Ke Mālolohi ʼOkotou Nima
“Ke mālolohi tokotou ʼu nima, ia koutou ʼaē ʼe koutou fagono ʼi te ʼu ʼaho ʼaenī ki te ʼu folafola ʼaia ʼe haʼu mai te gutu ʼo te kau polofeta.”—Sakalia 8:9.
1, 2. He koʼe ʼe tonu ke tou tokagaʼi te ʼu tohi ʼo Asea pea mo Sakalia?
KO TE ʼu lea faka polofeta ʼo Asea pea mo Sakalia neʼe tohi kua hili kiai taʼu e 2 500, kae ʼe kei ʼaoga moʼoni ki tokotou maʼuli. Ko te ʼu tohi ʼaia e lua ʼe mole ko he ʼu hisitolia pe ia. ʼE ko he ʼu fakamatala ʼe kau ki te ʼu “meʼa fuli ʼaē neʼe tohi ʼi te temi muʼa, . . . moʼo akoʼi ʼo tatou.” (Loma 15:4, MN ) ʼE lahi te ʼu ʼaluʼaga ʼi te ʼu tohi ʼaia e lua, ʼe ina uga tatou ke tou fakakaukauʼi te ʼu meʼa ʼaē neʼe hoko talu mai te fakatuʼu ʼo te Puleʼaga ʼi selo ʼi te taʼu 1914.
2 ʼO ʼuhiga mo te ʼu ʼaluʼaga ʼaē neʼe hoko ki te hahaʼi ʼa te ʼAtua ʼi te temi muʼa, neʼe ʼui fēnei e te ʼapositolo ko Paulo: “Nee hoko ia mea aeni kia natou alâ, ko te fakatokaga mai, pea nee tohi ko totatou akoi, ia tatou aeni kua kaku ki te fakaosi o te temi.” (1 Kolonito 10:11) Koia ʼe lagi koutou feʼekeʼaki fēnei: ‘He koʼe ʼe maʼuhiga te ʼu tohi ʼa Asea pea mo Sakalia ki totatou temi?’
3. Koteā ʼaē neʼe talanoa tāfito kiai ia Asea pea mo Sakalia?
3 Ohage ko tona fakahā ʼi te ʼuluaki alatike, ko te ʼu lea faka polofeta ʼo Asea pea mo Sakalia, neʼe faka ʼuhiga ki te temi ʼaē neʼe toe liliu ai te kau Sutea ki te fenua ʼaē neʼe foaki age e te ʼAtua, ʼi tanatou ʼosi ʼāteaina mai tanatou ʼaunofo ʼi Papiloni. Neʼe talanoa tāfito te ʼu polofeta ʼaia e lua ki te toe laga ʼo te fale lotu. Neʼe fakatuʼu e te kau Sutea ia te tāfitoʼaga ʼo te fale lotu ʼi te taʼu 536 ʼi muʼa ʼo totatou temi. Logola ko ʼihi hahaʼi mātutuʼa neʼe kei nātou manatuʼi te ʼuluaki fale lotu, kae ko te tokolahi neʼe nātou “kalaga fakafiafia.” Kae ʼi tona ʼuhiga moʼoni, ʼe hoko ʼi te temi ʼaenī he faʼahi ʼe maʼuhiga age. Koteā ia te faʼahi ʼaia?—Esitalasi 3:3-13.
4. Koteā ʼaē neʼe hoko ʼi te ʼosi pe ʼo te ʼUluaki Tau Faka Malamanei?
4 Hili pe te ʼUluaki Tau Faka Malamanei, neʼe faka ʼāteainaʼi te kau fakanofo ʼa Sehova mai tanatou ʼaunofo ʼi Papiloni Lahi. Neʼe ko fakaʼiloga lahi ʼaia ʼo te tokoni ʼa Sehova kiā nātou. ʼI te kamata mai, neʼe hage ʼe fakagata anai e te kau takitaki lotu pea mo te ʼu tagata fai politike, ia te gāue fai faka mafola pea mo te fai ʼo te ʼu ako Tohi-Tapu. (Esitalasi 4:8, 13, 21-24) Kae neʼe toʼo kehe e Sehova ia te ʼu faigataʼaʼia ʼaē neʼe feala ke nātou tāʼofi ia te gāue fai faka mafola pea mo te gāue faiako. Talu mai te taʼu 1919, neʼe haʼele ki muʼa te gāue ʼo te Puleʼaga pea neʼe mole feala ke tāʼofi tana tuputupu.
5, 6. Koteā te fetogi lahi ʼaē ʼe talanoa kiai ia Sakalia 4:7?
5 Tou tui papau ko Sehova ʼe haga tokoni pe anai ki te fai faka mafola pea mo te gāue faiako Tohi-Tapu ʼaē ʼe fai e te ʼu kaugana fakalogo ʼa Sehova ʼi totatou temi. Iā Sakalia 4:7, ʼe tou lau fēnei: “ ʼE ina faka mahuʼi anai te foʼi maka tāfito. ʼE fai anai te ʼu kalaga fēnei ʼo ʼuhiga mo ia: ‘ ʼI taulekaleka leva! ʼI taulekaleka leva!’ ” Neʼe hoko feafeaʼi te vaega ʼaia ʼi totatou temi?
6 ʼE talanoa ia Sakalia 4:7 ki te temi ʼaē ka kātoa ai te fakahoko ʼo te tauhi moʼoni ʼo te Tuʼi ʼAliki ʼi te ʼu malaʼe ʼo tona fale lotu fakalaumālie, ʼaē ʼe faka ʼuhiga ki te kele. Ko te fale lotu ʼaia ʼe ko te fakatuʼutuʼu ʼaē neʼe fai e Sehova ke feala hatatou fakaōvi kiā te ia ʼi te tauhi, ʼo fakatafito ki te sākilifisio faifakalelei ʼo Kilisito Sesu. ʼE moʼoni, kua fakatuʼu te fale lotu lahi fakalaumālie talu mai te ʼuluaki sēkulō ʼo totatou temi. Kae ʼe mole heʼeki kātoa te fakahoko ʼo te tauhi moʼoni ʼi te kele. Ko te ʼu lauʼi miliona kau atolasio ʼe nātou tauhi ʼi te temi nei ʼi te kele, ʼaē ʼe ina fakatātā ia te ʼu malaʼe ʼo te fale lotu fakalaumālie. Ko nātou ʼaia pea mo te hahaʼi tokolahi ʼaē ka fakatuʼuake, ʼe nātou maʼu anai ia te maʼuli haohaoa lolotoga te ʼAfio ʼa Sesu Kilisito Ia Taʼu e Afe. ʼI te fakaʼosi ʼo te ʼu taʼu e afe, ko te hahaʼi pe anai ʼaē ka māʼuʼuli ʼi te kele ʼaē kua fakamaʼa, ʼe ko te kau atolasio moʼoni ʼa te ʼAtua.
7. Koteā te gāue maʼuhiga ʼaē ka fai e Sesu ke feala ki te tauhi moʼoni ke hokohoko lelei ʼi totatou temi, pea he koʼe ʼe tonu ke tupu ai hotatou loto mālohi?
7 Ko te Kovana ko Solopapele pea mo te Pelepitelo Lahi ko Sesua, neʼe nā sio mata ki te ʼosi laga ʼo te fale lotu ʼi te taʼu 515 ʼi muʼa ʼo totatou temi. Neʼe fakakikite ia Sakalia 6:12, 13 ʼe tatau anai te gāue ʼaē ka fai e Sesu ke hokohoko lelei ia te tauhi moʼoni. ʼE tou lau fēnei: “Koʼeni te folafola ʼa Sehova ʼo te ʼatu kautau: ‘Koʼeni te tagata ʼaē ko tona higoa ko Muko. Pea mai te potu totonu ʼaē ka homo ake ai, ei, ʼe ina laga anai te fale lotu ʼa Sehova. . . . Pea ʼe ina maʼu anai ia te ʼalikisia; pea ʼe heka anai ʼo ʼafio ʼi tona hekaʼaga hau, pea ʼe tonu anai ke liliu ko he pelepitelo ʼi tona hekaʼaga hau.’ ” Ko Sesu, mai lagi ʼaē ʼe ina fakatuputupu ia te hōloga hau ʼo Tavite, ʼe lagolago ki te gāue ʼa te Puleʼaga ʼaē ʼe fai ʼi te fale lotu fakalaumālie. Koia, ʼe koutou manatu koa ʼe feala ki he tahi ke ina tāʼofi te tuputupu ʼa te gāue ʼaia? Kailoa ia! ʼE mole koa la ko he fakaloto mālohi ʼaia kiā tatou ke tou fakahoko totatou minisitelio, ʼo mole tou tuku ki te ʼu fihifihia ʼo te ʼaho fuli ke nātou fakahēʼi tatou?
Te ʼu Faʼahi ʼAē ʼe Tonu Ke Tou Fakamuʼamuʼa
8. He koʼe ʼe tonu ke takimuʼa kiā tatou ia te gāue ʼaē ʼe fai ʼi te fale lotu fakalaumālie?
8 Ke feala kiā Sehova ke tokoni pea mo ina tapuakinaʼi tatou, ʼe tonu ke takimuʼa tuʼumaʼu kiā tatou ia te gāue ʼaē ʼe tou fai ʼi te fale lotu fakalaumālie. ʼAua naʼa tou hage ko te kau Sutea ʼaē neʼe nātou ʼui fēnei, “ ʼE mole heʼeki hoko mai te temi,” kae ʼe tonu ke tou manatuʼi ʼe tou māʼuʼuli nei ʼi “te u aho fakamuli.” (Asea 1:2; 2 Timoteo 3:1) Neʼe fakakikite e Sesu ʼe faka mafola anai e tana ʼu tisipulo agatonu ia te logo lelei ʼo te Puleʼaga pea mo nātou fai he ʼu tisipulo. ʼAua naʼa tou fakaʼauʼauganoa ʼo ʼuhiga mo te gāue maʼuhiga ʼaia. ʼE mole heʼeki kātoa ia te gāue fai faka mafola pea mo te gāue faiako Tohi-Tapu ʼaē neʼe fakagata faka temi e te kau fakafeagai ʼo te mālama ʼa Satana, pea neʼe toe hoko atu ʼi te taʼu 1919. Kae ʼe feala takotou tui papau ʼe hoko kātoa anai!
9, 10. Koteā ʼaē ʼe tonu ke fai e he tahi ke tapuakina ia ia e Sehova, pea koteā tona faka ʼuhiga kiā tatou?
9 Kapau ʼe tou haga fai fakalelei ia te gāue, pea ʼe tapuakina anai tatou takitokotahi pea mo te hahaʼi kātoa ʼa te ʼAtua. ʼE tou lava falala ki te fakapapau ʼaenī ʼa Sehova. ʼI te toe liliu ʼa te kau Sutea ʼaki tonatou loto kātoa ʼo tauhi kiā Sehova pea mo fakaʼosi fakalelei te laga ʼo te tāfitoʼaga ʼo te fale lotu, neʼe ʼui fēnei e Sehova: “ ʼO kamata atu ʼi te ʼaho ʼaenī ʼe au tapuakiʼi anai.” (Asea 2:19) Neʼe ina fakapapau age ʼe ina tapuakina kātoa nātou. Tou vakaʼi ʼi te temi nei ia te ʼu tapuakina mai te fakapapau ʼaē neʼe fai e te ʼAtua: “[ʼE] ʼi ai anai te pulapula ʼo te tokalelei; ʼe fua anai te fuʼu vite, pea ʼe homo anai te magisi ʼo te kele, pea ʼe foaki anai e te lagi tona hahau; pea ko nātou ʼaē ka toe anai ʼi te hahaʼi ʼaia, ʼe au foaki faka tofiʼa anai ia te ʼu meʼa fuli ʼaia kiā nātou.”—Sakalia 8:9-13.
10 Ohage pe ko te tapuakina e Sehova te kau Sutea ʼaia ʼi te faʼahi fakalaumālie pea mo te faʼahi fakasino, ʼe ina toe tapuakina anai mo tatou, mo kapau ʼe tou faʼafai pea mo fai ʼaki he loto fiafia ia te gāue ʼaē neʼe ina tuku mai. ʼE kau ki te ʼu tapuakina ʼaia tatatou māʼuʼuli ʼi te tokalelei, mo te fīmālie, pea mo tou mahu ʼi te faʼahi fakalaumālie. Kae ʼe mahino ia ʼe haga tapuakina anai tatou e te ʼAtua mo kapau ʼe tou fakahoko te gāue ʼi tona fale lotu fakalaumālie ʼo mulimuli ki tona finegalo.
11. Koteā te vakavakaʼi ʼaē ʼe tonu ke tou fai ʼo ʼuhiga mo tatou?
11 ʼI te temi ʼaenī ʼe tonu ai ke tou ‘vakavakaʼi lelei te ʼu fakatuʼutuʼu ʼi totatou loto.’ (Asea 1:5, 7) ʼE tonu ke tou toʼo hotatou temi moʼo vakavakaʼi te ʼu faʼahi ʼaē ʼe tou fakamuʼamuʼa ʼi totatou maʼuli. ʼE tapuakina tatou e Sehova iā ʼaho nei, mo kapau ʼe tou lagolago mālohi ki te faka kolōliaʼi ʼo tona huafa pea mo haga haʼele ki muʼa ʼi te gāue ʼaē ʼe fai ʼi tona fale lotu fakalaumālie. Koutou fai kiā koutou ia te ʼu fehuʼi ʼaenī: ‘Kua fetogi koa te ʼu faʼahi ʼaē kua au fakamuʼamuʼa? Kua feafeaʼi ʼi te temi nei taku faʼafai ʼaē maʼa Sehova, mo te moʼoni, pea mo tana gāue, mo kapau ʼe au fakatatau mo taku faʼafai ʼi te temi ʼaē neʼe au papitema ai? Ko taku fia maʼuli fīmālie ʼe fua kovi koa ki taku faka maʼuhigaʼi ia Sehova pea mo tona Puleʼaga? Ko te mataku ki te tagata—te tuʼania ʼaē peʼe koteā anai te manatu ʼa ʼihi—ʼe ina tāʼofi koa taku fia faka kolōliaʼi ʼo tona huafa pea mo te fai ʼo te gāue ʼi tona fale lotu fakalaumālie?’—Apokalipesi 2:2-4.
12. Ohage ko tona tuʼu iā Asea 1:6, 9, neʼe feafeaʼi te ʼaluʼaga ʼo te kau Sutea?
12 ʼE mole tou loto ke tāʼofi e te ʼAtua tana tapuakinaʼi ʼo tatou, ʼuhi heʼe tou fakaʼauʼauganoa ki te gāue ʼaē ko te tāpuhā ʼo tona huafa. Tou manatuʼi, ʼe ʼui iā Asea 1:9, ʼi te kamata neʼe gāue mālohi te kau Sutea ʼaē neʼe toe liliu ki Selusalemi, kae ki muli age neʼe nātou ‘tahi maʼumaʼua ki tona ʼapi.’ Neʼe tōkakaga pe nātou ki te ʼu meʼa ʼaē neʼe ʼaoga kiā nātou pea mo tonatou maʼuli. Koia ʼaē neʼe “veliveli ai te taʼukai,” neʼe hoge te meʼa kai, mo te meʼa ʼinu pea neʼe mole feʼauga te ʼu mutuʼi meʼa māfana. (Asea 1:6) Neʼe mole kei tapuakinaʼi nātou e Sehova. Koteā te ako ʼe tou lava tāʼofi ai?
13, 14. ʼI hona ʼaluʼaga ʼe tāu mo feʼauga, ʼe tou lava maʼuliʼi feafeaʼi te ako ʼaē ʼe tou maʼu mai iā Asea 1:6, 9, pea he koʼe ʼe maʼuhiga te ako ʼaia?
13 Kapau ʼe koutou loto ke tapuakinaʼi tuʼumaʼu koutou e te ʼAtua, ʼaua naʼa koutou kumi pe te ʼu meʼa ʼaē ʼe lelei kiā koutou, ʼo koutou fakaʼauʼauganoa ki te tauhi ʼaē kiā Sehova. ʼE tonu ke tou tekeʼi te ʼu fakahala ohage ko te fia maʼu koloā, te fia maʼu vave ʼo hata paʼaga, peʼe ko te fai ʼo he ʼu fakatuʼutuʼu moʼo hoko atu takotou ako faka Tohi-Tapu ke koutou maʼu he gāue lelei ʼi te tuʼu ʼaenī, peʼe ko takotou loto ʼaē ke koutou gāue maʼa koutou totonu.
14 ʼE moʼoni ʼe mole kovi ia te ʼu meʼa ʼaia. Kae kapau ʼe koutou fakatatau mo te maʼuli heʼegata, ko te ʼu meʼa ʼaia ʼe feala hatatou ʼui ʼe ko he “u gaue mate.” (Hepeleo 9:14) He koʼe ʼe tou ʼui ʼe ko he ʼu gāue mate? Heʼe ʼi tona ʼaluʼaga fakalaumālie, ʼe ko he ʼu gāue ʼe mole honatou ʼaoga, ʼe nātou vaʼiganoa, pea ʼe mole honatou fua lelei kiā tatou. Kapau ʼe haga fakamuʼamuʼa e he tahi ia te ʼu meʼa ʼaia, pea ko te ʼu gāue ʼaia ʼe nātou taki anai ia ia ki tona mate fakalaumālie. Neʼe hoko te faʼahi ʼaia ki ʼihi kau Kilisitiano fakanofo ʼi te temi ʼo te kau ʼapositolo. (Filipe 3:17-19) Neʼe toe hoko te faʼahi ʼaia ki ʼihi ʼi totatou temi. ʼE lagi koutou ʼiloʼi ʼihi, māmālie pe neʼe nātou higa mai te ʼu gāue faka Kilisitiano pea mo te kokelekasio; ʼi te temi nei ʼe mole kei nātou fia liliu mai ʼo tauhi kiā Sehova. ʼE moʼoni, ʼe tou fakaʼamu ke nātou toe liliu mai kiā Sehova, kae kapau ʼe nātou haga faiga ki te ʼu “gaue mate” ʼe iku anai ki te mole kei ʼofa ʼa Sehova kiā nātou pea ʼe mole toe tapuakina anai nātou. ʼE koutou sio ki te ʼu ʼaluʼaga fakaʼofaʼofa ʼaē ʼe hoko, ʼe mole kei nātou maʼu te fiafia pea mo te tokalelei ʼaē ʼe ko te fua ʼo te laumālie ʼa te ʼAtua. Pea koutou fakakaukauʼi age muʼa te puli lahi ʼaē ka hoko kiā nātou ʼi tanatou mole kei fakatahi mo te ʼu tēhina mo tuagaʼane Kilisitiano!—Kalate 1:6; 5:7, 13, 22-24.
15. ʼE hā feafeaʼi iā Asea 2:14 te maʼuhiga ʼo tatatou tauhi?
15 ʼAua naʼa tou meʼa noaʼi ia te faʼahi ʼaia. Tou tokagaʼi ia Asea 2:14 pe neʼe koteā te manatu ʼa Sehova ʼo ʼuhiga mo te kau Sutea ʼaē neʼe nātou līaki tona fale lotu, kae nātou tōkakaga pe nātou ki te faka mataleleiʼi ʼo tonatou ʼu ʼapi. ʼE ʼui fēnei ʼi te vaega ʼaia: “ ‘ ʼE feiā te hahaʼi ʼaenī, pea ʼe feiā te puleʼaga ʼaenī ʼi ʼoku muʼa,’ ʼe ko te tala ʼaia ʼa Sehova, ‘pea ko te gāue kātoa ʼaia ʼo tonatou ʼu nima, pea mo te meʼa ʼaē ʼe nātou momoli ʼi ai. ʼE heʼemaʼa.’ ” Ko te ʼu sākilifisio ʼaē neʼe momoli e te kau Sutea ʼaki he loto ʼe vaelua, ʼi te ʼaletale faka temi ʼi Selusalemi, neʼe mole tali ia e Sehova he neʼe mole kei nātou tōkakaga ki te tauhi moʼoni.—Esitalasi 3:3.
ʼE Fakamoʼoni Mai e Sehova ʼe Tokoni Anai Kiā Tatou
16. ʼO fakatafito ki te ʼu ʼaluʼaga ʼaē neʼe hā kiā Sakalia, koteā ʼaē neʼe ʼiloʼi papau e te kau Sutea?
16 Ko te kau Sutea fakalogo ʼaē neʼe nātou gāue moʼo toe laga te fale lotu ʼa te ʼAtua, neʼe nātou ʼiloʼi ʼe lagolago moʼoni anai te ʼAtua kiā nātou, ohage ko tona fakahā e te ʼAtua ʼi te ʼu ʼaluʼaga e valu ʼaē neʼe hā kiā Sakalia. ʼI te ʼuluaki ʼaluʼaga ʼaē neʼe hā kiā Sakalia, neʼe fakamoʼoni ai ʼe fakaʼosi anai te laga ʼo te fale lotu pea ʼe maʼuli lelei anai ia Selusalemi pea mo Suta, mo kapau ʼe haga hoko atu e te kau Sutea te fai ʼo te gāue. (Sakalia 1:8-17) ʼI te lua ʼaluʼaga ʼaē neʼe hā, neʼe fakapapau ai e Sehova ʼe ina fakaʼauha anai ia te ʼu puleʼaga fuli ʼaē neʼe fakafeagai ki te tauhi moʼoni. (Sakalia 1:18-21) Ko te tahi ʼu ʼaluʼaga ʼaē neʼe hā kiā Sakalia, neʼe fakapapau ai ko te ʼAtua ʼe ina puipui anai ia te gāue, ko te hahaʼi mai te ʼu puleʼaga kehekehe ʼe nātou ʼōmai anai ki te fale tauhi ʼa Sehova ʼaē kua ʼosi, ʼe maʼu anai te tokalelei pea mo te fīmālie moʼoni, ʼe fakagata anai ia te ʼu fakafeagai ʼaē ʼe fai ki te gāue ʼa te ʼAtua, ʼe pulihi anai ia te agakovi, pea ko te kau ʼāselo ʼe nātou leʼoleʼo pea mo puipui anai ia te hahaʼi ʼa te ʼAtua. (Sakalia 2:5, 11; 3:10; 4:7; 5:6-11; 6:1-8) ʼAki te lagolago ʼa Sehova, ʼe mahino gafua ko te kau Sutea ʼaē neʼe fakalogo neʼe nātou fetogi tonatou maʼuli, ke nātou tōkakaga tāfito ki te gāue ʼaē neʼe tupu ai tonatou faka ʼāteainaʼi e te ʼAtua.
17. ʼAki te ʼu fakamoʼoni ʼaē ʼe tou maʼu, koteā te ʼu fehuʼi ʼaē ʼe tonu ke tou fai?
17 ʼO toe feiā, ko te fakamoʼoni ʼaē ʼe tou maʼu ʼo ʼuhiga mo te mālo moʼoni ʼa te tauhi moʼoni, ʼe ina uga tatou ke tou gāue pea mo tou fakakaukauʼi fakalelei ʼo ʼuhiga mo te fale lotu ʼo Sehova. Koutou fai kiā koutou ia te ʼu fehuʼi ʼaenī: ‘Kapau ʼe au tui ʼe ko te temi ʼaenī moʼo fai ia te gāue ʼaē ko te faka mafola ʼo te logo lelei ʼo te Puleʼaga pea mo fai ʼo he ʼu tisipulo, ko te ʼu fakatuʼutuʼu ʼaē ʼe au fai pea mo toku maʼuli ʼe mulimuli koa ki taku tui ʼaia? ʼE au fakaʼaogaʼi koa hoku temi feʼauga ke au ako ia te ʼu lea faka polofeta ʼi te Folafola ʼa te ʼAtua, ʼo au fakakaukauʼi, pea mo au fai palalau kiai mo te tahi ʼu tēhina mo tuagaʼane pea mo te tahi ʼu hahaʼi ʼe au felāveʼi mo nātou?’
18. Ohage ko tona fakahā ʼi te kapite 14 ʼo Sakalia, koteā ʼaē ka tou sisio anai kiai ʼi te temi ka haʼu?
18 Neʼe talanoa ia Sakalia ki te fakaʼauha ʼo Papiloni Lahi pea mo te hoa atu kiai ia te tau ʼo Halamaketone. ʼE tou lau fēnei ʼi tana tohi: “ ʼE moʼoni ia, ʼe liliu anai te ʼaho ʼaia, ko he ʼaho ʼa Sehova ʼe mole hona fakatatau. ʼE mole ʼi ai anai he ʼuhu, pea ʼe mole ʼi ai anai he pōʼuli; heʼe ʼi te temi ʼo te afiafi, ʼe kei mālama anai.” Ei, ko te ʼaho ʼa Sehova ʼe fakapōʼuli anai, ko he ʼaho fakamataku anai maʼa tona ʼu fili ʼaē ʼi te kele! Kae ʼe ko he mālama ʼe mū tuʼumaʼu pe anai pea mo he tapuakina ʼe foaki hoholo anai ki te kau atolasio agatonu ʼa Sehova. ʼE toe fakahā e Sakalia ko meʼa fuli ʼi te mālama foʼou ʼe nātou kalagaʼi anai ia te maʼoniʼoni ʼa Sehova. Ko te tauhi moʼoni ʼaē ʼe fai ʼi te fale lotu lahi fakalaumālie ʼa te ʼAtua, ʼe ko te tauhi pe ʼaia e tahi ka fai anai ʼi te kele. (Sakalia 14:7, 16-19) ʼE ko he fakapapau lahi ʼaia! ʼE tou sisio anai ki te hoko ʼo te ʼu meʼa ʼaē neʼe fakakikite pea mo te faka lākatonuʼi ʼo te pule faʼitaliha ʼa Sehova. ʼE mole he fakatatau anai ʼo te ʼaho ʼaia ʼa Sehova.
Ko He ʼu Tapuakina ʼo Talu Ai
19, 20. Kiā koutou, he koʼe ʼe fakaloto mālohi te koga tohi ʼo Sakalia 14:8, 9?
19 Hili ʼaia, pea ʼe tāʼofi maʼu anai ia Satana mo tana kau temonio ʼi te vanu, ʼo mole kei feala hanatou fai he meʼa. (Apokalipesi 20:1-3, 7) ʼE folahi anai te ʼu tapuakina lolotoga te ʼAfio ʼa Kilisito Ia Taʼu e Afe. ʼE ʼui fēnei iā Sakalia 14:8, 9: “ ʼI te ʼaho ʼaia, ʼe tafe mai anai ki tuʼa te ʼu vai maʼuli mai Selusalemi, te vaelua ki te tai esite pea ko te tahi vaelua ki te tai uesite. ʼE hoko anai ʼi te temi vela pea mo te temi momoko. Pea ʼe liliu anai ia Sehova ko te hau ʼo te kele kātoa. ʼI te ʼaho ʼaia ʼe tokotahi anai ia Sehova, pea ʼe tokotahi anai tona huafa.”
20 Ko “te ʼu vai maʼuli” peʼe ko “te vaitafe vai ʼo te maʼuli,” ʼaē ʼe nātou fakatātā ia te ʼu fakatuʼutuʼu ʼa Sehova moʼo foaki ia te maʼuli, ʼe tatafe tuʼumaʼu anai mai te Puleʼaga Faka Mesianike. (Apokalipesi 22:1, 2, MN ) Ko te kau atolasio kaugamālie ʼa Sehova, ʼaē ka hāo ʼi Halamaketone, ʼe tapuakina anai nātou, heʼe faka ʼāteaina anai nātou mai te tautea ki te mate ʼaē neʼe tupu mai ia Atama. Māʼiape la mo nātou ʼaē kua mamate ʼe tapuakina nātou ʼaki ia te fakatuʼuake. ʼE kamata ai anai he temi foʼou ʼo te pule ʼa Sehova ki te kele. Ko te hahaʼi ʼo te kele kātoa, ʼe nātou tali anai ia Sehova ohage ko tonatou Tuʼi ʼAliki ʼo Te ʼAtulaulau, ia ia tokotahi pe ʼaē ʼe tonu ke atolasioʼi.
21. Koteā ʼaē ʼe tonu ke tou fakatotonu ke tou fai?
21 ʼO ʼuhiga mo te ʼu meʼa fuli ʼaē neʼe fakakikite e Asea pea mo Sakalia pea mo te ʼu meʼa fuli ʼaē kua hoko, ʼe tou maʼu ai he tupuʼaga lelei ke tou haga hoko atu te gāue ʼaē neʼe tuku mai e te ʼAtua ke tou fai ʼi te kele, ia te ʼu malaʼe ʼo tona fale lotu fakalaumālie. ʼO aʼu ki te temi ʼaē ka tauhi kātoa ai ia te hahaʼi ki te tauhi moʼoni, tou haga faiga fuli ke tou fakamuʼamuʼa ia te Puleʼaga ʼi totatou maʼuli. ʼE fakaloto mālohiʼi fēnei tatou iā Sakalia 8:9: “Ke mālolohi tokotou ʼu nima, ia koutou ʼaē ʼe koutou fagono ʼi te ʼu ʼaho ʼaenī ki te ʼu folafola ʼaia ʼe haʼu mai te gutu ʼo te kau polofeta.”
ʼE Kei Koutou Manatuʼi Koa?
• Koteā te ʼu faʼahi ʼaē ʼe tatau ai te ʼu fakamatala ʼo te tohi ʼa Asea pea mo Sakalia mo totatou temi?
• ʼI te ʼu tohi ʼa Asea pea mo Sakalia, koteā te ako ʼaē ʼe tou tāʼofi ai ʼo ʼuhiga mo te ʼu meʼa ʼaē ʼe tonu ke tou fakamuʼamuʼa?
• He koʼe ʼe tou maʼu he falala ʼo ʼuhiga mo te ka haʼu mokā tou vakaʼi ia te ʼu tohi ʼa Asea pea mo Sakalia?
[Paki ʼo te pasina 12]
Ko Asea pea mo Sakalia neʼe nā fakaloto mālohiʼi te kau Sutea ke nātou gāue ʼaki tonatou loto kātoa pea mo nātou maʼu ai te tapuakina
[Paki ʼo te pasina 13]
ʼE koutou ‘tahi maʼumaʼua koa ki tokotou ʼapi’?
[Paki ʼo te pasina 14]
Neʼe fakapapau e Sehova tana tapuakina, pea neʼe ina foaki te tapuakina ʼaia