Ko Koutou Koa Ko He “Tagata Tauhi ʼApi Lelei ʼo Te ʼOfa Makehe ʼo Te ʼAtua”?
“ ʼI te ʼofa fakatautēhina, ke kotou feʼofamamahiʼaki. Ke kotou ʼuluaki tuʼumaʼu ʼi te fefakamaʼuhigaʼaki.”—LOMA 12:10.
1. Koteā te ʼu fakapapau ʼaē ʼe tou maʼu ʼi te Folafola ʼa te ʼAtua?
ʼI TE Folafola ʼa te ʼAtua, ʼe tuʼa lahi ia te fakapapau mai e Sehova, ʼe tokoni mai anai ʼi te ʼu temi ʼaē ʼe tou lotovaivai ai peʼe tou lotomamahi ai. Ohagē lā, kotou fakatokagaʼi ia te ʼu palalau fakalotofīmālie ʼaenī: “ ʼE poupouki e Sehova ia nātou ʼaē ʼe fetokaʼi, ʼe ina fakatuʼuake ia nātou ʼaē kua mapelu ki lalo.” “ ʼE ina fakamālōlō te hahaʼi ʼaē ʼe mafasia tonatou loto, pea ʼe ina haʼihaʼi tonatou ʼu lavea.” (Pes. 145:14; 147:3) Tahi ʼaē meʼa, ʼe ʼui totonu fēnei e tatatou Tamai ʼaē ʼe ʼi selō: “Ko au, ia Sehova tou ʼAtua, ʼe au puke tou nima mataʼu, ʼe au ʼui atu, ‘ ʼAua naʼa ke mataku. ʼE au tokoni atu anai.’ ”—Isa. 41:13.
2. ʼE foaki feafeaʼi e Sehova ia te tokoni ki tana ʼu kaugana?
2 ʼE lava puke feafeaʼi e Sehova ia totatou nima kae ʼe nofo ia ʼi te ʼu lagi fakapulipuli? ʼE lava feafeaʼi hana ‘fakatuʼuake tātou mokā kua tou mapelu ki lalo’? ʼE lahi te ʼu ʼaluʼaga ʼaē ʼe foaki mai ai e Sehova ʼAtua ia te taʼi tokoni ʼaia. Ohagē lā, ʼe ina foaki ki tana hahaʼi ʼaki ia tona laumālie māʼoniʼoni ia “te mālohi ʼaē ʼe fakalaka ʼi te mālohi māhani.” (2 Ko. 4:7; Soa. 14:16, 17) ʼE toe logoʼi e te kau kaugana ʼa te ʼAtua ia te mālohi ʼaē ʼe ina fakalotomālohi, ʼaē ʼe tou maʼu ʼi te logo ʼo te Tohi-Tapu, te Folafola ʼaē ʼe haʼu mai te ʼAtua. (Hep. 4:12) ʼE kei ʼi ai koa he tahi ʼaluʼaga ʼe fakalotomālohiʼi ai tātou e Sehova? ʼE tou maʼu tona tali ʼi te ʼUluaki tohi ʼa Petelo.
‘Ko Te ʼOfa Makehe ʼo Te ʼAtua, ʼe Hā ʼi He ʼu Agaaga Kehekehe’
3. (a) Koteā ʼaē neʼe ʼui e te ʼapositolo ko Petelo ʼo ʼuhiga mo te ʼu faigataʼaʼia? (b) Koteā ʼaē ʼe talanoa kiai ʼi te koga fakaʼosi ʼo te ʼuluaki tohi ʼa Petelo?
3 ʼI tana palalau ki te ʼu Kilisitiano fakanofo ʼaki te laumālie, neʼe tohi e te ʼapositolo ko Petelo ʼe natou maʼu he tupuʼaga lelei ke natou fiafia ai, ʼuhi ko te fakapale maʼuhiga ʼaē kā natou maʼu anai. Pea neʼe ina ʼui fēnei: “Logopē lā ʼi he kiʼi temi nounou ʼi te temi ʼaenī, kapau ʼe tonu ke hoko, ʼe kotou lotomamahi ʼuhi ko te ʼu ʼahiʼahi kehekehe.” (1 Pet. 1:1-6) Kotou tokagaʼi ia te kupu “kehekehe.” ʼE hā mai ai, ko te ʼu faigataʼaʼia ʼe kehekehe anai. Kae neʼe mole gata ai ia Petelo, ʼe mole ina tuku ke feʼekeʼaki e tona ʼu tehina peʼe feala anai hanatou tauʼi ia te ʼu faigataʼaʼia ʼaia. Neʼe fakahā lelei e Petelo ʼe feala ke tui papau ia te kau Kilisitiano, ko Sehova ʼe tokoni anai kiā nātou ke natou tauʼi ia te ʼu faʼahiga faigataʼaʼia fuli pē ʼaē kā hoko mai kiā nātou. ʼE maʼu ia te fakapapau ʼaia ʼi te koga fakaʼosi ʼo te tohi ʼa Petelo, ʼaē ʼe palalau ai ia te ʼapositolo ki te ʼu faʼahi ʼo ʼuhiga mo “te fakaʼosi ʼo te ʼu meʼa fuli.”—1 Pet. 4:7.
4. He koʼē ʼe fakalotofīmālie ia te ʼu palalau ʼaē iā 1 Petelo 4:10?
4 ʼE ʼui fēnei e Petelo: “ ʼO mulimuli ki te meʼa ʼofa ʼaē ʼe kotou maʼu takitokotahi, ke kotou fakaʼaogaʼi ia te meʼa ʼofa ʼaia, ʼo kotou fetauhiʼaki, ohagē ko he kau tagata tauhi ʼapi lelei ʼo te ʼofa makehe ʼo te ʼAtua, ʼaia ʼe hā ʼi he ʼu agaaga kehekehe.” (1 Pet. 4:10) ʼE toe fakaʼaogaʼi e Petelo ia te kupu “kehekehe.” ʼE hagē ʼe ina ʼui fēnei: ‘ ʼE hoko te ʼu faigataʼaʼia ʼi ni ʼu agaaga kehekehe, kae ko te hā ʼo te ʼofa makehe ʼo te ʼAtua ʼe toe hoko atu ia ʼi ni ʼu agaaga kehekehe.’ He koʼē ʼe fakalotofīmālie ia te ʼu palalau ʼaia? Heʼe ko tona fakaʼuhiga, tatau aipē pe koteā ia te faigataʼaʼia ʼaē ʼe tou tau mo ia, ʼe ʼi ai pē anai ia he faʼahiga hā ʼo te ʼofa makehe ʼo te ʼAtua moʼo tokoni mai ke tou kātakiʼi totatou faigataʼaʼia. Kae neʼe kotou tokagaʼi koa ʼi te ʼu palalau ʼa Petelo, peʼe tou maʼu feafeaʼi anai ia te ʼofa makehe ʼo Sehova? ʼAki totatou ʼu tehina mo tuagaʼane.
“Kotou Fetauhiʼaki”
5. (a) Koteā ʼaē ʼe tonu ke fai e te ʼu Kilisitiano takitokotahi? (b) Koteā te ʼu fehuʼi ʼaē ʼe lagaʼi?
5 ʼI tana palalau ki te kōkelekāsio kātoa, neʼe ʼui fēnei e Petelo: “Ko te meʼa ʼaē ʼe maʼuhiga tāfito, ke kotou femaʼuʼaki he ʼofa lahi.” Pea ina toe hoko atu fēnei: “ ʼO mulimuli ki te meʼa ʼofa ʼaē ʼe kotou maʼu takitokotahi, ke kotou fakaʼaogaʼi ia te meʼa ʼofa ʼaia, ʼo kotou fetauhiʼaki.” (1 Pet. 4:8, 10) Koia, ko tātou takitokotahi ʼi te kōkelekāsio ʼe tonu ke tou kau ki te fakalotomālohiʼi ʼo te kau Kilisitiano. Neʼe foaki mai e Sehova ia tana meʼa maʼuhiga, pea ʼe ko hotatou maʼua ke tou toe foaki ki ʼihi atu. Koteā ʼaē neʼe foaki mai kiā tātou? ʼE ʼui e Petelo ʼe ko “te meʼa ʼofa.” Koteā ia te meʼa ʼofa? ʼE tou ‘fakaʼaogaʼi feafeaʼi moʼo tou fetauhiʼaki’?
6. Koteā he tahi age ʼu meʼa ʼofa neʼe foaki mai ki te kau Kilisitiano?
6 ʼE ʼui fēnei ʼi te Folafola ʼa te ʼAtua: “Ko te meʼa ʼofa lelei fuli pea mo te mōlaga haohaoa fuli ʼe haʼu ia mai ʼoluga.” (Sake 1:17) Koia, ko te ʼu meʼa ʼofa fuli ʼaē neʼe foaki mai e Sehova ki tana hahaʼi ʼe ko he faʼahiga fakahā ʼaia ʼo tona ʼofa makehe. Ko te meʼa ʼofa fakaofoofo ʼaē ʼe foaki mai e Sehova, ʼe ko te laumālie māʼoniʼoni. ʼAki te meʼa ʼofa ʼaia, ʼe feala ai ke tou maʼu ia te ʼu kalitātē fakaʼatua ohagē ko te ʼofa, te agalelei, pea mo te agamalū. Pea ko te ʼu kalitātē ʼaia ʼe natou uga tātou ke tou fakahā ki totatou ʼu tehina ia he ʼofa moʼoni pea mo tou fia tokoni kiā nātou. Ko te poto moʼoni pea mo te ʼatamai mālama ʼe toe kau ʼi te ʼu meʼa ʼofa lelei ʼaē ʼe tou maʼu ʼaki te tokoni ʼa te laumālie māʼoniʼoni. (1 Ko. 2:10-16; Kal. 5:22, 23) ʼI tona fakahagatonu, ko totatou mālohi kātoa, totatou ʼu fealagia, mo totatou poto ʼi he gāue ʼe feala ke ʼui ʼe ko he ʼu meʼa ʼofa ke fakaʼaogaʼi moʼo fakavikiviki pea mo fakamaʼuhigaʼi ia totatou Tamai ʼaē ʼe ʼi selō. ʼE fakamaʼua mai e te ʼAtua ke tou fakaʼaogaʼi totatou ʼu fealagia pea mo totatou ʼu kalitātē ke hā ai ia te ʼofa makehe ʼo te ʼAtua ki ʼotatou tehina.
ʼE Feafeaʼi Hatatou ‘Fakaʼaogaʼi Ia Te Meʼa ʼOfa ʼAia Moʼo Tou Fetauhiʼaki’?
7. (a) Koteā ʼaē ʼe fakahā ʼaki te kupusiga palalau “ ʼo mulimuli ki”? (b) Koteā te ʼu fehuʼi ʼaē ʼe tonu ke tou fai kiā tātou totonu, pea koteā tona tupuʼaga?
7 ʼO ʼuhiga mo te ʼu meʼa ʼofa ʼaē neʼe tou maʼu, ʼe toe ʼui fēnei e Petelo: “ ʼO mulimuli ki te meʼa ʼofa ʼaē ʼe kotou maʼu takitokotahi, ke kotou fakaʼaogaʼi te meʼa ʼofa ʼaia.” Ko te kupusiga palalau “ ʼo mulimuli ki,” ʼe fakahā ai ko te ʼu kalitātē pea mo te ʼu fealagia ʼaē ʼe tou maʼu, ʼe feala ke kehekehe ʼi tona agaaga pea mo toe kehekehe ʼi tona lahi. Peʼe koteā pē ia te meʼa ʼofa ʼaē ʼe tou maʼu, kae ʼe fakalotomālohiʼi tātou takitokotahi ke tou ‘fakaʼaogaʼi ia te meʼa ʼofa ʼaia moʼo fetauhiʼaki.’ Tahi ʼaē meʼa, ko te kupusiga palalau “fakaʼaogaʼi ia te meʼa ʼofa ʼaia . . . ohagē ko he kau tagata tauhi ʼapi lelei” ʼe ko he fakatotonu. Koia, ʼe tonu ai ke tou feʼekeʼaki fēnei: ‘ ʼE au fakaʼaogaʼi koa ia te ʼu meʼa ʼofa ʼaē neʼe foaki mai moʼo fakalotomālohiʼi toku ʼu tehina?’ (Vakaʼi ia 1 Timoteo 5:9, 10.) ‘Peʼe au fakaʼaogaʼi koa toku ʼu fealagia ʼaē neʼe au maʼu mai iā Sehova moʼo fakahoko tāfito ia te meʼa ʼaē ʼe au leleiʼia, lagi ke au maʼu ai he ʼu koloa peʼe ko he tuʼulaga ʼi te mālamanei?’ (1 Ko. 4:7) Kapau ʼe tou fakaʼaogaʼi totatou ʼu meʼa ʼofa moʼo tou “fetauhiʼaki,” ʼe tou fakafiafia ai anai ia Sehova.—Taag. 19:17; lau ia Hepeleo 13:16.
8, 9. (a) Koteā ni ʼu ʼaluʼaga ʼe tauhi ai te kau Kilisitiano ʼi te mālamanei kātoa ki tonatou ʼu tehina? (b) ʼI takotou kōkelekāsio, ʼe fetokoniʼaki feafeaʼi ia te ʼu tehina mo tuagaʼane?
8 ʼE talanoa ʼi te Folafola ʼa te ʼAtua ki he ʼu ʼaluʼaga kehekehe neʼe fetauhiʼaki ai ia te kau Kilisitiano ʼi te ʼuluaki sēkulō. (Lau ia Loma 15:25, 26; 2 Timoteo 1:16-18.) ʼO toe fēia iā ʼaho nei, ko te fakatotonu ʼaē ke fakaʼaogaʼi e he tahi ia te meʼa ʼofa ʼaē ʼe ina maʼu moʼo tokoni ki tona ʼu tehina, ʼe fakahoko e te kau Kilisitiano moʼoni ia te fakatotonu ʼaia ʼaki he loto kātoa. Tou vakaʼi age ʼihi ʼaluʼaga ʼe hoko ai ia te faʼahi ʼaia.
9 Tokolahi te ʼu tehina ʼe natou fakaʼaogaʼi ni ʼu hola ʼi te māhina fuli moʼo teuteuʼi ia te ʼu fono. ʼI te ʼu fono, kā natou vaevae he ʼu manatu fakalaumālie maʼuhiga neʼe natou maʼu ʼi tanatou ako ia te Tohi-Tapu, ko tanatou ʼu palalau fakapotopoto ʼe natou uga ia te kōkelekāsio kātoa ki te faʼa kātaki. (1 Tim. 5:17) Tokolahi ia te ʼu tehina mo te ʼu tuagaʼane ʼe natou agalelei mo manavaʼofa ki ʼonatou tehina. (Loma 12:15) Ko ʼihi ʼe natou tautau ʼolo ʼo fakasiosio ia nātou ʼaē ʼe lotomamahi pea mo faikole mo nātou. (1 Tes. 5:14) Ko ʼihi ʼe natou fai he ʼu tohi fakalotomālohi ki te kau Kilisitiano ʼaē ʼe natou tauʼi ia he faigataʼaʼia. Pea ko ʼihi ʼe natou agalelei ʼo tokoni kiā nātou ʼaē ʼe māhahaki peʼe mātutuʼa ke natou kau ki te ʼu fono. Ko te ʼu lauʼi afe kau Fakamoʼoni ʼe natou kau ki te ʼu gāue ʼaē moʼo tokoni ki te ʼu tehina ʼaē neʼe hoko kiā nātou he tuʼutāmaki, ʼo natou toe laga te ʼu ʼapi ʼaē neʼe maumau. Ko te ʼofa pea mo te tokoni ʼa te ʼu tehina mo tuagaʼane loto tokaga ʼaia, ʼe ko te ʼu fakahā ʼaia ʼo “te ʼofa makehe ʼo te ʼAtua, ʼaia ʼe hā ʼi he ʼu ʼaluʼaga kehekehe.”—Lau ia 1 Petelo 4:11.
Ko Te Faʼahi Fea ʼAē ʼe Maʼuhiga Age?
10. (a) Ko te ʼu faʼahi fea e lua ʼo tana tauhi ki te ʼAtua ʼaē neʼe tokaga kiai ia Paulo? (b) ʼE tou faʼifaʼitakiʼi feafeaʼi ia Paulo iā ʼaho nei?
10 Neʼe mole foaki pē ki te ʼu kaugana ʼa te ʼAtua he meʼa ʼofa ke natou fakaʼaogaʼi moʼo tokoni ki tonatou ʼu tehina, kae neʼe toe foaki kiā nātou ia he logo ke natou vaevae ki te hahaʼi. Neʼe fakamoʼoni e te ʼapositolo ko Paulo ia te ʼu faʼahi ʼaia ʼe lua ʼo te tauhi ʼaē kiā Sehova. Neʼe faitohi ki te kōkelekāsio ʼo Efesi ʼo ʼuhiga mo “te fakatuʼutuʼu gāue ʼo te ʼofa makehe ʼo te ʼAtua” ʼaē neʼe foaki age kiā ia moʼo tokoni kiā nātou. (Efe. 3:2) Kae neʼe ina toe ʼui fēnei: “[Neʼe] ʼahiʼahiʼi tātou e te ʼAtua pea mo tou tuha ai ke foaki mai ia te logo lelei.” (1 Tes. 2:4) Ohagē ko Paulo, ʼe tou toe fakamoʼoni neʼe foaki mai ia te gāue ʼaē ko te fakamafola ia te Puleʼaga ʼo te ʼAtua. ʼI tatatou faʼafai ʼi te fai fakamafola, ʼe tou faiga ai ke tou faʼifaʼitakiʼi ia Paulo, ʼaē neʼe ko he tahi neʼe ina fakamafola ia te logo lelei, ʼo mole gaʼegaʼe. (Gāue 20:20, 21; 1 Ko. 11:1) ʼE tou ʼiloʼi ko te fakamafola ʼo te logo ʼo te Puleʼaga ʼe ina haofaki ia te ʼu maʼuli. Kae ʼe tou toe faiga ke tou faʼifaʼitakiʼi ia Paulo ʼaki tatatou kumi he ʼu faigamālie ke tou “foaki . . . he meʼa ʼofa fakalaumālie” ki te ʼu tehina.—Lau ia Loma 1:11, 12; 10:13-15.
11. ʼE tonu ke feafeaʼi kiā tātou te fekauʼi ʼaē ke tou fai fakamafola pea mo fakalotomālohiʼi ia totatou ʼu tehina?
11 ʼI te ʼu gāue Fakakilisitiano ʼaenī e lua, ko te gāue fea ʼaē ʼe maʼuhiga age? Ko te fai ʼo te fehuʼi ʼaia, ʼe hagē ko hatatou fehuʼi ʼo ʼuhiga mo he manulele: ʼi tona ʼu kapakau e lua ko te kapakau fea ʼaē ʼe maʼuhiga age? ʼE tou ʼiloʼi lelei pē ia tona tali. ʼE ʼaoga ki he manulele ke ina fakaʼaogaʼi tona ʼu kapakau e lua ke feala hana lele. ʼO toe fēia pē, ʼe tonu ke tou kau ki te ʼu faʼahi ʼaenī e lua ʼo tatatou tauhi ki te ʼAtua, ke tou fakahoko kātoa te ʼu meʼa fuli ʼaē ʼe fakamaʼua ki te kau Kilisitiano. Koia, ʼe mole tonu ke tou manatu ʼe kehe te fekau ʼaē ke tou fakamafola ia te logo lelei pea kehe te fakalotomālohiʼi ʼo te ʼu tehina, kae ʼo ʼuhiga mo te ʼu faʼahi ʼaia e lua, ʼe tonu ke tou manatu ohagē ko te ʼu ʼapositolo ko Petelo pea mo Paulo, ʼe ko he ʼu maʼua ʼe tonu ke fakahoko fakatahi. ʼO feafeaʼi?
12. ʼE fakaʼaogaʼi feafeaʼi tātou ohagē ko he ʼu meʼa gāue ʼi te ʼu nima ʼo Sehova?
12 ʼUhi ko tātou ko he ʼu hahaʼi ʼe natou ʼave te evaselio, ʼe tou fakaʼaogaʼi te ʼu poto faiako ʼaē ʼe tou maʼu moʼo faigaʼi ke malave ia te logo fakalotomālohi ʼo te Puleʼaga ʼo te ʼAtua ki te loto ʼo totatou ʼu tatau. ʼI tatatou fai ʼaia, ʼe tou fakaʼamu ke tou tokoni kiā nātou ke natou liliu ko he ʼu tisipulo ʼa Kilisito. Kae, ʼe tou toe fakaʼaogaʼi totatou ʼu fealagia pea mo he tahi age ʼu meʼa ʼofa ʼe tou maʼu moʼo faiga ke tou fakalotomālohiʼi ia totatou ʼu tehina, ʼo tou fai he ʼu palalau fakalotomālohi pea mo he ʼu gāue moʼo tokoni kiā nātou, ʼo hā ʼi te ʼu ʼaluʼaga ʼaia ia te ʼofa makehe ʼo te ʼAtua. (Taag. 3:27; 12:25) ʼI tatatou fai ʼaia, ʼe tou fakaʼamu ke tou tokoni kiā nātou ke natou nonofo ko he ʼu tisipulo ʼa Kilisito. ʼI te ʼu gāue ʼaia e lua, te fai fakamafola ki te hahaʼi pea mo te “fetauhiʼaki,” ʼe tou maʼu ia te pilivilēsio lahi ke tou tauhi ohagē ko he ʼu meʼa gāue ʼi te ʼu nima ʼo Sehova.—Kal. 6:10.
“Ke Kotou Feʼofamamahiʼaki”
13. Koteā ʼaē ʼe feala ke hoko mo kapau ʼe tou tuku ia tatatou “fetauhiʼaki”?
13 Neʼe uga fēnei e Paulo ia tona ʼu tehina: “ ʼI te ʼofa fakatautēhina, ke kotou feʼofamamahiʼaki. Ke kotou ʼuluaki tuʼumaʼu ʼi te fefakamaʼuhigaʼaki.” (Loma 12:10) Koia, ke tou ʼofa ki totatou ʼu tehina, ʼe fakamaʼua mai ke tou tauhi ʼaki he loto kātoa ohagē ko he ʼu hahaʼi taupau ʼo te ʼofa makehe ʼo te ʼAtua. ʼE mahino kiā tātou, kapau ʼe tāʼofi e Satana ia tatatou “fetauhiʼaki,” ʼe ina fakavaivai ai anai ia tatatou logotahi. (Kol. 3:14) Kapau ʼe mole kei maʼu ia te logotahi, pea ʼe iku anai ki te fakasiʼisiʼi ʼo te gāue fai fakamafola. ʼE ʼiloʼi lelei e Satana, ʼe tonu pē ke ina fakagata he koga e tahi ʼo tatatou tauhi, pea ʼe feala ai ke ina tāʼofi tātou ke tou fakahoko ia tatatou gāue.
14. Ko ai ʼe natou maʼu ia te ʼu fua lelei ʼo tatatou “fetauhiʼaki”? Kotou tuku mai he faʼifaʼitaki.
14 Ko te “fetauhiʼaki” ʼe mole fua lelei pē kiā nātou ʼaē ʼe natou maʼu ia te ʼofa makehe ʼo te ʼAtua kae kiā nātou fuli ʼaē ʼe natou fakahā ia te aga ʼaia. (Taag. 11:25) Ohagē lā ko Ryan pea mo Roni, te taumātuʼa ʼi Illinois, ʼi Amelika. ʼI tanā logo ʼaē neʼe maumauʼi e te ʼafā ko Katrina ia te ʼu lauʼi teau ʼapi ʼo tonā ʼu tehina Fakamoʼoni ʼa Sehova, ko te ʼofa fakatautēhina neʼe ina uga nāua ke nā mavae ʼi tanā ʼu gāue, pea ke nā fakatau tonā ʼapi, mo totogi hanā caravane ʼe fakapipiki ki te taumuli ʼo tanā motokā, pea nā folau ai iā kilometa e 1 400 ki te kolo ko Louisiane. Neʼe fakalaka ʼi te taʼu kātoa ia tanā nonofo ʼaē ʼi ai, ʼo nā foaki tonā temi, tonā mālohi, pea mo tonā ʼu koloa moʼo tokoni ki tonā ʼu tehina. ʼE ʼui fēnei e Ryan, ʼe taʼu 29: “ ʼI taku kau ki te gāue ʼaia moʼo tokoni ki te ʼu tehina, neʼe au fakaovi lelei ai ki te ʼAtua. Neʼe au sio ki te tokaga ʼa Sehova ki tana hahaʼi.” ʼE toe ʼui fēnei e Ryan: “Ko taku gāue mo te ʼu tehina ʼaē kua mātutuʼa age iā au, neʼe au ako lahi ai peʼe feafeaʼi haku tokaga ki te ʼu tehina. Neʼe au toe ako ai, ʼe lahi ʼaupitō ia te ʼu gāue maʼa mātou kau tūpulaga ʼi te kautahi ʼa Sehova.” ʼE ʼui fēnei e Roni, ʼaē ʼe taʼu 25: “ ʼE au loto fakafetaʼi ʼi taku lava tokoni ki ʼihi. Neʼe mole he temi ʼi toku maʼuli neʼe au fiafia lahi fēia. ʼE au ʼiloʼi, ʼi te ʼu taʼu ʼaenī kā hoko mai, ʼe au haga utu pē anai ia te ʼu lelei mai te ʼu meʼa fakaofoofo ʼaenī neʼe hoko kiā au.”
15. Ko te ʼu tupuʼaga lelei fea ʼe tou maʼu ke tou haga tauhi ohagē ko he kau tagata tauhi ʼapi lelei ʼo te ʼofa makehe ʼo te ʼAtua?
15 ʼE moʼoni, ko te fakalogo ki te ʼu fakatotonu ʼa te ʼAtua ke fakamafola ia te logo lelei pea mo fakalotomālohiʼi te ʼu tehina, ʼe maʼu fuli ai te ʼu tapuakina. Ko nātou ʼaē ʼe tou tokoni ki ai, ʼe natou mālolohi ʼi te faʼahi fakalaumālie, pea ʼe fiafia totatou loto, ko he fiafia ʼe tou maʼu pē he neʼe tou foaki. (Gāue 20:35) Ko te kōkelekāsio kātoa ʼe tuputupu ʼi te ʼofa, heʼe natou fetokagaʼaki. Tahi ʼaē meʼa, ko te ʼofa ʼaē ʼe tou fefakahāʼaki ʼe ina fakaʼiloga lelei ai ko tātou ko te kau Kilisitiano moʼoni. Neʼe ʼui fēnei e Sesu: “ ʼAki te meʼa ʼaia, ʼe ʼiloʼi ai anai e te hahaʼi fuli ko koutou ko taku ʼu tisipulo, mo kapau ʼe kotou femaʼuʼaki te ʼofa.” (Soa. 13:35) Kae ʼe tou fakamaʼuhigaʼi tāfito tatatou Tamai loto tokaga, ia Sehova, heʼe ko tona loto ke fakalotomālohiʼi e tana ʼu kaugana ʼi te kele ia nātou ʼaē ʼe nonofo ʼi te faigataʼaʼia. Koia, ʼe tou maʼu ai he ʼu tupuʼaga lelei ke tou fakaʼaogaʼi totatou ʼu meʼa ʼofa ke tou “fetauhiʼaki, ohagē ko he kau tagata tauhi ʼapi lelei ʼo te ʼofa makehe ʼo te ʼAtua”! ʼE kotou haga hoko atu anai fēia?—Lau ia Hepeleo 6:10.
ʼE Kei Kotou Manatuʼi Koa?
• ʼE fakalotomālohiʼi feafeaʼi e Sehova ia tana ʼu kaugana?
• Koteā ʼaē neʼe foaki mai kiā tātou?
• Koteā ʼihi ʼaluʼaga ʼaē ʼe feala ai ke tou tauhi ki totatou ʼu tehina?
• Koteā ʼaē kā ina uga anai tātou ke tou haga fakaʼaogaʼi totatou ʼu meʼa ʼofa moʼo “fetauhiʼaki”?
[Paki ʼo te pasina 18]
ʼE tou fakamafola ia te logo lelei ki te hahaʼi pea mo tokoni ki totatou ʼu tehina Kilisitiano