ʼE Fakahā e Sehova Tona Kolōlia Ki Te Kau Agavaivai
“Ko te ikuʼaga ʼo te agavaivai pea mo te manavasiʼi kia Sehova, ʼe ko te ʼu koloā, mo te kolōlia, pea mo te maʼuli.”—Tāʼaga Lea 22:4.
1, 2. (a) ʼE fakahā feafeaʼi e te tohi ʼo Gaue ko Setefano neʼe ko “he tagata tui mo fonu i te Laumalie-Maonioni”? (b) Koteā ʼaē ʼe fakamoʼoni ai ko Setefano neʼe agavaivai?
KO SETEFANO neʼe “ko he tagata tui mo fonu i te Laumalie-Maonioni.” Neʼe toe “fonu . . . i te kalasia mo te malohi.” Neʼe kau ʼi te ʼu ʼuluaki tisipulo ʼa Sesu, pea neʼe ina fakahoko te ʼu fakaʼiloga pea mo te ʼu gāue lalahi ʼi te lotolotoiga ʼo te hahaʼi. ʼI te tahi lakaga, neʼe fihi te ʼu tagata mo ia, kae “nee mole natou lavai te poto mo te laumalie nee ha i tana lea.” (Gaue 6:5, 8-10) ʼE mahino ia ko Setefano neʼe ina ako fakalelei te Folafola ʼa te ʼAtua, pea neʼe poto ʼi tona fakaʼaogaʼi ia muʼa ʼo te kau takitaki lotu Sutea ʼo tona temi. Ko tana fai faka mafola ʼaē ʼe fakamatala ʼi te tohi ʼo Gaue kapite 7, ʼe ina fakamoʼoni ai ko Setefano neʼe ina fia ʼiloʼi moʼoni te fakahāhā māmālie ʼo te fakatuʼutuʼu ʼa te ʼAtua.
2 Neʼe agavaivai ia Setefano, ʼo mole hage ko te kau takitaki lotu ʼaia, ʼaē neʼe nātou manatu ʼe nātou māʼoluga age ʼi te hahaʼi ʼuhi ko tonatou tuʼulaga pea mo tanatou ʼatamai mālama. (Mateo 23:2-7; Soane 7:49) Logola neʼe ko he tagata neʼe faiva ʼi te fakaʼaogaʼi ʼo te Tohi-Tapu, kae neʼe fiafia ʼaupito ʼi te temi ʼaē neʼe tuku age te gāue ʼaē ko te “tufa ʼo te meʼa kai ki te ʼu laupapa,” ke feala ki te kau ʼapositolo ke nātou tokaga lahi ki “te faikole pea mo te minisitelio ʼo te folafola.” Ko te ʼu tēhina neʼe nātou talanoa lelei ʼo ʼuhiga mo Setefano, koia ʼaē neʼe filifili ai ke kau ki te ʼu tagata aga fakapotopoto e toko fitu ke nātou fai te tufa meʼa kai ʼaia ʼi te ʼaho fuli. Pea neʼe ina tali te gāue ʼaia ʼaki he agavaivai.—Gaue 6:1-6, MN.
3. Neʼe hā feafeaʼi kia Setefano ia te ʼofa makehe ʼo te ʼAtua?
3 Neʼe tokagaʼi e Sehova te agavaivai ʼa Setefano, tana leleiʼia te ʼu meʼa fakalaumālie pea mo tana agatonu. ʼI tana fai faka mafola ʼi te Sanetualio ki te kau takitaki lotu Sutea ʼaē neʼe fakafeagai kia ia, ko te kau fakafeagai ʼaia neʼe nātou “mamata ki tona fofoga nee hage ia ko he fofoga o he aselo.” (Gaue 6:15) Neʼe ina maʼu te fofoga ʼo he tagata ʼave logo ʼa te ʼAtua, ʼaki te tokalelei ʼaē ʼe haʼu mai ia Sehova, te ʼAtua ʼo te kolōlia. ʼI tana ʼosi fai faka mafola ʼaki he lototoʼa kia nātou ʼo te Sanetualio, neʼe hā kia Setefano te ʼofa makehe ʼo te ʼAtua. “Nee fonu ia i te Laumalie-Maonioni, nee tagaki ake ona fofoga ki te lagi pea nee mamata ki te kololia o te Atua mo Sesu e tuu i te toomatau o te Atua.” (Gaue 7:55) Ko te meʼa fakaofoofo ʼaia neʼe hā kia Setefano neʼe toe mālohi ai tana tui ki te ʼuhiga ʼo Sesu, ko ia te ʼAlo ʼo te ʼAtua pea mo te Mesia. Neʼe mālohi ai ia Setefano ʼaē neʼe agavaivai pea neʼe tui ai neʼe ʼofa ia Sehova kia ia.
4. Ko ai ʼaē ʼe fakahā ki ai e Sehova tona kolōlia?
4 Ohage ko tatatou mahino ʼi te meʼa ʼaē neʼe hā kia Setefano, ʼe fakahā e Sehova tona kolōlia pea mo tana fakatuʼutuʼu ki te hahaʼi ʼaē ʼe manavasiʼi kia te ia, mo agavaivai pea mo nātou faka maʼuhiga tanatou ʼu felogoi mo ia. ʼE ʼui fēnei e te Tohi-Tapu: “Ko te ikuʼaga ʼo te agavaivai pea mo te manavasiʼi kia Sehova, ʼe ko te ʼu koloā, mo te kolōlia, pea mo te maʼuli.” (Tāʼaga Lea 22:4) Koia ʼe maʼuhiga ke tou mahino ki te faka ʼuhiga moʼoni ʼo te agavaivai, peʼe tou lava maʼu feafeaʼi te kalitate maʼuhiga ʼaia, pea koteā te ʼu lelei ʼe tou maʼu mokā tou agavaivai ʼi te ʼu faʼahi fuli ʼo totatou maʼuli.
Te Agavaivai ʼe Ko He Kalitate ʼo Te ʼAtua
5, 6. (a) Koteā te agavaivai? (b) Neʼe fakahā feafeaʼi e Sehova tana agavaivai? (c) Ko te agavaivai ʼa Sehova ʼe tonu ke ina uga tatou ke tou feafeaʼi?
5 ʼE lagi punamaʼuli ʼihi ʼi tanatou ʼiloʼi ʼaē ko Sehova ʼAtua, ʼaē ʼe māʼoluga age pea mo lahi age tona kolōlia ʼi te ʼatulaulau, ʼe ina tuku mai he faʼifaʼitaki lahi ʼo ʼuhiga mo te agavaivai. Neʼe ʼui fēnei e te Hau ko Tavite ʼo ʼuhiga mo Sehova: “ ʼE ke foaki mai anai tau meʼa tali tau ʼo te maʼuli, pea ko tou nima mataʼu ʼe lagolago anai kia ʼau, pea ko tau agavaivai ʼe ina fakalahi anai ʼau.” (Pesalemo 18:35) ʼI tana talanoa ʼo ʼuhiga mo te agavaivai ʼo Sehova, neʼe ina fakaʼaogaʼi te kupu faka Hepeleo ʼaē ko tona faka ʼuhiga tāfito “ke kita tulolo.” ʼE ʼi ai te tahi ʼu kupu ʼe tatau tonatou faka ʼuhiga, ohage ko te kupu “fia mālalo” pea “ko he tahi ʼe ina faka mālaloʼi ifo ia ia.” Neʼe fakahā e Sehova te agavaivai ʼi tana fia mālalo ifo ke felogoi ai mo te tagata agahala ko Tavite pea neʼe ina fakaʼaogaʼi Tavite ko Tana hau mo ʼona fakafofoga. Ohage ko tona fakahā ʼi te ʼu ʼuluaki palalau ʼi te kamata ʼo te kapite 18 ʼo Pesalemo, neʼe puipui pea mo tokoni ia Sehova kia Tavite, ʼo ina hāofaki ia ia “mai te nima ʼo tona ʼu fili fuli pea mai te nima ʼo Saulo.” Pea neʼe toe ʼiloʼi e Tavite ko te lahi pea mo te kolōlia ʼaē neʼe ina maʼu ʼi tona ʼuhiga hau neʼe feala ʼuhi ko te agavaivai ʼa Sehova kia ia. Ko tana mahino ki te faʼahi ʼaia neʼe tokoni ai kia Tavite ke agavaivai.
6 Kaeā tatou? Neʼe filifili e Sehova ke ina akoʼi mai te moʼoni, pea neʼe lagi ina foaki mai he ʼu pilivilesio makehe kia tatou ʼi tana kautahi, pe neʼe lagi ina fakaʼaogaʼi tatou ʼi hona faʼahiga ʼaluʼaga moʼo fakahoko tona finegalo. E feafeaʼi totatou loto ʼo ʼuhiga mo te ʼu meʼa fuli ʼaia? ʼE mole tonu koa la ke tou agavaivai? ʼE mole tonu koa la ke tou fakamālo ki te agavaivai ʼa Sehova pea mo ʼaua naʼa tou fia māʼoluga, heʼe mole fua lelei anai te aga ʼaia kia tatou?—Tāʼaga Lea 16:18; 29:23.
7, 8. (a) Neʼe fakahā feafeaʼi e Sehova tana agavaivai ʼo ʼuhiga mo Manase? (b) Koteā te faʼifaʼitaki ʼaē neʼe tuku mai e Sehova pea mo Manase ʼo ʼuhiga mo te agavaivai?
7 Neʼe mole fakahā pe e Sehova tana agavaivai ʼi tana felogoi ʼaē mo te ʼu tagata agahala, kae neʼe ina toe fakahā tana fia manavaʼofa kia nātou ʼaē ʼe fia mālalo, ʼo ina hikihiki ake nātou peʼe ina vikiʼi ia nātou ʼaē ʼe agavaivai. (Pesalemo 113:4-7) Ohage la ko te Hau ʼo Suta ko Manase. Neʼe ina fakaʼaogaʼi kovi tona tuʼulaga hau, he neʼe lagolago ki te tauhi hala pea “neʼe lahi ʼaupito te ʼu meʼa kovi neʼe ina fai ia mata ʼo Sehova, moʼo fakaloto mamahiʼi ia ia.” (2 Fakamatala 33:6) Ki muli age, neʼe tauteaʼi e Sehova ia Manase, ʼo ina fakaʼaogaʼi te hau ʼo Asilia moʼo fakahifo ia ia mai tona tuʼulaga hau. ʼI te fale pilisoni, ko Manase “neʼe ina fakamalūlū te fofoga ʼo Sehova, tona ʼAtua; pea neʼe ina fakavaivai lahi ia ia,” ke toe fakanofo ia ia e Sehova ki te hekaʼaga hau ʼi Selusalemi, pea “neʼe ʼiloʼi ai e Manase ko Sehova te ʼAtua moʼoni.” (2 Fakamatala 33:11-13) Ei, ʼi te fakaʼosi, neʼe leleiʼia e Sehova te agavaivai ʼa Manase, pea neʼe toe agavaivai mo ia ʼo ina fakamolemole kia ia pea mo ina toe fakanofo ki tona tuʼulaga hau.
8 Ko te fakamolemole ʼa Sehova ʼaki he lotolelei pea mo te fakahemala ʼa Manase, ʼe ina foaki mai he ʼu ako maʼuhiga kia tatou ʼo ʼuhiga mo te agavaivai. ʼE tonu ke tou manatuʼi tuʼumaʼu ko tatatou aga kia nātou ʼaē neʼe lagi hala mai kia tatou, pea mo te meʼa ʼaē ʼe tou fai mokā tou agahala, ʼe feala ke ʼi ai hona ʼu fua ki tatatou ʼu felogoi mo Sehova. Kapau ʼe tou lotolelei ke tou fakamolemole ki te ʼu hala ʼa ʼihi pea mo tou agavaivai ʼo tala te ʼu agahala neʼe tou fai, pea ʼe feala ke manavaʼofa ia Sehova kia tatou.—Mateo 5:23, 24; 6:12.
Neʼe Fakahā Te Kolōlia ʼo Te ʼAtua Ki Te Kau Agavaivai
9. Ko te agavaivai ʼe ko he vaivaiʼaga koa? Koutou fakamahino.
9 Kae ko te agavaivai pea mo te ʼu kalitate ʼaē ʼe pipiki kiai, ʼe mole tonu ke tou ʼui ʼe ko he vaivaiʼaga peʼe ko he tali ʼo he ʼu aga ʼe kovi. Ohage ko tona fakamoʼoni e te Tohi-Tapu, ko Sehova ʼe agavaivai, kae ʼe ina fakahā te ʼita ʼaē ʼe totonu pea mo te mālohi lahi ʼi te ʼu temi ʼaē ʼe tonu ke ina fakahoko ai te faʼahi ʼaia. ʼUhi ko tana agavaivai, ʼe tali leleiʼi e Sehova peʼe ina fai he tokaga makehe kia nātou ʼaē ʼe agavaivai, kae ʼe fakamamaʼo mai ia nātou ʼaē ʼe fialahi. (Pesalemo 138:6) ʼE fakahā feafeaʼi e Sehova he tokaga makehe ki tana ʼu kaugana agavaivai?
10. Koteā ʼaē ʼe fakahā e Sehova ki te kau agavaivai, ohage ko tona fakahā ia 1 Kolonito 2:6-10?
10 ʼI tona temi totonu pea ʼaki tana kautahi ʼi te kele, ʼe fakahā e Sehova ki te kau agavaivai te ʼu manatu fuli ʼo ʼuhiga mo tana fakahoko ʼo tona finegalo. Ko te ʼu manatu faka kolōlia ʼaia ʼe fufū ki te hahaʼi fialahi ʼaē ʼe nātou falala ki te poto peʼe ko te ʼu manatu fakatagata peʼe nātou fia mulimuli kiai. (1 Kolonito 2:6-10) Kae ko te kau agavaivai, ʼuhi ko tanatou maʼu te ʼatamai mālama totonu ʼo ʼuhiga mo te fakatuʼutuʼu ʼa Sehova, koia ʼe nātou fakavikiviki ai kia Sehova heʼe nātou leleiʼia ʼaupito tona kolōlia.
11. ʼI te ʼuluaki sēkulō, neʼe fakahā feafeaʼi e ʼihi tanatou mole agavaivai, pea neʼe fua kovi feafeaʼi kia nātou?
11 ʼI te ʼuluaki sēkulō, ko te tokolahi ʼo kau kiai mo ʼihi neʼe nātou lau ko te kau Kilisitiano, neʼe mole nātou agavaivai pea neʼe nātou tūkia ʼuhi ko te meʼa ʼaē neʼe fakahā age e te ʼapositolo ko Paulo kia nātou ʼo ʼuhiga mo te fakatuʼutuʼu ʼa te ʼAtua. Neʼe liliu ia Paulo ko “te ʼapositolo . . . ʼo te ʼu puleʼaga,” kae neʼe mole tupu ʼuhi ko tona lanu, peʼe ko tana ako, peʼe ko tona taʼu, peʼe ko te ʼu tuʼuga gāue lelei ʼaē neʼe ina fai. (Loma 11:13, MN ) ʼI te agamāhani, maʼa te hahaʼi ʼaē ʼe nātou maʼu te manatu fakatagata, ʼe ko te ʼu faʼahi ʼaia ʼaē ʼe tonu ke fakatafito kiai e Sehova tana filifili ia ia ʼaē ka ina fakaʼaogaʼi. (1 Kolonito 1:26-29; 3:1; Kolose 2:18) Kae neʼe fili e Sehova ia Paulo, ʼo mulimuli ki Tona lotoʼofa pea mo tana fakatuʼutuʼu faitotonu. (1 Kolonito 15:8-10) Ko nātou ʼaē neʼe ʼui e Paulo ko he kau “ ʼapositolo māʼoluga” pea mo te tahi ʼu hahaʼi fakafeagai, neʼe mole nātou tali ia ia pea mo te ʼu manatu ʼaē neʼe ina fakahā age ʼaki te Tohi-Tapu. ʼUhi ko tanatou mole agavaivai, neʼe mole nātou maʼu ai te ʼatamai mālama pea mo te mahino ki te fakahoko e Sehova tana fakatuʼutuʼu faka kolōlia. Koia ʼaua naʼa tou meʼa noaʼi peʼe tou fatufatuʼi ia nātou ʼaē ʼe filifili e Sehova ke ina fakaʼaogaʼi moʼo fakahoko tona finegalo.—2 Kolonito 11:4-6, MN.
12. ʼE fakahā feafeaʼi e te faʼifaʼitaki ʼa Moisese ko Sehova ʼe ʼofa kia nātou ʼaē ʼe agavaivai?
12 Kae ʼe lahi te ʼu faʼifaʼitaki ʼi te Tohi-Tapu ʼe fakahā lelei ai pe neʼe maʼu feafeaʼi e te hahaʼi agavaivai te pilivilesio ʼaē ke nātou sio ki he koga ʼo te kolōlia ʼo te ʼAtua. Ko Moisese, ʼaē “neʼe lahi tokotahi tana agavaivai” ʼi te ʼu tagata fuli pe, neʼe sio ki te kolōlia ʼo te ʼAtua pea neʼe felogoi lelei mo ia. (Faka au 12:3) Ko te tagata agavaivai ʼaia, ʼaē neʼe liliu ko he tagata tauhi ōvi fia mālalo lolotoga taʼu e 40, ʼi te fenua ʼo Alapi, neʼe ʼofainaʼi ʼaupito e te Tupuʼaga pea neʼe ina fakahā age ʼi ni ʼu ʼaluʼaga kehekehe. (Ekesote 6:12, 30) ʼAki te tokoni ʼa Sehova, neʼe liliu ia Moisese ko tana tagata fakafofoga pea mo tagata takitaki ʼo te puleʼaga ʼo Iselaele. Neʼe felogoi mo te ʼAtua ʼi ni ʼu ʼaluʼaga e lua. ʼAki te meʼa ʼaē neʼe hā, neʼe sio ki te “ ʼata totonu ʼo Sehova.” (Faka au 12:7, 8; Ekesote 24:10, 11) Neʼe toe tapuakina mo nātou ʼaē neʼe nātou fakalogo ki te kaugana agavaivai ʼaia pea mo fakafofoga ʼo te ʼAtua. ʼO toe feiā pe, ʼe tapuakina anai tatou mo kapau ʼe tou tali pea mo fakalogo ki te polofeta ʼaē ʼe lahi age ia Moisese, ia Sesu, pea mo “te tagata kaugana agatonu mo poto” ʼaē neʼe ina fakanofo.—Mateo 24:45, 46, MN; Gaue 3:22.
13. Neʼe fakahā feafeaʼi e Sehova tona kolōlia ki te kau tagata tauhi ōvi agavaivai ʼi te ʼuluaki sēkulō?
13 Ko ai ʼaē neʼe gigila ki ai te kolōlia ʼo Sehova ʼi te tala ifo ʼa te kau ʼaselo te logo lelei ʼo te tupu ʼa ‘te Fakamaʼuli, ia Kilisito te ʼAliki’? Neʼe mole fakahā age ki te kau takitaki lotu fialahi peʼe ko te hahaʼi maʼu tuʼulaga, kae ki te ʼu tagata tauhi ōvi agavaivai ʼaē neʼe nonofo “i te u gaueaga o leoleo i te pouli anatou fagamanu.” (Luka 2:8-11) Neʼe mole ko he ʼu hahaʼi neʼe maʼuhiga ʼuhi ko tanatou poto pea mo tanatou ʼu gāue. Kae neʼe ko nātou ʼaē neʼe tokagaʼi e Sehova pea neʼe ina filifili ke ina ʼuluaki fakahā age kia nātou te tupu ʼo te Mesia. Ei ʼe fakahā e Sehova tona kolōlia kia nātou ʼe agavaivai pea mo manavasiʼi kia te ia.
14. Koteā te ʼu tapuakina ʼaē ʼe foaki e te ʼAtua kia nātou ʼe agavaivai?
14 Koteā ʼaē ʼe tou ako mai te ʼu faʼifaʼitaki ʼaia? ʼE hā ʼaki mai ko Sehova ʼe ʼofa ki te hahaʼi agavaivai pea mo ina fakahā kia nātou te ʼatamai mālama pea mo te mahino ki tana fakatuʼutuʼu. ʼE ina filifili he ʼu hahaʼi ʼe mole lagi nātou maʼu te faʼahiga poto ʼaē ʼe loto kiai te tagata, pea mo ina fakaʼaogaʼi nātou moʼo fakahā tana fakatuʼutuʼu faka kolōlia ki te tahi ʼu hahaʼi. ʼE uga tatou e te faʼahi ʼaia ke tou haga kumi te takitaki ʼa Sehova, mo tana Folafola faka polofeta, pea mo tana kautahi. ʼE feala ke tou tui papau ʼe hoko atu pe anai te fakaʼilo e Sehova ki tana ʼu kaugana agavaivai tana fakatuʼutuʼu faka kolōlia. Neʼe tala fēnei e te polofeta ko Amosi: “Ko te Tuʼi ʼAliki ko Sehova ʼe mole ina fai anai he meʼa ka neʼe mole heʼeki ina tala tana meʼa fakalilo ki tana kau kaugana, te kau polofeta.”—Amosi 3:7.
Tou Agavaivai Ke Tou Felogoi Lelei Mo Te ʼAtua
15. He koʼe ʼe tonu ke tou gāue moʼo taupau te agavaivai, pea neʼe koteā ʼaē neʼe hoko kia Saulo, Hau ʼo Iselaele, ʼi tana mole fai te faʼahi ʼaia?
15 Ke feala hatatou felogoi lelei mo te ʼAtua ʼo talu ai, ʼe tonu ke tou haga taupau he fia agavaivai. ʼE mole feala anai hatatou agavaivai tuʼumaʼu, heʼe feala ke ʼi ai he ʼu temi ʼe tou liliu ai ʼo fialahi pea mo laupisi, ʼo iku ai ki te fiatuʼu pea mo fua kovi ai kia kita. Ko Saulo, te ʼuluaki hau ʼaē neʼe fakanofo ʼo Iselaele, neʼe hoko kia ia ia te faʼahi ʼaia. ʼI te temi ʼaē neʼe ʼuluaki filifili ai ia ia, neʼe ina ʼui ko he tahi ʼe ‘veliveli.’ (1 Samuele 15:17) Kae hili pe taʼu e lua ʼo tana pule, neʼe ina fai te aga fiatuʼu. Neʼe mole fakalogo ki te fakatuʼutuʼu ʼaē neʼe fai e Sehova ʼaē ko te polofeta ko Samuele ʼaē ʼe tonu ke ina momoli te ʼu sakilifisio, pea neʼe ina maʼu he ʼu takuʼaki ke ina fai e ia totonu te momoli sakilifisio ʼaia. (1 Samuele 13:1, 8-14) Neʼe ko te kamataʼaga ʼaia ʼo te ʼu meʼa ʼaē ka ina fakahā ai tana mole agavaivai. ʼO iku ai mo tana mole kei maʼu te laumālie ʼo te ʼAtua pea mo tana tapuakina, pea neʼe mate ʼi te lainoa. (1 Samuele 15:3-19, 26; 28:6; 31:4) Koʼeni te ako ʼaē ʼe tou tāʼofi mai ai: ʼE tonu ke tou gāue moʼo taupau tatatou agavaivai pea mo tatatou fakalogo, pea mo ʼaua naʼa tou manatu ʼe tou maʼuhiga, ʼo mole tou fai ai he ʼu gāue fiatuʼu ʼe iku ai ki te mole tapuakinaʼi ʼo tatou e Sehova.
16. Ko tatatou metitasio ki te ʼu felogoi mo Sehova pea mo totatou ʼu tēhina ʼe lava tokoni feafeaʼi mai ke tou maʼu te agavaivai?
16 Logola ʼe mole tuʼu te agavaivai ʼi te fua ʼo te laumālie ʼa te ʼAtua, kae ʼe ko he kalitate ʼo te ʼAtua ʼe tonu ke tou maʼu. (Kalate 5:22, 23; Kolose 3:10, 12) Mai tona ʼaluʼaga ʼaē ʼe pipiki kiai tatatou fakakaukau, tatatou faʼahiga sio kia tatou, koia ʼe tonu ke tou faiga lahi ke tou maʼu te agavaivai. Ko te fakakaukau lelei pea mo te metitasio ki tatatou ʼu felogoi mo Sehova pea mo totatou kāiga ʼe tokoni mai ke tou agavaivai. Ia mata ʼo te ʼAtua, ko te hahaʼi agahala fuli pe ʼe hage ko he vao ʼe maʼuli ʼi he temi nounou, pea magemage pea mo fefe. Ko te hahaʼi ʼe hage pe ko he ʼu heʼe ʼi te gāueʼaga. (Isaia 40:6, 7, 22) ʼE tonu koa ke laupisi he moʼi vao heʼe loa age ʼi he tahi moʼi vao? ʼE tonu koa ke laupisi te heʼe ki tana ʼu fealagia koteʼuhi ʼe hihiki mamaʼo age ʼi he tahi heʼe? ʼE mole tonu te manatu ʼaia. Koia neʼe fakamanatuʼi fēnei e te ʼapositolo ko Paulo ki tona ʼu tēhina: “Ko ai ʼaē ʼe ina fakakeheʼi koe mai he tahi? ʼIo, koteā te meʼa ʼe ke maʼu neʼe mole foaki atu? Pea kapau neʼe foaki atu, he koʼe koa ʼe ke laupisi ohage neʼe mole foaki atu?” (1 Kolonito 4:7, MN ) Ko te metitasioʼi ʼo te ʼu vaega Tohi-Tapu feiā ʼe feala ke tokoni mai kia tatou ke tou maʼuliʼi pea mo fakahā te agavaivai.
17. Koteā ʼaē neʼe tokoni ki te polofeta ko Taniela ke ina maʼu te agavaivai, pea koteā ʼaē ka tokoni mai kia tatou ke tou fai feiā?
17 Kia mata ʼo te ʼAtua ko te polofeta Hepeleo ko Taniela neʼe ko he “tagata ʼofaina ʼaupito” he neʼe “fia mālalo,” pea mo agavaivai. (Taniela 10:11, 12) Koteā ʼaē neʼe tokoni kia Taniela ke ina maʼuliʼi te agavaivai? ʼUluaki, neʼe falala katoa kia Sehova, ʼo faikole tuʼumaʼu kia te ia. (Taniela 6:10, 11) Tahi ʼaē meʼa, ko Taniela neʼe ina ako fakalelei te Folafola ʼa te ʼAtua, ʼo feala ai hana mahino lelei ki te fakatuʼutuʼu faka kolōlia ʼa te ʼAtua. Neʼe ina toe fakamoʼoni ki tana ʼu hala, kae mole ko te ʼu hala pe ʼa tana hahaʼi. Pea neʼe fia lagolago moʼoni ki te faitotonu ʼa te ʼAtua kae mole ko tana faitotonu ʼa ʼana. (Taniela 9:2, 5, 7) ʼE feala koa ke tou ako mai te faʼifaʼitaki lelei ʼa Taniela, pea mo tou faiga ke tou maʼu pea mo fakahā te agavaivai ʼi te ʼu faʼahi fuli ʼo totatou maʼuli?
18. Koteā te kolōlia ʼaē ka maʼu e nātou ʼaē ʼe agavaivai ia ʼaho nei?
18 ʼE ʼui fēnei ia Tāʼaga Lea 22:4: “Ko te ikuʼaga ʼo te agavaivai pea mo te manavasiʼi kia Sehova, ʼe ko te ʼu koloā, mo te kolōlia, pea mo te maʼuli.” Ei ʼe ʼofa ia Sehova kia nātou ʼaē ʼe agavaivai, pea ʼe nātou maʼu te kolōlia pea mo te maʼuli. Neʼe teitei pe ke līaki e Asafe tana tauhi ki te ʼAtua kae ʼi te ʼosi fakatonutonuʼi ʼo tana manatu e Sehova, neʼe agavaivai te tagata fai pesalemo ʼo ina ʼui fēnei: “ ʼE ke taki anai ʼau ʼaki tau tokoni, pea ʼe ke taki anai ʼau ki te kolōlia.” (Pesalemo 73:24) E feafeaʼi ia ʼaho nei? Koteā te kolōlia ʼe maʼu e nātou ʼaē ʼe agavaivai? ʼE nātou maʼu he ʼu felogoi lelei pea mo fakafiafia mo Sehova, pea ʼe feala anai hanatou sio ki te fakahoko ʼo te ʼu palalau ʼaenī ʼa te Hau ko Tavite: “Ko te kau agavaivai ʼe nātou maʼu anai te kele, pea ʼe nātou fiafia moʼoni anai ʼi te mahu ʼo te tokalelei.” ʼE mahino ia ʼe ko he ka haʼu faka kolōlia ʼaia!—Pesalemo 37:11.
ʼE Kei Koutou Manatuʼi Koa?
• He koʼe ko Setefano ʼe ko he faʼifaʼitaki ʼo he tahi ʼe agavaivai neʼe fakahā kia ia e Sehova Tona kolōlia?
• Neʼe fakahā feafeaʼi e Sehova ʼAtua tana agavaivai?
• Koteā te ʼu faʼifaʼitaki ʼe fakahā ai ko Sehova ʼe ina fakahā tona kolōlia kia nātou ʼaē ʼe agavaivai?
• ʼE tokoni feafeaʼi mai ia te faʼifaʼitaki ʼa Taniela ke tou maʼu te agavaivai?
[Talanoa ʼo te pasina 12]
Neʼe Ko He Tagata Mālohi Kae Neʼe Agavaivai
ʼI te taʼu 1919, ʼi Cedar Point, ʼi Ohio, Amelika, ʼi te fakatahi ʼa te kau Ako ʼa Te Tohi-Tapu (ʼe higoa ʼi te temi nei ko te kau Fakamoʼoni ʼa Sehova), ko te tagata taʼu 50 ko J. F. Rutherford ʼaē neʼe tokaga ki te gāue, neʼe fiafia ʼi tana kau ki te kau gāue ʼaē neʼe nātou fetuku te ʼu pasikete pea mo te hahaʼi ʼaē neʼe ʼōmai ki te fakatahi ki tonatou ʼu koga fale. ʼI te ʼaho fakaʼosi ʼo te fakatahi, neʼe ina fakaloto mālohiʼi te nofoʼaki ʼaē neʼe toko 7 000 ʼaki te ʼu palalau ʼaenī: “Ko koutou ko te ʼu hahaʼi fakafofoga ʼo te Hau ʼo te ʼu hau pea mo te ʼAliki ʼo te ʼu ʼaliki, koutou tala ki te hahaʼi . . . te puleʼaga faka kolōlia ʼo totatou ʼAliki.” Logola ko te Tēhina ko Rutherford neʼe ko te tagata neʼe tui mālohi, neʼe poto ʼi te palalau mālohi pea neʼe fakahagatonu ʼo ʼuhiga mo te moʼoni, kae neʼe ko te tagata neʼe agavaivai moʼoni ia muʼa ʼo te ʼAtua, pea ʼi ʼihi temi neʼe hā te faʼahi ʼaia ʼi tana ʼu faikole ʼi te Petele, ʼi te lau ʼo te vaega ʼo te ʼaho fuli.
[Paki ʼo te pasina 9]
Ko Setefano, ʼaē neʼe ina ʼiloʼi lelei te Tohi-Tapu, neʼe agavaivai ʼo tufa te meʼa kai
[Paki ʼo te pasina 10]
Neʼe fiafia ia Sehova ʼi te fia mālalo ʼa Manase
[Paki ʼo te pasina 12]
He koʼe neʼe liliu ia Taniela ko he “tagata ʼofaina ʼaupito”?