Te ʼu Fehuʼi ʼa Te Kau Lautohi
E feala koa ʼaki te ʼu gaoʼi viteo agamālohi ke fua kovi ki tatatou ʼu felogoʼi lelei mo Sehova?
Neʼe tohi fēnei e Tavite, te hau ʼo Iselaele ʼo te temi muʼa: “Ko Sehova totonu ʼe ina sivisivi te tagata agatonu pea mo te tagata agakovi, pea ko ʼaē ʼe manako ki te agamālohi, ʼe mahino ia, ʼe fehiʼa ki ai Tona nefesi.” (Pesalemo 11:5) ʼI te faka Hepeleo ko te kupu “fehiʼa” ʼe lava faka ʼuhiga “ki he tahi ʼe ko he fili.” ʼO mahino mai, ko ʼaē ʼe manako ki te agamālohi ʼe liliu ia ko he fili ʼo te ʼAtua. Kae ʼe maʼua ke tou fai te fehuʼi ʼaenī: ʼE feala koa ʼaki te ʼu gaoʼi viteo agamālohi ke ina fakatupu iā tatou ia te manako ki te agamālohi?
Ko te ʼu gaoʼi viteo agamālohi ʼe nātou fakavikiviki te fakaʼaogaʼi ʼo te ʼu mahafu tau. ʼI te agamāhani, ʼe nātou ako kiā ia ʼaē ʼe gaoʼi te poto tau. Neʼe tohi ʼi te nusipepa The Economist: “ ʼE akoako te foʼi solia Amelika ʼaki te ʼu gaoʼi viteo. ʼE ʼi ai te ʼu gaoʼi ʼe fakaʼaogaʼi e te kau solia ʼe fakatau ki te hahaʼi fuli.”
ʼE moʼoni, ko nātou ʼaē ʼe gaoʼi mo te ʼu gaoʼi viteo agamālohi, ʼe mole nātou fai moʼoni he ʼu meʼa kovi ki te hahaʼi. Kae koteā ʼaē ʼe hā ai ʼo ʼuhiga mo tonatou loto mokā ʼe nātou filifili te ʼu gaoʼi feiā? (Mateo 5:21, 22; Luka 6:45) Koteā takotou manatu ʼo ʼuhiga mo he tahi ʼe ina leleʼia te fuhu mo te tau heletā, mo te fanahi ʼo he tahi ke lavea kovi pea mo matematehi te hahaʼi? Koteā takotou manatu ʼo ʼuhiga mo he tahi ʼe nofo pe ia ʼo fakaʼaogaʼi tona temi ʼi te vāhaʼa fuli, moʼo fafaga ʼo tona loto ʼaki te ʼu agamālohi, ʼo liliu ai ko he tahi kua vale pe ia ki te ʼu taʼi gaoʼi viteo ʼaia? Tatau aipe peʼe mole koutou manatu feiā, kae ʼe feala pe ke tou ʼui ʼe ina fafaga tana manako ki te agamālohi, ohage pe ko ia ʼaē ʼe ina sioʼi he ʼu ʼata ʼe fakahā ai he ʼu felāveʼi fakasino fakalialia, ʼe ina fafaga tana holi ʼaē ki te ʼu aga heʼeʼaoga.—Mateo 5:27-29.
ʼE mālohi feafeaʼi koa te fehiʼa ʼa Sehova kiā ia aē ʼe manako ʼi te agamālohi? Neʼe ʼui e Tavite, ko Sehova “ ʼe fehiʼa moʼoni” kiā ia. ʼI te temi ʼo Noe, neʼe fakahā e Sehova tana fehiʼa lahi kiā nātou ʼaē ʼe nātou manako ki te agamālohi. Neʼe ʼui fēnei e Sehova kiā Noe: “Ko te fakaʼosi ʼo te kakano fuli kua aʼu mai ki ʼoku muʼa, heʼe ko te kele kua fonu ʼi te agakovi ʼuhi ko nātou; pea koʼeni ʼe au fakaʼauha nātou mo te kele.” (Senesi 6:13) Neʼe haga te ʼAtua moʼoni ʼo tauteaʼi te hahaʼi ʼo te malamanei kātoa ʼuhi ko tanatou agakovi. Neʼe ina hāofaki pe ia Noe mo tona famili—te ʼu hahaʼi e toko valu aē neʼe mole manako ki te agamālohi.—2 Petelo 2:5.
Ko nātou ʼaē ʼe fia kaumeʼa mo Sehova ʼe tonu ke nātou “tuki tanatou ʼu heletā ke liliu ko he ʼu huo fuli kele pea mo tanatou ʼu tao ke liliu ko he ʼu pipi moʼo sipi vaʼa ʼakau.” ʼO lītuʼa ki te manako ki te agamālohi, ʼe mole kei nātou ‘ako ia te tau.’ (Isaia 2:4) Ke feala hatatou kaumeʼa lelei mo te ʼAtua, kae ke ʼaua naʼa tou liliu ko hona fili, ʼe maʼua ke tou “maliu kehe mai te meʼa ʼaē ʼe kovi pea ke tou fai te meʼa ʼaē ʼe lelei.” ʼE tonu ke tou “kumi te tokalelei pea ke [tou] haga muliʼi.”—1 Petelo 3:11, MN.
ʼE feafeaʼi mo kapau kua tou māhani ʼi te ʼu gaoʼi viteo agamālohi? ʼE tonu ke tou fai he fakatuʼutuʼu mālohi ke tou fakafiafia te loto ʼo Sehova, ʼo tou fehiʼa ki te ʼu meʼa ʼaē ʼe fehiʼa kiai. ʼE tou faikole anai ke tokoni mai te laumālie maʼoniʼoni ʼo te ʼAtua ke feala hatatou tuku ia te aga ʼaia ʼaē ʼe fakatupu tuʼutāmaki ʼi te faʼahi fakalaumālie. ʼE feala ke tou tuku mo kapau ʼe tou tali ke gāueʼi totatou ʼulugaaga e te ʼu kalitātē fakaʼatua, ohage ko te tokalelei, mo te agalelei pea mo te loto lolomi.—Luka 11:13; Kalate 5:22, 23.