Te ʼu Fehuʼi ʼa Te Kau Lautohi

Koteā ʼaē ʼe tupu ai te hū ʼa “te ʼu meʼa ʼaē ʼe manakoʼia ʼo te ʼu puleʼaga fuli” ki te “fale” ʼo te tauhi moʼoni?​—Asea 2:⁠7.

ʼAki te polofeta ko Asea, neʼe fakakikite fēnei e Sehova: “ ʼE au luluʼi anai te ʼu puleʼaga fuli, pea ʼe tonu anai ke hū mai te ʼu meʼa ʼaē ʼe manakoʼia ʼo te ʼu puleʼaga fuli; pea ʼe au fakafonu anai ʼaki te kolōlia te fale ʼaenī.” (Asea 2:7) ʼE ko te luluʼi koa ʼa “te ʼu puleʼaga fuli” ʼaē ʼe tupu ai te hū ki te tauhi moʼoniʼo “te ʼu meʼa ʼaē ʼe manakoʼia”​—te hahaʼi ʼaē ʼe loto moʼoni? Kailoa ia.

Tou vakaʼi pe koteā ʼaē ʼe ina fakaluluʼi te ʼu puleʼaga pea koteā ʼaē ʼe hoko ʼaki te luluʼi ʼaia. ʼE ʼui ʼi te Tohi-Tapu “kua gatutu te ʼu fenua pea mo te ʼu puleʼaga kua nātou mumuhu ki he meʼa noa.” (Pesalemo 2:1) Ko te “meʼa noa” ʼaē ʼe nātou haga “muhumuhu” kiai, peʼe nātou haga fakakaukauʼi kiai, ʼe faka ʼuhiga ki te hoko atu ʼo tanatou pule. ʼE luluʼi lahi ai nātou ʼi tanatou mātataku ʼaē naʼa molehi tanatou pule.

Ko te tala ʼa te kau Fakamoʼoni ʼa Sehova ʼi te malamanei ia te kua fakatuʼu ʼo te Puleʼaga ʼo te ʼAtua, ʼe tupu ai te mātataku ʼa te ʼu puleʼaga. Ko te Puleʼaga Faka Mesianike ʼo te ʼAtua ʼaē ʼe puleʼi e Sesu Kilisito, ʼe ina “laliki anai pea mo fakagata anai te ʼu puleʼaga [fakatagata] fuli.” (Taniela 2:44) Ko te fakamāu ʼaē ʼe tou toe tala ʼi tatatou gāue fai faka mafola, ʼe ina fakaluluʼi ai te ʼu puleʼaga. (Isaia 61:2) Pea ʼe toe ʼāsili age te luluʼi ʼaia ʼo te ʼu puleʼaga ʼaki te tuputupu pea mo te mālohi ʼo te gāue fai faka mafola. Koteā ʼaē ʼe hoko ʼaki te luluʼi ʼaia ʼaē neʼe fakakikite iā Asea 2:7?

Iā Asea 2:​6, ʼe tou lau fēnei: “Koʼeni te meʼa ʼaē neʼe ʼui e Sehova ʼo te ʼatu kautau: ‘ ʼE au toe tala atu​—ʼi he kiʼi temi siʼipe​—pea ʼe au toe luluʼi anai te ʼu lagi, mo te kele, mo te tai, pea mo te kele moamoa.’ ” ʼI tana fakaʼaogaʼi te vaega ʼaia, neʼe tohi fēnei e te ʼapositolo ko Paulo: “Neʼe ina fakapapau, ʼo ʼui maʼana: ‘ ʼE au toe luluʼi anai te kele pea mo te lagi.’ Ko te ʼui ʼaē ʼe ina ‘toe’ [luluʼi anai] ʼe fakahā ai te molehi ʼo te ʼu meʼa ʼaē kua luluʼi, ʼaē neʼe fakatupu, ke tuʼumaʼu pe te ʼu meʼa ʼaē neʼe mole luluʼi [ia te Puleʼaga].” (Hepeleo 12:​26, 27, MN ) Ei, ko te tuʼu ʼo te ʼu faʼahiga meʼa kātoa ʼaenī ʼe molehi anai, ʼo fetogi e te mālama foʼou ʼaē ka fakatupu e te ʼAtua.

ʼE taki mai te ʼu hahaʼi ʼaē ʼe loto moʼoni ki te tauhi moʼoni, kae mole tupu ko te luluʼi ʼo te ʼu puleʼaga. Ko te faʼahi ʼaē ʼe ina taki ai nātou kiā Sehova pea mo tana tauhi, ʼe ko te faʼahi pe ʼaē ʼe ina fakatupu te luluʼi ʼo te ʼu puleʼaga: ia te fai faka mafola ʼi te kele kātoa ʼo te Puleʼaga ʼo te ʼAtua ʼaē kua fakatuʼu. Ko te tala ʼo te ‘logo lelei heʼegata’ ʼe ina taki mai te ʼu hahaʼi ʼaē ʼe loto lelei ki te tauhi ki te ʼAtua moʼoni.​—Apokalipesi 14:​6, 7.

Ko te logo ʼo te Puleʼaga ʼe ko he logo ʼo ʼuhiga mo he fakamāu pea mo te hāofaki. (Isaia 61:​1, 2) ʼAki te faka mafola ʼo te logo ʼaia ʼi te kele kātoa, ʼe hoko ai faʼahi e lua: ʼe luluʼi ai te ʼu puleʼaga pea ʼe ōmai te ʼu meʼa ʼaē ʼe manakoʼia ʼo te ʼu puleʼaga ki te kolōlia ʼa Sehova.