Te Matalelei ʼo Te ʼu Meʼa ʼAē Neʼe Fakatupu e Sehova

“ ʼE Lahi Tau ʼu Gāue, Ê Sehova!”

PEʼE tou nonofo ʼi he kolo veliveli peʼe ʼi he kolo lahi, peʼe ʼi te ʼu moʼuga peʼe tou nonofo ōvi ki te tai, ʼi te ʼu potu fuli ʼe tou sio ai ki te matalelei pea mo te fakamanavahe ʼo te faʼu ʼa te ʼAtua. Koia, ʼe fakahā e te Calendrier des Témoins de Jéhovah 2004 ia te ʼu mātaga matalelei ʼaia ʼaē neʼe fakatupu e Sehova ʼAtua.

Ko te hahaʼi loto fakafetaʼi ʼe nātou tokagaʼi tuʼumaʼu ia te ʼu gāue ʼa te ʼAtua. Ohage la ko Salomone, ʼaē neʼe ʼui ʼo ʼuhiga mo tona poto “neʼe lahi age ia ʼi te poto ʼo te hahaʼi fuli ʼo te potu Hahake.” ʼE ʼui fēnei e te Tohi-Tapu: “Neʼe palalau ʼo ʼuhiga mo te ʼu fuʼu ʼakau, ʼo kamata mai te setele ʼaē ʼe tuʼu ʼi Lipania ʼo aʼu ki te isope ʼe homo ake ʼi te kaupā; pea neʼe palalau ʼo ʼuhiga mo te ʼu manu, pea mo te ʼu manulele, pea mo te ʼu manu ʼe totolo, pea mo te ʼu ika.” (1 Hau 4:30, 33) Ko te tāmai ʼa Salomone, te Hau ko Tavite, neʼe ko hana agamāhani tana metitasio ki te ʼu gāue fakaofoofo ʼa te ʼAtua. Neʼe tupu ai tana ʼui ʼo ʼuhiga mo tona Tupuʼaga: “ ʼE lahi tau ʼu gāue, Ê Sehova! Neʼe ke fai tau ʼu gāue fuli ʼaia ʼaki te poto. ʼE mahu tou ʼu koloā ʼi te kele.”​—Pesalemo 104:24.a

ʼE tonu foki mo tatou ke tou sioʼi pea mo metitasioʼi ia te ʼu meʼa ʼaē neʼe fakatupu. ʼE lagi feala ke tou “hiki [ʼotatou] mata ki ʼoluga” pea mo tou ʼui fēnei: “Pe ko ai koa ʼaē neʼe ina fakatupu te ʼu meʼa ʼaia?” ʼE ko Sehova ʼAtua, ʼaē ʼe ‘lahi ʼi te mālohi pea mo te māfimāfi’!​—Isaia 40:26.

Ko tatatou metitasioʼi ia te ʼu meʼa ʼaē neʼe fakatupu e Sehova, ʼe tonu ke malave feafeaʼi kia tatou? Ko faʼahi e tolu ʼe tonu ke malave kia tatou. ʼAki te metitasio: (1) ʼE tonu ke ina fakamanatuʼi mai ke tou faka maʼuhigaʼi totatou maʼuli, (2) ʼe tonu ai ke ina uga tatou ke tou tokoni ki te hahaʼi ke nātou fakakaukauʼi te ʼu meʼa ʼaē ʼe nātou sio ʼi te faʼu ʼo te ʼAtua, pea (3) ʼe tonu ke ina ʼeke tatou ke toe lahi age hatatou fia ʼiloʼi pea mo fakafetaʼi ki totatou Tupuʼaga.

Ko te tagata, ʼe kehe ia ʼi “te ʼu manu ʼaē ʼe mole ʼi ai honatou ʼatamai,” heʼe feala ki te tagata ke ina sivisivi pea mo ina faka maʼuhigaʼi ia te ʼu mātaga ʼaē neʼe fakatupu e te ʼAtua. (2 Petelo 2:12, MN ) ʼAki totatou ʼu mata, ʼe tou lava sio ki he fenua matalelei. ʼAki ʼotatou taliga ʼe tou logoʼi te tagi mālie ʼa te ʼu manulele. ʼE tou lava manatuʼi he ʼu meʼa neʼe tou leleiʼia, mo tou manatuʼi te temi pea mo te koga meʼa ʼaē neʼe hoko ai he ʼu faʼahiga meʼa lelei. Logola ʼe mole heʼeki tou haohaoa, kae ʼe tou ʼiloʼi papau ʼe ko he meʼa maʼuhiga ʼaupito totatou maʼuli!

ʼE fakatokagaʼi e te ʼu mātuʼa ia te leleiʼia e tanatou fānau ia te ʼu meʼa ʼaē neʼe fakatupu e te ʼAtua. Ko te tamaliki ʼe nātou leleiʼia te ʼu figota ʼo te matātai, mo te alaala ʼo he manu, pea mo tanatou fekākeʼi ʼi he fuʼu ʼakau! ʼE fakamahino anai e te ʼu mātuʼa ki tanatou fānau ia te pikipikiga ʼo te ʼu meʼa ʼaia neʼe fakatupu pea mo te Tupuʼaga. Ko te fakaʼapaʼapa ʼaē ka tupu anai ʼi te tamaliki ʼo ʼuhiga mo te ʼu meʼa ʼaē neʼe fakatupu e Sehova, ʼe ko he faʼahi ʼe nātou taupau anai ʼi tonatou maʼuli katoa.​—Pesalemo 111:2, 10.

ʼE mole ko he aga fakapotopoto anai mo kapau ʼe tou leleiʼia te ʼu meʼa ʼaē neʼe fakatupu kae mole tou fakafetaʼi kia Ia ʼaē neʼe ina fakatupu te ʼu meʼa ʼaia. ʼE tokoni mai te lea faka polofeta ʼa Isaia ke tou metitasioʼi ia te puani ʼaia ʼi tana ʼui ʼaenī: “Neʼe mole ke ʼiloʼi pea mo logoʼi koa la koe? Ko Sehova te Tupuʼaga ʼo te ʼu potu taupotu ʼo te kele, ʼe ko he ʼAtua ki he ʼu temi ʼe heʼegata. ʼE mole gaʼegaʼe ia peʼe fiu. ʼE mole feala ia ke ʼiloʼi katoa tona poto.”​—Isaia 40:28.

ʼE ʼiloga ʼi te ʼu gāue ʼa Sehova tona poto lahi, mo tona māfimāfi, pea mo tona ʼofa lahi ʼaē kia tatou. Ka tou sio ki te ʼu meʼa matalelei fuli ʼo te kele pea mo tou mahino ai ki te ʼu kalitate ʼo Ia ʼaē neʼe ina faʼu ia meʼa fuli, ʼofa pe ke tou manatu ohage ko Tavite, ʼaē neʼe ina ʼui fēnei: “ ʼE mole he tahi . . . ʼe tatau mo koe, Ê Sehova, ʼe mole he ʼu gāue ʼe hage ko tau ʼu gāue.”​—Pesalemo 86:8.

ʼE tou tui papau, ko te hahaʼi fakalogo ʼe nātou hoko atu anai tanatou leleiʼia ia te ʼu gāue fakaofoofo ʼa Sehova. ʼAki te maʼuli heʼegata, ʼe lahi ʼaupito anai te ʼu faigamālie ke tou ako ai he tahi ʼu faʼahi ʼo ʼuhiga mo Sehova. (Tagata Tānaki 3:11) ʼAki te ʼu tuʼuga meʼa ʼaē ka tou ako ʼo ʼuhiga mo ia, ʼe toe lahi age anai totatou ʼofa ki totatou Tupuʼaga.

[Kiʼi nota]

[Talanoa ʼo te pasina 9]

Ko He Fakavikiviki Ki Te Tupuʼaga

Ko te kau popoto e tokolahi ʼe nātou faka tui ʼe ko te ʼAtua ʼaē neʼe ina fakatupu ia meʼa fuli. Koʼeni te ʼu faʼifaʼitaki:

“ ʼI te ʼu lakaga ʼaē ʼe au maʼu ai he ʼu meʼa foʼou ʼe au sio ki te maʼuhiga pea mo te fakafiafia ʼo taku gāue, pea ʼe au ʼui fēnei ʼi toku loto: ‘Neʼe feiā koa tona faʼahiga faʼu e te ʼAtua.’ ʼE au fia mahino ki he kiʼi koga veliveli pe ʼo te fakatuʼutuʼu ʼa te ʼAtua.”​—Henry Schaefer, tagata faiako ʼo te chimie.

“ ʼE fakalogo ki te tagata lautohi tana mahino ki te faʼahiga lahi ʼo te ʼAtulaulau, kae ʼe mole tou mahino katoa anai ki te faʼahi ʼaia, mo kapau ʼe mole fakahā mai e [te ʼAtua].”​—Edward Milne, ko te tagata poto mai Pilitania ʼe ina sivisivi te agaaga pea mo te lahi ʼo te ʼatulaulau.

“ ʼE tou ʼiloʼi ko te faʼahiga fakamahino pe e tahi ki te ʼu faʼahiga faʼufaʼu ʼo te kele, ʼe ko ia ʼaē ʼe poto lelei tokotahi ʼi te fai numelo, ia te ʼAtua, koteʼuhi heʼe ko ia ʼaē neʼe ina fakatupu te ʼu meʼa ʼaia.”​—Alexander Polyakov, ko he tagata Lusia ʼe fai numelo.

“ ʼI tatatou sivi te agaaga ʼo te ʼu manu pea mo te ʼuluʼakau, ʼe tou tokagaʼi ai te ʼu manatu ʼa te Tupuʼaga, ʼo tou mahino lelei ai ki tana ʼu faʼahiga faʼufaʼu, pea mo tou fakamahino ai he faʼahiga fakatuʼutuʼu ʼe ʼa te ʼAtua kae ʼe mole ʼa tatou.”​—Louis Agassiz, ko te tagata biologiste Amelika.

[Paki ʼo te pasina 8]

Ko te ʼu ‘manchots’ papous, ʼi te Péninsule Antarctique

[Paki ʼo te pasina 9]

Ko te ’Ōloto Lahi ʼo te Grand Teton, ʼi Wyoming, ʼi Amelika

[Haʼuʼaga ʼo te paki]

Jack Hoehn/Index Stock Photography