Kotou Fai Te Gaue ʼa Te Tagata Fakamafola Evaselio

1. He ko ʼe ʼe ui ko Sehova ʼae neʼe ina ʼuluaki fakamafola te evaselio?

KO TE tagata fakamafola evaselio, ʼe ko he tahi ʼe ina tala he ʼu logo lelei. Ko Sehova ʼAtua ʼae neʼe ina ʼuluaki fakamafola te evaselio. ʼI te hili pe ʼo te agatuʼu ʼa Atama mo Eva, neʼe fakaha e Sehova ʼe fakaʼauha anai ia Satana, te Tevolo. (Sen. 3:15) ʼAki te alu ʼo te temi, neʼe fakamahino e Sehova pe ʼe feafeaʼi hana fakatapuha ia tona huafa, pe ʼe ina fakatokatoka feafeaʼi ia te ʼu fihifihia ʼae neʼe fakatupu e Satana pea mo fakaha pe ʼe lava feafeaʼi ki te tagata hana toe maʼu ia te maʼuli heʼe gata. ʼE maʼu ia te ʼu logo lelei fuli ʼaia ʼi te Folafola ʼa te ʼAtua, te Tohi-Tapu.

2. (1) He ko ʼe ʼe ui ko te kau ʼaselo ʼe ko he kau fakamafola evaselio? (2) Kotea te faʼifaʼitaki lelei neʼe tuku mai e Sesu ʼo ʼuhiga mo te fakamafola ʼo te evaselio?

² ʼE ko te tahi kau fakamafola evaselio ia te kau ʼaselo. ʼE natou tala he ʼu logo lelei pea mo tokoni ki ʼihi ke natou fakamafola te logo lelei ʼi te kele. (Luka 1:19; 2:10; Gaue 8:26, 27, 35; Apk. 14:6) Kaʼe ʼe feafeaʼi ki te alekaselo ko Mikaele? ʼE ko te tahi ʼaselo fakamafola evaselio. ʼI tana ʼi te kele, ko te gaue ʼae neʼe maʼuhiga tafitō kia Sesu, neʼe ko te fakamafola ʼo te logo lelei. ʼE tou mahino ʼaki tona faʼifaʼitaki, ʼe tonu ke tou fakamaʼuhigaʼi tafitō ia te fakamafola ʼo te logo lelei.—Luka 4:16-21.

3. (1) Kotea te logo lelei ʼae ʼe tou fakamafola? (2) Kotea te ʼu puani ʼae ʼe tonu ke tou mahino ki ai?

³ Neʼe fakatotonu e Sesu ki tana kau tisipulo ke natou fakamafola te evaselio. (Mat. 28:19, 20; Gaue 1:8) Neʼe ui fenei e te apositolo ko Paulo kia Timoteo: “Fai te gaue ʼa te tagata fakamafola evaselio, fakahoko katoa tau minisitelio.” (2 Tim. 4:5, MN) Kotea te logo lelei ʼae ʼe tou fakamafola? ʼE tou fakaha ki te hahaʼi ʼe ʼofa ia Sehova, ia tatatou Tamai ʼae ʼe ʼi selo kia tatou. (Soa. 3:16; 1 Pet. 5:7) Ko te Puleʼaga ʼo te ʼAtua, ʼe ko te fakamoʼoni ʼaia ʼo tona ʼofa ʼae ki te malamanei. Koia ʼe tou fakaha ai ki te hahaʼi ʼe feala ke tou liliu ʼo kaumeʼa mo ia, mo kapau ʼe tou liliu ko he hahaʼi fakalogo ʼo tona Puleʼaga, ʼo talagafua ki ai pea mo fai ia te meʼa ʼae ʼe lelei. (Pes. 15:1, 2) ʼE pulihi anai e Sehova ia te ʼu mamahi fuli ʼe tupu mai te ʼu aluʼaga fakaʼofaʼofa neʼe hoko ʼi te ʼu temi ki muʼa atu. ʼE ko he logo lelei ʼaia! (Esa. 65:17) Ke feala hatatou fakamafola te evaselio, ʼe tonu ke tou mahino ki te ʼu puani maʼuhiga ʼaeni ʼe lua: He ko ʼe ʼe ʼaoga ia te logo lelei ki te hahaʼi ia ʼaho nei? ʼE feafeaʼi hatatou fakahoko fakalelei ia tatatou gaue fakamafola evaselio?

ʼE ʼAOGA TE LOGO LELEI KI TE HAHAʼI

4. Kotea te ʼu loi neʼe fai ki te hahaʼi ʼo ʼuhiga mo te ʼAtua?

⁴ Kotou fakakaukauʼi age muʼa he tahi ʼe ina lohiʼi koutou, ʼe ina ui atu neʼe liʼakina koutou mo tokotou famili e takotou tamai. ʼE ina ui atu ʼe mole fia felogoʼi takotou tamai mo koutou, ʼe mole ina loto ke kotou iloʼi ia ia pea ʼe agakovi. Pea ʼe ina ui atu kua mate takotou tamai, koia ʼe mole ʼi ai he ʼuhiga ʼo takotou faiga ʼae ke kotou kumi ia ia. Ko ʼihi ʼe natou fai ia te ʼu taʼi palalau ʼaia ʼo ʼuhiga mo te ʼAtua. ʼE natou lau ʼe mole feala ke tou iloʼi te ʼAtua, peʼe natou ui ʼe agakovi. Ko ʼihi kau takitaki lotu ʼe natou akoʼi ʼe fakatuʼā e te ʼAtua ia te hahaʼi agakovi ʼi he ʼifeli kakaha ʼo talu ai. Ko ʼihi ʼe natou ui, ʼe fakaʼaogaʼi e te ʼAtua ia te ʼu afā, peʼe ko he ʼu tuʼutamaki moʼo fakamamahiʼi te hahaʼi. ʼE natou ui ʼe fai e te ʼAtua ia te faʼahi ʼaia moʼo fakatuʼā te hahaʼi, tatau aipe pe mamate ai ia te hahaʼi agalelei mo te hahaʼi agakovi.

5, 6. ʼE fakamamahiʼi feafeaʼi ia te hahaʼi e te akonaki ʼo te evolisio pea mo te ʼu akonaki hala ʼo te ʼu lotu?

⁵ Ko ʼihi ʼe natou ui ʼe mole maʼuli te ʼAtua pea ʼe haʼu ia te tagata mai te manu. Ko natou ʼae ʼe tui ki te evolisio, ʼe natou ui ʼe mole ʼi ai he Tupuʼaga pea ʼe mole ʼi ai he tahi neʼe ina fakatupu ia te ʼu meʼa maʼuli fuli. Pea ko ʼihi ʼe mole natou punamaʼuli ki te agamalohi ʼo te tagata pea mo tana manatu pe ʼae kia ia totonu koteʼuhi heʼe haʼu ia mai te manu. ʼE natou ui ʼe mole feala ke puli ia te heʼe faitotonu koteʼuhi maʼa natou, ʼe ko he agamahani ia te gaohi koviʼi ʼo natou ʼae ʼe vaivai e te hahaʼi malolohi. Koia, ko natou ʼae ʼe tui ki te evolisio, ʼe mole hanatou ʼamanaki ki te ka haʼu.

⁶ ʼI te ʼu ʼaho fakamuli ʼaeni, ʼe lahi te ʼu mamahi ʼe tau mo te malamanei ʼuhi ko te akonaki ʼo te evolisio pea mo te ʼu akonaki hala ʼo te ʼu lotu. (Loma 1:28-31; 2 Tim. 3:1-5) Ko te ʼu akonaki hala ʼaia, ʼe mole ko he ʼu logo lelei. Kaʼe ʼe ina fakamamaʼo te hahaʼi mai te ʼAtua pea mo te ʼu logo lelei ʼae ʼe ina foaki mai. (Efe. 4:17-19) ʼE uga e te akonaki ʼo te evolisio pea mo te ʼu akonaki hala ia te hahaʼi ke ʼaua naʼa natou tali ia te logo lelei ʼae ʼe haʼu mai te ʼAtua.—Lau ia Efeso 2:11-13.

7, 8. Kotea ia te aluʼaga pe ʼe tahi ʼae ʼe feala ai ki te hahaʼi ke natou ako ia te logo lelei?

⁷ Ke feala ke maʼu e te hahaʼi ia he ʼu felogoʼi mo te ʼAtua, ʼe tonu muʼa ke natou tui papau ʼe maʼuli moʼoni ia Sehova pea ʼe ʼi ai te ʼaoga ʼo tanatou iloʼi ia ia. ʼE feala ke tou tokoni kia natou ke natou iloʼi te ʼAtua ʼo tou fakalotomalohiʼi natou ke natou tokagaʼi te ʼu meʼa ʼae neʼe ina fakatupu. Kapau ʼe natou fai ia te faʼahi ʼaia pea mo natou fakakaukauʼi ia te ʼu meʼa ʼae neʼe natou sisio ki ai, ʼe natou mahino ai ki te poto pea mo te mafimafi ʼo te ʼAtua. (Loma 1:19, 20) ʼE tou lava tokoni feafeaʼi ki te hahaʼi ke natou mahino ki te fakaofoofo ʼo te ʼu meʼa fuli neʼe fakatupu e te ʼAtua? ʼE feala ke tou fakaʼaogaʼi ia Te Tule Leʼo ʼo te ʼaho 1 ʼo Sulio 2007 ʼi te pasina 11 ki te 15 pea mo Te Tule Leʼo ʼo te ʼaho 1 ʼo Oketopeli 2004 ʼi te pasina 9, palakalafe 1 mo te 2.a Kaʼe ʼe ʼi ai te ʼu fehuʼi ʼe mole feala ki he tahi ke tali ki ai ʼaki pe tana sivisivi te ʼu meʼa ʼae neʼe fakatupu e te ʼAtua. Ohage la, ʼe mole feala ke ina iloʼi pe ko ʼe ʼe fakagafua e te ʼAtua ke hoko ia te ʼu mamahi, peʼe kotea te fakatuʼutuʼu ʼa te ʼAtua ʼo ʼuhiga mo te kele, peʼe tokagaʼi koa e te ʼAtua ia tatou takitokotahi.

⁸ Ko te aluʼaga pe ʼe tahi ʼe feala ke tou iloʼi ai te ʼu logo lelei ʼo ʼuhiga mo te ʼAtua pea mo ʼana fakatuʼutuʼu, ʼe ko te ako ʼo te Tohi-Tapu. ʼE ko he toe pilivilesio ʼaia kia tatou ia tatatou tokoni ki ʼihi ke natou iloʼi te logo lelei. Kaʼe kapau ʼe tou fia tokoni moʼoni ki he tahi ke tui ki te ʼAtua pea mo liliu ko Tona kaumeʼa, ʼe mole gata ʼaki pe tatatou fakahaha age ia te ʼu meʼa ʼae neʼe fakatupu e te ʼAtua. ʼE tonu ke tou fakalotoʼi ia ia ke mahino ki te ʼaoga ʼae ke ina maʼu te tui. (2 Tim. 3:14) Koia ʼe tonu ai ke tou ako pe ʼe feafeaʼi hatatou fakalotoʼi ia te hahaʼi ohage ko tona fai e Sesu. He ko ʼe neʼe faiva ia Sesu ʼi te fai ʼo te faʼahi ʼaia? He neʼe ina fai he ʼu fehuʼi fakapotopoto. ʼE tou lava faʼifaʼitakiʼi feafeaʼi ia ia?

TOU FAI HE ʼU FEHUʼI FAKAPOTOPOTO

9. Kotea ʼae ʼe tonu ke tou fai mo kapau ʼe tou loto ke tui ia te hahaʼi ki te logo lelei?

⁹ He ko ʼe ʼe tonu ke tou faʼifaʼitakiʼi ia Sesu ʼo tou fakaʼaogaʼi he ʼu fehuʼi ʼi te minisitelio? Kotou fakakaukauʼi age muʼa mo kapau la ʼe ui atu e takotou toketa ʼe tonu ke tafa koutou. ʼE lagi kotou falala anai ki ai. Kaʼe ʼe feafeaʼi mo kapau ʼe ina fakaha atu te tonu ʼaia kaʼe neʼe mole pe la ina fai atu he ʼu fehuʼi ʼo ʼuhiga mo tokotou mahaki? ʼE mole lagi kotou falala anai ki ai. Maʼia pe la mo he toketa ʼe faiva, ʼe maʼua ke ina fai he ʼu fehuʼi pea mo fakalogo ki te ʼu tali ʼi muʼa ʼo tana toʼo he tonu. Kapau ʼe tou fia tokoni ki te hahaʼi ke natou tui ki te logo lelei ʼo te Puleʼaga, ʼe tonu ke tou akoako ia te faʼahiga fai ʼo te ʼu fehuʼi ʼe lelei ke feala hatatou mahino ki te faʼahiga tokoni ʼae ʼe ʼaoga kia natou.

10, 11. Kotea te ʼu fua lelei ʼe feala ke tou maʼu mo kapau ʼe tou faʼifaʼitakiʼi ia te faʼahiga faiako ʼa Sesu?

¹⁰ Neʼe iloʼi e Sesu ʼe feala ki he tagata faiako ke ina fakaʼaogaʼi te ʼu fehuʼi moʼo tokoni ki he tahi ʼe ako ke fakakaukau pea mo ina fakaha tana manatu. Ohage la, ʼi te temi ʼae neʼe fia akoʼi age ai e Sesu ki tana kau tisipulo ia te agavaivai, neʼe ina ʼuluaki fai ia te fehuʼi ke natou fakakaukauʼi. (Mko. 9:33) ʼI te tahi aluʼaga, neʼe fai e Sesu ia te fehuʼi kia Petelo, ʼo ina fakaha age ia tali ʼe lua pea neʼe ina kole age kia Petelo ke ina vakavakaʼi ia te tali ʼae ʼe totonu. Neʼe tokoni ai kia Petelo ke mahino ki he ako maʼuhiga. (Mat. 17:24-26) ʼI te tahi ʼaho, neʼe fia iloʼi e Sesu ia te meʼa ʼae ʼi te loto ʼo tana kau tisipulo, koia neʼe ina fai ai ia te ʼu tuʼuga fehuʼi moʼo uga ʼo natou ke natou fakaha ia te ʼu meʼa ʼae ʼe natou logoʼi. (Lau ia Mateo 16:13-17.) Neʼe mole ui age pe e Sesu ki te hahaʼi ia te ʼu meʼa ʼe tonu ke natou fai. Kaʼe ʼaki te ʼu fehuʼi, neʼe ina uga natou ke natou tali ia te logo lelei pea mo fakahoko he ʼu fetogi ʼi tonatou maʼuli.

¹¹ Ka tou faʼifaʼitakiʼi ia te faʼahiga fai e Sesu ia te ʼu fehuʼi, ʼe tou maʼu ia te faʼahiga tokoni ʼae ʼe ʼaoga ki te hahaʼi takitokotahi ʼae ʼe tou felaveʼi ʼi te minisitelio. ʼE tou mahino ki te faʼahiga manatu ʼa te hahaʼi ʼae ʼe mole tou manatu tahi pea mo tou tokoni kia natou. Pea ʼe tou akoʼi te hahaʼi ke fua lelei kia natou totonu. Koia ʼe tou talanoa anai ki he ʼu faʼifaʼitaki ʼe tolu ʼo ʼuhiga mo te faʼahiga fai ʼo he ʼu fehuʼi fakapotopoto.

12-14. ʼE feafeaʼi hakotou tokoni ki takotou tamasiʼi ke lotomalohi ʼi te faifakamafola? Kotou tuku mai he faʼifaʼitaki.

¹² ʼUluaki faʼifaʼitaki: Kotea ʼe kotou fai anai mo kapau ʼe mataku takotou tamasiʼi ʼi te palalau ki ʼona kauga ako ʼo ʼuhiga mo te fakatupu? ʼE kotou tokoni feafeaʼi anai ki ai ke feala hana lotomalohi ʼi te faifakamafola? ʼE mole tonu anai ke kotou munaʼi peʼe kotou fakaha age ia te meʼa ʼae ʼe tonu ke ina fai, kotou mulimuli ki te faʼifaʼitaki ʼo Sesu, ʼo kotou fai he ʼu fehuʼi ki ai ke feala hana fakaha ia te meʼa ʼae ʼi tona loto. ʼO feafeaʼi?

¹³ Kotou lau mo takotou tamasiʼi ia te ʼu alatike ʼo Te Tule Leʼo ʼo te ʼaho 1 ʼo Sulio 2007 ʼi te pasina 11 ki te 15 pea mo Te Tule Leʼo ʼo te ʼaho 1 ʼo Oketopeli 2004 ʼi te pasina 9, palakalafe 1 mo te 2. ʼI te hili ʼo takotou vakaʼi ia te ʼu alatike ʼaia, kotou fakalavelave age pe ko te manatu fea ʼae neʼe ina leleiʼia. Kotou fakalotomalohiʼi ia ia ke ina manatuʼi ʼihi age tupuʼaga ʼo tana tui ʼae ʼe ʼi ai te Tupuʼaga pea he ko ʼe ʼe fia tauhi ki te ʼAtua. (Loma 12:2) Kotou fakamahino age ki takotou tamasiʼi ʼe kehekehe pe ʼona tupuʼaga mo ʼae ʼa koutou.

¹⁴ Kotou fakaha ki takotou tamasiʼi ʼe feala ke palalau ki tona kauga ako ohage pe ko takotou palalau age ki ai. ʼE feala ke ina fakamatala he ʼu aluʼaga ʼo te fakatupu ki tona kauga ako pea mo fakalavelave age pe kotea tana manatu. Ohage la, ʼe feala ke ina kole age ki tona kauga ako ke ina lau ia te palakalafe 12 ʼo Te Tule Leʼo ʼo te ʼaho 1 ʼo Fepualio 2011 ʼi te pasina 14. Pea ʼe feala leva ki takotou tamasiʼi ke ina fai ia te fehuʼi ʼaeni: “ ʼE mole koa la fakaofoofo ia te gaue ʼae ʼe fai e te ADN?” ʼE mahino papau ia, ʼe fakamoʼoni anai ki ai tona kauga ako. ʼE feala leva ke fai e takotou tamasiʼi ia te fehuʼi ʼaeni: “Kapau ʼe ke fakamoʼoni ki ai, ʼe mole koa la fakapotopoto hatatou ui neʼe ʼi ai te tahi neʼe ina fakatupu ia te ADN?” Moʼo tokoni ki takotou tamasiʼi ke lotomalohi moka palalau mo te hahaʼi ki tana tui, ʼe tonu ke kotou akoako mo ia. Kapau ʼe kotou akoʼi age ia te faʼahiga fai ʼo he ʼu fehuʼi fakapotopoto, ʼe kotou tokoni ki ai ke liliu ko he tagata fakamafola evaselio faiva.

15. ʼE feafeaʼi hatatou fakaʼaogaʼi ia te ʼu fehuʼi moʼo tokoni ki he tahi ʼe mole tui ki te ʼAtua?

¹⁵ Lua faʼifaʼitaki: ʼI te faifakamafola, ʼe feala ke tou maʼu he tahi ʼe mole tui ʼe maʼuli moʼoni te ʼAtua. ʼE feala ke tou tokoni ki ai ʼo tou fai age he ʼu fehuʼi. ʼE feala ke tou fakalavelave age pe ʼe kua fualoa ia tana maʼu ia te manatu ʼaia, pea kotea tona tupuʼaga. ʼI te hili ʼo takotou fakalogo ki tana tali, ʼe feala ke tou fakaha age ʼe tou mahino ki te tupuʼaga ʼo tana maʼu ia te manatu ʼaia. ʼE feala ke tou kole age pe ʼe lotolelei ke ina lau he tohi ʼe ina foaki ai he ʼu fakamoʼoni neʼe fakatupu ia te maʼuli. Kapau ʼe lotolelei ki ai, ʼe feala ke kotou ui age ʼe feala anai hatatou toe liliu mai mo he tohi ʼe talanoa ki te faʼahi ʼaia. Kapau ʼe tou fakapotopoto pea kapau ʼe tou fai he ʼu fehuʼi ʼaki he agalelei, ʼe feala anai ke malave ki te hahaʼi fakamalotoloto ia te logo lelei ʼae ʼe tou tala age.

16. He ko ʼe ʼe mole tonu ke tou tuku pe ʼatatou ako ke natou lau te ʼu tali ʼi te tohi peʼe ʼi te kaupepa lahi?

¹⁶ Tolu faʼifaʼitaki: ʼI te temi ʼae ʼe tou takitaki ai he ako Tohi-Tapu, kotea ʼae ʼe feala ke hoko mo kapau ʼe lau pe e tatatou ako ia te ʼu tali ʼi te tohi peʼe ʼi te kaupepa lahi? ʼE lagi mole tuputupu anai ʼi te faʼahi fakalaumalie. Kotea tona tupuʼaga? Koteʼuhi ko he ako ʼe ina lau te tali kaʼe mole fakakaukau, ʼe feala ke fakatatau ki he fuʼu ʼakau ʼe mole malohi ʼona aka. ʼE lagi faigataʼa anai kia ia ʼae ʼe ako hana nofo maʼu ʼi te moʼoni ʼi te temi ʼae ʼe tau ai mo te ʼu fakataga. (Mat. 13:20, 21) Moʼo tokoni ki tatatou ako, ʼe tonu ke tou fakalavelave age pe ʼe kotea la tana manatu ʼo ʼuhiga mo te ʼu meʼa ʼae ʼe ina ako. ʼE tonu ke tou iloʼi pe ʼe tui ki te ʼu meʼa ʼae ʼe ina ako pea kotea tona tupuʼaga. Tou tokoni ki ai ke ina fakakaukauʼi ia te ʼu manatu ʼae ʼe tuʼu ʼi te Tohi-Tapu ke feala ke fakatafito ki ai tana tui. (Hep. 5:14) Kapau ʼe tou fai he ʼu fehuʼi fakapotopoto, ʼe malohi anai ʼatatou ako ʼi te moʼoni pea ʼe natou nonofo agatonu anai moka fakatagaʼi peʼe kakaʼi natou. (Kol. 2:6-8) Kotea te tahi ʼu faʼahi ʼe feala ke tou fai ke feala ai hatatou liliu ko he ʼu tagata fakamafola evaselio faiva?

ʼE FETOKONIʼAKI IA NATOU ʼAE ʼE FAKAMAFOLA EVASELIO

17, 18. ʼE feafeaʼi hakotou tokoni ki he tehina ʼi te temi ʼae ʼe lolotoga palalau ai?

¹⁷ Neʼe fekauʼi e Sesu ia tana kau tisipulo ke natou olo ʼo faifakamafola taki toko lua. (Mko. 6:7; Luka 10:1) Ki muli age neʼe palalau ia te apositolo ko Paulo ki ʼona kauga gaue, ʼe natou gaue “fakatahi” mo ia ʼi te fakamafola ʼo te logo lelei. (Filp. 4:3) ʼI te taʼu 1953, neʼe kamata fai ai e te kautahi ia te polokalama makehe ʼe tokoni ai te kau faifakamafola ki ʼihi ʼi te minisitelio.

¹⁸ Ka kotou faifakamafola mo he tahi age tehina, ʼe feafeaʼi anai hakotou tokoni ki ai ʼi te temi ʼae ʼe lolotoga palalau ai ki he tahi? (Lau ia 1 Kolinito 3:6-9.) Kotou muliʼi ia te vaega ʼae ʼe lau ʼi takotou Tohi-Tapu. Kotou tokaga ki te tehina mo kapau ʼe ʼaoga ki ai he tokoni ki te fai ʼo he fakamahino. (Ekl. 4:12) Kotou tokaga naʼa fokifa kua kotou tuʼusi ia te palalau ʼa te tehina pe ʼe ko ia ʼae ʼe kotou faipalalau mo ia. Kapau ʼe kotou fai ia te faʼahi ʼaia, ʼe feala ke kotou fakalotovaivaiʼi ia te tehina ʼae ʼe kolua gaue pea ʼe feala ke lotolotolua ia ia ʼae ʼe kotou faipalalau mo ia. ʼE feala ke kotou fai ʼakotou kiʼi palalau, kaʼe ʼe tonu ke kotou tuku ki te tehina ke hoko atu tana faifakamahino.

19. Kotea ʼae ʼe tonu ke ʼaua naʼa galo kia tatou pea kotea tona tupuʼaga?

¹⁹ ʼI te temi ʼae ʼe kotou feʼoloʼaki ai ʼi te faifakamafola mo he tahi age tehina, ʼe feafeaʼi hakotou fetokoniʼaki ke kotou liliu ai ko he kau fakamafola evaselio faiva? Kotou fakaʼaogaʼi te temi ʼaia moʼo hikihiki ia takotou faʼahiga faipalalau. Kotou tokakaga ke ʼaua naʼa kotou fai he ʼu palalau fakalotovaivai ʼo ʼuhiga mo te hahaʼi ʼo te telituale. ʼAua naʼa kotou fatufatuʼi te ʼu tehina mo tuagaʼane. (Taag. 18:24) Tou manatuʼi ʼe mole he tahi ia tatou ʼe haohaoa. ʼE agalelei ʼaupito ia Sehova ʼaki tana foaki mai ia te koloa maʼuhiga ʼae ko te fakamafola ʼo te logo lelei. (Lau ia 2 Kolinito 4:1, 7.) Tou loto fakafetaʼi fuli ki te logo lelei ʼo tou faiga malohi ke tou liliu ko he kau fakamafola evaselio faiva.