Tou Maʼu Ia Te Fiafia ʼi Te Gāue ʼAē Ko Te Fai ʼo Ni ʼu Tisipulo
“Kotou ʼolo pea ke kotou fai ni ʼu tisipulo.”—MAT. 28:19.
1-3. (a) Koteā ʼaē ʼe logoʼi e te tokolahi ʼo ʼuhiga mo te fealagia ʼaē ke natou fai he ʼu ako Tohi-Tapu? (b) Ko te ʼu fehuʼi fea ʼaē kā tou vakaʼi anai?
NEʼE tohi fēnei e te tuagaʼane ʼe kau ʼi te kūtuga ʼaē ʼe lea Fakainitia ʼi Amelika: “Neʼe au fai ia te ako ʼa te kiʼi fāmili mai Pakisitani ʼi te ʼu māhina e 11 ʼaenī kua hili. ʼE mahino ia neʼe matou liliu ʼo kaumeʼa lelei. ʼE au tagi ʼi taku manatu ʼaē kua ovi mai pē te temi ʼaē kā toe liliu ai te kiʼi fāmili ʼaia ki Pakisitani. ʼE au tagi mole ʼuhi pē heʼe au mamahi ʼi tanatou pupuli kae ʼe au toe tagi ʼi te fiafia ʼaē neʼe au logoʼi ʼi taku akoʼi age kiā nātou pe ko ai ia Sehova.”
2 Ohagē ko te tuagaʼane ʼaenī, neʼe kua kotou logoʼi koa ia te fiafia ʼi te akoʼi ia te Tohi-Tapu ki he tahi? Ko Sesu pea mo tana ʼu tisipulo ʼo te ʼuluaki sēkulō, neʼe natou maʼu te toe fiafia lahi ʼi te gāue ʼaē ko te fai ʼo ni ʼu tisipulo. ʼI te toe liliu age ʼa te toko 70 tisipulo ʼaē neʼe akoʼi e Sesu mo tanatou fai fakamatala fakafiafia, ko Sesu totonu “neʼe fonu ia ʼi te fiafia ʼi te laumālie māʼoniʼoni.” (Luka 10:17-21) ʼO toe fēia aipē iā ʼaho nei, tokolahi ʼe natou maʼu te toe fiafia lahi ʼi te fai ʼo ni ʼu tisipulo. ʼE fakamoʼoni kiai ʼi te gāue kinakina ʼa te ʼu kaugā fagona fiafia ʼo te taʼu 2007, ko ako Tohi-Tapu e teitei ono tupu miliona ʼi te māhina fuli!
3 Kae ko ʼihi kau fai fakamafola neʼe mole heʼeki natou maʼu ia te fiafia ʼi te fai ʼo he ako Tohi-Tapu. Ko ʼihi ʼe lagi ʼe mole ʼi ai hanatou ako Tohi-Tapu ʼi te ʼu taʼu ʼaenī. Ko te ʼu faigataʼaʼia fea ʼe feala ke hoko ʼi tatatou faiga ke tou fai he ako Tohi-Tapu? ʼE tou lava tauʼi feafeaʼi ia te ʼu faigataʼaʼia ʼaia? Pea koteā te ʼu lelei ʼe tou maʼu mokā tou faiga fakamālotoloto ke tou fakalogo ki te fakatotonu ʼaenī ʼa Sesu: “Kotou ʼolo pea ke kotou fai ni ʼu tisipulo”?—Mat. 28:19.
Te ʼu Faigataʼaʼia ʼAē ʼe Feala Ke Puli Ai Totatou Fiafia
4, 5. (a) ʼI ʼihi koga meʼa ʼo te kele, ʼe tali feafeaʼi tātou e te hahaʼi tokolahi? (b) Koteā te ʼu faigataʼaʼia ʼaē ʼe hoko ki te kau fai fakamafola ʼi ʼihi age koga meʼa?
4 ʼI ʼihi koga meʼa ʼi te kele, ʼe tali lelei e te hahaʼi tatatou ʼu tohi pea ʼe natou fia ako ia te Tohi-Tapu mo tātou. Ko te taumātuʼa mai Ositalalia ʼaē neʼe fai fakamafola fakatemi ʼi Samipea, neʼe nā tohi fēnei: “ ʼE moʼoni ia te ʼu fakamatala ʼaē ʼe fai ʼo ʼuhiga mo Samipea. ʼE ko he fenua ʼe fua lelei ai ia te fai fakamafola. ʼE fakaofoofo ia te fai fagonogono ʼi te ala! ʼE fakaovi mai te hahaʼi, pea ko ʼihi ʼe natou kole mai he ʼu nusipepa.” Mole heʼeki faʼa fualoa, ko te ʼu tehina mo tuagaʼane ʼi Samipea neʼe natou fai ia te ʼu ako Tohi-Tapu e 200 000 tupu, ko tona fakafuafua, ko he ako e tahi maʼa te ʼu kaugā fagona takitahi.
5 Kae ʼi ʼihi age koga meʼa, ʼe lagi faigataʼa ki ʼihi kau fai fakamafola hanatou tufa te ʼu tohi pea mo fai tuʼumaʼu he ʼu ako Tohi-Tapu. Koteā tona tupuʼaga? ʼI te agamāhani ʼe lāvaki te ʼu ʼapi mokā fai atu te gāue fai fakamafola kiō nātou peʼe natou maʼu atu ni ʼihi kae lagi mole natou fia logo ki te lotu. Neʼe lagi natou lahilahi ake ʼi he loto fale ʼe mole lotu peʼe kua natou fakalialia ki te mālualoi ʼaē ʼi te lotu hala. Tokolahi kua natou ʼāhua pea mo mavetevete ʼuhi ko te kau takitaki lotu loi. (Mat. 9:36) ʼE mahino papau ia, ʼe mole fia fai palalau te hahaʼi ʼaia ki te Tohi-Tapu.
6. Koteā te ʼu tuʼakoi ʼaē ʼe lagi maʼu e ʼihi kau fai fakamafola?
6 ʼE hoko ki ʼihi kau fai fakamafola agatonu ia he faigataʼaʼia ʼe kehe age, ʼo feala ai ke puli ia tonatou fiafia. Logolā ʼi te temi muʼa neʼe natou faʼafai ʼi te gāue ʼaē ko te fai ʼo ni ʼu tisipulo, kae ʼi te temi nei kua fakatuʼakoi leva ia tanatou minisitelio ʼuhi ko te mahaki peʼe ko tanatou kua mātutuʼa. Tou toe vakaʼi age mo ʼihi tuʼakoi ʼe lagi tupu pē ʼuhi ko tātou totonu. Ohagē lā, ʼe hagē koa kiā koutou ʼe mole feala hakotou fai he ako Tohi-Tapu? ʼE lagi kotou hagē ko Moisese ʼi te temi ʼaē neʼe fekauʼi ai ia ia e Sehova ke ʼalu ʼo palalau kiā Falaone. Neʼe ʼui fēnei e Moisese: “Fakalelei mai Sehova, ʼe mole au poto palalau, talu mai ʼanāfi peʼe ʼi muʼa atu.” (Eke. 4:10) Ko te manatu ʼaē ʼe mole tou lava fai he ako, ko tona fakaʼuhiga ʼe tou tuʼaniaʼi naʼa mole ʼi ai hona fua. ʼE lagi tou tuʼania naʼa mole liliu anai ia ia ʼaē ʼe tou fai ia tana ako ko he tisipulo ʼuhi he mole lelei ia tatatou fai ʼo tana ako. Koia, ke mole hoko kiā tātou ia te faʼahi ʼaia, ʼe lagi tou fai anai ia te tonu ʼaē ke mole tou fai he ako. ʼE tou lava tauʼi feafeaʼi ia te ʼu faigataʼaʼia ʼaia?
Kotou Teuteuʼi Tokotou Loto
7. Koteā te meʼa ʼaē neʼe ina uga Sesu ʼi tana minisitelio?
7 Ko te ʼuluaki fakatuʼutuʼu ʼe tonu ke tou fai, ko te teuteuʼi ʼo totatou loto. Neʼe ʼui fēnei e Sesu: “Ko te mahu ʼo te loto ʼaē ʼe palalau ai te gutu.” (Luka 6:45) Ko te meʼa ʼaē neʼe ina uga Sesu ʼi tana minisitelio, neʼe ko tana tokaga ʼaē ke maʼuli fīmālie ia te hahaʼi. Ohagē lā, ʼi tana tokagaʼi ia te ʼaluʼaga fakalaumālie fakaʼofaʼofa ʼa te kau Sutea, “neʼe ʼofa mamahi ia kiā nātou.” Neʼe ina ʼui fēnei ki tana ʼu tisipulo: “Ko te taʼukai ʼe lahi. . . . Kotou faikole ki te ʼAliki ʼo te taʼukai ke ina fekauʼi mai he kau gāue ki tana taʼukai.”—Mat. 9:36-38.
8. (a) Koteā ʼaē ʼe lelei ke tou fakakaukau kiai? (b) Koteā te ako ʼe tou lava tāʼofi mai te ʼu palalau neʼe fai e te fafine ʼe ako te Tohi-Tapu?
8 ʼI tatatou kau ki te gāue ʼaē ko te fai ʼo ni ʼu tisipulo, ʼe lelei anai ke tou fakakaukauʼi loloto ia te ʼatu ʼu lelei ʼaē neʼe tou maʼu, heʼe ko he tahi neʼe ina fakaʼaogaʼi tona temi moʼo akoʼi mai kiā tātou ia te Tohi-Tapu. Kotou toe fakakaukauʼi mo te hahaʼi ʼaē ʼe tou felāveʼi anai mo nātou ʼi te minisitelio pea mo te ʼatu ʼu lelei kā natou maʼu anai ʼi tanatou logo ki te logo lelei ʼaē ʼe tou ʼavage kiā nātou. Neʼe faitohi te fafine ki te filiale ʼo te fenua ʼaē ʼe nofo ai, ʼo ina ʼui fēnei: “ ʼE au fia tala atu te lahi ʼo taku leleiʼia ia te kau Fakamoʼoni ʼaē ʼe natou ʼomai ki toku loto fale ʼo akoʼi au. ʼE au ʼiloʼi ʼi ʼihi temi ʼe lagi kua natou pipiko heʼe lahi fau taku ʼu faifehuʼi pea tuʼumaʼu pē ʼe au tāʼofi fualoa ia nātou. Kae ʼe natou faʼa kātaki aipē pea mo natou fia akoʼi mai te ʼu meʼa ʼaē kua natou ʼiloʼi. ʼE au fakamālo kiā Sehova pea mo Sesu ʼi taku ʼiloʼi ia te ʼu hahaʼi ʼaia.”
9. Koteā ʼaē neʼe tokaga tāfito kiai ia Sesu, pea ʼe tou lava faʼifaʼitakiʼi feafeaʼi ia ia?
9 ʼE moʼoni, neʼe mole tali e te hahaʼi fuli ia te ʼu faiga ʼaē ʼa Sesu ke tokoni kiā nātou. (Mat. 23:37) Neʼe muliʼi e ʼihi ia ia ʼi he kiʼi temi pea neʼe mole kei natou leleiʼia leva ia tana ʼu akonaki, ʼo “mole kei natou haʼele mo ia.” (Soa. 6:66) Kae i te mole tali lelei ʼaē e ʼihi, neʼe mole manatu leva ia Sesu neʼe mole maʼuhiga ia tana logo ʼaē ʼe ina fakamafola. Logolā neʼe lahi te ʼu pulapula ʼaē neʼe ina tūtū pea neʼe mole fua, kae neʼe tokaga tāfito ia Sesu ki te lelei ʼaē ʼe ina lolotoga fai. Neʼe mahino kiā ia ko te gāueʼaga kua hihina ki te taʼukai pea neʼe fiafia lahi ʼi tana tokoni ki te tānaki ʼaia ʼo te taʼukai. (Lau ia Soane 4:35, 36.) ʼE mole tonu ke tuʼu ia tatatou sio ʼi te hahaʼi ʼaē ʼe mole fia logo ki te moʼoni, kae ke tou tōkakaga tāfito ki te taʼukai ʼaē ʼe feala anai ke tou utu ʼi te telituale ʼaē ʼe tou gāue ai. Tou vakaʼi peʼe lava feafeaʼi hatatou taupau he manatu ʼe lelei.
Tou Tūtū ʼAki Te ʼAmanaki ʼAē Ke Tou Utu
10, 11. Koteā ʼaē ʼe feala ke kotou fai ke kotou taupau maʼu ia takotou fiafia?
10 Ko he tagata gāue kele ʼe ina tūtū ia te pulapula ʼaki te ʼamanaki ʼaē ʼe ina utu anai ʼi te taʼukai. ʼO toe fēia, ʼe tonu ke tou fai fakamafola ʼaki te manatu ʼaē ke tou kamata he ʼu ako Tohi-Tapu. Kae ʼe feafeaʼi mo kapau ʼe lahi totatou temi ʼi te fai fakamafola kae tokosiʼi ia te hahaʼi ʼaē ʼe tou maʼu atu ki ʼonatou ʼapi peʼe hagē ʼe mole kei tou maʼu atu ia tatatou ʼu ʼaʼahi? ʼE feala ke kotou lotovaivai ai. ʼE tonu ai koa ke kotou tuku te fai fakamafola ʼi te ʼu ʼapi? Kailoa ia! Kei tokolahi te hahaʼi ʼe ko tanatou hoki palalau ʼaē mo he kau Fakamoʼoni ʼa Sehova, ʼaki te taʼi faʼahiga fai fakamafola ʼaia talu mai fualoa ia tona fai pea mo fua lelei.
11 Kae moʼo taupau maʼu ia takotou fiafia, ʼe feala koa ke kotou fakaʼaogaʼi ʼihi age faʼahiga fai fakamafola, lagi ko he ʼu faʼahiga fakaovi ki te hahaʼi? Ohagē lā, neʼe kua kotou ʼahiʼahiʼi koa ia te fai fagonogono ʼi te ala peʼe ʼi te ʼu fale gāue? ʼE feala koa ʼaki te telefoni ke kotou fai palalau ai mo te hahaʼi peʼe kotou maʼu te ʼu nūmelo telefoni ʼo nātou ʼaē kua kotou palalau age ki te logo ʼo te Puleʼaga ke feala hakotou ʼaʼahi nātou? ʼAki he faʼa kātaki pea mo hakotou mulimuli ki te ʼaluʼaga ʼo te hahaʼi ʼo tokotou telituale, ʼe kotou logoʼi ai anai ia te fiafia ʼo te maʼu ia he ʼu hahaʼi ʼe natou tali lelei ia te logo ʼo te Puleʼaga.
Kotou Tauʼi Ia Te Mole Fia Logo ʼa Te Hahaʼi
12. Koteā ʼaē ʼe feala ke tou fai mo kapau ʼe tokolahi te hahaʼi ʼi totatou telituale ʼe hagē ʼe mole natou fia logo ki te lotu?
12 ʼE feafeaʼi mo kapau ko te hahaʼi tokolahi ʼi tokotou telituale ʼe mole natou fia logo ki te lotu? ʼE feala koa ke kotou kamata fai palalau ki he ʼu meʼa ʼe fia logo kiai te hahaʼi? Neʼe tohi fēnei e te ʼapositolo ko Paulo ki tona ʼu tehina ʼi Kolonito: “Maʼa te kau Sutea kua au liliu ko te tagata Sutea. . . . Maʼa nātou ʼaē neʼe mole hanatou lao, kua au liliu ko he tahi ʼe mole ʼi ai hana lao, logopē lā ʼe ʼi ai taku lao ki te ʼAtua.” Koteā ʼaē neʼe ina uga ia Paulo? Neʼe ina ʼui fēnei: “Kua au liliu ko meʼa fuli maʼa te hahaʼi kehekehe, ke feala ai haku haofaki niʼihi.” (1 Ko. 9:20-22) ʼE toe fēia pē, ʼe feala koa ke tou maʼu he ʼu faʼahi ke tou felōgoi lelei ai mo nātou ʼo totatou telituale? Tokolahi te hahaʼi ʼaē ʼe mole fia palalau ki te lotu ʼe natou fia hikihiki te lelei ʼo tanatou ʼu felōgoi fakafāmili. ʼE lagi natou toe kumi foki ia he fakatuʼutuʼu ki tonatou maʼuli. ʼE feala koa ke tou fakahā age ia te logo ʼo te Puleʼaga ki te hahaʼi ʼaia ʼi hona ʼaluʼaga ʼe tupu ai anai hanatou fia logo kiai?
13, 14. Koteā ʼaē ʼe feala ke tou fai ke lahi age tatatou fiafia ʼi te gāue ʼaē ko te fai ʼo ni ʼu tisipulo?
13 Kua fakahaʼuhaʼu ʼo tokolahi ia te kau fai fakamafola ʼaē kua lahi age tanatou fiafia ʼi te gāue ʼaē ko te fai ʼo ni ʼu tisipulo, māʼiapē lā ʼi te ʼu telituale ʼaē ʼe tokolahi ai te hahaʼi ʼe hagē ʼe mole natou fia logo ki te lotu. Neʼe lava feafeaʼi ia te faʼahi ʼaia? Neʼe natou ako ia he tahi age lea. Ko te taumātuʼa, ʼi tonā taʼu 60, neʼe nā tokagaʼi ko te ʼu toko lauʼi teau kau tūpulaga ako Siaina pea mo tonatou ʼu fāmili ʼe natou nonofo ʼi te telituale ʼaē ʼe fai fakamafola kiai tanā kōkelekāsio. ʼE ʼui fēnei e te tagata ʼohoana: “Tupu ko te faʼahi ʼaia, neʼe fakalotomālohiʼi māua ke mā ako ia te lea Fakasiaina. Logolā neʼe tonu ke mā fakaʼaogaʼi he temi ʼi te ʼaho fuli moʼo ako ia te lea, kae neʼe lahi tamā ʼu ako Tohi-Tapu mo te hahaʼi Siaina ʼo te telituale.”
14 Tatau aipē peʼe mole feala ke kotou ako ia he tahi age lea, ʼe feala ke kotou fakaʼaogaʼi lelei ia te kaupepa Une bonne nouvelle pour des gens de toutes nations mokā kotou felāveʼi mo nātou ʼaē ʼe palalau ʼi he tahi age lea. ʼE feala ke kotou toe maʼu te ʼu tohi ʼi te lea ʼo te hahaʼi ʼaē ʼe kotou felāveʼi mo ia. ʼE moʼoni, ʼe ko he temi lahi pea mo he ʼu faiga ʼe tonu ke tou fai moʼo palalau ki te hahaʼi ʼi he tahi age lea peʼe ko he tahi age agaʼi fenua. Kae kotou manatuʼi ia te pelesepeto ʼaē ʼe tou maʼu ʼi te Folafola ʼa te ʼAtua: “Ko ʼaē ʼe ina tō fakalahi ʼe ina toe utu fakalahi anai.”—2 Ko. 9:6.
ʼE Kau Kiai Ia Te Kōkelekāsio Kātoa
15, 16. (a) He koʼē ʼe kau ia te kōkelekāsio kātoa ki te gāue ʼaē ko te fai ʼo ni ʼu tisipulo? (b) Koteā te gāue ʼa te hahaʼi mātutuʼa?
15 Kae ko te fai ʼo ni ʼu tisipulo ʼe mole fakalogo pē ki te ʼu faiga ʼa he tokotahi. ʼE tokoni ia te kōkelekāsio kātoa kiai. ʼO feafeaʼi? Neʼe ʼui fēnei e Sesu: “ ʼAki te meʼa ʼaia, ʼe ʼiloʼi ai anai e te hahaʼi fuli ko koutou ko taku ʼu tisipulo, mo kapau ʼe kotou femaʼuʼaki te ʼofa.” (Soa. 13:35) Koia kā kau te kau ako Tohi-Tapu ki te ʼu fono, ʼi te agamāhani ʼe natou punamaʼuli ʼi te ʼofa ʼaē ʼe hā ʼi tatatou ʼu fono. Neʼe tohi fēnei e te fafine ʼe ako: “ ʼE au leleiʼia ʼaupitō ia te kau ki te ʼu fono. ʼE agalelei te hahaʼi mo au.” Neʼe ʼui e Sesu ko nātou ʼaē ʼe liliu ʼo muli iā te ia, ʼe feala ke fakafeagai tonatou fāmili kiā nātou. (Lau ia Mateo 10:35-37.) Kae neʼe ina fakapapau mai, ʼe natou maʼu anai ʼi te kōkelekāsio ia “te ʼu tehina, te ʼu tuagaʼane, pea mo te ʼu faʼē, te ʼu fānau” fakalaumālie.—Mko. 10:30.
16 Ko totatou ʼu tehina mo tuagaʼane kua mātutuʼa ʼe maʼuhiga tāfito tanatou gāue moʼo tokoni ki te kau ako Tohi-Tapu ke natou tuputupu. ʼI te ʼu ʼaluʼaga fea? Tatau aipē mo kapau ʼe mole kei feala kiā nātou kua mātutuʼa ke natou fai he ʼu ako Tohi-Tapu, kae ko tanatou ʼu tali fakalotomālohi ʼi te ʼu fono ʼe ina fakalotomālohiʼi te tui ʼo nātou fuli ʼaē ʼe fakalogo. Ko tanatou haʼele “ ʼi te ala ʼo te faitotonu” talu mai fualoa, ʼe toe kau ki te fakamataleleiʼi ʼo te kōkelekāsio pea mo ina taki mai ki te kautahi ʼa te ʼAtua ia te ʼu hahaʼi ʼe fakamālotoloto.—Taag. 16:31.
Tou Tauʼi Totatou ʼu Tuʼania
17. Koteā ʼaē ʼe feala ke tou fai moʼo tauʼi ia tatatou manatu ʼaē ʼe mole tou lava fai he ako Tohi-Tapu?
17 ʼE feafeaʼi mokā kotou manatu ʼe mole kotou lava fai he ako Tohi-Tapu? Kotou manatuʼi neʼe tokoni ia Sehova kiā Moisese, ʼo ina foaki age ia te laumālie māʼoniʼoni pea mo hona kaugā gāue, ia tona tehina ko Alone. (Eke. 4:10-17) Neʼe fakapapau e Sesu ko te laumālie ʼo te ʼAtua ʼe tokoni mai anai ki tatatou gāue fai fakamafola. (Gāue 1:8) Tahi ʼaē meʼa, neʼe fekauʼi e Sesu te kau gāue ke natou ʼolo ʼo fai fakamafola taki tokolua. (Luka 10:1) Koia, kapau ʼe faigataʼa kiā koutou ia te fai ʼo he ako Tohi-Tapu, kotou kole ia te laumālie ʼo te ʼAtua ke ina foaki atu ia te poto pea kotou kaugā fai fakamafola mo he tehina peʼe ko he tuagaʼane ʼe ina foaki atu anai ia he loto falala pea kā tokoni atu anai he kua natou māhani ʼi te fai ʼo ni ʼu ako Tohi-Tapu. ʼE mālohi tatatou tui mokā tou manatuʼi ko Sehova neʼe ina filifili ke ina fakaʼaogaʼi he ʼu hahaʼi māhani, “te ʼu meʼa ʼaē ʼe vaivai ʼo te mālamanei,” moʼo fakahoko ia te gāue fakaofoofo ʼaia.—1 Ko. 1:26-29.
18. ʼE tou lava tauʼi feafeaʼi ia tatatou tuʼania ʼaē naʼa mole tou lava tokoni ki he tahi ʼe ina ako ia te Tohi-Tapu?
18 ʼE tou lava tauʼi feafeaʼi tatatou tuʼania ʼaē naʼa mole tou lava tokoni ki he tahi ʼe ina ako ia te Tohi-Tapu? ʼE lelei ke tou manatuʼi, ko te fai ʼo ni ʼu tisipulo ʼe mole hagē ko te fai ʼo he meʼa kai, ʼaē ʼe fakalogo pē kiā ia ʼaē ʼe kuka ia tona kano lelei peʼe kano kovi. Ko te fai ʼo he tisipulo ʼe mole fakalogo ʼāteaina pē ia ki tatatou ʼu faiga. ʼE ko Sehova tāfito ʼaē ʼe ina fai te koga maʼuhiga ʼo te gāue, ʼaki tana taki mai ʼaē ʼo he tahi kiā te ia. (Soa. 6:44) Ko tātou pea mo ʼihi atu ʼi te kōkelekāsio, ʼe tou faiga mālohi ke tou fakaʼaogaʼi ia te poto ʼi te faiako moʼo tokoni ke tuputupu he tahi e ako. (Lau ia 2 Timoteo 2:15.) Pea ʼe tonu ke maʼuliʼi e ia ʼaē ʼe ako te meʼa ʼaē ʼe ina ako. (Mat. 7:24-27) Kapau ʼe fakagata e he tahi tana ako ia te Tohi-Tapu, ʼe feala ke tou lotovaivai ai. ʼE tou fakaʼamu ke fai e te kau ako Tohi-Tapu ia te tonu ʼaē ʼe lelei, kae ʼe tou tahi ‘huʼi maʼua anai ki te ʼAtua maʼa kita takitokotahi.’—Loma 14:12.
Koteā Te ʼu Lelei ʼAē ʼe Tou Maʼu?
19-21. (a) Koteā te ʼu lelei ʼe tou maʼu ʼi tatatou fai ia he ʼu ako Tohi-Tapu? (b) ʼE feafeaʼi kiā Sehova ia nātou fuli ʼaē ʼe kau ki te gāue fai fakamafola?
19 Kapau ʼe tou fai he ʼu ako Tohi-Tapu, pea ʼe tou haga tōkakaga tāfito ai ke tou kumi muʼa ia te Puleʼaga. ʼE toe tokoni mai foki ke tou taupau maʼu ʼi totatou ʼatamai pea mo totatou loto ia te ʼu moʼoni ʼo te Folafola ʼa te ʼAtua. ʼO feafeaʼi? Ko te tehina pioniē ko Barak, ʼe ina fakamahino fēnei: “Ko taku fai he ʼu ako Tohi-Tapu ʼe fakamaʼua ai ke lelei age taku ako ia te Folafola ʼa te ʼAtua. Neʼe au tokagaʼi ʼe tonu ke au fakamālohi taku tui ki te ʼu meʼa ʼaē ʼe au akoʼi ki te hahaʼi ʼi muʼa ʼo haku lava akoʼi fakalelei he tahi.”
20 Kapau ʼe mole kotou fai ia he ako Tohi-Tapu, ko tona fakaʼuhiga koa ʼe mole maʼuhiga takotou tauhi ki te ʼAtua? Kailoa ia! ʼE maʼuhiga ʼaupitō kiā Sehova takotou ʼu faiga ʼaē ke kotou vikiʼi ia ia. Ko nātou fuli ʼaē ʼe natou kau ki te gāue fai fakamafola ʼe ko he ʼu “kaugā gāue ʼa te ʼAtua.” Kae kā tou fai he ako Tohi-Tapu ʼe toe lahi age totatou fiafia ʼi tatatou sio ʼaē pe feafeaʼi te haga ʼa te ʼAtua ʼo fakahomo ake ia te pulapula ʼaē neʼe tou tō. (1 Ko. 3:6, 9) ʼE ʼui fēnei e te tuagaʼane pioniē ko Amy: “ ʼI takotou sio ʼaē ki te tuputupu ʼa he tahi ʼe ako ia te Tohi-Tapu, ʼe kotou logoʼi ia he toe loto fakafetaʼi lahi kiā Sehova ʼi tana fakafealagia ʼaē ke fakaʼaogaʼi koutou moʼo foaki kiā ia ʼaē ʼe ako ia te meʼa ʼofa fakaofoofo, te fealagia ʼaē ke ina ʼiloʼi ia Sehova pea mo maʼu ia te maʼuli heʼegata.”
21 Ko tatatou faiga lahi ke tou kamata pea mo fai he ʼu ako Tohi-Tapu, ʼe tokoni mai anai ke tou haga tōkakaga ʼo tauhi ki te ʼAtua ʼi te temi nei pea mo fakamālohiʼi anai tatatou ʼamanaki ʼaē ke tou māʼuʼuli ʼi te mālama foʼou. ʼAki te tokoni ʼa Sehova, ʼe feala ke tou toe tokoni ke haofaki ia nātou ʼaē ʼe fakalogo mai kiā tātou. (Lau ia 1 Timoteo 4:16.) ʼE tupu ai tatatou fiafia lahi!
ʼE Kei Kotou Manatuʼi Koa?
• Koteā te ʼu faigataʼaʼia ʼaē ʼe feala ke tāʼofi ai ʼihi ke natou fai he ʼu ako Tohi-Tapu?
• Koteā ʼaē ʼe feala ke tou fai mo kapau ʼe tokolahi te hahaʼi ʼi totatou telituale ʼe hagē ʼe mole natou fia logo ki te lotu?
• Koteā te ʼu lelei ʼe tou maʼu ʼi te fai ʼo he ako Tohi-Tapu?
[Paki ʼo te pasina 15]
ʼE kotou fakaʼaogaʼi koa he tahi age ʼu faʼahiga fai fakamafola moʼo maʼu he ʼu hahaʼi ʼe loto moʼoni?