ʼE Tou Lava ʼUtakiʼi Te ʼu ʼAhiʼahi Kehekehe!
ʼE ʼAHIʼAHIʼI koa takotou tui ʼi te temi nei? ʼE koutou lotovaivai koa, ohage ʼe mole koutou lava ʼutakiʼi? ʼE ʼi ai koa he ʼu temi neʼe koutou manatu ai ʼe makehe tokotou fihifihia pea ʼe mole ʼi ai hona puleʼaki? Kapau koia, pea ʼaua naʼa koutou lotovaivai! Logope la he faʼahiga ʼahiʼahi ʼe feala ke hoko kiā tatou, kae ʼe fakamoʼoni mai ʼi te Tohi-Tapu ʼe lava faka fealagia mai e te ʼAtua ke tou ʼutakiʼi.
ʼE fakamoʼoni mai ʼi te Tohi-Tapu ko te ʼu kaugana ʼa te ʼAtua ʼe nātou “to [anai] kia faahiga ahiahi kehekehe.” (Sakopo 1:2) Koutou fakatokagaʼi te kupu “kehekehe” (ko te kupu faka Keleka, ko poi·kiʹlos). ʼI tona fakaʼaogaʼi ʼi te temi muʼa, ʼe faka ʼuhiga te kupu faka Keleka ki te “lahi pea mo te kehekehe” peʼe ko te “lanu kehekehe,” pea ʼe ina faka maʼuhigaʼi ia “te kehekehe ʼo te ʼu ʼahiʼahi.” ʼI hona ʼaluʼaga fakatā, ko te “faahiga ahiahi kehekehe” ʼe nātou “lanu kehekehe.” Kae ʼe lagolago mai ia Sehova kiā tatou ke tou lava ʼutakiʼi fuli te ʼu ʼahiʼahi. He koʼe ʼe feala ke tou tui papau ki te faʼahi ʼaia?
‘Ko Te ʼOfa Makehe ʼo Te ʼAtua ʼe Hā ʼi He ʼu Agaaga Kehekehe’
ʼE ʼui e te ʼapositolo ko Petelo ko te kau Kilisitiano ʼe nātou “tali mamahi i te u faahiga ahiahi kehekehe.” (1 Petelo 1:6) Ki muli age ʼi tana tohi pe ʼaia, ʼe ina ʼui ko “te ʼofa makehe ʼo te ʼAtua . . . ʼe hā ʼi he ʼu agaaga kehekehe.” (1 Petelo 4:10, MN ) Ko te ʼu palalau “ ʼi he ʼu agaaga kehekehe” ʼe tatau tona haʼuʼaga mo te ʼuluaki kupu faka Keleka ʼaē neʼe tou talanoa kiai. ʼE fakamahino fēnei e te tagata poto sivi Tohi-Tapu ʼo ʼuhiga mo te kupuʼi palalau ʼaia: “ ʼE ko he manatu maʼuhiga. . . . Ka tou palalau ʼo ʼuhiga mo te ʼofa makehe ʼo te ʼAtua ʼaki te kupu poikilos, ko tona fakaliliu ko te ʼofa makehe ʼo te ʼAtua ʼe tāu mo feʼauga mo te ʼaluʼaga ʼo te tagata ʼo te ʼu lanu kehekehe.” ʼE ina toe ʼui fēnei: “Ko te ʼofa makehe ʼo te ʼAtua ʼe lava mālo ʼi te ʼu ʼaluʼaga fuli, mo te fihifihia fuli, mo te ʼu kole fuli. ʼE mole ʼi ai he ʼaluʼaga ʼo te maʼuli ʼe mole lava ʼutakiʼi e te ʼofa makehe ʼo te ʼAtua. ʼE fakamanatuʼi lelei mai e te kupu poikilos, ko te ʼofa makehe ʼo te ʼAtua ʼaē ʼe lanu kehekehe ʼe feʼauga lelei moʼo tokoni mai kiā tatou ke tou ʼutakiʼi te ʼu ʼahiʼahi fuli.”
Ko Te ʼOfa Makehe ʼo Te ʼAtua ʼe Tokoni Mai Kiā Tatou Ke Tou ʼUtakiʼi Te ʼu ʼAhiʼahi
ʼI te ʼu palalau ʼa Petelo, ʼe ʼiloga te ʼofa makehe ʼo te ʼAtua ia nātou kehekehe ʼaē ʼe nātou faʼufaʼu te kokelekasio faka Kilisitiano. (1 Petelo 4:11) ʼE takitahi te tagata kaugana ʼa te ʼAtua mo tona ʼu fealagia fakalaumālie, ʼe feala ai hana fakaloto mālohiʼi ia nātou ʼaē ʼe tau mo he ʼu ʼahiʼahi. (Loma 12:6-8) Ohage la, ko ʼihi ʼi te kokelekasio ʼe ko he kau faiako faka Tohi-Tapu makehe. Ko ʼanatou palalau ʼe malave ki te ʼu loto ʼa ʼihi pea mo ʼuga ai nātou ke nātou kātaki. (Nehemia 8:1-4, 8, 12) Ko ʼihi ʼe nātou fai tuʼumaʼu he ʼu ʼaʼahi faka tauhi ōvi kiā nātou ʼaē ʼe ʼaoga ki ai he tokoni. Ko te ʼu taʼi ʼaʼahi ʼaia ʼe ko he ʼu faigamālie moʼo fakaloto mālohiʼi, pea mo ‘fakafimālieʼi te ʼu loto.’ (Kolose 2:2) Ka fai e te ʼu tēhina taupau ia te ʼu taʼi ʼaʼahi fakaloto mālohi ʼaia ki te tui, ʼe nātou foaki he meʼa ʼofa fakalaumālie. (Soane 21:16) ʼE ʼi ai ʼihi ʼi te kokelekasio ʼe nātou agalelei, mo manavaʼofa, pea mo agaʼofa ki ʼonatou tēhina ʼaē ʼe lotomamahi ʼuhi ko te ʼu ʼahiʼahi ʼe tau mo nātou. (Gaue 4:36; Loma 12:10; Kolose 3:10) Ko te agalelei pea mo te tokoni ʼaē ʼe fai e te ʼu tēhina mo tuagaʼane ʼaia, ʼe ko he aga maʼuhiga ia, peʼe ko he faʼahiga “lanu,” ʼo te ʼofa makehe ʼo te ʼAtua.—Tāʼaga Lea 12:25; 17:17.
“Te Atua o Te u Fakafimalie”
Ko Sehova ʼe ina foaki mai te fakafimālie. Ko ia ko “te Atua o te u fakafimalie; iaʼia e ina fakafimalieʼi tatou i otatou mamahi fuape.” (2 Kolonito 1:3, 4) Ko te poto ʼaē ʼe tou maʼu ʼi te Folafola ʼa te ʼAtua pea mo te mālohi ʼo tona laumālie maʼoniʼoni, ʼe ko te ʼu puleʼaki tāfito ʼaia ʼe foaki mai e Sehova moʼo tali ki tatatou kumi tokoni kiā te ia ʼi ʼatatou faikole. (Isaia 30:18, 21; Luka 11:13; Soane 14:16) ʼE feala pe ke fakaloto mālohiʼi tatou e te fakapapau ʼaē neʼe fai e te ʼapositolo ko Paulo. Neʼe ina ʼui fēnei: “E agatonu te Atua, e mole ina fakagafua anai ke lahiʼage toutou fakahalaʼi i te mea e koutou lavaʼi, kae e ina tuku atu anai fakatahi mo te fakahala te faigamalie ke koutou hao ai pea mo te malohi ke koutou faa tali.”—1 Kolonito 10:13.
Ei, logope he faʼahiga ʼahiʼahi ʼe lagi tau mo tatou, kae ʼe ʼi ai tuʼumaʼu pe anai he puleʼaki ʼo te ʼofa makehe ʼo te ʼAtua moʼo tokoni mai ke tou ʼutakiʼi te ʼahiʼahi. (Sakopo 1:17) Ko te tokoni totonu ʼaē ʼe foaki e Sehova ki tana kau kaugana ʼi tona temi totonu—ʼo mole lauʼia te ʼu fakahala pea mo te ʼu faigataʼaʼia ʼe tau mo nātou—ʼe ko te fakamoʼoni ʼo “te Poto lahi o te Atua.” (Efeso 3:10) ʼE mole koa la ko he manatu fakaloto mālohi ʼaia?
[Paki ʼo te pasina 31]
ʼE tokoni mai ia Sehova ke tou ʼutakiʼi ʼotatou ʼahiʼahi