Koutou Tokakaga Ki “Te Leo o Te Kau Matapule”
“E mole natou mulimuli i he matapule, e natou hola anai maia te ia, koteuhi e mole natou iloi te leo o te kau matapule.”—Soane 10:5.
1, 2. (a) Neʼe feafeaʼi ia Malia ʼi te temi ʼaē neʼe pauʼi ai ia ia e Sesu ʼi tona higoa, pea koteā te ʼu palalau neʼe fai e Sesu ki muʼa atu neʼe fakatātā lelei e te meʼa ʼaia neʼe hoko? (b) Koteā ʼaē ka tokoni mai ke tou nonofo ōvi kia Sesu?
KO SESU ʼaē kua fakatuʼuake, ʼe ina sioʼi te fafine ʼe tuʼu ōvi ki tona fale maka ʼaē kua gaʼasi. ʼE ina ʼiloʼi lelei te fafine ʼaia. ʼE ko Malia Maketalena. Kua hili kiai teitei taʼu e lua, neʼe ina kapu te temonio neʼe ulusino ʼi te fafine ʼaia. Talu mai ai, neʼe kaugā ʼalu mo Sesu pea mo tana kau tisipulo, ʼo taupau ia nātou. (Luka 8:1-3) Kae ʼi te lakaga leva ʼaenī, ʼe tagi ia Malia heʼe lahi tona lotomamahi ʼi tana sio kua mate ia Sesu pea kua puli tona sino! Pea neʼe fehuʼi fēnei age e Sesu: “Fafine, kotea ae e ke tagi ai? Ko ai ae e ke kumi?” ʼI tana manatu ʼaē neʼe ko te tagata leʼo ʼōloto, neʼe ina tali fēnei: “Aliki, kapau nee ke ave ia ia, tala mai kia te au, pe nee ke avaifo ia, i fea, pea e au aumai anai ia.” Pea neʼe ʼui age e Sesu: “Malia.” ʼI te temi pe ʼaia neʼe ina ʼiloʼi ai te faʼahiga palalau ʼa Sesu kia ia. ʼAki he loto fiafia, neʼe ina ʼui fēnei: “Aliki.” Pea neʼe uma kia te ia.—Soane 20:11-18.
2 ʼE hā lelei ʼaki te fakamatala ʼaia, te ʼu palalau faka loto māfana ʼaē neʼe fai e Sesu ʼi te tahi temi ki muʼa atu. Neʼe ina fakatatau ia ia ki te tagata tauhi ōvi pea ko tana ʼu tisipulo ki te ʼu ōvi, pea neʼe ina ʼui ko te tagata tauhi ōvi ʼe ina pāuiʼi tana ʼu ōvi ʼi tonatou higoa pea ʼe nātou ʼiloʼi tona leʼo. (Soane 10:3, 4, 14, 27, 28) Koia ohage ko te ʼiloʼi ʼa he ōvi tana tagata tauhi ōvi, neʼe ʼiloʼi e Malia tana Tagata Tauhi Ōvi, ia Kilisito. ʼE toe feiā mo te ʼu tisipulo ʼa Sesu ia ʼaho nei. (Soane 10:16) Ohage pe ko te nofo ōvi ʼa te ōvi ki tana tagata tauhi ōvi heʼe ina ʼiloʼi tona leʼo, ʼo toe feiā ʼe feala ke tou haʼele ʼi te ʼu tafuga vaʼe ʼo totatou Tagata Tauhi Ōvi Agalelei ko Sesu Kilisito mo kapau ʼe tou maʼu te fakasiosio fakalaumālie.—Soane 13:15; 1 Soane 2:6; 5:20.
3. Koteā he ʼu fehuʼi ʼe lagaʼi ʼaki te lea fakatātā ʼa Sesu ʼo te tagata tauhi ōvi?
3 Kae ohage ko tona fakahā e te lea fakatātā ʼaia, ʼe lava ʼiloʼi e te ōvi ia te ʼu leʼo ʼo te ʼu tagata, koia ʼe feala ai ke ina ʼiloʼi peʼe ko ai tona ʼu kaumeʼa pea mo tona ʼu fili. ʼE maʼuhiga te faʼahi ʼaia heʼe ʼi ai totatou ʼu fili aga fakakākā. Ko ai ia nātou? Koteā ʼaē ʼe nātou fai? ʼE tou lava puipui feafeaʼi ia tatou? Ke tou tali kiai, tou vakaʼi pe koteā ʼaē neʼe toe ʼui e Sesu ʼi tana lea fakatātā ʼo te tagata tauhi ōvi lelei.
‘Ko ʼAē ʼe Mole Hū Ki Loto ʼi Te Matapā’
4. Ohage ko tona ʼui e te lea fakatātā ʼo te tagata tauhi ōvi, ko ai ʼaē ʼe mulimuli ki ai te ʼu ōvi, pea ko ai ʼaē ʼe mole nātou mulimuli ki ai?
4 ʼE ʼui fēnei e Sesu: “Ko ae e hu ki loto i te matapa, e ko te tauhiovi o te ovi. E avahi kia te ia e te tauhi-matapa, pea e fakalogo tona leo e te u ovi, pea e ina paui higoa tana u ovi pea e ina taki natou ki tuà. Ka fakahu fuli e ia ana ovi ki tuà, pea e alu ia i muà, pea e mulimuli ia te ia te u ovi, koteuhi e natou iloi tona leo. Kae e mole natou mulimuli i he matapule, e natou hola anai maia te ia, koteuhi e mole natou iloi te leo o te kau matapule.” (Soane 10:2-5) Koutou tokagaʼi, ʼe fakaʼaogaʼi tuʼa tolu e Sesu te kupu “leo.” Tuʼa lua neʼe palalau ʼo ʼuhiga mo te leʼo ʼo te tagata tauhi ōvi, pea ʼi tona tuʼa tolu leva, neʼe palalau ʼo ʼuhiga mo “te leo o te kau matapule.” Ko ai te kau matāpule ʼaē neʼe talanoa kiai ia Sesu?
5. He koʼe ʼe mole tou tali kāiga ki te faʼahiga matāpule ʼaē ʼe talanoa ki ai ia Soane kapite 10?
5 ʼE mole talanoa Sesu ʼo ʼuhiga mo te ʼu matāpule ʼaē ʼe tou fia fai ki ai te tali kāiga—koteʼuhi ko te kupu tali kāiga neʼe faka ʼuhiga ʼi te lea ʼa te Tohi-Tapu ki “te ʼofa ki te kau matāpule.” (Hepeleo 13:2, MN ) ʼI te lea fakatātā ʼa Sesu, ko te matāpule ʼe mole ko he tahi ʼe fakaafe. ʼE “mole hu ki loto i te matapa o alu ki te faga ovi kae kake ia i he tahi faahi.” ʼE ko he “tagata fakapo mo kaihaa.” (Soane 10:1) Ko ai koa te ʼuluaki tagata ʼaē ʼe talanoa ki ai ʼi te Folafola ʼa te ʼAtua ʼaē neʼe liliu ko he tagata fakapō pea mo kaihaʼa? Ko Satana te Tevolo. ʼE tou maʼu tona fakamoʼoni ʼi te tohi ʼo Senesi.
Te Temi ʼAē Neʼe ʼUluaki Logo Ai Ki Te Leʼo ʼo Te Matāpule
6, 7. He koʼe ʼe tonu te ʼui ʼaē ko Satana ko he matāpule?
6 ʼE fakahā ia Senesi 3:1-5 pe neʼe ʼuluaki logo feafeaʼi ki te leʼo ʼo te matāpule ʼi te kele. ʼE ʼui e te fakamatala neʼe fakaōvi ia Satana ki te ʼuluaki fafine, ia Eva, ʼaki te gata pea neʼe palalau kākā age kia ia. ʼE moʼoni, ʼi te fakamatala ʼaia ʼe mole ʼui ai ko Satana ko “he matapule.” Kae ʼe hā ʼi tana aga neʼe hage ko te tagata matāpule ʼaē ʼe fakamatala ʼi te lea fakatātā ʼa Sesu ʼo Soane kapite 10. Tou vakaʼi te ʼu faʼahi ʼaē ʼe tatau ai.
7 ʼE ʼui e Sesu ko te tagata matāpule ʼe mole fakaōvi fakahagatonu ki te ʼu ōvi, kae ʼe ina fai ʼi hona ʼu ʼaluʼaga fakakākā. ʼO toe feiā mo Satana, neʼe mole fakaōvi fakahagatonu kia Eva, kae neʼe ina fakaʼaogaʼi te gata. Ko tana fakaōvi fakakākā ʼaia neʼe hā ai tona ʼuhiga moʼoni—ko he matāpule ʼe agakākā. Tahi ʼaē meʼa, ko te matāpule ʼe ina faiga ke fakalogo te ʼu ōvi kia ia. ʼI tona ʼuhiga moʼoni, ʼe kovi age ia ʼi he tagata kaihaʼa, heʼe ina toe fakatuʼutuʼu foki ke ina “tamatei pea mo maumaui.” (Soane 10:10) ʼO toe feiā pe, ko Satana neʼe ko he tagata kaihaʼa. ʼI tana kākāʼi ia Eva, neʼe ina kaihaʼa tana fakalogo ʼaē ki te ʼAtua. Tahi ʼaē meʼa, neʼe fakahū e Satana te mate ki te malamanei. Koia ko he tagata fai fakapō.
8. Neʼe koteā te ʼu loi neʼe fai e Satana ʼo ʼuhiga mo te ʼu palalau pea mo te manatu ʼa Sehova?
8 Ko te kākā ʼa Satana neʼe toe hā ʼi tana loi ʼo ʼuhiga mo te ʼu palalau pea mo te manatu ʼa Sehova. Neʼe ina fehuʼi fēnei kia Eva: “ ʼE moʼoni koa neʼe ʼui atu e te ʼAtua ke ʼaua naʼa koulua kai ki te ʼu ʼakau fuli pe?” Neʼe fia fakahā e Satana tana punamaʼuli, ohage neʼe ina ʼui: ‘ ʼE mole fakapotopoto te fakatotonu ʼaia ʼa te ʼAtua!’ Pea neʼe ina toe ʼui fēnei: “ ʼE ʼiloʼi e te ʼAtua ʼi te ʼaho pe ʼaē ʼe koulua kai kiai ʼe ava ai anai tokolua ʼu mata.” Koutou tokagaʼi tana ʼui ʼaē: “ ʼE ʼiloʼi e te ʼAtua.” Neʼe hage pe neʼe ʼui e Satana: ‘ ʼE ʼau ʼiloʼi te meʼa ʼaē ʼe ʼiloʼi e te ʼAtua. ʼE ʼau ʼiloʼi tana manatu, pea ʼe ko he ʼu manatu kovi.’ (Senesi 2:16, 17; 3:1, 5) Meʼa fakaʼofaʼofa foki, neʼe mole lītuʼa ia Atama mo Eva mai te leʼo ʼo te tagata matāpule ʼaia. Kae neʼe nā fakalogo ki ai ʼo hoko ai te malaʼia kia nāua pea mo tonā hōloga.—Loma 5:12, 14.
9. He koʼe ʼe feala ke tou tui ʼe tou logo ia ʼaho nei ki te leʼo ʼo te kau matāpule?
9 ʼE toe tatau te faʼahiga fai ʼaia ʼa Satana ia ʼaho nei, moʼo kākāʼi te hahaʼi ʼa te ʼAtua. (Apokalipesi 12:9) Ko ia “te tamai o te kaka,” pea ko nātou ʼaē ʼe nātou faiga ohage ko ia ke nātou kākāʼi te ʼu kaugana ʼa te ʼAtua ʼe ko tanā ʼu fānau. (Soane 8:44) Tou vakaʼi ʼihi ʼu faʼahi ʼe tou logo ai ia ʼaho nei ki te leʼo ʼo te kau matāpule ʼaia.
Te ʼu Faʼahi ʼAē ʼe Tou Logo Ai Ia ʼAho Nei Ki Te Leʼo ʼo Te Kau Matāpule
10. ʼE tou logo feafeaʼi ki te leʼo ʼo te kau matāpule?
10 Te ʼu manatu fakakākā. ʼE ʼui fēnei e te ʼapositolo ko Paulo: “Koutou tokaga naʼa fakahehe koutou e te u akonaki kehekehe mo agaaga kehe.” (Hepeleo 13:9) Ko te ʼu akonaki fea? Mai tona ʼaluʼaga ʼaē ʼe feala ke fakahēʼi tatou e te ʼu akonaki ʼaia, ʼe mahino ia ʼe talanoa ia Paulo ʼo ʼuhiga mo te ʼu akonaki ʼe nātou fakavaivaiʼi tatou ʼi te faʼahi fakalaumālie. Ko ai ʼaē ʼe nātou tala te ʼu akonaki kehe ʼaia? Neʼe tala fēnei e Paulo ki te ʼu tagata ʼāfea: “ ʼI te lotolotoiga ʼo koutou ʼe mafuta ake anai he ʼu tagata ʼe nātou palalau ki te ʼu meʼa pikopiko moʼo toho te kau tisipulo ke mulimuli ia nātou.” (Gaue 20:30, MN ) Ia ʼaho nei, ohage ko te temi ʼo Paulo, ko ʼihi ʼaē neʼe kau ki muʼa atu ʼi te kokelekasio ʼe nātou faiga nei ke nātou kākāʼi te ʼu ōvi ʼo nātou palalau ki “te ʼu meʼa pikopiko”—ʼe nātou loi pea ʼe mole nātou tala katoa te moʼoni. Ohage ko tona fakahā e te ʼapositolo ko Petelo, ʼe nātou fakaʼaogaʼi ‘he ʼu palalau kākā’—ko he ʼu palalau ʼe hage ʼe moʼoni kae ʼi tona fakahagatonu ʼe mole feala hatatou falala kiai.—2 Petelo 2:3.
11. ʼE fakahā feafeaʼi ʼi te ʼu palalau ʼo 2 Petelo 2:1, 3 te faʼahiga fai pea mo te fakatuʼutuʼu ʼa te kau ʼaposita?
11 ʼE fakahā ki muli age e Petelo te faʼahiga fai ʼa te kau ʼaposita ʼo ina ʼui ʼe nātou “fakahū fakafūfū anai he ʼu magaʼi lotu.” (2 Petelo 2:1, 3, MN ) Ohage pe ko te tagata kaihaʼa ʼi te lea fakatātā ʼa Sesu ʼo te ʼu ōvi ʼaē ʼe mole hū “ki loto i te matapa o alu ki te faga ovi kae kake ia i he tahi faahi,” ko te kau ʼaposita ʼe nātou fakaōvi fakalogologo mai kia tatou. (Kalate 2:4; Suta 4) Koteā tanatou fakatuʼutuʼu? ʼE toe ʼui fēnei e Petelo: “ ʼE natou fakagaue anai koutou i tonatou fiafai paaga.” Tatau aipe peʼe koteā ʼaē ʼe feala ke ʼui e te kau ʼaposita, kae ko te fakatuʼutuʼu tāfito ʼa te hahaʼi kākā ʼaia ʼe ko te “kaihaa mo te tamatei pea mo maumaui.” (Soane 10:10) Koutou tokakaga ki te kau matāpule ʼaia!
12. (a) E feafeaʼi tatatou logo ki te leʼo ʼo te kau matāpule ʼi tatatou ʼu fakakaugā? (b) Koteā ʼaē ʼe tatau ai te ʼu gāue ʼa Satana pea mo te kau matāpule ia ʼaho nei?
12 Te ʼu fakakaugā kovi. ʼE feala ke tou logo ki te leʼo ʼo te kau matāpule ʼi te hahaʼi ʼaē ʼe tou fakakaugā mo nātou. Ko te ʼu fakakaugā kovi ʼe fakatupu tuʼutāmaki tāfito ki te kau tūpulaga. (1 Kolonito 15:33) Koutou manatuʼi, neʼe filifili tāfito e Satana ia Eva—heʼe ko ia ʼaē neʼe fakatupu fakamuli ʼi te taumatuʼa pea neʼe mole lahi te ʼu meʼa neʼe ina ʼiloʼi. Neʼe ina fakalotoʼi te fafine ke ina tui ko Sehova neʼe aga fefeka ʼi tana faka tuʼakoi tonā ʼāteaina, kae neʼe mole moʼoni te faʼahi ʼaia. Ko Sehova neʼe ʼofa ki tana fakatupu pea neʼe tokaga ke nā maʼuli lelei. (Isaia 48:17) ʼO toe feiā ia ʼaho nei, ʼe faiga e te kau matāpule ke koutou tui, kau tūpulaga, ʼe aga fefeka takotou ʼu mātuʼa ʼi tanatou faka tuʼakoi tokotou ʼāteaina. ʼE malave feafeaʼi kia koutou te ʼu palalau ʼaia ʼa te kau matāpule? ʼE ʼui fēnei e te kiʼi finemui Kilisitiano: “ ʼI te tahi temi, neʼe vaivai ai taku tui ʼuhi ko te kau tūpulaga ʼaē neʼe mātou ako tahi. Neʼe nātou ʼui tuʼumaʼu ʼe lahi te ʼu tapu ʼi taku lotu pea ʼe fefeka.” Kae ʼi tona ʼuhiga moʼoni, ʼe ʼoʼofa takotou ʼu mātuʼa ia koutou. Koia ka faiga e te ʼu tūpulaga ʼo te faleako ke mole koutou tui ki takotou ʼu mātuʼa, koutou tokaga naʼa kākāʼi koutou ohage ko Eva.
13. Ko te aga fakapotopoto fea ʼaē neʼe mulimuli kiai ia Tavite, pea e feafeaʼi hatatou faʼifaʼitakiʼi ia ia?
13 ʼO ʼuhiga mo te ʼu fakakaugā kovi, ʼe ʼui fēnei e te tagata fai pesalemo ko Tavite: “Neʼe mole ʼau heka mo te hahaʼi kākā, pea ʼe mole ʼau hū mo nātou ʼaē ʼe nātou fufū tonatou ʼuhiga moʼoni.” (Pesalemo 26:4) ʼE koutou toe tokagaʼi te agaaga ʼo te kau matāpule? ʼE nātou fufū tonatou ʼuhiga moʼoni—ohage pe ko Satana ʼaē neʼe ina fakaʼaogaʼi te gata moʼo fufū tona ʼuhiga moʼoni. Ia ʼaho nei, ko ʼihi hahaʼi aga heʼeʼaoga ʼe nātou fakaʼaogaʼi te Internet moʼo fufū tonatou ʼuhiga moʼoni pea mo tanatou ʼu fakatuʼutuʼu. ʼI te ʼu fai palalau ʼaē ʼe fai ai, ʼe feala kia koutou kau tūpulaga ke kākāʼi koutou e te ʼu hahaʼi lalahi, ʼo nātou ʼui ʼe kei nātou tūpulaga. Koia kau tūpulaga, koutou tokakaga fakalelei naʼa koutou tuʼutāmaki ʼi te faʼahi fakalaumālie.—Pesalemo 119:101; Tāʼaga Lea 22:3.
14. ʼI ʼihi temi, ʼe fakaʼaogaʼi feafeaʼi e te kau matāpule te televisio, mo te lātio, pea mo te ʼu nusipepa, pea e feafeaʼi te aga ʼa te kau Kilisitiano aga fakapotopoto?
14 Te ʼu tukugakovi hala. Logola ko ʼihi logo ʼo ʼuhiga mo te kau Fakamoʼoni ʼa Sehova ʼe mole kovi, kae ʼi ʼihi temi, ʼe fakaʼaogaʼi e te kau matāpule te televisio, mo te lātio pea mo te ʼu nusipepa moʼo tala he ʼu loi. Ohage la, ʼi te tahi fenua neʼe tala ʼi te ʼu tala logo te ʼu loi ʼo ʼuhiga mo te kau Fakamoʼoni, ʼo nātou ʼui neʼe nātou lagolago ki te pule ʼa Itilele lolotoga te Lua Tau Faka Malamanei. ʼI te tahi fenua, neʼe ʼui ʼi te tahi logo neʼe maumauʼi e te kau Fakamoʼoni te ʼu ʼēkelesia. ʼI te tahi ʼu fenua, ko te ʼu tala logo neʼe nātou tukugakoviʼi te kau Fakamoʼoni, ʼo ʼui ʼe nātou fakafisi ke faitoʼo tanatou ʼu fānau pea mo nātou tali te ʼu agahala mamafa neʼe fai e te hahaʼi ʼo tanatou lotu. (Mateo 10:22) Kae ko te hahaʼi loto moʼoni ʼaē ʼe nātou ʼiloʼi lelei tatou, ʼe nātou fakamoʼoni ʼe hala te ʼu tukugakovi ʼaia.
15. He koʼe ʼe mole tonu ke tou tui ki te ʼu meʼa fuli ʼaē ʼe tala ʼi te ʼu tala logo?
15 Koteā ʼaē ʼe tonu ke tou fai mo kapau ʼe tou logo ki te ʼu tukugakovi ʼaē ʼe faka mafola e te leʼo ʼo te kau matāpule? ʼE tonu ke tou tokagaʼi te tokoni ʼaē ʼe tuʼu ia Tāʼaga Lea 14:15: “Ko ia ʼaē ʼe mole heʼeki fakapotopoto ʼe tui ki te ʼu palalau fuli, kae ko ia ʼaē ʼe fakasiosio tonu ʼe tokaga ki tana haʼele.” ʼE mole fakapotopoto hatatou tui ʼe moʼoni te ʼu meʼa fuli ʼaē ʼe tala ʼi te ʼu logo. Logola ʼe mole tou fakafisi ki te ʼu logo fuli pe, kae ʼe tou ʼiloʼi “e mauli te malama-nei katoa i te Kovi.”—1 Soane 5:19.
“Koutou ʼAhiʼahiʼi Te ʼu Folafola”
16. (a) ʼE fakahā feafeaʼi e te aga ʼa te ʼu ōvi te moʼoni ʼo te ʼu palalau ʼa Sesu ia Soane 10:4? (b) Koteā ʼaē ʼe fakaloto mālohiʼi tatou e te Tohi-Tapu ke tou fai?
16 ʼE tou lava ʼiloʼi papau feafeaʼi peʼe tou felogoi mo he kaumeʼa peʼe ko he fili? ʼE ʼui e Sesu ko te ʼu ōvi ʼe nātou mulimuli ki te tagata tauhi ōvi “koteuhi e natou iloi tona leo.” (Soane 10:4) ʼE mole mulimuli te ʼu ōvi ki te tagata tauhi ōvi ʼuhi ko tona ʼu mutuʼi meʼa, kae ʼuhi ko tona leʼo. ʼI te tohi ʼo ʼuhiga mo te ʼu fenua ʼo te Tohi-Tapu, ʼe ʼui ai ko te tagata neʼe haʼu ʼo mata fenua, pea neʼe ina ʼui ʼe ʼiloʼi e te ʼu ōvi tanatou ʼu tagata tauhi ōvi ʼuhi ko tona ʼu mutuʼi meʼa, kae mole ʼuhi ko tona leʼo. Neʼe tali age e te tagata tauhi ōvi ʼe ʼiloʼi ia ia e tana ʼu ōvi ʼuhi ko tona leʼo. Moʼo fakamoʼoni te faʼahi ʼaia, neʼe ina fetogi tona ʼu mutuʼi meʼa mo te tagata ʼaia. ʼAki te ʼu mutuʼi meʼa ʼo te tagata tauhi ōvi, neʼe pāuiʼi e te tagata ʼaia te ʼu ōvi, kae neʼe mole nātou mulimuli ia ia. Neʼe mole nātou ʼiloʼi tona leʼo. Kae ʼi te pāuiʼi tuʼa tahi ʼo nātou e te tagata tauhi ōvi, logola neʼe teu kehe, neʼe ʼolo age kia ia te ʼu ōvi. Koia ko ʼihi ʼe nātou hage ko ni ʼu tagata tauhi ōvi, kae ʼe mole tui te ʼu ōvi ʼe ko ia moʼoni. ʼE vakavakaʼi e te ʼu ōvi te leʼo ʼo ia ʼaē ʼe ina pāuiʼi nātou, ʼo nātou fakalogologo lelei peʼe ko te leʼo ʼo te tagata tauhi ōvi. ʼE ʼui mai e te Folafola ʼa te ʼAtua ke tou fai feiā—“koutou ʼahiʼahiʼi te ʼu folafola ʼaē ʼe haʼu mai te laumālie ke koutou ʼiloʼi ai peʼe haʼu moʼoni mai te ʼAtua.” (1 Soane 4:1, MN; 2 Timoteo 1:13) Koteā ʼaē ka tokoni mai ke tou fai te faʼahi ʼaia?
17. (a) ʼE tou lava ʼiloʼi lelei feafeaʼi te leʼo ʼo Sehova? (b) Kapau ʼe tou ʼiloʼi ia Sehova, pea koteā ʼaē ʼe feala ke tou fai?
17 ʼE mahino papau ia, kapau ʼe tou ʼiloʼi lelei te leʼo peʼe ko te logo ʼo Sehova, pea ʼe tou ʼiloʼi vave ai mo te leʼo ʼo he matāpule. ʼE fakahā lelei e te Tohi-Tapu peʼe tou lava ʼiloʼi feafeaʼi te faʼahi ʼaia. ʼE ina ʼui fēnei: “ ʼE logo anai tou ʼu taliga ki he folafola ʼe haʼu mai ʼou tuʼa, ʼo ina ʼui fēnei: ‘Koʼeni te ala. Koutou haʼele ai.’ ” (Isaia 30:21) Ko te “folafola” ʼaē ʼe tou logo ʼe haʼu mai ʼotatou tuʼa, ʼe haʼu mai te Folafola ʼa te ʼAtua. ʼI te temi fuli ʼaē ʼe tou lau ai te Folafola ʼa te ʼAtua, ʼe hage pe ʼe tou logo ki te leʼo ʼo totatou Tagata Tauhi Ōvi Lahi, ia Sehova. (Pesalemo 23:1) Koia kapau ʼe lahi tatatou ako te Tohi-Tapu, pea ʼe tou ʼiloʼi lelei ai te leʼo ʼo te ʼAtua. Ko tatatou ʼiloʼi lelei ia Sehova ʼe feala ai anai ke tou ʼiloʼi vave te leʼo ʼo te kau matāpule.—Kalate 1:8.
18. (a) Koteā ʼaē ʼe tonu ke tou fai ke tou ʼiloʼi ai te leʼo ʼo Sehova? (b) ʼO mulimuli kia Mateo 17:5, he koʼe ʼe tonu ke tou fakalogo ki te leʼo ʼo Sesu?
18 Koteā ʼaē ʼe tonu ke tou fai ke tou ʼiloʼi lelei ai te leʼo ʼo Sehova? ʼE mole tonu pe ke tou logo, kae ʼe tonu ke tou fai te ʼu meʼa ʼaē ʼe tou logo kiai. Koutou toe tokagaʼi te meʼa ʼaē ʼe ʼui ia Isaia 30:21. ʼE ʼui fēnei e te Folafola ʼa te ʼAtua: “Koʼeni te ala.” ʼE moʼoni, ʼaki te ako ʼo te Tohi-Tapu ʼe tou logo ai ki te ʼu fakatotonu ʼa Sehova. Pea ʼe ina ʼui fēnei: “Koutou haʼele ai.” ʼE loto ia Sehova ke tou fai te ʼu meʼa ʼaē ʼe tou logo kiai. Koia, ʼi tatatou maʼuliʼi te ʼu meʼa ʼaē ʼe tou logo kiai, ʼe tou fakahā ai ʼe mole tou logo pe ki te leʼo ʼo Sehova kae ʼe tou toe mulimuli kiai. (Teutalonome 28:1) Ko tatatou fakalogo ki te leʼo ʼo Sehova ko tona faka ʼuhiga ʼe tou toe fakalogo foki ki te leʼo ʼo Sesu, heʼe ko Sehova totonu ʼaē ʼe ina ʼui mai ke tou fai feiā. (Mateo 17:5) Koteā ʼaē ʼe ʼui mai e Sesu, te Tagata Tauhi Ōvi Lelei ke tou fai? ʼE ina akoʼi tatou ke tou fai ni ʼu tisipulo pea mo tou falala ki “te tagata kaugana agatonu mo poto.” (Mateo 24:45, MN; 28:18-20) Kapau ʼe tou fakalogo ki tona leʼo pea ʼe tou maʼu ai anai te maʼuli heʼegata.—Gaue 3:23.
“E Natou Hola Anai Maia Te Ia”
19. Koteā ʼaē ʼe tonu ke tou fai mokā tou logo ki te leʼo ʼo te kau matāpule?
19 Koteā ʼaē ʼe tonu ke tou fai mokā tou logo ki te leʼo ʼo te kau matāpule? Tou fai ohage ko te ʼu ōvi, ʼaē neʼe ʼui fēnei e Sesu: “E mole natou mulimuli i he matapule, e natou hola anai maia te ia.” (Soane 10:5) ʼE ko faʼahi e lua ʼe tonu ke tou fai. ʼUluaki, “e mole [tou] mulimuli” ʼi he matāpule. Ei, ʼe tou fakafisi mālohi ki te matāpule. ʼI tona ʼuhiga moʼoni, ʼi te lea faka Keleka ʼo te Tohi-Tapu, ko te kupu ʼaē neʼe fakaliliu ʼaki te kupu “mole” ʼe mālohi age ia ʼi te kupu fakaʼuvea. (Mateo 24:35; Hepeleo 13:5) Lua, ʼe tou “hola anai maia te ia,” peʼe tou maliu kehe anai mai ia ia. ʼE ko te puleʼaki pe ʼaia e tahi ʼe tonu ke tou fai kia nātou ʼaē ʼe mole ʼalutahi tanatou ʼu akonaki mo te leʼo ʼo te Tagata Tauhi Ōvi Lelei.
20. Koteā ʼaē ʼe tou fai anai ʼo ʼuhiga mo (a) te kau ʼaposita, (b) te ʼu fakakaugā kovi, (c) te ʼu tukugakovi hala ʼi te ʼu logo?
20 Koia, ka tou logo ki he ʼu manatu faka ʼaposita, pea ʼe tou fai anai te meʼa ʼaē ʼe ʼui e te Folafola ʼa te ʼAtua: “Koutou tokaga kia natou e natou lagalaga te u mavetevete mo te u fasituu o fakafehagai ki te akonaki nee koutou tali, pea koutou fakamamao maia natou.” (Loma 16:17; Tito 3:10) ʼO toe feiā pe, ko te kau Kilisitiano tūpulaga ʼaē ʼe feala ke tuʼutāmaki ʼuhi ko te ʼu fakakaugā kovi, ʼe nātou fia maʼuliʼi te tokoni ʼaenī ʼa Paulo ki te tūpulaga ko Timoteo: “Hola mai te ʼu holi ʼo te temi tūpulaga.” Pea ka tou logo ki he ʼu tukugakovi hala ʼi te ʼu logo, ʼe tou manatuʼi anai te tokoni ʼaenī ʼa Paulo kia Timoteo: “[Ko nātou ʼaē ʼe fakalogo ki te leʼo ʼo te kau matāpule] ʼe nātou haga anai ki te ʼu fagana. Kae ko koe, taupau tau poto ia meʼa fuli.” (2 Timoteo 2:22, MN; 4:3-5, MN ) Tatau aipe peʼe mālie te leʼo ʼo te kau matāpule, kae ʼe tou fakamamaʼo anai mai ia meʼa fuli ʼe feala ke ina fakavaivaiʼi tatatou tui.—Pesalemo 26:5; Tāʼaga Lea 7:5, 21; Apokalipesi 18:2, 4.
21. Koteā te fakapale ʼe maʼu anai e nātou ʼaē ʼe mole nātou fakalogo ki te leʼo ʼo te kau matāpule?
21 Ko te fakafisi ʼa te kau Kilisitiano ʼaē neʼe fakanofo ʼaki te laumālie ki te leʼo ʼo te kau matāpule, ʼe nātou tali ai ki te ʼu palalau ʼa te Tagata Tauhi Ōvi Lelei ʼaē ʼe tou maʼu ia Luka 12:32. ʼE ʼui fēnei e Sesu kia nātou: “Aua tautou mataku kiʼi fagaovi, koteuhi nee lotolelei’pe tautou Tamai ke ina foaki kia koutou te Puleaga.” ʼO toe feiā mo te “tahi ʼu ōvi” ʼe nātou atalitali ke nātou logo ki te ʼui fēnei ʼa Sesu kia nātou: “Koutou omai hahai tapuakina o taku Tamai. Koutou tali te Puleaga, ko te tofia nee teuteui kia koutou talu mai te kamataʼaga o te malama-nei.” (Soane 10:16, MN; Mateo 25:34) ʼE ko he fakapale fakaloto māfana ʼe tou maʼu anai mo kapau ʼe tou tokakaga ki “te leo o te kau matapule.”
ʼE Kei Koutou Manatuʼi Koa?
• He koʼe ʼe tau mo Satana te fakamatala ʼo te tagata matāpule ʼaē ʼe talanoa kiai te lea fakatātā ʼa Sesu ʼo ʼuhiga mo te tauhi ōvi?
• ʼE tou logo feafeaʼi ia ʼaho nei ki te leʼo ʼo te kau matāpule?
• ʼE tou lava ʼiloʼi feafeaʼi te leʼo ʼo te kau matāpule?
• Koteā ʼaē ʼe tonu ke tou fai mokā tou logo ki te leʼo ʼo te kau matāpule?
[Paki ʼo te pasina 15]
Neʼe ʼiloʼi e Malia ia Kilisito
[Paki ʼo te pasina 16]
Ko te tagata matāpule ʼe mole fakaōvi fakahagatonu ki te ʼu ōvi
[Paki ʼo te pasina 18]
Koteā ʼaē ʼe tonu ke tou fai ʼo ʼuhiga mo te leʼo ʼo te kau matāpule?