Totatou Tofiʼa Maʼuhiga—Koteā Tona Faka ʼUhiga Kia Koutou?
“Koutou omai hahai tapuakina o taku Tamai. Koutou tali te Puleaga, ko te tofia nee teuteui kia koutou talu mai te kamataʼaga o te malama-nei.”—Mateo 25:34.
1. Koteā te ʼu faʼahiga tofiʼa ʼaē ʼe maʼu e te hahaʼi?
KO TE hahaʼi fuli ʼe ʼi ai tonatou tofiʼa. Ko te tofiʼa ʼaē ʼe maʼu e ʼihi ʼe lagi ko he maʼuli koloaʼia. Ki ʼihi ʼe ko he maʼuli masiva. ʼI ʼihi ʼaluʼaga, neʼe tuku fakaholo e te ʼu ʼuluaki taʼiake he fehiʼa lahi ki te tahi lanu, ʼuhi ko te ʼu meʼa ʼaē neʼe hoko kia nātou peʼe ko te ʼu meʼa ʼaē neʼe nātou logo kiai. Kae ʼe ʼi ai te meʼa ʼe tou tatau fuli ai. Neʼe tou maʼu fuli mai te ʼuluaki tagata, ia Atama, te tofiʼa ʼo te agahala. ʼAki te temi, ko te tofiʼa ʼaia ʼe ina fakaiku tatou ki te mate.—Tagata Tānaki 9:2, 10; Loma 5:12.
2, 3. ʼI te kamata, koteā te tofiʼa ʼaē neʼe foaki e Sehova ki te hākoga ʼo Atama pea mo Eva, pea he koʼe neʼe mole nātou maʼu?
2 ʼI te kamata, ko Sehova, ʼi tona ʼuhiga Tāmai ʼofa ʼi selo, neʼe ina foaki ki te malamanei he tofiʼa neʼe kehe ʼaupito—ko te maʼuli heʼegata pea mo haohaoa ʼi te Palatiso. Neʼe foaki ki tatatou ʼu ʼuluaki mātuʼa, ia Atama pea mo Eva, he kamataʼaga haohaoa, neʼe nā hāo mai te agahala. Neʼe foaki e Sehova ʼAtua te Kele ko he meʼa ʼofa ki te malamanei. (Pesalemo 115:16) Neʼe ina fakatuʼu te ʼōloto ʼo Eteni moʼo fakahā peʼe feafeaʼi anai te kele katoa, pea neʼe ina tuku ki tatatou ʼu ʼuluaki mātuʼa te gāue fakatalakitupua. Neʼe tonu ke nā fanaunau, mo tokakaga ki te kele pea mo ʼona ʼu ʼakau kehekehe pea mo te ʼu manu, pea mo faka mafola te Palatiso ki te kele katoa. (Senesi 1:28; 2:8, 9, 15) Neʼe tonu ke toe kau kiai tonā hākoga. Neʼe ko he tofiʼa fakatalakitupua ʼaē neʼe feala ke nā tuku kia nātou!
3 Kae ke feala hanatou maʼu te ʼu faʼahi fuli ʼaia, ko Atama pea mo Eva, ʼo feiā mo tona hākoga neʼe tonu ke nātou felogoi lelei mo te ʼAtua. Neʼe tonu ke nā ʼofa pea mo fakalogo kia Sehova, kae neʼe mole leleiʼia e Atama pea mo Eva te meʼa ʼaē neʼe foaki age e te ʼAtua kia nāua pea neʼe nā talagataʼa ki tana fakatotonu. Neʼe nā pulihi ai tona nofoʼaga faka Palatiso pea mo te ʼu ʼamanaki faka kolōlia ʼaē neʼe fakatuʼutuʼu e te ʼAtua maʼa nāua. Koia, neʼe mole feala ke nā tuku te ʼu meʼa ʼaia ki tonā hākoga.—Senesi 2:16, 17; 3:1-24.
4. ʼE tou lava maʼu feafeaʼi te tofiʼa ʼaē neʼe pulihi e Atama?
4 ʼI tana loto manavaʼofa, neʼe fai e Sehova te fakatuʼutuʼu ke maʼu e te hākoga ʼo Atama pea mo Eva he fealagia ke nātou maʼu te tofiʼa ʼaē neʼe pulihi e Atama. ʼO feafeaʼi? ʼI te temi ʼaē neʼe fakakatofa kiai e te ʼAtua, ko tona ʼAlo, ia Sesu Kilisito, neʼe ina foaki tona maʼuli haohaoa maʼa te hākoga ʼo Atama. ʼAki te faʼahi ʼaia neʼe totogi fuli ai nātou e Kilisito. Kae ʼe mole nātou maʼu atu aipe te tofiʼa. ʼE tonu ke tali nātou e te ʼAtua, pea ʼe hoki feala mo kapau ʼe nātou tui ki te sakilifisio maʼuhiga pea mo faifakalelei ʼa Sesu, pea mo nātou fakahā tanatou tui ʼaki tanatou fakalogo. (Soane 3:16, 36; 1 Timoteo 2:5, 6; Hepeleo 2:9; 5:9) ʼE koutou fakahā koa ʼi tokotou maʼuli takotou loto fakafetaʼi ki te fakatuʼutuʼu ʼaia?
Ko He Tofiʼa Neʼe Foaki ʼAki Ia Apalahamo
5. Neʼe fakahā feafeaʼi e Apalahamo tana leleiʼia tana ʼu felogoi mo Sehova?
5 Moʼo fakahoko tana fakatuʼutuʼu ki te kele, neʼe makehe te fai felogoi ʼa Sehova mo Apalahamo. Neʼe ina fakatotonu ki te tagata agatonu ʼaia ke mavae ʼi tona kolo, pea ke ʼalu ki he fenua ʼe ina hinoʼi anai ki ai. Neʼe fakalogo lelei ia Apalahamo ki ai. ʼI te ʼosi tau atu kiai ʼa Apalahamo, neʼe ʼui e Sehova ko te hākoga ʼo Apalahamo, kae mole ko Apalahamo totonu, ʼe ina maʼu faka tofiʼa anai te fenua. (Senesi 12:1, 2, 7) Neʼe koteā ʼaē neʼe fai e Apalahamo? Neʼe fia tauhi kia Sehova ʼi te potu fuli pe pea ʼi he faʼahi pe ʼe taki ki ai e te ʼAtua, ke feala ke maʼu e tona hākoga tonatou tofiʼa. Neʼe tauhi ia Apalahamo kia Sehova ʼi he fenua matāpule, lolotoga taʼu e 100 ʼo aʼu ki tona mate. (Senesi 12:4; 25:8-10) Kanapaula neʼe ko koutou, neʼe koutou fai feiā koa? Neʼe ʼui e Sehova ko tona “kaumeʼa” ia Apalahamo.—Isaia 41:8.
6. (a) Koteā ʼaē neʼe fakahā e Apalahamo ʼi tana lotolelei ʼaē ke ina sakilifisioʼi tona foha? (b) Ko te tofiʼa maʼuhiga fea ʼaē neʼe lava foaki e Apalahamo ki tona hōloga?
6 Neʼe talitali Apalahamo lolotoga ni taʼu, pea neʼe ina maʼu tona foha, ia Isaake, ʼaē neʼe ʼofa mamahi ai. ʼI te kua lahi ʼa te tama, neʼe fakatotonu e Sehova kia Apalahamo ke ina toʼo te tama ʼaia pea mo ina momoli faka sakilifisio kia te ia. Neʼe mole ʼiloʼi e Apalahamo neʼe ina fai te meʼa ʼaē ka fai e te ʼAtua totonu, ʼi tana foaki fakatotogi tona ʼAlo; kae neʼe fakalogo pea ʼi tana ʼamanaki momoli faka sakilifisio ia Isaake, neʼe tāʼofi ia ia e te ʼaselo ʼa Sehova. (Senesi 22:9-14) Neʼe kua ʼosi tala e Sehova kia Apalahamo ʼe ina fakahoko anai tana ʼu fakapapau ʼaki ia Isaake. Koia, neʼe tui moʼoni ia Apalahamo, kapau neʼe ʼaoga, pea neʼe feala pe ki te ʼAtua ke ina toe fakamaʼuli ake ia Isaake, logola neʼe mole heʼeki hoko he meʼa feiā ʼi muʼa atu. (Senesi 17:15-18; Hepeleo 11:17-19) ʼUhi ʼaē neʼe mole fakafisi Apalahamo ki te foaki ʼo tona foha, koia neʼe tala fēnei ai e Sehova: “ ʼAki tou hāko ʼe tapuakina moʼoni ai anai te ʼatu puleʼaga fuli pe ʼo te kele.” (Senesi 22:15-18) Neʼe fakahā ʼaki ai ko te Hāko ʼaē neʼe talanoa kiai ia Senesi 3:15, te Mesia ʼaē ka ina foaki te ʼāteaina, ʼe hifo anai mai te hōloga ʼo Apalahamo. ʼE ko he tofiʼa maʼuhiga ʼaē neʼe ina maʼu!
7. Neʼe fakahā feafeaʼi e Apalahamo, mo Isaake, pea mo Sakopo tanatou leleiʼia tonatou tofiʼa?
7 Neʼe mole mahino Apalahamo ki te faka ʼuhiga ʼo te meʼa ʼaē neʼe fakatuʼutuʼu e Sehova ke ina fai; pea neʼe mole mahino kiai mo tona foha ko Isaake pea mo tona mokopuna ko Sakopo, ʼaē neʼe nātou “tofia i te fakapapau e tahi.” Kae neʼe nātou falala fuli kia Sehova. Neʼe mole nātou maʼuʼuli ʼo fakalogo ki he ʼu puleʼaga ʼo te fenua, koteʼuhi neʼe nātou ʼamanaki ki he meʼa ʼe lelei age—“te kolo kua tuu ona fakatafito, ko ia ae e ina fai tona fuafua pea mo tufuga e ko te Atua.” (Hepeleo 11:8-10, 13-16) Kae neʼe mole leleiʼia e te hākoga fuli ʼo Apalahamo te maʼuhiga ʼo te tofiʼa ʼaē neʼe feala ke nātou maʼu ʼaki ia Apalahamo.
Neʼe Fehiʼa ʼIhi Ki Te Tofiʼa
8. Neʼe fakahā feafeaʼi e Esau ʼe mole maʼuhiga kia ia tona tofiʼa?
8 Ko Esau, te foha lahi ʼo Isaake, neʼe mole maʼuhiga kia ia te tofiʼa ʼo tona ʼuhiga ʼuluaki tupu. Neʼe mole ina leleiʼia te ʼu meʼa taputapu. Koia, ʼi te tahi ʼaho neʼe hālofia Esau, pea neʼe ina fakatau ki tona tēhina ko Sakopo, tona tofiʼa ʼo tona ʼuhiga ʼuluaki tupu. He koʼe neʼe ina fakatau? Neʼe ina fakatau ke ʼavage hana moʼi pane pea mo hana haka lenitili! (Senesi 25:29-34; Hepeleo 12:14-17) Ko te puleʼaga ʼaē neʼe tonu ke hoko kiai te ʼu fakapapau ʼaē neʼe fai e te ʼAtua kia Apalahamo, neʼe hifo mai ia Sakopo, ʼaē neʼe fetogi e te ʼAtua tona higoa, ʼo fakatoʼo ko Iselaele. Koteā te ʼu ʼaluʼaga ʼaē neʼe nātou lava maʼu ʼaki te tofiʼa makehe ʼaia?
9. ʼUhi ko tonatou tofiʼa fakalaumālie, koteā te faka ʼāteaina ʼaē neʼe hoko ki te hākoga ʼo Sakopo, peʼe ko Iselaele?
9 Lolotoga te hoge, neʼe ʼolo ia Sakopo pea mo tona famili ki Esipito. Neʼe nātou liliu ai ʼo kaugamālie, kae neʼe nātou toe liliu foki ko he ʼu kaugana. Kae neʼe mole galo kia Sehova tana fuakava mo Apalahamo. ʼI te temi ʼaē neʼe fakakatofa e te ʼAtua, neʼe ina faka ʼāteainaʼi te ʼu foha ʼo Iselaele mai tanatou nofo popūla ʼaia, pea mo ina fakahā age kia nātou ʼe nātou hū anai ki “he fenua ʼe tafe ai te huʼa pipi pea mo te meli,” te fenua ʼaē neʼe ina fakapapauʼi age kia Apalahamo.—Ekesote 3:7, 8; Senesi 15:18-21.
10. ʼI te Moʼuga ʼo Sinai, koteā te faʼahi fakaofoofo ʼaē neʼe hoko ki te tofiʼa ʼo te ʼu foha ʼo Iselaele?
10 ʼI te temi ʼaē neʼe ʼolo ai te ʼu foha ʼo Iselaele ki te Kele ʼo Te Fakapapau, neʼe fakatahitahiʼi nātou e Sehova ʼi te Moʼuga ʼo Sinai. Neʼe ina ʼui fēnei ai kia nātou: “ ʼI te temi nei, kapau ʼe koutou fakalogo lelei ki toku leʼo pea mo koutou taupau fakalelei taku fuakava, pea ʼe koutou liliu moʼoni anai ko toku koloā makehe ʼi te lotolotoiga ʼo te ʼu hahaʼi fuli, heʼe ko te kele katoa ʼe ʼaʼaku. Pea ko koutou, ʼe koutou liliu anai maʼaku ko he puleʼaga faka pelepitelo pea ko te puleʼaga maʼoniʼoni.” (Ekesote 19:5, 6) ʼI te ʼosi tali fakatahi e te hahaʼi ʼaki he lotolelei, neʼe foaki e Sehova kia nātou tana Lao—pea ko te faʼahi ʼaia neʼe mole ina fai feiā ki he tahi age hahaʼi.—Pesalemo 147:19, 20.
11. Koteā ʼihi meʼa maʼuhiga neʼe kau ki te tofiʼa fakalaumālie ʼo te ʼu foha ʼo Iselaele?
11 ʼE ko he toe tofiʼa fakalaumālie lahi ʼaē neʼe maʼu e te puleʼaga foʼou ʼaia! Neʼe nātou tauhi ki te ʼAtua moʼoni tokotahi pe. Neʼe ina faka ʼāteainaʼi nātou mai Esipito pea neʼe nātou sio mata ki te ʼu meʼa fakaofoofo neʼe hoko ʼi te temi ʼaē neʼe foaki age ai te Lao ʼi te Moʼuga ʼo Sinai. Neʼe toe maʼuhiga age tonatou tofiʼa ʼi tanatou maʼu mai te kau polofeta te tahi “u folafola a te Atua.” (Loma 3:1, 2) Neʼe hinoʼi nātou e Sehova ke nātou liliu ko hana kau fakamoʼoni. (Isaia 43:10-12) Ko te Hāko Faka Mesianike neʼe tonu ke haʼu mai tonatou puleʼaga. Neʼe hinoʼi fakatomuʼa ia ia e te Lao, mo ina fakahā pe ko ai, pea mo tokoni kia nātou ke nātou mahino ʼe ʼaoga kia nātou te Hāko. (Kalate 3:19, 24) Tahi ʼaē meʼa, neʼe tuku age kia nātou te fealagia ʼaē ke nātou kaugā tauhi fakatahi mo te Hāko Faka Mesianike, ʼi tonatou ʼuhiga puleʼaga faka pelepitelo pea mo puleʼaga maʼoniʼoni.—Loma 9:4, 5.
12. Logola tanatou kua hū ki te Kele ʼo Te Fakapapau, koteā ʼaē neʼe mole hoko ki te kau Iselaele? Koteā tona tupuʼaga?
12 Neʼe fakahoko e Sehova tana fakapapau, ʼo ina taki Iselaele ki te Kele ʼo Te Fakapapau. Kae ohage ko tona fakamahino ki muli age e te ʼapositolo ko Paulo, ʼuhi ko tanatou mole tui, neʼe mole liliu te fenua ʼaia ko “he mālōlōʼaga.” Ko te hahaʼi katoa ʼaia, neʼe mole nātou hū ki te “mālōlō ʼa te ʼAtua” he neʼe mole nātou mahino pea mo gāue ʼo mulimuli ki te fakatuʼutuʼu ʼo te ʼaho mālōlō tonu ʼa te ʼAtua, ʼaē neʼe kamata ʼi te ʼosi fakatupu ʼo Atama pea mo Eva.—Hepeleo 4:3-10, MN.
13. ʼI tanatou mole leleiʼia tonatou tofiʼa fakalaumālie, koteā ʼaē neʼe pulihi e te puleʼaga ʼo Iselaele?
13 Neʼe feala ke maʼu ʼi te Iselaele ʼo te kakano te hahaʼi katoa ʼaē ka nātou fakatahi anai mo te Mesia ʼi tona Puleʼaga ʼi selo, ohage ko he puleʼaga faka pelepitelo pea mo he puleʼaga maʼoniʼoni. Kae neʼe mole nātou leleiʼia tonatou tofiʼa maʼuhiga ʼaia. Neʼe ko te kau Iselaele tokosiʼi pe ʼaē neʼe nātou tali te Mesia ʼi tana haʼu. Koia, neʼe ko te kiʼi kūtuga pe ʼaē neʼe kau ki te puleʼaga faka pelepitelo ʼaē neʼe fakakikite. Neʼe toʼo te Puleʼaga mai ia Iselaele pea neʼe “foakiʼage . . . ki he puleaga e ina fakafua anai.” (Mateo 21:43) Neʼe ko ai te puleʼaga ʼaia?
Ko He Tofiʼa ʼi Selo
14, 15. (a) ʼI te ʼosi mate ʼa Sesu, neʼe kamata tapuakina feafeaʼi te ʼu puleʼaga ʼaki te “hako” ʼo Apalahamo? (b) Koteā te tofiʼa ʼaē ʼe maʼu e “te Iselaele a te Atua”?
14 Ko te hahaʼi ʼaē neʼe foaki ki ai te Puleʼaga ʼe ko “te Iselaele a te Atua,” te Iselaele fakalaumālie, ko te toko 144 000 ʼu tisipulo ʼa Sesu Kilisito ʼaē neʼe fakanofo ʼaki te laumālie. (Kalate 6:16; Apokalipesi 5:9, 10; 14:1-3) Ko ʼihi ʼi te toko 144 000 ʼaia neʼe ko he kau Sutea, kae ko te tokolahi neʼe ko he ʼu hahaʼi mai te ʼu puleʼaga Senitile. Neʼe kamata hoko ai te fakapapau ʼa Sehova kia Apalahamo, ʼaē neʼe ina ʼui ʼaki tona “hako” ʼe tapuakina anai te ʼu puleʼaga fuli. (Gaue 3:25, 26; Kalate 3:8, 9) ʼI te ʼuluaki fakahoko ʼaia, neʼe fakanofo te hahaʼi ʼo te ʼu puleʼaga ʼaki te laumālie maʼoniʼoni pea nātou liliu ko he ʼu foha fakalaumālie ʼo Sehova ʼAtua, te ʼu tēhina ʼo Sesu Kilisito. Koia, neʼe nātou toe liliu mo nātou ko te lua koga ʼo te “hako” ʼaia.—Kalate 3:28, 29.
15 ʼI muʼa ʼo tana mate, neʼe fakahū e Sesu ki te fuakava foʼou, te kau Sutea ʼaē ka nātou kau ʼi te puleʼaga foʼou ʼaia, ʼaē neʼe fakamoʼoni ʼaki tona taʼataʼa. ʼAki tanatou tui ki te sakilifisio ʼaia neʼe fakamoʼoni, ko nātou ʼaē neʼe hū ki te fuakava ʼaia ʼe nātou liliu anai ʼo “haohaoa ʼo talu ai.” (Hepeleo 10:14-18, MN ) “Kua fakatonuhia” nātou pea mo fakamolemole tanatou ʼu agahala. (1 Kolonito 6:11) Koia, ʼi tona ʼaluʼaga ʼaia kua nātou hage ko Atama ʼi muʼa ʼo tana agahala. Kae ʼe mole nātou maʼuʼuli ʼi te palatiso ʼi te kele. Neʼe ʼui e Sesu ʼe ʼalu ʼo teuteuʼi maʼa nātou honatou ʼu nofoʼaga ʼi selo. (Soane 14:2, 3) ʼE nātou līaki tonatou maʼuli ʼi te kele ke nātou maʼu te ‘tofiʼa ʼaē neʼe tāʼofi maʼa nātou ʼi selo.’ (1 Petelo 1:4) Koteā ʼaē ʼe nātou fai ai? Neʼe fakamahino fēnei e Sesu: “ ʼE ʼau fai he fuakava mo koutou, . . . ki he puleʼaga.”—Luka 22:29, MN.
16. Koteā te gāue fakaofoofo ʼaē ka fakahoko anai e te kau Kilisitiano fakanofo?
16 Ko nātou ʼaē ka kaugā hau anai mo Kilisito ʼi selo, ʼe nātou tokoni anai ki te pulihi ʼi te kele te ʼu fakaʼiloga fuli ʼo te agatuʼu ki te pule ʼa Sehova. (Apokalipesi 2:26, 27) ʼI tanatou kau ki te lua koga ʼo te hāko fakalaumālie ʼa Apalahamo, ʼe nātou kau anai ki te foaki ʼo te ʼu tapuakina ʼo te maʼuli haohaoa ki te hahaʼi ʼo te ʼu puleʼaga fuli. (Loma 8:17-21) ʼE ko he tofiʼa maʼuhiga ʼaupito ʼaē ʼe nātou maʼu!—Efeso 1:16-18.
17. Koteā te ʼu faʼahi ʼo tonatou tofiʼa ʼe maʼu e te kau Kilisitiano fakanofo ʼi tanatou kei maʼuʼuli ʼi te kele?
17 Kae ʼe mole maʼu pe anai e te kau tisipulo fakanofo ʼa Sesu tonatou tofiʼa ʼi te temi ka haʼu. ʼI hona ʼaluʼaga makehe, neʼe tokoni Sesu kia nātou ke nātou ʼiloʼi ia Sehova, te ʼAtua moʼoni tokotahi pe. (Mateo 11:27; Soane 17:3, 26) ʼAki tana ʼu palalau pea mo tana faʼifaʼitaki, neʼe ina akoʼi kia nātou te faka ʼuhiga ʼaē ke ‘nātou falala kia Sehova’ pea mo te faka ʼuhiga ʼo te fakalogo ʼaē kia Sehova. (Hepeleo 2:13; 5:7-9) Neʼe foaki e Sesu kia nātou te ʼatamai mālama ʼo te moʼoni ʼo ʼuhiga mo te fakatuʼutuʼu ʼa te ʼAtua, pea neʼe ina fakapapau age ʼe taki anai nātou e te laumālie maʼoniʼoni ke nātou mahino katoa kiai. (Soane 14:24-26) Neʼe ina ʼai ki tonatou ʼatamai pea mo tonatou loto te maʼuhiga ʼo te Puleʼaga ʼa te ʼAtua. (Mateo 6:10, 33) Neʼe toe foaki e Sesu kia nātou te gāue ʼaē ke nātou fagonogono pea mo fai he ʼu tisipulo ʼi te hahaʼi ʼo Selusalemi, mo Sutea, mo Samalia, pea ʼi te ʼu potu taupotu ʼo te kele.—Mateo 24:14; 28:19, 20; Gaue 1:8.
Ko He Tofiʼa Maʼuhiga Maʼa Te Hahaʼi Tokolahi
18. ʼE hoko feafeaʼi ia ʼaho nei te fakapapau ʼa Sehova, ʼaē ʼe tapuakina anai te ʼu puleʼaga fuli ʼaki te “hako” ʼo Apalahamo?
18 ʼE mahino ia kua katoa te hahaʼi ʼaē ʼe nātou faʼufaʼu te Iselaele fakalaumālie, te “kiʼi fagaovi” ʼaē ka nātou maʼu te tofiʼa ʼo te Puleʼaga. (Luka 12:32) Kua lauʼi taʼu nei te tokaga ʼa Sehova ke ina tānaki te tahi hahaʼi tokolahi mai te ʼu puleʼaga fuli. Koia, ʼe lolotoga hoko ʼi hona ʼaluʼaga lahi, te fakapapau ʼa Sehova kia Apalahamo ʼaē neʼe ina ʼui ʼe tapuakina anai te ʼu puleʼaga fuli pe ʼaki tona “hāko.” ʼAki he loto fiafia, ko te hahaʼi tapuakina ʼaia ʼe nātou toe tauhi kia Sehova pea mo fakamoʼoni ko tonatou maʼuli ʼe fakalogo ki tanatou tui ki te Akeno ʼa te ʼAtua, ia Sesu Kilisito. (Apokalipesi 7:9, 10) Kua koutou tali koa te fakaafe manavaʼofa ʼa Sehova ke koutou kau ki te kūtuga loto fiafia ʼaia?
19. Koteā te tofiʼa ʼaē ʼe ʼamanaki kiai te hahaʼi ʼo te ʼu puleʼaga ʼaē ʼe lolotoga tapuakinaʼi nei?
19 Koteā te tofiʼa maʼuhiga ʼaē ʼe foaki e Sehova kia nātou ʼaē ʼe mole kau ʼi te kiʼi faga ōvi? ʼE mole ko he tofiʼa ʼi selo. ʼE ko te tofiʼa neʼe tonu ke foaki e Atama ki tona hākoga—te ʼamanaki ki te maʼuli heʼegata pea mo haohaoa ʼi te palatiso, ʼaē ka mafola māmālie anai ʼi te kele katoa. ʼI te mālama ʼaia, “e mole toe mau anai te mate. E mole toe mau anai he putu, pe ko he lauga, pe ko he mamahi.” (Apokalipesi 21:4) Koia ʼe fai atu e te ʼAtua te ʼu palalau ʼaenī ʼi tana Folafola: “[Koutou] falala kia Sehova pea mo fai te meʼa ʼaē ʼe lelei. [Koutou] maʼuli ʼi te kele, pea mo nonofo agatonu. Pea ke [koutou] fakafiafiaʼi foki ia Sehova, pea ʼe ina fakahoko anai te ʼu meʼa ʼaē ʼe kole e [tokotou] loto. Pea kei toe he kiʼi temi siʼipe, pea pulihi anai te tagata agakovi . . . Kae ko te kau agavaivai ʼe nātou maʼu anai te kele, pea ʼe nātou fiafia moʼoni anai ʼi te mahu ʼo te tokalelei. ʼE maʼu anai te kele e te kau faitotonu, pea ʼe nātou nonofo ai anai ʼo talu ai.”—Pesalemo 37:3, 4, 10, 11, 29.
20. E feafeaʼi ki te “tahi ʼu ōvi” hanatou maʼu he koga lahi ʼo te tofiʼa fakalaumālie ʼo te kau Kilisitiano fakanofo?
20 Ko te “tahi ʼu ōvi” ʼa Sesu ʼe nātou maʼu he tofiʼa ʼi te potu fakakelekele ʼo te Puleʼaga ʼo selo. (Soane 10:16a, MN ) Logola ʼe mole nātou ʼolo anai ki selo, kae ko te koga lahi ʼo te tofiʼa fakalaumālie ʼaē ʼe maʼu e te kau fakanofo kua fakahoko kia nātou. ʼAki te kalasi katoa ʼo te kau fakanofo, “te kaugana agatonu mo fakapotopoto” neʼe feala ai ki te tahi ʼu ōvi ke nātou mahino ki te ʼu fakapapau maʼuhiga ʼaē ʼe maʼu ʼi te Folafola ʼa te ʼAtua. (Mateo 24:45-47; 25:34) Ko te kau fakanofo ʼo fakatahi mo te tahi ʼu ōvi, ʼe nātou ʼiloʼi pea mo nātou tauhi ki te ʼAtua moʼoni tokotahi pe, ia Sehova. (Soane 17:20, 21) ʼE nātou fakafetaʼi fakatahi ki te ʼAtua ʼo ʼuhiga mo te maʼuhiga ʼo te sakilifisio faifakalelei ʼa Sesu. ʼE nātou tauhi fakatahi ohage ko he faga ōvi e tahi, pea mo nātou fakalogo ki te Tagata Tauhi Ōvi e tahi, ia Sesu Kilisito. (Soane 10:16b) ʼE nātou kau fuli ki te fale tautēhina faka malamanei ʼaē ʼe nātou feʼofaʼofani. ʼE nātou maʼu fakatahi te pilivilesio ʼaē ke nātou Fakamoʼoni ʼo ʼuhiga mo Sehova pea mo tona Puleʼaga. Ei, kapau ko koutou ko he kau kaugana ʼa Sehova kua koutou foaki tokotou maʼuli kia te ia pea mo papitema, pea ko te ʼu meʼa fuli ʼaenī ʼe kau ki tokotou tofiʼa fakalaumālie.
21, 22. ʼE tou lava fakahā feafeaʼi ʼe maʼuhiga kia tatou fuli totatou tofiʼa fakalaumālie?
21 E feafeaʼi kia koutou te maʼuhiga ʼo te tofiʼa fakalaumālie ʼaia? ʼE koutou faka maʼuhigaʼi koa, ke liliu te fakahoko ʼo te finegalo ʼo te ʼAtua ʼe ko te meʼa ʼaē ʼe maʼuhiga ʼaupito ʼi tokotou maʼuli? ʼI tona fakahagatonu, ʼe koutou manatuʼi koa te tokoni ʼo tana Folafola pea mo tana kautahi ʼaē ke koutou kau tuʼumaʼu ki te ʼu fono faka Kilisitiano ʼo te kokelekasio? (Hepeleo 10:24, 25) Ko te tofiʼa ʼaia ʼe lahi koa tona maʼuhiga kia koutou ke hoko atu takotou tauhi ki te ʼAtua logope la te ʼu faigataʼaʼia? Ko takotou leleiʼia ia te tofiʼa ʼaia ʼe mālohi koa ke feala hakotou tauʼi te ʼu fakahala fuli ʼaē ʼe feala ke nātou pulihi tokotou tofiʼa ʼaia?
22 Tou fakaʼamu ke tou leleiʼia fuli te tofiʼa fakalaumālie ʼaē neʼe foaki mai e te ʼAtua kia tatou. Kapau ʼe tou manatuʼi tuʼumaʼu te Palatiso ʼaē ka fakatuʼu, pea ʼe tou kau lahi anai ki te ʼu pilivilesio fakalaumālie ʼaē ʼe tuku mai e Sehova ʼi te temi nei. Kapau ʼe tou fakatuʼutuʼu totatou maʼuli ʼo fakatafito ki tatatou ʼu felogoi mo Sehova, pea ʼe tou fakahā lelei ai ʼe tou faka maʼuhigaʼi moʼoni totatou tofiʼa ʼaē neʼe foaki mai e te ʼAtua. Tou fakaʼamu ke tou kau ia nātou ʼaē ʼe nātou ʼui fēnei: “ ʼE ʼau vikivikiʼi anai koe, Ê toku ʼAtua, te Hau, pea ʼe ʼau tapuakiʼi anai tou huafa ki he ʼu temi ʼe mole ʼiloʼi hona gataʼaga, ʼio, ʼo talu ai.”—Pesalemo 145:1.
ʼE Koutou Fakamahino Feafeaʼi Anai?
• Kanapaula neʼe nofo agatonu ia Atama ki te ʼAtua, pea koteā anai te tofiʼa ʼaē neʼe feala ke ina foaki mai kia tatou?
• Neʼe feafeaʼi te aga ʼa te hākoga ʼo Apalahamo ʼo ʼuhiga mo te tofiʼa ʼaē neʼe foaki kia nātou?
• Koteā ʼaē ʼe kau ki te tofiʼa ʼo te kau tisipulo fakanofo ʼa Kilisito?
• Koteā te tofiʼa ʼo te hahaʼi tokolahi, pea ʼe nātou lava fakahā feafeaʼi ʼe nātou leleiʼia moʼoni te tofiʼa ʼaia?
[Paki ʼo te pasina 20]
Neʼe fai ki te hākoga ʼo Apalahamo te fakapapau ʼo ʼuhiga mo he tofiʼa maʼuhiga
[Paki ʼo te pasina 23]
ʼE koutou leleiʼia koa tokotou tofiʼa fakalaumālie?