Ko Te ʼAtamai Tokalelei ʼi Te Sosiete Fakataupiepie
“KAPAU ʼe fia ʼuluaki he tahi,” neʼe tokoni age ia Sesu Kilisito ki tana kau ʼapositolo, “ ʼe tonu anai ke liliu ia ko te tukumuli ia nātou fuli pea ko te minisi ʼo nātou fuli.” Neʼe feʼekeʼaki e te kau ʼapositolo pe ko ai ʼaē ia nātou ʼe lahi ake. Neʼe nātou ʼiloʼi lelei ko Sesu ʼe fehiʼa ʼosi ki te taʼi faʼahiga manatu ʼaia. Neʼe mole ina fakaneke pe la he tahi ʼi tana kau tisipulo ke nātou fesiosioʼaki ke tupu ʼaki ai hana tuputupu ʼi te faʼahi fakalaumālie.—Maleko 9:33-37.
ʼI muʼa ʼo tana hifo mai ki te kele, neʼe kau ia Sesu Kilisito ki te fakatupu ʼaē ʼo te ʼuluaki taumatuʼa pea neʼe ina ʼiloʼi pe neʼe feafeaʼi tonā natula. (Kolose 1:15, 16) Neʼe fakatupu te ʼuluaki taumatuʼa ʼaki te fealagia ʼaē ke nā tuputupu ʼo mole fakahoko te faʼahi ʼaia ʼaki he fakataupiepie fakamālohi ki niʼihi. Neʼe mole tonu ke fetauʼaki te tagata ke ʼiloʼi pe ko ai ʼaē ka pule, pe ko hana fetauʼaki mo te ʼu manu ke nātou maʼuli ai.—Senesi 1:26; 2:20-24; 1 Kolonito 11:3.
Te Tupuʼaga ʼo Te Manatu ʼAē Ko Te Fakataupiepie
Koia ʼaē, neʼe koteā ʼaē neʼe liliu ai te manatu kovi ʼaia ʼaē ko te fakataupiepie ko he mālohi makehe ʼi te sosiete fakatagata? ʼAki te ʼuluaki fakapō ʼaē neʼe hoko ʼi te hisitolia ʼo te tagata ʼe ina fakamālamaʼi ʼaki te tagata ʼo ʼuhiga mo te fehuʼi ʼaia. Ko te manatu fakataupiepie ʼa Kaino, ʼaē ko te ʼuluaki foha ʼaia ʼo te ʼuluaki taumatuʼa, neʼe ina taki ia ia ki te tuʼutāmaki. Neʼe matehi e Kaino tona tēhina ko Apele koteʼuhi ko te sakilifisio ʼa Apele neʼe lelei ki te ʼAtua, kae ki ʼaē ʼa Kaino neʼe mole lelei ia. Pea ʼe fakahā e te Tohi-Tapu ko Kaino ʼaē “neʼe hifo mai te agakovi pea neʼe ina tāmateʼi tona tēhina.”—1 Soane 3:12; Senesi 4:4-8.
Ei, ʼaki te agakovi ʼaē ʼa Satana te Tevolo, te Tupuʼaga pea mo te Fakanekeʼaga ʼo te manatu fakataupiepie. Logope la ʼaē ko ia neʼe ko te foha fakaʼaselo ʼo te ʼAtua ʼaki tona ʼu pilivilesio lahi, neʼe mole feʼauga pe la kia te ia te ʼu meʼa ʼaia. (Vakaʼi ia Esekiele 28:14, 15.) ʼI tana fakalalata ʼaē ia Eva, neʼe ina fakahā aipe tona holi ʼo ia totonu. Neʼe ina ʼui age kapau ʼe ina kai te fuaʼi ʼakau ʼaē neʼe tapuʼi “ ʼe liliu moʼoni anai ia ohage ko te ʼAtua.” (Senesi 3:4, 5) Kae tālā ia neʼe ko Satana pe ʼaē neʼe fia tatau ki te ʼAtua, he neʼe fakatutuʼu ia kia Sehova. Ko te fakataupiepie ʼaia ki te ʼAtua ʼaē neʼe liliu ai ia ia ko te fakafeagai.—Sake 1:14, 15.
Ko te taʼi manatu ʼaia ʼe pikisia gafua. ʼAki te fakahala ʼaē ʼa Satana, ko te tokalelei ʼaē neʼe foaki e te ʼAtua ki te ʼuluaki famili neʼe puli leva ia. (Senesi 3:6, 16) Talu mai tana fakafeagai ʼaē ki te ʼAtua, ko Satana te Tevolo neʼe pule ki te malamanei, ʼo ina fakaneke te manatu fakataupiepie, ʼo toe feiā aipe ki tana kākāʼi ʼaē te tagata pea mo te fafine ke nā ʼui ko te fakamālohiʼi ʼo te fakataupiepie ko te kalavi ʼaia ʼo te manuʼia. Kae, ʼe fakahā e te Tohi-Tapu, ʼo fēnei: “Heʼe ko te meʼa ʼaē ʼe ʼi ai te fuaʼā pea mo te loto fia fakatauʼaki fai ʼe ʼi ai te maveuveu pea mo te ʼu faʼahiga meʼa kovi kehekehe.” (Sake 3:14-16) Koia neʼe kaihaʼa ai e Satana te fīmālie ʼa te tagata pea mo te tokalelei ʼo tona ʼatamai.
Manuʼia Kae Mole ʼAki He Fakataupiepie
ʼO kehekehe ʼosi ia mo te fakanekeneke ʼa Satana, ʼe fakahā e te Tohi-Tapu te ʼu faʼifaʼitaki fua lelei ʼe mole hona pikipikiga mo te fakataupiepie. ʼUluaki faʼifaʼitaki maʼuhiga ko Sesu Kilisito. Logope tana maʼuli ʼi te natula Fakaʼatua, neʼe mole manatu ia ʼi he temi ke liliu ohage ko te ʼAtua, kailoa neʼe liliu ia ko te kaugana, ʼo hifo mai ia ki te kele. ʼO mole gata ʼaki aipe, neʼe ina haga ʼo fakamālaloʼi ia ia totonu pea neʼe talagafua ʼo aʼu ki te mate ʼi te pou fakamamahi. Ko te aga fakalogo ʼaia, ʼaē ʼe mole pipiki ki te loto fakataupiepie, ʼe maʼu ai te ʼofa fakaʼatua. “Ko te tahi la ʼaenā tupuʼaga ʼo tona hikihiki ʼaē e te ʼAtua ki te tuʼulaga māʼoluga pea mo ina foaki fakalelei age te higoa ʼaē ʼe māʼoluga age ʼi te higoa fuli pe.” (Filipe 2:5-9) Koteā he toe mālo neʼe feala ke fai e he tahi? Neʼe ina fakafiafia lahi tana Tāmai he ko he meʼa ia neʼe mole lavaʼi e he tahi, pea ko te meʼa ʼaia neʼe mole ina fai ʼaki he loto fakataupiepie.—Tāʼaga Lea 27:11.
Ko te ʼu tuʼuga ʼaselo agatonu ʼaē ʼi selo ʼe nātou fakahā te taʼi aga pe ʼaia. Logope la ʼaē ko Sesu neʼe ko te pule ʼo te kau ʼaselo, neʼe liliu ia ʼo veliveli age ia nātou ʼi te temi ʼaē neʼe haʼu ai ki te kele, neʼe nātou kaugana fakalelei aipe ki tana ʼu meʼa. ʼE ʼiloga ia, neʼe mole nātou manatu pe la ʼi te moʼi temi faigamālie ʼaia ke nātou māʼoluga ake ia te ia pea mo faigaʼi ke nātou fakamālaloʼi ia ia ʼi tona ʼuhiga Alekaselo.—Mateo 4:11; 1 Tesalonika 4:16; Hepeleo 2:7.
Ko tanatou fehiʼa likoliko ki te ʼu aga fakataupiepie ʼe toe ʼiloga lelei mokā ʼe tou vakaʼi tanatou tali ʼaē ki te fakatuʼutuʼu ʼa te ʼAtua ʼo ʼuhiga mo te hikihiki ʼaē ʼo ni hahaʼi heʼe haohaoa ki te maʼuli fakalaumālie tuputupua, ʼaē ko he faʼahiga maʼuli ʼe nātou liliu ai anai ʼo “fakamāu te kau ʼaselo.” (1 Kolonito 6:3) Ko te kau ʼaselo ʼe lahi te ʼu meʼa ʼe nātou ʼiloʼi ʼi tanatou kaugana ʼaē kia Sehova pea lahi age tanatou ʼu fealagia ʼi ʼaē ʼo te tagata heʼe haohaoa ʼo ʼuhiga mo te fai ʼo ni ʼu meʼa ʼe lelei. Pea kaugana fakafiafia te kau ʼaselo ki te kau Kilisitiano fakanofo ʼaē ʼi te kele, ʼe mole nātou fuaʼā pe la kia nātou ʼaia ʼo ʼuhiga mo te ʼu meʼa ʼaē ka nātou maʼu anai. (Hepeleo 1:14) Ko tanatou aga lelei pea mo tanatou mole fakataupiepie ʼe faka fealagia kia nātou ke hoholo atu tanatou kaugana ʼi muʼa ʼo te nofoʼaga hau ʼo te Pule ʼAliki ko Sehova.
Koia ʼaē, koutou fakakaukau age ki te ʼu kaugana agatonu ʼo te ʼAtua ʼi te ʼu temi muʼa ʼaē ka fakatuʼuake anai ʼi te kele. Ko Apalahamo neʼe ko he faʼifaʼitaki fakaofoofo ʼo ʼuhiga mo te tui pea neʼe higoaʼi ia ia “ko te tāmai ʼo nātou fuli ʼaē ʼe tui.” (Loma 4:9, 11) Neʼe tuku e Sopo te faʼifaʼitaki ʼaoga ʼo ʼuhiga mo te lotoʼutaki. (Sake 5:11) Ko Moisese, “neʼe ko ia tokotahi neʼe agavaivai ʼi te ʼu tagata fuli neʼe nonofo ʼi te fuga kele,” neʼe ina taki te hahaʼi ʼo Iselaele ki te ʼāteaina. (Faka au 12:3) Ko ai ʼi te ʼu tagata heʼe haohaoa neʼe nātou tuku he tahi age faʼifaʼitaki lelei ʼo ʼuhiga mo te tui, mo te lotoʼutaki, pea mo te agavaivai ia nātou ʼaia? Koia, ʼe nātou maʼu leva te nofoʼaga fakakelekele ʼaē ʼo te Puleʼaga ʼo te ʼAtua. (Mateo 25:34; Hepeleo 11:13-16) Ohage ko Soane Patita, ʼe nātou veliveli age ʼosi ʼi “ ʼaē ʼe veliveli ʼi te puleʼaga ʼo selo.” (Mateo 11:11) ʼE nātou meo anai koa, ʼo nātou fakahā ko tanatou tui, tanatou lotoʼutaki, peʼe ko tanatou agavaivai ʼe tatau peʼe ko ʼihi faʼahi ʼe nātou fakalaka ia nātou ʼaē neʼe foaki ake te maʼuli ʼaē ʼi selo? Kailoa ia! ʼE nātou fiafia anai ʼi tanatou liliu ko te kau gāue fakakelekele ʼo te Puleʼaga ʼo te ʼAtua.
ʼI te temi nei pe foki, ko te hahaʼi ʼaē ʼe mole loto fakataupiepie ʼe lelei te maʼuʼuli mo nātou. Ko Yasuo, ʼaē neʼe tou talanoa kiai ʼi te ʼuluaki alatike, neʼe lahi tona ʼu maʼua ʼi te gaohi fakakākā ʼo te aulo pea neʼe puli fuli tona ʼu koloā. Ko tona ʼu “kaumeʼa” neʼe nātou līaki ia ia. ʼI te kua kamata ako ʼo tona ʼohoana mo te kau Fakamoʼoni ʼa Sehova, neʼe ʼalu ia ki tanatou ʼu fono ʼaki he loto fakahemala ʼuhi ko te mamahi ʼaē neʼe ina fai ki tona famili. Pea neʼe ina toʼo kehe ia te ia te manatu fakataupiepie pea kua liliu nei ko te Fakamoʼoni ʼa Sehova. ʼI te temi nei ʼe fiafia ʼi tana maʼuli fakatahi mo tona ʼu kaumeʼa Kilisitiano, te taʼi faʼahiga kaumeʼa ʼaē ʼe tokoni fakalelei kia te ia ʼi te ʼu temi faigataʼa.
E Feafeaʼi Te Taupau ʼo Te ʼAtamai Tokalelei
ʼE faigataʼa ia te taupau tuʼumaʼu ʼo he ʼatamai tokalelei ʼi he sosiete heʼe manavaʼofa pea mo fakataupiepie. ʼE tonu ke tou fakatokagaʼi fakalelei ko te Tohi-Tapu ʼe ina tauteaʼi te ʼu “fehiʼa, te kē, te fuaʼā, te ʼita, te ʼu fihi, te ʼu maveuveu, te ʼu magaʼi lotu, te ʼu mānumānu” ohage ko ni ʼu “gāue ʼo te kakano” ʼe mole nātou faka fealagia ki te hahaʼi ke nātou maʼu te Puleʼaga ʼo te ʼAtua. Ko te ʼu gāue fuli ʼaia ʼe pipiki ki te manatu fakataupiepie. ʼO mole fakapuna’maʼuli kia tatou te tokoni ʼaenī ʼa te ʼapositolo ko Paulo ki te kau Kalate: “ ʼAua naʼa tou fetetekiʼaki, ʼo tou fefakatupu he loto ki he fakataupiepie mo femahekaʼaki.”—Kalate 5:19-21, 26.
ʼI te ʼu vaega ʼaē ʼe nātou ʼaofi ʼaki ai te manatu ʼaia, neʼe fakahā e te tohi ʼa Paulo te kalavi ʼaē moʼo fakafeagai ki te fakataupiepie ʼaē ʼo te manatu pe kia kita totonu. Neʼe ina ʼui: “Kae, ko te fua ʼo te laumālie, ko te ʼofa, te fiafia, te tokalelei, te manavaʼofa, te finegaloʼofa, te agalelei, te tui, te agamālū, te lotoʼutaki. Ki he ʼu meʼa fēnei ʼe mole he lao.” (Kalate 5:22, 23) Ko te fua ʼo te laumālie ʼe tokoni kia tatou moʼo fakafimālie ʼo totatou ʼatamai mai te loto fakataupiepie. Koutou fakatokagaʼi muʼa, te kalitate ʼaē ʼo te ʼofa. “Ko te ʼofa ʼe mole fuaʼā,” ko te fakamatala ʼaia ʼa Paulo. “ ʼE mole laupisi, ʼe mole fialahi, ʼe mole aga fakavale, ʼe mole tokaga pe ki te meʼa ʼa kita, ʼe mole ʼita ia.” (1 Kolonito 13:4-7) ʼAki te fakatuputupu ʼo te ʼofa, ʼe feala ke tou toʼo te fuaʼā, ʼaē ko he mālohi ʼe ina taki ki te manatu fakataupiepie. Ko ʼihi fua ʼo te laumālie ʼe toe tokoni kia tatou ke tou toʼo ʼi ʼotatou loto pea mo totatou ʼatamai te ʼu faʼahiga meʼa kei pipiki ki he manatu fakataupiepie kovi. Koia ʼaki he loto lolomi ʼe feala aipe ke pulihi he ʼu faʼahiga manatu ki te fakataupiepie ʼi te loto ʼo niʼihi age!—Tāʼaga Lea 17:27.
ʼO mole gata ʼaki pe te taupau ʼo te ʼu kalitate ʼaia, ʼe tonu ke tou tuku te laumālie ʼo te ʼAtua ke gāue ia tatou. ʼE feala ke tou fakaloto mālohiʼi te gāue fakamālōlō ʼaia ʼo te laumālie maʼoniʼoni ʼaki hatatou haga faikole pea mo kole ki te laumālie ʼo te ʼAtua ke tokoni mai kia tatou. (Luka 11:13) Moʼo tali ki ʼatatou ʼu faikole, koteā te meʼa ʼe fakapapau mai e te ʼAtua kia tatou? ʼE tali fēnei e te Tohi-Tapu: “ ʼAua naʼa koutou tuʼaniaʼi he meʼa, kae ia meʼa fuli, ʼaki te faikole pea mo te ʼu fakakolekole ʼaki he ʼu fakafetaʼi, koutou fakahā takotou ʼu kole ki te ʼAtua; pea ko te tokalelei ʼa te ʼAtua, ʼaē ʼe māʼoluga age ʼi te ʼu manatu fuli, ʼe ina taupau anai tokotou ʼu loto pea mo ʼakotou ʼu fealagia fakakaukau ʼaki ia Kilisito Sesu.”—Filipe 4:6, 7.
Ko te meʼa ʼaia neʼe ʼiloga ʼi te kau ʼapositolo ʼa Sesu. Tatau aipe ʼi te ʼosi fakatuʼu ʼaē e Sesu ʼo te Taumafa ʼo te ʼAliki ʼi tona po fakaʼosi ʼaē mo tana kau ʼapositolo, neʼe nātou toe fihi aipe pe ko ai ʼaē ia nātou ʼe lahi ake. (Luka 22:24-27) ʼI te ʼu ʼaluʼaga kehekehe neʼe tokoni aipe Sesu kia nātou ke nātou fakatonutonuʼi tanatou ʼu manatu, kae ko te aga fakataupiepie ʼaia neʼe mālohi ʼosi ia nātou. (Maleko 9:34-37; 10:35-45; Soane 13:12-17) Kae ʼi tanatou maʼu leva ʼaē ʼo te laumālie maʼoniʼoni ia ʼaho e 50 ki muli age ʼo tanatou fihi ʼaia, ko tanatou aga neʼe fetogi. Neʼe mole toe ʼi ai he fihi pe ko ai anai ia nātou ʼaē ka palalau ki te kaugamālie fia ʼiloʼi meʼa fuli ʼaē neʼe fakatahi age kia nātou ʼi te ʼaho ʼo te Penikosite.—Gāue 2:14-21.
Neʼe mole faka fealagia ʼi te kokelekasio faka Kilisitiano ke ʼi ai he faʼahiga pule fakatagata. ʼI te temi ʼaē neʼe tonu ke nātou fakatokatoka te fihifihia ʼo ʼuhiga mo te silikosisio, ko Sake ʼaē neʼe mole heʼeki liliu ko te tisipulo ʼi te temi ʼaē neʼe mate ai Sesu, neʼe ko ia ʼaē neʼe ina takitaki te fono maʼuhiga ʼaia. Neʼe mole ʼi ai pe la he fakafihi pe ko ai anai ʼaē ka ina takitaki te fono ʼo te kolesi pule ʼo te kokelekasio faka Kilisitiano. ʼE ko he meʼa kehekehe ʼosi mo te temi ʼaē neʼe maʼu ai e te kau ʼapositolo te manatu fakataupiepie! ʼAki te tokoni ʼa te laumālie maʼoniʼoni, neʼe nātou manatuʼi te ʼu akonaki ʼa Sesu pea neʼe nātou kamata mahino ki te ʼuhiga ʼo tana ʼu ako.—Soane 14:26.
Ko te meʼa ʼaia ʼe feala pe ke toe hoko kia tatou. ʼAki te laumālie maʼoniʼoni, ʼe feala ke tekeʼi te ʼu faʼahiga meʼa ʼaē ʼe uga kita ki he loto fakataupiepie ki niʼihi ke tou haʼele ki muʼa ʼuhi ko nātou. ʼE feala ke tou maʼu te tokalelei ʼo te ʼatamai ʼaē ʼe māʼoluga age ʼi te ʼu manatu fuli. ʼE fakahā fakalelei mai e te Tohi-Tapu ko te matapuna ʼo te fakataupiepie, ko Satana te Tevolo, ka vave lī anai ki te luo, koga meʼa ʼe mole gāue ai. (Fakahā 20:1-3) Ko te loto fakataupiepie ʼaē ʼe hā ʼi te hahaʼi ʼe mole toe ʼi ai anai. ʼE fua anai koa ko he sosiete ʼe mole toe tuputupu anai? Kailoa ia! ʼE hikihiki anai te tagata ki te maʼuli haohaoa, ʼo mole ʼi ai he loto fakataupiepie ia nātou, kae ʼaki te fakaʼaogaʼi ʼo te sakilifisio faitotogi ʼo Sesu kia nātou.—1 Soane 2:1, 2.
Ko Keinosuke ʼaē neʼe tou talanoa kiai ʼi ʼoluga atu, ʼaē neʼe kua ina ʼiloʼi te kolōlia ʼo te manuʼia ʼi te malamanei ʼuhi he neʼe ina fakatau ʼaupito te ʼu tuʼuga motokā, neʼe vaivai fakaʼatamai pea mo fakasino, kae kua ina līaki tana gāue. “ ʼI te temi nei, ko toku maʼuli ʼe kua fonu ʼi te manuʼia moʼoni,” ko tana ʼui ʼaia. Kua mahino leva kia ia pe koteā ʼaē ʼiloga ai ʼi te maʼuli ʼo Sesu te manuʼia moʼoni. ʼI te temi nei, ʼe fiafia pe ia ʼi te ʼu meʼa fuli ʼaē ʼe feala ke ina fai ʼi te kokelekasio faka malamanei ʼa te ʼAtua. ʼO feala ai kia ia ke teuteu ki te mālama foʼou, ʼaē ʼe mole toe ʼi ai anai he loto fakataupiepie. ʼE feala foki ke koutou sio mamaʼo ki te sosiete ʼo te mālama foʼou ʼaki hakotou ʼolo ʼo mamata ki he fale ʼi te ʼu Fale ʼo te Puleʼaga ʼaē ʼe tuʼu ʼi te koga meʼa ʼaē ʼe koutou nonofo ai pea mo koutou fakatahi ki te kau Fakamoʼoni ʼa Sehova.
[Paki ʼo te pasina 7]
Ko te tokalelei pea mo te kaugā gāue ʼe maʼu anai e te sosiete ʼo te tagata ʼi te mālama foʼou