ʼE Koutou Meʼa Noaʼi Koa Ia Koutou Totonu?
ʼO AʼU ki tona teitei taʼu 30, ko Lena neʼe ina tauʼi te ʼu manatu ʼe mole lelei ʼo ʼuhiga mo ia. Neʼe ina ʼui fēnei: “Neʼe fakaʼalikiʼi au ʼi taku kei veliveli, pea neʼe mole kei ʼi ai hoku matagafua. Maʼaku neʼe mole kei ʼi ai hoku ʼaoga.” ʼO toe feiā mo Simone, ʼe ina manatuʼi tona temi finemui pea ina ʼui fēnei: “Neʼe mole kei au fiafia pea neʼe au tui neʼe mole au maʼuhiga.” ʼI te temi nei, kua mafola te lotomamahi lahi ʼa te hahaʼi ʼuhi ko te ʼu faʼahiga manatu ʼaia. Ko te kautahi neʼe fakatuʼu moʼo fakalogo ki te kau tūpulaga ʼi te telefoni, ʼe ina ʼui ʼi te ʼu fai telefoni ʼaē ʼe nātou tali kiai, ko te teitei vaelua ʼe ko te kau tūpulaga ʼe nātou fakahā tanatou “manatu tuʼumaʼu pe ʼaē ʼe mole honatou maʼuhiga.”
ʼE ʼui e ʼihi tōketā, ʼe manatu e te hahaʼi ʼe mole nātou maʼuhiga mokā ʼe ʼui age e te hahaʼi ʼe nātou feiā. ʼE feala ke tupu he ʼu manatu feiā mokā munaʼi tuʼumaʼu pe he tahi ʼuhi ko he hala neʼe ina fai, peʼe valokiʼi peʼe gaohi koviʼi. Tatau aipe peʼe koteā tona tupuʼaga, kae ʼe feala ke liliu he tahi ʼo lotovaivai pea mo fia fakamate. Mole heʼeki faʼa fualoa, neʼe fai te sivi neʼe fakahā ai ko te hahaʼi ʼaē ʼe mole nātou maʼu he ʼu manatu ʼe lelei ʼo ʼuhiga mo nātou, ʼe mole nātou falala kiā nātou pea ki ʼihi, ʼo nātou maumauʼi ai he ʼu felogoi lelei pea mo he ʼu fakakaumeʼa lelei, kae neʼe mole nātou loto kiai. ʼE ʼui ʼi te fakamatala ʼo ʼuhiga mo te sivi ʼaia: “ ʼE feala ke tou ʼui ʼe ko nātou totonu ʼaē ʼe nātou ‘fakatupu’ te ʼu ʼaluʼaga ʼaē ʼe nātou mātataku lahi ai.”
Ko te hahaʼi ʼaē ʼe nātou maʼu he ʼu manatu feiā, ʼi te agamāhani ʼe ko nātou ʼaē ʼe ʼui ʼi te Tohi-Tapu ʼe ‘hoha lahi tanatou ʼu fakakaukau.’ (Pesalemo 94:19) ʼE nātou manatu ʼe mole he meʼa lelei ʼe nātou fai. Ka hoko he meʼa kovi, pea ʼe nātou ʼui atu aipe ʼe ko tanatou ia hala. Logola ʼe vikiʼi nātou e ʼihi ʼo ʼuhiga mo te ʼu meʼa neʼe nātou fai, kae ʼi tonatou loto ʼe mole nātou leleiʼia pea ʼe hā anai ʼi he temi ki muli age. ʼI tanatou tui ʼaē ʼe mole tāu mo nātou ke nātou māʼuʼuli fiafia, ko ʼihi ʼe nātou fai he ʼu aga ʼe fua kovi ʼaupito kiā nātou, pea ʼe nātou manatu ʼe mole feala ke nātou fetogi. Ko Lena, ʼaē neʼe tou talanoa ki ai ʼi te kamata, neʼe mole kei kai lelei he neʼe kua ina meʼa noaʼi ia ia totonu, pea ʼe ina ʼui fakalelei fēnei: “Neʼe hage kiā au ʼe mole feala haku fetogi te ʼaluʼaga ʼaia.”
Ko nātou ʼaē ʼe ‘hoha lahi tanatou ʼu fakakaukau’ ʼe mole feala koa ke nātou fetogi ʼi he temi? ʼE mole ʼi ai koa he puleʼaki moʼo tauʼi te ʼu manatu ʼaia? ʼE fakahā ʼi te Tohi-Tapu te ʼu pelesepeto pea mo te ʼu tokoni neʼe ʼaoga ki te hahaʼi tokolahi moʼo fetogi te ʼu manatu ʼaia. Koteā ʼihi ʼu pelesepeto, pea neʼe tokoni feafeaʼi kiā nātou ʼaē ʼe lotomamahi ke nātou maʼuli fiafia? ʼE tou vakaʼi anai ia te faʼahi ʼaia ʼi te alatike ʼaē ka hoa mai.