Koutou Haga Kumi Ia ʼAho Nei Ia Te ‘Mataʼi Tofe Maʼuhiga ʼAupito’
“[ʼE] fagonogono anai te Logolelei aeni o te Puleaga ki te kelekele katoa.”—Mateo 24:14.
1, 2. (a) ʼI te temi ʼo Sesu, neʼe koteā te manatu ʼa te kau Sutea ʼo ʼuhiga mo te Puleʼaga ʼo te ʼAtua? (b) Koteā ʼaē neʼe foaki e Sesu moʼo fakamahino lelei ia te Puleʼaga, pea neʼe koteā tona ʼu fua?
KO TE Puleʼaga ʼo te ʼAtua neʼe maʼuhiga ʼaupito ki te kau Sutea ʼi te temi ʼaē neʼe haʼu ai Sesu ki te kele. (Mateo 3:1, 2; 4:23-25; Soane 1:49) Kae ʼi te kamata, tokolahi ia nātou neʼe mole nātou mahino kātoa pe feafeaʼi anai ia tana pule; pea neʼe mole nātou mahino ko te puleʼaga ʼe tuʼu anai ʼi selo. (Soane 3:1-5) Māʼiape la mo te ʼu tisipulo ʼa Sesu neʼe mole nātou mahino lelei pe koteā te Puleʼaga ʼo te ʼAtua pea mo te ʼu gāue ʼaē ke nātou fai moʼo maʼu ia te tapuakina ʼi tanatou kaugā hau mo Kilisito.—Mateo 20:20-22; Luka 19:11; Gaue 1:6.
2 ʼAki te temi, neʼe lahi te ʼu ako neʼe fakamahino māmālie e Sesu ki tana kau tisipulo, ohage ko te lea fakatātā ʼo te mataʼi tofe maʼuhiga ʼaupito ʼaē neʼe tou talanoa kiai ʼi te alatike kua ʼosi, pea neʼe ina fakahā kiā nātou ia te maʼuhiga ke nātou haga kumi ia te Puleʼaga ʼaē ʼe ʼi selo. (Mateo 6:33; 13:45, 46; Luka 13:23, 24) Neʼe lagi malave mālohi ia te faʼahi ʼaia ki ʼonatou loto, heʼe mole faʼa fualoa kiai, neʼe nātou liliu ko te kau fai faka mafola mālohi pea mo lototoʼa ʼo te logo lelei ʼo te Puleʼaga ʼo aʼu ki te ʼu potu taupotu ʼo te kele, ohage ko te ʼu tuʼuga fakamoʼoni ʼaē ʼe tou maʼu ʼi te tohi ʼo Gaue.—Gaue 1:8; Kolose 1:23.
3. ʼO ʼuhiga mo totatou temi, koteā ʼaē neʼe ʼui e Sesu ʼo ʼuhiga mo te Puleʼaga?
3 E feafeaʼi ia ʼaho nei? ʼAki ia te takitaki ʼa te Puleʼaga, neʼe faka mafola ki te ʼu toko lauʼi miliona hahaʼi ia te ʼu tapuakina ʼo te palatiso ʼi te kele. ʼI tana lea faka polofeta maʼuhiga ʼo ʼuhiga mo “te fakaʼosi ʼo te tuʼu ʼo te ʼu faʼahiga meʼa ʼaenī,” neʼe tala fakalelei e Sesu: “Ko te logo lelei ʼaenī ʼo te puleʼaga ʼe faka mafola anai ʼi te kele kātoa, ko he meʼa fakamoʼoni ia ki te ʼu puleʼaga kātoa; pea hoko mai ai leva te fakaʼosi.” (Mateo 24:3, 14, MN; Maleko 13:10) Pea neʼe ina toe fakahā, ko te gāue lahi ʼaia ʼe fakahoko anai logola te ʼu fihifihia lahi pea mo te ʼu ʼahiʼahi, pea mo te ʼu fakataga. Kae neʼe ina fai mo te fakapapau ʼaenī: “Ko ae e kataki anai ki te gataʼaga, e mauli anai.” (Mateo 24:9-13) Pea ki te ʼu faʼahi fuli ʼaia, ʼe fakamaʼua ia te faʼahiga maʼuli faka sākilifisio ʼaē neʼe fai e te tagata fakatau koloā haʼele ʼo te lea fakatātā ʼa Sesu. ʼI te temi nei, ʼe ʼi ai koa ni ʼu hahaʼi ʼe nātou fakahā ia te taʼi tui pea mo faʼafai ʼaia moʼo kumi ia te Puleʼaga?
Te Fiafia ʼi Te Maʼu ʼo Te Moʼoni
4. ʼE malave feafeaʼi ia te moʼoni ʼo te Puleʼaga ki te hahaʼi ia ʼaho nei?
4 ʼI te lea fakatātā ʼa Sesu, neʼe fiafia ʼaupito ia te tagata fakatau koloā ʼi tana maʼu ia te meʼa ʼaē neʼe ina faka ʼuhigaʼi ʼe ko he “mataʼi tofe maʼuhiga lahi.” Pea ʼaki tana fiafia neʼe ina fai ia meʼa fuli ʼe ina lavaʼi moʼo maʼu ia te mataʼi tofe. (Hepeleo 12:1) Ia ʼaho nei, ʼe toe fia logo te hahaʼi ki te moʼoni ʼo ʼuhiga mo te ʼAtua pea mo tona Puleʼaga pea ʼe ina fakaloto mālohiʼi nātou. Pea ki te faʼahi ʼaia, ʼe tou manatuʼi te ʼu palalau neʼe fai e te Tēhina ko A. H. Macmillan ʼi te tohi Faith on the March (Ko he tui ʼe maʼuli) ʼo ʼuhiga mo tana kumi ia te ʼAtua pea mo Tana fakatuʼutuʼu ki te malamanei. Neʼe ina ʼui fēnei: “Neʼe au maʼu te meʼa ʼaē ʼe maʼu e te ʼu toko lauʼi afe hahaʼi ʼi te taʼu fuli. Ko te hahaʼi pe ohage ko koutou pea mo au, ʼe ʼōmai mai te ʼu puleʼaga kehekehe, mo te ʼu lanu kehekehe, pea mo te ʼu ʼaluʼaga kehekehe, pea mo te ʼu taʼu kehekehe. Ko te moʼoni ʼe mole fakapalatahi, pea ʼe ʼaoga ki te hahaʼi fuli.”
5. Koteā te ʼu fua lelei neʼe tou sio kiai ʼi te tānaki gāue ʼo te taʼu 2004?
5 Ko te ʼu palalau ʼaia ʼe hoko moʼoni heʼe ʼi te taʼu fuli neʼe foaki e te ʼu toko lauʼi teau afe hahaʼi agatonu ia tonatou maʼuli kiā Sehova pea mo fai ia tona finegalo ʼuhi ko te logo lelei ʼo te Puleʼaga ʼo te ʼAtua. Neʼe hoko ia te meʼa feiā ʼi te taʼu gāue 2004, ʼaē neʼe kamata mai te māhina ʼo Sepetepeli ʼo te taʼu 2003 ʼo aʼu ki te māhina ʼo ʼAukusitō 2004. ʼI te ʼu māhina ʼaia e 12, neʼe fakahā e te hahaʼi e toko 262 416 iā muʼa ʼo te kaugamālie kua nātou foaki tonatou maʼuli kiā Sehova ʼo nātou papitema ʼi te vai. Neʼe hoko te faʼahi ʼaia iā fenua e 235, pea ko te kau Fakamoʼoni ʼa Sehova ʼe nātou fai ʼi te vāhaʼa fuli ia te ʼu ako Tohi-Tapu e 6 085 387 moʼo tokoni ki te hahaʼi mai te ʼu ʼaluʼaga kehekehe, mo te ʼu puleʼaga kehekehe, pea mo te ʼu lea kehekehe ke nātou maʼu ia te moʼoni ʼo te Folafola ʼa te ʼAtua, ʼaē ʼe ina foaki ia te maʼuli.—Apokalipesi 7:9.
6. Koteā ʼaē ʼe ʼasi mai ʼi te tuputupu ʼaē ʼe hoko tuʼumaʼu lolotoga te ʼu taʼu?
6 Koteā ʼaē ʼe ina faka fealagia ia te ʼu meʼa fuli ʼaia? ʼE mahino papau ia ʼe ko Sehova ʼaē ʼe ina taki mai kiā te ia ia te hahaʼi ʼaē ʼe lotolelei. (Soane 6:65; Gaue 13:48) Kae ʼaua naʼa tou meʼa noaʼi ia te ʼu sākilifisio pea mo te faʼafai ʼa te hahaʼi ʼaē neʼe nātou haga kumi ia te Puleʼaga. ʼI te taʼu 79 ʼo te Tēhina ko Macmillan, neʼe ina ʼui fēnei: “Talu mai te temi ʼaē neʼe au ʼuluaki logo ai ki te ʼu fakapapau ʼo ʼuhiga mo te fakafimālie ʼo te mahaki pea mo te fakatuʼuake mai te mate, mole heʼeki galo ia au te falala ʼaia ʼo te Tohi-Tapu. ʼI te temi ʼaia, neʼe au fakatotonu ke lahi age ia taku mahino ki te Tohi-Tapu ke feala haku tokoni ki te hahaʼi ʼaē ʼe hage ko au ʼe nātou kumi ia te ʼatamai mālama ʼo ʼuhiga mo te ʼAtua māfimāfi ko Sehova, pea mo tana ʼu fakatuʼutuʼu lelei ʼo ʼuhiga mo te malamanei.”
7. Koteā te meʼa neʼe hoko ʼe hā ai ia te fiafia pea mo te faiga mālohi ʼa te hahaʼi ʼaē ʼe nātou maʼu ia te moʼoni ʼo te Tohi-Tapu?
7 Ko te faiga mālohi ʼaia neʼe toe hā ʼi te kau kaugana ʼa Sehova ʼo te temi nei. Ohage ko te tuagaʼane ko Daniela, mai Vienne, ia te kolo ʼo te fenua ʼo Otilisia. Neʼe ina ʼui fēnei: “Talu mai taku kei veliveli, ko te ʼAtua neʼe ko toku kaumeʼa lelei. Neʼe au fia mahino tuʼumaʼu ki tona huafa heʼe kiā au ko te kupu ‘ ʼAtua’ neʼe mole ʼi ai hona ʼuhiga kiā au. Pea ʼi toku taʼu 17, neʼe au mahino leva kiai ʼi te temi ʼaē neʼe ʼōmai ai te kau Fakamoʼoni ʼa Sehova ʼo fisifisi ʼi toku matapā. Neʼe nātou fakamahino mai ia meʼa fuli neʼe au fia ʼiloʼi ʼo ʼuhiga mo te ʼAtua. Pea neʼe au maʼu ai leva ia te moʼoni, pea neʼe ko he meʼa taulekaleka! ʼI te lahi ʼo toku fiafia neʼe au kamata fagonogono ki te hahaʼi fuape.” Mole tuai, pea vāʼi tana fiafia ʼaia e tona ʼu kaugā ako. Neʼe toe ʼui e Daniela: “Kae kiā au, kua hoko ia te lea faka polofeta ʼa te Tohi-Tapu, koteʼuhi neʼe au ʼiloʼi neʼe ʼui e Sesu ki tana kau tisipulo ʼe fehiʼaʼinaʼi anai nātou pea mo fakatagaʼi anai nātou ʼuhi pe ko tona huafa. Koia neʼe au fiafia ʼaupito pea mo ʼofolele ʼi te hoko ʼo te faʼahi ʼaia.” Mole tuai, pea neʼe foaki e Daniela ia tona maʼuli kiā Sehova, neʼe papitema, pea neʼe ina kamata tana selevisi misionea. ʼI tana ʼosi ʼohoana, ko Daniela pea mo tona ʼohoana ko Helmut, neʼe nā kamata faka mafola ʼi Vienne ki te kau Afelika, mo te kau Siaina, mo te kau Filipine, pea mo te kau Initia. ʼI te temi nei, ʼe misionea ia Daniela pea mo Helmut ʼi te potu saute-uesite ʼo Afelika.
ʼE Mole Nātou Fia Tuku Tanatou Gāue
8. Koteā ia te gāue maʼuhiga ʼaē neʼe fakahā ai e te tokolahi ia tonatou ʼofa ʼaē ki te ʼAtua pea mo tanatou agatonu ki tona Puleʼaga?
8 Ko te seIevisi misionea ʼe ko he tahi ʼaia gāue ʼe fakahā ai e te hahaʼi ʼa Sehova ia tonatou ʼofa ki te ʼAtua pea mo tanatou agatonu ki tona Puleʼaga. Ohage ko te tagata fakatau koloā ʼo te lea fakatātā ʼa Sesu, ko te ʼu tēhina mo tuagaʼane ʼaē ʼe nātou toʼo ia te selevisi ʼaia, ʼe nātou lotolelei ke nātou ʼolo ki te ʼu potu mamaʼo ʼuhi pe ko te Puleʼaga. ʼE mahino ia, ko te ʼu misionea ʼaia ʼe mole nātou folau ʼo kumi ia te logo lelei ʼo te Puleʼaga, kae ʼe nātou ʼolo ʼo kumi ia te hahaʼi ʼaē ʼe nonofo ʼi te ʼu potu mamaʼo ʼo te kele, ke nātou akoʼi pea mo tokoniʼi nātou ke nātou liliu ko ni ʼu tisipulo ʼa Sesu Kilisito. (Mateo 28:19, 20) ʼE lahi te ʼu fenua, ko te ʼu misionea neʼe nātou kātakiʼi ia te ʼu fakataga lahi, pea neʼe fakapale ʼaupito tanatou faʼa kātaki ʼaia.
9, 10. ʼI te ʼu potu mamaʼo ohage ko te Lepupilika Centrafricaine, koteā te ʼu meʼa fakaofoofo neʼe hoko ki te kau misionea?
9 Tou toʼo te faʼifaʼitaki ʼi te République Centrafricaine, ʼi te taʼu kua ʼosi neʼe ko te toko 16 184 hahaʼi neʼe kau ki te ʼAho Fakamanatu ʼo te mate ʼo Kilisito, ʼe teitei ko te tuʼa fitu ʼo te lahi ʼo te kau fai faka mafola ʼo te Puleʼaga ʼo te fenua ʼaia. ʼE mole hila te ʼu kolo fuli, koia ʼi te agamāhani ko te hahaʼi ʼe nātou fai tanatou ʼu gāue ʼi tuʼa ʼi te ʼu lalo fuʼu ʼakau. Pea kua māhani pe kiai ia te kau misionea—heʼe ko tanatou ʼu ako Tohi-Tapu ʼe nātou fai ʼi te ʼu lalo fuʼu ʼakau. ʼE mole gata pe te lelei ʼo te ʼu faʼahiga faiako ʼaia, ʼuhi ko te mālamagia pea mo te mokomoko, kae ʼe ʼi ai tona tahi lelei, heʼe ko te hahaʼi ʼe nātou leleiʼia ʼaupito ia te Tohi-Tapu, pea mo te ʼu fai palalau faka lotu. Ko te meʼa ʼaē ʼe tautau hoko, ka fakalaka te hahaʼi pea nātou sisio ki te ʼu ako, pea nātou ʼolo ʼo kau ai.
10 Koia, ʼi te tahi ʼaho neʼe fai ai e te misionea ia tana ako Tohi-Tapu ʼi tuʼa, ko te tūpulaga neʼe nofo ʼi te tahi kauʼala neʼe fakaōvi age kiā ia ʼo ina ʼui age kua fualoa tana mole heʼeki toe fai palalau mo he Fakamoʼoni, pea neʼe ina kole ki te misionea ke ʼalu age ki tona ʼapi ʼo fai hana ako Tohi-Tapu. Neʼe tali e te misionea ia tana kole, pea mole tuai ia te tuputupu ʼa te tūpulaga. ʼI te fenua ʼaia, ko he agamāhani ʼa te kau polisi te fakatuʼu ʼo te kau Fakamoʼoni ʼi te ala, mole ʼuhi ko hanatou fia tāʼofi ia tanatou fai faka mafola peʼe ko he fakatūʼā ʼo nātou, kae ʼe nātou fakatuʼu moʼo kole age ia te ʼu nusipepa foʼou ʼo Te Tule Leʼo pea mo te Réveillez-vous !, peʼe nātou fakamālo age ʼo ʼuhiga mo he alatike neʼe nātou leleiʼia ʼaupito.
11. Logola te ʼu faigataʼaʼia, kae koteā ʼaē ʼe ʼui e te kau misionea ʼaē kua fualoa tanatou gāue, ʼo ʼuhiga mo tanatou selevisi?
11 Ko te tokolahi ʼo te kau misionea ʼaē neʼe nātou kamata ia tanatou gāue kua hili nei kiai taʼu e 40 peʼe 50, ʼe kei nātou agatonu aipe ʼi tanatou selevisi. ʼE ko he faʼifaʼitaki maʼa tatou fuli ʼo ʼuhiga mo te tui pea mo te faʼa kātaki! Kua hili nei kiai taʼu e 42 tupu, ko te taumatuʼa neʼe misionea ʼi te ʼu fenua kehekehe e tolu. ʼE ʼui fēnei e te tagata: “Neʼe ʼi ai tomā ʼu fihifihia. Ia taʼu e 35 neʼe ma kau ʼi te mahaki ʼaē ko te malaria. Kae logola ia te faʼahi ʼaia, neʼe mole ʼi ai he temi neʼe ma fakahemala ai ʼi tamā filifili ʼaē ke ma misionea.” ʼE toe ʼui fēnei e tona ʼohoana: “ ʼE lahi tuʼumaʼu pe ia te ʼu meʼa ke ma loto fakafetaʼi ai. ʼE haʼele lelei ia te fai faka mafola, pea ʼe faigafua ia te kamata ʼo te ʼu ako Tohi-Tapu. Ka koutou sisio ʼe ʼōmai ia te kau ako ki te ʼu fono pea mo tanatou faiga ʼaē ke nātou feʼiloʼiʼaki, ʼe hage pe ʼi te ʼu lakaga ʼaia ʼe ko he foʼi famili ʼaē ʼe fakatahitahi.”
ʼE Nātou “Lau Ko Meafuape e Alunoa”
12. ʼE fakahā feafeaʼi e he tahi ʼe ina leleiʼia moʼoni ia te maʼuhiga ʼo te Puleʼaga?
12 ʼI te temi pe ʼaē neʼe maʼu ai e te tagata fakatau koloā haʼele ia te mataʼi tofe maʼuhiga ʼaupito, “neʼe ʼalu ia ʼo foimo fakatau ʼana meʼa fuli pea ina totogi ai te mataʼi tofe.” (Mateo 13:46, MN ) Ko te hahaʼi ʼaē ʼe nātou leleiʼia moʼoni ia te maʼuhiga ʼo te Puleʼaga, neʼe nātou līaki atu aipe ia meʼa fuli ʼaē neʼe lagi maʼuhiga kiā nātou. Ko te ʼapositolo ko Paulo, ʼaē neʼe ina maʼu ia te pilivilesio ke kau mo Kilisito ki te kolōlia ʼo te Puleʼaga, neʼe ina ʼui fēnei: “Io, e au lau ko meafuape e alunoa uhi ko te mauhiga o te iloi o Kilisito Sesu toku Aliki, uhi ko ia, kuʼau sakilifisioʼi ia meafuape, o au lau ko meafuape aia e ko te otaota, koteuhi ke au mau ia Kilisito.”—Filipe 3:8.
13. ʼI te Lepupilika Tchèque, neʼe fakahā feafeaʼi e te tagata pule faiako ia tana leleiʼia ʼaupito ia te Puleʼaga?
13 ʼO toe feiā pe mo te temi nei, tokolahi ʼe nātou fai ia te ʼu fetogi lahi ʼi tonatou maʼuli ʼuhi ko te ʼu tapuakina ʼo te Puleʼaga. Ohage la ʼi te māhina ʼo ʼOketopeli 2003, ʼi te faleako ʼi te Lepupilika Tchèque, ko te tagata pule ʼo te faleako kua taʼu 60 neʼe ina maʼu ia te tohi ako Te ʼAtamai Mālama ʼAē ʼe Ina Taki Ki Te Maʼuli Heʼegata. ʼI tana ʼosi lau ia te tohi, neʼe faiga atu aipe ke felāveʼi mo te kau Fakamoʼoni ʼa Sehova ʼo tona kolo ke fai hana ako Tohi-Tapu. Neʼe tuputupu ʼi te faʼahi fakalaumālie pea mole tuai neʼe kau ki te ʼu fono fuli. Neʼe feafeaʼi ʼo ʼuhiga mo tana ʼu fakatuʼutuʼu ʼaē ke kau ia nātou ʼaē ʼe fili ke pule kolo pea ki muli age ke kau ia nātou ʼaē ʼe fili ke senatea? Neʼe ina fili ia te tahi fakatuʼutuʼu—ke liliu ko he kaugā fagona ʼo te Puleʼaga. Neʼe ina ʼui fēnei: “Neʼe lahi te ʼu tohi faka Tohi-Tapu neʼe au tuku ki taku kau ako.” Pea ʼi te fakatahi lahi ʼi Sūlio 2004 neʼe ina foaki ai leva tona maʼuli kiā Sehova ʼaki te papitema.
14. (a) Koteā ʼaē neʼe fai e te ʼu lauʼi miliona hahaʼi ʼi tanatou ʼosi maʼu ia te logo lelei ʼo te Puleʼaga? (b) Koteā te ʼu fehuʼi ʼe matatonu ke tou lagaʼi takitokotahi?
14 ʼI te malamanei kātoa ko te ʼu toko lauʼi miliona hahaʼi neʼe nātou tali mo nātou ia te logo lelei ʼo te Puleʼaga. Neʼe nātou mavae mai te mālama agakovi, neʼe nātou huʼi tonatou ulugaaga ʼāfea, neʼe nātou mavae mai tonatou ʼu fakakaugā ʼāfea, pea neʼe nātou līaki tanatou faiga ki te ʼu koloā fakamālama. (Soane 15:19; Efeso 4:22-24; Sakopo 4:4; 1 Soane 2:15-17) He koʼe neʼe nātou fai ia te ʼu meʼa fuli ʼaia? Koteʼuhi ʼe maʼuhiga age kiā nātou ia te ʼu tapuakina ʼo te Puleʼaga ʼo te ʼAtua ʼi te ʼu meʼa ʼaē ʼe feala ke nātou maʼu ʼi te tuʼu ʼaenī. ʼE koutou manatu feiā koa ʼo ʼuhiga mo te logo lelei ʼo te Puleʼaga? Ko te logo lelei ʼo te Puleʼaga, ʼe ina uga koa koutou ke koutou faka ʼalutahi mo te finegalo ʼo te ʼAtua ia tokotou maʼuli, mo te ʼu meʼa ʼaē ʼe koutou faka maʼuhigaʼi, mo takotou ʼu fakatuʼutuʼu? Kapau ʼe koutou fai feiā, ʼe koutou maʼu anai ia te ʼu tapuakina lahi ʼi te temi nei pea mo te ka haʼu.
Ko Te Taʼukai Kua Aʼu Ki Tona Fakaʼosi
15. Koteā ʼaē neʼe fakakikite ʼe fakahoko anai e te hahaʼi ʼa te ʼAtua ʼi te ʼu ʼaho fakaʼosi?
15 Neʼe tohi fēnei e te tagata fai pesalemo: “Ko tau hahaʼi ʼe nātou foaki fakamalotoloto anai ia nātou ʼi te ʼaho ʼo tou ʼu mālohi faka solia.” ʼE kau ai ia te “kau tūpulaga [ʼaē ʼe nātou hage] ko he ʼu mosiʼi hahau,” pea mo te ‘foʼi kautau lahi fafine ʼaē ʼe nātou fagonogono ia te logo lelei.’ (Pesalemo 68:11; 110:3) ʼI te ʼu ʼaho fakaʼosi ʼaenī, neʼe koteā te ʼu fua ʼo te faʼafai pea mo te maʼuli faka sākilifisio ʼa te hahaʼi ʼa Sehova —tagata mo fafine, tūpulaga mo mātutuʼa?
16. Koutou tuku mai he faʼifaʼitaki, pe koteā ʼaē neʼe fai e te ʼu kaugana ʼa te ʼAtua moʼo tokoni ki te hahaʼi ke nātou mahino ki te Puleʼaga.
16 ʼI Initia, ko te pionie temi kātoa ʼo te Puleʼaga, neʼe fia tokoni ki te kau tuli e lauʼi miliona tupu ʼo te fenua ke nātou mahino ki te Puleʼaga. (Isaia 35:5) Neʼe ina fakatuʼutuʼu ke ina ako i Bangalore ia te lea ʼa te kau tuli. Pea neʼe hoki feala ai leva ke ina faka mafola ki te kau tuli e tokolahi ia te ʼamanaki ʼo te Puleʼaga, pea mo fai ia te ʼu ako Tohi-Tapu. Hili pe te ʼu kiʼi vāhaʼa, ko te toko hogofulu tupu neʼe ʼōmai ki te ʼu fono ʼi te Fale ʼo Te Puleʼaga. Ki muli age, ʼi te fai ʼohoana neʼe felāveʼi ia te pionie mo te tama tuli mai Calcutta pea neʼe lahi tana ʼu fehuʼi, pea neʼe lahi te ʼu meʼa neʼe fia mahino kiai ʼo ʼuhiga mo Sehova. Kae neʼe ʼi ai te fihifihia he neʼe tonu ki te tama ʼaia ke toe liliu ki Calcutta, ʼaē ʼe mamaʼo ia kilometa e 1 600, ko te hū ako ʼi te kolesio, pea neʼe mole ʼi ai he Fakamoʼoni ʼa Sehova ʼi Calcutta neʼe ina ʼiloʼi ia te lea ʼa te kau tuli. Kae ʼaki tana kole mālohi ki tana tāmai ke ʼalu ʼo ako ʼi Bangalore, neʼe feala ai leva ke hoko atu ia tana ako Tohi-Tapu. Neʼe tuputupu ʼi te faʼahi fakalaumālie, pea hili kiai te taʼu kātoa, neʼe ina foaki tona maʼuli kiā Sehova. Pea ʼi te temi nei, ko ia ʼaē kua ina akoʼi ki ʼihi kau tuli ia te Tohi-Tapu, pea neʼe kau ai tona kaumeʼa ʼi tanā kei liliki. Kua fakatuʼutuʼu e te filiale ke ʼi ai he kau pionie ʼe nātou ako te lea ʼa te kau tuli moʼo tokoni ki te hahaʼi ʼo te telituale ʼaia.
17. ʼI te pasina 19 ki te 22, koutou fakahā te meʼa ʼaē neʼe ina fakaloto mālohiʼi koutou ʼi te tānaki gāue ʼo te taʼu gāue 2004.
17 ʼI te pasina 19 ki te 22 ʼo te nusipepa ʼaenī, ʼe koutou maʼu anai ia te tānaki gāue ʼo te gāue fai faka mafola ʼa te kau Fakamoʼoni ʼa Sehova ʼo te taʼu gāue 2004. Koutou vakavakaʼi ia te tānaki ʼaia, pea ʼe koutou mahino ai leva ko te hahaʼi ʼa Sehova ʼo te malamanei kātoa ʼe nātou tōkakaga moʼoni ʼi te temi nei ʼo kumi ia te ‘mataʼi tofe maʼuhiga ʼaupito.’
Koutou “Fua Kumi Te Puleʼaga”
18. Koteā te faʼahi ʼaē neʼe mole talanoa kiai Sesu ʼi te lea fakatātā ʼo te tagata fakatau koloā haʼele, pea koteā tona tupuʼaga?
18 Kapau ʼe tou toe vakaʼi ia te lea fakatātā ʼa Sesu ʼo te tagata fakatau koloā haʼele, ʼe tou fakatokagaʼi ko Sesu neʼe mole talanoa ki te maʼuli ʼo te tagata fakatau koloā ʼi tana ʼosi fakatau ʼana meʼa. Koia ʼe feala pe ke ʼui fēnei e ʼihi: ‘Ko te tagata fakatau koloā ʼaia, ʼe ina maʼu feafeaʼi anai hana meʼa kai, mo hona meʼa vala, pea mo hona ʼapi heʼe mole kei ʼi ai hona ʼu koloā? Koteā anai te ʼuhiga ʼo te mataʼi tofe matalelei ʼaia kiā ia?’ ʼI te sio fakatagata ʼe ko he ʼu fehuʼi lelei. Kae ko Sesu neʼe mole ina fai koa ia te fakaloto mālohi ʼaenī ki tana ʼu tisipulo: “Kae koutou fua kumi te Puleaga o Selo mo tana susitisia pea e foaki atu anai kia koutou ia meafuape alâ”? (Mateo 6:31-33) Koʼeni te puani tāfito ʼo te lea fakatātā: ke kita pipiki ʼāteaina ki te ʼAtua pea mo gāue mālohi ki te Puleʼaga. ʼE ʼi ai koa he ako kiā tatou?
19. Koteā te puani maʼuhiga ʼaē ʼe tou lava ako ʼi te lea fakatātā ʼa Sesu ʼo ʼuhiga mo te mataʼi tofe maʼuhiga ʼaupito?
19 Peʼe mole heʼeki fualoa ia tatatou ako ia te logo lelei taulekaleka peʼe kua lauʼi taʼu tatatou kumi ia te Puleʼaga pea mo tala tana ʼu tapuakina ki te hahaʼi, ʼe tonu ke tou tōkakaga tuʼumaʼu ki te ʼu meʼa ʼo te Puleʼaga. ʼI te ʼu temi faigataʼa ʼaenī, tou tui papau ko te meʼa ʼaē ʼe tou haga kumi ʼe moʼoni tokotahi—ohage pe ko te mataʼi tofe ʼaē neʼe maʼu e te tagata fakatau koloā. ʼE tou māʼuʼuli nei ʼi “te fakaʼosi ʼo te tuʼu ʼo te ʼu faʼahiga meʼa ʼaenī,” ʼuhi ko te ʼu meʼa ʼaē ʼe hoko ʼi te malamanei pea mo te ʼu lea faka polofeta faka Tohi-Tapu ʼaē kua hoko. (Mateo 24:3, MN ) Koia ohage pe ko te tagata fakatau koloā haʼele, tou gāue mo totatou loto kātoa maʼa te Puleʼaga ʼo te ʼAtua pea mo tou fakahā fakafiafia ia te logo lelei.—Pesalemo 9:1, 2.
ʼE Kei Koutou Manatuʼi Koa?
• Lolotoga ia te ʼu taʼu, koteā ʼaē neʼe tupu ai te tuputupu ʼa te kau atolasio moʼoni?
• Neʼe feafeaʼi ia te kau misionea ʼo ʼuhiga mo tanatou selevisi?
• Koteā te ʼu fetogi ʼaē neʼe fai e ʼihi ʼuhi ko te logo lelei ʼo te Puleʼaga?
• Koteā te ako maʼuhiga ʼe tou lava maʼu mai te lea fakatātā ʼa Sesu ʼo ʼuhiga mo te mataʼi tofe maʼuhiga ʼaupito?
[Paki ʼo te pasina 14]
“Ko te moʼoni . . . ʼe fia logo kiai ia te hahaʼi fuli.”—A. H. Macmillan
[Paki ʼo te pasina 15]
Ko Daniela pea mo Helmut neʼe nā fai faka mafola ʼi Vienne ʼi te tahi lea
[Paki ʼo te pasina 16]
Ohage ko te tagata fakatau koloā haʼele, ʼe lahi te fakapale ʼo te kau misionea ia ʼaho nei
[Paki ʼo te pasina 17]
“Ko tau hahaʼi ʼe nātou foaki fakamalotoloto anai ia nātou”