nātou ‘fefuli hala ʼaki te Tohi-Tapu’ moʼo fakahoko te meʼa ʼaē ʼe nātou loto kiai. (2 Petelo 2:3, 13; 3:16) Meʼa fakaʼofaʼofa, heʼe ko te kau ʼaposita neʼe nātou lava “fakahiga . . . te tui a ihi.”—2 Timoteo 2:18.
9, 10. (a) ʼE lava feafeaʼi hatatou nofo tokaga ke mole kākāʼi tatou e te kau ʼaposita? (b) He koʼe ʼe mole tou hoha mo kapau ʼe fetogi tatatou mahino ki te fakatuʼutuʼu ʼa te ʼAtua?
9 E feafeaʼi hatatou nofo tokaga ke mole kākāʼi tatou e te kau ʼaposita? ʼE tonu ke tou tokagaʼi te tokoni ʼaenī ʼa te Tohi-Tapu: “Koutou tokaga kia natou e natou lagalaga te u mavetevete mo te u fasituu o fakafehagai ki te akonaki nee koutou tali, pea koutou fakamamao maia natou.” (Loma 16:17) Moʼo “fakamamao maia natou” ʼe tou fakafisi ki tanatou ʼu manatu—mokā faka mafola mai e he tahi, peʼe tou lau ʼi he tohi, peʼe ʼi te Internet. He koʼe ʼe tonu ke tou fai te faʼahi ʼaia? ʼUluaki heʼe fakatotonu mai e te Folafola ʼa te ʼAtua ke tou fai feiā, pea ʼe tou falala ʼe loto e Sehova te meʼa ʼaē ʼe lelei maʼa tatou.—Isaia 48:17, 18.
10 Lua, ʼe tou ʼofa ki te kautahi ʼaē neʼe ina akoʼi mai te ʼu moʼoni maʼuhiga ʼaē ʼe ina fakakehekeheʼi lelei tatou mai ia Papiloni Lahi. Tahi ʼaē meʼa, ʼe tou ʼiloʼi ʼe mole heʼeki tou mahino katoa ki te fakatuʼutuʼu ʼa te ʼAtua, koteʼuhi ko tatatou mahino ʼe tuputupu ʼaki te temi. Ko te kau Kilisitiano agatonu ʼe nātou atalitali kia Sehova ke ina fakahā mai te ʼu fakamahino fuli ʼaia. (Tāʼaga Lea 4:18) Koia ʼe mole tou līaki anai te kautahi ʼaē ʼe fakaʼaogaʼi e te ʼAtua, heʼe tou sio ki te fakamoʼoni ʼo tana tapuakina ia te kautahi ʼaia.—Gaue 6:7; 1 Kolonito 3:6.
Tou Tokaga Naʼa Tou Kākāʼi Pe Ia Tatou Totonu
11. He koʼe ʼe kākāʼi e te hahaʼi ia nātou totonu pe?
11 ʼE ʼi ai te aga ʼa te tagata ʼe fia gāueʼi e Satana—ko tona kākāʼi pe ia ia totonu. ʼE ʼui fēnei ia Selemia 17:9: “ ʼE kākā te loto, ʼo laka ʼi te meʼa kehe fuli, pea ʼe mole hona faitoʼo.” Pea neʼe tohi fēnei e Sakopo: “ ʼE ʼahiʼahiʼi te tagata takitokotahi mokā ina tuku ia ia ke taki pea mo kākāʼi e tona holi ʼo ia totonu.” (Sakopo 1:14, MN) Kapau ʼe kākāʼi tatou e totatou loto pea ʼe feala ke ina taki tuʼumaʼu ia tatou ki te agahala, ke tou holi kiai pea mo tou leleiʼia. Ko te manatu ʼaia ʼe kākā, heʼe kita tō ai ki te agahala ʼaē ʼe iku ki te fakaʼauha.—Loma 8:6.
12. ʼE tou lava tō feafeaʼi ki te hele ʼaē ko tatatou kākāʼi pe ia tatou totonu?
12 Ko tatatou kākāʼi pe ia tatou ʼe feala ke tou tō gafua ai ki he hele. Ko te loto kākā ʼe lagi ina maʼu anai he takuʼaki ki he faʼahi ʼe kovi ʼo totatou ʼulugaaga peʼe kapau ʼe tou fai he agahala mamafa. (1 Samuele 15:13-15, 20, 21) Ko te fefeka ʼo totatou loto ʼe ina kumi anai he ʼu takuʼaki ki he aga ʼe mole lelei. Ohage la ko te ʼu fakafiafia. Ko ʼihi fakafiafia ʼe ʼaoga pea mo lelei. Kae ʼi te ʼu fakafiafia ʼaē ʼe foaki mai e te mālama ʼaenī, ʼe lahi ai te ʼu meʼa fakalialia pea mo heʼeʼaoga—ʼi te ʼu ʼata, mo te ʼu polokalama televisio pea mo te Internet. ʼE faigafua hatatou manatu hala, ʼo tou ʼui ʼe mole fua kovi anai kia tatou tatatou sioʼi te ʼu fakafiafia kovi ʼaia. ʼE toe manatu fēnei e ʼihi: “Kapau ʼe mole hoha toku leʼo ʼo loto, pea ʼe mole hona meʼa ʼe kovi!” Kae ko te hahaʼi ʼaia ʼe nātou ‘kākāʼi pe ia nātou totonu ʼaki he ʼu fakakaukau hala.’—Sakopo 1:22.
13, 14. (a) Koteā te faʼifaʼitaki ʼo te Tohi-Tapu ʼe ina fakahā mai ʼe mole takitaki lelei tuʼumaʼu tatou e totatou leʼo ʼo loto? (b) Koteā ʼaē ʼe tou lava fai ke mole tou kākāʼi ia tatou totonu?
13 ʼE tou lava tokakaga feafeaʼi ke mole tou kākāʼi ia tatou totonu? ʼUluaki, tou manatuʼi ʼe mole tonu ke tou falala tuʼumaʼu ki totatou leʼo ʼo loto. Ohage ko te ʼapositolo ko Paulo. ʼI muʼa ʼo tana liliu ko he Kilisitiano, neʼe ina fakatagaʼi te ʼu tisipulo ʼa Kilisito. (Gaue 9:1, 2) Neʼe mole hoha tona leʼo ʼo loto. Kae neʼe mole lelei tana aga. Neʼe ʼui fēnei e Paulo: “Nee au fai i te fakapouli, nee mole au mau te tui.” (1 Timoteo 1:13) Koia, kapau ʼe mole hoha totatou leʼo ʼo loto ʼo ʼuhiga mo he fakafiafia, pea ʼe mole faka ʼuhiga leva ʼe lelei te meʼa ʼaē ʼe tou fai. ʼE feala ke tou falala ki te takitaki ʼo totatou leʼo ʼo loto ʼaē ʼe maʼa, mo kapau neʼe akoʼi lelei e te Folafola ʼa te ʼAtua.
14 Ke mole tou kākāʼi ia tatou totonu tou manatuʼi te ʼu tokoni ʼe feala ke ʼaoga kia tatou. Koutou sivisivi fakalelei ia koutou ʼi te faikole. (Pesalemo 26:2; 2 Kolonito 13:5) Ko hakotou sivisivi fakahagatonu ia koutou ʼe koutou lava mahino ai ki te ʼaoga ʼaē ke koutou fetogi takotou faʼahiga manatu peʼe ko takotou aga. Koutou fakalogo ki te ʼu tokoni ʼo tokotou ʼu tēhina. (Sakopo 1:19) ʼE feala pe ke mole totonu takotou sivisivi ia koutou, koia ʼe lelei ke koutou fakalogo ki te ʼu tokoni lelei ʼa te kau Kilisitiano ʼaē kua fakapotopoto. Kapau ʼe koutou fai he ʼu tonu peʼe koutou fai he meʼa ʼe mole lelei kia mata ʼo te kau Kilisitiano ʼaē kua fakapotopoto, mo māhani ʼi te maʼuli, pea ʼe feala ke koutou fai te fehuʼi ʼaenī: ‘Neʼe ʼau akoʼi fakalelei koa toku leʼo ʼo loto peʼe kākāʼi ʼau e toku loto?’ Koutou lau tuʼumaʼu te Tohi-Tapu pea mo te ʼu tohi faka Tohi-Tapu. (Pesalemo 1:2) Ko te faʼahi ʼaia ʼe tokoni atu anai ke koutou taupau takotou ʼu manatu, mo takotou ʼu aga, pea mo te ʼu meʼa ʼaē ʼe koutou logoʼi, ke mulimuli ki te ʼu pelesepeto fakaʼatua.
Tou Tokakaga Ki Te ʼu Loi ʼa Satana
15, 16. (a) ʼI tana faiga ʼaē ke ina kākāʼi tatou, koteā te ʼu loi e fakaʼaogaʼi e Satana? (b) Koteā ʼaē ʼe feala ke tou fai ke mole kākāʼi tatou e te ʼu loi ʼaia?
15 ʼE fakaʼaogaʼi e Satana te ʼu loi kehekehe ʼi tana faiga ʼaē ke ina kākāʼi tatou. ʼE ina loto ke tou tui ʼe tou maʼu te maʼuli fiafia ʼi te ʼu koloā, kae ʼi te agamāhani ʼe mole koia. (Tagata Tānaki 5:10-12) ʼE ina loto ke tou tui ko te mālama agakovi ʼaenī ʼe mole pulihi anai, logola ʼe ʼi ai te fakamoʼoni lelei ʼe tou maʼuʼuli ʼi “te u aho fakamuli.” (2 Timoteo 3:1-5) ʼE faka mafola e Satana te manatu ʼaē ʼe mole kovi te fai ʼo te ʼu aga heʼeʼaoga, tatau aipe peʼe ko nātou ʼaē ʼe nātou kumi te ʼu fakafiafia ʼi te agamāhani ʼe nātou utu te ʼu fua kovi. (Kalate 6:7) Koteā ʼaē ʼe tonu ke tou fai ke mole kākāʼi tatou e te ʼu loi ʼaia?
16 Te ʼu fua lelei ʼe tou maʼu mai te ʼu faʼifaʼitaki ʼi te Tohi-Tapu. ʼE maʼu ʼi te Tohi-Tapu he ʼu faʼifaʼitaki ʼo nātou neʼe kākāʼi e te ʼu loi ʼa Satana. Neʼe nātou manako ki te ʼu koloā, neʼe mole kei nātou tokagaʼi te maʼuhiga ʼo te ʼu temi, peʼe nātou tō ki te aga heʼeʼaoga—ʼo nātou utu tona ʼu fua kovi. (Mateo 19:16-22; 24:36-42; Luka 16:14; 1 Kolonito 10:8-11) Tou ako mai te ʼu faʼifaʼitaki ʼo totatou temi. Ko te meʼa fakaʼofaʼofa ʼaē ʼe hoko, ko ʼihi Kilisitiano neʼe galo kia nātou te maʼuhiga ʼo totatou temi, pea mo nātou manatu ʼe ʼi ai te meʼa lelei ʼe nātou hala ai ʼuhi ko tanatou tauhi ki te ʼAtua. ʼE lagi nātou mavae ʼi te moʼoni ʼo nātou mulimuli ki te ʼu fakafiafia ʼo te maʼuli. Kae ko te hahaʼi ʼaia ʼe nātou tutuʼu ʼi “he kele ʼe mahekeheke,” heʼe tonu anai ʼi he temi ke nātou utu te ʼu fua ʼo tanatou aga heʼe faka lotu. (Pesalemo 73:18, 19) ʼE ko he aga fakapotopoto ke tou ako mai te ʼu hala neʼe fai e ʼihi.—Tāʼaga Lea 22:3.
17. He koʼe ʼe faka mafola e Satana te loi ʼaē ko Sehova ʼe mole ʼofa kia tatou pea ʼe mole tou maʼuhiga kia te ia?
17 ʼE ʼi ai te tahi loi ʼe fakaʼaogaʼi lelei e Satana—te loi ʼaē ko Sehova ʼe mole ʼofa ia tatou pea ʼe mole tou maʼuhiga kia te ia. Neʼe maʼu e Satana te ʼu lauʼi afe taʼu ke ina vakavakaʼi te ʼuhiga ʼo te hahaʼi agahala. ʼE ina ʼiloʼi lelei ko te lotovaivai ʼe feala ke ina fakavaivaiʼi tatou. (Tāʼaga Lea 24:10) Koia neʼe ina faka mafola ai te loi ʼaē ʼe mole tou maʼuhiga kia mata ʼo te ʼAtua. E lagi tou tuku anai tatatou tauhi kia Sehova, mo kapau kua “tokahi” tatou pea mo tou tui papau ʼe mole tokaga ia Sehova kia tatou. (2 Kolonito 4:9, MN) ʼE ko te meʼa ʼaia ʼaē ʼe loto kiai ia Satana, te Kākā lahi. Koteā ʼaē ʼe feala ke tou fai ke mole kākāʼi tatou e te loi ʼaia ʼa Satana?
18. ʼE fakamoʼoni feafeaʼi e te Tohi-Tapu ʼe ʼofa Sehova kia tatou?
18 Ke maʼuhiga kia tatou takitokotahi te meʼa ʼaē ʼe ʼui e te Tohi-Tapu ʼo ʼuhiga mo te ʼofa ʼo te ʼAtua kia tatou. ʼE fakaʼaogaʼi e te Folafola ʼa te ʼAtua he ʼu faʼifaʼitaki ʼe malave ki te loto, moʼo fakahā lelei mai ʼe tokagaʼi tatou e Sehova pea mo ʼofa kia tatou takitokotahi. ʼI hona ʼaluʼaga fakatā, ʼe ina ʼai tokotou ʼu loʼimata ki tana “taga kiliʼi manu,” ko tona faka ʼuhiga ʼaē ʼe sio pea mo ina manatuʼi takotou tagi ʼi takotou faiga ʼaē ke koutou nonofo agatonu. (Pesalemo 56:8) ʼE ina ʼiloʼi te temi ʼaē ʼe ‘lavea ai tokotou loto’ pea ʼe fakaōvi atu kia koutou ʼi te ʼu temi ʼaia. (Pesalemo 34:18) ʼE ina ʼiloʼi lelei koutou, pea mo ina ʼiloʼi peʼe ko ‘tokotou ʼu fuluʼi ʼulu e fia.’ (Mateo 10:29-31, MN ) Ko te meʼa ʼaē ʼe maʼuhiga, ko te ʼAtua neʼe ina “foaki mai tona Alo Ulutokotahi.” (Soane 3:16; Kalate 2:20) ʼI ʼihi temi, ʼe lagi faigataʼa hakotou tui ʼe faka ʼuhiga te ʼu vaega Tohi-Tapu ʼaia kia koutou takitokotahi. Kae ʼe tonu ke tou tui ki te ʼu folafola ʼa Sehova. ʼE loto ia Sehova ke tou tui ʼe ʼofa kia tatou fuli pea mo tatou takitokotahi.
19, 20. (a) He koe ʼe maʼuhiga ke tou ʼiloʼi pea mo tou līaki te loi ʼaē ʼe ʼui ai e Satana ʼe mole ʼofa ia Sehova kia koutou? (b) Koteā te tokoni ʼe fai e te tagata taupau feʼaluʼaki kia nātou ʼaē kua lotovaivai?
19 Tou ʼiloʼi pea mo tou līaki te loi. Kapau ʼe koutou ʼiloʼi he tahi ʼe loi, pea ʼe feala ke koutou puipui ia koutou ke mole ina kākāʼi ia koutou. ʼO toe feiā pe, ko takotou ʼiloʼi ʼaē ʼe loto ia Satana ke koutou tui ko Sehova ʼe mole ʼofa kia koutou, ʼe feala ke liliu ai ko he mālohi moʼo tokoni kia koutou. ʼI tana ʼosi lau te alatike ʼi Te Tule Leʼo ʼo ʼuhiga mo te ʼu kākā ʼa Satana, neʼe ʼui fēnei e te tuagaʼane: “Neʼe mole ʼau ʼiloʼi ko Satana ʼe ina fakaʼaogaʼi te ʼu meʼa ʼaē ʼe ʼau logoʼi moʼo fakaloto vaivaiʼi ʼau. ʼI taku kua ʼiloʼi ia te faʼahi ʼaia ʼe ʼau maʼu ai he mālohi ke ʼau tauʼi te ʼu meʼa ʼaia ʼe ʼau logoʼi.”
20 Koutou tokagaʼi te fakamatala ʼa te tagata taupau feʼaluʼaki ʼi te fenua ʼo Amelika Saute. ʼI tana ʼaʼahi faka tauhi ōvi ʼaē ʼe ina fai ki te ʼu tēhina neʼe lotovaivai, ʼi te agamāhani ʼe ina fehuʼi fenei kia nātou: ‘ ʼE ke tui koa ki te Tahitolu?’ ʼE tali fēnei e ia kua lotovaivai: ‘Kailoa,’ heʼe ina ʼiloʼi ʼe ko te loi ʼaia ʼa Satana. Pea ʼe toe fehuʼi age e te tēhina taupau: ‘ ʼE ke tui koa ki te ʼifeli?’ ʼO ina toe tali fēnei: ‘Kailoa!’ Pea ʼe ʼui leva e te tēhina taupau ʼe ʼi ai te tahi loi ʼe fakaʼaogaʼi e Satana, ʼi te agamāhani ʼe mole kita ʼiloʼi ʼe ko he loi. ʼE ina fakahā age te pasina 249, te palakalafe 21 ʼo te tohi Approchez-vous de Jéhovah,b ʼaē ʼe fakahā ai ʼe ko te loi te ʼui ʼaē ko Sehova ʼe mole ʼofa kia tatou takitokotahi. ʼE fakamatala e te tēhina taupau feʼaluʼaki te ʼu fua lelei ʼo tana tokoni ʼaia kia nātou ʼaē kua lotovaivai, ke nātou ʼiloʼi pea mo līaki te loi ʼaia ʼa Satana.
Koutou Hāofaki Ia Koutou Mai Te Kākā
21, 22. He koʼe ʼe tou lava ʼiloʼi te ʼu kākā ʼa Satana, pea koteā ʼaē ʼe tou fakatotonu ke tou fai?
21 ʼI te fakaʼosi ʼo te ʼu ʼaho fakamuli ʼaenī, ʼe mole tou punamaʼuli anai ki te haga fai e Satana te ʼu tuʼuga loi pea mo te ʼu kākā. Meʼa lelei, heʼe fakahā mai e Sehova te ʼu aga fakakākā ʼa Satana. Ko te Tohi-Tapu pea mo te ʼu tohi ʼaē ʼe fakatafito ki te Tohi-Tapu ʼa “te tagata kaugana agatonu mo poto” ʼe fakahā lelei ai te ʼu kākā ʼa te Tevolo. (Mateo 24:45, MN) ʼAki te ʼu fakatokaga ʼaē ʼe fai mai kia tatou, kua tou ʼiloʼi peʼe koteā ʼaē ʼe tonu ke tou fai.—2 Kolonito 2:11.
22 Koia tou tokakaga ki te ʼu manatu ʼa te kau ʼaposita. Tou lotomālohi ke mole tou tō ki te hele ʼaē ko te mulimuli ki he ʼu manatu hala. Tou tokakaga ʼo vakavakaʼi pea mo līaki te ʼu loi fuli ʼa Satana. Kapau ʼe tou fai feiā, pea ʼe tou hāofaki anai tatatou ʼu felogoi mo “te ʼAtua ʼo te moʼoni,” ʼaē ʼe fehiʼa ki te kākā.—Pesalemo 31:5; Tāʼaga Lea 3:32.
[Kiʼi nota]
a ʼO ʼuhiga mo te kupu “ ʼe ina fakahēʼi” ʼaē ʼe tuʼu ia Apokalipesi 12:9 (MN ), ʼe ʼui e te tohi ʼe ‘faka ʼuhiga ki he gāue ʼe fai hoholo ʼo liliu ko he meʼa māhani.’
b Neʼe tā e te kau Fakamoʼoni ʼa Sehova.
ʼE Kei Koutou Manatuʼi Koa?
• He koʼe kua lahi te ʼu kākā ʼi te malamanei ia ʼaho nei?
• Koteā ʼaē ʼe tonu ke tou fai ke mole kākāʼi pe ia tatou e te kau ʼaposita?
• Koteā ʼaē ʼe tonu ke tou fai ke mole tou kākāʼi ia tatou totonu pe?
• Koteā ʼaē ʼe tonu ke tou fai ke mole kākāʼi ia tatou e te ʼu loi ʼa Satana?
[Paki ʼo te pasina 17]
ʼAua naʼa koutou kākāʼi ia koutou totonu pe ʼo ʼuhiga mo te ʼu fakafiafia
[Paki ʼo te pasina 18]
Ke ʼaua naʼa koutou kākāʼi ia koutou totonu, koutou sivisivi ia koutou ʼi te faikole, mo fakalogo kia nātou ʼe fai tokoni atu, pea mo lau tuʼumaʼu te Folafola ʼa te ʼAtua