Te Poto ʼi Te Fagono ʼAki Te ʼOfa

“ ʼE AU fakamālo atu ki tau fagono mai.” Neʼe kua ʼui atu koa he meʼa feiā kiā koutou e he tahi? ʼE ko he palalau lave lelei! ʼE teitei ko te hahaʼi fuli ʼe nātou leleiʼia ia ia ʼaē ʼe fagono fakalelei. ʼI tatatou fagono fakalelei, ʼe tou lava fakafimālieʼi ia nātou ʼaē ʼe lotomamahi peʼe mafasia ʼi te ʼu fihifihia. Ko tatatou fagono fakalelei ki te hahaʼi ʼe tokoni mai kiā tatou ke tou ʼoʼofa kiā nātou. ʼI te kokelekasio faka Kilisitiano, ko te fagono ʼaki te ʼofa ʼe ko he koga maʼuhiga ʼo te ‘fetokagaʼaki ke tou feʼugaʼaki ki te ʼofa pea mo te ʼu gāue matalelei.’​—Hepeleo 10:⁠24.

Kae tokolahi te hahaʼi ʼe mole ko he ʼu hahaʼi ʼe nātou fagono fakalelei. ʼE nātou leleiʼia te fai tokoni, te fakamatala te ʼu meʼa ʼaē neʼe hoko kiā nātou, peʼe nātou fakahā tanatou manatu kae ʼe mole nātou fagono fakalelei ki te meʼa ʼaē ʼe fakamatala age e ʼihi. Ko te fagono ʼe ko he poto ia. ʼE tou lava ako feafeaʼi te fagono ʼaki te ʼofa?

Ko He Faʼahi Maʼuhiga

Ko Sehova ko totatou “Faiako Lahi.” (Isaia 30:20) ʼE lahi te ʼu meʼa ʼe ina lava akoʼi mai ʼo ʼuhiga mo te fagono. Tou vakaʼi age muʼa ia te faʼahiga fai tokoni ʼa Sehova ki te polofeta ko Elia. ʼI tana tuʼania ki te ʼu fakamatakutaku ʼa te Hau Fafine ko Sesapele, neʼe hola ia Elia ki te toafa pea mo ina fakahā kiā Sehova ʼe fia mate. Neʼe palalau age ai te ʼāselo ʼa te ʼAtua kiā ia. ʼI te fakahā age e te polofeta tana tuʼania, neʼe fagono ia Sehova pea mo ina fakahā age Tona Māfimāfi. Neʼe koteā tona fua kiā Elia? Neʼe mole kei mataku, pea neʼe ina toe fakahoko te gāue ʼaē neʼe hinoʼi age ki ai. (1 Hau 19:​2-15) He koʼe ʼe toʼo e Sehova ia he temi ke fagono ai ki te ʼu tuʼania ʼo tana ʼu kaugana? Koteʼuhi ʼe tokaga kiā nātou. (1 Petelo 5:7) Koʼeni te ʼu faʼahi maʼuhiga ʼe tonu ke kita mulimuli kiai ke feala hakita liliu ko he tahi ʼe fagono fakalelei: ko te tokaga ki te hahaʼi, pea mo te ʼofa fakamalotoloto kiā nātou.

ʼI Bolivie, neʼe fai e te tagata tana aga ʼe kovi ʼaupito, pea neʼe fakafetaʼi ki te ʼofa ʼo tona tēhina ʼi te tui. ʼE ina fakamahino fēnei: “Neʼe fakaʼofaʼofa ʼosi toku maʼuli ʼi te temi ʼaia. Neʼe lagi feala pe ke au higa gafua mo kanapaula neʼe mole toʼo he temi e te tēhina ke fagono mai kiā au. Neʼe mole lahi te meʼa ʼaē neʼe ina ʼui mai, kae ko taku ʼiloʼi ʼaē neʼe tokaga moʼoni ʼo fagono mai neʼe fakaloto mālohi kiā au. Neʼe mole ʼaoga ia ke fakahā mai he puleʼaki, kae neʼe au ʼiloʼi te meʼa ʼaē neʼe tonu ke au fai. Neʼe ʼaoga mai pe kiā au ke au ʼiloʼi neʼe ʼi ai te tahi neʼe tokaga mai ki te meʼa ʼaē neʼe au logoʼi. Ko tana fagono mai neʼe ina hāofaki au ke ʼaua naʼa lahi fau taku heʼe ʼamanaki.”

Ko te Faʼifaʼitaki lahi ʼo ʼuhiga mo te fagono lelei ʼaki te ʼofa ʼe ko Sesu Kilisito. Mole faʼa fualoa ki te ʼosi mate ʼa Sesu, ko tana ʼu tisipulo e toko lua neʼe nā ʼōmai mai Selusalemi ʼo ʼolo ki te kolo veliveli ʼe tuʼu iā kilometa e 11. ʼE ʼiloga neʼe nā lotomamahi. Koia ko Sesu Kilisito ʼaē neʼe kua fakatuʼuake neʼe kamata haʼele fakatahi mo nāua. Neʼe ina lagaʼi te ʼu fehuʼi ke feala hanā fakahā te ʼu meʼa ʼaē neʼe nā lotomamahi ai. Neʼe nā fakahā te ʼu meʼa ʼaē neʼe nā fakaʼamu kiai, pea mo tanā lotomamahi pea mo tanā mole ʼiloʼi te meʼa ʼaē neʼe tonu ke nā fai. Neʼe tokaga ia Sesu kiā nāua, pea ko tana fagono kiā nāua ʼaki te ʼofa neʼe teuteuʼi ai ia te ʼu tisipulo ʼaia e toko lua ke nā fagono. Pea ko Sesu “neʼe ina fakamahino age kiā nāua te ʼu meʼa ʼo ʼuhiga mo ia ʼi te Tohi kātoa.”​—Luka 24:​13-27, MN.

Ko tatatou fagono ʼaki te ʼofa ki ʼihi ʼe ina faka fealagia ai ke nātou fagono mai kiā tatou. ʼE ʼui fēnei e te fafine Bolivie: “Neʼe valokiʼi taku ako fānau e taku ʼu mātuʼa mo te ʼu mātuʼa ʼo toku ʼohoana. Neʼe au ʼita ki ʼanatou palalau, kae neʼe hage neʼe au lotolotolua ki toku ʼuhiga faʼē. ʼI te temi ʼaia, neʼe ʼaʼahi au e te Fakamoʼoni ʼa Sehova. Neʼe palalau mai ʼo ʼuhiga mo te ʼu fakapapau ʼa te ʼAtua. Kae neʼe ko tana fehuʼi mai peʼe koteā taku manatu, ʼaē neʼe au ʼiloʼi ai ko te fafine ʼaia neʼe fia fagono ki taku ʼu palalau. Neʼe au fakahū mai ia ia ki toku ʼapi, pea neʼe au kamata fakamahino age toku fihifihia. Neʼe fagono fakalelei mai. Neʼe ina fehuʼi mai peʼe koteā te meʼa ʼaē neʼe au loto ke au fai maʼa taku fānau pea neʼe koteā te manatu ʼo toku ʼohoana ʼo ʼuhiga mo te faʼahi ʼaia. Neʼe ko he fakaloto fīmālie ʼaia kiā au taku sio ʼaē ki he tahi ʼe faiga ke mahino mai kiā au. ʼI tana kamata fakahā mai peʼe koteā te meʼa ʼaē ʼe ʼui ʼi te Tohi-Tapu ʼo ʼuhiga mo te maʼuli faka famili, neʼe au ʼiloʼi ai neʼe au palalau mo te fafine neʼe tokaga moʼoni ki toku ʼaluʼaga.”

ʼE ʼui ʼi te Tohi-Tapu “ko te ʼofa . . . ʼe mole ina kumi pe te meʼa ʼaē ʼe ʼaoga kiā te ia.” (1 Kolonito 13:​4, 5, MN ) Koia ko te fagono ʼaki te ʼofa ʼe faka ʼuhiga ai ke tou tuku kehe ia tatou totonu. Ko tona faka ʼuhiga, ka kita fai palalau mo he tahi, ke kita matehi te televisio, ke kita tuku muʼa te lau ʼo te sulunale, peʼe ko te telefoni mokā palalau mai he tahi ʼo ʼuhiga mo he meʼa maʼuhiga. Ko te fagono ʼaki te ʼofa ko tona faka ʼuhiga ke kita tokaga fakalelei ki te ʼu manatu ʼa ʼihi. Ko tona faka ʼuhiga ke ʼaua naʼa tou kamata palalau ʼo ʼuhiga mo tatou totonu ʼo tou ʼui fēnei age, “ ʼE au manatuʼi neʼe hoko te meʼa feiā kiā au kua hili kiai te kiʼi temi.” Logola ko te taʼi felogoi ʼaia ʼe feala tona fai mokā ko he ʼu felogoi fakakaumeʼa, kae ʼe tonu ke tou tuku keheʼi ia tatou totonu mokā palalau mai he tahi ʼo ʼuhiga mo hona fihifihia maʼuhiga. ʼE ʼi ai te tahi faʼahiga fakahā ʼe tou tokagaʼi moʼoni te meʼa ʼaē ʼe hoko ki ʼihi hahaʼi.

Ko Te Fagono Moʼo ʼIloʼi Te ʼu Meʼa ʼAē ʼi Te Loto

Ko te ʼu kaumeʼa ʼo te tagata ko Sopo neʼe lagi nātou logo ki tana ʼu akonaki e hogofulu. Kae neʼe lāuga fēnei ia Sopo: “Ka na neʼe ʼi ai pe la he tahi ʼe fagono mai kiā au!” (Sopo 31:35) He koʼe neʼe lāuga feiā ia Sopo? Koteʼuhi neʼe mole ina maʼu hona fīmālie ʼi tanatou fagono age ki ai. Neʼe mole nātou tōkakaga kiā Sopo pea neʼe mole nātou fia mahino ki te ʼu meʼa ʼaē ʼi tona loto. ʼE mahino mai neʼe mole nātou fagono ke nātou mahino ki tona ʼu mamahi. Kae ʼe tokoniʼi fēnei tatou e te ʼapositolo ko Petelo: “Ke koutou maʼu fuli te manatu e tahi, koutou felotomahinoʼaki, mo ʼofa ki te ʼu tēhina, mo fonu ʼi te manavaʼofa mo agavaivai.” (1 Petelo 3:​8, MN ) ʼE tou lava fakahā feafeaʼi tatatou felotomahinoʼaki? ʼAki tatatou tokagaʼi te loto ʼo he tahi pea mo tou faigaʼi ke tou mahino kiai. ʼE hā anai tatatou mahino ʼi te ʼu palalau ʼaenī: “Neʼe lagi ke mamahi ai” pe “neʼe lagi hage kiā koe neʼe mole mahino ia ki te meʼa ʼaē ʼi tou loto.” Ko te tahi faʼahiga fakahā ʼo tatatou tokagaʼi ia nātou, ʼe ko tatatou fakahā tana ʼu manatu ʼaki ʼatatou palalau totonu, ʼo tou fakahā ai neʼe tou mahino ki te ʼu meʼa ʼaē neʼe ina ʼui mai. Ko te fagono ʼaki te ʼofa ʼe faka ʼuhiga ia ʼe mole tokaga pe ki te ʼu palalau kae ʼe tou toe mahino foki ki te ʼu meʼa ʼaē ʼi tona loto.

Ko Roberta ko te Fakamoʼoni faiva ʼa Sehova ʼe minisi temi kātoa. ʼE ina fakamatala fēnei: “ ʼI te tahi temi, neʼe au lotovaivai ʼi taku minisitelio. Pea neʼe au kole ai ke au fai palalau mo te tagata taupau feʼaluʼaki. Neʼe fagono mai kiā au pea neʼe ina faigaʼi ke mahino ki te ʼu meʼa ʼaē ʼi toku loto. Neʼe hage neʼe mahino ki taku tuʼania ʼaē naʼa ina valokiʼi taku aga. Neʼe fakamoʼoni mai e te tēhina neʼe mahino ki te ʼu meʼa ʼaē neʼe au logoʼi, koteʼuhi neʼe kua hoko ki ai te meʼa feiā. Neʼe tokoni moʼoni mai te faʼahi ʼaia ke au hoko atu taku minisitelio.”

ʼE tonu koa ke tou fagono ki he tahi, tatau aipe peʼe mole tou tali te ʼu meʼa ʼaē ʼe palalau mai kiai? ʼE tou lava ʼui koa ki he tahi ʼe tou leleiʼia tana fakahā mai te ʼu meʼa ʼaē ʼi tona loto? Ei, ʼe feala ke tou fai ia te ʼu faʼahi ʼaia. ʼE koutou tali feafeaʼi anai mo kapau neʼe fuhu hakotou tamasiʼi ʼi te faleako, peʼe ka haʼu takotou taʼahine ʼo ʼui atu ʼe manako ki te tama? ʼE mole koa lelei age ki he tāmai peʼe ki he faʼē hana fagono pea mo faigaʼi ke mahino ki te fakakaukau ʼo tana tamasiʼi ʼi muʼa ʼo hana fakamahino age peʼe koteā te aga ʼaē lelei pea mo te aga ʼaē ʼe kovi?

ʼE ʼui fēnei iā Tāʼaga Lea 20:5: “Ko te tokoni ʼaē ʼi te loto ʼo te tagata ʼe hage he ʼu vai loloto, kae ʼe ko te tagata ʼaē ʼe fakasiosio tonu ʼaē ka ina ʼohu anai te vai ʼaē ʼi loto.” Kapau ko he tahi ʼe fakapotopoto pea mo lahi te ʼu meʼa ʼaē ʼe mālama kiai, kae ʼe mole māhani ʼi te foaki he ʼu tokoni, ʼe lagi tonu anai ke tou faigaʼi ke tou kumi tokoni kiā ia. ʼE toe feiā pe mokā tou fagono ʼaki te ʼofa. ʼE tonu ke kita fakasiosio tonu ke feala hatatou ʼiloʼi te ʼu meʼa ʼaē ʼi te loto ʼo he tahi. ʼE ʼaoga te fai ʼo te ʼu fehuʼi, kae ʼe tonu ke tōkakaga ki ʼatatou fehuʼi kae ʼaua naʼa hage ʼe tou fia ʼiloʼi meʼa fuli. ʼE lagi lelei ke ʼui age kiā ia ʼaē ʼe palalau ke ina fakamatala mai muʼa te ʼu meʼa ʼaē ʼe faigafua hana fakamatala. Ohage la, ko te fafine ʼaē ʼe fia palalau ki te ʼu fihifihia ʼo tana nofo ʼohoana ʼe lagi faigafua anai hana kamata fakamatala peʼe neʼe feafeaʼi tanā feʼiloʼiʼaki mo tona ʼohoana ʼo hoko ai tanā ʼohoana. ʼE lagi faigafua anai ki he tahi ʼe mole kei fai faka mafola hana kamata fakamatala pe neʼe ina ʼiloʼi feafeaʼi te moʼoni.

ʼE Faigataʼa Te Fagono ʼAki Te ʼOfa

ʼE faigataʼa hatatou fagono ki he tahi neʼe tokakovi mo tatou, koteʼuhi ko totatou nātulā te fia tonuhia. ʼE feafeaʼi hatatou fakahoko ia te faʼahi ʼaia? ʼE ʼui fēnei iā Tāʼaga Lea 15:1: “Ka malū he tali, pea ʼe ina tekeʼi te ʼita.” Moʼo tali ʼaki te agamālū, ʼe lagi feala ke kita fakaafe ia ia ke palalau pea ke kita fagono fakalelei mokā ina fakamatala te meʼa ʼaē ʼe ʼita ai.

ʼI te agamāhani ʼe fetalanoaʼaki he toko lua ʼo ʼuhiga mo he ʼu meʼa neʼe kua nā palalau kiai. ʼE nā tahi manatu ko ia ʼaē, ʼe mole fagono ia. ʼE feala pe ke fakatokatoka te ʼaluʼaga ʼaia mo kapau ko he tahi iā nāua ʼe fagono fakalelei muʼa. ʼE moʼoni ia, ʼe maʼuhiga ia te loto lolomi pea mo te palalau ʼaki he aga fakapotopoto pea mo ʼaki te ʼofa. ʼE ʼui fēnei mai ʼi te Tohi-Tapu: “Ko ʼaē ʼe ina tāʼofi tona ʼu laugutu ʼe poto ia.”​—Tāʼaga Lea 10:⁠19.

ʼE mole tou tutupu ake mo te faiva ʼi te fagono ʼaki te ʼofa. Kae ʼe ko he faiva ʼe kita lava maʼu ʼaki te faiga pea mo fakamalotoloto. ʼE ko he faiva ʼe maʼuhiga ke kita maʼu. Ko te fagono moʼoni ki niʼihi mokā nātou palalau, ʼe ko he fakahā ʼaia ʼo totatou ʼofa. ʼE toe tokoni foki ki totatou maʼuli fiafia. Koia ʼe ko he aga fakapotopoto hatatou faiga ke tou gāueʼi te faiva ʼo te fagono ʼaki te ʼofa.

[Kiʼi nota]

[Paki ʼo te pasina 11]

Ka tou fagono, ʼaua naʼa tou manatu ki te ʼu meʼa ʼaē ʼe lelei kiā tatou

[Paki ʼo te pasina 12]

ʼE faigataʼa hakita fagono ki he tahi ʼe tokakovi mo kita