Koʼenī! Te Tagata Kaugana ʼAē Kua Fiafia Ai Sehova

“Koʼenī! Taku tagata kaugana . . . ʼaē kua fiafia ai toku nefesi!”—ISA. 42:1.

1. Koteā ʼaē ʼe fakalotomālohiʼi kiai ia te hahaʼi ʼa Sehova ke natou fai, tāfito lā ʼi te fakaovi mai ʼo te ʼAho Fakamanatu, pea koteā tona tupuʼaga?

ʼI TE kua fakaovi mai ʼo te ʼAho Fakamanatu ʼo te mate ʼo Kilisito, ʼe lelei anai ki te hahaʼi ʼa te ʼAtua ke natou fakakaukauʼi ia te tokoni ʼaenī ʼa te ʼapositolo ko Paulo ʼaē ke natou “sioʼi tuʼumaʼu ia Sesu, te Fakafofoga tāfito pea mo haohaoa ʼo tatatou tui.” Neʼe toe ʼui fēnei e Paulo: “ ʼEī, kotou tokagaʼi fakalelei, ia ia ʼaē neʼe ina kātakiʼi te ʼu palalau fakafeagai ʼaia mai te kau agahala, ʼaē neʼe ko he meʼa kovi kiā nātou, koteʼuhi ke mole kotou fiu pea mo lotovaivai ʼi tokotou ʼu nefesi.” (Hep. 12:2, 3) Ko he vakaʼi fakalelei ia te maʼuli agatonu ʼo Kilisito, ʼaē neʼe iku ki tana mate fakasākilifisio, ʼe tokoni mai anai ki te kau Kilisitiano fakanofo pea mo tonatou ʼu kaumeʼa ia te tahi ʼu ovi ke hoko atu ia tanatou kaugana agatonu ʼaē kiā Sehova pea ke ‘ ʼaua naʼa natou lotovaivai ʼi ʼonatou nefesi.’—Vakaʼi ia Kalate 6:9.

2. Koteā te ako ʼe feala ke tou maʼu mai te ʼu lea fakapolofetā ʼa Isaia ʼo ʼuhiga mo te ʼAlo ʼo te ʼAtua?

² ʼAki te polofetā ko Isaia, neʼe foaki e Sehova ia te ʼu lea fakapolofetā ʼe talanoa fakahagatonu ai ki tona ʼAlo. ʼE tokoni mai anai ia te ʼu lea fakapolofetā ʼaia kiā tātou, ke tou “sioʼi tuʼumaʼu ia . . . te Fakafofoga Tāfito pea ina fakakātoa tatatou tui” ia Kilisito Sesu.a ʼE talanoa ia te ʼu lea fakapolofetā ʼaia ki tona ʼuluagaaga, tona ʼu mamahi, pea mo tona fakanofo ʼaē ke liliu ko totatou Hau pea mo totatou Haofakiʼaga. ʼE haga anai ia te ʼu lea fakapolofetā ʼaia ʼo fakaloloto ia tatatou mahino ki te ʼAho Fakamanatu, ʼaē ʼe tou fai anai ʼi te taʼu ʼaenī ʼi te Felianima ʼaho 9 ʼo ʼApelili, mokā tō te laʼā.

Kua ʼIloʼi Ia Te Tagata Kaugana

3, 4. (a) ʼI te tohi ʼa Isaia, koteā te fakaʼuhiga ʼo te kupu “tagata kaugana”? (b) ʼE fakahā feafeaʼi ʼi te Tohi-Tapu ia te Tagata Kaugana ʼaē ʼe talanoa ki ai ia te ʼu kāpite ʼo Isaia 42, 49, 50, 52, pea mo te 53?

³ ʼE tuʼa lahi ia te fakaʼaogaʼi ʼo te kupu “tagata kaugana” ʼi te tohi ʼa Isaia. ʼE tautau fakaʼuhiga te kupu ʼaia ki te polofetā totonu pē. (Isa. 20:3; 44:26) ʼI ʼihi temi ʼe fakaʼuhiga ki te puleʼaga ʼo Iselaele, peʼe ko Sakopo. (Isa. 41:8, 9; 44:1, 2, 21) Kae ʼe feafeaʼi ki te ʼu lea fakapolofetā maʼuhiga ʼo ʼuhiga mo te Tagata Kaugana ʼaē ʼe talanoa ki ai te ʼu kāpite ʼo Isaia kāpite 42, 49, 50, 52, pea mo te 53? Ko te ʼu Tohi Fakakeleka Fakakilisitiano ʼe natou fakahā lelei mai ia te Tagata Kaugana ʼa Sehova ʼaē ʼe talanoa ki ai ia te ʼu kāpite ʼaia. Tahi ʼaē meʼa maʼuhiga, ko te tagata ofisie Etiopea ʼaē ʼe talanoa ki ai ia te tohi ʼo Gāue, neʼe ina lolotoga lau ia te ʼu lea fakapolofetā ʼaia ʼi te temi ʼaē neʼe fetaulaki ai mo te tagata fai fakamafola Evaselio ko Filipo ʼaē neʼe taki fakahagatonu e te laumālie māʼoniʼoni ki ai. Ko te tagata ofisie ʼaē neʼe ina lau ia te koga tohi Fakatohi-tapu ʼo Isaia 53:7, 8, neʼe ina fehuʼi fēnei age kiā Filipo: “ ʼE au kole atu kiā koe, ko ai koa ʼaē ʼe talanoa ki ai te polofetā? ʼE talanoa koa ia kiā ia totonu peʼe ki he tahi tagata?” Neʼe foimo fakahā atu aipē e Filipo, neʼe talanoa ia Isaia ʼo ʼuhiga mo te Mēsia, ko Sesu.—Gāue 8:26-35.

⁴ ʼI te kei meamea ʼa Sesu, ko te tagata agatonu ko Simeone neʼe ina ʼui ʼaki te mālohi ʼo te laumālie māʼoniʼoni, ko “te kiʼi tamasiʼi ko Sesu” ʼe liliu anai ko “te mālama ʼaē kua teuteuʼi moʼo toʼo ʼo te pūlou ʼi te ʼu puleʼaga” ohagē ko tona fakakikite iā Isaia 42:6 pea mo Isaia 49:6. (Luka 2:25-32) Tahi ʼaē, ko te fakalainoaʼi ʼaē neʼe tau mo Sesu ʼi te pō ʼo tona fakamāuʼi, neʼe fakakikite ʼi te lea fakapolofetā ʼo Isaia 50:6-9. (Mat. 26:67; Luka 22:63) ʼI te ʼosi ʼo te Penikositē ʼo te taʼu 33 ʼo totatou temi, ko te ʼapositolo ko Petelo neʼe ina fakahā lelei ko Sesu ʼe ko te “Tagata Kaugana” ʼa Sehova. (Isa. 52:13; 53:11; lau ia Gāue 3:13, 26.) Koteā te ako ʼe feala ke tou maʼu mai te ʼu lea fakapolofetā Fakamēsia ʼaia?

ʼE Akoʼi e Sehova Ia Tana Tagata Kaugana

5. Koteā ia te ako ʼaē neʼe maʼu e te Tagata Kaugana?

⁵ Ko te lea fakapolofetā ʼa Isaia ʼo ʼuhiga mo te Tagata Kaugana ʼa te ʼAtua ʼe ina fakamahino mai ia te felōgoi lelei ʼaē ʼa Sehova pea mo tona ʼAlo ʼuluaki-tupu lolotoga ia tana maʼuli ʼaē ʼi selō. (Lau ia Isaia 50:4-9.) ʼE fakahā totonu e te Tagata Kaugana, ko Sehova neʼe ina akoʼi hoholo aipē ia ia, ʼo ʼui māʼana: “ ʼE ina fakaʼala toku taliga moʼo fagono ohagē ko nātou ʼaē neʼe akoʼi.” (Isa. 50:4) Lolotoga te temi ʼaia, ko te Tagata Kaugana ʼa Sehova neʼe fakalogo ki tana Tamai pea mo ako mai iā te ia, ʼo liliu ko he tisipulo neʼe fakalogo lelei. ʼE ko he pilivilēsio makehe ʼaia ʼi tona akoʼi e te Tupuʼaga ʼo te ʼatulaulau!

6. Neʼe fakahā feafeaʼi e te Tagata Kaugana ia tana fakalogo kātoa ʼaē ki tana Tamai?

⁶ ʼI te lea fakapolofetā ʼaia, neʼe ʼui e te Tagata Kaugana ʼo ʼuhiga mo tana Tamai ʼe “ko te Tuʼi ʼAliki ko Sehova.” ʼE hā mai ai ko te Tagata Kaugana neʼe ina ako ia te moʼoni maʼuhiga ʼo ʼuhiga mo te pule faʼitaliha ʼa Sehova. ʼI tana fakahā ia tana fakalogo kātoa ʼaē ki tana Tamai, neʼe ina ʼui fēnei: “Ko te Tuʼi ʼAliki ko Sehova totonu neʼe ina ʼavahi toku taliga, pea ko au neʼe mole au talagataʼa. Neʼe mole au maliu kehe mai ai ʼo fakafeagai.” (Isa. 50:5) Neʼe “liliu ai ʼi ʼona tafa [ʼo Sehova] ko he tufuga faiva” ʼi te fakatupu ʼo te ʼatulaulau pea mo te tagata. Ko te “tufuga faiva” ʼaia neʼe “fiafia ʼi ʼona muʼa [ʼo Sehova] ʼi te temi fuli pē pea mo fakafiafia ʼo ʼuhiga mo te koga maʼuli ʼo tona kele, pea ko te ʼu meʼa ʼaē neʼe . . . ʼofa kiai [te ʼAlo ʼo te ʼAtua] neʼe ko te ʼu meʼa ʼaē neʼe nofo mo te ʼu foha ʼo te tagata.”—Taag. 8:22-31.

7. Koteā ʼaē ʼe fakahā mai ai ko te Tagata Kaugana neʼe falala ki te tokoni ʼa tana Tamai lolotoga tona ʼu ʼahiʼahi?

⁷ Ko te ako ʼaia neʼe maʼu e te Tagata Kaugana pea mo tona ʼofa ʼaē ki te mālamanei neʼe ina teuteuʼi ai ia ia ki te temi ʼaē kā hifo mai ai anai ki te kele pea mo felāveʼi mo te fakataga mālohi. Neʼe fiafia aipē ʼi te fai ʼo te finegalo ʼo tana Tamai, logolā te ʼu fakataga mālohi ʼaē neʼe tau mo ia. (Pes. 40:8; Mat. 26:42; Soa. 6:38) ʼI tona ʼahiʼahiʼi ʼaē ʼi te kele, neʼe falala ia Sesu ki te ʼofa pea mo te tokoni ʼo tana Tamai. Ohagē ko tona fakakikite ʼi te lea fakapolofetā ʼa Isaia, neʼe feala ai ke ʼui fēnei e Sesu: “ ʼE ovi mai ia Ia ʼaē ʼe ina ʼui ʼe au faitotonu. Ko ai ʼaē ʼe feala ke fakafeagai mai kiā te au? . . . Koʼenī! Ko te Tuʼi ʼAliki ko Sehova totonu kā ina haofaki anai au.” (Isa. 50:8, 9) Neʼe tokoni moʼoni ia Sehova ki tana Tagata Kaugana agatonu lolotoga ia tana minisitelio ʼi te kele, ohagē ko tona fakahā mai ʼi te tahi lea fakapolofetā ʼa Isaia.

Te Minisitelio ʼo Te Tagata Kaugana ʼi Te Kele

8. Koteā ʼaē ʼe fakamoʼoni ai ko Sesu neʼe ko ‘ia ʼaē neʼe fili’ e Sehova ohagē ko tona fakakikite iā Isaia 42:1?

⁸ Ko te hisitolia Fakatohi-tapu ʼe ina fakahā mai ia te meʼa ʼaē neʼe hoko ʼi te temi ʼaē neʼe papitema ai ia Sesu ʼi te taʼu 29 ʼo totatou temi: “Neʼe hifo ifo kiā te ia te laumālie māʼoniʼoni . . . pea neʼe logoʼi te leʼo mai te lagi: ‘Ko koe ko toku ʼAlo ʼofaina; kua au fiafia ʼaupitō iā te koe.’ ” (Luka 3:21, 22) Koia, neʼe fakahā lelei ai e Sehova ia ‘ia ʼaē neʼe ina fili,’ ʼaē ʼe talanoa ki ai ia te lea fakapolofetā ʼa Isaia. (Lau ia Isaia 42:1-7.) Lolotoga tana minisitelio ʼi te kele, neʼe fakahoko e Sesu ia te lea fakapolofetā ʼaia ʼi hona ʼaluʼaga fakaofoofo. ʼI te Evaselio ʼa Mateo, ʼe talanoa ai ki te ʼu palalau ʼaē ʼe tou maʼu iā Isaia 42:1-4 pea ʼe fakaʼuhiga kiā Sesu.—Mat. 12:15-21.

9, 10. (a) ʼI te lolotoga ʼo tana minisitelio, neʼe fakahoko feafeaʼi e Sesu ia te ʼu palalau ʼaē iā Isaia 42:3? (b) Neʼe ‘fakahā feafeaʼi e Kilisito ia te faitotonu’ ʼi tana maʼuli ʼaē ʼi te kele, pea ko te temi fea ʼaē kā ina ‘fakatuʼu ai anai ia te faitotonu’?

⁹ Ko te hahaʼi ʼaē ʼe mole faʼa maʼuhiga ʼi te kau Sutea neʼe manukinukiʼi e te kau takitaki lotu Sutea. (Soa. 7:47-49) Neʼe gaohi koviʼi ia te hahaʼi pea neʼe feala ke fakatatau nātou ki he ʼu “kaho kua volu” peʼe ki he ʼu “vavae lino” kua mū veliveli mokā kua natou aʼu ki tonatou mālohi fakaʼosi. Kae ko Sesu ia, neʼe manavaʼofa ki te hahaʼi māsisiva pea mo fakaʼofaʼofa. (Mat. 9:35, 36) Neʼe ina fai ia te fakaafe ʼaenī ki te taʼi faʼahiga hahaʼi ʼaia, ʼo ʼui māʼana: “Kotou ʼomai kiā te au, ia koutou fuli ʼaē ʼe kinakina pea mo mafasia, pea ʼe au fakafīmālie anai koutou.” (Mat. 11:28) Tahi ʼaē, ‘neʼe fakahā e Sesu ia te faitotonu,’ ʼo ina akonakiʼi ia te ʼu lēkula ʼa Sehova ʼo ʼuhiga mo te meʼa ʼaē ʼe totonu pea mo te meʼa ʼaē ʼe kovi. (Isa. 42:3) Neʼe ina toe fakahā ko te Lao ʼa te ʼAtua ʼe tonu ke maʼuliʼi fakapotopoto pea ʼaki te manavaʼofa. (Mat. 23:23) Neʼe toe fakahā foki e Sesu ia te faitotonu ʼaki tana fakamafola fakatatau ia te logo lelei ki te hahaʼi maʼu koloa pea mo te hahaʼi māsisiva.—Mat. 11:5; Luka 18:18-23.

¹⁰ Ko te lea fakapolofetā ʼa Isaia ʼe ina toe fakakikite foki ko ‘ia ʼaē neʼe fili’ e Sehova ʼe ina ‘fakatuʼu anai ia te faitotonu ʼi te kele.’ (Isa. 42:4) Ko he faʼahi kua vave pē anai ia tana fakahoko ʼi tona ʼuhiga Hau ʼo te Puleʼaga Fakamēsia, ʼe ina fakaʼauha anai ia te ʼu puleʼaga fakapolitike fuli pea mo fetogi ʼaki tana pule faitotonu. ʼE ina fakatuʼu anai ia he mālama foʼou, ʼe ‘maʼuli ai anai ia te faitotonu.’—2 Pet. 3:13; Tan. 2:44.

Ko “He Mālama” Pea Mo “He Fuakava”

11. ʼE fakaʼuhiga feafeaʼi ko Sesu neʼe ko “he mālama ʼo te ʼu puleʼaga” ʼi te ʼuluaki sēkulō, pea ʼe feafeaʼi ʼi te temi nei?

¹¹ ʼO mulimuli ki te koga tohi ʼo Isaia 42:6, neʼe fakamoʼoni e Sesu ko ia te “mālama ʼo te ʼu puleʼaga.” Lolotoga tana minisitelio, neʼe ina ʼuluaki foaki ia te mālama fakalaumālie ki te kau Sutea. (Mat. 15:24; Gāue 3:26) Kae neʼe ʼui fēnei e Sesu: “Ko au ko te mālama ʼo te mālamanei.” (Soa. 8:12) Neʼe liliu ko he mālama ki te kau Sutea pea mo te hahaʼi ʼo te ʼu puleʼaga, ʼo mole gata pē ki tana foaki ia te ʼu fakamahino fakalaumālie, kae neʼe ina toe momoli foki mo tona maʼuli haohaoa ko he totogi maʼa te hahaʼi fuli. (Mat. 20:28) ʼI tona ʼosi fakatuʼuake mai te mate, neʼe ina fakatotonu ki tana ʼu tisipulo ke natou ʼolo ʼo fagonogono ʼo ʼuhiga mo ia “ ʼo kaku ki te potu taupotu ʼo te kele.” (Gāue 1:8) Lolotoga tanatou minisitelio, ko Paulo mo Palenapa neʼe nā talanoa ki te kupusiga palalau ʼaē ko te “mālama ʼo te ʼu puleʼaga” pea neʼe nā fakaʼuhiga ki te fai fakamafola ʼaē neʼe nā fakahoko ki te hahaʼi ʼaē neʼe mole ko ni Sutea. (Gāue 13:46-48; vakaʼi ia Isaia 49:6.) Ko te gāue ʼaia ʼe kei fai pē e te ʼu tehina fakanofo ʼo Sesu ʼaē ʼi te kele pea mo tonatou ʼu kaumeʼa, ʼo natou fakamafola ia te mālama fakalaumālie pea mo tokoni ki te hahaʼi ke natou tui kiā Sesu, te “mālama ʼo te ʼu puleʼaga.”

12. Neʼe foaki feafeaʼi e Sehova ia tana Tagata Kaugana ko “he fuakava ʼo te hahaʼi”?

¹² ʼI te lea fakapolofetā pē ʼaia, neʼe ʼui fēnei e Sehova ki tana Tagata Kaugana ʼaē neʼe ina fili: “ ʼE au taupau anai koe pea mo foaki anai koe ko he fuakava ʼo te hahaʼi.” (Isa. 42:6) Neʼe faiga mālohi ia Satana ke ina fakaʼauha ia Sesu pea mo fai he meʼa ke ʼaua naʼa fakahoko kātoa e Sesu ia tana minisitelio ʼi te kele, kae ko Sehova neʼe ina puipui aipē ia ia ʼo aʼu ki te temi ʼaē neʼe kua fakatotonu ke matehi ai ia ia. (Mat. 2:13; Soa. 7:30) Ki muli age neʼe fakatuʼuake e Sehova ia Sesu mai te mate pea mo foaki ki ai ia “he fuakava” peʼe ko he fakapapau maʼa te hahaʼi ʼo te kele. Ko te fakapapau ʼaia neʼe ko he fakamoʼoni ko te Tagata Kaugana agatonu ʼa te ʼAtua ʼe hoko atu pē anai tana liliu ko “he mālama ʼo te ʼu puleʼaga,” ʼo ina fakaʼāteaina nātou mai te fakapōʼuli fakalaumālie.—Lau ia Isaia 49:8, 9.b

13. Neʼe fakaʼāteaina feafeaʼi e Sesu “ia nātou ʼaē ʼe heheka ʼi te ʼu fakapōʼuli” lolotoga tana minisitelio ʼi te kele, pea ʼe ina hoko atu feafeaʼi ia tana gāue?

¹³ ʼO mulimuli ki te fakapapau ʼaia, ko te Tagata Kaugana ʼaē neʼe fili e Sehova, ʼe ina ‘ ʼavahi anai te ʼu mata ʼo te kau kivi,’ ʼo ina “toʼo ki tuʼa mai te fale pilisoni te tagata pilisoni,” pea mo haofaki “ia nātou ʼaē ʼe heheka ʼi te ʼu fakapōʼuli.” (Isa. 42:7) Lolotoga ia tana minisitelio, neʼe fai e Sesu ia te faʼahi ʼaia ʼo ina fakahāhā ai ia te ʼu talatisio hala ʼa te kau takitaki lotu pea mo fakamafola ia te logo lelei ʼo te Puleʼaga. (Mat. 15:3; Luka 8:1) Koia neʼe ina fakaʼāteaina ai ia te kau Sutea mai te lotu hala, ʼo natou liliu ko tana ʼu tisipulo. (Soa. 8:31, 32) ʼO toe fēia pē, neʼe foaki e Sesu ia te fakaʼāteaina fakalaumālie ki te ʼu toko lauʼi miliona ʼe mole natou Sutea. Neʼe ina fakatotonu ki tana ʼu tisipulo ke natou ‘ ʼolo pea ke natou fai ni ʼu tisipulo ʼi te hahaʼi ʼo te ʼu fenua fuli pē,’ ʼo ina fakapapau age ʼe nofo anai mo tana ʼu tisipulo “ ʼo kaku ki te fakaʼosi ʼo te tuʼu ʼo te ʼu faʼahiga meʼa ʼaenī.” (Mat. 28:19, 20) Mai tona tuʼulaga hau ʼi selō, ʼe tokaga ia Kilisito Sesu ki te gāue fai fakamafola ʼaē ʼe fai ʼi te kele kātoa.

Neʼe Hiki e Sehova Ia Te “Tagata Kaugana” Ki He Tuʼulaga Māʼoluga

14, 15. He koʼē neʼe hiki e Sehova tana Tagata Kaugana, ʼo feafeaʼi?

¹⁴ ʼI te tahi age lea fakapolofetā ʼo ʼuhiga mo tana Tagata Kaugana Fakamēsia, neʼe ʼui fēnei e Sehova: “Koʼenī! Ko taku tagata kaugana ʼe ina maʼu anai ia te fakasiosio tonu. ʼE nofo anai ʼi te tuʼulaga māʼoluga, ʼio ʼe hiki moʼoni anai ia pea mo hikihiki ki he tuʼulaga ʼe māʼoluga age ʼosi.” (Isa. 52:13) ʼI te fakalogo agatonu ʼo tona ʼAlo ki Tana pule faʼitaliha pea mo tana nofo agatonu ʼi te ʼu faigataʼaʼia ʼaupitō, neʼe haga ai leva ia Sehova ʼo hiki ia ia ki he tuʼulaga māʼoluga.

¹⁵ Neʼe tohi fēnei e te ʼapositolo ko Petelo ʼo ʼuhiga mo Sesu: “Neʼe heka ʼi te toʼomataʼu ʼo te ʼAtua, he neʼe hake ia ki selō; pea kua foaki age kiā te ia te ʼu ʼāselo, mo te ʼu mālohi, mo te ʼu puleʼaga ke fakalogo kiā te ia.” (1 Pet. 3:22) ʼO toe fēia pē, neʼe tohi fēnei e te ʼapositolo ko Paulo: “Neʼe ina fakamālaloʼi ia ia totonu pea neʼe talagafua ʼo aʼu ki te mate, ʼio, ki te mate ʼi te pou fakamamahi. Ko te tupuʼaga lā ʼaia ʼo tona hikihiki e te ʼAtua ki he tuʼulaga māʼoluga pea mo ina tali fakalelei ke ina foaki age kiā te ia te higoa ʼaē ʼe māʼoluga age ʼi te ʼu higoa fuli pē, koteʼuhi ke tuʼutuli fuli pē ki te higoa ʼo Sesu ia nātou ʼe ʼi te lagi, pea mo nātou ʼe ʼi te kele, pea mo nātou ʼe ʼi te lalo kele, pea ke fakahā e te ʼalelo fuli pē ko Sesu Kilisito ʼe ʼAliki ki te kolōlia ʼo te ʼAtua te Tamai.”—Filp. 2:8-11.

16. Neʼe feafeaʼi te ‘hikihiki ʼo Sesu ki he tuʼulaga ʼe māʼoluga age ʼosi’ ʼi te taʼu 1914, pea koteā ʼaē neʼe ina fakahoko talu mai te taʼu ʼaia?

¹⁶ ʼI te taʼu 1914, neʼe hiki e Sehova ia Sesu ki he tuʼulaga ʼe māʼoluga ʼosi. Neʼe “hikihiki [ia ia] ki he tuʼulaga ʼe māʼoluga age ʼosi” ʼi te temi ʼaē neʼe haga ai ia Sehova ʼo fakanofo ia ia ke Hau ʼi te Puleʼaga Fakamēsia. (Pes. 2:6; Tan. 7:13, 14) Talu mai te temi ʼaia, neʼe ‘ ʼalu ia Kilisito ʼo pule ʼi te lotolotoiga ʼo tona ʼu fili.’ (Pes. 110:2) Neʼe ina ʼuluaki fakahoko ia tana pule kiā Satana pea mo tana kau temonio, ʼo ina lī ifo nātou ki te kele. (Fakh. 12:7-12) ʼOsi ʼaia, ohagē ko te Siliusi Lahi, neʼe fakaʼāteaina e Kilisito tona ʼu tehina fakanofo ʼaē kei toe ʼi te kele mai tonatou haʼisia iā “Papiloni Lahi.” (Fakh. 18:2; Isa. 44:28) Neʼe ina takitaki ia te gāue fai fakamafola ʼi te mālamanei kātoa, ʼaē neʼe iku ai ki te fakamāʼopoʼopo ʼo “te toe” ʼo tona ʼu tehina fakalaumālie pea ki muli age mo te toko lauʼi miliona “tahi ʼu ovi,” ia te ʼu kaumeʼa agatonu ʼo te “kiʼi faga ovi.”—Fakh. 12:17; Soa. 10:16; Luka 12:32.

17. Koteā ʼaē neʼe kua tou mahino kiai mai tatatou ako ia te ʼu lea fakapolofetā ʼa Isaia ʼo ʼuhiga mo te “tagata kaugana”?

¹⁷ ʼE lagi ko te ako ʼo te ʼu lea fakapolofetā maʼuhiga ʼaia ʼi te tohi ʼa Isaia neʼe ina fakatuputupu ai ia tatatou loto fakafetaʼi ʼaē ki totatou Hau pea mo Haofakiʼaga, ia Kilisito Sesu. Ko tana fakalogo ki tana Tamai lolotoga tana minisitelio ʼi te kele, ʼe fakahā ai te ako ʼaē neʼe ina maʼu iā tafa ʼo tana Tamai ʼi muʼa ʼo tana hifo mai ki te kele. Neʼe ina fakamoʼoni ko ia te “mālama ʼo te ʼu puleʼaga” ʼi tana minisitelio pea mo te gāue fai fakamafola ʼaē neʼe tokaga kiai ʼo aʼu mai ki te ʼaho nei. ʼE tou vakaʼi anai ʼi te ʼalatike ʼaē kā hoa mai, ko te tahi lea fakapolofetā ʼo ʼuhiga mo te Tagata Kaugana Fakamēsia, ʼe ina fakahā mai ʼe mamahi anai ia Sesu pea mo ina foaki tona maʼuli maʼa tātou, pea ko he ʼu faʼahi ʼe tonu anai ke tou “tokagaʼi fakalelei” ʼi te fakaovi mai ʼo te ʼAho Fakamanatu ʼo tona mate.—Hep. 12:2, 3.

[ʼU nota]

Moʼo Fakamanatu

• Ko ai te “tagata kaugana” ʼaē ʼe talanoa ki ai ia te ʼu lea fakapolofetā ʼa Isaia, pea ʼe tou ʼiloʼi feafeaʼi ia te faʼahi ʼaia?

• Koteā te ako neʼe maʼu e te Tagata Kaugana mai iā Sehova?

• ʼE liliu feafeaʼi ia Sesu ko “he mālama ʼo te ʼu puleʼaga”?

• Neʼe hikihiki feafeaʼi ia te Tagata Kaugana ki he tuʼulaga māʼoluga?

[Paki ʼo te pasina 23]

Ohagē ko te Tagata Kaugana ʼaē neʼe fili e Sehova, neʼe manavaʼofa ia Sesu ki te hahaʼi māsisiva pea mo fakaʼofaʼofa