“Fakahoko Katoa Tau Minisitelio”
“Fakahoko katoa tau minisitelio.”—1 Timoteo 4:5, MN.
1, 2. Logola ko te kau Kilisitiano fuli ʼe ko te kau faka mafola evaselio, kae koteā ʼaē ʼe fakamaʼua e te Tohi-Tapu ki te kau tagata ʼāfea?
ʼE KOUTOU faka mafola koa te Puleʼaga? Kapau koia, koutou fakamālo kia Sehova ʼAtua ʼo ʼuhiga mo te pilivilesio fakatalakitupua ʼaia. ʼE koutou tagata ʼāfea koa ʼi te kokelekasio? ʼE ko he tahi pilivilesio ʼaia mai ia Sehova. Kae ʼaua naʼa tou manatu ʼe ko tatatou ako peʼe ko tatatou popoto ʼi te palalau ʼaē ʼe nā faka fealagia ai ke tou kau ki te minisitelio peʼe ko te taupau ʼo te kokelekasio. Ko Sehova ʼaē neʼe ina akoʼi tatou ke tou popoto ʼi te minisitelio, pea ko ʼihi tagata ia tatou ʼe nātou tagata ʼāfea koteʼuhi ʼe nātou mulimuli ki te ʼu fakamaʼua ʼo te Tohi-Tapu ʼo ʼuhiga mo te pilivilesio ʼaia.—2 Kolonito 3:5, 6; 1 Timoteo 3:1-7.
2 Ko te kau Kilisitiano fuli ʼaē kua foaki tonatou maʼuli kia Sehova ʼe nātou faka mafola te evaselio, kae ʼe ko te kau tagata taupau, peʼe ko te ʼu tagata ʼāfea, ʼaē ʼe maʼua tāfito ke nātou tuku he faʼifaʼitaki lelei ʼi te minisitelio. Ko te kau tagata ʼāfea ʼaē ʼe “gāue kinakina ʼi te folafola pea mo te faiakonaki,” ʼe tokagaʼi nātou e te ʼAtua pea mo Kilisito, ʼo toe feiā mo tonatou ʼu tēhina mo tuagaʼane ʼi te kokelekasio. (1 Timoteo 5:17, MN; Efeso 5:23; Hepeleo 6:10-12) ʼI te ʼu ʼaluʼaga fuli pe, ko te faiakonaki ʼa he tagata ʼāfea ʼe tonu ke tokoni ki te maʼuli fakalaumālie ʼo te ʼu tēhina mo tuagaʼane, he neʼe ʼui fēnei e te ʼapositolo ko Paulo ki te tagata taupau ko Timoteo: “ ʼE hoko mai anai he temi, ʼe mole nātou kātakiʼi anai te akonaki ʼo te fakamaʼuli, kae ʼo mulimuli ki tanatou ʼu holi, ʼe nātou tānaki anai he kau faiakonaki maʼa nātou totonu, ke feala he alaala ʼo tonatou ʼu taliga. Pea ʼe nātou fakamaliu anai tonatou ʼu taliga mai te moʼoni, kae nātou haga anai ki te ʼu fagana. Kae ko koe, taupau tau poto ia meʼa fuli, kātaki ʼi te mamahi, fai te gāue ʼa te tagata faka mafola evaselio, ke katoa tou minisitelio.”—2 Timoteo 4:3-5, MN.
3. Koteā ʼaē ʼe tonu ke fai e he tagata taupau moʼo puipui te maʼuli fakalaumālie ʼo te kokelekasio mai te ʼu akonaki hala?
3 Moʼo puipui te maʼuli fakalaumālie ʼo te kokelekasio mai te ʼu akonaki hala, ʼe tonu ke mulimuli te tagata taupau ki te tokoni ʼaenī ʼa Paulo: “Taupau tau poto ʼi te ʼu faʼahi fuli pe, . . . fakahoko katoa tau minisitelio.” (1 Timoteo 4:5, MN ) Ei, ʼe tonu ke ‘fakahoko katoa e he tagata ʼāfea tana minisitelio.’ Ko he tagata ʼāfea ʼe ina fakahoko katoa tana minisitelio ʼe tokaga ʼo fakahoko fakalelei tona ʼu maʼua fuli, ʼe mole ina meʼa noaʼi he meʼa peʼe ina fakahoko fakakoga. Ko te tagata ʼaia ʼe agatonu māʼia ʼi te ʼu kiʼi meʼa liliki.—Luka 12:48; 16:10.
4. Koteā ʼaē ʼe feala ke tokoni mai kia tatou ke tou fakahoko katoa ai te minisitelio?
4 ʼE mole ʼaoga tuʼumaʼu ke lahi he temi moʼo fakahoko totatou minisitelio, kae ko tona fakaʼaogaʼi lelei ʼaē ʼe maʼuhiga. Ko te fakaʼaluʼalu lelei ʼo te ʼu gāue, ʼe lava tokoni ki te kau Kilisitiano fuli ke nātou fakahoko tonatou minisitelio. Ke feala ki te tagata ʼāfea ke lahi age tona temi ʼi te fai faka mafola, ʼe tonu ke ina fakatuʼutuʼu lelei pea mo fakafuafua lelei tana polokalama, pea ke ina vakaʼi te ʼu gāue ʼaē ʼe feala ke ina tuku ke fai e he tahi kehe pea mo fakahā age peʼe feafeaʼi te fai ʼo te gāue ʼaia. (Hepeleo 13:17) ʼE mahino ia, ko he tagata ʼāfea ʼe fakaʼapaʼapaʼia ʼe toe kau foki mo ia ki te gāue fai faka mafola, ohage ko Nehemia, ʼaē neʼe kau ki te toe laga ʼo te ʼu kaupā ʼo Selusalemi. (Nehemia 5:16) Pea ko te ʼu kaugana fuli ʼa Sehova ʼe tonu ke nātou kau tuʼumaʼu ki te gāue fai faka mafola ʼo te Puleʼaga.—1 Kolonito 9:16-18.
5. ʼE tonu ke tou feafeaʼi ʼo ʼuhiga mo te minisitelio?
5 ʼE ko he gāue fakafiafia ʼaē ʼe tou maʼu: te faka mafola ʼo te Puleʼaga ʼaē kua fakatuʼu ʼi selo! ʼE mahino ia ʼe maʼuhiga kia tatou totatou pilivilesio ʼaē ke tou kau ki te faka mafola ʼo te logo lelei ʼi te kele katoa ʼi muʼa ʼo te hoko mai ʼo te fakaʼosi. (Mateo 24:14) Logola totatou ʼuhiga agahala, kae ʼe feala ke fakaloto mālohiʼi tatou e te ʼu palalau ʼaenī ʼa Paulo: “Ko te koloā ʼaia [te minisitelio], ʼe tou maʼu ʼi te ʼu ipu kele, koteʼuhi ko te mālohi ʼaē ʼe laka age ʼi te mālohi māhani ʼe ko te mālohi ia ʼo te ʼAtua kae mole ko te mālohi ʼo tatou totonu.” (2 Kolonito 4:7, MN ) Ei, ʼe feala ke tou fakahoko lelei totatou minisitelio—ʼaki pe te mālohi pea mo te poto ʼaē ʼe foaki mai e te ʼAtua.—1 Kolonito 1:26-31.
Tou Fakatapa Te Kolōlia ʼo Te ʼAtua
6. Koteā ʼaē ʼe kehekehe ai te Iselaele ʼo te kakano pea mo te Iselaele fakalaumālie?
6 ʼO ʼuhiga mo te kau Kilisitiano fakanofo, ʼe ʼui e Paulo ko te ʼAtua ʼaē neʼe ina “fakanofo [nātou] ko te ʼu minisi ʼo te fuakava foʼou.” ʼE fakakehekeheʼi e te ʼapositolo te fuakava foʼou ʼaē neʼe fai ʼaki ia Sesu Kilisito pea mo te Iselaele fakalaumālie, pea mo te fuakava ʼāfea ʼo te Lao ʼaē neʼe fai ʼaki ia Moisese pea mo te Iselaele ʼo te kakano. ʼE toe ʼui e Paulo, ʼi te temi ʼaē neʼe hifo mai ai ia Moisese mai te Moʼuga ʼo Sinai mo te ʼu maka ʼaē neʼe tohi ai te ʼu Folafola e Hogofulu, ko tona fofoga neʼe gigila ʼaupito pea neʼe mole feala ki te kau Iselaele ke nātou sioʼi ia ia. Kae ʼaki te temi, neʼe hoko te faʼahi maʼuhiga heʼe “nee fakapouli anatou fakakaukau” pea neʼe ʼuʼufi tonatou loto e he kie. Kae ʼi te temi ʼaē neʼe nātou toe haga ai kia Sehova ʼaki tonatou loto katoa, neʼe toʼo kehe te kie ʼaia. ʼI tana talanoa ki muli age ki te minisitelio ʼaē neʼe tuku age kia nātou ʼi te fuakava foʼou, ʼe ʼui fēnei e Paulo: “Kia tatou fuli, kua too kehe te kie mai otatou fofoga, e [fakatapa, MN ] ia tatou te kololia o te Aliki.” (2 Kolonito 3:6-8, 14-18; Ekesote 34:29-35) Ko te “tahi ʼu ōvi” ʼa Sesu ia ʼaho nei ʼe nātou maʼu mo nātou te pilivilesio ʼaē ke nātou fakatapa te kolōlia ʼo Sehova.—Soane 10:16, MN.
7. E tou lava fakatapa feafeaʼi te kolōlia ʼo te ʼAtua?
7 E lava feafeaʼi kia tatou hahaʼi agahala ke tou fakatapa te kolōlia ʼo te ʼAtua, heʼe mole feala ki he tahi ke sio ki tona fofoga pea mo maʼuli? (Ekesote 33:20) ʼO hilifaki ki te kolōlia ʼo Sehova, ʼe toe ʼi ai mo tana fakatuʼutuʼu faka kolōlia ʼaē ko te fakaʼaogaʼi ʼo tona Puleʼaga moʼo lagavaka ʼo ʼuhiga mo tana pule faʼitaliha. Ko te ʼu moʼoni ʼo ʼuhiga mo te Puleʼaga ʼe ko he koga ʼaia ʼo “te ʼu meʼa taulekaleka ʼa te ʼAtua” ʼaē neʼe kamata tala e te kau Kilisitiano ʼaē neʼe folahi kia nātou te laumālie maʼoniʼoni ʼi te Penikosite ʼo te taʼu 33 ʼo totatou temi. (Gaue 2:11, MN ) ʼAki te takitaki ʼo te laumālie, neʼe nātou fakahoko katoa te minisitelio ʼaē neʼe tuku age ke nātou fai.—Gaue 1:8.
8. Koteā ʼaē neʼe mole loto kiai ia Paulo ʼo ʼuhiga mo tona minisitelio?
8 Neʼe mole loto ia Paulo ke ʼi ai he meʼa ʼe ina tāʼofi tana fakahoko katoa tana minisitelio. Neʼe ina tohi fēnei: “ ʼE mole tou fia fakagata, koteʼuhi ʼe tou maʼu te minisitelio ʼaenī ʼuhi ko te manavaʼofa ʼaē neʼe fai mai kia tatou; kua tou līaki te ʼu meʼa ʼaē ʼe ū pea mo tou ufiufi ai, ʼo mole tou haʼele fakakākā, ʼo mole tou fulihi hala te folafola ʼa te ʼAtua, kae ʼe tou fakahā te moʼoni, ʼo tou tuku te faʼahi ʼaia ki te leʼo ʼo loto ʼo te tagata fuape ia muʼa ʼo te ʼAtua.” (2 Kolonito 4:1, 2, MN ) ʼAki “te minisitelio ʼaenī,” ʼaē ʼe talanoa kiai ia Paulo, ʼe fakahā ai ki te hahaʼi ia te moʼoni pea mo mafola kia nātou te mālama fakalaumālie.
9, 10. ʼE lava fakatapa feafeaʼi te kolōlia ʼo Sehova?
9 ʼO ʼuhiga mo te Matapuna ʼo te mālama moʼoni pea mo fakalaumālie, ʼe tohi fēnei e Paulo: “Neʼe ʼui fēnei e te ʼAtua: ‘Ke gigila te mālama mai te lotolotoiga ʼo te fakapōʼuli’, pea neʼe ina fakamālamaʼi totatou ʼu loto ke nātou gigila ʼaki te ʼatamai mālama faka kolōlia ʼo te ʼAtua, ʼaki te fofoga ʼo Kilisito.” (2 Kolonito 4:6, MN; Senesi 1:2-5) Neʼe tuku mai te pilivilesio lahi ʼaē ke tou liliu ko he ʼu minisi ʼa te ʼAtua, koia tou nonofo maʼa ke feala, ohage ko he ʼu sioʼata, ke tou fakatapa te kolōlia ʼo Sehova.
10 Ko te hahaʼi ʼaē ʼe nonofo ʼi te fakapōʼuli fakalaumālie ʼe mole feala ke nātou sisio ki te kolōlia ʼo Sehova peʼe ki tona fakatapa e te Moisese Lahi ʼaē ko Sesu Kilisito. Kae ʼi totatou ʼuhiga kaugana ʼa Sehova, ʼe tou maʼu te mālama faka kolōlia mai te Tohi-Tapu pea mo tou fakatapa ki te hahaʼi. Ke feala ki te hahaʼi ʼaē ʼe nonofo ʼi te temi nei ʼi te fakapōʼuli fakalaumālie ke nātou hāo ʼi te fakaʼauha, ʼe ʼaoga kia nātou te mālama ʼaē ʼe haʼu mai te ʼAtua. Koia, ʼaki he fiafia lahi pea mo he faʼafai, ʼe tou fakalogo ki te fakatotonu ʼa te ʼAtua ke tou fakagigila te mālama ʼi te fakapōʼuli moʼo faka kolōlia kia Sehova.
Ke Mū Takotou Mālama ʼi Te ʼu Ako Tohi-Tapu
11. Koteā ʼaē neʼe ʼui e Sesu ʼo ʼuhiga mo te fakamū ʼo tatatou mālama, pea ko te ʼaluʼaga fea ʼaē ʼe feala ke tou fai ai te faʼahi ʼaia?
11 Neʼe ʼui fēnei e Sesu ki tana kau tisipulo: “Ko koutou ko te mālama ʼo te malamanei. ʼE mole feala ke ū he kolo mokā ʼe tuʼu ʼi he fuga moʼuga. ʼE mole tutu he mālama ke tuku ki te lalo kato fua meʼa, kae ʼe tutu ia ke fakatuʼu ki te tuʼulaga mālama, pea ʼe ina fakamālama ia nātou fuli ʼaē ʼi te loto fale. Ke toe feiā pe te mū ʼo tokotou mālama ʼi muʼa ʼo te hahaʼi, koteʼuhi ke nātou mamata ki ʼakotou gāue lelei pea nātou faka kolōlia ai ki takotou Tāmai ʼe ʼi selo.” (Mateo 5:14-16, MN ) Ko tatatou aga ʼaē ʼe lelei ʼe feala ke ina uga ʼihi ke nātou faka kolōlia ki te ʼAtua. (1 Petelo 2:12) Pea ko te ʼu faʼahi kehekehe ʼo tatatou gāue fai faka mafola, ʼe lahi ai te ʼu faigamālie ke tou fakamū tatatou mālama. ʼE tou fakatuʼutuʼu tāfito ke tou fakatapa te mālama fakalaumālie ʼo te Folafola ʼa te ʼAtua ʼo tou fai he ʼu ako Tohi-Tapu ʼe ʼi ai tona ʼu fua. ʼE ko he faʼahi maʼuhiga ʼaupito ʼaia moʼo fakahoko totatou minisitelio. Koteā ʼaē ʼe feala ke tokoni mai kia tatou ke tou fai he ʼu ako Tohi-Tapu ʼe malave ki te loto ʼo nātou ʼaē ʼe nātou kumi te moʼoni?
12. Koteā te pikipikiga ʼo te faikole pea mo te gāue ʼaē ko te fai ʼo he ʼu ako Tohi-Tapu?
12 Ko te faikole kia Sehova ʼo ʼuhiga mo te faʼahi ʼaia ʼe fakahā ʼaki ai tatatou loto moʼoni ʼaē ke tou fai he ʼu ako Tohi-Tapu. ʼE tou toe fakahā ai ʼe tou ʼiloʼi te maʼuhiga ʼaē ke tou tokoni ki te hahaʼi ke nātou maʼu te ʼatamai mālama ʼo ʼuhiga mo te ʼAtua. (Esekiele 33:7-9) ʼE mahino papau ia ʼe tali e Sehova ki tatatou ʼu faikole pea mo ina tapuakina tatatou ʼu faiga fakamalotoloto ʼi te minisitelio. (1 Soane 5:14, 15) Kae ʼe mole tou faikole pe ke tou maʼu he ako Tohi-Tapu. ʼI tatatou ʼosi fakatuʼutuʼu te ako, ko te faikole pea mo te metitasio ʼo ʼuhiga mo te ʼu meʼa ʼaē ʼe ʼaoga moʼoni kia ia ʼaē ʼe ako, ʼe tokoni mai anai kia tatou ke tou fai he ako ʼe ʼi ai hona ʼu fua.—Loma 12:12.
13. Koteā ʼaē ka tokoni mai ke tou maʼu he ʼu fua lelei ʼi te ʼu ako Tohi-Tapu?
13 Ke fua lelei te ʼu ako ʼaē ʼe tou fai, ʼe tonu ke tou teuteuʼi lelei. Kapau ʼe tou manatu ʼe mole heʼeki tou popoto ʼi te faʼahi ʼaia, pea ʼe lelei ke tou sioʼi te faʼahiga faiako ʼa te tagata taupau ʼo te Ako Tohi. ʼI te tahi lakaga, ʼe lagi feala ke koutou kaugā ʼolo mo he kau fai faka mafola ʼo te Puleʼaga kua ʼi ai he ʼu fua ʼo tanatou fai ʼo te ʼu ako Tohi-Tapu. ʼE mahino ia, ʼe tonu ke tou vakavakaʼi te agaaga ʼo Sesu Kilisito pea mo tana faʼahiga faiakonaki.
14. Koteā ʼaē ʼe tonu ke tou fai ke malave tatatou ʼu palalau ki te loto ʼo ia ʼe ina ako te Tohi-Tapu?
14 Neʼe fiafia ia Sesu ʼi te fai ʼo te finegalo ʼo tana Tāmai ʼaē ʼe ʼi selo pea mo tana palalau ki te hahaʼi ʼo ʼuhiga mo te ʼAtua. (Pesalemo 40:8) Neʼe agamālū pea neʼe malave tana ʼu palalau ki te loto ʼo nātou ʼaē neʼe fakalogo kia te ia. (Mateo 11:28-30) Koia tou faiga ke tou fai he ʼu palalau ʼe malave ki te loto ʼo tatatou kau ako. Moʼo fakahoko te faʼahi ʼaia, ʼe tonu ke tou teuteuʼi te ʼu ako fuli ʼo tou manatuʼi te ʼaluʼaga ʼo ia ʼaē ʼe ako. Ohage la, kapau ʼe mole tui ki te Tohi-Tapu, pea ʼe lagi tonu anai ke tou faiga ke ina faka tui ʼe moʼoni te Tohi-Tapu. ʼE tou lau anai he ʼu tuʼuga vaega Tohi-Tapu pea mo fakamahino.
Tou Tokoni Ki Te Kau Ako Ke Nātou Mahino Ki Te ʼu Lea Fakatātā
15, 16. (a) ʼE tou lava tokoni feafeaʼi ki he ako ʼe mole mahino ki he lea fakatātā ʼe fakaʼaogaʼi ʼi te Tohi-Tapu? (b) Koteā ʼaē ʼe feala ke tou fai mo kapau ʼe fakaʼaogaʼi ʼi tatatou ʼu tohi he lea fakatātā ʼe faigataʼa te mahino kiai he tahi ʼe ina ako te Tohi-Tapu?
15 Ko he tahi ʼe ina ako te Tohi-Tapu, ʼe mole lagi mahino lelei ki he lea fakatātā ʼe fakaʼaogaʼi ʼi te Tohi-Tapu. Ohage la, ʼe mole lagi mahino ki te faka ʼuhiga ʼo te ʼu palalau ʼa Sesu, ʼi tana ʼui ʼaē ke fakatuʼu te mālama ki te tuʼulaga mālama. (Maleko 4:21, 22) Neʼe talanoa ia Sesu ki te faʼahiga mālama ʼo te temi muʼa, ʼaē neʼe fakafonu ʼaki te faʼahiga lolo pea neʼe tutu ʼaki te moʼi vavae. Ko te taʼi mālama ʼaia neʼe fakatuʼu ki tona tuʼulaga moʼo faka mālamagia te loto fale. ʼE lagi feala hakotou fai he ʼu kumi ʼi te ʼu tohi ʼa te Sosiete, ke feala hakotou mahino lelei ki te lea fakatātā ʼa Sesu. Kae ʼe fakafiafia lahi takita lava fakamahino ʼo he manatu kia ia ʼaē ʼe ako pea mo fiafia ai.
16 ʼI ʼihi temi, ko te tohi ʼaē ʼe fai kiai te ako ʼe ina fakaʼaogaʼi he lea fakatātā ʼe faigataʼa he mahino kiai he tahi ʼe ako. Koutou toʼo he temi ke koutou fakamahino, peʼe koutou fakaʼaogaʼi he tahi lea fakatātā ʼe ʼalutahi mo te manatu. ʼO ʼuhiga mo te ʼohoana, ʼe lagi fakahā ʼi te tohi, ʼe maʼuhiga ke maʼu he tahi ʼe ʼalutahi mo kita pea mo faiga fakatahi moʼo fai he gāue. Moʼo fakatātā te faʼahi ʼaia, ʼe feala ke talanoa ki he tagata ʼe tautau ʼi ʼoluga, ʼe ina fakatō ifo ia ia pea ʼe hapo ia ia e he tahi kehe. ʼE feala ke tou fakaʼaogaʼi he tahi lea fakatātā moʼo fakamahino te maʼuhiga ʼaē ke maʼu he tahi ʼe ʼalutahi mo kita pea mo kita gāue fakatahi mo ia, ohage la ko he kau gāue ʼe nātou gāue fakatahi moʼo fetuku he ʼu ʼuta mai te vaka.
17. Koteā te ako ʼe tou tāʼofi mai ia Sesu ʼo ʼuhiga mo te ʼu lea fakatātā?
17 Moʼo fakaʼaogaʼi he tahi lea fakatātā ʼe lagi tonu ke koutou teuteu fakatomuʼa. Kae ʼe ko he fakahā ʼaia ʼe tou tokaga fakalelei kia ia ʼaē ʼe ina ako te Tohi-Tapu. Neʼe fakaʼaogaʼi e Sesu te ʼu lea fakatātā faigafua moʼo fakamahino te ʼu manatu faigataʼa. ʼE tou maʼu ʼi tana Akonaki ʼi te Moʼuga te ʼu faʼifaʼitaki, pea ʼe fakahā e te Tohi-Tapu ko tana faiakonaki neʼe fua lelei kia nātou neʼe fakalogo kia te ia. (Mateo 5:1–7:29) ʼAki he faʼa kātaki, neʼe fakamahino e Sesu te ʼu meʼa he neʼe tokaga moʼoni ki te hahaʼi.—Mateo 16:5-12.
18. Ko te tokoni fea ʼaē ʼe tonu ke tou mulimuli kiai ʼo ʼuhiga mo te ʼu vaega faka Tohi-Tapu ʼaē ʼe tuʼu ʼi tatatou ʼu tohi?
18 Ko tatatou tokakaga ʼaē ki te hahaʼi ʼe ina uga anai tatou ke tou ‘fakakaukauʼi te Tohi-Tapu mo nātou.’ (Gaue 17:2, 3) ʼE tonu ai ke tou ako fakamalotoloto ʼo tou faikole pea mo tou fakaʼaogaʼi lelei te ʼu tohi ʼaē ʼe foaki mai e “te tagata tauhi ʼapi agatonu.” (Luka 12:42-44, MN ) Ohage la, ko te tohi Te ʼAtamai Mālama ʼAē ʼe Ina Taki Ki Te Maʼuli Heʼegata ʼe lahi ai te ʼu vaega faka Tohi-Tapu.a ʼUhi ko te mole lahi ʼo te tohi, ko ʼihi vaega ʼe mole tohi katoa ai. ʼI te ako, ʼe maʼuhiga ke tou lau pea mo fakamahino ni ʼu vaega ʼe tohi ai, heʼe ko tatatou faiako ʼe fakatafito ki te Folafola ʼa te ʼAtua, ʼaē ʼe mālohi ʼaupito. (Hepeleo 4:12) Ka koutou fai te ako, koutou fakaʼaogaʼi tuʼumaʼu te Tohi-Tapu, pea mo fakaʼaogaʼi lahi te ʼu vaega ʼaē ʼe tuʼu ʼi te ʼu palakalafe. Koutou tokoni kia ia ʼaē ʼe ako ke ina sioʼi te meʼa ʼaē ʼe ʼui e te Tohi-Tapu ʼo ʼuhiga mo he faʼahiga manatu peʼe ko he meʼa ʼe tonu ke ina fai. Koutou faiga ʼo fakahā age kia ia ʼe fua lelei anai kia ia kapau ʼe fakalogo ki te ʼAtua.—Isaia 48:17, 18.
Koutou Fai He ʼu Fehuʼi Ke Tupu Tana Fakakaukau
19, 20. (a) He koʼe ʼe tonu ke tou fai he ʼu fehuʼi moʼo ʼiloʼi te manatu ʼo ia ʼaē ʼe ako? (b) Koteā ʼaē ʼe feala ke fai mo kapau ʼe tonu ke tou fai he ʼu kumi?
19 Neʼe faiva ia Sesu ʼi te fakaʼaogaʼi ʼo te ʼu fehuʼi moʼo tokoni ki te hahaʼi ke nātou fakakaukau. (Mateo 17:24-27) Kapau ʼe koutou fai he ʼu fehuʼi fakapotopoto kia ia ʼaē ʼe ako, ke feala hakotou ʼiloʼi tana manatu, pea ʼe koutou ʼiloʼi anai ʼaki tana ʼu tali peʼe koteā tana manatu ʼo ʼuhiga mo te faʼahi ʼaē ʼe koutou palalau kiai. ʼE feala ke tou sio ai ʼe kei ina taupau he ʼu manatu ʼe mole ʼalutahi mo te Tohi-Tapu. Kapau la ʼe tui ki te Tahitolu, pea ʼe fakahā lelei ʼi te kapite 3 ʼo te tohi Te ʼAtamai Mālama ʼe mole tuʼu te kupu “Tahitolu” ʼi te Tohi-Tapu. ʼE tuʼu ʼi te tohi he ʼu vaega ʼo te Tohi-Tapu pea ko ʼihi ʼe mole tohi katoa, ʼe nātou fakahā ai ko Sehova ʼe kehe mo Sesu pea ko te laumālie maʼoniʼoni ʼe ko te mālohi gāue ʼo te ʼAtua, kae mole ko he tahi. Ko te lau pea mo te fai palalau ki te ʼu vaega ʼaia ʼe lagi feʼauga aipe. Kae e feafeaʼi mo kapau ʼe tonu ke hilifaki he tahi ʼu manatu? Lagi ʼi te ʼosi ʼo te ako, ʼe feala ke fakaʼaogaʼi he kiʼi temi ke fai palalau ki te faʼahi ʼaia ʼaki te tahi tohi ʼa te kau Fakamoʼoni ʼa Sehova, ohage la ko te kaupepa lahi Fakafalani Doit-on croire à la Trinité ? Hili ʼaia, ʼe feala hakotou toe fakamanatuʼi fakanounou te ako ʼaki te tohi Te ʼAtamai Mālama.
20 E feafeaʼi mo kapau ʼe koutou punamaʼuli peʼe mole koutou leleiʼia tana faʼahiga tali ki te fehuʼi? Kapau ʼe talanoa ʼo ʼuhiga mo te suluka, peʼe ko he tahi age faʼahi maʼuhiga, ʼe feala ke tou ʼui ʼe tou hoko atu anai te ako pea mo tou fai palalau ki te faʼahi ʼaia ʼi te vāhaʼa ka haʼu. Kapau ʼe koutou ʼiloʼi ko ia ʼaē ʼe koutou ako ʼe kei suluka, ʼe koutou maʼu anai he tahi ʼu manatu moʼo tokoni kia ia ke tuputupu ʼi te faʼahi fakalaumālie. ʼI tatatou faiga ʼaē ke tou gāueʼi te loto ʼo ia ʼaē ʼe ako, tou faikole kia Sehova ke tokoni kia ia ke tuputupu ʼi te faʼahi fakalaumālie.
21. Koteā ʼaē ʼe feala ke hoko mo kapau ʼe tou fai tatatou faʼahiga faiako ʼo mulimuli ki te ʼu meʼa ʼaē ʼe ʼaoga moʼoni kia ia ʼaē ʼe ako?
21 ʼAki he teuteu lelei pea mo te tokoni ʼa Sehova, ʼe mahino ia ʼe tou lava fai anai tatatou faʼahiga faiako ʼo mulimuli ki te ʼu meʼa ʼaē ʼe ʼaoga moʼoni kia ia ʼaē ʼe ako. ʼAki te temi, ʼe tou lava tokoni anai kia ia ke toe lahi age tana ʼofa lahi ki te ʼAtua. Pea ʼe lagi toe feala anai hatatou fakatuputupu ʼi tona loto he fakaʼapaʼapa pea mo he loto fakafetaʼi ki te kautahi ʼa Sehova. Pea ʼe ko he meʼa fakafiafia ʼaupito mokā fakamoʼoni e te kau ako Tohi-Tapu ‘ko te ʼAtua ʼe nofo moʼoni ʼi te lotolotoiga ʼo tatou’! (1 Kolonito 14:24, 25) ʼOfa pe ke tou fai he ʼu ako Tohi-Tapu ʼe fua lelei, pea mo tou faiga mālohi ke tou tokoni ki te hahaʼi ke nātou liliu ko he ʼu tisipulo ʼa Sesu.
Ko He Koloā Ke Tou Taupau Lelei
22, 23. Koteā ʼaē ʼe ʼaoga kia tatou mo kapau ʼe tou fia fakahoko katoa totatou minisitelio?
22 Moʼo fakahoko katoa totatou minisitelio, ʼe tonu ke tou falala ki te mālohi ʼaē ʼe foaki mai e te ʼAtua. ʼO ʼuhiga mo te minisitelio, neʼe faitohi fēnei ia Paulo ki te kau Kilisitiano fakanofo: “Ko te koloā ʼaia, ʼe tou maʼu ʼi te ʼu ipu kele, koteʼuhi ko te mālohi ʼaē ʼe laka age ʼi te mālohi māhani ʼe ko te mālohi ia ʼo te ʼAtua kae mole ko te mālohi ʼo tatou totonu.”—2 Kolonito 4:7, MN.
23 Peʼe tou kau ʼi te kau fakanofo peʼe ʼi te “tahi ʼu ōvi,” kae ʼe tou hage ko he ʼu ipu kele ʼe maumau gafua. (Soane 10:16, MN ) Kae ko Sehova ʼe feala ke ina foaki mai te mālohi ʼaē ʼe ʼaoga kia tatou, ke feala hatatou fakahoko tatatou gāue logola te ʼu faigataʼaʼia. (Soane 16:13; Filipe 4:13) Koia tou falala katoa kia Sehova, tou faka maʼuhigaʼi totatou koloā ʼaē ko te selevisi, pea mo fakahoko katoa totatou minisitelio.
[Kiʼi nota]
a Neʼe tā e te kau Fakamoʼoni ʼa Sehova.
ʼE Koutou Tali Feafeaʼi Anai?
• Koteā ʼaē ʼe feala ke fai e te kau tagata ʼāfea moʼo fakahoko katoa tanatou minisitelio?
• ʼE tou lava hikihiki feafeaʼi tatatou fai te ʼu ako Tohi-Tapu?
• Koteā ʼaē ka koutou fai anai mo kapau ko he tahi ʼe ina ako te Tohi-Tapu, ʼe mole mahino ki he lea fakatātā peʼe ʼaoga ke hilifaki he tahi ʼu manatu ʼo ʼuhiga mo he faʼahi?
[Paki ʼo te pasina 16]
Ko te kau tagata ʼāfea ʼe nātou faiako ʼi te kokelekasio pea mo tokoni ki te ʼu tēhina mo tuagaʼane ke nātou popoto ʼi te minisitelio
[Paki ʼo te pasina 18]
ʼE tou fakagigila totatou mālama ʼi tatatou fai he ʼu ako Tohi-Tapu ʼe fua lelei