ʼE Hāofaki Tatou ʼUhi Ko Te ʼOfa Makehe, Kae Mole ʼUhi Pe Ko Te ʼu Gāue ʼAē ʼe Tou Fai
“Neʼe hāofaki koutou ʼaki te tui . . . ʼE mole ʼuhi ko te ʼu gāue, ke ʼaua naʼa laupisi ai he tahi.”—Efeso 2:8, 9, MN.
1. He koʼe ʼe kehekehe ia te hahaʼi ʼo te mālama pea mo te kau Kilisitiano ʼo ʼuhiga mo tanatou ʼu gāue takitokotahi, pea koteā tona tupuʼaga?
KO TE hahaʼi ia ʼaho nei ʼe nātou fiahā ʼaupito ʼi tonatou ʼu fealagia, pea ʼi te agamāhani ʼe nātou laupisi ʼo ʼuhiga mo tanatou ʼu gāue. Kae ʼe mole feiā te kau Kilisitiano. ʼE mole nātou fia laupisiʼi tonatou ʼu fealagia, ʼo feiā mo tanatou ʼu gāue ʼaē ʼe nātou fakahoko ʼi te tauhi moʼoni. ʼE nātou fiafia ki te ʼu gāue ʼaē ʼe fakahoko e te hahaʼi fuli ʼa Sehova, kae ʼe mole nātou fia fakahāhā te ʼu gāue ʼaē ʼe nātou fai takitokotahi. ʼE nātou ʼiloʼi ko te ʼu gāue ʼaē ʼe fakahoko ʼi te tauhi ʼa Sehova ʼaki he loto kātoa, ʼe maʼuhiga age ia ʼi he ʼu poto gāue takitokotahi. Kapau ʼe maʼu anai e he tahi ia te meʼa ʼofa ʼaē ko te maʼuli heʼegata, ʼe mole ina maʼu anai ʼuhi ko hona fealagia makehe, kae ʼuhi ko tana tui pea mo te lotoʼofa ʼo te ʼAtua.—Luka 17:10; Soane 3:16.
2, 3. Koteā te ʼu meʼa ʼaē neʼe fia laupisi ai Paulo, pea koteā tona tupuʼaga?
2 Ko te ʼapositolo ko Paulo neʼe mahino lelei ki te faʼahi ʼaia. ʼI tana ʼosi faikole tuʼa tolu ke toʼo iā te ia “te tala [ʼi tona] kakano” neʼe tali fēnei age e Sehova: “Ko toku ʼofa makehe ʼe feʼauga kiā koe; heʼe ko [toku] mālohi ʼe lolotoga fakaliliu ʼo haohaoa ʼi te vaivai.” Pea neʼe tali leleiʼi pe e Paulo ia te tonu ʼa Sehova, ʼo ina ʼui fēnei: “Koia, ʼe lelei age haku fia laupisi ʼo ʼuhiga mo toku ʼu vaivaiʼaga, ke malumalu ia te au te māfimāfi ʼo Kilisito.” ʼE tonu ke tou faʼifaʼitakiʼi ia te agavaivai ʼa Paulo.—2 Kolonito 12:7-9, MN.
3 Logola neʼe fakahoko e Paulo ia te ʼu gāue faka Kilisitiano lelei, kae neʼe ina ʼiloʼi neʼe mole ko ia ʼaē neʼe tupu ai te fua lelei ʼo tana ʼu gāue. ʼAki he agavaivai, neʼe ina ʼui fēnei: “Kia te au, ko te siʼi pau o te kaigalotu, nee foaki mai te [“ ʼofa makehe,” MN ] aeni ke fagonogono ki te hahai pagani te u koloa hee fakafuafua o Kilisito.” (Efeso 3:8) ʼE ʼasi mai ʼi tana ʼu palalau neʼe mole fia hā pea neʼe mole fiatuʼu. “Ko te ʼAtua ʼe fakafeagai ki te hahaʼi fiahā, kae ʼe ina foaki te ʼofa makehe ki te hahaʼi agavaivai.” (Sakopo 4:6, MN; 1 Petelo 5:5) ʼE tou muliʼi koa te faʼifaʼitaki ʼa Paulo, ʼo tou fia mālalo age ʼi totatou ʼu tēhina?
“Koutou Faka ʼUhiga Ia Nātou ʼAē ʼe Nātou Māʼoluga Age Ia Koutou”
4. He koʼe ʼi ʼihi temi ʼe mata faigataʼa hatatou faka māʼoluga age niʼihi ia tatou?
4 Neʼe tokoniʼi fēnei e te ʼapositolo ko Paulo ia te kau Kilisitiano: “ ʼAua naʼa tou fai he meʼa ʼaki he fia kē, peʼe ʼaki he fiahā, kae ʼaki he loto fia mālalo, ʼo koutou faka ʼuhiga ia nātou ʼaē ʼe nātou māʼoluga age ia koutou.” (Filipe 2:3, MN ) Kae kapau ʼe tou takitaki he ʼu gāue, ʼe feala ke faigataʼa hatatou muliʼi ia te tokoni ʼaia. ʼE lagi faigataʼa hatatou fia mālalo heʼe ko te mālama ʼi te temi nei ʼe ina fakaneke mālohi ia te manatu fakataupiepie. Pea ʼi tatatou kei liliki, lagi ʼi totatou famili neʼe akoʼi mai kiā tatou ke tou fakataupiepie mo ʼotatou tēhina mo tuagaʼane, peʼe ʼi te faleako mo ʼotatou kaugā ako. Lagi ʼi te faleako neʼe uga tuʼumaʼu pe tatou ke tou tuʼulaga ʼuluaki ʼi te ʼu faigaoʼi peʼe ke tou poto age ʼi te kau ako fuli. ʼE moʼoni, ʼe tonu ki te kau Kilisitiano ke nātou faiga fakamalotoloto ʼo faifakalelei tanatou ʼu gāue, kae ka nātou fakahoko tanatou ʼu gāue ʼe mole nātou fai ʼaki he loto fiahā, kae ʼe nātou faiga tāfito ke ʼaoga te ʼu gāue ʼaia kiā nātou pea mo niʼihi. Kapau ʼe tou faiga tuʼumaʼu ke laupisiʼi tatou e te hahaʼi ʼo ʼuhiga mo tatatou ʼu gāue, pea ʼe feala ke tou tuʼutāmaki ai. ʼE lava hoko feafeaʼi te faʼahi ʼaia?
5. Kapau ʼe mole tou tōkakaga ki te manatu fakataupiepie, koteā ʼaē ʼe lava hoko?
5 Kapau ʼe mole tou tōkakaga kiai, pea ko te manatu fakataupiepie peʼe ko te fiahā, ʼe ina lava fakaliliu he tahi ke agapauʼu pea mo fiatuʼu. ʼE feala anai ke mānumānu ki te ʼu fealagia pea mo te ʼu pilivilesio ʼa ʼihi. ʼE ʼui iā Tāʼaga Lea 28:22: “Ko he tagata ʼe sio mānumānu, ʼe fakatevili ki te ʼu koloā, kae ʼe mole ina ʼiloʼi ia ʼe haʼu anai kiā ia te masiva.” ʼI tana fiahā, ʼe faiga anai ke ina maʼu he ʼu tuʼulaga ʼe mole ina lavaʼi. Pea moʼo faka lākatonuʼi te ʼu meʼa ʼaē ʼe ina fai, ʼe kamata muhumuhu anai pea mo ina fatufatuʼi te ʼu gāue ʼa ʼihi—kae ʼe ko he ʼu aga ʼe tonu ke līʼaki e te kau Kilisitiano. (Sakopo 3:14-16) Koia, kapau ʼe mole fetogi pea ʼe feala ʼaki te temi ke liliu ko he tahi ʼe manatu pe kiā ia totonu.
6. Koteā te fakatokaga ʼe fai ʼi te Tohi-Tapu ʼo ʼuhiga mo te fakataupiepie?
6 Koia, ʼi te Tohi-Tapu ʼe fakaloto mālohiʼi fēnei te kau Kilisitiano: “ ʼAua naʼa tou fiahā, ʼo tou fefakataupiepieʼaki, pea mo femahekaʼaki.” (Kalate 5:26, MN ) Ko te ʼapositolo ko Soane neʼe talanoa ʼo ʼuhiga mo tona tēhina neʼe tō ki te aga ʼaia, ʼo ina ʼui fēnei: “Nee i ai he mea nee au faitohi ai ki te Ekelesia; kae ko Tiotefeso i tana fia matamua ia natou, e mole ina tali matou. Koia, kapau e au alu atu, e au fakamanatu anai kia te ia te u gaue e ina fai; te u lea kovi e ina fakamafola o fakafehagai kia matou.” ʼI ʼaluʼaga fakaʼofaʼofa ki he Kilisitiano!—3 Soane 9, 10.
7. Ia ʼaho nei, ko te ʼu fakataupiepie fea ʼaē ʼe tokaga anai ʼo tekeʼi e te Kilisitiano ʼi tana gāue?
7 ʼE feala ʼi ʼihi temi ke mole tekeʼi e te Kilisitiano ia te ʼu fakataupiepie fuli. ʼI tona fale gāue ʼe hoko ai te ʼu fakataupiepie ʼi te faʼahi faka ekonomika mo niʼihi peʼe mo ʼihi matani gāue, heʼe tatau te ʼu meʼa ʼaē ʼe nātou faʼu. Kae logola te ʼu ʼaluʼaga ʼaia, ʼe haga fai pe anai e te Kilisitiano ia tana gāue ʼaki te fakaʼapaʼapa, mo te ʼofa, pea mo te tokaga. ʼE mole ina fai anai he ʼu gāue ʼe tapuʼi e te puleʼaga peʼe fakafeagai ki te ʼu pelesepeto ʼa te ʼAtua, pea ʼe tokaga anai naʼa ʼiloʼi tāfito ia ia ʼe ko he tahi ʼe fakataupiepie, pea mo aga fefeka. ʼI te ʼu gāue fuli ʼaē ʼe ina fai, ʼe tokaga tāfito anai ke ʼaua naʼa takimuʼa kiā ia tana fia tuʼulaga ʼuluaki. Kapau ʼe mole tonu ke tou fiahā ʼi te ʼu gāue faka mālama, pea ʼe toe feiā pe mo te ʼu gāue fakalaumālie!
‘ ʼAua Naʼa Tou Fakatatau Mo He Tahi Kehe’
8, 9. (a) He koʼe ʼe mole tonu ke fesiosioʼaki te kau tagata ʼāfea? (b) He koʼe ʼe faka ʼuhiga ki te ʼu kaugana fuli ʼa te ʼAtua ia te ʼu palalau ʼaē iā 1 Petelo 4:10?
8 Ko te aga ʼaē ʼe tonu ke muliʼi e te kau Kilisitiano ʼi tanatou tauhi ʼe hā ʼi te ʼu palalau fakaʼatua ʼaenī: “Ke tahi vakaʼi tana gāue takitokotahi, pea ʼe tupu ai anai hana fiafia ʼuhi pe ko ia totonu, kae ʼe mole fiafia anai ʼuhi he neʼe fakatatau ki he tahi kehe.” (Kalate 6:4, MN ) ʼE mahino ki te ʼu tagata ʼāfea ʼo te kokelekasio, ʼe mole tonu ke nātou fesiosioʼaki, kae ohage ko he sino e tahi ʼe tonu ke nātou felagolagoʼaki pea mo gāue fakatahi. ʼE nātou kaugā gāue ki te fiafia ʼo te kokelekasio kātoa. Koia, ʼe nātou tōkakaga ke mole iā nātou ia te fakataupiepie pea ʼe nātou tuku he faʼifaʼitaki lelei ki te kokelekasio ʼo ʼuhiga mo te logo tahi.
9 ʼE lagi faiva age ʼihi tagata ʼāfea ʼuhi heʼe kua nātou fotufotuʼa, kua fualoa te fakanofo tagata ʼāfea ʼo nātou, peʼe nātou maʼu he fakasiosio ʼe loloto age. Koia, ko te kau tagata ʼāfea ʼe nātou fakahoko ia te ʼu gāue kehekehe ʼi te kautahi ʼa Sehova. ʼE mole nātou fesiosioʼaki, heʼe nātou mahino ki te tokoni ʼaenī: “ ʼO mulimuli ki te fealagia ʼaē ʼe koutou maʼu takitokotahi, ke koutou fakaʼaogaʼi te fealagia ʼaia, ʼo koutou fetauhiʼaki, ohage ko he kau tagata tauhi ʼapi lelei ʼo te ʼofa makehe ʼo te ʼAtua, ʼaia ʼe hā ʼi he ʼu agaaga kehekehe.” (1 Petelo 4:10, MN ) Kae ko te tokoni ʼaia ʼe ʼaoga ki te ʼu kaugana fuli ʼa Sehova, heʼe nātou maʼu fuli ia te ʼatamai mālama totonu pea ʼe nātou maʼu fuli te pilivilesio ʼaē ko te kau ki te minisitelio faka Kilisitiano.
10. ʼE tonu ke feafeaʼi tatatou tauhi taputapu ke feala ai hona tali e Sehova?
10 ʼE leleiʼia e Sehova tatatou tauhi taputapu mo kapau ʼe tou fai ʼaki te ʼofa pea mo te pipiki ʼāteaina kiā te ia, kae ʼaua naʼa tou fai heʼe tou fia māʼoluga age ʼi niʼihi. Koia ʼe tonu ai ke tou vakavakaʼi fakalelei ia tatatou ʼu gāue ʼaē ʼe tou fai moʼo lagolago ki te tauhi moʼoni. ʼE ko Sehova pe ʼaē ʼe ina “fakafuafua te lelei ʼo te loto,” heʼe mole feala ki he tagata ke ina ʼiloʼi lelei ia te loto ʼo he tahi tagata. (Tāʼaga Lea 24:12; 1 Samuele 16:7) Koia, ʼe tonu ai ʼi ʼihi temi ke tou fai te fehuʼi ʼaenī: ‘He koʼe ʼe au fia fai te ʼu gāue ʼi te tauhi ʼa Sehova?’—Pesalemo 24:3, 4; Mateo 5:8.
Tou Fakahoko Tatatou Tauhi ʼAki He ʼu Manatu ʼe Lelei
11. Koteā te ʼu fehuʼi ʼaē ʼe lelei ke tou fai ʼo ʼuhiga mo tatatou ʼu gāue ʼi te minisitelio?
11 Kapau ʼi te ʼu gāue fuli ʼaē ʼe tou fai ko tona tupuʼaga ʼaē ʼe takimuʼa moʼo maʼu ʼo te tapuakina ʼa Sehova, ʼe tonu anai ke tou faka maʼuhigaʼi feafeaʼi tatatou ʼu gāue ʼo ʼuhiga mo te tui? Pea ka tou fai tatatou minisitelio ʼaki he ʼu manatu ʼe lelei, ʼe tonu koa ke tou lau te lahi ʼo te ʼu gāue ʼaē neʼe tou fai? ʼE lelei hatatou fakakaukauʼi te ʼu fehuʼi ʼaenī, ke mole tou fiahā ʼi te ʼu gāue fakalaumālie ʼaē ʼe tou fai peʼe ke tou faka maʼuhigaʼi fau he tānaki gāue ʼe lelei.
12, 13. (a) Koteā te ʼu tupuʼaga ʼaē ʼe tonu ai ke tou tōkakaga ʼo tohi tatatou gāue fai faka mafola? (b) He koʼe ʼe tou fiafia ʼo ʼuhiga mo tatatou tānaki gāue ʼaē ʼe fai ʼi te malamanei?
12 Koutou fakatokagaʼi te manatu ʼaē ʼe ʼui ʼi te tohi Organisés pour faire la volonté de Jéhovah : “Neʼe maʼuhiga ki te ʼu ʼuluaki tisipulo ʼa Sesu Kilisito ia te ʼu logo ʼo ʼuhiga mo te tuputupu ʼo te gāue fai faka mafola. (Maleko 6:30) ʼE fakahā mai ʼi te tohi ʼo Gaue, ʼi te temi ʼaē neʼe mafola ai te laumālie maʼoniʼoni ki te kau tisipulo ʼi te Penikosite, neʼe ko te toko 120 hahaʼi. Pea neʼe tuputupu ia te hahaʼi ʼo te ʼu tisipulo ʼo liliu ko te toko 3 000 pea nātou kaku ki te toko 5 000. . . . (Gaue 1:15, 2:5-11, 41, 47; 4:4; 6:7) ʼE mahino ia, neʼe lotomālohi te kau tisipulo ʼi tanatou logo ki te ʼu tuputupu ʼaia!” ʼO toe feiā mo te kau Fakamoʼoni ʼa Sehova ia ʼaho nei, ʼe nātou faiga ke nātou ʼiloʼi te ʼu gāue ʼaē neʼe fakahoko ʼi te malamanei, ʼo mulimuli pe ki te ʼu palalau ʼaenī ʼa Sesu: “Ko te logo lelei ʼaenī ʼo te puleʼaga ʼe faka mafola anai ʼi te kele kātoa, ko he meʼa fakamoʼoni ia ki te ʼu puleʼaga kātoa; pea hoko mai ai leva te fakaʼosi.” (Mateo 24:14, MN ) ʼE feala ʼaki te ʼu tānaki gāue ʼaia ke tou ʼiloʼi ia te gāue fai faka mafola ʼaē neʼe fai ʼi te malamanei. ʼAki te ʼu tānaki gāue ʼaia, ʼe feala ai ke ʼiloʼi te ʼu fenua ʼaē ʼe ʼaoga kiai he ʼu tohi faka Tohi-Tapu pea mo te gāue fai faka mafola ʼaē ke fakahoko ai.
13 Koia, ʼe feala ʼaki te ʼu kiʼi pepa tānaki gāue ke tou ʼiloʼi te fakahoko lelei ʼo te faka mafola ʼo te logo lelei ʼo te Puleʼaga. Tahi ʼaē meʼa, ʼe tou lotomālohi foki mokā tou logo ki te ʼu gāue ʼaē neʼe fai e ʼotatou tēhina ʼi te ʼu potu kehekehe ʼo te malamanei. ʼE tou fiafia ʼi te tuputupu ʼo tatatou kautahi, ʼo ina uga ai tatou ke lahi age tatatou kau ki te gāue, pea ʼe tou tui papau ai ʼe tapuakina tatou e Sehova. ʼE tou toe fiafia ʼi tatatou ʼiloʼi ʼaē ʼe kau tatatou kiʼi pepa tānaki gāue takitokotahi ki te tānaki ʼo te gāue faka malamanei! ʼE veliveli tatatou ʼu gāue mo kapau ʼe tou fakatatau ki te tānaki gāue ʼaē ʼe fai ʼi te malamanei, kae ko Sehova ʼe ina ʼiloʼi te gāue ʼaē neʼe tou fai takitokotahi. (Maleko 12:42, 43) Koutou manatuʼi, kapau ʼe mole koutou tohi takotou kiʼi pepa tānaki gāue, pea ʼe mole kātoa anai te tānaki gāue faka malamanei.
14. ʼO hilifaki ki te fai faka mafola pea mo te faiako Tohi-Tapu, koteā te tahi ʼu gāue ʼe tonu ke tou fai ʼi te tauhi kiā Sehova?
14 ʼIo, ʼe lahi te ʼu gāue ʼe mole tohi ʼi te pepa tānaki gāue ʼa te kau Fakamoʼoni takitokotahi ʼi tonatou ʼuhiga kaugana ʼa Sehova. Ohage la ʼe mole tohi ʼi te kiʼi pepa tānaki gāue ia te ako Tohi-Tapu takitokotahi ʼaē ʼe fai tuʼumaʼu, te kau pea mo te tali ʼi te ʼu fono faka Kilisitiano, te ʼu gāue ʼi te kokelekasio, te tokoni ki te ʼu tēhina mo tuagaʼane mokā ʼe ʼaoga, te lagolago faka paʼaga ki te gāue ʼo te Puleʼaga faka malamanei, pea mo ʼihi ʼatu ʼu gāue. Logola te maʼuhiga ʼo tatatou kiʼi pepa tānaki gāue moʼo tokoni kiā tatou ke tou faʼafai ʼi te fai faka mafola pea ke mole tou fakaʼauʼauganoa, kae ʼe mole tonu ke tou faka ʼuhiga te kiʼi pepa ʼaia ohage ko he fealagia fakalaumālie ke tou maʼu ai ia te maʼuli heʼegata.
“E Natou Faʼafai i Te u Gaue Lelei”
15. Logola ʼe mole ko te ʼu gāue pe ʼaē ʼe nātou hāofaki tatou, kae koteā tonatou ʼaoga kiā tatou?
15 ʼE moʼoni logola ʼe mole ko te ʼu gāue pe ʼaē ʼe nātou hāofaki tatou, kae ʼe ʼi ai tonatou ʼaoga. Koia la ʼaē ʼe higoaʼi ai te kau Kilisitiano ʼe ko “he hahai maʼana, e natou faʼafai i te u gaue lelei” pea ʼe toe fakaloto mālohiʼi nātou ke nātou “fe’tokagaʼaki o fakaʼalaʼala ki te fai o te ofa pea mo te u gaue lelei.” (Tito 2:14; Hepeleo 10:24) Tahi ʼaē meʼa, ʼe ʼui e te tahi tagata fai Tohi-Tapu ko Sakopo: “O hagepe ko te sino e hala mo laumalie, e ko te sino mate, pea e feia mo te tui e hala mo gaue, e ko te tui mate.”—Sakopo 2:26.
16. Koteā ʼaē ʼe maʼuhiga age ʼi te ʼu gāue ʼaē ʼe tou fakahoko, kae koteā te tahi age meʼa ʼe tonu ke tou mahino kiai?
16 Logola te maʼuhiga ʼo te ʼu gāue lelei, kae ʼe toe maʼuhiga foki mo te ʼu tupuʼaga ʼo tatatou fai ia te ʼu gāue ʼaia. Koia ʼe tonu ai ʼi ʼihi temi ke tou vakavakaʼi te tupuʼaga ʼo tatatou fai ʼo te ʼu gāue. Kae ʼe mole tonu ke tou fakamāuʼi te ʼu gāue ʼa ʼihi heʼe mole feala ki he tahi ke ina ʼiloʼi lelei te ʼu meʼa ʼaē ʼi te loto ʼo he tagata. ʼE fai mai kiā tatou ia te fehuʼi, pea mo te tali ʼaenī: “Ko ai koa ia koe ke ke fakamāuʼi te tagata faifekau ʼa he tahi tagata? ʼE tuʼu peʼe tō maʼa tona pule.” (Loma 14:4, MN ) Ko Sehova, ia te Pule ʼo te hahaʼi fuli, pea mo Kilisito Sesu ia te Tuʼi Fakamāu ʼaē neʼe ina fakanofo, ʼe mole nā fakamāu anai tatou ʼo mulimuli pe ki te ʼu gāue ʼaē neʼe tou fakahoko, kae ʼe nā toe vakaʼi anai mo te ʼu meʼa ʼaē ʼi ʼotatou loto, totatou ʼu fealagia, totatou ʼofa, pea mo tatatou pipiki ki te ʼAtua. ʼE ko Sehova pe pea mo Kilisito Sesu ʼe feala ke nā fai he fakamāu ʼe totonu, pe neʼe tou fakahoko totatou ʼu maʼua faka Kilisitiano, ohage ko tona ʼui e te ʼapositolo ko Paulo: “Faiga fakamalotoloto ke ke tuʼu iā muʼa ʼo te ʼAtua ohage ko he tagata ʼe ina tali lelei, ko he tagata gāue ʼe mole ufiufi ʼi he meʼa, ʼe ina fakaʼaogaʼi lelei te folafola ʼo te moʼoni.”—2 Timoteo 2:15, MN; 2 Petelo 1:10; 3:14.
17. Logola tatatou faiga fakamalotoloto, he koʼe ʼe tonu ke tou taupau tuʼumaʼu ia te manatu ʼaē iā Sakopo 3:17?
17 ʼE fakapotopoto ia Sehova ʼi te ʼu meʼa ʼaē ʼe ina fakamaʼua mai kiā tatou. ʼE ʼui iā Sakopo 3:17 (MN ), “ko te poto mai ʼoluga . . . ʼe fakapotopoto” pea mo ina maʼu te tahi ʼu fealagia. ʼE tou fakapotopoto anai mo kapau ʼe tou fakahoko pe ia te ʼu meʼa ʼaē ʼe tou lavaʼi, ohage pe ko te fakapotopoto ʼa Sehova ʼo ʼuhiga mo te ʼu meʼa ʼaē ʼe ina fakamaʼua mai. Koia, ʼe mole tonu ke tou fai he ʼu fakatuʼutuʼu ʼe mole fakapotopoto peʼe faigataʼa fau maʼa tatou peʼe maʼa totatou ʼu tēhina.
18. Koteā te meʼa ʼaē ʼe feala ke tou maʼu mokā ʼe tou fakafuafua lelei ia tatatou ʼu gāue pea mo te ʼofa makehe ʼa Sehova?
18 Kapau ʼe tou fakafuafua lelei tatatou ʼu gāue ʼaē kiā Sehova pea mo tona ʼofa makehe, ʼe tou taupau anai te fiafia ʼaē ʼe ina fakaʼiloga kehe ia te ʼu kaugana moʼoni ʼa Sehova. (Isaia 65:13, 14) ʼE feala ke tou fiafia ʼi te ʼu tapuakina ʼaē ʼe foaki e Sehova ki tana hahaʼi fuli, logola te ʼu meʼa ʼaē neʼe feala ke tou fakahoko takitokotahi. Ka tou haga ‘faikole pea mo kole mamahi ʼaki te fakafetaʼi,’ ʼe tou kolekole anai ki te ʼAtua ke tokoni mai ke tou faiga fakamalotoloto. ʼE mahino papau ia, ko “te tokalelei ʼa te ʼAtua, ʼaē ʼe māʼoluga ake ʼi te ʼu manatu fuli, ʼe ina taupau anai [totatou] ʼu loto pea mo [totatou] ʼu ʼatamai ʼaki ia Kilisito Sesu.” (Filipe 4:4-7, MN ) Ei, ʼe tou maʼu te loto fīmālie pea mo te lotomālohi ʼi tatatou ʼiloʼi ʼaē ʼe mole hāofaki tatou ʼuhi ko te ʼu gāue ʼaē ʼe tou fai, kae ʼe hāofaki tatou ʼuhi ko te ʼofa makehe ʼo Sehova!
He Koʼe ʼe Tou ʼUi Ko Te Kau Kilisitiano
• ʼe mole nātou laupisi ʼo ʼuhiga mo tanatou ʼu gāue?
• ʼe nātou tekeʼi te manatu fakataupiepie?
• ʼe nātou tohi tanatou ʼu kiʼi pepa tānaki ʼo te ʼu gāue faka Kilisitiano ʼaē neʼe nātou fai ʼi te minisitelio?
• ʼe mole nātou fakamāuʼi tonatou ʼu tēhina pea mo tuagaʼane ʼo te kokelekasio?
[Paki ʼo te pasina 15]
“Ko toku ʼofa makehe ʼe feʼauga kiā koe”
[Paki ʼo te pasina 17]
ʼE kaugā gāue te kau tagata ʼāfea ki te fiafia ʼo te kokelekasio kātoa
[Paki ʼo te pasina 19]
Kapau ʼe mole koutou tohi takotou kiʼi pepa tānaki gāue, pea ʼe mole kātoa anai te tānaki gāue faka malamanei ʼa te kau Fakamoʼoni ʼa Sehova