Koutou Tekeʼi Te Manatu ʼo Te Malamanei ʼAē ʼe Fetogi
“Neʼe mole tou maʼu te manatu ʼo te malamanei ʼaenī, kae ko te laumālie ʼaē ʼe haʼu mai te ʼAtua.”—1 Kolonito 2:12, MN.
1. Neʼe kākāʼi feafeaʼi ia Eva?
“KO TE gata—neʼe ina kākāʼi ʼau.” (Senesi 3:13) ʼI tana palalau ʼaia, neʼe faiga e te ʼuluaki fafine, ia Eva, ke ina fakamahino te tupuʼaga ʼo tana agatuʼu kia Sehova ʼAtua. Ko te meʼa ʼaē neʼe ina ʼui neʼe moʼoni, kae neʼe mole feala hana takuʼaki tana agahala. Ki muli age, ʼaki te takitaki ʼa te ʼAtua, neʼe tohi fēnei e te ʼapositolo ko Paulo: “Ko [Eva] ʼaē neʼe kākāʼi ʼosi.” (1 Timoteo 2:14, MN ) Neʼe faihala ʼi tana tui ʼaē ko tana talagataʼa ʼo kai ki te fuaʼi ʼakau ʼaē neʼe tapuʼi, ʼe fua lelei anai kia ia, pea ʼe liliu anai ohage ko te ʼAtua. Neʼe toe faihala foki ʼo ʼuhiga mo ia ʼaē neʼe ina fakahēʼia ia ia. Neʼe mole ina ʼiloʼi ʼe ko Satana te Tevolo ʼaē neʼe palalau ʼaki te gata.—Senesi 3:1-6.
2. (a) ʼE fakahēʼi feafeaʼi e Satana te hahaʼi ia ʼaho nei? (b) Koteā “te manatu ʼo te malamanei,” pea koteā te ʼu fehuʼi ʼaē ka tou vakaʼi?
2 Talu mai te temi ʼo Atama mo Eva, neʼe hoko atu e Satana tana kākāʼi te hahaʼi. ʼI tona fakahagatonu, “ ʼe ina fakahēʼi te kele katoa.” (Apokalipesi 12:9, MN ) Mole heʼeki fetogi tana faʼahiga fai. Logola ʼe mole kei ina fakaʼaogaʼi he gata, kae ʼe mole ina fakahā fakahagatonu ia ia. ʼE fakahēʼi e Satana te hahaʼi, ʼaki te ʼu fakafiafia, mo te televisio, te lātio, te sulunale pea mo te tahi ʼu meʼa. ʼE ina faigaʼi ke nātou tui ʼe mole ʼaoga kia nātou te takitaki ʼa te ʼAtua pea ʼe mole hona fua lelei kia nātou. ʼAki te ʼu kākā ʼa te Tevolo, kua agatuʼu te hahaʼi ki te ʼu lao pea mo te ʼu pelesepeto ʼa te Tohi-Tapu. ʼE fakahigoaʼi e te Tohi-Tapu te faʼahi ʼaia ko “te manatu ʼo te malamanei.” (1 Kolonito 2:12, MN ) Ko te manatu ʼaia ʼe malave mālohi ki te tui pea mo te aga ʼa te hahaʼi ʼaē ʼe mole nātou ʼiloʼi te ʼAtua. ʼE hā feafeaʼi te manatu ʼaia, pea ʼe tou lava tauʼi feafeaʼi te mālohi agakovi ʼaia? Tou vakaʼi te ʼu fehuʼi ʼaia.
ʼE Mole Kei Mulimuli Te Hahaʼi Ki Te ʼu Aga ʼAē ʼe Tonu Ke Fai
3. He koʼe kua mālohi ʼaupito “te manatu ʼo te malamanei” ʼi totatou temi?
3 ʼI totatou temi, kua mālohi ʼaupito “te manatu ʼo te malamanei” ʼaenī. (2 Timoteo 3:1-5) Lagi kua koutou tokagaʼi ko te hahaʼi ʼe mole kei nātou mulimuli ki te ʼu aga ʼaē ʼe tonu ke fai. ʼE fakamahino e te Tohi-Tapu tona tupuʼaga. ʼI te ʼosi fakatuʼu ʼo te Puleʼaga ʼo te ʼAtua ʼi te taʼu 1914, neʼe hoko te tau ʼi selo. Neʼe mole mālo ia Satana mo tana kau temonio pea neʼe lī ifo ia nātou ki te kele. ʼAki tona toe ʼita lahi, neʼe toe fakalahi age e Satana tana ʼu fakatuʼutuʼu moʼo kākāʼi te malamanei katoa. (Apokalipesi 12:1-9, 12, 17) ʼE ina faiga ʼi te ʼu ʼaluʼaga fuli pe ke “hēhē . . . mo nātou ʼaē kua fili.” (Mateo 24:24, MN ) ʼE ina tauʼi tāfito tatou koteʼuhi ko tatou te hahaʼi ʼa te ʼAtua. ʼE ina faigaʼi ke ina maumauʼi tatou ʼi te faʼahi fakalaumālie, ke mole kei tou maʼu te ʼofa ʼo Sehova pea mo te ʼamanaki ki te maʼuli heʼegata.
4. Koteā te manatu ʼa te ʼu kaugana ʼa Sehova ʼo ʼuhiga mo te Tohi-Tapu, pea koteā te manatu ʼa te malamanei kiai?
4 ʼE faiga ia Satana ke meʼa noaʼi e te hahaʼi ia te Tohi-Tapu, te tohi maʼuhiga ʼaē ʼe tou ako ai peʼe ko ai totatou Tupuʼaga ʼofa. Ko te ʼu kaugana ʼa Sehova ʼe nātou ʼofa pea mo nātou faka maʼuhigaʼi te Tohi-Tapu. ʼE tou ʼiloʼi ko te Folafola ʼaia ʼe haʼu mai te ʼAtua, kae mole ko te folafola ʼa te tagata. (1 Tesalonika 2:13; 2 Timoteo 3:16) Kae ko te malamanei ʼe ʼa Satana, ʼe mole ina loto ke tou manatu feiā. Ohage la, ʼe tohi fēnei te ʼu ʼuluaki palalau ʼo te tohi ʼe fakafeagai ki te Tohi-Tapu: “ ʼE mole he meʼa ʼe ‘taputapu’ ʼo ʼuhiga mo te Tohi-Tapu, pea ʼe mole ko ‘te folafola ʼa te ʼAtua.’ Neʼe mole tohi e te kau sagato ʼaki te takitaki ʼa te ʼAtua, kae neʼe tohi e he ʼu pelepitelo neʼe fia maʼu tuʼulaga.” Ko te hahaʼi ʼaē ʼe nātou tui ki te ʼu palalau ʼaia, ʼe faigafua hanatou manatu hala ʼe feala ke nātou tauhi ki te ʼAtua ʼo mulimuli ki te ʼu meʼa ʼaē ʼe nātou leleiʼia, peʼe mole nātou tauhi kia te ia.—Tāʼaga Lea 14:12.
5. (a) Koteā ʼaē neʼe ʼui e te tagata faitohi ʼo ʼuhiga mo te ʼu lotu ʼaē ʼe nātou fakaʼaogaʼi te Tohi-Tapu? (b) Koteā ʼaē ʼe mole tatau ai te ʼu manatu ʼo te malamanei pea mo te meʼa ʼaē ʼe ʼui e te Tohi-Tapu? (Vakaʼi te talanoa ʼi te pasina ʼaē ʼe hoa mai.)
5 ʼUhi ko te ʼu fakafeagai ʼaē ʼe fai ki te Tohi-Tapu, pea mo te malualoi faka lotu ʼo nātou ʼaē ʼe nātou lau ʼe nātou lagolago ki te Tohi-Tapu, neʼe tuputupu ai te fehiʼa ki te ʼu lotu, ʼo feiā ki te ʼu lotu ʼaē ʼe mulimuli ki te Tohi-Tapu. Ko te televisio, mo te lātio mo te sulunale pea mo te ʼu hahaʼi popoto, ʼe nātou fakafeagai ki te lotu. ʼE ʼui fēnei e te tagata faitohi: “Ko te manatu ʼaē ʼe mafola ʼo ʼuhiga mo te lotu faka Sutea pea mo faka Kilisitiano ʼe mole ko he manatu ʼe lelei. Ko ʼihi ʼe nātou ʼui ʼe ko he ʼu meʼa ʼāfea ʼe ina taki mai te hahaʼi, pea ko ʼihi ʼe nātou ʼui ʼe ko he ʼu manatu ʼāfea ʼe ina tāʼofi te hahaʼi ke nātou liliu ʼo popoto pea mo ina tāʼofi te ʼu tuputupu ʼi te poto fakatagata. ʼI te ʼu taʼu pe ʼaenī, neʼe liliu te fehiʼa ʼaia ko he manukinuki pea mo he fakafeagai mālohi.” ʼI te agamāhani, ʼe tupu te agakovi ʼaia ʼuhi ko nātou ʼaē ʼe mole nātou tui ʼe maʼuli moʼoni te ʼAtua pea kua nātou liliu “ ʼo vavale ʼi tanatou ʼu fakakaukau.”—Loma 1:20-22, MN.
6. Koteā te manatu ʼa te malamanei ʼo ʼuhiga mo te ʼu felāveʼi fakasino ʼaē ʼe tauteaʼi e te ʼAtua?
6 Koia ʼe mole tou punamaʼuli ai ki te fakamamaʼo ʼa te hahaʼi mai te ʼu lekula ʼa te ʼAtua ʼo ʼuhiga mo te aga. Ohage la, ʼe ʼui e te Tohi-Tapu ko te ʼu felāveʼi fakasino ʼa he tagata mo he tahi tagata ʼe ko he aga “heʼeʼaoga.” (Loma 1:26, 27, MN ) ʼE ina toe ʼui ko nātou ʼaē ʼe nātou fai folonikasio pea mo tono ʼe mole nātou maʼu anai te Puleʼaga ʼo te ʼAtua. (1 Kolonito 6:9) Kae ʼe lahi te ʼu fenua ʼe nātou tali te ʼu felāveʼi fakasino ʼaia, ʼo nātou fakahā ʼi te ʼu tohi, te ʼu nusipepa, te ʼu hiva, te ʼu ʼata, pea mo te televisio ohage ko he ʼu aga ʼe lelei. Ko te ʼu hahaʼi ʼaē ʼe nātou tala ʼe mole nātou leleiʼia te ʼu aga ʼaia, ʼe ʼui ko he ʼu hahaʼi loto fefeka, mo fakapalatahi pea ʼe mole nātou tali te ʼu fetogi ʼo totatou temi. ʼE mole faka ʼuhiga e te malamanei te ʼu lekula ʼa te ʼAtua ohage ko hona ʼofa. Kae ʼe hage kia nātou ʼe nātou tāʼofi he tahi ke maʼuli faʼitaliha ʼo fai te meʼa ʼaē ʼe loto kiai.—Tāʼaga Lea 17:15; Suta 4.
7. Koteā te ʼu fehuʼi ʼe tonu ke tou fai kia tatou?
7 ʼI te lotolotoiga ʼo te malamanei ʼaē ʼe ʼāsili fakafeagai ki te ʼAtua, ʼe ko he aga fakapotopoto hatatou vakaʼi tatatou aga pea mo te ʼu meʼa ʼaē ʼe maʼuhiga kia tatou. ʼI ʼihi temi, ʼe tonu ke tou sivisivi ia tatou ʼi te faikole, ke tou ʼiloʼi papau ai ʼe mole tou fakamamaʼo mai te manatu pea mo te ʼu lekula ʼa Sehova. Ohage la, ʼe feala ke tou fai kia tatou te ʼu fehuʼi ʼaenī: ‘Kua ʼau leleiʼia koa he ʼu faʼahi neʼe mole lagi ʼau leleiʼia ki muʼa atu? ʼE ʼau tali koa he ʼu aga ʼe tapuʼi e te ʼAtua? Kua fakahaʼuhaʼu koa ke mole kei maʼuhiga kia ʼau te ʼu meʼa fakalaumālie? ʼE hā koa ʼi toku maʼuli ʼe ʼau fakamuʼamuʼa te ʼu gāue ʼo te Puleʼaga?’ (Mateo 6:33) Ko te fakakaukauʼi ʼo te ʼu faʼahi ʼaia ʼe tokoni mai anai ke tou fakafeagai ki te manatu ʼo te malamanei.
ʼAua “Naʼa Tou Tafea”
8. ʼE lava fakamamaʼo feafeaʼi he tahi mai ia Sehova?
8 Neʼe tohi fēnei e te ʼapositolo ko Paulo ki te kau Kilisitiano: “E maua aupito ke tou tokaga ki te mea kua tou logo ki ai, naʼa tou tafea.” (Hepeleo 2:1) Ko te vaka ʼaē ʼe tafea ʼe mole tau ki te potu ʼaē neʼe tonu ke ʼalu kiai. Kapau ʼe mole tokaga te kapiteni ki te matagi pea mo te tafe ʼo te tai, pea ʼe faigafua anai ki tona vaka ke tafea ʼo mole kaku ki te ʼuafu pea mo ʼī ki te hakau. ʼO toe feiā pe, kapau ʼe mole tou nonofo tokaga ki te ʼu moʼoni maʼuhiga ʼo te Folafola ʼa te ʼAtua, pea ʼe faigafua anai hatatou fakamamaʼo mai ia Sehova pea mo tou tūkia ʼi te faʼahi fakalaumālie. ʼE mole hoko pe te faʼahi ʼaia mokā tou līaki katoa te moʼoni. ʼI tona ʼuhiga moʼoni, tokolahi neʼe mole nātou līaki ia Sehova fakafokifā pe. ʼI te agamāhani, ʼe fakahaʼuhaʼu māmālie tanatou fakaʼaogaʼi lahi tonatou temi ki he meʼa ʼe mole kei feala ai hanatou tokagaʼi te Folafola ʼa te ʼAtua. Neʼe mole nātou tokagaʼi, pea neʼe nātou tō ai ki te agahala. Ohage ko he kapiteni ʼe tulemoe, ko te hahaʼi ʼaia ʼe nātou tulemomoe pea hoki nātou ʼaʼala ake kae kua tauhala.
9. Ko te ʼu tapuakina fea ʼaē neʼe foaki e Sehova kia Salomone?
9 Tou vakaʼi te maʼuli ʼo Salomone. Neʼe fakanofo e Sehova ke hau ki Iselaele. Neʼe fakagafua e te ʼAtua ke laga e Salomone te fale lotu pea neʼe ina takitaki ia ia ke ina tohi he ʼu koga ʼo te Tohi-Tapu. Neʼe palalau tuʼa lua ia Sehova mo ia pea mo ina foaki kia ia te ʼu koloā, te ʼiloa pea mo te tokalelei ʼi tona temi hau. Kae neʼe tapuakina tāfito e Sehova ia Salomone ʼaki he poto lahi. ʼE ʼui fēnei e te Tohi-Tapu: “Pea neʼe foaki lahi e te ʼAtua kia Salomone, te poto pea mo te ʼatamai, pea mo te mahino, ohage ko te one ʼo te matatai. Pea ko te poto ʼo Salomone neʼe lahi age ia ʼi te poto ʼo te hahaʼi ʼo te potu Hahake pea mo te poto ʼo te hahaʼi fuli ʼo Esipito.” (1 Hau 4:21, 29, 30; 11:9) ʼE mahino ia ʼe lagi manatu anai e he tahi ʼe mole he tagata ohage ko Salomone neʼe nofo agatonu ki te ʼAtua. Kae neʼe tō ia Salomone ki te ʼapositasia. Neʼe hoko feafeaʼi te faʼahi ʼaia?
10. Ko te fakatotonu fea ʼaē neʼe mole fakalogo kiai ia Salomone, pea koteā ʼaē neʼe hoko?
10 Neʼe ʼiloʼi e Salomone ia te Lao ʼa te ʼAtua pea mo mahino lelei kiai. ʼE mahino ia neʼe ina tokagaʼi tāfito te ʼu fakatotonu ʼaē neʼe fai ki te ʼu hau ʼo Iselaele. Ohage ko te fakatotonu ʼaenī: “ ʼE mole tonu anai [ki te hau] ke lahi tona ʼu ʼohoana, ke ʼaua naʼa hēʼia tona loto.” (Teutalonome 17:14, 17) Logola te matala lelei ʼo te fakatotonu ʼaia, kae neʼe ʼohoana Salomone mo te ʼu fafine e toko fitugeau pea mo tana ʼu fafine sinifu e tolugeau. Tokolahi ʼi te ʼu fafine ʼaia neʼe nātou tauhi ki te ʼu ʼatua pagani. ʼE mole tou ʼiloʼi pe koʼe neʼe hahaʼi feiā te ʼu ʼohoana ʼo Salomone, pea ʼe mole tou toe ʼiloʼi pe koʼe neʼe ina fai te faʼahi ʼaia. Ko te meʼa ʼaē ʼe tou ʼiloʼi ko tana mole fakalogo ki te fakatotonu ʼa te ʼAtua. Pea neʼe hoko te meʼa ʼaē neʼe fakatokaga age e Sehova, heʼe tou lau fēnei: “Ko [te] ʼu ʼohoana [ʼo Salomone] neʼe nātou uga māmālie . . . tona loto ke ina muliʼi te tahi ʼu ʼatua.” (1 Hau 11:3, 4) “Māmālie” pe pea neʼe mole kei maʼu e Salomone te poto fakaʼatua pea neʼe higa ai. ʼAki te temi, ko te loto ʼo Salomone ke ina fakafiafia tona ʼu ʼohoana pagani neʼe maʼuhiga age ʼi tana fia fakalogo pea mo fakafiafia te ʼAtua. ʼI meʼa fakaʼofaʼofa foki, heʼe ki muʼa atu, neʼe ko Salomone ʼaē neʼe ina tohi te ʼu palalau ʼaenī: “Ke ke fakapotopoto Ê toku foha pea mo fakafiafia toku loto, ke feala haku tali kia ia ʼaē ʼe manukinuki kia te ʼau.”—Tāʼaga Lea 27:11.
ʼE Mālohi Te Manatu ʼo Te Malamanei
11. Ko te ʼu meʼa ʼaē ʼe hū ki tatatou fakakaukau ʼe malave feafeaʼi ki tatatou manatu?
11 ʼE ʼi ai te faʼahi ʼe tonu ke tou tāʼofi ʼi te faʼifaʼitaki ʼo Salomone. ʼAua naʼa tou manatu kua tou ʼiloʼi te moʼoni, pea ʼe mole feala anai ke higa tatatou fakakaukau ʼi te ʼu manatu ʼo te malamanei. Ohage pe ko te meʼa kai ʼe ʼi ai tona fua ki totatou sino, ʼo toe feiā pe mo te ʼu meʼa ʼaē ʼe hū ki totatou ʼatamai, ʼe feala ke ina fetogi tatatou fakakaukau. Ko te ʼu meʼa ʼaē ʼe tou fakahū ki totatou ʼatamai ʼe malave ki tatatou ʼu manatu pea mo tatatou aga. ʼE ʼiloʼi te faʼahi ʼaia e te ʼu sosiete, koia ʼe nātou fakaʼaogaʼi ai te ʼu lauʼi miliale paʼaga ʼi te taʼu fuli moʼo fakahāhā te ʼu meʼa ʼaē ʼe nātou fakatau. Ko te ʼu publicités ʼe nātou fakaʼaogaʼi te ʼu kupuʼi palalau pea mo te ʼu paki ke tupu ai te fia toʼo e te hahaʼi ia te ʼu meʼa ʼaia. Ko te hahaʼi ʼaē ʼe fai publicités ʼe nātou toe ʼiloʼi foki ko te fakahāhā tuʼa tahi peʼe tuʼa lua ʼo he meʼa ke toʼo e te hahaʼi, ʼi te agamāhani ʼe mole ʼolo atu aipe te hahaʼi ʼo toʼo te ʼu meʼa ʼaia. Kae ʼaki te temi, mokā ʼe nātou fakahāhā tuʼa lahi te ʼu meʼa ʼaia, ʼe manatu ai leva te hahaʼi ʼe ko he ʼu meʼa ʼe tonu ke nātou toʼo. ʼE maʼu te ʼu fua ʼo te ʼu publicités, heʼe kanaʼauala ʼe mole he tahi ʼe ina fakaʼaoga tana paʼaga moʼo fai ʼo te ʼu meʼa ʼaia. ʼE malave mālohi ki te fakakaukau pea mo te aga ʼa te hahaʼi.
12. (a) Koteā ʼaē ʼe fai e Satana moʼo fakahalaʼi te fakakaukau ʼa te hahaʼi? (b) Koteā ʼaē ʼe hā ai ʼe feala ki te kau Kilisitiano ke nātou tō ki te ʼu manatu hala ʼaia?
12 Ohage ko he tagata fai publicités, ko Satana ʼe ina fakahāhā tana ʼu manatu ohage ko he meʼa ʼe lelei, heʼe ina ʼiloʼi ʼaki te temi ʼe tali anai e te hahaʼi tana manatu. ʼAki te ʼu fakafiafia pea mo te tahi ʼu meʼa, ʼe kākāʼi e Satana te hahaʼi ke nātou tui ko te ʼu meʼa ʼaē ʼe lelei ʼe kovi pea ko te meʼa ʼaē ʼe kovi ʼe lelei. (Isaia 5:20) Māʼiape la mo te kau Kilisitiano moʼoni neʼe nātou tō ki te ʼu manatu hala ʼa Satana. ʼE fakatokaga fēnei e te Tohi-Tapu: “ ʼE ʼui tonu e te folafola ʼaē ʼe haʼu mai te ʼAtua, ʼi te ʼu temi fakamuli, ʼe līaki anai e ʼihi tanatou tui, ʼo nātou tokakaga ki he ʼu folafola loi pea mo he ʼu akonaki ʼa te kau temonio, ʼuhi ko te malualoi ʼa te hahaʼi ʼaē ʼe nātou lau ni ʼu loi, ohage kua fakaʼiloga nātou ʼaki he ukamea kakaha ʼi tonatou leʼo ʼo loto.”—1 Timoteo 4:1, 2, MN; Selemia 6:15.
13. Ko ai te ʼu fakakaugā kovi, pea ʼe malave feafeaʼi tatatou ʼu fakakaugā kia tatou?
13 ʼE mole he tahi ʼe hāo mai te ʼu manatu ʼo te malamanei. ʼE mālohi te ʼu fakaneke pea mo te ʼu fakahala ʼo te mālama ʼa Satana. ʼE tokoni fakapotopoto fēnei mai ia te Tohi-Tapu kia tatou: “Aua naa koutou faihala: ‘Ko te u fakakauga ae e kovi, e ina maumauʼi te u aga e lelei.’ ” (1 Kolonito 15:33) Ko te ʼu fakakaugā kovi, ʼaē ʼe feala ke maʼu ʼi te kokelekasio, ʼe faka ʼuhiga ki te ʼu meʼa fuli pe pea mo te hahaʼi fuli pe ʼaē ʼe nātou maʼu te manatu ʼo te malamanei. Kapau ʼe tou manatu ʼe mole feala ke fua kovi kia tatou te ʼu fakakaugā kovi pea ʼe tou toe manatu pe anai ʼe mole feala ke tokoni mai kia tatou te ʼu fakakaugā lelei. Kae ʼe hala te manatu ʼaia! ʼE fakamahino lelei mai e te Tohi-Tapu ia te faʼahi ʼaia, ʼo ina ʼui fēnei: “Ko ʼaē ʼe haʼele mo te kau poto ʼe liliu anai ia ʼo poto, kae ko ʼaē ʼe fakatahi mo te kau vale, ʼe fua kovi anai kia ia.”—Tāʼaga Lea 13:20.
14. ʼE tou lava tauʼi feafeaʼi te manatu ʼo te malamanei?
14 Moʼo tauʼi te manatu ʼo te malamanei, ʼe tonu ke tou fakatahi mo te ʼu hahaʼi popoto—te hahaʼi ʼaē ʼe tauhi kia Sehova. ʼE tonu ke tou fakafonu totatou ʼatamai ʼaki he ʼu manatu ʼe nātou fakaloto mālohiʼi tatatou tui. Neʼe tohi fēnei e te ʼapositolo ko Paulo: “Ko meʼa fuli ʼe moʼoni, ko meʼa fuli ʼe tāu mo he fakaʼapaʼapa, ko meʼa fuli ʼe faitotonu, ko meʼa fuli ʼe maʼa, ko meʼa fuli ʼe fakavikiviki, ko meʼa fuli ʼe lelei hona talanoaʼi, kapau ʼe ʼi ai he faʼahiga vilitute pea kapau ʼe ʼi ai he meʼa ʼe tāu ke vikiʼi, koutou haga tokagaʼi te ʼu meʼa ʼaia.” (Filipe 4:8, MN ) ʼAki te fealagia ʼaē ke tou filifili te meʼa ʼaē ʼe lelei pea mo te meʼa ʼaē ʼe kovi, koia ʼe tou lava filifili te ʼu meʼa ʼaē ka tou tokagaʼi anai. ʼOfa pe ke tou fili tuʼumaʼu te ʼu meʼa ʼaē ʼe fakaōvi ai tatou kia Sehova.
ʼE Mālohi Age Te Laumālie ʼo Te ʼAtua
15. Neʼe kehekehe feafeaʼi te kau Kilisitiano ʼo te Kolonito ʼāfea pea mo te hahaʼi ʼo te kolo?
15 ʼO mole hage ko nātou ʼaē ʼe kākāʼi e te manatu ʼo te malamanei, ʼe takitaki te kau Kilisitiano moʼoni e te laumālie maʼoniʼoni ʼo te ʼAtua. Neʼe faitohi fēnei ia Paulo ki te kokelekasio ʼo Kolonito: “Neʼe mole tou maʼu te manatu ʼo te malamanei ʼaenī, kae ko te laumālie ʼaē ʼe haʼu mai te ʼAtua, ke feala hatatou ʼiloʼi te ʼu meʼa ʼaē neʼe lotolelei e te ʼAtua ke ina foaki mai.” (1 Kolonito 2:12, MN ) Neʼe mālohi te manatu ʼo te malamanei ʼi te kolo ʼāfea ʼo Kolonito. ʼI te lahi ʼo te maʼuli heʼeʼaoga ʼa te hahaʼi ʼo te kolo ʼaia, neʼe tupu ai te tākuga lea ʼaē ʼe ina ʼui “ko te maʼuli faka Kolonito” ʼaē ko tona faka ʼuhiga ko “te fai ʼo te ʼu aga heʼeʼaoga.” Neʼe fakakiviʼi e Satana te ʼatamai ʼo te hahaʼi. Koia, neʼe veliveli ai tanatou mahino pe neʼe mole nātou mahino ki te ʼAtua moʼoni. (2 Kolonito 4:4) Kae ʼaki tona laumālie maʼoniʼoni, neʼe avahi e Sehova te ʼu mata ʼo ʼihi kau Kolonito, ʼo feala ai ke nātou maʼu te ʼatamai mālama ʼo te moʼoni. Ko tona laumālie neʼe ina uga pea mo takitaki ia nātou ke nātou fai he ʼu fetogi lahi ʼi tonatou maʼuli, ke lava tali ia nātou pea mo tapuakina ia nātou. (1 Kolonito 6:9-11) Logola neʼe mālohi te manatu ʼo te malamanei, kae neʼe mālohi age te laumālie ʼo Sehova.
16. E feafeaʼi hatatou maʼu pea mo taupau te laumālie ʼo te ʼAtua?
16 ʼE toe feiā ia ʼaho nei. Ko te laumālie maʼoniʼoni ʼo Sehova ʼe ko te mālohi ʼaē ʼe lahi age ʼi te ʼatulaulau, pea ʼe ina foaki lahi kia nātou fuli ʼaē ʼe nātou kole kia te ia ʼi te tui. (Luka 11:13) Kae ke feala hatatou maʼu te laumālie ʼo te ʼAtua, ʼe mole tonu ke gata ʼaki pe tatatou tauʼi te manatu ʼo te malamanei. ʼE toe maʼua foki ke tou ako tuʼumaʼu pea mo maʼuliʼi te Folafola ʼa te ʼAtua, ke ʼalutahi tatatou manatu peʼe ko tatatou faʼahiga fakakaukau, pea mo tana manatu. Kapau ʼe tou fai feiā, pea ʼe foaki mai anai e Sehova te mālohi ke tou tauʼi te ʼu faiga ʼa Satana moʼo maumauʼi tatou ʼi te faʼahi fakalaumālie.
17. Koteā te fakaloto fīmālie ʼe tou lava maʼu ʼi te ʼaluʼaga ʼaē neʼe tau mo Lote?
17 Logola ʼe mole kau te kau Kilisitiano ʼi te malamanei, kae ʼe nātou maʼuʼuli ʼi te malamanei. (Soane 17:11, 16) ʼE mole he tahi ia tatou ʼe feala ke ʼāteaina katoa mai te manatu ʼo te malamanei, koteʼuhi ʼe tou gāue peʼe tou maʼuʼuli mo nātou ʼaē ʼe mole ʼoʼofa ki te ʼAtua peʼe mole ʼoʼofa ki tana ʼu fakatotonu. ʼE tou hage koa ko Lote, ʼaē neʼe “mauli mamahi,” mo hoha ʼaupito, ʼuhi ko tana maʼuli tahi mo te hahaʼi ʼo Sotoma ʼaē neʼe nātou fai te ʼu aga heʼeʼaoga? (2 Petelo 2:7, 8) Kapau ʼe tou feiā, pea ʼe feala ke tou loto fīmālie. Neʼe puipui pea mo hāofaki e Sehova ia Lote, pea ʼe feala ke ina toe fai feiā kia tatou. Ko tatatou Tāmai ʼofa ʼe sio pea mo ina ʼiloʼi totatou ʼu ʼaluʼaga, pea ʼe feala ke ina foaki mai te tokoni pea mo te mālohi ʼaē ʼe ʼaoga kia tatou ke tou mālolohi ʼi te faʼahi fakalaumālie. (Pesalemo 33:18, 19) Kapau ʼe tou falala kia te ia pea mo pāui kia te ia, pea ʼe tokoni mai anai kia tatou ke tou tauʼi te manatu ʼo te malamanei, tatau aipe peʼe faigataʼa totatou ʼaluʼaga.—Isaia 41:10.
18. He koʼe ʼe tonu ke tou taupau lelei tatatou ʼu felogoi mo Sehova?
18 ʼI te malamanei ʼaē ʼe mamaʼo mai te ʼAtua pea mo kākāʼi e Satana, ko tatou te hahaʼi ʼa Sehova, ʼe tapuakina tatou ʼaki te ʼatamai mālama ʼo te moʼoni. ʼE tou maʼu ai te fiafia pea mo te tokalelei ʼaē ʼe mole maʼu e te malamanei. (Isaia 57:20, 21; Kalate 5:22) ʼE tou taupau lelei te ʼamanaki taulekaleka ki te maʼuli heʼegata ʼi te Palatiso, ʼaē ka pulihi ai anai te manatu ʼo te malamanei ʼaenī ʼaē ʼe ʼamanaki fakaʼauha. ʼOfa pe ke tou taupau lelei tatatou ʼu felogoi maʼuhiga mo te ʼAtua pea ke tou tokakaga ʼo fetogi te ʼu faʼahi fuli pe ʼaē ʼe feala ke tou tafea ai ʼi te faʼahi fakalaumālie. Tou fakaōvi lelei kia Sehova, pea ʼe tokoni mai anai ke tou tauʼi te manatu ʼo te malamanei.—Sakopo 4:7, 8.
ʼE Feala Koa Hakotou Fakamahino?
• Ko te ʼu ʼaluʼaga fea ʼaē ʼe kākāʼi ai pea mo fakahalaʼi ai e Satana ia te hahaʼi?
• Koteā ʼaē ʼe tonu ke tou fai ke mole tou fakamamaʼo mai ia Sehova?
• Koteā ʼaē ʼe hā ai ko te manatu ʼo te malamanei ʼe mālohi?
• ʼE tou lava maʼu pea mo taupau feafeaʼi te laumālie ʼo te ʼAtua?
[Talanoa ʼo te pasina 11]
TE POTO ʼO TE MALAMANEI ʼE FAKAFEAGAI KI TE POTO ʼO TE ʼATUA
ʼE mole ʼi ai he moʼoni katoa—ʼe tahi faʼu e te hahaʼi tana moʼoni.
“Ko [te] folafola [ʼa te ʼAtua] ʼe moʼoni.”—Soane 17:17, MN.
Ke koutou ʼiloʼi te meʼa ʼaē ʼe lelei pea mo te meʼa ʼaē ʼe kovi, koutou mulimuli ki tokotou loto.
“ ʼE kākā te loto, ʼo laka age ʼi te ʼu meʼa fuli, pea ʼe mole hona faitoʼo.”—Selemia 17:9.
Koutou fai te meʼa ʼaē ʼe koutou loto kiai.
“ ʼE mole ʼa te tagata ʼaē ʼe haʼele te takitaki ʼo tana haʼele.”—Selemia 10:23.
ʼE tou fiafia mo kapau ʼe tou maʼu koloā.
“Ko te manako ki te paʼaga ʼe ko te aka ʼaia ʼo te ʼu meʼa kovi fuli.”—1 Timoteo 6:10, MN.
[Paki ʼo te pasina 10]
Neʼe fakamamaʼo ia Salomone mai te tauhi moʼoni pea neʼe tauhi ki te ʼu ʼatua hala
[Paki ʼo te pasina 12]
Ohage ko he tagata fakahāhā meʼa, ko Satana ʼe ina fakahāhā te manatu ʼo te malamanei. ʼE koutou tauʼi koa te manatu ʼaia?