Te ʼu Fehuʼi ʼa Te Kau Lautohi

ʼE tou lau fēnei iā Teutalonome 14:21: “ ʼAua naʼa koutou kai he manu kua mate.” ʼE fakafeagai koa ki te koga tohi ʼo Levitike 11:40 ʼaē ʼe ʼui fēnei ai: “Ko ʼaē ʼe ina kai anai te sino mate ʼaia ʼe ina fō anai tona ʼu mutuʼi meʼa, pea ʼe heʼemaʼa anai ʼo aʼu ki te afiafi; pea ko ʼaē ʼe ina hiki anai te sino mate ʼaia, ʼe ina fō anai tona ʼu mutuʼi meʼa pea ʼe heʼemaʼa anai ʼo aʼu ki te afiafi”?

ʼE mole fefakafeagaiʼaki te ʼu vaega ʼaenī. Ko te ʼuluaki vaega ʼe ina toe fakamanatuʼi te tapu ʼaē ke ʼaua naʼa kai he manu neʼe maʼu atu kua mate, lagi ko he manu neʼe matehi e he ʼu manu fekai. (Ekesote 22:31; Levitike 22:8) Ko te lua vaega ʼe ina fakamahino te meʼa ʼaē ʼe tonu ke fai e he tagata Iselaele mo kapau neʼe ina maumauʼi te tapu ʼaia, he neʼe lagi mole ina ʼiloʼi ia te faʼahi ʼaia.

Ko he meʼa neʼe tapuʼi ʼi te Lao neʼe mole faka ʼuhiga leva ia ʼe mole feala ia ʼi ʼihi temi ke mole tokagaʼi. Ohage la, neʼe ʼi ai te ʼu lao ʼo ʼuhiga mo te kaihaʼa, mo te fakapō, mo te fai ʼo he ʼu fakamoʼoni loi, pea mo te tahi age ʼu meʼa. Kae neʼe ʼi ai mo te ʼu tūʼā mo kapau neʼe maumauʼi te ʼu lao ʼaia. Neʼe fakamālohiʼi e te ʼu tūʼā ʼaia ia te ʼu lao pea mo fakahā ai te maʼuhiga ʼo te ʼu lao.

Ko he tahi neʼe ina maumauʼi te lao ʼo ʼuhiga mo te kai ʼo he manu neʼe maʼu kua mate, neʼe liliu ʼo heʼemaʼa kiā mata ʼo Sehova, pea neʼe tonu ke ina muliʼi te ʼu fakatuʼutuʼu ʼaē neʼe ʼaoga ki tona fakamaʼa. Kapau neʼe mole mulimuli fakalelei ki te fakamaʼa ʼaia, ‘pea neʼe ina utu te ikuʼaga ʼo tana hala.’​—Levitike 17:​15, 16.