“Fai Te Gāue ʼa Te Tagata Faka Mafola Evaselio”
“Taupau tau poto ia meʼa fuli, . . . fai te gāue ʼa te tagata faka mafola evaselio.”—2 Timoteo 4:5, MN.
1. Koteā te gāue ʼaē neʼe tuku age e Sesu ki tana kau tisipulo?
KO TE huafa ʼo Sehova pea mo tana ʼu fakatuʼutuʼu kua tala ʼi te kele katoa. ʼE tupu te faʼahi ʼaia heʼe ko te hahaʼi ʼaē kua foaki tonatou maʼuli ki te ʼAtua, ʼe nātou fakahoko fakalelei te gāue ʼaē neʼe tuku age e Sesu Kilisito ki tana ʼu tisipulo, ʼi tana ʼui fēnei: “Koutou ʼolo pea ke koutou fai ni ʼu tisipulo ʼi te hahaʼi ʼo te ʼu fenua fuli pe, ʼo papitemaʼi ia nātou ʼi te huafa ʼo te Tāmai pea mo te ʼAlo pea mo te laumālie maʼoniʼoni, ʼo koutou ako ia nātou ke nātou mulimuli ki te ʼu meʼa fuli pe ʼaē neʼe ʼau fakatotonu atu kia koutou.”—Mateo 28:19, 20, MN.
2. Koteā te tokoni neʼe fai ki te tagata taupau ko Timoteo, pea ia ʼaho nei ʼe lava fakahoko feafeaʼi e te ʼu tagata taupau Kilisitiano tonatou minisitelio?
2 Neʼe fakahoko fakalelei te gāue ʼaia e te ʼu tisipulo ʼa Sesu ʼo te ʼuluaki sēkulō. Ohage la, neʼe uga fēnei e te ʼapositolo ko Paulo te tagata taupau Kilisitiano ko Timoteo: “Fai te gāue ʼa te tagata faka mafola evaselio, fakahoko katoa tou minisitelio.” (2 Timoteo 4:5, MN ) Ia ʼaho nei, ʼe ʼi ai te faʼahiga fakahoko e te tagata taupau ia tona minisitelio: ko tana faʼafai ʼi te faka mafola ʼo te Puleʼaga, ʼo kau tuʼumaʼu ki te minisitelio. Ohage la, ko te tagata taupau ʼo te Ako Tohi ʼe ina maʼu te pilivilesio ʼaē ke ina takitaki te gāue fai faka mafola pea mo akoʼi ʼihi ki te gāue ʼaia. Neʼe fakahoko e Paulo tona maʼua ʼaē ko te tala ʼo te logo lelei pea neʼe tokoni ki te akoʼi ʼo ʼihi ki te minisitelio.—Gaue 20:20; 1 Kolonito 9:16, 17.
Ko Te Kau Faka Mafola Evaselio ʼo Te Temi Muʼa
3, 4. Koteā te ʼu meʼa ʼaē neʼe fai e Filipe ʼi tana faka mafola te evaselio?
3 Neʼe ʼiloa te ʼu ʼuluaki Kilisitiano ko he kau faka mafola evaselio faʼafai. Tou vakaʼi te tagata faka mafola evaselio ko Filipe. Neʼe kau ʼi te ʼu “tagata fakaapaapaʼia e fitu, e natou fonu i te Laumalie-Maonioni mo te poto,” ʼaē neʼe fili moʼo fakahoko te tufa fakatatau ʼo te meʼa kai ki te kau vitua Kilisitiano ʼaē ʼe lea faka Keleka pea mo faka Hepeleo ʼi Selusalemi. (Gaue 6:1-6) ʼI tanatou ʼosi fakahoko te gāue makehe ʼaia pea mo te mavetevete ʼo te kau Kilisitiano fuli ʼuhi ko te fakataga, gata pe ki te kau ʼapositolo, neʼe ʼalu ia Filipe ki Samalia. Neʼe ina tala ai te logo lelei pea ʼaki te mālohi ʼo te laumālie maʼoniʼoni neʼe ina kapu te ʼu temonio pea mo faka mālōlō te kau ketu pea mo te kau palalisia. Tokolahi te kau Samalitana neʼe nātou tali te logo ʼo te Puleʼaga pea neʼe nātou papitema. ʼI tanatou logo ki te ʼu meʼa ʼaia, neʼe fekauʼi e te kau ʼapositolo ʼi Selusalemi te ʼu ʼapositolo ko Petelo pea mo Soane ke nā ʼolo ki Samalia, ke feala kia nātou ʼaē neʼe hoki papitema ke nātou maʼu te laumālie maʼoniʼoni.—Gaue 8:4-17.
4 Neʼe taki leva e te laumālie ʼo te ʼAtua ia Filipe ke felāveʼi mo te enuke Etiopea ʼi te ala ʼaē ʼe ʼalu ki Kasa. ʼI te ʼosi fakamahino lelei e Filipe te lea faka polofeta ʼa Isaia, ko te “minisi [ʼaia] a Kanatake, te finealiki o Etiopi,” neʼe tui kia Sesu Kilisito pea mo papitema. (Gaue 8:26-38) Pea neʼe alu leva ia Filipe ki Asote pea mo Sesalea, ʼo “ina fagonogono te Logolelei i te atu kolo fuape.” (Gaue 8:39, 40) ʼE mahino papau ia neʼe ko he faʼifaʼitaki lelei ʼaē neʼe ina tuku mai ʼi tana fai te gāue ʼa te tagata faka mafola evaselio.
5. Koteā ʼaē neʼe ʼiloa tāfito ai te ʼu ʼofafine e toko fā ʼo Filipe?
5 Neʼe kei gāue pe ia Filipe ʼi te minisitelio ʼi Sesalea hili taʼu e 20 ki muli age. ʼI te nonofo ʼa Paulo pea mo Luka ʼi tona ʼapi, “nee i ai ona ofafine e fa pea nee ko he u polofeta.” (Gaue 21:8-10) ʼE mahino ia neʼe akoʼi fakalelei nātou ʼi te faʼahi fakalaumālie, mo nātou faʼafai ʼi te minisitelio, pea mo nātou maʼu te pilivilesio ke nātou fai fakakikite. Ko te faʼafai ʼa te ʼu mātuʼa ʼi te minisitelio ʼe feala ia ʼaho nei, ke malave lelei ki tanatou ʼu tamaliki tagata pea mo fafine, ʼo uga nātou ke nātou faka mafola te evaselio ʼi tonatou maʼuli katoa.
Te Kau Faka Mafola Faʼafai ʼo Te Evaselio Ia ʼAho Nei
6. Koteā te ʼu fua lelei neʼe maʼu e te kau faka mafola evaselio ʼo te ʼuluaki sēkulō?
6 ʼI tana lea faka polofeta lahi ʼo ʼuhiga mo totatou temi pea mo te temi ʼo te fakaʼosi, neʼe tala fēnei e Sesu Kilisito: “ ʼE tonu muʼa ke ʼuluaki faka mafola te logo lelei ʼi te ʼu puleʼaga fuli.” (Maleko 13:10, MN ) ʼE hoko mai anai te fakaʼosi ʼi te ʼosi faka mafola ʼo te logo lelei “ ʼi te kele katoa.” (Mateo 24:14, MN ) ʼI te faka mafola ʼo te logo lelei e Paulo pea mo te kau faka mafola evaselio ʼo te ʼuluaki sēkulō, tokolahi neʼe nātou liliu ʼo tui, pea neʼe fakatuʼu te ʼu kokelekasio ʼi te ʼu potu kehekehe ʼo te Puleʼaga Loma. Ko te ʼu tagata ʼāfea ʼaē neʼe hinoʼi ke nātou gāue ʼi te ʼu kokelekasio ʼaia, neʼe nātou kau mo tonatou ʼu tēhina pea mo tuagaʼane ki te gāue fai faka mafola evaselio pea mo fakahoko atu te gāue fai faka mafola ki te ʼu potu taupotu. Neʼe tuputupu mālohi te folafola ʼa Sehova ʼi te temi ʼaia ohage pe ko totatou temi, koteʼuhi ko te ʼu lauʼi miliona kau Fakamoʼoni ʼa Sehova ʼe nātou fai te gāue ʼaē ko te faka mafola ʼo te evaselio. (Gaue 19:20) ʼE koutou kau koa ia nātou ʼaia ʼaē ʼe nātou fakavikiviki fakafiafia kia Sehova?
7. Koteā ʼaē ʼe fai e te kau fai faka mafola ʼo te Puleʼaga ia ʼaho nei?
7 Tokolahi te kau fai faka mafola ʼo te Puleʼaga ia ʼaho nei ʼe nātou fakaʼaogaʼi lelei te ʼu faigamālie moʼo fakalahi tanatou gāue ʼaē ko te faka mafola ʼo te evaselio. Ko te ʼu lauʼi afe ʼe nātou misionea, pea ko te ʼu lauʼi teau afe ʼe nātou pionie, ʼo nātou gāue temi katoa peʼe vaeluaʼi temi ʼi te faka mafola ʼo te evaselio. Pea ʼe ko he toe gāue lelei ʼaē ʼe fai e te hahaʼi tagata, mo fafine, pea mo te fānau ʼi tonatou ʼuhiga kau fai faka mafola faʼafai ʼo te Puleʼaga! Koia ko te hahaʼi fuli ʼa Sehova ʼe nātou maʼu tonatou tapuakina lahi, ʼi tanatou tauhi kia te ia ʼi te logo tahi, ʼi tonatou ʼuhiga kau Kilisitiano faka mafola evaselio.—Sakalia 3:9.
8. Ko te fakaʼiloga fea ʼaē ʼe fai ia ʼaho nei, pea ko ai ʼaē ʼe nātou fakahoko?
8 Neʼe foaki e te ʼAtua ki te ʼu tisipulo fakanofo ʼa Sesu, te maʼua ʼaē ke nātou tala te logo lelei ʼi te kele katoa. ʼI te gāue faka mafola evaselio ʼaia, ʼe tokoni kia nātou te “tahi ʼu ōvi” ʼa Kilisito ʼaē ʼe tuputupu tonatou kaugamālie. (Soane 10:16, MN ) Ohage ko tona fakakikite, ko te gāue ʼaia ʼaē ʼe ina hāofaki te ʼu maʼuli, ʼe faka ʼuhiga ki te tohi ʼo te fakaʼiloga ki te laʼe ʼo nātou ʼaē ʼe maʼuli mamahi pea mo fetāgihi ʼuhi ko te ʼu meʼa fakalialia ʼaē ʼe hoko ʼi te temi nei. Kua ōvi mai te temi ʼaē ka fakaʼauha ai te agakovi. ʼO talitali ki te temi ʼaia, ʼe ko he pilivilesio lahi hatatou ʼave ki te hahaʼi fuli ʼo te kele, te ʼu moʼoni ʼaē ʼe nātou hāofaki te maʼuli!—Esekiele 9:4-6, 11.
9. Ko te tokoni fea ʼaē ʼe lava fai kia nātou ʼaē ʼe foʼou ʼi te minisitelio?
9 Kapau kua fualoa tatatou kau ki te gāue ʼaē ko te faka mafola ʼo te evaselio, pea ʼe mahino ia ʼe feala ke tou tokoni kia nātou ʼaē ʼe foʼou ʼi te kokelekasio. ʼE lagi feala ke nātou kaugā fai faka mafola mo tatou. Ko te kau tagata ʼāfea ʼe nātou fia fai anai ia meʼa fuli ke tuputupu ai te ʼu tēhina mo tuagaʼane ʼi te faʼahi fakalaumālie. Ko te ʼu faiga lelei pea mo agavaivai ʼa te ʼu tagata taupau ʼe feala ke tokoni lahi ki ʼihi atu ke nātou faʼafai pea mo liliu ko he kau faka mafola evaselio ʼe maʼu honatou ʼu fua ʼe lelei.—2 Petelo 1:5-8.
Te Fai Faka Mafola ʼi Te ʼu ʼApi
10. Koteā te faʼifaʼitaki neʼe tuku e Kilisito pea mo tana ʼu ʼuluaki tisipulo ʼi te minisitelio?
10 Ko Sesu Kilisito neʼe ina tuku he faʼifaʼitaki lelei ki tana ʼu tisipulo ʼi tona ʼuhiga tagata faka mafola evaselio. ʼO ʼuhiga mo te minisitelio ʼa Kilisito pea mo tana kau ʼapositolo, ʼe ʼui fēnei e te Folafola ʼa te ʼAtua: “Neʼe ʼalu ki te ʼu kolo lalahi pea mo te ʼu kolo liliki, ʼo fai faka mafola pea mo kalagaʼi te logo lelei ʼo te puleʼaga ʼo te ʼAtua. Pea neʼe ʼolo te toko hogofulu-ma-lua mo ia.” (Luka 8:1, MN ) Neʼe feafeaʼi ʼo ʼuhiga mo te kau ʼapositolo? ʼI te ʼosi folahi ʼo te laumālie maʼoniʼoni ʼi te Penikosite ʼo te taʼu 33 ʼo totatou temi, ʼi “te aho fuape, nee mole gata tanatou akonaki pea mo tanatou fagonogono te Logolelei, [ʼo ʼuhiga mo] Sesu.”—Gaue 5:42.
11. ʼO mulimuli kia Gaue 20:20, 21, koteā ʼaē neʼe fai e te ʼapositolo ko Paulo ʼi tona minisitelio?
11 ʼUhi ko tana gāue faʼafai moʼo faka mafola te evaselio, neʼe feala ki te ʼapositolo ko Paulo ke ina ʼui fēnei ki te ʼu tagata ʼāfea ʼo Efeso: “Neʼe mole ʼau tātāʼofi ʼau ʼi te fakahā atu kia koutou te ʼu meʼa fuli ʼaē neʼe ʼaoga, pea mo akoʼi koutou ʼi muʼa ʼo te hahaʼi pea ʼi te ʼu ʼapi.” ʼI te ‘faiako ʼa Paulo ʼi te ʼu ʼapi,’ neʼe ko he ʼaʼahi koa ki te ʼu ʼapi ʼo te kau atolasio ʼa Sehova, moʼo fai he ʼu ʼaʼahi faka tauhi ōvi? Kailoa, heʼe ina hoko atu ʼo fakamahino fēnei: “Neʼe ʼau fakamoʼoni ʼaki toku loto katoa ʼi muʼa ʼo te kau Sutea pea mo te kau Keleka ʼo ʼuhiga mo te fakahemala ki te ʼAtua pea mo te tui ki totatou ʼAliki ko Sesu.” (Gaue 20:20, 21, MN ) ʼI te agamāhani, ko nātou ʼaē kua ʼosi foaki tonatou maʼuli kia Sehova neʼe mole ʼaoga ke akoʼi nātou ʼo ʼuhiga mo “te fakahemala ki te ʼAtua pea mo te tui ki totatou ʼAliki ko Sesu.” Neʼe akoʼi e Paulo te kau tagata ʼāfea ʼo Efeso ki te minisitelio ʼi te ʼu ʼapi, kae ki te hahaʼi ʼaē neʼe mole heʼeki tui neʼe ina akoʼi nātou ʼo ʼuhiga mo te fakahemala pea mo te tui. ʼI tana fai te faʼahi ʼaia, neʼe faʼifaʼitakiʼi e Paulo te faʼahiga fai ʼa Sesu.
12, 13. Ohage ko tona tuʼu ia Filipe 1:7, koteā ʼaē neʼe fai e te hahaʼi ʼa Sehova ʼo ʼuhiga mo tanatou lava fai faka mafola?
12 ʼE feala ke faigataʼa te fakahoko ʼo te minisitelio ʼi te ʼu ʼapi. Ohage la, ʼe ʼiʼita ʼihi mokā tou ʼolo age ki tonatou ʼapi ʼaki te logo ʼo te Tohi-Tapu. ʼE mole tou loto ke ʼiʼita te hahaʼi. Kae ko te faka mafola ʼi te ʼu ʼapi ʼe ko he gāue ʼe fakatotonu mai ʼi te Tohi-Tapu, pea ko te ʼofa ki te ʼAtua pea mo totatou kāiga ʼaē ʼe ina uga tatou ke tou fai te gāue fai faka mafola ʼaia. (Maleko 12:28-31) Moʼo fakagafua tatatou fai faka mafola ʼi te ʼu ʼapi, neʼe tou ʼolo ki te ʼu telepinale, ʼo kau ai mo te Telepinale Lahi ʼo Amelika. (Filipe 1:7) Teitei ʼi te ʼu ʼaluʼaga fuli, neʼe tali e te telepinale tatatou gāue. Ohage ko te tonu ʼaenī neʼe fai:
13 “Ko te tufa ʼo te ʼu kiʼi pepa lotu ʼe ko he faʼahiga fai ʼāfea ʼo te gāue misionea ʼaē ko te tala ʼo te evaselio—ohage tona ʼāfea ko te ʼāfea ʼo te hisitolia ʼo te ʼu fale tā tohi. Neʼe ko he mālohi ʼaupito ʼi te ʼu gāue faka lotu kehekehe ʼi te ʼu temi fuli pe. Ko te faʼahiga faka mafola ʼaia ʼo te evaselio kua toe lahi age tona fai ia ʼaho nei, ʼi te ʼu lotu kehekehe, ʼaē ʼe ʼi ai tonatou ʼu hahaʼi ʼe nātou tala te Evaselio ki te ʼu lauʼi afe ʼapi pea mo nātou kumi he ʼu hahaʼi ke nātou kau ki tanatou lotu. . . . ʼI te ʼUluaki Fakatotonu [ʼo Te ʼu Lao ʼo Amelika], ko te faʼahiga gāue faka lotu ʼaia ʼe tatau mo te tauhi ʼaē ʼe fai ʼi te ʼu ʼēkelesia pea mo te fai faka mafola mai te ʼu faiakonakiʼaga.”—Murdock contre Pennsylvania, 1943.
He Koʼe ʼe Tou Haga Fai Faka Mafola?
14. Koteā te ʼu faʼahi ʼaē ʼe feala ke fua lelei ki totatou minisitelio mo kapau ʼe fai fakatahi?
14 ʼE lahi te ʼu tupuʼaga ke tou fai faka mafola ai ʼi te ʼu ʼapi. ʼI te temi fuli pe ʼaē ʼe tou palalau ai ki he tahi, ʼe tou tō ai te pulapula ʼo te moʼoni ʼo te Tohi-Tapu. ʼI tatatou fai te ʼu ʼaʼahi, ʼe tou faiga ke tou fakapala. Pea ʼe feala ke fua lelei te fai fakatahi ʼo te ʼu faʼahi ʼaia e lua, he neʼe tohi fēnei e Paulo: “Ko au, nee au to, nee fakapala e Apolose, kae nee fakatupu e te Atua.” (1 Kolonito 3:6) Koia tou haga ‘tō pea mo fakapala,’ ʼo tou falala ko Sehova ʼe ina ‘fakatupu ake anai.’
15, 16. He koʼe ʼe tou ʼolo tuʼumaʼu ʼo ʼaʼahi te hahaʼi ʼi tonatou ʼu ʼapi?
15 ʼE tou faka mafola te evaselio heʼe fakalogo kiai te maʼuli ʼo te hahaʼi. ʼI tatatou fai faka mafola, ʼe feala ke tou hāofaki ia tatou pea mo nātou ʼe fakalogo mai kia tatou. (1 Timoteo 4:16) Ka tou ʼiloʼi ʼe tuʼutāmaki he tahi, ʼe mole tou faiga mālohi anai koa ke tou tokoni kia ia? Koia, mai tona ʼaluʼaga ʼaē ʼe feala ke hāofaki te hahaʼi, ʼe tou ʼaʼahi tuʼa lahi ia nātou ʼi tonatou ʼu ʼapi. ʼE feala pe ke hoko he ʼu fetogi. Ko he tahi ʼe mole fakalogo ʼuhi heʼe maʼumaʼua fau, ʼe feala ʼi he tahi temi ke fia logo ki te logo ʼa te Tohi-Tapu. ʼE feala ke tou felāveʼi mo he tahi kehe ʼo te loto fale, pea ʼe feala ke hoko ai he fai palalau ki te Tohi-Tapu.
16 ʼE lagi fetogi te ʼu ʼaluʼaga ʼo te hahaʼi, pea mo tanatou aga. Ohage la, ko he tahi ʼe lotomamahi heʼe kua mate he tahi neʼe ʼofa ai, ʼe feala ke tupu ai hana fia fakalogo ki te logo ʼo te Puleʼaga. ʼE tou fakaʼamu ke tou fakaloto fīmālieʼi ia ia, ʼo tou fakamahino ʼe ʼaoga kia ia te ʼu manatu fakalaumālie, pea mo tou fakahā age peʼe ina lava maʼu feafeaʼi.—Mateo 5:3, 4.
17. Koteā te tupuʼaga tāfito ʼo tatatou fai faka mafola?
17 Ko te tupuʼaga tāfito ʼo tatatou fai faka mafola ʼi te ʼu ʼapi pea mo tatatou kau ki te tahi ʼu agaaga ʼo te minisitelio, ʼe ko tatatou fia tāpuhā ia te huafa ʼo Sehova. (Ekesote 9:16; Pesalemo 83:18) ʼE tou fiafia lahi mokā tokoni tatatou gāue fai faka mafola ʼo te evaselio kia nātou ʼe manako ki te moʼoni pea mo te faitotonu, ke nātou liliu ʼo fakavikiviki kia Sehova! Neʼe hiva fēnei te tagata fai pesalemo: “Kau tūpulaga pea mo koutou kau taupoʼou, kau matutuʼa pea mo te kau tama. Ke nātou fakavikiviki ki te huafa ʼo Sehova, heʼe ko tona huafa tokotahi pe ʼaē ʼe māʼoluga ʼaupito! Ko tona ʼalikisia ʼe māʼoluga ake ia ʼi te kele pea mo te lagi.”—Pesalemo 148:12, 13.
ʼE Fua Lelei Kia Tatou Te Faka Mafola ʼo Te Evaselio
18. Koteā te ʼu lelei ʼe tou maʼu ʼi te faka mafola ʼo te evaselio?
18 Ko te fakahoko ʼo te faka mafola ʼo te evaselio ʼe fua lelei kia tatou ʼi te ʼu ʼaluʼaga kehekehe. Ko te ʼolo ʼaē ʼi te ʼu ʼapi ʼo tala te logo lelei ʼe tokoni mai ke tou maʼu te agavaivai, tāfito ʼi te ʼu temi ʼaē ʼe mole tali lelei ai tatou. Moʼo faka mafola lelei te evaselio, ʼe tonu ke tou hage ko Paulo, ʼaē ‘neʼe liliu ko meʼa fuli maʼa te hahaʼi kehekehe, ke feala hana hāofaki niʼihi.’ (1 Kolonito 9:19-23) Ko tatatou kau ki te minisitelio ʼe tokoni mai ke tou maʼu te aga fakaʼeteʼete. ʼI tatatou falala kia Sehova pea mo filifili lelei tatatou ʼu palalau, ʼe tou lava mulimuli ki te tokoni ʼaenī ʼa Paulo: “Ke lelei tuumau tautou lea, i tona fakakonakona aki te masima, ke koutou iloi te tali e tonu ke koutou fai kia natou takitahi.”—Kolose 4:6.
19. ʼE tokoni feafeaʼi te laumālie maʼoniʼoni ki te kau faka mafola evaselio?
19 Ko te faka mafola ʼo te evaselio ʼe ina toe uga tatou ke tou falala ki te laumālie maʼoniʼoni ʼo te ʼAtua. (Sakalia 4:6) Pea ko tona ʼu fua—“te ofa, te fiafia, te tokalelei, te kataki, te agalelei, te agaofa, te agatonu, te agamalu, te agalolomi”—ʼe hā lelei anai ʼi totatou minisitelio. (Kalate 5:22, 23) Ko te ʼu fua ʼaia ʼo te laumālie, ʼe malave ki tatatou ʼu felogoi mo te hahaʼi, heʼe ko tatatou falala ki te takitaki ʼa te laumālie, ʼe tokoni mai ke tou maʼu te ʼofa, ke tou fiafia pea mo tokalelei, ke tou kātaki fualoa pea mo agalelei, ke tou agaʼofa pea mo tui, pea mo tou agamālū pea mo loto lolomi mokā tou tala te logo lelei.
20, 21. Koteā ʼihi ʼu lelei ʼe tou maʼu ʼi tatatou haga maʼumaʼua ʼi te faka mafola ʼo te evaselio?
20 Ko te tahi tapuakina ʼe tou maʼu ʼi tatatou faka mafola te evaselio, ʼe ko tatatou liliu ʼo lotomahino. Ka fakamatala mai e te hahaʼi tonatou ʼu fihifihia—te mahaki, te mole kei he gāue, te ʼu faigataʼaʼia ʼi te loto fale—ʼe mole tou hage ko he ʼu hahaʼi fai tokoni, kae ʼe tou vaevae mo nātou te ʼu vaega faka Tohi-Tapu fakaloto mālohi pea mo fakaloto fīmālie. ʼE tou tuʼania ʼo ʼuhiga mo te hahaʼi ʼaē neʼe fakakiviʼi ʼi te faʼahi fakalaumālie, kae ʼe nātou ʼofa ki te faitotonu. (2 Kolonito 4:4) Pea ʼe ko he meʼa fakafiafia ʼaupito tatatou lava tokoni ʼi te faʼahi fakalaumālie kia nātou ʼaē ʼe “lotolelei ki te maʼuli heʼegata”!—Gaue 13:48, MN.
21 Ko te kau tuʼumaʼu ki te faka mafola ʼo te evaselio ʼe tokoni mai ke tou tokakaga tuʼumaʼu ki te ʼu meʼa fakalaumālie. (Luka 11:34) ʼE mahino ia ʼe lelei te faʼahi ʼaia, heʼe kapau ʼe mole tou tokagaʼi te ʼu meʼa fakalaumālie, pea ʼe tou higa anai ʼi te ʼu fakahala ʼo te ʼu koloā ʼaē kua hoko māhani ʼi te malamanei. Neʼe uga fēnei e te ʼapositolo ko Soane te kau Kilisitiano: “Aua tautou ofa i te malama-nei, mo te u mea i te malama-nei. Kapau e i ai he tahi e ofa i te malama-nei, e mole mau te ofa o te Tamai ia te ia, koteuhi ko meafuape e mau i te malama-nei, te holi a te kakano mo te holi a te mata pea mo te fiaha i te u koloa, e mole haù ia mai te Tamai, kae e haù mai te malama-nei. Io, e fakamole te malama-nei mo tana u holi; kae kia ia ae e ina fai te finegalo o te Atua e mauli o talu ai.” (1 Soane 2:15-17) Ko tatatou maʼumaʼua tuʼumaʼu ʼi te faka mafola ʼo te evaselio pea mo te ʼu gāue ʼo te ʼAliki, ʼe tokoni mai ke mole tou manako ki te malamanei.—1 Kolonito 15:58.
Tou Tānaki He ʼu Koloā ʼi Selo
22, 23. (a) Ko te ʼu koloā fea ʼaē ʼe tānaki e te kau faka mafola evaselio Kilisitiano? (b) ʼE tokoni feafeaʼi mai anai te alatike ʼaē ka hoa mai?
22 Ko tatatou faʼafai ʼi te gāue fai faka mafola ʼo te Puleʼaga ʼe tou maʼu ai te ʼu lelei ʼe tologa. Neʼe fakahā e Sesu te faʼahi ʼaia ʼi tana ʼui fēnei: “Tuku takotou tānaki maʼa koutou he ʼu koloā ʼi te kele, ʼaia ʼe kaina ai e te ane pea mo te ukaukamea, pea ʼe puhi ai e te kau kaihaʼa ke kaihaʼasia ia. Kaʼe ke koutou tānaki maʼa koutou he ʼu koloā ʼi selo, ʼaia ʼe mole kaina ai e te ane pea mo te ukaukamea, pea ʼe mole puhi ai pea mo kaihaʼasia ai e te kau kaihaʼa. Heʼe ko te potu ʼaē ʼe ʼi ai tou koloā, pea ʼe toe ʼi ai foki mo tou loto.”—Mateo 6:19-21, MN.
23 ʼOfa pe ke tou haga tānaki he ʼu koloā ʼi selo, heʼe tou ʼiloʼi ʼe mole he tahi age pilivilesio lahi ʼi totatou ʼuhiga kau Fakamoʼoni, ʼi hatatou fakafofoga te Tuʼi ʼAliki ko Sehova. (Isaia 43:10-12) ʼI tatatou fakahoko tatatou gāue ʼi totatou ʼuhiga kau minisi ʼa te ʼAtua, ʼe mahino ia ʼe tou hage anai ko te fafine Kilisitiano ʼi tona taʼu 90, ʼaē neʼe ina ʼui fēnei ʼo ʼuhiga mo tana kua tauhi fualoa ki te ʼAtua: “ ʼE ʼau fakamālo kia Sehova ʼi tana fakaʼaogaʼi ʼau ʼi te ʼu taʼu fuli ʼaenī moʼo fai tana gāue, pea ʼe ʼau faikole fakamalotoloto ke liliu ko taku Tāmai ʼofa ʼo talu ai.” Kapau ʼe toe maʼuhiga feiā kia tatou tatatou ʼu felogoi mo te ʼAtua, pea ʼe mahino ia ʼe tou fia fakahoko katoa anai te faka mafola ʼo te evaselio. Ko te alatike ʼaē ka hoa mai, ʼe tokoni mai anai ke tou sio peʼe feafeaʼi hatatou fakahoko katoa totatou minisitelio.
ʼE Koutou Tali Feafeaʼi Anai?
• He koʼe ʼe tonu ke tou fai te gāue ʼaē ko te faka mafola ʼo te evaselio?
• Koteā ʼaē ʼe feala ke koutou ʼui ʼo ʼuhiga mo te gāue ʼa te kau faka mafola evaselio ʼo te temi ʼāfea pea mo te temi nei?
• He koʼe ʼe tou fai faka mafola ʼi te ʼu ʼapi?
• Koteā te ʼu lelei ʼe koutou maʼu ʼi takotou faka mafola ia te evaselio?
[Paki ʼo te pasina 10]
ʼI totatou temi, ʼe ʼi ai te kau faka mafola evaselio fiafia ohage ko Filipe pea mo tona ʼu ʼofafine
[Paki ʼo te pasina 14]
Koteā te ʼu lelei ʼe koutou maʼu ʼi te tala ʼo te logo lelei ki te hahaʼi?