Te ʼu Fehuʼi ʼa Te Kau Lautohi
He koʼe neʼe mole matehi ia Tavite mo Pati-Sepa ʼi tanā tono, kae mate tanā tamasiʼi tagata?
Neʼe ʼui lelei fēnei ʼi te Lao ʼa Moisese: “Kapau ʼe maʼu atu he tagata ʼe moe mo he fafine kua ʼohoana, pea ʼe tonu anai ke nā mamate toko lua, te tagata ʼaē neʼe moe mo te fafine, ʼo feiā mo te fafine. ʼE tonu anai ke ke molehi feiā ʼi Iselaele te meʼa ʼaē ʼe kovi.” (Teutalonome 22:22) Kanapaula neʼe tuku e Sehova ʼAtua ke fakamāuʼi te agahala ʼa Tavite mo Pati-Sepa e he ʼu tagata, kanaʼauala kua matehi ia nāua. ʼI te mole lava sio ʼa te ʼu tagata ʼaia ki te ʼu loto, ʼe mahino ia ʼe lagi nātou fakamāuʼi pe anai ʼo mulimuli ki te agahala ʼaē neʼe nā fai. Ko he toko lua neʼe tono neʼe fakatuʼā nāua ki te mate. Neʼe mole tali ke fakamolemole te taʼi agahala ʼaia e te ʼu tuʼi fakamāu ʼo Iselaele.
Kae ko te ʼAtua ʼe lava sio ki te ʼu loto pea mo ina fakamolemole he ʼu agahala mo kapau ʼe sio ʼe tāu mo feʼauga ke fai he fakamolemole. Mai tona ʼaluʼaga ʼaē neʼe ko Tavite ʼaē neʼe agahala, ʼaē neʼe fai e Sehova mo ia te fuakava ki te Puleʼaga, koia neʼe filifili ai e Sehova ke hoko he fetogi ʼi te lakaga ʼaia ke ina fakamāuʼi tonu ia te agahala ʼaia. (2 Samuele 7:12-16) ʼE gafua ki “te Tuʼi Fakamāu ʼo te kele kātoa” ke ina fai te tonu ʼaia.—Senesi 18:25.
Koteā ʼaē neʼe tokagaʼi e Sehova ʼi tana sivi te loto ʼo Tavite? ʼI te ʼu palalau ʼaē ʼe tuʼu ʼi ʼaluga ʼo te Pesalemo 51, ʼe fakahā ai ʼi te Pesalemo ʼaia ia te ʼu meʼa ʼaē neʼe logoʼi e Tavite, “ ʼi te temi ʼaē neʼe hū ai ia Natane te polofeta kiō ia ʼi tana ʼosi tono mo Pati-Sepa.” ʼE ʼui fēnei ia Pesalemo 51:1-4: “Fakahā mai tou ʼofa, Ê ʼAtua, ʼaki tou finegaloʼofa. ʼAki te lahi ʼo tou ʼu manavaʼofa, molehi taku ʼu talagataʼa. Fufulu kātoa au mai taku hala, pea mo fakamaʼa au mai taku agahala. Koteʼuhi, ʼe au ʼiloʼi taku ʼu talagataʼa, pea ko taku agahala ʼe nofo tuʼumaʼu ʼi ʼoku muʼa. Neʼe au agahala kiā koe, kiā koe tokotahi, pea neʼe au fai te meʼa ʼaē ʼe kovi ʼi ʼou mata.” Neʼe lagi fakatokagaʼi e Sehova ia te mamahi lahi ʼaia ʼi te loto ʼo Tavite, ohage ko he fakamoʼoni ʼo tana fakahemala moʼoni, pea neʼe ina fakatotonu ai ke fakatafito kiai tana manavaʼofa kiā nāua ʼaē neʼe agahala. Pea tahi ʼaē meʼa, ko Tavite neʼe ko he tagata manavaʼofa, pea ko Sehova ʼe manavaʼofa kiā nātou ʼaē ʼe nātou aga feiā. (1 Samuele 24:4-7; Mateo 5:7; Sakopo 2:13) Koia ʼi te fakamoʼoni age e Tavite tana agahala, neʼe ʼui fēnei age e Natane: “Ki te faʼahi ʼo Sehova, ʼe ina tuku ke fakalaka tau agahala. ʼE mole ke mate anai.”—2 Samuele 12:13.
Ko Tavite mo Pati-Sepa neʼe mole nā hāo mai te ʼu ikuʼaga fuli ʼo tanā agahala. Neʼe ʼui fēnei age e Natane kiā Tavite: “ ʼUhi ko tau mole fakaʼapaʼapa kiā Sehova ʼi te lakaga ʼaia, koia ko tou foha ʼaē ka tupu ake ʼe mate moʼoni anai ia.” Neʼe mahaki te tamasiʼi pea neʼe mate leva, logola te ʼaukai pea mo te putu ʼaē neʼe fakahoko e Tavite lolotoga te ʼu ʼaho e fitu.—2 Samuele 12:14-18.
Ko ʼihi ʼe nātou mahino gataʼa peʼe koʼe neʼe mate te tamasiʼi ʼaia kae ʼe fakahā fēnei iā Teutalonome 24:16: “ ʼE mole matehi anai te fānau ʼuhi ko tanatou ʼu mātuʼa.” Kae ʼe tonu ke tou manatuʼi mo kanapaula neʼe fakamāuʼi te ʼaluʼaga ʼaia e he ʼu tagata, kanaʼauala ʼe matehi fuli ia nātou, te ʼu mātuʼa mo te tamasiʼi ʼaē ʼe fuafatuʼi. Ko te mate ʼo te tamasiʼi neʼe lagi toe tokoni foki kiā Tavite ke mahino lahi age ki te mamahi ʼaē neʼe tau mo Sehova ʼi tana agahala mo Pati-Sepa. ʼE tou falala ko Sehova neʼe ina fakamāuʼi te ʼaluʼaga ʼaia ʼaki te faitotonu, koteʼuhi “ ʼe haohaoa tana ala.”—2 Samuele 22:31.
[Paki ʼo te pasina 31]
Neʼe fakahemala moʼoni ia Tavite