Ko He Tofiʼa ʼe Feala Hakotou Falala Kiai
“KOUTOU tokaga mo kapau ʼe momoli atu he pepa e he tahi, ʼe ina fakahā atu ʼe ʼi ai takotou tofiʼa, heʼe feala pe ko he tahi ʼe ina kākāʼi koutou.”
ʼE ko he fakatokaga neʼe fai ʼi Amelika ʼi te tuʼasila Internet ʼa te selevisi ʼe ina sivi te laposi. Koteā tona tupuʼaga? Koteʼuhi ko te ʼu lauʼi miliale hahaʼi neʼe nātou maʼu te tohi ʼi te laposi ʼe ʼui fēnei, ‘Ko tokotou kāiga kua mate pea neʼe ina tuku atu tokotou tofiʼa.’ Koia tokolahi neʼe nātou momoli te 3 000 peʼe laka age kia ia ʼaē ʼi tanatou manatu ʼe ina fakahā age anai peʼe tuku ʼifea te tofiʼa pea mo feafeaʼi tona toʼo. Kae neʼe nātou lotomamahi fuli, he neʼe mole he tahi ia nātou ʼaia neʼe ina maʼu hana meʼa.
Ko te ʼu faʼahiga fakatuʼutuʼu ʼaia ʼe ina uga te holi ʼa te hahaʼi fuli ke nātou maʼu honatou tofiʼa. Koia ʼe talanoa ai te Tohi-Tapu ʼo ʼuhiga mo nātou ʼaē ʼe nātou foaki he tofiʼa, ʼo ina ʼui fēnei: “Ko he tahi ʼe lelei ʼe ina tuku anai he tofiʼa ki te ʼu foha ʼo tona ʼu foha.” (Tāʼaga Lea 13:22) ʼI tona fakahagatonu, ko Sesu totonu ʼaē neʼe ina fai te palalau ʼiloa pea mo ʼofa ʼaia ʼi tana Akonaki ʼaē ʼi te Moʼuga: “Manuʼia te kau agavaivai: heʼe nātou maʼu anai te kele.”—Mateo 5:5, King James Version.
ʼAki te ʼu palalau ʼa Sesu ʼe tou manatuʼi ai te ʼu palalau neʼe tohi ʼi te ʼu sēkulō ki muʼa atu e Tavite te Hau ʼo te Iselaele ʼāfea: “ ʼE maʼu anai e te kau agavaivai te kele; pea ʼe nātou fiafia moʼoni anai ʼi te mahu ʼo te tokalelei.”—Pesalemo 37:11, KJ.
ʼE ko he ʼamanaki taulekaleka te “maʼu [ʼo] te kele”! Kae ʼe feala koa ke tou tui papau ʼe mole ko he fakatuʼutuʼu fakakākā moʼo kaihaʼa te hahaʼi? ʼE tou tui papau ʼe ko te moʼoni, heʼe ko te kele ʼe ko te fakatupu taulekaleka ʼa te ʼAtua, ʼi tona ʼuhiga Pule pea mo Tupuʼaga, ʼe tāu mo ia ke ina foaki ki he tahi pe ʼe loto kiai. ʼAki te Hau ko Tavite, neʼe fai e Sehova te fakapapau fakakikite ʼo ʼuhiga mo Tona ʼAlo ʼofaina ʼaia, ko Sesu Kilisito: “Kole mai kia te ʼau, ke ʼau foaki atu kia te koe te ʼu puleʼaga ko hou tofiʼa pea mo te ʼu potu taupotu ʼo te kele ko hau ʼu meʼa.” (Pesalemo 2:8) Koia ʼaē neʼe ʼui ai e Paulo ʼo ʼuhiga mo Sesu ʼe ko ia ʼaē “neʼe . . . fakanofo [e te ʼAtua] . . . ke ina maʼu te tofiʼa ʼo meʼa fuli.” (Hepeleo 1:2, MN ) Koia, ʼe feala ai ke tou falala katoa mokā ʼui e Sesu ko te kau agavaivai ʼe nātou “maʼu anai te kele,” pea neʼe ina fai te fakapapau ʼaia mo tona loto katoa, pea ʼe ina maʼu te mālohi moʼo fakahoko ʼo te faʼahi ʼaia.—Mateo 28:18.
Koia ko te fehuʼi maʼuhiga ʼe malaga ai: ʼE hoko feafeaʼi anai te fakapapau ʼaia? ʼI te malamanei katoa, kua ʼāsili age te agamālohi pea mo te fialahi, pea ʼe nātou lolotoga fai pe nātou ia te meʼa ʼaē ʼe nātou loloto kiai. Koteā anai te meʼa ka maʼu e te hahaʼi agavaivai? Tahi ʼaē meʼa, kua lahi te ʼu meʼa ʼe nātou ʼulihi te kele, pea ko tona ʼu koloā ʼe maumauʼi e te hahaʼi ʼaē ʼe mānumānu pea mo fakavalevale. ʼE feala koa ke ʼui ko te kele ʼe ko he tofiʼa anai ki he temi? ʼE mātou fakaafe atu ke koutou lau te alatike ka hoko mai moʼo maʼu te tali ki te ʼu fehuʼi ʼaia pea mo te tahi age ʼu fehuʼi maʼuhiga.
[Paki ʼo te pasina 3]
ʼE koutou maʼu anai koa he tofiʼa moʼoni?