“Kotou Olo ʼo Fai Ni Tisipulo”

1-2. (1) Kotea te gaue maʼuhiga neʼe foaki ki te ʼuluaki kokelekasio Fakakilisitiano ʼae ʼe tou maʼu ia Mateo 28:18-20? (2) Kotea te ʼu fehuʼi ka tou tali ki ai ʼi te alatike ʼaeni?

HILI te fakatuʼuake ʼo Sesu, neʼe ina kole ki ʼana tisipulo ke natou fakatahitahi ʼi he moʼuga. ʼE mahino ia, neʼe natou fiafia ʼi tanatou fakatahitahi ʼaia. (Mat. 28:16) Neʼe lagi ko te lakaga ʼaia neʼe ha ai ia Sesu “ki te ʼu tehina ʼe toko 500 tupu ʼi he temi pe ʼe tahi.” (1 Ko. 15:6) He koʼe neʼe kole e Sesu ki ʼana tisipulo ke natou fakatahitahi ki te koga meʼa ʼaia? Koteʼuhi neʼe tonu ke ina foaki kia natou he gaue maʼuhiga ke natou fai. Neʼe ina ui fenei: “Koia, kotou olo ʼo fai ni tisipulo ʼi te hahaʼi ʼo te ʼu fenua fuli pe.”—Lau ia Mateo 28:18-20.

² Ko te ʼu tisipulo ʼae neʼe logo ki te ʼu folafola ʼa Sesu, neʼe kau ki te ʼuluaki kokelekasio Fakakilisitiano. Pea ko te ʼuluaki gaue ʼa te ʼuluaki kokelekasio ʼaia, ko te hoko atu ʼo te fai ʼo ni tisipulo ʼa Kilisito.b Ia ʼaho nei, kua lauʼi hogofulu afe te ʼu kokelekasio ʼi te malamanei, pea ʼe kei natou fakahoko pe te gaue ʼaia. ʼE tou vakaʼi anai ʼi te alatike ʼaeni te ʼu fehuʼi ʼaeni ʼe fa: He koʼe ʼe maʼuhiga ʼaupito te fai ʼo ni tisipulo? Kotea ʼae ʼe tonu ke tou fai? ʼE feala koa ki te kau Kilisitiano fuli ke natou fai ni tisipulo? He koʼe ʼe ʼaoga ke tou kataki fualoa moka tou fakahoko te gaue ʼaia?

HE KOʼE ʼE MAʼUHIGA ʼAUPITO TE FAI ʼO NI TISIPULO?

3. Kotea ʼae ʼe ui ia Soane 14:6 mo Soane 17:3, pea he koʼe ʼe maʼuhiga ʼaupito te fai ʼo ni tisipulo?

³ He koʼe ʼe maʼuhiga ʼaupito te fai ʼo ni tisipulo? Koteʼuhi ʼe gata pe ki te ʼu tisipulo ʼa Kilisito ʼe feala ke natou kaumeʼa mo te ʼAtua. Pea tahi, ko natou ʼae ʼe natou muliʼi ia Kilisito kua lelei age ʼonatou maʼuli, pea ʼe natou maʼu te ʼamanaki ʼae ko te maʼuli heʼe gata ʼi te ka haʼu. (Lau ia Soane 14:6; 17:3.) ʼE moʼoni, neʼe foaki mai e Sesu he gaue maʼuhiga, kae ʼe mole ko tatou ʼateaina pe ʼae ʼe tou fai te gaue ʼaia. Neʼe tohi fenei e te apositolo ko Paulo ʼo ʼuhiga mo ia pea mo ʼona kaugā gaue: “ ʼE [tou] kaugā gaue mo te ʼAtua.” (1 Ko. 3:9) ʼE ko he toe pilivilesio neʼe foaki mai e Sehova pea mo Kilisito kia tatou ko he kau agahala.

4. Kotea ʼae ʼe tou ako mai te aluʼaga ʼae neʼe hoko kia Ivan mo Matilde?

⁴ ʼE tou logoʼi he fiafia lahi moka tou fai ni tisipulo. Tou toʼo te faʼifaʼitaki ʼo Ivan mo tona ʼohoana ko Matilde ʼe nonofo ʼi Colombie. Neʼe nā faifakamafola ki te tupulaga ʼe higoa ko Davier ʼae neʼe ina ui fenei kia naua: “ ʼE au fia fai he ʼu fetogi ʼi toku maʼuli, kae ʼe faigataʼa ʼosi.” Neʼe ko he tama fuhu ia Davier mo ina fakaʼaogaʼi te toloke, mo inu kava fakavale pea neʼe maʼuli mo te taʼahine ʼe higoa ko Erika. ʼE fakamahino fenei e Ivan: “Neʼe ma kamata ʼaʼahi ia ia ki tona kolo. Neʼe tonu ke ma olo lelue lolotoga ni hola ʼi he ʼu ala ʼe pela. Neʼe fakatokagaʼi e Erika te kua fetogi ʼo te aga pea mo te faʼahiga manatu ʼa Davier, ʼo fia kau ai mo ia ki te ako Tohi-Tapu.” ʼAki te temi, neʼe tuku leva e Davier tana fakaʼaogaʼi te toloke, tana inu pea mo tana fuhu. Pea neʼe ʼohoana leva pea mo Erika. ʼE fakamatala fenei e Matilde: “ ʼI te papitema ʼa Davier pea mo Erika ʼi te taʼu 2016, neʼe ma manatuʼi neʼe ui tuʼumaʼu e Davier, ‘ ʼe au fia fai he ʼu fetogi ʼi toku maʼuli, kae ʼe faigataʼa ʼosi.’ Koia neʼe ma fetagihi ai.” ʼE moʼoni, ʼe tou logoʼi he fiafia lahi moka ʼe tou tokoni ki te hahaʼi ke natou liliu ko ni tisipulo ʼa Kilisito.

KOTEA ʼAE ʼE TONU KE TOU FAI MOʼO FAI NI TISIPULO?

5. Kotea te ʼuluaki gaue ʼae ʼe tonu ke tou fai mo kapau ʼe tou fia fai ni tisipulo?

⁵ Ka tou fia fai ni tisipulo, ko te ʼuluaki gaue tafito ko te “kumi” ʼo te hahaʼi ʼae ʼe natou lotolelei ke natou ako ke natou iloʼi ia Sehova. (Mat. 10:11) Kapau ʼe tou palalau ʼo ʼuhiga mo Sehova ki te hahaʼi fuli pe ʼae ʼe tou felaveʼi, ʼe tou fakaha ai ko tatou ko te ʼu Fakamoʼoni ʼa Sehova. Pea ʼe tou toe fakaha ko tatou ko te ʼu Kilisitiano moʼoni mo kapau ʼe tou fakalogo ki te fakatotonu ʼa Kilisito ʼae ke tou olo ʼo faifakamafola.

6. Kotea ʼae ʼe tonu ke kotou fai ke fia fagono atu te hahaʼi ʼi te faifakamafola?

⁶ Ko ʼihi hahaʼi ʼe natou fia ako te ʼu moʼoni Fakatohi-tapu kae ʼe fakafisi te tokolahi. ʼE feala pe ke tou fakalotomalohiʼi ia natou ke natou fia ako ia te Tohi-Tapu. Kapau ʼe tou loto ke fua lelei tatatou faifakamafola ʼe tonu ke tou teuteuʼi lelei. Tou filifili he ʼu manatu ʼe leleiʼia e te hahaʼi pea tou fakakaukauʼi pe ʼe feafeaʼi hatatou kamata te faipalalau ki te ʼu manatu ʼaia.

7. ʼE feafeaʼi he kamata ʼo he faipalalau mo he tahi? Pea he koʼe ʼe maʼuhiga ke kotou fagono lelei ki te hahaʼi ʼaki he fakaʼapaʼapa?

⁷ Ohage la, ʼe feala pe ke kotou ui fenei: “ ʼE feala la ke au fai atu he fehuʼi? Tokolahi ʼe natou tau mo he ʼu fihifihia ʼi te malamanei. ʼI takotou manatu la ʼe feala koa ki he puleʼaga ke ina fakatokatoka te ʼu fihifihia ʼaia?” Pea ʼe feala ke kotou faipalalau ki te vaega ʼo Taniela 2:44. Peʼe toe feala pe ke kotou ui fenei: “Kia koutou la, kotea ʼae ʼe tonu ke akoʼi ki ʼakotou fanau ke natou maʼu he ʼu aga ʼe lelei?” Pea kotou faipalalau kia Tetelonome 6:6, 7. Kotou fakakaukauʼi pe kotea te manatu ʼa te hahaʼi ʼo ʼuhiga mo te manatu ʼae neʼe kotou faipalalau ki ai. Kotou toe manatuʼi te ʼu fua lelei ʼae ʼe feala ke natou maʼu mo kapau ʼe natou ako te ʼu moʼoni Fakatohi-tapu. Pea ka kotou faipalalau mo natou, ʼe maʼuhiga ke kotou fagono lelei pea mo fakaʼapaʼapa ki ʼanatou manatu. ʼE feala anai ke kotou mahino lelei ki ʼanatou manatu pea ʼe natou fia fakalogo atu leva.

8. He koʼe ʼe tonu ke tou toe liliu ʼo ʼaʼahi te hahaʼi?

⁸ ʼE tonu ke kotou faiga malohi ke kotou olo ʼo ʼaʼahi tuʼumaʼu he tahi ia muʼa ʼo hana fia ako te Tohi-Tapu. Kotea tona tupuʼaga? Koteʼuhi ka kotou ʼaʼahi he tahi ki tona ʼapi, ʼe mole kotou maʼu tuʼumaʼu. Koia ʼae ʼe tonu ai ke kotou olo liuliuga ʼo ʼaʼahi ia ia ke mahani mo koutou, pea lagi ki ʼamuli ʼe ina fia ako anai te Tohi-Tapu. Kotou manatuʼi ke maʼuli lelei he fuʼu ʼakau ʼe tonu ke fakavai tuʼumaʼu. ʼE toe feia pe mo tatou, kapau ʼe tou palalau tuʼumaʼu ki te Tohi-Tapu, pea ʼe feala kia ia ʼae ʼe tou ʼaʼahi ke tuputupu tona ʼofa kia Sehova pea mo Kilisito.

ʼE FEALA KOA KI TE KAU KILISITIANO FULI KE NATOU FAI NI TISIPULO?

9-10. He koʼe ʼe feala ke tou ui ʼe tokoni te kau Kilisitiano moʼoni fuli ki te kumi ʼo natou ʼae ʼe fia liliu ko he ʼu tisipulo?

⁹ ʼE tonu ki te Kilisitiano takitokotahi ke ina kumi te hahaʼi ʼae ʼe natou fakamalotoloto. ʼE feala ke tou fakatatau te gaue ʼaia ki te kumi ʼo he kiʼi tamasiʼi neʼe puli. ʼO feafeaʼi? Tou toʼo te faʼifaʼitaki ʼo te kiʼi tama ʼe taʼu tolu neʼe puli ʼi tona ʼapi. Neʼe teitei toko 500 natou ʼae neʼe olo ʼo kumi ia ia. Pea hili leva hola ʼe teitei 20 ki tana puli ʼaia, neʼe maʼu leva ia ia e he tahi ʼi te gaueʼaga tulina. Neʼe mole loto e ia ʼaia ke fakaha ko ia ʼae neʼe ina maʼu. Kae neʼe ina ui fenei: “Neʼe maʼu te kiʼi tama koteʼuhi neʼe kaugā malie tona kumi.”

¹⁰ Tokolahi te hahaʼi ʼe natou hage ko te kiʼi tama ʼaia, ʼe mole kei hanatou ʼamanaki pea ʼe natou kole tokoni. (Efe. 2:12) Pea ko te faʼahiga hahaʼi la ʼaia, ʼe kumi e te toko valu miliona tupu kau Fakamoʼoni ʼa Sehova. ʼE lagi ʼe kotou maʼu anai he tahi ʼi he telituale kae ʼe mole ina fia ako anai te Tohi-Tapu mo koutou. Kae neʼe fai e ʼihi tehina mo tuagaʼane te telituale ʼaia, ʼo maʼu ai he tahi ʼe ina fia ako te ʼu moʼoni ʼo te Tohi-Tapu. Ka maʼu e he tehina peʼe ko he tuagaʼane he tahi ʼo tokoni ki ai ke liliu ko he tisipulo ʼa Kilisito, ʼe fiafia anai ia natou fuli ʼae neʼe natou gaue ʼi te telituale ʼaia.

11. ʼE feafeaʼi hakotou tokoni ki te fai ʼo he ʼu tisipulo tatau aipe pe ʼe mole ʼi ai hakotou ako Tohi-Tapu?

¹¹ Tatau aipe pe ʼe mole ʼi ai hakotou ako Tohi-Tapu, kae ʼe feala pe ke kotou tokoni ki te fai ʼo ni tisipulo. Ohage la, ʼe feala pe ke kotou tali leleiʼi te hahaʼi foʼou ʼae ʼe ʼomai ki te Fale Fono pea mo kotou tokoni kia natou. Ka kotou fai te faʼahi ʼaia, ʼe feala anai ke natou tokagaʼi ʼe tou feʼofaʼofani pea ko tatou ko te kau Kilisitiano moʼoni. (Soa. 13:34, 35) Ka kotou fai he ʼu tali ʼi te ʼu fono maʼia pe ʼe nounou, ʼe kotou tokoni ai kia natou ʼae ʼe kei foʼofoʼou ke natou fakaha tanatou tui ʼaki he ʼu tali ʼe fakamalotoloto pea mo fakaʼapaʼapa. ʼE toe feala ke kotou faifakamafola mo he kaugā fagona foʼou pea mo tokoni ki ai ke ina fakaʼaogaʼi lelei te Tohi-Tapu moka ʼe faipalalau mo te hahaʼi. Kapau ʼe kotou fai feia, ʼe kotou ako kia ia te faʼifaʼitakiʼi ʼo Kilisito.—Luka 10:25-28.

12. ʼE tonu koa ke tou maʼu he ʼu fealagia makehe moʼo fai ʼo ni tisipulo? Kotou fakamahino.

¹² ʼAua tatatou manatu ʼe tonu ke tou maʼu he ʼu fealagia makehe moʼo akoʼi te hahaʼi ke natou liliu ko he ʼu tisipulo ʼa Sesu. Kotea tona tupuʼaga? Tou toʼo te faʼifaʼitaki ʼo Faustina, ʼe maʼuli ʼi Bolivie. Neʼe mole poto ʼi te lautohi ʼi tana kamata alu ki te ʼu fono ʼa te Kau Fakamoʼoni ʼa Sehova. Talu mai ai, kua ina kamata akoako te lautohi. ʼI te temi nei kua papitema, pea ʼe fiafia ʼi te akoʼi ʼo ʼihi. Pea ʼe ina fai ʼana ako Tohi-Tapu ʼe nima ʼi te vahaʼa. Logo la, ʼe heʼeki poto lelei ia Faustina ʼi te lautohi ohage ko ʼana kau ako, kae neʼe tokoni ki te toko ono ʼo kaku ki tonatou papitema.—Luka 10:21.

13. Kotea he ʼu tapuakina ʼe tou maʼu moka tou fai ni tisipulo, tatau aipe pe ʼe tou maʼumaʼua?

¹³ Tokolahi te kau Kilisitiano ʼe natou maʼumaʼua, koteʼuhi ʼe lahi te ʼu gaue maʼuhiga ʼe natou fai. Kae logo la te ʼu aluʼaga ʼaia, kae ʼe natou toʼo he temi moʼo fai he ʼu ako Tohi-Tapu, pea ʼe natou fiafia lahi ai. Tou toʼo te faʼifaʼitaki ʼo te tuagaʼane ʼe higoa ko Melanie, ʼe maʼuli ʼi Alaska. Neʼe ina taupau tokotahi tana kiʼi taʼahine ʼe taʼu valu. Neʼe gaue ʼi te ʼaho fuli pea neʼe tonu ke toe tokaga ki tana matuʼa ʼae neʼe ina maʼu te kosea. Pea ko Melanie neʼe ko te Fakamoʼoni pe ʼaia ʼe tahi ʼi tona kolo. Neʼe faikole tuʼumaʼu kia Sehova ke ina maʼu te malohi moʼo faifakamafola logo la te momoko. Neʼe ina fia maʼu ʼosi he tahi ke ina akoʼi ki ai te Tohi-Tapu. Ki muli age, neʼe felaveʼi pea mo Sara ʼae neʼe fiafia ʼi tana iloʼi ʼae ʼe ʼi ai te huafa ʼo te ʼAtua. Hili he ʼu kiʼi temi siʼi ki ai, neʼe tali leva e Sara ke ina fai hana ako Tohi-Tapu. ʼE fakamatala fenei e Melanie: “ ʼI te Feliaono afiafi, neʼe au gaʼegaʼe kae neʼe ma olo mo taku kiʼi taʼahine ʼo fai te ako ʼaia. Neʼe ma fiafia ʼi tamā tali ki te ʼu fehuʼi ʼa Sara, pea neʼe ma toe fiafia lahi ʼi tana liliu ʼae ʼo kaumeʼa mo Sehova.” Neʼe faʼa kataki ia Sara ʼo tauʼi te fakafeagai, ʼo mavae leva mai te ʼekelesia. Pea neʼe papitema leva.

ʼE TONU KE TOU KATAKI FUALOA MOKA ʼE TOU FAI NI TISIPULO

14. (1) He koʼe ʼe feala ke tou fakatatau te kau faifakamafola ki te ʼu tagata tautai? (2) Kotea ʼae ʼe ui e te apositolo ko Paulo ia 2 Timoteo 4:1, 2, pea kotea te ako kia tatou?

¹⁴ ʼE tatau aipe pe ʼe mole tou maʼu he tahi ʼe fia ako, kae ʼaua naʼa tou lotovaivai ʼi te kumi ʼo he ʼu tisipulo. Kotou manatuʼi, neʼe fakatatau e Sesu ia te kau faifakamafola ki he ʼu tagata tautai. ʼE feala ki te ʼu tagata tautai ke natou gelu fualoa pea hoki maʼu hanatou ʼu ika. ʼE natou gelu tuʼumaʼu ʼi te poʼuli peʼe ʼi te kei hegihegi, pea ʼi ʼihi temi ʼe tonu leva ke natou olo ʼo gelu mamaʼo. (Luka 5:5) ʼE toe feia ia ʼaho nei, ko ʼihi kau faifakamafola ʼe natou “kumi” te hahaʼi ʼaki he kataki fualoa ʼi he ʼu temi pea mo he ʼu koga meʼa kehekehe. Kotea tona tupuʼaga? Ke feala ai hanatou felaveʼi pea mo te hahaʼi. Ko natou ʼae ʼe faiga malohi feia, ʼe natou maʼu he ʼu fua lelei koteʼuhi ʼe natou felaveʼi mo te ʼu hahaʼi ʼe fia logo ki te folafola ʼa te ʼAtua. ʼE lagi ʼe feala pe ke tou faigaʼi ke tou faifakamafola ʼi he temi pe ʼo te ʼaho, peʼe ʼi he koga meʼa pe ʼe tou iloʼi ai ʼe feala ke tou maʼu lahi ai te hahaʼi.—Lau ia 2 Timoteo 4:1, 2.

15. He koʼe ʼe tonu ke tou kataki fualoa moka tou fai he ako Tohi-Tapu?

¹⁵ He koʼe ʼe tonu ke tou kataki fualoa moka ʼe tou fai he ʼu ako Tohi-Tapu? Koteʼuhi ʼe mole tonu pe ke tou tokoni kia ia ʼae ʼe ako ke ʼofa ki te ʼu moʼoni Fakatohi-tapu. Kae ʼe tonu ke tou tokoni ki ai ke ina iloʼi lelei pea mo ʼofa kia Sehova, te Tupuʼaga ʼo te Tohi-Tapu. ʼE tonu ke tou akoʼi kia ia te ʼu meʼa ʼae neʼe fakatotonu e Sesu ki ʼana tisipulo, pea mo tou tokoni ki ai ke mahino pe ʼe feafeaʼi tana maʼuliʼi te ʼu fakatotonu ʼaia. ʼE tonu ke tou kataki fualoa ʼo tokoni ki ai koteʼuhi ʼe faiga malohi ke ina maʼuliʼi te ʼu pelesepeto Fakatohi-tapu. Ko ʼihi ʼe feala pe ke natou fetogi ʼanatou faʼahiga manatu pea mo ʼanatou aga mahani ʼi he ʼu kiʼi mahina pe. Kae ki ʼihi leva ʼe ʼaoga ki ai he temi fualoa.

16. Kotea te ako ʼe tou maʼu mai te faʼifaʼitaki ʼo Raúl?

¹⁶ Neʼe mahino te tehina misionea ʼi Pérou pe koʼe ʼe tonu ke tou kataki fualoa. ʼE ina fakamatala fenei: “Neʼe au ako te ʼu tohi ʼe lua mo te tagata ʼe higoa ko Raúl. Kae neʼe kei lahi pe ʼona fihifihia. Neʼe ʼi ai te ʼu fihifihia ʼi tona maʼuli fakataumatuʼa, neʼe ina fai tuʼumaʼu te ʼu leakovi pea neʼe mole fakaʼapaʼapaʼi e tana fanau ʼuhi ko ʼana aga ʼae ʼe kovi. Neʼe haʼu tuʼumaʼu ki te ʼu fono koia neʼe hoko atu taku ʼaʼahi ia ia pea mo tokoni ki ai mo tona kiʼi famili. Pea hili ki ai taʼu ʼe tolu, neʼe feala ai leva ke papitema.”

17. Kotea anai ka tou vakaʼi ʼi te alatike ka hoa mai?

¹⁷ Neʼe fakatotonu mai e Sesu ke tou “olo ʼo fai ni tisipulo ʼi te hahaʼi ʼo te ʼu fenua fuli pe.” Kapau ʼe tou fia fakahoko te gaue ʼaia, ʼe tonu ke tou palalau tuʼumaʼu ki te hahaʼi ʼae ʼe mole tatau ʼatatou faʼahiga manatu. Ko ʼihi ʼe mole hanatou lotu pea ko ʼihi leva ʼe mole natou tui ki te ʼAtua. ʼE tou vakaʼi anai ʼi te alatike ka hoa mai pe ʼe feafeaʼi anai hatatou palalau ʼo ʼuhiga mo te logo lelei ki te faʼahiga hahaʼi ʼaia.