‘Koutou Lolomi Ia Koutou ʼi Te Kovi’
“Ko he kaugana ʼa te ʼAliki ʼe mole tonu ke fekēʼaki mo he tahi, kae ʼe tonu ke agamālū ki te hahaʼi fuli, . . . pea mo lava lolomi ʼo ia ʼi te kovi.”—2 Timoteo 2:24, MN.
1. Ka koutou fakahoko takotou gāue faka Kilisitiano, he koʼe ʼe koutou felāveʼi ʼi ʼihi temi mo he ʼu hahaʼi ʼe palalau kovi atu?
ʼE KOUTOU feafeaʼi mokā koutou felāveʼi mo he ʼu hahaʼi ʼe ʼiʼita atu kiā koutou peʼe ki te meʼa ʼaē ʼe koutou palalau age kiā nātou? ʼI tana fakamatala ʼo ʼuhiga mo te ʼaluʼaga ʼo te ʼu ʼaho fakaʼosi, neʼe fakakikite e te ʼapositolo ko Paulo ko te hahaʼi ʼe nātou “lea hala [anai] ki te ʼAtua, . . . fasituʼu, heʼe fakatatāʼofi, fekai.” (2 Timoteo 3:1-5, 12, MN ) ʼE lagi koutou felāveʼi mo ni ʼu hahaʼi feiā ʼi takotou minisitelio peʼe ʼi hakotou tahi ʼu gāue.
2. Ko te ʼu vaega Tohi-Tapu fea ʼaē ʼe feala ke tokoni mai kiā tatou ke tou aga fakapotopoto ki te hahaʼi ʼaē ʼe palalau kovi mai kiā tatou?
2 Mole faka ʼuhiga leva ko te hahaʼi fuli ʼaē ʼe palalau kovi ʼe mole nātou loto ki te faitotonu. Neʼe lagi lahi tanatou lotomamahi peʼe ko hanatou ʼiʼita, ʼo tupu ai tanatou palalau kovi ki he tahi ʼi ʼonatou tafaʼaki. (Tagata Tānaki 7:7) ʼE feiā te aga ʼa te tokolahi, heʼe nātou māʼuʼuli pea mo gāue ʼi he potu ʼe nātou logo tuʼumaʼu ai ki he ʼu palalau kovi. ʼE mole liliu leva te faʼahiga palalau ʼaia ko he meʼa ʼe tou tali e tatou kau Kilisitiano, kae ʼe tokoni mai kiā tatou ke tou mahino pe koʼe ʼe palalau feiā te hahaʼi. ʼE tonu ke tou tali feafeaʼi ki he tahi ʼe palalau kovi mai kiā tatou? ʼE ʼui fēnei iā Tāʼaga Lea 19:11: “Ko te fakasiosio poto ʼa he tagata, ʼe mahino ia ʼe ina fakatuai tona ʼita.” ʼE tokoni fēnei mai kiā tatou iā Loma 12:17, 18 (MN ): “ ʼAua naʼa koutou liufaki ki he tahi te kovi ʼaki te kovi. . . . Kapau ko he meʼa ʼe feala, tāfito mo kapau ko he meʼa ʼe fakalogo kiā koutou, koutou māʼuʼuli ʼi te tokalelei mo te tagata fuape.”
3. ʼE hā feafeaʼi te tokalelei ʼi te logo ʼaē ʼe tou faka mafola?
3 Kapau ʼe tou kumi moʼoni te tokalelei, pea ʼe hā anai te faʼahi ʼaia ʼi tatatou aga. ʼE hā anai ʼi tatatou ʼu palalau pea mo tatatou ʼu gāue, pea ʼe feala foki ke hā ʼi totatou fofoga pea mo totatou leʼo. (Tāʼaga Lea 17:27) ʼI tana fekauʼi tana kau ʼapositolo ke nātou ʼolo ʼo fai faka mafola, neʼe foaki e Sesu te tokoni ʼaenī kiā nātou: “ ʼI takotou hū ki te loto fale, koutou fakaʼalofa ki ʼona hahaʼi [“koutou kole ke haʼu te tokalelei ki te loto fale,” The New English Bible]; pea kapau ʼe tāu mo te ʼapi, pea ke haʼu kiā te ia te tokalelei ʼaē ʼe koutou fakaʼamu ke ina maʼu; kae kapau leva ʼe mole tāu mo ia, pea ke toe liliu mai takotou tokalelei kiā koutou.” (Mateo 10:12, 13, MN ) Ko te logo ʼaē ʼe tou tala ʼe ko he logo lelei. ʼE fakahigoaʼi ʼi te Tohi-Tapu ko “te logo lelei ʼo te tokalelei,” “te logo lelei ʼo te ʼofa makehe ʼa te ʼAtua,” pea mo te “logo lelei . . . ʼo te puleʼaga.” (Efeso 6:15; Gaue 20:24; Mateo 24:14, MN ) ʼE mole tou fia fatufatuʼi te tui ʼa he tahi, peʼe tou fihi mo ia ʼo ʼuhiga mo tana ʼu manatu, kae ʼe tou fia vaevae mo ia te logo lelei ʼaē ʼe maʼu ʼi te Folafola ʼa te ʼAtua.
4. Koteā te tali ʼe feala ke koutou fai mokā ʼui atu e he tahi “ ʼE mole au fia fai au ki te faʼahi ʼaenā,” kae mole heʼeki koutou fakahā age te tupuʼaga ʼo takotou ʼaʼahi?
4 Ko he tahi ʼe mole fakalogo moʼoni ki tatatou palalau, ʼe feala ke ina ʼui fakafefeka: “ ʼE mole au fia fai au ki te faʼahi ʼaenā.” ʼI te agamāhani ʼe feala ke tou ʼui fēnei, “Neʼe au fia lau atu pe te kiʼi vaega ʼaenī ʼi te Tohi-Tapu.” ʼE mole lagi fakafisi anai kiai. ʼI he tahi age faʼahi, ʼe lagi lelei ke tou ʼui fēnei, “Neʼe au fia palalau atu ʼo ʼuhiga mo he temi ʼe mole toe ʼi ai anai te heʼe faitotonu pea ʼe ako fuli anai e te hahaʼi ia te feʼofaʼofani.” Kapau ʼe koutou sio ʼe mole ina fia ʼiloʼi he tahi ʼu manatu, pea ʼe feala ke koutou ʼui fēnei: “Kae ʼe lagi feala haku haʼu ʼi he tahi temi ʼe ke ava ai.” Kapau ʼe mole ina tali lelei mai, ʼe tonu koa ke tou manatu ʼe “mole tāu” mo ia ia te logo lelei? Tatau aipe peʼe feafeaʼi tana tali, kae ʼe tonu ke tou manatuʼi ʼe tokoni mai ia te Tohi-Tapu ke tou ‘agamālū ki te hahaʼi fuli pea mo lolomi ʼi te agakovi.’—2 Timoteo 2:24.
Neʼe Agapauʼu He Neʼe Mole Tuku Age He Takitaki Lelei
5, 6. Neʼe gaohi feafeaʼi e Saulo te ʼu tisipulo ʼa Sesu, pea he koʼe neʼe feiā tana aga?
5 ʼI te ʼuluaki sēkulō, ko te tagata neʼe higoa ko Saulo neʼe ʼiloa he neʼe ina fai te ʼu palalau heʼe fakaʼapaʼapa pea neʼe agamālohi. ʼE ʼui ʼi te Tohi-Tapu neʼe “kei ina fai te ʼu fakamatakutaku pea mo te ʼu fai fakapō ʼo fakafeagai ki te kau tisipulo ʼo te ʼAliki.” (Gaue 9:1, 2, MN ) Ki muli age neʼe ina ʼui tonu ʼo ʼuhiga mo ia neʼe ko “he tagata laukovi, nee ko he tagata fai fakataga mo pauʼu.” (1 Timoteo 1:13) Logola ko ʼihi ʼi tana famili neʼe kua lagi liliu ko he kau Kilisitiano, kae neʼe ina ʼui fēnei ʼo ʼuhiga mo tana aga ki te kau tisipulo ʼa Kilisito: “I toku ita nee au fakatagai natou o kaku ki te u kolo matapule.” (Gaue 23:16; 26:11; Loma 16:7, 11) ʼE mole fakahā mai ʼi te Tohi-Tapu pe neʼe faigaʼi e te kau tisipulo ke nātou fai palalau mo Saulo iā muʼa ʼo te kaugamālie, ʼi te temi ʼaē neʼe fakatagaʼi ai nātou.
6 He koʼe neʼe feiā te aga ʼa Saulo? ʼI te ʼu taʼu ki muli age, neʼe ina tohi fēnei: “Nee au fai i te fakapouli, nee mole au mau te tui.” (1 Timoteo 1:13) Neʼe ko te tagata Faliseo, neʼe akoʼi ia ia ʼi “te totonu o te lao o [“te ʼu kui,” MN ].” (Gaue 22:3) Logola ko Kamaliele, te tagata faiako ʼo Saulo, neʼe ko he tagata neʼe ina tali te ʼu manatu kehekehe, kae ko Kaifa, te pelepitelo lahi, ʼaē neʼe kaugā gāue mo Saulo, neʼe ko he tagata neʼe pipiki mālohi ki tana ʼu manatu. Neʼe ko Kaifa ʼaē neʼe ina takitaki te fonofono ʼaē neʼe iku ai ki te matehi ʼa Sesu Kilisito. (Mateo 26: 3, 4, 63-66; Gaue 5:34-39) Hili ʼaia, neʼe ʼui e Kaifa ke huipiʼi te kau ʼapositolo ʼa Sesu, pea neʼe ina fakatotonu fakafefeka age kiā nātou ke fakagata tanatou fai faka mafola ʼaki te huafa ʼo Sesu. Neʼe pelesita ia Kaifa ʼi te temi ʼaē neʼe hoko ai te maveuveu ʼi te Sanetualio, pea neʼe ʼave ai ia Setefano ʼo tuki makaʼi. (Gaue 5:27, 28, 40; 7:1-60) Neʼe mamata ia Saulo ki te tuki makaʼi ʼaia, pea neʼe fakagafua age e Kaifa ke ʼalu ki Tamaso ʼo puke te kau Kilisitiano, pea ke hoko atu ai tana ʼu faiga ʼaē ke ina molehi te ʼu tisipulo ʼa Sesu. (Gaue 8:1; 9:1, 2) ʼAki te fakaneke ʼaia, neʼe manatu ai e Saulo ko tana aga neʼe ko he fakahā ʼaia ʼo tana faʼafai maʼa te ʼAtua, kae ʼi tona ʼaluʼaga moʼoni, neʼe mole ina maʼu te tui moʼoni. (Gaue 22:3-5) Koia neʼe mole mahino e Saulo ko Sesu neʼe ko te Mesia moʼoni. Kae neʼe mālama leva ia Saulo ʼi te temi ʼaē neʼe ʼalu ai ki Tamaso, ʼi te palalau faka milakulo age ia Sesu ʼaē kua fakatuʼuake.—Gaue 9:3-6.
7. Koteā ʼaē neʼe hoko kiā Saulo ʼi tana logo ʼaē kiā Sesu ʼi te ala ki Tamaso?
7 Mole fualoa kiai, neʼe fekauʼi ia te tisipulo ko Ananiasi ke ʼalu ʼo faka mafola kiā Saulo. ʼE koutou ʼolo anai koa ʼo fai te ʼaʼahi ʼaia mo kanapaula neʼe ko koutou ʼaē neʼe fekauʼi? Neʼe mataku ia Ananiasi, kae neʼe palalau lelei kiā Saulo. Neʼe fetogi te aga ʼa Saulo ʼi tana logo faka milakulo ki te leʼo ʼa Sesu ʼi te ala ʼo Tamaso. (Gaue 9:10-22) Neʼe fakahigoaʼi leva ki muli age ko te ʼapositolo ko Paulo, te misionea Kilisitiano faʼafai.
Neʼe Agamālū Kae Neʼe Lototoʼa
8. Neʼe fakahā feafeaʼi e Sesu te manatu ʼo tana Tāmai ʼi tana ʼu felogoi mo te hahaʼi ʼaē neʼe nātou fai te ʼu aga ʼaē ʼe kovi?
8 Neʼe agamālū ia Sesu, te tagata fai faka mafola faʼafai ʼo te Puleʼaga, kae neʼe lototoʼa ʼi tana ʼu palalau ki te hahaʼi. (Mateo 11:29) Neʼe ina fakahā te manatu ʼo tana Tāmai ʼaē ʼe ʼi selo, ʼaē neʼe ina uga te hahaʼi agakovi ke nātou līaki tanatou ʼu aga ʼaē ʼe kovi. (Isaia 55:6, 7) ʼI tana felogoi mo te kau agahala, neʼe tokagaʼi e Sesu te temi ʼaē neʼe hā lelei ai tanatou fetogi, pea neʼe ina fai age kiā nātou he ʼu palalau fakaloto mālohi. (Luka 7:37-50; 19:2-10) Neʼe mole fakamāuʼi e Sesu te hahaʼi ʼo mulimuli ki tonatou ʼu agaaga ʼaē ʼe hā ki tuʼa, kae neʼe ina faʼifaʼitakiʼi te agalelei ʼo tana Tāmai, mo tana faʼa kātaki, mo tana ʼutakiʼi ʼaki te ʼamanaki ʼaē ke nātou fakahemala. (Loma 2:4) ʼE ko te finegalo ʼo Sehova ke fakahemala te hahaʼi fuli pe pea mo hāofaki.—1 Timoteo 2:3, 4.
9. Koteā ʼaē ʼe feala ke tou ako mai te fakahoko e Sesu ia Isaia 42:1-4?
9 ʼI tana fakahā te manatu ʼa Sehova ʼo ʼuhiga mo Sesu Kilisito, neʼe tohi e Mateo, te tagata faitohi ʼo te Evaselio, te ʼu palalau fakakikite ʼaenī: “Koʼeni taku tagata kaugana ʼaē neʼe au fili, toku ʼofaʼaga, ʼaia kua fiafia ʼaupito ai toku nefesi! ʼE au tuku anai toku laumālie kiā te ia, pea ʼe ina fakamahino lelei anai ki te ʼu puleʼaga pe koteā te faitotonu. ʼE mole ina fai anai he kē pe ko he kalaga, pea ʼe mole logo anai he tahi ki tona leʼo ʼi te ʼu ala lalahi. ʼE mole ina malaki anai te kaho ʼaē kua volu, pea ʼe mole ina matehi anai te vavaeʼi lino ʼaē ʼe kohu, ʼo kaku ki tana tuku mai te faitotonu ʼo lava lelei. ʼIo, ʼe falala anai te ʼatu puleʼaga ki tona huafa.” (Mateo 12:17-21, MN; Isaia 42:1-4) ʼO mulimuli ki te lea faka polofeta ʼaia, neʼe mole kau Sesu ki he ʼu fihi logoaʼa. Māʼiape la ʼi te ʼu lakaga faigataʼa, kae ko tana faʼahiga palalau ʼo ʼuhiga mo te moʼoni neʼe ina taki mai te ʼu hahaʼi loto fakamalotoloto.—Soane 7:32, 40, 45, 46.
10, 11. (a) Logola ko te kau Faliseo neʼe fakafeagai mālohi kiā Sesu, kae he koʼe neʼe fai faka mafola ki ʼihi ia nātou? (b) Koteā te ʼu faʼahiga tali ʼaē neʼe fai e Sesu ʼi ʼihi temi ki te kau fakafeagai, kae koteā ʼaē neʼe mole ina fai?
10 Lolotoga te minisitelio ʼa Sesu, neʼe fai palalau mo te kau Faliseo tokolahi. Logola te faiga ʼa ʼihi ia nātou ke nātou faka lakahalaʼi ia ia ʼi tana ʼu palalau, kae neʼe mole ʼui e Sesu ko nātou fuli neʼe kovi tanatou ʼu fakakaukau. Ko Simone, ko te Faliseo neʼe fai valoki, neʼe ina fia ʼiloʼi lelei age ia Sesu pea neʼe ina fakaafe ia ia ki te taumafa. Neʼe tali e Sesu te fakaafe pea neʼe fai faka mafola kiā nātou ʼaē neʼe kau ki te taumafa. (Luka 7:36-50) ʼI te tahi lakaga, ko te Faliseo maʼuhiga neʼe higoa ko Nikotemo neʼe haʼu fakafūfū kiā Sesu ʼi te pōʼuli. Neʼe mole valokiʼi ia ia e Sesu ʼi tana ʼatalitali ʼaē ke hoki haʼu kiā ia ʼi te pōʼuli. Kailoa, kae neʼe fai faka mafola kiā Nikotemo ʼo ʼuhiga mo te ʼofa ʼaē neʼe fakahā e te ʼAtua ʼi tana fekauʼi tona ʼAlo ke feala ai he hāofaki ʼo nātou ʼaē ka nātou maʼu anai te tui. ʼAki he agalelei, neʼe toe fakahā age e Sesu kiā ia te maʼuhiga ʼaē ke fakalogo ki te ʼu fakatotonu ʼa te ʼAtua. (Soane 3:1-21) Ki muli age, neʼe palalau ia Nikotemo moʼo hāofaki ia Sesu ʼi te temi ʼaē neʼe meʼa noaʼi e te kau Faliseo te fakamatala lelei ʼaē neʼe fai e te ʼu tagata faifekau ʼo ʼuhiga mo Sesu.—Soane 7:46-51.
11 Neʼe ʼiloʼi lelei pe e Sesu te malualoi ʼo nātou ʼaē neʼe nātou faiga ke nātou faka lakahalaʼi ia ia. Neʼe mole mulimuli ki te loto ʼa te ʼu fili ke nātou fai he ʼu fai palalau, kae ʼe mole ʼi ai anai hona fua. Kae kapau neʼe tāu mo feʼauga, neʼe fai he ʼu tali fakanounou pea mo mālohi ʼo fakatafito ki he pelesepeto, peʼe ina fakaʼaogaʼi he lea fakatātā, peʼe ko he vaega Tohi-Tapu. (Mateo 12:38-42; 15:1-9; 16:1-4) ʼI ʼihi temi, neʼe mole fai e Sesu hana tali mo kapau neʼe ʼiloga lelei ʼi te ʼu faifehuʼi ʼe mole maʼu anai hona ikuʼaga lelei.—Maleko 15:2-5; Luka 22:67-70.
12. Māʼiape la mo te ʼu temi ʼaē neʼe munaʼi ai, neʼe tokoni feafeaʼi ia Sesu ki te hahaʼi?
12 ʼI ʼihi temi, ko te ʼu hahaʼi ʼaē neʼe ʼulusino ai te ʼu temonio neʼe nātou munaʼi ia Sesu. Kae ʼi te ʼu temi ʼaē neʼe hoko ai te meʼa ʼaia, neʼe loto lolomi, pea mo ina fakaʼaogaʼi te mālohi ʼaē neʼe foaki age e te ʼAtua moʼo fakamālōlō nātou. (Maleko 1:23-28; 5:2-8, 15) Kapau ko ʼihi hahaʼi ʼe nātou ʼiʼita mai pea mo mumuna mokā tou fai faka mafola, pea ʼe toe ʼaoga mo tatou ke tou loto lolomi, pea mo tou faiga ke tou agalelei pea mo aga fakaʼeteʼete.—Kolose 4:6.
ʼI Te Loto Fale
13. He koʼe ʼi ʼihi temi ʼe fakafeagai te famili ki he tahi ʼe ina kamata ako te Tohi-Tapu mo te kau Fakamoʼoni ʼa Sehova?
13 ʼI te agamāhani, ko te ʼu tisipulo ʼa Sesu ʼe maʼua ke nātou maʼu te loto lolomi ʼi tonatou loto fale. Ko he tahi neʼe malave mālohi ki tona loto ia te ʼu moʼoni ʼo te Tohi-Tapu ʼe ina loto ke toe feiā mo tona famili. Kae ohage ko tona ʼui e Sesu, ʼe feala ke hoko he ʼu fakafeagai ʼi te famili. (Mateo 10:32-37; Soane 15:20, 21) ʼE lahi tona ʼu tupuʼaga. Ohage la, ko te ako ʼa te Tohi-Tapu ʼe tokoni mai kiā tatou ke tou aga fakahagatonu ʼi tatatou ʼu gāue, mo fakahoko tatatou ʼu maʼua, pea mo aga fakaʼapaʼapa. Kae ʼe toe akoʼi mai ʼi te Tohi-Tapu, ʼi te ʼu ʼaluʼaga fuli pe, ko tatatou maʼua tāfito, ʼe ko totatou maʼua ki totatou Tupuʼaga. (Tagata Tānaki 12:1, 13; Gaue 5:29) ʼE feala ke ʼita he tahi ʼi te famili heʼe lagi sio ʼe mole kei ʼi ai hona mālohi kiā tatou ʼuhi ko tatatou nofo agatonu kiā Sehova. Ka hoko he ʼaluʼaga feiā, pea ʼe maʼuhiga ʼaupito ke tou faʼifaʼitakiʼi te loto lolomi ʼaē neʼe fakahā e Sesu.—1 Petelo 2:21-23; 3:1, 2.
14-16. Koteā ʼaē neʼe tupu ai te fetogi ʼa ʼihi neʼe fakafeagai ʼi te temi muʼa ki ʼihi ʼo tanatou famili?
14 ʼI te temi nei, tokolahi ia nātou ʼaē ʼe tauhi kiā Sehova neʼe fakafeagai tonatou ʼohoana peʼe ko he tahi ʼo te famili ki te ʼu fetogi ʼaē neʼe nātou fai ʼi tanatou kamata ako te Tohi-Tapu. Neʼe lagi logo e te kau fakafeagai ʼaia, ki he ʼu palalau kovi ʼo ʼuhiga mo te kau Fakamoʼoni ʼa Sehova, pea neʼe lagi nātou mātataku naʼa fua kovi ki te loto fale. Kae koteā ʼaē neʼe tupu ai te fetogi ʼo tanatou manatu? Neʼe tupu tāfito ko te faʼifaʼitaki lelei ʼo nātou ʼaē neʼe nātou ako te Tohi-Tapu. ʼI ʼihi temi neʼe mālū ifo te fakafeagai ʼa te famili, heʼe ko ia ʼaē neʼe ina ako te Tohi-Tapu neʼe mulimuli tuʼumaʼu ki te ʼu tokoni ʼa te Tohi-Tapu—tana kau tuʼumaʼu ki te ʼu fono, tana fai faka mafola, tana fakahoko tana ʼu maʼua faka famili pea mo tana loto lolomi mokā leakoviʼi.—1 Petelo 2:12.
15 Ko he tahi ʼe fakafeagai ʼe mole lagi fia fakalogo ki he fakamahino ʼe fai age ʼaki te Tohi-Tapu, heʼe mahalohalo kovi ʼo ʼuhiga mo te lotu, peʼe mole fia agavaivai. Neʼe hoko te faʼahi ʼaia ʼo ʼuhiga mo te tagata ʼi Amelika, neʼe ina ʼui neʼe tauhi fakamalotoloto ki tona fenua. ʼI te tahi ʼaho, neʼe ʼalu tona ʼohoana ki te fakatahi, pea neʼe ina toʼo tona ʼu mutuʼi meʼa fuli pea mavae ia ʼi tonā ʼapi. ʼI te tahi temi, neʼe ʼalu mo tana fana pea mo ina ʼui ʼe ʼalu ʼo fakamate. Neʼe ina ʼui ʼe ina fai te ʼu meʼa ʼaia ʼuhi ko te lotu ʼo tona ʼohoana. Kae neʼe faiga aipe e te tuagaʼane ke ina maʼuliʼi te ʼu tokoni ʼa te Tohi-Tapu. Hili kiai taʼu e uafulu ʼi tana ʼosi liliu ko te Fakamoʼoni ʼa Sehova, neʼe liliu mo tona ʼohoana ko he Fakamoʼoni ʼa Sehova. ʼI Alepania, neʼe ʼita te fafine he neʼe ako e tana taʼahine ia te Tohi-Tapu mo te kau Fakamoʼoni ʼa Sehova pea neʼe papitema. Tuʼa 12 neʼe maumauʼi e te fafine ʼaia te ʼu Tohi-Tapu ʼo tana taʼahine. Pea ʼi te tahi ʼaho, neʼe ina ʼavahi te tahi Tohi-Tapu neʼe tuku e tana taʼahine ʼi te laupapa. Neʼe ina ʼavahi tonu ʼi te vaega ʼo Mateo 10:36, pea neʼe mahino ki te fafine ʼaia neʼe faka ʼuhiga kiā ia te ʼu palalau ʼaia. Kae ʼi tana tuʼania ki te ʼu meʼa ʼaē neʼe feala ke hoko ki tana taʼahine, neʼe kaugā ʼalu tana faʼē mo ia ki te vaka he neʼe ʼalu mo te tahi kau Fakamoʼoni ki te fakatahi neʼe fai ʼi Italia. ʼI te sio ʼa tana faʼē ki te ʼofa, mo te fefāʼufuaʼaki pea mo te ʼu malimali ʼo te hahaʼi ʼaia pea mo logo ki tanatou kakata, neʼe fetogi ai tana manatu. Mole fualoa pea neʼe ina tali tana ako Tohi-Tapu. Ia ʼaho nei, ʼe faiga ke tokoni kiā nātou ʼaē neʼe fakafeagai ʼi te temi muʼa.
16 ʼI te tahi ʼaluʼaga, ko te tagata neʼe haʼu ʼo fakafeagai ki tona ʼohoana ʼaki te hele, pea mo fai age tana ʼu palalau kovi kiā ia ʼi te fakaōvi ʼa te tuagaʼane ki te Fale ʼo Te Puleʼaga. Kae ʼaki he agamālū neʼe tali fēnei age e te tuagaʼane: “ ʼUlu mai ki fale ʼo sio tonu ki te Fale ʼo Te Puleʼaga.” Neʼe ina fai te meʼa ʼaia, pea ki muli age neʼe liliu ko he tagata ʼāfea.
17. Kapau ʼe hoko he ʼu faigataʼaʼia ʼi he loto fale Kilisitiano, ko te ʼu vaega Tohi-Tapu fea ʼaē ʼe lava ʼaoga?
17 Māʼiape la peʼe kua papitema fuli takotou famili, kae ʼe ʼi ai ʼihi temi ʼe liliu ai te ʼaluʼaga ʼo te famili ʼo faigataʼa pea ʼe feala ke tou fai he ʼu palalau fefeka ʼuhi ko totatou ʼuhiga agahala. ʼE lelei ke tou tokagaʼi te tokoni ʼaenī neʼe fai ki te kau Kilisitiano ʼi Efeso: “Ke toʼo iā koutou te lotokovi fuli pe, te ʼita fuli pe, te hāūhāū fuli pe, te kalaga fuli pe, te leakovi fuli pe, pea mo te agakovi fuli pe.” (Efeso 4:31, MN ) ʼE hā mai ko ʼihi Kilisitiano ʼi Efeso neʼe nātou mulimuli ki te ʼu aga ʼaē neʼe fai e te hahaʼi ʼo te kolo ʼaia, mo nātou mulimuli ki tonatou ʼuhiga agahala, pea mo tonatou maʼuli ʼāfea. Koteā ʼaē neʼe tokoni kiā nātou ke nātou fetogi? Neʼe tonu ke nātou “fakafoou te laumalie o [tonatou] atamai.” (Efeso 4:23) Kapau ʼe nātou ako te Folafola ʼa te ʼAtua, mo metitāsio peʼe tonu ke malave feafeaʼi ki tonatou maʼuli, mo nātou fakatahi mo te ʼu tēhina mo tuagaʼane, pea mo nātou faikole fakamalotoloto, pea ʼe ʼiloga lelei anai ʼi tonatou maʼuli te ʼu fua ʼo te laumālie ʼa te ʼAtua. ʼE nātou ako anai ke nātou “fe’lotoleleiʼaki, mo feʼofaʼaki, [mo] fe’fakamolemoleʼaki o hage ko te Atua nee fakamolemole kia [nātou] ia Kilisito.” (Efeso 4:32) Tatau aipe peʼe feafeaʼi mai te aga ʼa te hahaʼi, kae ʼe tonu ke tou gāueʼi te loto lolomi, ke tou agalelei, mo loto manavaʼofa, pea mo loto fakamolemole. Koia, ʼe mole tonu ke tou “liufaki ki he tahi te kovi ʼaki te kovi.” (Loma 12:17, 18, MN ) Ko te aga ʼaē ʼe lelei tuʼumaʼu ke tou fai, ʼe ko te fakahā ʼo te ʼofa moʼoni ohage ko te ʼAtua.—1 Soane 4:8.
Te ʼu Tokoni Maʼa Te Kau Kilisitiano Fuli
18. He koʼe neʼe lelei te tokoni ʼo 2 Timoteo 2:24 ki te kau tagata ʼāfea ʼo te kolo ʼāfea ʼo Efeso, pea ʼe ʼaoga feafeaʼi ki te kau Kilisitiano fuli?
18 Ko te tokoni ʼaē ke tou ‘loto lolomi ʼi te agakovi,’ ʼe ko he tokoni maʼa te kau Kilisitiano fuli. (2 Timoteo 2:24) Kae neʼe ʼuluaki fai te tokoni ʼaia kiā Timoteo, ʼaē neʼe ʼaoga kiā ia he neʼe ko te tagata ʼāfea ʼi Efeso. Ko ʼihi ʼi te kokelekasio ʼaia neʼe nātou fakahā leʼo lahi tanatou manatu pea neʼe nātou akoʼi te ʼu akonaki hala. ʼUhi ko tanatou mole mahino kātoa ki te fakatuʼutuʼu ʼo te Lao ʼa Moisese, neʼe mole nātou mahino ai ki te maʼuhiga ʼo te tui, mo te ʼofa pea mo he leʼo ʼo loto ʼe maʼa. ʼI tanatou fiatuʼu, neʼe hoko te ʼu fihi ʼo ʼuhiga mo te ʼu kupu, kae galo kiā nātou te manatu tāfito ʼo te ʼu akonaki ʼa Kilisito pea mo te maʼuhiga ʼaē ke nātou tauhi fakamalotoloto ki te ʼAtua. Moʼo fakatokatoka te faʼahi ʼaia, neʼe tonu kiā Timoteo ke pipiki maʼu ki te moʼoni ʼa te Tohi-Tapu, kae ke agalelei ʼi tana ʼu felogoi mo tona ʼu tēhina. Ohage ko te kau tagata ʼāfea ʼo te temi nei, neʼe ʼiloʼi e Timoteo ʼe mole ʼa ia te faga ōvi, pea neʼe tonu ke ina fakatuputupu te ʼofa pea mo te logo tahi ʼi tana ʼu felogoi mo nātou.—Efeso 4:1-3; 1 Timoteo 1:3-11; 5:1, 2; 6:3-5.
19. He koʼe ʼe maʼuhiga kiā tatou fuli ke tou “kumi te agavaivai”?
19 ʼE uga e te ʼAtua tana hahaʼi ke nātou “kumi te agavaivai.” (Sofonia 2:3) ʼI te faka Hepeleo ko te kupu “agavaivai” ʼe faka ʼuhiga ki he tahi ʼe feala ke ina kātakiʼi fualoa he agakovi, ʼo mole ʼita peʼe fia lagavaka. ʼOfa pe ke tou kole fakamalotoloto kiā Sehova ke tokoni mai ke tou loto lolomi pea mo tou fakafofoga lelei ia ia, māʼiape la ʼi te ʼu ʼaluʼaga faigataʼa.
Koteā ʼAē Neʼe Koutou Ako?
• Kapau ʼe palalau kovi atu he tahi, ko te ʼu vaega Tohi-Tapu fea ʼaē ʼe lava tokoni atu?
• He koʼe neʼe agapauʼu ia Saulo?
• ʼE tokoni feafeaʼi mai te faʼifaʼitaki ʼa Sesu ke tou agalelei ki te hahaʼi kehekehe fuli pe?
• Koteā te ʼu lelei ʼe feala ke tou maʼu ʼi te loto fale mo kapau ʼe tou loto lolomi ʼi tatatou ʼu palalau?
[Paki ʼo te pasina 26]
Logola te ʼu meʼa ʼaē neʼe logo kiai ʼo ʼuhiga mo Saulo, kae neʼe agalelei ia Ananiasi kiā ia
[Paki ʼo te pasina 29]
Ko he Kilisitiano ʼe ina fakahoko agatonu tana ʼu maʼua, ʼe feala ke ina fakamalū ifo te fakafeagai ʼo tona famili
[Paki ʼo te pasina 30]
ʼE lagolago te kau Kilisitiano ki te ʼofa pea mo te logo tahi