Tou Faʼifaʼitakiʼi Te Tagata Lahi ʼAē Neʼe Ina Fai Ni ʼu Tisipulo
“Ke kotou tōkakaga ki takotou faʼahiga fagono.”—Luka 8:18.
1, 2. He koʼē ʼe tonu ke kotou tokagaʼi fakalelei ia te faʼahiga felōgoi ʼaē ʼa Sesu mo te hahaʼi ʼi tana minisitelio?
NEʼE lolotoga fai e Sesu Kilisito tana gāue ʼaē ko te Faiako pea mo Fai ʼo Ni ʼu Tisipulo, ʼi te temi ʼaē neʼe ina ʼui fēnei ai ki tana ʼu tisipulo: “Ke kotou tōkakaga ki takotou faʼahiga fagono.” (Luka 8:16-18) ʼE tonu ke kotou maʼuliʼi ia te pelesepeto ʼaia ʼi takotou minisitelio, ʼi tokotou ʼuhiga Kilisitiano. Kapau ʼe kotou tōkakaga fakalelei ki te ako fakalaumālie ʼaē ʼe fai atu, pea ʼe kotou maʼuliʼi anai te ʼu meʼa ʼaē ʼe akoʼi atu pea mo kotou liliu ko he ʼu fai faka mafola ʼo te Puleʼaga ʼe natou maʼu he ʼu fua lelei ʼi tanatou gāue. ʼE mahino ia, ʼe mole feala ke kotou logo ki te leʼo ʼo Sesu iā ʼaho nei, kae ʼe feala ke kotou lau ʼi te Tohi-Tapu ia te ʼu palalau ʼaē neʼe ina fai pea mo tana ʼu gāue. Koteā ʼaē ʼe fakahā mai ai ʼo ʼuhiga mo te felōgoi ʼa Sesu mo te hahaʼi ʼi tana minisitelio?
2 Ko Sesu neʼe ko he tagata fai faka mafola lelei ʼaupitō ʼo te logo ʼo te Puleʼaga pea mo he tagata faiako poto ʼo te Tohi-Tapu. (Luka 8:1; Soane 8:28) ʼI te gāue ʼaē ko te fai ʼo ni ʼu tisipulo, ʼe tonu ke tou fai faka mafola pea mo faiako. Kae ko ʼihi Kilisitiano ʼaē ʼe fua lelei tanatou fai faka mafola, ʼe faigataʼa kiā nātou te akoʼi fakalelei ʼo te hahaʼi. Logolā ko te fai faka mafola ʼe ko te tala ʼo he logo, kae ko te akoʼi ʼo te hahaʼi ʼo ʼuhiga mo Sehova pea mo tana ʼu fakatuʼutuʼu ʼe fakamaʼua kiā ia ʼaē ʼe ina fai ni ʼu tisipulo, ke felōgoi lelei mo te hahaʼi. (Mateo 28:19, 20) ʼE feala ke tou fai te faʼahi ʼaia mokā tou faʼifaʼitakiʼi ia Sesu Kilisito, te Tagata Faiako Lahi pea mo Fai ʼo Ni ʼu Tisipulo.—Soane 13:13.
3. Kapau ʼe kotou faʼifaʼitakiʼi ia Sesu, pea koteā anai tona fua ki takotou faiga lahi ʼaē ke kotou fai he ʼu tisipulo?
3 Kapau ʼe kotou faʼifaʼitakiʼi te faʼahiga faiako ʼa Sesu, pea ʼe kotou mulimuli anai ki te tokoni ʼaenī neʼe fai e te ʼapositolo ko Paulo: “Kotou haga haʼele ʼi te fakapotopoto ʼo ʼuhiga mo nātou ʼaē ʼo tuʼa, ʼo kotou totogi maʼa koutou te temi faigamālie. Kotou fai ke lelei tuʼumaʼu takotou ʼu palalau pea ke konakonaʼi ʼaki te māsima, ke kotou ʼiloʼi te tali ʼaē ʼe tonu ke kotou fai ki te hahaʼi takitokotahi.” (Kolose 4:5, 6) ʼE tonu ke kotou faiga lahi moʼo faʼifaʼitakiʼi ia Sesu ʼi te gāue ʼaē ko te fai ʼo ni ʼu tisipulo, kae ʼe lelei age anai takotou faʼahiga faiako, heʼe tokoni atu anai ke kotou “ ʼiloʼi te tali ʼaē ʼe tonu ke kotou fai ki te hahaʼi takitokotahi” ʼo mulimuli ki te ʼu meʼa ʼaē ʼe ʼaoga kiā nātou takitokotahi.
Neʼe Fakaloto Mālohiʼi e Sesu Te Hahaʼi Ke Natou Palalau
4. He koʼē ʼe feala ke tou ʼui ko Sesu neʼe ko he tahi neʼe fagono lelei?
4 Talu mai tana kei veliveli, neʼe ko te agamāhani ʼa Sesu tana fagono ki te hahaʼi pea mo fakaloto mālohiʼi nātou ke natou fakahā tanatou manatu. Ohagē lā, ʼi tona taʼu 12, neʼe maʼu atu ia ia e tana ʼu mātuʼa ʼi te lotolotoiga ʼo te hahaʼi faiako ʼi te fale lotu, ʼe “fagono kiā nātou pea mo faifehuʼi kiā nātou.” (Luka 2:46) Neʼe mole ʼalu Sesu ki te fale lotu moʼo fakalainoaʼi ia te kau faiako ʼaki te ʼatamai mālama ʼaē neʼe ina maʼu. Neʼe ʼalu ia ʼo fakalogo, pea neʼe toe fai fehuʼi kiā nātou. Ko tana fagono lelei ʼaia neʼe lagi ko he kalitātē neʼe tupu ai tona ʼofainaʼi e te ʼAtua pea mo te hahaʼi.—Luka 2:52.
5, 6. ʼE tou ʼiloʼi feafeaʼi neʼe fagono Sesu ki te ʼu palalau ʼa nātou ʼaē neʼe ina akoʼi?
5 ʼI te ʼosi papitema ʼa Sesu pea mo fakanofo ko te Mēsia, neʼe tokaga aipē ki te hahaʼi ʼo fagono kiā nātou mokā natou palalau. Neʼe mole tokaga tāfito pē ki te ʼu meʼa ʼaē neʼe ina akoʼi ki te hahaʼi, ʼo tupu ai hana mole tokagaʼi ia nātou ʼaē neʼe ʼomai ʼo fagono ki tana ʼu palalau. Neʼe fai tuʼumaʼu tana kiʼi tuʼu ʼi tana palalau, mo fehuʼi pe koteā tanatou manatu, pea mo fagono ki tanatou tali. (Mateo 16:13-15) Ohagē lā, ʼi te ʼosi mate ʼo Lasalo, te tokolua ʼo Maleta, neʼe ʼui fēnei e Sesu kiā ia: “Ko ʼaē ʼe maʼuli pea mo tui kiā te au, ʼe mole mate anai ia.” Pea neʼe ina fehuʼi age leva ʼo fēnei: “ ʼE ke tui ki te meʼa ʼaia?” Pea ʼe mahino neʼe fagono Sesu ki te tali ʼaenī ʼa Maleta: “ ʼEī, ʼAliki; ʼe au tui ko koe ko Kilisito, te ʼAlo ʼo te ʼAtua.” (Soane 11:26, 27) Neʼe ko he meʼa fakafiafia tana logo ʼaē ki te fakahā e Maleta ʼo tana tui ʼaki tana ʼu palalau ʼaia!
6 ʼI temi ʼaē neʼe tokolahi ai te ʼu tisipulo neʼe natou situʼa kiā Sesu, neʼe fia logo ia ki te manatu ʼo tana ʼu ʼapositolo. Koia, neʼe ina fehuʼi fēnei ai: “ ʼE mole koa lā toe fia ʼolo ai mo koutou?” Kae neʼe tali fēnei age e Simone Petelo: “ ʼAliki, ke matou ʼolo lā kiā ai? ʼE ke maʼu koe te ʼu folafola ʼo te maʼuli heʼegata; koia neʼe matou tui ai, pea neʼe matou ʼiloʼi ai ʼe ko koe ko te Māʼoniʼoni ʼa te ʼAtua.” (Soane 6:66-69) Neʼe lagi fiafia ʼaupitō ia Sesu ʼi te ʼu palalau ʼaia! Kapau ʼe fakahā e he tahi ʼe ako te Tohi-Tapu he tui fēia, pea ʼe mahino papau ia ʼe kotou fiafia ai anai.
Neʼe Fagono Sesu ʼAki He Fakaʼapaʼapa
7. He koʼē neʼe tokolahi te kau Samalitana neʼe natou tui kiā Sesu?
7 Ko te tahi tupuʼaga ʼo te maʼu e Sesu he ʼu fua lelei ʼi tana fai ʼo ni ʼu tisipulo, he neʼe tokaga ki te hahaʼi pea mo fagono kiā nātou ʼaki he fakaʼapaʼapa mokā natou palalau. Ohagē lā, ʼi te tahi lakaga, neʼe fai faka mafola ia Sesu ki te fafine Samalitana ʼe ovi ki te vai keli ʼo Sakopo ʼi Sisale. ʼI tanā fai palalau ʼaia, neʼe mole ko Sesu tokotahi pē ʼaē neʼe palalau; neʼe fagono ki te ʼu palalau ʼa te fafine. ʼI tana fagono ki te fafine, neʼe tokagaʼi e Sesu tana fia mahino ʼo ʼuhiga mo te tauhi, pea neʼe ina ʼui age ko te ʼAtua ʼe ina kumi te hahaʼi ʼaē ʼe natou tauhi age kiā te Ia ʼaki te laumālie pea mo te moʼoni. Neʼe fakaʼapaʼapa ia Sesu pea mo ina tokagaʼi ia te fafine ʼaia, ʼo tupu ai tana ʼalu ʼo palalau ki te hahaʼi ʼo ʼuhiga mo ia, pea “tokolahi . . . te kau Samalitana ʼo te kolo ʼaia, neʼe natou tui kiā te ia, ʼuhi ko te ʼu palalau ʼa te fafine.”—Soane 4:5-29, 39-42.
8. Kā fakahā atu e te hahaʼi tanatou ʼu manatu, ʼe feafeaʼi hakotou fakaʼaogaʼi moʼo kamata he fai palalau ʼi te minisitelio?
8 ʼI te agamāhani, ʼe fia fakahā e te hahaʼi tanatou manatu. Ohagē lā, ko te hahaʼi ʼo te kolo ʼo Ateni ʼi te temi muʼa, neʼe natou fakahā tanatou ʼu manatu pea mo natou fakalogo ki he manatu foʼou. Ko he faʼahi neʼe tupu ai leva te fai e te ʼapositolo ko Paulo te akonaki neʼe fua lelei ʼi te Aleopasi ʼi te kolo ʼaia. (Gāue 17:18-34) Iā ʼaho nei, kā kotou kamata he fai palalau mo he tahi ʼi takotou fai faka mafola, ʼe feala ke kotou ʼui fēnei: “ ʼE au ʼaʼahi mai koe heʼe au fia ʼiloʼi tau manatu ʼo ʼuhiga [mo he meʼa neʼe hoko].” Kotou fagono ki te manatu ʼa te tagata peʼe ko te fafine, pea kotou fai palalau ki te faʼahi ʼaia, peʼe kotou fai he fehuʼi ʼo ʼuhiga mo tana manatu ʼaia. Pea ʼaki he agalelei, kotou fakahā age te manatu ʼaē ʼe ʼui ʼi te Tohi-Tapu ʼo ʼuhiga mo te faʼahi ʼaia.
Neʼe ʼIloʼi e Sesu Te ʼu Palalau ʼAē Neʼe Tonu Ke Ina Fai
9. Koteā ʼaē neʼe fai e Sesu ʼi muʼa ʼo tana ‘ ʼavahi kātoa te ʼu Tohi’ kiā Keleopasi pea mo tona kaumeʼa?
9 Neʼe ʼiloʼi tuʼumaʼu pē e Sesu te ʼu palalau ʼaē neʼe tonu ke ina fai. Neʼe fakalogo lelei ki te hahaʼi, pea neʼe ina ʼiloʼi tuʼumaʼu te manatu ʼa te hahaʼi, pea neʼe ina ʼiloʼi te ʼu palalau ʼaē neʼe tonu ke ina fai. (Mateo 9:4; 12:22-30; Luka 9:46, 47) Koʼenī tona faʼifaʼitaki: ʼI te ʼosi fakatuʼuake pē ʼaē ʼo Sesu, ko te foʼi toko lua ʼi tana ʼu tisipulo neʼe nā mavae mai Selusalemi ʼo ʼolo ki Emausi. ʼE ʼui fēnei ʼi te Evaselio: “ ʼI tanā lolotoga talanoa pea mo fai palalau, neʼe fakaovi age ia Sesu totonu pea neʼe fagona ia mo nāua; kae neʼe mole feala ki ʼonā mata ke nā ʼiloʼi ia ia. Neʼe ʼui māʼana kiā nāua: ‘Koteā koa te ʼu meʼa ʼaē e kolua talanoa kiai ʼi takolua fagona ʼi te ala?’ Pea neʼe nā tutuʼu ai pea mo te lotomamahi ʼaē ʼe hā ʼi ʼonā fofoga. Pea neʼe tali e te tokotahi ia nāua ʼe higoa ko Keleopasi, ʼo ʼui māʼana kiā te ia: ‘ ʼE ko koe koa, ko he matāpule, ʼe ke nofo mamaʼo ʼi Selusalemi, ʼaē ʼe mole ke ʼiloʼi ai te ʼu meʼa ʼaē neʼe hoko ʼi te ʼu ʼaho ʼaenī?’ Pea neʼe ʼui māʼana kiā nāua: ‘Koteā te ʼu meʼa ʼaia?’ ” Neʼe fagono te Tagata Faiako Lahi ki tanā fakamatala ʼaē ko Sesu ʼo Nasaleti neʼe ina akoʼi te hahaʼi, mo fai he ʼu milakulo, pea neʼe matehi leva. ʼI te temi nei, ʼe ʼui e ʼihi kua fakatuʼuake ia mai te kau mate. Neʼe tuku e Sesu ia Keleopasi pea mo tona kaumeʼa ke nā fakahā tanā ʼu manatu. Pea neʼe ina fakamahino leva te ʼu meʼa ʼaē neʼe tonu ke nā ʼiloʼi, ʼo ina ‘ ʼavahi kātoa kiā nāua te ʼu Tohi.’—Luka 24:13-27, 32.
10. ʼE feafeaʼi hakotou ʼiloʼi ʼi te minisitelio ia te manatu ʼa he tahi ʼo ʼuhiga mo te lotu?
10 ʼE lagi mole kotou ʼiloʼi te manatu ʼa he tahi ʼo ʼuhiga mo te lotu. Ke kotou ʼiloʼi tana manatu, ʼe feala ke kotou ʼui age ʼe kotou fia ʼiloʼi ia te manatu ʼa te hahaʼi ʼo ʼuhiga mo te faikole. Pea ʼe feala ke kotou fehuʼi fēnei age: “ ʼI tau manatu, ʼe ʼi ai koa he tahi ʼe fagono moʼoni mai ki te ʼu faikole?” ʼE hā anai ʼi tana tali ia tana manatu pea mo te lotu ʼaē ʼe tauhi kiai. Kapau ʼe fia fai palalau ʼo ʼuhiga mo te lotu, pea ʼe feala hakotou ʼiloʼi hana tahi age ʼu manatu ʼaki takotou fai te fehuʼi ʼaenī: “ ʼI tau manatu, ʼe fakalogo koa te ʼAtua ki te ʼu faikole fuli, peʼe ʼi ai koa he ʼu faikole ʼe mole ina tali?” ʼAki te ʼu fehuʼi ʼaia, ʼe feala ai leva ke fai he fai palalau lelei. Kā feala ke fakahā age he manatu faka Tohi-Tapu, pea ʼe kotou fai anai te faʼahi ʼaia ʼaki he aga fakaʼeteʼete, kae mole kotou valokiʼi tana tui. Kapau ʼe fia fakalogo atu, pea ʼe lagi fiafia anai ʼi hakotou toe liliu mai. Kae ʼe feafeaʼi age lā mo kapau ʼe ina fai atu he fehuʼi ʼe mole kotou lava tali kiai? ʼE feala ke kotou fai he ʼu kumi pea kotou toe liliu mo tona tali moʼo fakahā “te tupuʼaga ʼo takotou falala, kae kotou fai ʼaki he agamalū pea mo he fakaʼapaʼapa lahi.”—1 Petelo 3:15.
Neʼe Akoʼi e Sesu Te Hahaʼi ʼAē Neʼe Tuha Mo Nātou Ia Te Logo
11. Koteā ʼaē kā tokoni atu ke kotou maʼu ia nātou ʼaē ʼe tuha mo nātou ke akoʼi?
11 Ko te tagata haohaoa ko Sesu neʼe fakasiosio tonu, ʼo feala ai ke ina ʼiloʼi ia nātou ʼaē neʼe tuha mo nātou ke ina akoʼi. ʼE faigataʼa age kiā tātou hatatou maʼu ia nātou ʼaē ʼe “lotolelei ki te maʼuli heʼegata.” (Gāue 13:48) Ko he faʼahi neʼe fai e te ʼu ʼapositolo, ʼaē neʼe ʼui fēnei age e Sesu kiā nātou: “ ʼI he kolo lahi, pe ko he kolo veliveli ʼe kotou hū kiai, kotou kumi pe ko ai ʼaē ʼe tāu mo ia.” (Mateo 10:11) Ohagē ko te ʼu ʼapositolo ʼa Sesu, ʼe tonu ke tou kumi te ʼu hahaʼi ʼaē ʼe natou fia logo pea mo fia ako te moʼoni ʼaē ʼi te Tohi-Tapu. ʼE feala hakotou maʼu he ʼu hahaʼi ʼe tuha mo nātou ke akoʼi, ʼaki hakotou fakalogo lelei kiā nātou takitokotahi, ʼo kotou tokagaʼi peʼe feafeaʼi tanatou tali ia te logo.
12. ʼE lava feafeaʼi hakotou tokoni ki he tahi neʼe fia fagono ki te logo lelei?
12 Kā kotou ʼosi fai palalau mo he tahi neʼe fia fagono ki te logo ʼo te Puleʼaga, pea ʼe lelei anai hakotou fakakaukauʼi pe ko te ʼu manatu fakalaumālie fea ʼaē kā ʼaoga anai ke ina akoʼi. Kapau neʼe kotou fai palalau mo he tahi ʼo ʼuhiga mo te logo lelei, pea ʼe lelei ke kotou tohi te ʼu meʼa ʼaē kua kotou ʼiloʼi ʼo ʼuhiga mo ia, ke feala ai anai hakotou tokoni kiā ia ʼi te faʼahi fakalaumālie. ʼI takotou ʼolo ʼo ʼaʼahi ia ia, ʼe tonu ke kotou fakalogo lelei mo kapau ʼe kotou fia ʼiloʼi he tahi age ʼu faʼahi ʼo ʼuhiga mo tana tui, mo tana aga peʼe ko tona maʼuli.
13. Koteā ʼaē kā tokoni atu ke kotou ʼiloʼi te manatu ʼa he tahi ʼo ʼuhiga mo te Tohi-Tapu?
13 ʼE kotou lava fakaloto mālohiʼi feafeaʼi te hahaʼi ke natou fakahā atu tanatou manatu ʼo ʼuhiga mo te Folafola ʼa te ʼAtua? ʼI ʼihi koga meʼa, ʼe lelei te fai palalau mokā fai te fehuʼi ʼaenī: “Neʼe faigataʼa koa kiā koutou te mahino ki te Tohi-Tapu?” ʼI te agamāhani, ko te tali ʼaē ʼe tou maʼu ki te fehuʼi ʼaia, ʼe feala ai ke tou ʼiloʼi ai te manatu ʼa te hahaʼi o ʼuhiga mo te ʼu manatu fakalaumālie. ʼE feala ke kotou lau he vaega pea kotou fehuʼi fēnei age: “Koteā lā tau manatu kiai?” Ohagē ko Sesu, ʼe lelei anai te gāue ʼaē kā kotou fai ʼi takotou minisitelio mokā kotou fai te ʼu fehuʼi ʼaē ʼe lelei. Kae ʼe tonu ke kotou tōkakaga ki te tahi faʼahi.
Neʼe Fakaʼaogaʼi Lelei e Sesu Ia Te ʼu Fehuʼi
14. Logolā takotou mole fakafehufehuʼi ia te hahaʼi, kae ʼe feafeaʼi hakotou tokagaʼi tanatou ʼu manatu?
14 Kotou fakahā ʼi takotou fakalogo ia takotou tokagaʼi ia te manatu ʼa te hahaʼi, kae ke ʼaua takotou fai ia he meʼa ke tupu ai hanatou ufiufi. Kotou mulimuli ki te faʼahiga fai ʼaē ʼa Sesu. Neʼe mole ina fai he ʼu tuʼuga fehuʼi ʼe fia ʼiloʼi meʼa fuli ai, kae neʼe ina fai he ʼu fehuʼi ke fakakaukauʼi ai e te hahaʼi te ʼu manatu ʼaē neʼe talanoa kiai. Neʼe toe fagono lelei ia Sesu, ʼo ina fakafīmālieʼi te hahaʼi loto fakamālotoloto pea neʼe mole natou mātataku iā ia. (Mateo 11:28) Ko te hahaʼi kehekehe neʼe natou fakaovi age kiā te ia, ʼo fakahā age tanatou ʼu tuʼania. (Maleko 1:40; 5:35, 36; 10:13, 17, 46, 47) Kapau ʼe fakahā faʼifaʼitaliha atu e te hahaʼi tanatou manatu ʼo ʼuhiga mo te Tohi-Tapu pea mo te ʼu akonaki ʼaē ʼe tuʼu ʼi loto, pea ʼe mole tonu ke kotou fai kiā nātou he ʼu tuʼuga fehuʼi.
15, 16. ʼE feafeaʼi hakotou faʼahiga fai palalau mo te hahaʼi ki te ʼu manatu faka lotu?
15 ʼO hilifaki ki te fakaʼaogaʼi lelei ʼo te ʼu fehuʼi, ʼe feala hakotou hoko atu te fai palalau, ʼo kotou fakahā age he manatu ʼe maʼuhiga pea mo kotou fakalogo ki te tali ʼaē kā ina fai atu. Ohagē lā, neʼe ʼui fēnei e Sesu kiā Nikotemo: “Kapau ʼe mole toe tupu he tahi, pea ʼe mole feala ia ke mamata ki te puleʼaga ʼo te ʼAtua.” (Soane 3:3) Neʼe maʼuhiga ʼaupitō te ʼu palalau ʼaia, koia neʼe hoko atu e Nikotemo te fai palalau pea mo fakalogo kiā Sesu. (Soane 3:4-20) ʼE feala ke kotou fai palalau fēia mo te hahaʼi mo kapau ʼe kotou faʼifaʼitakiʼi te faʼahiga fai ʼaia.
16 Iā ʼaho nei, ko te hā ʼo te ʼu tuʼuga lotu foʼou, ʼe ko he faʼahi ʼe talanoa kiai te hahaʼi ʼi te ʼu fenua ohagē ko Afelika, mo te Potu ʼEsitē ʼo Eulopa, pea mo Amelika Latina. ʼI te ʼu fenua ʼaia, ʼi te agamāhani ʼe feala hakotou kamata he fai palalau, ʼo kotou ʼui fēnei: “Neʼe au tokagaʼi te kua lahi ʼo te ʼu lotu. Kae ʼe au falala kua au vave sio pē anai ki te ʼu hahaʼi mai te ʼu puleʼaga fuli pē ʼe natou logotahi ʼi te tauhi moʼoni. ʼE ke fia sio koa ki te fakahoko ʼo te faʼahi ʼaia?” Kapau ʼe kotou talanoa ki he faʼahi ʼe punamaʼuli kiai te hahaʼi ʼo ʼuhiga mo takotou ʼamanaki, pea ʼe feala ai anai ke fakahā atu e te hahaʼi tanatou manatu. Pea kapau ʼe kotou fai he fehuʼi pea mo fakahā age he ʼu tali e lua ʼe feala ke natou filifili, pea ʼe faigafua anai hanatou tali kiai. (Mateo 17:25) ʼI te ʼosi tali atu ʼa te tagata peʼe ko te fafine ki takotou fehuʼi, kotou tali leva ki te fehuʼi ʼaki he vaega faka Tohi-Tapu e tahi peʼe lua. (Isaia 11:9; Sofonia 3:9) Kapau ʼe kotou fakalogo lelei pea mo tokagaʼi te tali ʼa te tagata peʼe ko te fafine, pea ʼe kotou ʼiloʼi ai anai te manatu ʼaē kā kotou palalau anai kiai ʼi takotou toe ʼaʼahi ia ia.
Neʼe Fakalogo Sesu Ki Te ʼu Tamaliki
17. Koteā ʼaē ʼe hā ʼaki mai ai neʼe tokaga Sesu ki te ʼu tamaliki?
17 Neʼe tokagaʼi e Sesu te hahaʼi lalahi ʼo fēia mo te ʼu tamaliki. Neʼe ina ʼiloʼi te ʼu gaoʼi ʼa te ʼu tūpulaga pea mo te ʼu meʼa ʼaē neʼe natou palalau kiai. ʼI ʼihi temi, neʼe ina fakaafe te ʼu tamaliki ke natou ʼolo age kiā te ia. (Luka 7:31, 32; 18:15-17) Tokolahi te ʼu fānau neʼe natou kau ʼi te ʼu hahaʼi tokolahi ʼaē neʼe fakalogo kiā Sesu. ʼI te kalaga ʼa te tamaliki moʼo fakavikiviki ki te Mēsia, neʼe tokagaʼi e Sesu pea neʼe ina fakahā neʼe fakakikite e te Tohi-Tapu ia te faʼahi ʼaia. (Mateo 14:21; 15:38; 21:15, 16) Iā ʼaho nei, tokolahi te ʼu tamaliki ʼe natou liliu ko he ʼu tisipulo ʼa Sesu. ʼE kotou lava tokoni feafeaʼi kiā nātou?
18, 19. ʼE kotou lava tokoni feafeaʼi ki hakotou tamasiʼi ʼi te faʼahi fakalaumālie?
18 Moʼo tokoni ki hakotou tamasiʼi ʼi te faʼahi fakalaumālie, ʼe tonu ke kotou fakalogo mokā palalau atu. ʼE tonu ke kotou mahino pe koteā tana manatu ʼaē ʼe lagi mole ʼalutahi mo te manatu ʼa Sehova. Tatau aipē pe koteā ʼaē ʼe ʼui atu e takotou tamasiʼi, kae ʼe lelei hakotou tali fakalelei age. Pea ʼe feala leva ke kotou fakaʼaogaʼi he ʼu vaega Tohi-Tapu ʼe ʼalutahi mo te faʼahi ʼaē ʼe kotou palalau kiai, moʼo tokoni ki takotou tamasiʼi ke mahino ki te manatu ʼa Sehova.
19 ʼE ʼaoga ke kotou fai ni ʼu fehuʼi ke feala ai hakotou ʼiloʼi tana manatu. Kae ʼe mole leleiʼia e te tamaliki mokā tou fai age he ʼu tuʼuga fehuʼi, ohagē pē ko te hahaʼi lalahi. ʼE mole tonu ke kotou fai ki takotou tamasiʼi he ʼu tuʼuga fehuʼi ʼe faigataʼa, kae ʼe lelei age mo kapau ʼe kotou fakamatala fakanounou he meʼa neʼe hoko kiā koutou. ʼO mulimuli ki te faʼahi ʼaē ʼe kotou fai palalau kiai, ʼe feala ke kotou fakahā age te faʼahiga manatu ʼaē neʼe kotou maʼu ʼi muʼa atu pea mo fakamahino age pe koʼē neʼe fēia takotou manatu. Pea feala ke kotou fehuʼi age fēnei: “ ʼE ke fēia koa mo koe?” Ko te tali ʼaē kā fai atu e takotou tamasiʼi, ʼe feala ai anai ke tupu ʼaki ai he fai palalau ʼe fakatafito ki te Tohi-Tapu, ʼe ʼaoga kiā ia pea mo fakaloto mālohi.
Tou Haga Faʼifaʼitakiʼi Te Tagata Lahi ʼAē Neʼe Ina Fai Ni ʼu Tisipulo
20, 21. He koʼē ʼe tonu ke kotou fakalogo lelei ʼi takotou gāue ʼaē ko te fai ʼo ni ʼu tisipulo?
20 ʼE maʼuhiga ke kotou fakalogo lelei mokā kotou fai palalau mo hakotou tamasiʼi peʼe mo he tahi age. ʼE ko hakotou fakahā ʼaia ʼo tokotou ʼofa ʼaē kiā nātou. ʼAki takotou fakalogo, ʼe kotou fakahā ai te agavaivai, pea ʼe kotou fakaʼapaʼapa ai kiā ia ʼaē ʼe palalau atu pea mo kotou ʼofa ki ai. ʼE mahino ia, kā kotou fakalogo pea ʼe maʼua ke kotou tokaga ki tana ʼu palalau.
21 ʼI takotou fai faka mafola, kotou haga fakalogo lelei mokā palalau atu te hahaʼi. Kapau ʼe kotou tokaga fakalelei ki tanatou ʼu palalau, pea ʼe feala anai ke kotou ʼiloʼi pe ko te ʼu manatu faka Tohi-Tapu fea ʼaē kā fia logo anai kiai. Pea kotou faiga ke kotou tokoni kiā nātou, ʼo kotou mulimuli ki te ʼu faʼahiga faiakonaki kehekehe ʼa Sesu. ʼI takotou fai te faʼahi ʼaia, ʼe kotou maʼu ai anai te fiafia heʼe kotou faʼifaʼitakiʼi te Tagata Lahi ʼAē Neʼe Ina Fai Ni ʼu Tisipulo.
ʼE Kotou Tali Feafeaʼi Anai?
• Neʼe fakaloto mālohiʼi feafeaʼi e Sesu te hahaʼi ke natou fakahā tanatou ʼu manatu?
• He koʼē neʼe fagono Sesu kiā nātou ʼaē neʼe ina akoʼi?
• ʼE kotou lava fakaʼaogaʼi feafeaʼi te ʼu fehuʼi ʼi takotou minisitelio?
• Koteā ʼaē ʼe feala ke kotou fai moʼo tokoni ki takotou tamaliki ʼi te faʼahi fakalaumālie?
[Paki ʼo te pasina 24]
Kā kotou fai faka mafola, kotou tokaga ʼo fakalogo lelei ki te hahaʼi
[Paki ʼo te pasina 26]
ʼE tou faʼifaʼitakiʼi ia Sesu mokā tou tokoni ki tatatou tamaliki ʼi te faʼahi fakalaumālie