Tou Maʼu Te Fiafia ʼi Te Foaki!
“ ʼE lahi age te fiafia ʼo takita foaki, ʼi takita tali.”—Gaue 20:35, MN.
1. ʼE fakahā feafeaʼi e Sehova te fiafia ʼi te foaki?
KO TE fiafia ʼi te ʼiloʼi ʼo te moʼoni pea mo tona ʼu tapuakina ʼe ko he ʼu meʼa ʼofa maʼuhiga mai te ʼAtua. Ko nātou ʼaē kua nātou ʼiloʼi ia Sehova ʼe lahi te ʼu tupuʼaga ke nātou fiafia ai. Kae logola ʼe tou fiafia mokā foaki mai he meʼa ʼofa, kae ʼe tou toe fiafia mokā tou foaki he meʼa ʼofa. Ko Sehova ʼe ko Ia ʼaē ʼe ina foaki “te meʼa ʼofa lelei fuli pea mo te mōlaga haohaoa fuli,” pea ʼe ko “te ʼAtua fiafia.” (Sakopo 1:17, MN; 1 Timoteo 1:11, MN ) ʼE ina foaki he ʼu akonaki fua lelei kia nātou fuli ʼaē ʼe fagono pea ʼe fiafia ʼi te fakalogo ʼo nātou ʼaē ʼe ina akoʼi, ohage pe ko te fiafia ʼa he ʼu mātuʼa mokā ʼe fakalogo ia te fānau ki te ʼu meʼa ʼaē ʼe nā akoʼi age kia nātou.—Tāʼaga Lea 27:11.
2. (a) Koteā ʼaē neʼe ʼui e Sesu ʼo ʼuhiga mo te foaki? (b) Koteā te fiafia ʼaē ʼe tou maʼu mokā tou akoʼi ki te hahaʼi te moʼoni ʼo te Tohi-Tapu?
2 ʼO toe feiā pe, ʼi tana ʼi te kele neʼe fiafia ia Sesu ʼi tana sio ki te tali leleiʼi e te hahaʼi tana akonaki. ʼE tala e te ʼapositolo ko Paulo te ʼu palalau ʼaenī neʼe fai e Sesu: “ ʼE lahi age te fiafia ʼo takita foaki, ʼi takita tali.” (Gaue 20:35 MN ) Ko te fiafia ʼaē ʼe tou maʼu mokā tou akoʼi ki te hahaʼi te moʼoni ʼo te Tohi-Tapu, ʼe mole ko he fiafia pe he kua nātou tali te ʼu akonaki ʼo tatatou lotu. ʼE lahi age te fiafia ʼi tatatou ʼiloʼi ʼaē ʼe tou foaki kia nātou he meʼa ʼe maʼuhiga moʼoni pea mo heʼegata. Kapau ʼe tou foaki ki te hahaʼi te ʼu meʼa ʼofa fakalaumālie, pea ʼe tou lava tokoni ke fua lelei te ʼu meʼa ʼaia kia nātou ʼi te temi nei pea ʼo heʼegata.—1 Timoteo 4:8.
ʼE Tou Maʼu Te Fiafia ʼi Te Foaki
3. (a) Neʼe fakahā feafeaʼi e te ʼu ʼapositolo ko Paulo pea mo Soane tanā fiafia ʼi tanā tokoni ki te hahaʼi ʼi te faʼahi fakalaumālie? (b) He koʼe ʼe tou fakahā te ʼofa mokā tou foaki te moʼoni ʼo te Tohi-Tapu ki tatatou ʼu fānau?
3 Ei, ohage pe ko te fiafia ʼa Sehova pea mo Sesu ʼi tanā foaki he ʼu meʼa ʼofa fakalaumālie, ʼe tonu ke toe feiā mo te kau Kilisitiano. Neʼe maʼu e Paulo te fiafia ʼi tana ʼiloʼi ʼaē neʼe tokoni ki te hahaʼi ke nātou ʼiloʼi te moʼoni ʼo te Folafola ʼa te ʼAtua. Ki te kokelekasio ʼo Tesalonika, neʼe ina tohi fēnei: “Io, e kotea tamatou falala, tomatou fiafia; te kolona o tamatou hikisia, pe mole ko koutou, ia mua o totatou Aliki ko Sesu i tana haele mai? Koteuhi ko tomatou kololia mo tomatou fiafia e ko koutou.” (1 Tesalonika 2:19, 20) ʼO toe feiā pe, neʼe tohi fēnei e te ʼapositolo ko Soane ʼo ʼuhiga mo tana ʼu fānau fakalaumālie: “E mole lahiʼage toku fiafia ki niʼihiʼage mea i te mea aeni, i taku logo e mauli aku fanau i te mooni.” (3 Soane 4) Pea koutou fakakaukauʼi age muʼa tatatou fiafia ʼi te tokoni ki tatatou fānau totonu ke nātou liliu ko tatatou fānau fakalaumālie! Ko te taupau ʼo te fānau ʼi “te akonaki pea mo te manatu ʼa Sehova” ʼe ko he fakahā ʼaia ʼo te ʼofa ʼa te ʼu mātuʼa. (Efeso 6:4, MN ) ʼE fakahā ai e te ʼu mātuʼa tanatou tuʼania ʼo ʼuhiga mo te maʼuli lelei ʼo heʼegata ʼo tanatou fānau. Ka fakalogo lelei te fānau, pea ʼe maʼu e te ʼu mātuʼa he toe fiafia lahi.
4. Koteā te fakamatala ʼe hā ai te fiafia ʼi te foaki ʼo te ʼu meʼa fakalaumālie?
4 Ko te fafine ko Dell ʼe pionie katoa pea ko ʼana ʼu toe ʼe toko nima. ʼE ina ʼui fēnei: “ ʼE ʼau mahino ki te ʼu palalau ʼa te ʼapositolo ko Soane, koteʼuhi ʼe ʼau loto fakafetaʼi he ko taku ʼu fānau e toko fā ʼe nātou ‘haʼele ʼi te moʼoni.’ ʼE ʼau ʼiloʼi ʼe fakaʼapaʼapaʼi pea mo faka kolōliaʼi ia Sehova mokā logo tahi te ʼu famili ʼi te tauhi moʼoni, koia ʼe ʼau fiafia lahi ʼi taku sio ki te tapuakina ʼo taku ʼu faiga ke ʼau fakahū te moʼoni ki te loto ʼo taku ʼu tamaliki. Ko te ʼamanaki taulekaleka ʼaē ke ʼau maʼuli heʼegata ʼi te Palatiso mo toku kiʼi famili, ʼe fakafonu ai toku loto ʼaki te ʼamanaki pea mo uga ai ʼau ke ʼau kātakiʼi logola te ʼu faigataʼaʼia pea mo te ʼu fihifihia.” Meʼa fakaloto mamahi, he ko te tahi ʼo te ʼu taʼahine ʼa Dell neʼe fakamavae ʼi te kokelekasio he neʼe ina fai te aga heʼeʼaoga. Kae ʼe gāue kinakina pe ia Dell ke ina taupau he manatu ʼe lelei. ʼE ina ʼui fēnei: “ ʼE ʼau fakaʼamu ke toe liliu moʼoni mai ʼi he ʼaho taku taʼahine kia Sehova ʼaki he agavaivai. Kae ʼe ʼau fakamālo ki te ʼAtua ʼo ʼuhiga mo taku tahi fānau ʼaē ʼe nātou tauhi agatonu kia te ia. ʼE moʼoni neʼe ʼau mālohi ʼuhi ko te fiafia ʼaē neʼe ʼau maʼu ai.”—Nehemia 8:10.
Tou Maʼu He ʼu Kaumeʼa ʼe Heʼegata
5. Kapau ʼe tou foaki ia tatou ki te gāue ʼaē ko te fai ʼo he ʼu tisipulo, pea koteā te meʼa ʼe tou ʼiloʼi ʼaē ʼe tou fiafia ai?
5 Neʼe fakatotonu e Sesu ki tana kau tisipulo ke nātou fai he ʼu tisipulo pea mo akoʼi nātou ʼo ʼuhiga mo Sehova pea mo tana ʼu fakamaʼua. (Mateo 28:19, 20) Ko Sehova pea mo Sesu neʼe nā tokoni lahi ki te hahaʼi ke nātou ʼiloʼi te ala ʼo te moʼoni. Koia, kapau ʼe tou foaki ia tatou totonu ki te gāue ʼaē ko te fai ʼo he ʼu tisipulo, pea ʼe tou fiafia ʼi tatatou ʼiloʼi ʼaē ʼe tou faʼifaʼitakiʼi ia Sehova pea mo Sesu, ohage ko te ʼu ʼuluaki Kilisitiano. (1 Kolonito 11:1) Ka tou gāue fakatahi mo te ʼAtua Māʼoluga pea mo tona ʼAlo ʼofaina, pea ʼe tou maʼu ai he ʼuhiga moʼoni ʼi totatou maʼuli. ʼE ko he meʼa fakafiafia tatatou kau ʼi “te u kaugāgaue” ʼa te ʼAtua. (1 Kolonito 3:9) Pea ʼe mole koa la toe fakafiafia mo te kau ʼa te kau ʼaselo ki te faka mafola ʼaia ʼo te logo lelei?—Apokalipesi 14:6, 7.
6. Kapau ʼe tou kau ki te foaki ʼo te ʼu meʼa ʼofa fakalaumālie, pea ko ai ʼaē ka liliu ko hotatou ʼu kaumeʼa?
6 ʼI tona ʼuhiga moʼoni, ka tou kau ki te gāue ʼaia ʼo tou foaki te ʼu meʼa ʼofa fakalaumālie, ʼe mole tou kaugā gāue pe mo te ʼAtua—kae ʼe feala ke tou fakakaumeʼa mo ia ʼo heʼegata. ʼUhi ko tana tui, neʼe fakahigoaʼi ia Apalahamo ko te kaumeʼa ʼo Sehova. (Sakopo 2:23) ʼI tatatou faiga ke tou fai te finegalo ʼo te ʼAtua, ʼe feala ke tou liliu mo tatou ko he ʼu kaumeʼa ʼa te ʼAtua. Kapau ʼe tou fai te faʼahi ʼaia, ʼe tou toe liliu foki ʼo kaumeʼa mo Sesu. Neʼe ina ʼui fēnei ki tana ʼu tisipulo: “E au higoai koutou ko oku kaumea, koteuhi ko meafuape nee au fakalogo mai taku Tamai, nee au fakailoilo kia koutou.” (Soane 15:15) ʼE fiafia te tokolahi mokā ʼui ʼe nātou kaumeʼa mo he ʼu hahaʼi maʼuhiga peʼe ko he ʼu pule lalahi, kae ʼe feala ke tou kau ʼi te ʼu kaumeʼa ʼa te ʼu tagata lalahi tokotahi ʼo te ʼatulaulau!
7. (a) Neʼe maʼu feafeaʼi e te fafine hona kaumeʼa moʼoni? (b) Neʼe kua hoko koa kia koutou te faʼahi ʼaia?
7 Tahi ʼaē meʼa, ka tou tokoni ki te hahaʼi ke nātou ʼiloʼi te ʼAtua, pea ʼe nātou liliu mo nātou ko hotatou ʼu kaumeʼa, ʼo tou maʼu ai he fiafia makehe. Ko Joan, ʼaē ʼe maʼuli ʼi Amelika, neʼe ina kamata fai te ako Tohi-Tapu ʼa te fafine neʼe higoa ko Thelma. Logola te fakafeagai ʼo te famili ʼo Thelma ki tana ako, kae neʼe faʼa kātaki pea neʼe papitema hili te taʼu katoa. Neʼe tohi fēnei e Joan: “Neʼe mole gata ai tamā ʼu felogoi; kailoa, kae neʼe ma liliu ʼo kaumeʼa lelei lolotoga nei taʼu e 35. Neʼe ma tau ʼolo fakatahi ʼi te minisitelio pea mo te ʼu fakatahi. Ki muli age, neʼe ʼau hiki ki te tahi ʼapi ʼe vaha mamaʼo ia kilometa e 800. Kae neʼe haga faitohi mai pe ia Thelma ʼo ina fakahā mai tona ʼofa, mo ina ʼui mai ʼe manatu tuʼumaʼu pe kia ʼau pea mo fakamālo mai ʼi taku liliu ko hona kaumeʼa pea mo he faʼifaʼitaki pea mo taku akoʼi kia ia te moʼoni ʼo te Tohi-Tapu. Ko taku maʼu ʼo hoku kaumeʼa lelei pea mo maʼuhiga ʼaia ʼe ko he fakapale lahi ʼo taku ʼu faiga ʼaē ke ʼau tokoni ki ai ke ina ʼiloʼi ia Sehova.”
8. Koteā te aga ʼaē ʼe lelei ka tokoni mai anai kia tatou ʼi te minisitelio?
8 Ko te ʼamanaki ʼaē ke tou maʼu he tahi ʼe ina fia ako te moʼoni, ʼe lava tokoni mai ke tou faʼa kātaki tatau aipe peʼe tokolahi ia te hahaʼi ʼaē ʼe tou felāveʼi mo nātou ʼe mole nātou fia logo ki te Folafola ʼa Sehova. Ko te mole fia ʼiloʼi ʼaia ʼa te hahaʼi ʼe feala ke ina ʼahiʼahiʼi ai tatatou tui pea mo tatatou faʼa kātaki. Kae ko te taupau ʼo he manatu ʼe lelei ʼe tokoni mai anai kia tatou. Neʼe ʼui fēnei e Fausto, mai Guatemala: “Ka ʼau faka mafola ki te hahaʼi, pea ʼe ʼau ʼui ʼi toku loto, ʼe fakatalakitupua anai mo kapau ʼe liliu ia ia ʼaē ʼe ʼau fai palalau mo ia ko he tēhina peʼe ko he tuagaʼane. ʼE ʼau fakakaukau ʼe lagi ʼau felāveʼi anai mo he tahi pe ʼe feala ki muli age ke ina tali te moʼoni ʼo te Folafola ʼa te ʼAtua. Ko taku manatu feiā ʼe tokoni mai ke hoko atu taku gāue pea mo ʼau maʼu ai te fiafia moʼoni.”
Tou Tānaki He ʼu Koloā ʼi Selo
9. Koteā ʼaē neʼe ʼui e Sesu ʼo ʼuhiga mo te ʼu koloā ʼi selo, pea koteā te ako ʼaē ʼe tou tāʼofi mai ai?
9 ʼE mole faigafua tuʼumaʼu te fai ʼo he ʼu tisipulo, peʼe ko tatatou fānau peʼe ko he tahi hahaʼi. ʼE tonu ke tou foaki totatou temi, ke tou poto ʼi te atalitali pea mo faʼa kātaki. Kae koutou manatuʼi, ko te tokolahi ʼe nātou fia gāue kinakina moʼo tānaki hanatou ʼu tuʼuga koloā fakasino, pea ʼi te agamāhani ʼe mole nātou maʼu ai he fiafia pea ʼe mole heʼegata. Neʼe ʼui e Sesu ki te hahaʼi ʼaē neʼe fakalogo, ʼe lelei age te gāue moʼo maʼu he ʼu koloā fakalaumālie. Neʼe ina ʼui fēnei: “Aua naa koutou tanaki he u koloa maʼa koutou i te kelekele, e maumaui ia e te ane mo te ukaukamea, pea e foa e te tagata kaihaa te kaupa o kaihaʼasia. Kae, koutou tanaki he u koloa maʼa koutou i Selo, i ai, e mole maumaui e te ane mo te ukaukamea, pea i ai e mole foa e te tagata kaihaa te matapa pea e mole ina kaihaʼa ia.” (Mateo 6:19, 20) Kapau ʼe tou faiga ki te ʼu meʼa fakalaumālie—ʼaē ʼe toe kau kiai te gāue maʼuhiga ʼaē ko te fai ʼo he ʼu tisipulo—ʼe feala ke tou maʼu te fiafia ʼi te ʼiloʼi ʼaē ʼe tou fai te finegalo ʼo te ʼAtua pea ʼe ina fakapale anai tatou. Neʼe tohi fēnei e te ʼapositolo ko Paulo: “ ʼE mole heʼe agatonu te ʼAtua ke ina galoʼi takotou gāue pea mo te ʼofa ʼaē neʼe koutou fakahā ʼo ʼuhiga mo tona huafa.”—Hepeleo 6:10, MN.
10. (a) He koʼe neʼe maʼu e Sesu tona ʼu koloā fakalaumālie? (b) Neʼe foaki feafeaʼi e Sesu ia ia totonu, pea koteā te ʼu lelei ʼaē ʼe maʼu ai e te hahaʼi?
10 Kapau ʼe tou gāue mālohi moʼo fai he ʼu tisipulo, pea ʼe tou tānaki ai maʼa tatou “he u koloa . . . i Selo,” ohage ko tona ʼui e Sesu. ʼE tou maʼu ai te fiafia ʼi te foaki. Kapau ʼe lahi tatatou foaki, pea ʼe lahi ai mo totatou ʼu koloā. Neʼe tauhi agatonu ia Sesu kia Sehova ʼi te ʼu lauʼi taʼu. Koutou fakakaukauʼi age muʼa te ʼu koloā ʼaē neʼe ina tānaki ʼi selo! Kae neʼe mole manatu pe Sesu kia ia totonu. Neʼe tohi fēnei e te ʼapositolo ko Paulo: “[Ko Sesu] nee ina tukuʼage iaʼia o uhiga mo atatou agahala, koteuhi ke ina taʼaki mai tatou mai te malama kovi aeni o fai ki te finegalo o totatou Atua mo tatatou Tamai.” (Kalate 1:4) Neʼe foaki lahi e Sesu ia ia totonu ʼi tona minisitelio pea neʼe ina toe foaki mo tona maʼuli ko he totogi ke feala ai ki te hahaʼi ke nātou maʼu te fealagia ke nātou tānaki he ʼu koloā ʼi selo.
11. He koʼe ʼe maʼuhiga age te ʼu meʼa ʼofa fakalaumālie ʼi te ʼu meʼa ʼofa faka koloā?
11 Ka tou akoʼi ki te hahaʼi ʼo ʼuhiga mo te ʼAtua, pea ʼe tou tokoni kia nātou ke vakaʼi mo nātou peʼe lava feafeaʼi hanatou tānaki he ʼu koloā fakalaumālie ʼe mole popo. Koteā te meʼa ʼofa lahi ʼaē ʼe koutou lava foaki? Kapau ʼe koutou foaki ki hokotou kaumeʼa hana televisio neʼe totogi kovi, he motokā, peʼe ko he ʼapi, pea ʼe fakafetaʼi anai tokotou kaumeʼa ʼaia pea mo fiafia, pea ʼe fiafia anai mo koutou ʼi te foaki. Kae ʼe feafeaʼi anai te meʼa ʼofa ʼaia hili kiai taʼu e 20? Peʼe taʼu e 200? Peʼe hili taʼu e 2 000? ʼI te tahi age faʼahi, kapau ʼe koutou foaki ia koutou totonu moʼo tokoni ki he tahi ke tauhi kia Sehova, pea feala ke ʼaoga te meʼa ʼofa ʼaia kia ia ʼo heʼegata.
Tou Kumi Nātou ʼAē ʼe Nātou Loto Ki Te Moʼoni
12. Neʼe foaki feafeaʼi e ʼihi ia nātou moʼo tokoni ki te hahaʼi ʼi te faʼahi fakalaumālie?
12 Moʼo vaevae te fiafia ʼi te foaki ʼo te ʼu meʼa ʼofa fakalaumālie, ʼe ʼolo te hahaʼi ʼa Sehova ki te potu taupotu ʼo te kele. Ko te toko lauʼi afe neʼe nātou mavae ʼi tonatou loto fale pea mo tonatou famili, ʼo nātou misionea ʼi te ʼu fenua ʼaē neʼe tonu ke nātou ako ai he ʼu lea foʼou pea mo he ʼu agaʼi fenua foʼou. Ko ʼihi neʼe ʼolo ki te ʼu koga meʼa ʼi tonatou fenua ʼaē ʼe ʼaoga lahi ai he kau fai faka mafola ʼo te Puleʼaga. Pea ko ʼihi neʼe nātou ako he tahi ʼu lea, ke feala ai ke nātou faka mafola ʼi tonatou kolo ki te hahaʼi ʼaē ʼe ʼōmai mai te tahi fenua. Ohage la, ʼi tanā ʼosi taupau tanā ʼu toe e tokolua ʼaē kua gāue nei ʼi te ʼu nofoʼaga faka malamanei ʼa te kau Fakamoʼoni ʼa Sehova, ko te taumatuʼa ʼi New Jersey, Amelika, neʼe nā kamata pionie pea mo ako te lea faka Siaina. Hili taʼu e tolu, neʼe nā fai te ʼu ako Tohi-Tapu e 74 ʼo te ʼu hahaʼi ʼe lea faka Siaina ʼaē neʼe ako ʼi te kolesi neʼe tuʼu ōvi age. ʼE feala koa ke koutou fai he ʼu fakatuʼutuʼu ke lahi age tokotou minisitelio, ke lahi age tokotou fiafia ʼi te fai ʼo he ʼu tisipulo?
13. Koteā ʼaē ʼe feala ke koutou fai, mo kapau ʼe koutou loto ke lahi age te fua ʼo tokotou minisitelio?
13 Lagi koutou fia fai he ako Tohi-Tapu kae mole heʼeki koutou maʼu he tahi ʼe fia ako. ʼI ʼihi fenua, ʼe faigataʼa te maʼu ʼo he ʼu hahaʼi ʼe nātou fia logo. Lagi koutou felāveʼi mo he ʼu hahaʼi ʼe mole nātou fia ʼiloʼi te Tohi-Tapu. Kapau koia, pea ʼe lagi feala ke koutou palalau tuʼa lahi ki te faʼahi ʼaia ʼi takotou ʼu faikole, ʼi takotou ʼiloʼi ʼaē ʼe tokaga lelei ia Sehova pea mo Sesu Kilisito ki te gāue pea ʼe feala ke nā taki koutou ki he tahi ʼe hage he ōvi. Koutou kole tokoni ʼi tokotou kokelekasio kia nātou ʼaē kua māhani peʼe fua lelei tonatou minisitelio. Koutou fakaʼaogaʼi te ako pea mo te ʼu tokoni ʼaē ʼe foaki mai ʼi te ʼu fono. Koutou tokagaʼi mo te ʼu tokoni ʼa te ʼu tagata taupau feʼoloʼaki pea mo tonatou ʼu ʼohoana. Kae tāfito, ʼaua naʼa koutou līaki te gāue ʼaia. Neʼe tohi fēnei e te tagata poto: “ ʼI te uhu to tau pulapula pea ʼo aʼu ki te afiafi ʼaua naʼa ke fakamālōlō tou nima, heʼe mole ke ʼiloʼi pe kofea te potu ʼaē ka fua ai anai.” (Tagata Tānaki 11:6) Pea koutou toe manatuʼi mo te ʼu tagata agatonu ohage ko Noe pea mo Selemia. Logola neʼe tokosiʼi ia nātou ʼaē neʼe tali ki tanā fai faka mafola, kae neʼe ʼi ai te fua ʼo tonā ʼu minisitelio. Kae ko te meʼa ʼaē neʼe maʼuhiga neʼe fakafiafia ai te loto ʼo Sehova.
Tou Fai Te Meʼa ʼAē ʼe Tou Lavaʼi
14. ʼE feafeaʼi kia Sehova ia nātou ʼaē neʼe nātou tauhi kia te ia ʼo aʼu ki tonatou temi matuʼa?
14 Lagi ʼuhi ko tokotou ʼaluʼaga ʼi te temi nei, ʼe mole feala ai ke lahi age te ʼu meʼa ʼe koutou fai ʼi te minisitelio ohage ko te meʼa ʼaē ʼe koutou loto kiai. Ohage la, ʼi takotou kua matuʼa ʼe tuʼakoi ai te ʼu meʼa ʼe feala ke koutou fai ʼi te tauhi kia Sehova. Kae koutou manatuʼi te meʼa ʼaenī neʼe tohi e te tagata poto: “Ko te ʼu ʼulu hina ʼe ko he kolona matalelei mokā ʼe maʼu nātou ʼi te ala ʼo te faitotonu.” (Tāʼaga Lea 16:31) Kia Sehova, ko te tauhi ʼa he tahi kia te ia ʼi tona maʼuli katoa, ʼe ko he meʼa ʼe fiafia ai tona loto. Pea ʼe toe ʼui fēnei e te Tohi-Tapu: “ ʼO aʼu ki tokotou temi matuʼa [ko Sehova] ʼe . . . Tatau aipe; pea ʼo aʼu ki tokotou ʼulu hina, ko ʼau, ʼe ʼau lagolago aipe kia koutou. ʼE mahino papau ia, ko ʼau, ʼe ʼau fai anai ke ʼau fua pea ke ʼau lagolago pea mo ʼau fakamaʼuli.” (Isaia 46:4) Ko tatatou Tāmai ʼofa ʼi selo ʼe ina fakapapau ʼe lagolago pea mo tokoni ki tana hahaʼi agatonu.
15. ʼE koutou tui koa ʼe mahino Sehova ki tokotou ʼu ʼaluʼaga? Koteā tona tupuʼaga?
15 Lagi koutou tau mo he mahaki, peʼe ko te fakafeagai ʼo tokotou hoa ʼaē ʼe mole ʼi te moʼoni, peʼe lahi tokotou ʼu maʼua faka famili peʼe ko ʼihi atu ʼu faigataʼaʼia. ʼE ʼiloʼi e Sehova totatou ʼu tuʼakoi pea mo totatou ʼu ʼaluʼaga, pea ʼe ʼofa kia tatou ʼuhi ko tatatou faiga mālohi ʼaē ke tou tauhi kia te ia. ʼE moʼoni te faʼahi ʼaia tatau aipe peʼe veliveli age te meʼa ʼaē ʼe tou lavaʼi ʼi te ʼu meʼa ʼaē ʼe fai ʼe ʼihi. (Kalate 6:4) ʼE ʼiloʼi e Sehova ʼe tou agahala, pea ʼe fakapotopoto ʼo ʼuhiga mo te ʼu meʼa ʼaē ʼe ina fakamaʼua mai kia tatou. (Pesalemo 147:11) Kapau ʼe tou fai te meʼa ʼaē ʼe tou lavaʼi, pea ʼe feala ke tou tui papau ʼe tou maʼuhiga kia mata ʼo te ʼAtua pea ʼe mole galo anai kia te ia tatatou ʼu gāue ʼi te tui.—Luka 21:1-4.
16. ʼE feafeaʼi te kau ʼa te kokelekasio katoa ki te fai ʼo he tisipulo?
16 Pea koutou toe manatuʼi ʼe tou kau fuli ki te fai ʼo he tisipulo. ʼE mole ko he tokotahi pe ʼaē ʼe ina fai he tisipulo, ohage pe ʼe mole ko he mosiʼi ʼua pe e tahi ʼaē ka ina fakamaʼuli he fuʼu ʼakau. ʼE moʼoni ʼe feala ke felāveʼi he Fakamoʼoni mo he tahi ʼe fia logo pea mo ina fai ai te ako Tohi-Tapu. Kae ʼi te temi ʼaē ʼe haʼu ai te ako foʼou ʼaia ki te fono, pea ʼe ko te kokelekasio katoa ʼaē ka tokoni kia ia ke ina ʼiloʼi ʼe ko te moʼoni ʼaia. Ko te ʼofa fakatautehina ʼe ina fakahā te gāue ʼa te laumālie ʼo te ʼAtua. (1 Kolonito 14:24, 25) Ko te fānau pea mo te kau tūpulaga ʼe nātou fai he ʼu tali fakaloto mālohi, ʼo fakahā ai kia ia ʼaē ʼe foʼou ko totatou kau tūpulaga ʼe nātou kehekehe mo te kau tūpulaga ʼo te mālama. Ko nātou ʼaē ʼe mahahaki, nātou ʼaē kua māʼimoa pea mo nātou ʼe matutuʼa ʼi te kokelekasio ʼe nātou akoʼi ki te hahaʼi foʼou te faka ʼuhiga ʼo te faʼa kātaki. Tatau aipe peʼe tou taʼu fia pea mo te ʼu meʼa ʼaē ʼe tou lavaʼi, kae ʼe tou kau fuli ki te tokoni ʼaē ki te hahaʼi foʼou ke loloto tonatou ʼofa ki te moʼoni ʼo te Tohi-Tapu pea ke nātou tuputupu ki te papitema. Ko te ʼu hola ʼaē ʼe tou fai ʼi te minisitelio, ʼi te ʼu ʼaʼahi, ʼi te fai palalau ʼi te Fale fono mo nātou foʼou, ʼe lagi mole faʼa maʼuhiga, kae ʼe kau ia ki te gāue mālohi ʼaē ʼe fakahoko e Sehova.
17, 18. (a) ʼO hilifaki ki tatatou kau ki te gāue ʼaē ko te fai ʼo he ʼu tisipulo, koteā te tahi ʼu faʼahi ʼe feala ke tou maʼu ai te fiafia ʼi te foaki? (b) ʼI tatatou maʼu te fiafia ʼi te foaki, ko ai ʼaē ʼe tou faʼifaʼitakiʼi?
17 ʼE mahino ia, ʼe tou fiafia ʼi te kau ki te gāue maʼuhiga ʼaē ko te fai ʼo he ʼu tisipulo kae, ʼi totatou ʼuhiga kau Kilisitiano, ʼe tou toe fiafia ʼi te foaki ʼi te tahi faʼahi. ʼE feala ke tou tāʼofi he falā moʼo lagolago ki te tauhi maʼa pea mo tokoni kia nātou ʼaē ʼi te faigataʼaʼia. (Luka 16:9; 1 Kolonito 16:1, 2) ʼE feala ke tou kumi he ʼu faigamālie ke tou fakahā ai te tali kāiga ki ʼihi. (Loma 12:13) ʼE feala ke tou faiga ke tou “fai te meʼa ʼaē ʼe lelei ki te hahaʼi fuli pe, kae tāfito foki kia nātou ʼaē ko ʼotatou ʼu kāiga ʼi te tui.” (Kalate 6:10, MN ) Pea ʼe ʼi ai te tahi meʼa ʼe faigafua tona fai kae ʼe toe maʼuhiga, ʼe feala ke tou foaki ki te hahaʼi—ʼaki hatatou faitohi, peʼe fai telefoni, peʼe tou foaki he meʼa ʼofa, peʼe tou tokoni kia nātou, peʼe ko he palalau fakaloto mālohi.
18 Kapau ʼe tou foaki pea ʼe tou fakahā ai ʼe tou faʼifaʼitakiʼi tatatou Tāmai ʼaē ʼi selo. ʼE tou toe fakahā mo totatou ʼofa fakatautehina, ʼaē ʼe ko te fakaʼiloga ʼo te kau Kilisitiano moʼoni. (Soane 13:35) Ko tatatou manatuʼi te ʼu meʼa ʼaia ʼe tokoni mai kia tatou ke tou maʼu te fiafia ʼi te foaki.
ʼE Feala Koa Hakotou Fakamahino?
• Neʼe koteā te faʼifaʼitaki ʼaē neʼe tuku e Sehova pea mo Sesu ʼo ʼuhiga mo te foaki ʼo te ʼu meʼa ʼofa fakalaumālie?
• ʼE tou lava maʼu feafeaʼi he ʼu fakakaumeʼa ʼe heʼegata?
• Koteā te ʼu meʼa ʼe feala ke tou fai ke fua lelei totatou minisitelio?
• ʼE lava feafeaʼi ki te kokelekasio katoa ke fiafia ʼi te foaki?
[Paki ʼo te pasina 13]
Ka tali e te fānau te ʼu meʼa ʼaē ʼe akoʼi age kia nātou, pea ʼe fiafia lahi ai te ʼu mātuʼa
[Paki ʼo te pasina 15]
ʼI tatatou fai he ʼu tisipulo, ʼe feala ke tou maʼu he ʼu kaumeʼa moʼoni
[Paki ʼo te pasina 16]
ʼE lagolago Sehova kia tatou ʼi totatou temi matuʼa
[Paki ʼo te pasina 17]
Ko he ʼu meʼa faigafua ʼe feala ke tou fai ke tou maʼu ai te fiafia ʼi te foaki, kae ʼe ko he ʼu meʼa maʼuhiga