Kotou Maʼu Te ʼu Kalitātē ʼAē Kā Tokoni Atu Ke Kotou Fai Ni ʼu Tisipulo
“Kotou ʼolo pea ke kotou fai ni ʼu tisipulo ʼi te hahaʼi ʼo te ʼu fenua fuli pē.”—Mateo 28:19.
1. ʼI te temi muʼa, koteā te poto ʼaē neʼe tonu ke maʼu e ʼihi kaugana ʼa te ʼAtua?
KO TE ʼu kaugana ʼa Sehova ʼe tonu ke natou maʼu ʼi ʼihi temi te poto ʼaē kā tokoni anai kiā nātou ke natou fai tona finegalo. Ohagē lā, ʼo mulimuli ki te fakatotonu ʼa te ʼAtua, neʼe mavae ia Apalahamo pea mo Sala mai te kolo maʼu koloa ko Ule pea ki muli age neʼe tonu ke nā maʼu te ʼu kalitātē pea mo te poto ʼo te hahaʼi ʼaē ʼe nonofo ʼi te ʼu falelā. (Hepeleo 11:8, 9, 15) Moʼo taki te kau Iselaele ki te Kele ʼo Te Fakapapau, neʼe tonu ke maʼu e Sosue he lototoʼa, mo he loto falala kiā Sehova, pea ke ina ʼiloʼi te Lao ʼa te ʼAtua. (Sosue 1:7-9) Pea ʼe mahino ia, ko te poto ʼaē neʼe kua maʼu e Pesasele pea mo Oholiape, neʼe toe tuputupu ʼaki te laumālie ʼo te ʼAtua, ke feala ai ki te ʼu tagata ʼaia ke fua lelei tanā gāue pea mo tanā tōkakaga ki te laga ʼo te tapenakulo pea mo te ʼu gāue ʼaē neʼe pipiki kiai.—Ekesote 31:1-11.
2. Koteā te ʼu fehuʼi kā tou vakaʼi anai ʼo ʼuhiga mo te gāue ʼaē ko te fai ʼo ni ʼu tisipulo?
2 ʼI ni ʼu sēkulō ki muli age, neʼe foaki e Sesu Kilisito te fakatotonu ʼaenī ki tana ʼu tisipulo: “Kotou ʼolo pea ke kotou fai ni ʼu tisipulo ʼi te hahaʼi ʼo te ʼu fenua fuli pē, . . . ʼo kotou akoʼi ia nātou ke natou mulimuli ki te ʼu meʼa fuli pē ʼaē neʼe au fakatotonu atu kiā koutou.” (Mateo 28:19, 20) Neʼe mole heʼeki he pilivilēsio fēia ki muʼa atu neʼe kua foaki ki te hahaʼi. Ko te ʼu kalitātē fea ʼaē ʼe ʼaoga ki te gāue ʼaē ko te fai ʼo ni ʼu tisipulo? ʼE tou lava maʼu feafeaʼi te ʼu kalitātē ʼaia?
Tou ʼOʼofa Lahi Ki Te ʼAtua
3. Koteā te fealagia ʼe tou maʼu ʼi te fakatotonu ʼaē ke tou fai ni ʼu tisipulo?
3 ʼE tonu ke tou ʼoʼofa lahi kiā Sehova, ke feala ai hatatou palalau ki te hahaʼi pea mo faiga ke tou fakalotoʼi nātou ke natou tauhi ki te ʼAtua moʼoni. Neʼe feala ke fakahā e te kau Iselaele tonatou ʼofa ki te ʼAtua, ʼo natou fakalogo ʼaki tonatou loto kātoa ki tana ʼu fakatotonu, mo natou momoli he ʼu sākilifisio ʼe ina tali, pea mo natou fakavikiviki kiā te ia ʼaki he ʼu hiva. (Teutalonome 10:12, 13; 30:19, 20; Pesalemo 21:13; 96:1, 2; 138:5) Mo tātou, ʼi tatatou fai ʼo ni ʼu tisipulo, ʼe tou toe mulimuli ki te ʼu lao ʼa te ʼAtua, kae ʼe tou toe fakahā totatou ʼofa kiā Sehova ʼaki tatatou palalau ki te hahaʼi ʼo ʼuhiga mo ia pea mo tana ʼu fakatuʼutuʼu. ʼE tonu ke tou tui papau mokā tou palalau, ʼo tou filifili te ʼu kupu ʼaē ʼe totonu moʼo fakahā tatatou leleiʼia moʼoni ia te ʼamanaki ʼaē ʼe foaki mai e te ʼAtua.—1 Tesalonika 1:5; 1 Petelo 3:15.
4. He koʼē neʼe fiafia Sesu ʼi tana akoʼi te hahaʼi ʼo ʼuhiga mo Sehova?
4 ʼI tana ʼofa lahi kiā Sehova, neʼe fiafia ʼaupitō ia Sesu ʼi tana palalau ʼo ʼuhiga mo te ʼu fakatuʼutuʼu ʼa te ʼAtua, mo te Puleʼaga, pea mo te tauhi moʼoni. (Luka 8:1; Soane 4:23, 24, 31) Koia, neʼe ʼui fēnei e Sesu: “Ko taku meʼa kai ko te fai ʼo te finegalo ʼo ia ʼaē neʼe ina fekauʼi mai au, pea mo au fakaʼosi tana gāue.” (Soane 4:34) Ko te ʼu palalau ʼaenī neʼe fai e te tagata fai pesalemo ʼe faka ʼuhiga kiā Sesu: “Neʼe au fiafia, Ê toku ʼAtua, ʼi te fai ʼo tou finegalo, pea ko tau lao ʼe nofo ʼi toku loto. Neʼe au tala te logo lelei ʼo te faitotonu ʼi te kōkelekāsio lahi. Koʼenī! ʼE mole au tāʼofi toku ʼu laugutu. Ê Sehova, ʼe ke ʼiloʼi lelei pē.”—Pesalemo 40:8, 9; Hepeleo 10:7-10.
5, 6. Koteā te kalitātē maʼuhiga ʼaē ʼe ʼaoga moʼo fai ni ʼu tisipulo?
5 ʼUhi ko tanatou ʼoʼofa ki te ʼAtua, ko te hahaʼi ʼaē neʼe hoki natou ako pē ia te Tohi-Tapu, ʼi ʼihi temi ʼe natou palalau ʼo ʼuhiga mo Sehova pea mo te Puleʼaga ʼaki he toe tui papau lahi, ʼo fua lelei ai tanatou fakalotoʼi ia te hahaʼi ke natou ako ia te Tohi-Tapu. (Soane 1:41) Ko te ʼofa ki te ʼAtua ʼe ko te kalitātē maʼuhiga ʼaia moʼo uga tātou ke tou kau ki te gāue ʼaē ko te fai ʼo ni ʼu tisipulo. Koia, tou taupau ke mālohi tuʼumaʼu te ʼofa ʼaia, ʼo tou lau pea mo metitāsioʼi tuʼumaʼu tana Folafola.—1 Timoteo 4:6, 15; Fakahā 2:4.
6 ʼE mahino papau ia, ʼe ko te ʼofa kiā Sehova ʼaē neʼe tokoni kiā Sesu Kilisito ke liliu ko he tagata faiako faʼafai. Kae neʼe mole ko te tupuʼaga pē ʼaia e tahi ʼo tana maʼu he ʼu fua lelei ʼi tana faka mafola ia te Puleʼaga. Koteā te tahi kalitātē neʼe maʼu e Sesu ke fua lelei ai tana fai ʼo ni ʼu tisipulo?
Tou ʼOʼofa Ki Te Hahaʼi
7, 8. Neʼe feafeaʼi te aga ʼa Sesu ki te hahaʼi?
7 Neʼe tokaga Sesu ki te hahaʼi pea neʼe fia mahino ki tonatou maʼuli. Māʼiapē lā ʼi tona maʼuli ʼi selō, ʼi tona ʼuhiga “tufuga faiva” ʼo te ʼAtua, neʼe ina leleiʼia te ʼu meʼa ʼaē neʼe pipiki ki te tagata. (Tāʼaga Lea 8:30, 31) ʼI tona maʼuli ʼi te kele, neʼe manavaʼofa Sesu ki te hahaʼi, ʼo ina faka fīmālieʼi ia nātou ʼaē neʼe ʼomai kiā te ia. (Mateo 11:28-30) Neʼe fakahā e Sesu te ʼofa pea mo te manavaʼofa ʼo Sehova, pea neʼe tupu ai te fia tali e te hahaʼi ke natou tauhi ki te ʼAtua moʼoni pē e tahi. Ko te hahaʼi kehekehe neʼe natou fakalogo kiā Sesu he neʼe ʼofa kiā nātou pea mo mahino ki te ʼu ʼaluʼaga ʼo tonatou maʼuli.—Luka 7:36-50; 18:15-17; 19:1-10.
8 ʼI te fehuʼi age ʼa te tagata pe koteā ʼaē ʼe tonu ke ina fai ke ina maʼu ai te maʼuli heʼegata, “neʼe sioʼi ai ia ia e Sesu pea tupu ai tona ʼofa kiā te ia.” (Maleko 10:17-21) ʼO ʼuhiga mo ʼihi hahaʼi ʼaē neʼe akoʼi e Sesu ʼi Petania, ʼe tou lau fēnei: “Neʼe ʼofa Sesu ia Maleta mo tona tehina pea mo Lasalo.” (Soane 11:1, 5) Neʼe tokaga ʼaupitō ia Sesu ki te hahaʼi, ʼo mole ina ʼai hana kiʼi mālōlō kae ina haga akoʼi nātou. (Maleko 6:30-34) ʼAki te taʼi ʼofa lahi ʼaia ʼa Sesu ki te hahaʼi, neʼe liliu ai ia ʼo faiva tokotahi ʼi te taki mai ʼo te hahaʼi ki te tauhi moʼoni.
9. Neʼe feafeaʼi ia Paulo ʼi tana fai ni ʼu tisipulo?
9 Neʼe toe tokaga ʼaupitō ia te ʼapositolo ko Paulo ki te hahaʼi ʼaē neʼe fai faka mafola kiā nātou. Ohagē lā, neʼe ina ʼui fēnei kiā nātou ʼaē neʼe liliu ko he kau Kilisitiano ʼi Tesalonika: “ ʼI tamatou ʼofa ʼaē kiā koutou, ko tamatou fiafia neʼe mole gata ʼaki pē tamatou fakahā atu te logo lelei ʼa te ʼAtua, kae neʼe toe kau ai mo tomatou ʼu nefesi totonu, koteʼuhi kua kotou liliu maʼa mātou ko he kau ʼofaina.” ʼAki te ʼu faiga ʼofa ʼaia ʼa Paulo, ko ʼihi ʼi Tesalonika neʼe natou ‘maliu mai tanatou ʼu tamapua, ʼo natou kaugana ki te ʼAtua maʼuli.’ (1 Tesalonika 1:9; 2:8) Kapau ʼe tou tokaga lahi ki te hahaʼi, ohagē ko tona fai e Sesu pea mo Paulo, pea ʼe tou toe fiafia mo tātou ʼi te sio ki te malave ʼo te logo lelei ki te loto ʼo nātou “ ʼaē neʼe lotolelei ki te maʼuli heʼegata.”—Gāue 13:48.
Tou Maʼuli Faka Sākilifisio
10, 11. He koʼē ʼe ʼaoga he maʼuli faka sākilifisio ʼi tatatou gāue ʼaē ko te fai ʼo ni ʼu tisipulo?
10 Ko nātou ʼaē ʼe natou maʼu he ʼu fua lelei ʼi tanatou fai ni ʼu tisipulo, ʼe natou maʼuli faka sākilifisio. ʼE mahino ia, ʼe mole maʼuhiga ʼaupitō kiā nātou te maʼu ʼo he ʼu koloa. Koia, neʼe ʼui fēnei e Sesu ki tana ʼu tisipulo: “ ʼE faigataʼa anai kiā nātou ʼaē ʼe maʼu paʼaga tanatou hū ki te puleʼaga ʼo te ʼAtua!” Neʼe punamaʼuli te ʼu tisipulo ʼi tanatou logo ki te ʼu palalau ʼaia, kae neʼe toe ʼui fēnei e Sesu: “Fānau, ʼe ko he meʼa faigataʼa ia te hū ki te puleʼaga ʼo te ʼAtua! ʼE faigafua age ki he kamelo tana hū ʼi he pu ʼo he hui tui, ʼi he tagata maʼu koloa ke hū ki te puleʼaga ʼo te ʼAtua.” (Maleko 10:23-25) Neʼe fakaloto mālohiʼi e Sesu tana ʼu tisipulo ke natou maʼuli faigafua, ke feala hanatou tōkakaga ʼāteaina pē ki te fai ʼo ni ʼu tisipulo. (Mateo 6:22-24, 33) He koʼē ko he maʼuli faka sākilifisio ʼe tokoni mai anai ke tou fai ni ʼu tisipulo?
11 ʼE tonu ke tou faiga lahi moʼo akoʼi ki te hahaʼi te ʼu meʼa fuli ʼaē neʼe fakatotonu mai e Sesu. ʼI te agamāhani, ko he tahi ʼe ina fai ni ʼu tisipulo, ʼe faiga ʼi te vāhaʼa fuli ke ina fai he ako Tohi-Tapu mo he tahi ʼe ina fia ʼiloʼi te moʼoni. Ke lahi age te ʼu faigamālie ʼaē ke natou maʼu ai he ʼu hahaʼi ʼe natou fia ʼiloʼi te moʼoni, ko ʼihi fai faka mafola ʼo te Puleʼaga neʼe natou fetogi tanatou gāue temi kātoa, ʼo natou gāue vaeluaʼi ʼaho. Ko te ʼu toko lauʼi afe kau Kilisitiano neʼe natou ako te tahi lea ke feala hanatou fai faka mafola ki he kūtuga ʼo he tahi lanu ʼi tonatou telituale. Ko ʼihi ʼe natou kau ki te gāue ʼo te fai ʼo ni ʼu tisipulo, neʼe natou mavae mai tonatou ʼu ʼapi, ʼo natou ʼolo ki he tahi telituale peʼe ko he tahi fenua moʼo lagolago mālohi age ki te taʼukai. (Mateo 9:37, 38) ʼE maʼua kiā meʼa fuli ʼaia he maʼuli faka sākilifisio. Kae ʼe ʼaoga te tahi age meʼa ke lelei age tatatou fai ni ʼu tisipulo.
Tou Faʼa Kātaki Kae ʼAua Naʼa Pulinoa Totatou Temi
12, 13. He koʼē ʼe maʼuhiga ia te faʼa kātaki moʼo fai ʼo ni ʼu tisipulo?
12 Ko te faʼa kātaki ʼe ko he tahi kalitātē kā tokoni mai ke tou fai ni ʼu tisipulo. Ko te logo ʼaē ʼe tou faka mafola ʼi totatou ʼuhiga Kilisitiano ʼe fakamaʼua ke tou gāue fakavilivili, kae ʼi ʼihi temi, ko te fai ʼo ni ʼu tisipulo ʼe fakamaʼua kiai he temi ʼe lahi age pea mo he faʼa kātaki. (1 Kolonito 7:29) Neʼe faʼa kātaki Sesu mo tona tehina ko Sake. Logolā neʼe lagi ʼiloʼi lelei e Sake te ʼu gāue fai faka mafola ʼa Sesu, kae lolotoga te temi, neʼe ʼi ai te meʼa neʼe ina tāʼofi ia ia ke liliu ko he tisipulo. (Soane 7:5) Kae ʼi te vāha ʼaē mai te temi neʼe mate ai Kilisito pea mo te Penikositē ʼo te taʼu 33 ʼo totatou temi, ʼe hā mai neʼe liliu Sake ko he tisipulo, heʼe ʼui ʼi te Tohi-Tapu neʼe fakatahi faikole mo tana faʼē, mo tona ʼu tehina, pea mo te ʼu ʼapositolo. (Gāue 1:13, 14) Neʼe tuputupu lelei ia Sake ʼi te faʼahi fakalaumālie, pea ki muli age neʼe ʼi ai tona ʼu maʼua lahi ʼi te kōkelekāsio faka Kilisitiano.—Gāue 15:13; 1 Kolonito 15:7.
13 Ohagē ko he hahaʼi gāue kele, ʼi ʼihi temi ʼe tō e te kau Kilisitiano he ʼu meʼa ʼe tuputupu māmālie—te mahino ki te Folafola ʼa te ʼAtua, te ʼofa kiā Sehova, pea mo te manatu ʼaē neʼe maʼu e Kilisito. Ko he faʼahi ʼe fakamaʼua kiai te faʼa kātaki. Neʼe tohi fēnei e Sake: “Kotou faʼa kātaki . . . ʼu tehina, ʼo aʼu ki te ʼafio ʼo te ʼAliki. Koʼenī! ʼE fakatalitali ia te tagata gāue kele ki te fua maʼuhiga ʼo te kele, ʼo faʼa kātaki ʼi te faʼahi ʼaia, ʼo aʼu ki te tō ʼo te ʼuluaki ʼua pea mo te ʼua fakamuli. Kotou faʼa kātaki, mo koutou foki; kotou tāʼofi maʼu tokotou ʼu loto, koteʼuhi kua ovi mai te ʼi henī ʼo te ʼAliki.” (Sake 5:7, 8) Neʼe fakaloto mālohiʼi e Sake te ʼu tehina ke natou ‘faʼa kātaki ʼo aʼu ki te ʼafio ʼo te ʼAliki.’ Kapau neʼe ʼi ai he faʼahi neʼe mole mahino kiai te ʼu tisipulo, pea neʼe faʼa kātaki Sesu ʼo ina fakamahino age peʼe ina fakaʼaogaʼi he ʼu lea fakatātā. (Mateo 13:10-23; Luka 19:11; 21:7; Gāue 1:6-8) ʼI te temi ʼaenī ʼaē kua ʼafio ai te ʼAliki, ʼe toe ʼaoga ke tou faʼa kātaki ʼi tatatou faiga ʼaē ke tou fai ni ʼu tisipulo. ʼI totatou temi, ʼe tonu ke tou faʼa kātaki ʼo akoʼi ia nātou ʼaē ʼe liliu ko he ʼu tisipulo ʼa Sesu.—Soane 14:9.
14. Tatau aipē pe tou faʼa kātaki, kae ʼe tou lava fakaʼaogaʼi fakapotopoto feafeaʼi totatou temi ʼi tatatou fai ʼo ni ʼu tisipulo?
14 Tatau aipē pe tou faʼa kātaki, kae ko te folafola ʼe mole fua anai ʼi te hahaʼi fuli ʼaē kā tou kamata fai tanatou ako Tohi-Tapu. (Mateo 13:18-23) Koia, ʼi tatatou kua fai ia meʼa fuli moʼo tokoni ki te taʼi faʼahiga hahaʼi ʼaia, lagi kua tonu leva ke tou fakaʼaogaʼi fakapotopoto ia totatou temi moʼo kumi ia nātou ʼaē kā natou faka maʼuhigaʼi anai ia te moʼoni ʼo te Tohi-Tapu. (Tagata Tānaki 3:1, 6) Kae māʼiapē lā mo te hahaʼi ʼaē ʼe natou leleiʼia te moʼoni ʼaē ʼi te Tohi-Tapu, ʼe lagi ʼaoga anai he tokoni lahi kiā nātou ʼaia moʼo fetogi tanatou manatu, tanatou aga, pea mo te ʼu meʼa ʼaē ʼe natou fakamuʼamuʼa ʼi tonatou maʼuli. Koia ʼe tou faʼa kātaki ai, ohagē pē ko Sesu neʼe faʼa kātaki mo te ʼu tisipulo ʼaē neʼe faigataʼa hanatou maʼu ia he manatu ʼe lelei.—Maleko 9:33-37; 10:35-45.
Tou Popoto ʼi Te Faiako
15, 16. Kā tou fai ni ʼu tisipulo, he koʼē ʼe maʼuhiga ke tou teuteu lelei pea mo faigafua tatatou fakamahino?
15 Ko te ʼofa ki te ʼAtua, te tokaga ki te hahaʼi, te maʼuli faka sākilifisio, pea mo te faʼa kātaki ʼe ko he ʼu faʼahi maʼuhiga ke tou maʼu ai he ʼu fua lelei ʼi te fai ʼo he ʼu tisipulo. ʼE toe ʼaoga ke tou popoto ʼi te faiako, heʼe feala ai hatatou fakamahino lelei he ʼu manatu pea mo faigafua. Ohagē lā, ʼe lahi te ʼu folafola ʼa te Tagata Faiako Lahi ko Sesu Kilisito neʼe fua lelei he neʼe faigafua ki te mahino ʼa te hahaʼi. ʼE kotou lagi manatuʼi te ʼu palalau ʼaenī neʼe fai e Sesu: “Ke kotou tānaki maʼa koutou he ʼu koloā ʼi selō.” “ ʼAua naʼa kotou foaki ki te faga kuli te meʼa ʼaē ʼe māʼoniʼoni.” “Ko te poto neʼe hā mai ia ʼe tonu ʼaki tana ʼu gāue.” “Kotou liufaki te ʼu meʼa ʼa Sesale kiā Sesale, kae ko te ʼu meʼa ʼa te ʼAtua ki te ʼAtua.” (Mateo 6:20; 7:6; 11:19; 22:21) ʼE mole ʼui leva neʼe fai pē e Sesu he ʼu palalau fakanounou. Neʼe matala lelei tana faiakonaki pea neʼe ina fakamahino te ʼu manatu mokā neʼe ʼaoga ke ina fai te faʼahi ʼaia. ʼE kotou lava faʼifaʼitakiʼi feafeaʼi te faʼahiga faiakonaki ʼa Sesu?
16 Ko te teuteuʼi fakalelei ʼo he ako, ʼe ko te puleʼaki maʼuhiga ʼaia ke faigafua pea mo matala lelei tatatou faiakonaki. Ko he minisi neʼe mole teuteu lelei, ʼi te agamāhani ʼe lahi fau anai tana ʼu palalau. ʼE feala ke mole ina fakahā lelei te ʼu puani maʼuhiga heʼe lahi fau tana palalau, ʼo ina fakamatala te ʼu meʼa fuli ʼaē ʼe ina ʼiloʼi ʼo ʼuhiga mo te manatu ʼaia. Kae ko ia ʼaē neʼe teuteu lelei, ʼe manatu ki te ʼaluʼaga ʼo ia ʼaē ʼe ako, ʼe metitāsio ki te ʼu manatu ʼaē kā ina faka ako, pea ʼe faigafua tana fakamatala ia te ʼu manatu ʼaē ʼe ʼaoga. (Tāʼaga Lea 15:28; 1 Kolonito 2:1, 2) ʼE ina manatuʼi te ʼu meʼa ʼaē kua ʼiloʼi e ia ʼaē ʼe ako pea mo fakakaukauʼi pe ko te ʼu manatu fea ʼaē kā ina fakamaʼuhigaʼi lolotoga te ako. ʼE feala ke ʼiloʼi e te minisi faka Kilisitiano he ʼu tuʼuga manatu ʼo ʼuhiga mo te meʼa ʼaē ʼe ina faka ako, kae ʼe feala kiā ia ʼaē ʼe ako ke matala lelei mokā ʼe mole talanoa ki te ʼu manatu ʼaē ʼe mole honatou ʼaoga.
17. ʼE tou lava tokoni feafeaʼi ki te hahaʼi ke natou fakakaukauʼi ia te ʼu manatu faka Tohi-Tapu?
17 Neʼe toe tokoni Sesu ki te hahaʼi ke natou fakakaukauʼi te ʼu meʼa ʼaē ʼe palalau kiai, kae ʼe mole gata pē ʼi tana ʼu fai fakamatala. Ohagē lā, ʼi te tahi lakaga, neʼe ina fehuʼi fēnei: “Koteā tau manatu kiai, Simone? ʼE maʼu maifea e te ʼu hau ʼo te kele ia te ʼu tukuhau peʼe ko te tukuhau ʼa te takitokotahi? Mai tonatou ʼu foha peʼe mai te hahaʼi matāpule?” (Mateo 17:25) ʼE lagi tou leleiʼia te fakamahino ʼo te Tohi-Tapu, koia ʼe maʼua ai ke tou loto lolomi, ʼo tou tuku kiā ia ʼaē ʼe ako ke ina fakahā mai tana manatu peʼe ke ina fakamahino he puani ʼe vakaʼi ʼi te ako Tohi-Tapu. ʼE mahino ia ʼe mole tou fai anai he ʼu tuʼuga fehuʼi kiā ia ʼaē ʼe ako. Kae, ʼaki he fakaʼeteʼete, mo he ʼu lea fakatātā lelei, pea mo he ʼu fehuʼi neʼe fakakaukauʼi lelei, ʼe feala ke tou tokoni kiā nātou ke natou mahino ki te ʼu puani faka Tohi-Tapu ʼaē ʼe tuʼu ʼi tatatou ʼu tohi faka Tohi-Tapu.
18. Koteā ʼaē ʼe tonu ke tou fai ke tou maʼu te “poto ʼi te faiakonaki”?
18 ʼE talanoa ʼi te Tohi-Tapu ki te “poto ʼi te faiakonaki.” (2 Timoteo 4:2; Tito 1:9) Ko te taʼi poto faiako ʼaia, ʼe mole gata pē ʼi tatatou tokoni ʼaē ki he tahi ke ina manatuʼi he ʼu puani. ʼE tonu ke tou faiga ʼo tokoni kiā ia ʼaē ʼe ako te Tohi-Tapu ke mahino ki te kehekehe ʼo te ʼu faʼahi ʼaenī: te moʼoni pea mo te loi, te lelei pea mo te kovi, te aga ʼaē ʼe poto pea mo te aga ʼaē ʼe vale. ʼI tatatou fai fēia pea mo tou fakatuputu iā te ia te ʼofa ʼaē kiā Sehova, ʼe feala anai ke mahino pe koʼē ʼe tonu ke fakalogo ki te ʼAtua.
Tou Faʼafai ʼi Te Gāue ʼAē Ko Te Fai ʼo Ni ʼu Tisipulo
19. ʼE tokoni feafeaʼi te ʼu Kilisitiano fuli ki te fai ʼo ni ʼu tisipulo?
19 Ko te kōkelekāsio faka Kilisitiano ʼe ko he kautahi ʼe ina fai ni ʼu tisipulo. Kā liliu he tahi ko he tisipulo, ʼe mole gata pē te fiafia ʼi te Fakamoʼoni ʼa Sehova ʼaē neʼe ina maʼu ia ia pea mo tokoni ki ai ke ina ako te ʼu manatu faka Tohi-Tapu. Kā fekumi e te hahaʼi he tamasiʼi neʼe puli, ʼe lagi ko te tokotahi pē ʼaē kā ina maʼu te tamasiʼi. Kae kā toe ʼave ia te tamasiʼi ki tana ʼu mātuʼa, pea ʼe fiafia te hahaʼi fuli ʼaē neʼe natou fekumi ia ia. (Luka 15:6, 7) ʼO toe fēia pē ki te fai ʼo ni ʼu tisipulo, ʼe ko te gāue ʼa he tokolahi. ʼE kau te ʼu Kilisitiano fuli ki te kumi ʼo nātou ʼaē ʼe feala ke liliu ko he ʼu tisipulo ʼa Sesu. Pea kā kamata kau he tahi ʼe foʼofoʼou ki te ʼu fono ʼi te Fale ʼo Te Puleʼaga, ko te kau Kilisitiano fuli ʼi te fono ʼe natou tokoni ke tuputupu tana leleiʼia ia te tauhi moʼoni. (1 Kolonito 14:24, 25) Koia, ko te kau Kilisitiano fuli ʼe natou fiafia ʼi te liliu ʼa te hahaʼi e lauʼi teau afe ko he ʼu tisipulo foʼou ʼi te taʼu fuli.
20. Koteā ʼaē ʼe tonu ke kotou fai mo kapau ʼe kotou fia akoʼi ki niʼihi ia te ʼu moʼoni faka Tohi-Tapu?
20 Tokolahi te kau Kilisitiano agatonu ʼe natou fiafia anai ʼi te akoʼi ki he tahi ʼo ʼuhiga mo Sehova pea mo te tauhi moʼoni. Kae logolā tanatou ʼu faiga lahi, ʼe lagi mole feala ke natou fai te faʼahi ʼaia. Kapau ʼe fēia tokotou ʼaluʼaga, kotou haga fakatuputupu tokotou ʼofa ʼaē kiā Sehova, kotou tokaga ki te hahaʼi, kotou maʼuli faka sākilifisio, mo faʼa kātaki, pea mo kotou faigaʼi ʼo hikihiki tokotou poto ʼi te faiako. Kae tāfito, kotou fakahā ʼi takotou ʼu faikole ia takotou fia akoʼi te moʼoni ki he tahi. (Tagata Tānaki 11:1) Kae ke kotou fakafiafia ʼi takotou ʼiloʼi ʼaē ko meʼa fuli ʼe kotou fai ʼi te tauhi kiā Sehova, ʼe tokoni ki te gāue ʼaē ko te fai ʼo ni ʼu tisipulo, ʼo faka kolōlia ai te ʼAtua.
ʼE Feala Koa Hakotou Fakamahino?
• He koʼē ko te fai ʼo ni ʼu tisipulo ʼe ʼahiʼahiʼi ai totatou ʼofa ʼaē ki te ʼAtua?
• Ko te ʼu kalitātē fea ʼaē ʼe ʼaoga ki te gāue ʼaē ko te fai ʼo ni ʼu tisipulo?
• Koteā ʼaē ʼe tonu ke tou fai ke tou maʼu te “poto ʼi te faiakonaki”?
[Paki ʼo te pasina 17]
ʼI tanatou fai ʼo ni ʼu tisipulo, ʼe fakahā e te kau Kilisitiano tonatou ʼoʼofa lahi ʼaē ki te ʼAtua
[Paki ʼo te pasina 19]
He koʼē ʼe tonu ke tou tokaga ki te hahaʼi ke feala hatatou fai ni ʼu tisipulo?
[Paki ʼo te pasina 20]
Koteā ʼihi ʼu kalitātē ʼe ʼaoga moʼo fai ʼo ni ʼu tisipulo?
[Paki ʼo te pasina 21]
ʼE fiafia te kau Kilisitiano fuli ʼi tanatou sisio ki te ʼu fua lelei ʼo te gāue ʼaē ko te fai ʼo ni ʼu tisipulo