‘Neʼe Ina Maʼu Te Mataʼi Tofe Maʼuhiga ʼAupito’
“Ko te puleʼaga ʼo selo ʼaē ʼe laka fakamālohi kiai te ʼu tagata, pea ko nātou ʼaē ʼe laka fakamālohi ʼe nātou maʼu.”—Mateo 11:12, MN.
1, 2. (a) Koteā te meʼa makehe ʼaupito neʼe talanoa kiai ia Sesu ʼi tana tahi lea fakatātā ʼo ʼuhiga mo te Puleʼaga? (b) Koteā ʼaē neʼe ʼui e Sesu ʼi tana lea fakatātā ʼo ʼuhiga mo te mataʼi tofe maʼuhiga ʼaupito?
ʼE ʼI AI koa he meʼa ʼe maʼuhiga ʼaupito kiā koutou, ʼo feala ai ke koutou līaki ia meʼa fuli ke koutou maʼu ia te meʼa ʼaia? Logola ko te hahaʼi ʼe nātou faiga mālohi ke nātou maʼu ia te ʼu meʼa ʼaē ʼe nātou fakatuʼutuʼu kiai—ohage ko te paʼaga, mo te logona, mo te mālohi, peʼe ko te tuʼulaga—kae ʼe tokosiʼi ia te hahaʼi ʼaē ka nātou maʼu he meʼa, pea ʼe nātou līaki ia meʼa fuli ʼuhi pe ko te meʼa ʼaia. ʼI tana tahi lea fakatātā ʼo ʼuhiga mo te Puleʼaga, neʼe talanoa ia Sesu Kilisito ʼo ʼuhiga mo te meʼa maʼuhiga pea mo maʼu tahitahiga.
2 Neʼe ko tana ʼu tisipulo pe ʼaē neʼe fakahā kiai e Sesu ia te lea fakatātā ʼaia, pea ʼe tau fakahigoaʼi ko te lea fakatātā ʼo te mataʼi tofe maʼuhiga ʼaupito. Neʼe ʼui fēnei e Sesu: “Ko te puleʼaga ʼo selo ʼe toe fakatatau ki he tagata fakatau koloā haʼele ʼe ina kumi he ʼu mataʼi tofe matalelei. Pea ʼi tana maʼu te mataʼi tofe maʼuhiga lahi, neʼe ʼalu ia ʼo foimo fakatau ʼana meʼa fuli pea ina totogi ai te mataʼi tofe ʼaia.” (Mateo 13:36, 45, 46, MN ) Koteā ʼaē neʼe fia akoʼi e Sesu ki te hahaʼi ʼaē neʼe logo ki te lea fakatātā ʼaia? Pea ʼe ʼaoga feafeaʼi kiā tatou ia te ʼu palalau ʼa Sesu?
Te ʼu Mataʼi Tofe Maʼuhiga ʼAupito
3. He koʼe neʼe maʼuhiga ʼaupito ʼi te temi ʼāfea ia te ʼu mataʼi tofe matalelei?
3 ʼI te ʼu temi ʼāfea, neʼe fakaʼaogaʼi ia te ʼu mataʼi tofe ohage ko he ʼu meʼa fakateuteu. ʼI te tohi, ʼe ʼui ai e te tagata faitohi Loma ko Pline lʼAncien, ko te ʼu mataʼi tofe “neʼe maʼuhiga kehe age ia ʼi te ʼu meʼa maʼuhiga fuli.” Ko te aulo, mo te siliva, pea mo te ʼu maka maʼugataʼa, ʼe mole tatau mo te ʼu mataʼi tofe, ʼaē neʼe haʼu mai te ʼu meʼa ʼe maʼuli. ʼE tou ʼiloʼi lelei ko ʼihi sifa ʼe feala ke nātou fakaliliu ni ʼu ʼotaʼota—ohage la ko he ʼu kiʼi eveʼi maka—ko he mataʼi tofe. ʼI te ʼu temi ʼāfea, neʼe maʼu tāfito ia te ʼu mataʼi tofe matalelei ʼi te ʼu potu ʼe tuʼu mamaʼo atu ʼi te fenua ʼo Iselaele, ohage ko te Tai Kula, mo te Golfe Persique, pea mo te Tai ʼo Initia. ʼE lagi ko te tupuʼaga la ʼaia ʼo te talanoa ʼa Sesu ʼo ʼuhiga mo “he tagata fakatau koloā haʼele ʼe ina kumi he ʼu mataʼi tofe matalelei.” Pea neʼe mole ko he kihiʼi gāue ki he tahi hana maʼu ia he mataʼi tofe maʼuhiga.
4. Koteā ʼaē neʼe maʼuhiga tāfito ʼi te lea fakatātā ʼa Sesu ʼo te tagata fakatau koloā haʼele?
4 Tatau aipe pe neʼe totogi kovi talu mai fualoa ia te ʼu mataʼi tofe matalelei, kae ʼe ʼasi mai ʼi te lea fakatātā ʼa Sesu ko te meʼa ʼaē neʼe maʼuhiga ʼe mole ko tonatou totogi. ʼI te lea fakatātā ʼaia, neʼe mole fakatatau pe e Sesu ia te Puleʼaga ʼo te ʼAtua ki he mataʼi tofe matalelei, kae neʼe toe talanoa ki “he tagata fakatau koloā haʼele ʼe ina kumi he ʼu mataʼi tofe matalelei” pea mo te meʼa ʼaē ka ina fai mokā ina maʼu anai ia te mataʼi tofe matalelei ʼaia. ʼE kehekehe ia mo te tagata fakatau koloā māhani, ʼaē ʼe poto lelei ʼi te sivisivi ʼo he mataʼi tofe ʼe matalelei peʼe matakovi. Ka sio te tagata ʼaia ki he mataʼi tofe, ʼe ina ʼiloʼi atu aipe peʼe maʼuhiga moʼoni, pea ʼe mole lava kākāʼi ia ia mo kapau ʼe fakatau age ki ai he ʼu mataʼi tofe.
5, 6. (a) Koteā ʼaē ʼe makehe ai te tagata fakatau koloā ʼo te lea fakatātā ʼa Sesu? (b) ʼAki te lea fakatātā ʼo te koloā ʼaē neʼe fufū, koteā ʼaē kua tou mahino kiai ʼo ʼuhiga mo te tagata fakatau koloā haʼele?
5 ʼE tonu ke tou fakatokagaʼi ia te tahi meʼa ʼi te tagata fakatau koloā. Ko te tagata fakatau koloā, ʼe ina fakafuafua muʼa ia te maʼuhiga ʼo te mataʼi tofe, ke feala ai hana ʼiloʼi peʼe fia anai ia tona totogi pea mo te falā ʼaē ka ina maʼu ai mokā ina fakatau anai. ʼE ina toe vakaʼi anai pe ʼi ai he ʼu hahaʼi ʼe nātou fakaʼui te taʼi mataʼi tofe ʼaia, ke feala hana foimo fakatau. Ko tona faka ʼuhiga, ʼe mole ina taupau fualoa anai ia te mataʼi tofe ʼaia, heʼe maʼuhiga age hana foimo fakatau ke ina maʼu ai hana paʼaga. Kae ʼe mole feiā ia te tagata fakatau koloā ʼo te lea fakatātā ʼa Sesu. ʼE mole fia fai ia ki hana paʼaga, kae ʼe ina fakatau “ ʼana meʼa fuli”—tona ʼu lelei pea mo tona ʼu koloā fuli—ke feala ai hana maʼu ia te meʼa ʼaē ʼe ina kumi.
6 ʼE lagi ʼui anai e te ʼu hahaʼi fakatau koloā, ko te meʼa ʼaē neʼe fai e te tagata ʼi te lea fakatātā ʼa Sesu neʼe mole ko he aga fakapotopoto ia. Heʼe ko he tagata fakatau koloā ʼe mole ina fai anai he fakatuʼutuʼu feiā. Kae ko te tagata fakatau koloā ʼo te lea fakatātā ʼa Sesu neʼe kehe tana faʼahiga sio ki te ʼu meʼa ʼaē ʼe faka maʼuhigaʼi e te hahaʼi. Neʼe mole mānumānu ia ki te falā, kae ko te meʼa ʼaē neʼe maʼuhiga ʼaupito kiā ia neʼe ko te fiafia pea mo te tokalelei ʼi tana maʼu ʼaē ʼo te koloā ʼe maʼuhiga ʼaupito. Ko te puani ʼaia ʼe ʼasi lelei ʼi te tahi lea fakatātā ʼa Sesu. Neʼe ina ʼui fēnei: “Ko te puleʼaga ʼo selo ʼe fakatatau ki he koloā neʼe fufū ʼi he gāueʼaga, pea neʼe maʼu e he tagata pea ina fufū; pea ʼi tona fiafia, neʼe ʼalu ʼo fakatau ʼana meʼa fuli pea ina totogi ai te gāueʼaga ʼaia.” (Mateo 13:44, MN ) Ei, ʼaki pe tana fiafia he neʼe ina maʼu ia te koloā ʼo ina taupau maʼana, neʼe fakatau ai e te tagata ʼana meʼa fuli. ʼE ʼi ai koa he ʼu tagata feiā ia ʼaho nei? ʼE ʼi ai koa he koloā ʼe tau mo he sākilifisio feiā?
Te Hahaʼi ʼAē Neʼe Mahino Ki Te Maʼuhiga ʼo Te Puleʼaga
7. Neʼe fakahā feafeaʼi e Sesu neʼe mahino lelei ki te maʼuhiga ʼaupito ʼo te Puleʼaga?
7 ʼI te lea fakatātā ʼa Sesu, neʼe talanoa ia ʼo ʼuhiga mo “te puleʼaga ʼo selo.” ʼIo, neʼe ko ia tāfito ʼaē neʼe mahino lelei ki te maʼuhiga ʼaupito ʼo te Puleʼaga. ʼE fakamoʼoni mālohi ia te ʼu Evaselio ki te faʼahi ʼaia. ʼI tona ʼosi papitema ʼi te taʼu 29 ʼo totatou temi, neʼe “kamata ai ʼi te lakaga ʼaia te akonaki ʼa Sesu ʼo ʼui maʼana: ‘Koutou fakahemala, he kua fakaōvi mai te puleʼaga ʼo selo.’ ” Lolotoga taʼu e tolu vaelua, neʼe ina faka mafola ia te Puleʼaga ki te hahaʼi tokolahi. Neʼe feʼaluʼaki ʼi te fenua, ʼo “ ʼalu ki te ʼu kolo lalahi pea mo te ʼu kolo liliki, ʼo fai faka mafola pea mo kalagaʼi te logo lelei ʼo te puleʼaga ʼo te ʼAtua.”—Mateo 4:17, MN; Luka 8:1, MN.
8. Koteā ʼaē neʼe fai e Sesu moʼo fakahā ia te meʼa ʼaē ka fakahoko anai e te Puleʼaga?
8 Neʼe toe fakahā e Sesu ia te ʼu gāue ʼaē ka fakahoko anai e te Puleʼaga ʼo te ʼAtua, ʼaki te ʼu tuʼuga milakulo ʼaē neʼe ina fakahoko ʼi te fenua—ia tana fakamālōlō te kau mahaki, mo tana fafaga ia te hahaʼi pākupapaku, mo tana puleʼi te ʼu mālohi ʼo te faʼu ʼo te ʼAtua, pea mo tana fakatuʼuake ia te kau mate. (Mateo 14:14-21; Maleko 4:37-39; Luka 7:11-17) Ki muli age, neʼe ina foaki tona maʼuli ʼo mate faka maletile ʼi te pou fakamamahi moʼo fakahā ia tana agatonu ʼaē ki te ʼAtua pea mo te Puleʼaga. Ohage pe ko te tagata fakatau koloā haʼele ʼaē neʼe ina tali lelei ke ina foaki ia meʼa fuli ʼaʼana ʼuhi pe ko te “mataʼi tofe maʼuhiga lahi,” neʼe maʼuli ia Sesu maʼa te Puleʼaga pea neʼe mate maʼa te Puleʼaga.—Soane 18:37.
9. Koteā te kalitātē makehe neʼe ʼiloga ʼi te kau ʼuluaki tisipulo ʼa Sesu?
9 Neʼe fakaʼaogaʼi kātoa e Sesu ia tona maʼuli ki te Puleʼaga, pea neʼe ina toe fakatahiʼi foki mo te ʼu tisipulo e tokosiʼi. Ko te kau tisipulo ʼaia neʼe ko te hahaʼi neʼe nātou mahino lelei ki te maʼuhiga ʼaupito ʼo te Puleʼaga. Neʼe kau iā nātou ʼaia, ia Atelea ʼaē neʼe ko te ʼuluaki tisipulo ʼa Soane Patita. ʼI tana logo ki te fakamoʼoni ʼa Soane ko Sesu neʼe ko “te Akeno a te Atua,” ko Atelea pea mo te tahi tisipulo ʼa Soane, lagi neʼe ko he tama ʼi te ʼu foha ʼo Sepeteo ʼaē neʼe toe higoa pe foki ko Soane, neʼe nā muli atu aipe ia Sesu pea neʼe nā tui kiā te ia. Kae neʼe mole gata ai, he neʼe ʼalu atu aipe ia Atelea ki tona tēhina ko Simone pea neʼe ina ʼui age: “Kua mâ mau te Mesia.” Mole tuai, pea ko Simone (ʼaē neʼe higoa ko Sefasi, peʼe ko Petelo), mo Filipo pea mo tona kaumeʼa ko Natanaele, neʼe toe fakamoʼoni mo nātou ʼe ko Sesu ia te Mesia. Koia neʼe ʼui e Natanaele kiā Sesu: “Ko koe ia te Alo o te Atua, ko koe ia te Hau o Iselaele.”—Soane 1:35-49.
Neʼe Uga Ki He Gāue
10. Ki muli age ʼi te hili ʼo tanatou ʼuluaki felāveʼi, neʼe koteā ia te tali ʼa te kau tisipulo ʼi te toe fakaafe ʼo nātou e Sesu?
10 Ko te fiafia ʼa Atelea, mo Petelo, mo Soane, pea mo ʼihi ʼi tanatou maʼu ia te Mesia, ʼe feala ke fakatatau ki te tagata fakatau koloā haʼele ʼi te temi ʼaē neʼe ina maʼu ai ia te mataʼi tofe maʼuhiga ʼaupito. Koteā ʼaē ka nātou fai anai ʼi te temi ʼaia? ʼE mole lahi te ʼu fakamatala ʼa te ʼu Evaselio ʼo ʼuhiga mo te meʼa ʼaē neʼe nātou fai ʼi te hili ʼo tanatou ʼuluaki felāveʼi mo Sesu. ʼE mahino ia, ko ʼihi ia nātou neʼe toe liliu ki tanatou ʼu gāue māhani. Kae teitei māhina e ono peʼe taʼu kātoa ki muli age, ko Sesu neʼe toe felāveʼi mo Atelea, mo Petelo, mo Soane, pea mo Sakopo, te tēhina ʼo Soane, ʼi tanatou gāue tautai ʼi te Tai ʼo Kalilea.a ʼI te sio ʼa Sesu kiā nātou, neʼe ʼui maʼana: “[Koutou] mulimuli mai ia te au.” Neʼe koteā ia tanatou tali kiai? ʼO ʼuhiga mo Petelo pea mo Atelea, ʼe ʼui fēnei ʼi te evaselio ʼa Mateo: “Nee tuku atu aipe e naua te u kupega pea nee ’na mulimuli ia te ia.” Pea kiā Sakopo mo Soane, ʼe tou lau fēnei: “Nee tuku atu aipe e naua te vaka mo tanā tamai, pea nee ’na mulimuli ia te ia.” Ko te evaselio ʼa Luka ʼe ina toe ʼui “nee natou laku ai ia meafuape pea nee natou mulimuli ia te ia.”—Mateo 4:18-22; Luka 5:1-11.
11. He koʼe neʼe foimo tali atu aipe e te kau tisipulo ia te fakaafe ʼa Sesu?
11 Neʼe vave fau koa te tali ʼaē ʼa te kau tisipulo ia te fakaafe ʼa Sesu, ʼo faka ʼuhiga neʼe mole nātou fakakaukauʼi fakalelei muʼa? Kailoa ia! Tatau aipe pe neʼe nātou toe liliu ki tanatou ʼu gāue tautai faka famili ʼi te hili ʼo tanatou ʼuluaki felāveʼi ʼaē mo Sesu, kae ko te meʼa ʼaē neʼe nātou sisio pea mo logoʼi ʼi te temi ʼaia neʼe malave mālohi ki ʼonatou loto pea mo ʼonatou ʼatamai. Ko te taʼu kātoa ʼaē neʼe hili neʼe ko he faigamālie ʼaia ke nātou metitāsioʼi ia te ʼu meʼa ʼaia. Neʼe kua tonu leva ʼi te temi ʼaia ke nātou fai he tonu. ʼE nātou hage anai koa ko te tagata fakatau koloā haʼele ʼaē neʼe fiafia ʼaupito ʼi tana maʼu ia te mataʼi tofe maʼuhiga, pea neʼe ʼui e Sesu “neʼe ʼalu ia ʼo foimo fakatau” ia tana ʼu meʼa fuli moʼo totogi ʼaki ia te mataʼi tofe ʼaia? Ei. Neʼe fiafia ʼonatou loto ʼuhi ko te ʼu meʼa ʼaē neʼe nātou sisio pea mo logo kiai. Neʼe mahino kiā nātou kua hoko mai ia te temi ʼaē ke nātou gāue ai. Koia, ohage ko tona ʼui e te ʼu evaselio, neʼe nātou līaki atu aipe tanatou ʼu meʼa fuli kae nātou liliu ko te ʼu tisipulo ʼa Sesu.
12, 13. (a) Neʼe tali feafeaʼi e te tokolahi ia te fai faka mafola ʼa Sesu? (b) Koteā ʼaē neʼe ʼui e Sesu ʼo ʼuhiga mo tana kau tisipulo agatonu, pea koteā te faka ʼuhiga ʼo tana ʼu palalau ʼaia?
12 Ki muli age neʼe talanoa ʼi te ʼu Evaselio ki te ʼu hahaʼi neʼe kehekehe ʼosi mo te kau agatonu ʼaia! Neʼe tokolahi ia te hahaʼi ʼaē neʼe fakamālōlō pea mo fafaga e Sesu kae neʼe nātou toe liliu ʼo hoko atu pe tanatou ʼu gāue māhani. (Luka 17:17, 18; Soane 6:26) Mo ʼihi pe la neʼe mole nātou tali ia te fakaafe ʼa Sesu ʼaē ke nātou liliu ko ni ʼana tisipulo. (Luka 9:59-62) Kae neʼe mole feiā ia te hahaʼi agatonu, pea ʼo ʼuhiga mo nātou ʼaia neʼe ʼui fēnei e Sesu ki muli age: “Talu mai iā ʼaho ʼo Soane Patita ʼo kaku mai ki te lakaga nei, ʼe ko te puleʼaga ʼo selo ʼaē ʼe laka fakamālohi kiai te ʼu tagata, pea ko nātou ʼaē ʼe laka fakamālohi ʼe nātou maʼu.”—Mateo 11:12, MN.
13 Koteā te faka ʼuhiga ʼo te kupu “laka fakamālohi”? Ko te kupu faka Keleka ʼaē ʼe haʼu mai ai te kupu ʼaia, ʼe ʼui ʼi te tohi Vine’s Expository Dictionary of Old and New Testament Words: “Ko te kupu ʼaia ʼe faka ʼuhiga ki he faiga mālohi.” Pea ʼo ʼuhiga mo te vaega ʼaia, ʼe tou lau fēnei ʼi te Tohi-Tapu Sainte Bible commentée ʼo Fillion: “ ʼE mahino lelei mai, ʼaki te kupu ʼaia, te faiga mālohi ʼa te kau Sutea tokolahi ohage ko hanatou fia ulufi ia te puleʼaga ʼaia, pea mo tanatou faiga ʼaē ke nātou liliu ko he ʼu hahaʼi fakalogo ʼo te puleʼaga ʼaia.” Ohage ko te tagata fakatau koloā haʼele, neʼe mahino vave ki te ʼu tisipulo ʼaia ia te meʼa ʼaē neʼe maʼuhiga moʼoni, pea neʼe nātou līaki atu aipe tonatou ʼu lelei fuli ʼuhi ko te Puleʼaga.—Mateo 19:27, 28; Filipe 3:8.
Ko ʼIhi Neʼe Kau Mo Nātou Ki Te Kumi
14. Neʼe teuteuʼi feafeaʼi e Sesu te kau ʼapositolo ki tanatou gāue fai faka mafola, pea neʼe koteā tona fua?
14 ʼI te lolotoga fai e Sesu tana minisitelio, neʼe faiako pea neʼe tokoni ki te hahaʼi ke nātou kaku ki te Puleʼaga. Neʼe ina ʼuluaki filifili ʼi tana ʼu tisipulo ia te toko 12, ʼo ina fakanofo nātou ko te kau ʼapositolo, peʼe ko ni hahaʼi ʼe ina fekauʼi. Pea neʼe foaki e Sesu kiā nātou ʼaia ia te ʼu fakatotonu ʼo ʼuhiga mo te fakahoko ʼo tanatou minisitelio pea neʼe ina fakahā age ia te ʼu fihifihia pea mo te ʼu fakataga ʼaē ka hoko anai kiā nātou. (Mateo 10:1-42; Luka 6:12-16) ʼI te ʼu taʼu e lua ʼaē neʼe hoa mai, neʼe nātou kaugā ʼolo mo Sesu ʼi tana ʼu fai faka mafola ʼi te fenua, pea ʼi te ʼu lakaga ʼaia neʼe nātou felogoi lelei mo ia. Neʼe nātou logo ki tana ʼu folafola, mo sio ki tana ʼu gāue mālohi pea mo tana faʼifaʼitaki lelei. (Mateo 13:16, 17) ʼE mahino ia, ohage ko te tagata fakatau koloā haʼele, ʼi te malave mālohi ʼo te ʼu meʼa fuli ʼaia kiā nātou, neʼe nātou faiga mālohi pea mo fakamalotoloto ʼi tanatou kumi ia te Puleʼaga.
15. Koteā ʼaē neʼe ʼui e Sesu ke fakafiafia tāfito kiai tana ʼu tisipulo?
15 ʼO hilifaki ki te toko 12 ʼapositolo, neʼe “hinoʼi e [Sesu] te tahi ʼu tisipulo e toko fitugofulu ʼo ina fekauʼi taki toko lua ia nātou, ke nātou muʼamuʼa ia te ia ʼo hū ki te ʼu kolo pea mo te ʼu koga meʼa fuli pe ʼaē neʼe ʼamanaki ke ʼalu tonu kiai.” Neʼe ina toe fakahā age foki ʼe hoko anai kiā nātou ia te ʼu ʼahiʼahi pea mo te ʼu fakataga, pea neʼe ina fakatotonu age ke nātou ʼui fēnei ki te hahaʼi: “Ko te Puleʼaga ʼo te ʼAtua kua fakaōvi mai kiā koutou.” (Luka 10:1-12, MN ) ʼI te liliu mai ʼa te toko 70 tisipulo, neʼe nātou fakafiafia pea neʼe nātou fakahā ia te meʼa ʼaenī kiā Sesu: “ ʼAliki, māʼia mo te kau temonio, kua nātou fakalogo kiā mātou mokā mātou fakaʼaogaʼi tou huafa.” Kae lagi neʼe nātou punamaʼuli, ʼi te fakahā age e Sesu ʼe nātou maʼu anai he toe fiafia lahi age ʼi te ka haʼu ʼuhi ko tanatou faʼafai ʼo ʼuhiga mo te Puleʼaga. Neʼe ina ʼui fēnei kiā nātou: “ ʼAua naʼa koutou fakafiafia ʼi te fakalogo atu ʼa te ʼu laumālie kiā koutou, kae ke koutou fakafiafia ʼi te kua tohi ʼo tokotou ʼu higoa ʼi te lagi.”—Luka 10:17, 20, MN.
16, 17. (a) ʼI te po fakaʼosi ʼa Sesu mo tana kau ʼapositolo agatonu, koteā ʼaē neʼe ina ʼui age kiā nātou? (b) ʼAki te ʼu palalau ʼa Sesu, koteā te fakapapau neʼe maʼu pea mo fiafia ai te kau ʼapositolo?
16 Pea ʼi te ʼaho 14 ʼo Nisani ʼo totatou temi, ʼi te po fakaʼosi ʼaē neʼe nofo ai Sesu mo te kau ʼapositolo, neʼe ina fai leva ia te toʼotoʼoga ʼaē ka liliu ko te Ōmoe ʼa Te ʼAliki pea neʼe ina fakatotonu ke nātou fakamanatuʼi ia te toʼotoʼoga ʼaia. Lolotoga te afiafi ʼaia, neʼe ʼui e Sesu ki te toko 11 ʼaē neʼe kau ai: “Ko koutou ia ʼaē neʼe nonofo fakatahi tuʼumaʼu mo au ʼi toku ʼu ʼahiʼahiʼi; pea ʼe au fai he fuakava mo koutou, ohage ko taku tāmai neʼe ina fai te fuakava mo au, ki he puleʼaga, koteʼuhi ke koutou kakai pea mo ʼiʼinu ʼi toku laupapa kai ʼi toku puleʼaga, pea mo koutou heheka ʼi he ʼu hekaʼaga faka hau moʼo fakamāuʼi te ʼu telepi ʼaē e hogofulu-ma-lua ʼo Iselaele.”—Luka 22:19, 20, 28-30, MN.
17 Neʼe lagi fiafia pea mo fīmālie ia te kau ʼapositolo ʼi tanatou logo ki te ʼu palalau ʼaia ʼa Sesu! Neʼe foaki age kiā nātou ia te toe pilivilesio lahi neʼe mole maʼu e te hahaʼi fuli. (Mateo 7:13, 14; 1 Petelo 2:9) Ohage ko te tagata fakatau koloā haʼele ʼaia, neʼe lahi te ʼu meʼa neʼe nātou situʼa kiai kae nātou muli ia Sesu ʼi tanatou fia kumi ia te Puleʼaga. Neʼe nātou ʼiloʼi papau ʼe mole ʼalunoa ia tanatou ʼu sākilifisio.
18. Ko ai niʼihi ake ʼi te toko 11 kau ʼapositolo ʼe nātou toe maʼu anai te ʼu fua lelei ʼo te Puleʼaga?
18 Ko te ʼu fua lelei ʼo te Puleʼaga neʼe mole faka tuʼakoi pe ki te ʼu ʼapositolo ʼaē neʼe nonofo mo Sesu ʼi te po ʼaia. He neʼe finegalo ia Sehova ke toko 144 000 ia te hahaʼi ʼaē ka nātou kau anai ki te fuakava ʼo te Puleʼaga, ke nātou kaugā hau mo Sesu Kilisito ʼi te Puleʼaga faka kolōlia ʼaē ʼe ʼi selo. Tahi ʼaē meʼa, neʼe sio ia Soane ki “te toe hahaʼi tokolahi, ʼe mole feala tona lau e he tahi . . . ʼe nātou tutuʼu iā muʼa ʼo te hekaʼaga faka hau pea iā muʼa ʼo te Akeno, . . . ʼo ʼui maʼa nātou: ‘Ko te fakamaʼuli, ʼe tou maʼu mai totatou ʼAtua, ʼaē ʼe ʼafio ʼi te hekaʼaga faka hau, pea mo te Akeno.’ ” Ko nātou ʼaia ʼaē ka nonofo ʼi te kele ʼo fakalogo ki te takitaki ʼa te Puleʼaga.b—Apokalipesi 7:9, 10; 14:1, 4, MN.
19, 20. (a) Koteā te faigamālie ʼe foaki ki te hahaʼi ʼo te ʼu puleʼaga fuli? (b) Koteā te fehuʼi ʼaē ka tou vakaʼi ʼi te alatike ka hoa mai?
19 ʼI muʼa pe ʼo te hake ʼa Sesu ki selo, neʼe ina fakatotonu ki tana kau tisipulo agatonu: “Koutou ʼolo pea ke koutou fai ni ʼu tisipulo ʼi te hahaʼi ʼo te ʼu fenua fuli pe, ʼo papitemaʼi ia nātou ʼi te huafa ʼo te Tāmai pea mo te ʼAlo pea mo te laumālie maʼoniʼoni, ʼo koutou ako ia nātou ke nātou mulimuli ki te ʼu meʼa fuli pe ʼaē neʼe au fakatotonu atu kiā koutou. Pea koʼeni, ʼe au nofo mo koutou ʼi te ʼaho fuli pe, ʼo kaku ki te fakaʼosi ʼo te tuʼu ʼo te ʼu faʼahiga meʼa ʼaenī.” (Mateo 28:19, 20, MN ) Koia, ko te hahaʼi mai te ʼu puleʼaga kehekehe ʼe nātou liliu anai ko ni ʼu tisipulo ʼa Sesu Kilisito. Ko te hahaʼi ʼaia ʼe nātou tuku anai ʼonatou loto ki te Puleʼaga—peʼe nātou ʼamanaki ke nātou māʼuʼuli ʼi selo peʼe ʼi te kele—ohage pe ko te meʼa ʼaē neʼe fai e te tagata fakatau koloā haʼele ʼo ʼuhiga mo te mataʼi tofe matalelei.
20 Neʼe ʼasi ʼi te ʼu palalau ʼa Sesu ko te fai ʼo ni ʼu tisipulo ʼe fai anai ʼo aʼu ki “te fakaʼosi ʼo te tuʼu ʼo te ʼu faʼahiga meʼa ʼaenī.” Koia ʼi te temi nei, ʼe kei ʼi ai koa ni ʼu hahaʼi ʼe hage ko te tagata fakatau koloā haʼele, ʼe nātou tali lelei ke nātou līaki ʼanatou meʼa fuli moʼo kumi ia te Puleʼaga ʼo te ʼAtua? ʼE tou vakaʼi anai ia te fehuʼi ʼaia ʼi te alatike ka hoa mai.
[Kiʼi nota]
a Ko te foha ʼo Sepeteo ia Soane, neʼe lagi mulimuli ia Sesu pea neʼe sio ki ʼihi gāue neʼe ina fai ʼi te hili ʼo tanatou ʼuluaki felāveʼi, koia ʼi tana Evaselio neʼe feala ai ke ina fakamatalatala fakalelei ia te ʼu gāue ʼaia. (Soane, kapite 2 ki te kapite 5) Kae iā muʼa ʼo tona toe fakaafe e Sesu, neʼe toe liliu ki tana gāue tautai faka famili.
b Kapau ʼe koutou fia maʼu he tahi ʼu fakamahino, koutou vakaʼi ʼi te kapite 10 ʼo te tohi Te ʼAtamai Mālama ʼAē ʼe Ina Taki Ki Te Maʼuli Heʼegata, ʼaē neʼe tā e te kau Fakamoʼoni ʼa Sehova.
ʼE Feala Koa Hakotou Fakamahino?
• Koteā te ako tāfito ʼaē ʼe tou tāʼofi ʼi te lea fakatātā ʼo te tagata fakatau koloā haʼele?
• Neʼe fakahā feafeaʼi e Sesu ia te maʼuhiga ʼaupito ʼo te Puleʼaga?
• He koʼe neʼe foimo tali atu aipe te fakaafe ʼa Sesu e Atelea, mo Petelo, mo Soane, pea mo ʼihi age?
• Koteā te faigamālie taulekaleka ʼe foaki ki te hahaʼi ʼo te ʼu puleʼaga fuli?
[Paki ʼo te pasina 10]
‘Neʼe nātou līaki ia meʼa fuli kae nātou mulimuli ia Sesu’
[Paki ʼo te pasina 12]
ʼI muʼa ʼo tana hake ki selo, neʼe fakatotonu e Sesu ki tana ʼu tisipulo ke nātou fai ni ʼu tisipulo