‘Koutou Filifili Te Maʼuli Ke Feala Hakotou Māʼuʼuli’
“Neʼe au tuku atu ki ʼokotou muʼa te maʼuli pea mo te mate, te tapuakina pea mo te malaʼia, pea ʼe tonu ke koutou filifili ia te maʼuli ke feala ai hakotou māʼuʼuli.”—Teutalonome 30:19.
1, 2. Ko te ʼu faʼahi fea ʼaē neʼe faʼu ai te tagata ki te pāki ʼo te ʼAtua?
“TĀ FAʼU te tagata ki totā pāki, ke hoko kiā tāua.” ʼE tuʼu te ʼu palalau ʼaia ʼa te ʼAtua ʼi te ʼuluaki kapite ʼo te Tohi-Tapu. ʼE ʼui fēnei iā Senesi 1:26, 27: “Neʼe fakatupu e te ʼAtua te tagata ʼo mulimuli ki tona pāki, neʼe fakatupu ia ia ʼo mulimuli ki te pāki ʼo te ʼAtua.” Koia, ko te ʼuluaki tagata neʼe makehe tona faʼu ʼi te ʼu meʼa fuli ʼaē neʼe fakatupu ʼi te kele. Neʼe tatau ia mo tona Tupuʼaga, he neʼe ina lava faʼifaʼitakiʼi te ʼulugaaga ʼo te ʼAtua, ʼi te faʼahi faka ʼatamai, ʼi te ʼofa, ʼi te faitotonu, ʼi te poto pea mo te mālohi. Neʼe ʼi ai tona leʼo ʼo loto moʼo fai he ʼu tonu ʼe fua lelei anai kiā te ia pea mo ina fakafiafia tana Tāmai ʼaē ʼe ʼi selo. (Loma 2:15) Moʼo fakanounou, neʼe maʼu e Atama ia te loto faʼitaliha. ʼI tana ʼosi faʼu ʼo tona foha fakakelekele, neʼe ʼui fēnei e Sehova ʼo ʼuhiga mo tana gāue ʼaia: “Koʼeni ko te meʼa ʼaia neʼe lelei ʼaupito.”—Senesi 1:31; Pesalemo 95:6.
2 ʼO feiā mo tatou, ʼi totatou ʼuhiga fānau ʼa Atama, neʼe faʼu tatou ʼo mulimuli ki te pāki pea mo te ʼulugaaga ʼo te ʼAtua. Kae ʼe tou lava filifili koa te meʼa ʼaē ʼe tonu ke tou fai? Ei ʼe tou lava filifili te meʼa ʼaē ʼe tou loto kiai. Ko te ʼAtua ʼe ina lava ʼiloʼi fakatomuʼa te meʼa ʼaē ka hoko, kae ʼe mole ina fakakikite te ʼu meʼa ʼaē ka tou fai takitokotahi pea mo tohi fakatomuʼa tatatou ʼu gāue. ʼE mole ina tuku tana fānau ʼi te kele ke fakalogo tonatou maʼuli ki he ʼu meʼa ʼe kua fakatuʼutuʼu fakatomuʼa ke hoko feiā. Ke tou mahino ki te maʼuhiga ʼaē ke tou fakaʼaogaʼi totatou loto faʼitaliha moʼo fai he ʼu tonu ʼe lelei. Tou vakaʼi age muʼa te faʼifaʼitaki ʼa te puleʼaga ʼo Iselaele.—Loma 15:4.
Neʼe Tuku Age Ki Te Kau Iselaele Ia Te Loto Faʼitaliha
3. Koteā te ʼuluaki Folafola ʼi te ʼu Folafola e Hogofulu, pea neʼe fakalogo feafeaʼi te kau Iselaele agatonu ki te lao ʼaia?
3 Neʼe ʼui fēnei e Sehova ki te kau Iselaele: “Ko au Sehova tou ʼAtua, ʼaē neʼe ina hāofaki koe mai te fenua ʼo Esipito, mai te ʼapi ʼo te kau sinifu.” (Teutalonome 5:6) ʼI te taʼu 1513 ʼi muʼa ʼo totatou temi, neʼe hāofaki faka milakulo te puleʼaga ʼo Iselaele mai tonatou maʼuli popūla ʼi Esipito, koia neʼe mole tonu ke nātou lotolotolua ʼo ʼuhiga mo te ʼu folafola ʼaia. ʼAki tana tagata fakafofoga ko Moisese, neʼe fakahā e Sehova te ʼuluaki Folafola ʼo te ʼu Folafola e Hogofulu: “ ʼAua naʼa ʼi ai hou tahi ʼu ʼatua ʼe fakafeagai ki toku fofoga.” (Ekesote 20:1, 3) ʼI te temi ʼaia, neʼe filifili e te puleʼaga ʼo Iselaele ke fakalogo kiā te ia. Neʼe nātou lotolelei ke nātou tauhi ʼāteaina pe kiā Sehova.—Ekesote 20:5; Faka au 25:11.
4. (a) Koteā te filifili ʼaē neʼe tuku age e Moisese ki te kau Iselaele? (b) Ko te tonu fea ʼaē ʼe tonu ke tou fai iā ʼaho nei?
4 Hili taʼu e 40 ki muli age, neʼe fakamanatuʼi e Moisese ki te kau Iselaele ʼo te tahi taʼiake te meʼa ʼaē neʼe tonu ke nātou filifili. Neʼe ina ʼui fēnei: “Iā ʼaho nei, ʼe ʼau toʼo te lagi pea mo te kele ko he ʼu fakamoʼoni ʼe fakafeagai kiā koutou, neʼe au tuku atu ki ʼokotou muʼa te maʼuli pea mo te mate, te tapuakina pea mo te malaʼia, pea ʼe tonu ke koutou filifili ia te maʼuli ke feala ai hakotou māʼuʼuli, ia koutou pea mo tokotou hōloga.” (Teutalonome 30:19) ʼE feala mo tatou iā ʼaho nei ke tou filifili peʼe tou fia māʼuʼuli peʼe tou fia mamate. Ei, ʼe fakalogo kiā tatou peʼe tou fia tauhi agatonu kiā Sehova ʼo tou maʼu ai te maʼuli heʼegata, peʼe tou fia talagataʼa kiā te ia ʼo tou utu ai tona ʼu fua kovi. Tou vakaʼi age muʼa te kehekehe ʼo te tonu ʼaē neʼe fai e te kau Iselaele pea mo te tonu ʼaē neʼe fai e Sosue.
5, 6. Koteā ʼaē neʼe filifili e Sosue, pea neʼe koteā tona fua kiā ia?
5 ʼI te taʼu 1473 ʼi muʼa ʼo totatou temi, neʼe fakahū e Sosue ia te kau Iselaele ki te Kele ʼo Te Fakapapau. Pea ʼi muʼa ʼo tana mate, neʼe fai e Sosue te tokoni mālohi ki te puleʼaga kātoa pea mo kole mamahi age kiā nātou: “Kapau ʼe ko he meʼa kovi ki ʼokotou mata te tauhi ʼaē kiā Sehova, koutou filifili maʼa koutou ʼi te ʼaho nei pe ko ai ʼaē ka koutou tauhi ki ai, pe ko te ʼu ʼatua ʼaē neʼe tauhi ki ai takotou ʼu kui, ʼi te tahi kauvai ʼo te Vaitafe, pe ko te ʼu ʼatua ʼo te kau Amolite te fenua ʼaē ʼe koutou nonofo ai.” Koia, ʼo ʼuhiga mo tona famili, neʼe ina ʼui fēnei: “Kae kiā au mo toku loto fale, ʼe mātou tauhi anai kiā Sehova.”—Sosue 24:15.
6 ʼI te kamata, neʼe fakaloto mālohiʼi e Sehova ia Sosue ke lototoʼa pea mo lotomālohi, ʼo ina fakatotonu age ke fakalogo tuʼumaʼu ki te Lao ʼa te ʼAtua. Pea ke ina lau leʼo lahi te tohi ʼo te Lao ʼi te ʼaho mo te pō, heʼe fua manuʼia anai kiā Sosue. (Sosue 1:7, 8) Pea neʼe hoko te faʼahi ʼaia, neʼe tapuakina te maʼuli ʼo Sosue he neʼe ina filifili te meʼa ʼaē ʼe lelei. Neʼe ʼui fēnei e Sosue: “Neʼe mole he fakapapau neʼe mole hoko ʼi te ʼu fakapapau lelei fuli ʼaē neʼe fai e Sehova ki te ʼapi ʼo Iselaele; neʼe hoko fuli.”—Sosue 21:45.
7. ʼI te temi ʼo Isaia, koteā ʼaē neʼe filifili e ʼihi Iselaele, pea neʼe koteā tona ʼu fua kiā nātou?
7 Tou vakaʼi age muʼa te maʼuli ʼo te kau Iselaele ʼi te ʼu taʼu e 700 ki muli age. ʼI te temi ʼaia, tokolahi ʼi te kau Iselaele neʼe nātou muliʼi te ʼu agaʼi fenua ʼo te kau pagani. Ohage la, ʼi te ʼaho fakaʼosi ʼo te taʼu, neʼe fai te kātoaga e te kau Iselaele ʼo nātou kai te ʼu meʼa kai kehekehe pea mo ʼinu te vino huʼa mālie. Neʼe mole ko he toʼotoʼoga faka fenua, kae neʼe ko he toʼotoʼoga faka lotu moʼo atolasio ki te ʼu ʼatua pagani e toko lua. Neʼe tala e te polofeta ko Isaia te manatu ʼa te ʼAtua ʼo ʼuhiga mo te aga heʼe agatonu ʼaia: “Ko koutou ʼu tagata ʼaē ʼe koutou mavae mai iā Sehova, ʼaē ʼe koutou galoʼi toku moʼuga taputapu, ia koutou ʼaē ʼe koutou fakatuʼu te laupapa maʼa te ʼatua [ko Kate] pea mo fakafonu maʼa te ʼatua [ko Meni] ia te vino ʼaē neʼe fio.” Neʼe nātou tui ko te taʼukai, ʼe mole fakalogo ki te tapuakina ʼa Sehova, kae ki te fakafimālieʼi ʼo “te ʼatua [ko Kate]” pea mo “te ʼatua [ko Meni].” Kae ʼi tona fakahagatonu, ʼe nātou utu pe te ʼu meʼa ʼaē ʼe nātou fai ʼi tanatou talagataʼa pea mo tanatou loto fefeka. Neʼe ʼui fēnei e Sehova: “ ʼE au tuku anai koutou ki te heletā, pea ʼe koutou tulolo fuli anai ki te fakaʼauha; he neʼe au pāui atu, kae neʼe mole koutou tali mai; neʼe au palalau atu, kae neʼe mole koutou fagono mai; pea neʼe koutou haga fai te meʼa ʼaē ʼe kovi ki ʼoku mata, pea neʼe koutou filifili te ʼu meʼa ʼaē ʼe mole au fiafia ai.” (Isaia 65:11, 12) Neʼe fakaʼauha nātou he neʼe kovi te ʼu tonu ʼaē neʼe nātou fai, pea neʼe mole he mālohi ʼo te ʼu ʼatua ko Meni pea mo Kate moʼo tāʼofi ia te faʼahi ʼaia.
Tou Fai He ʼu Tonu ʼe Lelei
8. Iā Teutalonome 30:20, ko te ʼu faʼahi fea ʼaē ʼe tonu ke tou fai moʼo filifili te meʼa ʼaē ʼe lelei?
8 ʼI te temi ʼaē neʼe tokoniʼi ai e Moisese ia te kau Iselaele ke nātou filifili te maʼuli, neʼe ina fakahā age faʼahi e tolu ʼe tonu ke nātou fai: “Ke [nātou] ʼofa kiā Sehova, [tonatou] ʼAtua, ʼo [nātou] fakalogo ki tona leʼo pea mo [nātou] pipiki maʼu kiā te ia.” (Teutalonome 30:20) Tou vakaʼi takitahi te ʼu faʼahi ʼaia ke tou filifili te meʼa ʼaē ʼe lelei.
9. ʼE tou lava fakahā feafeaʼi totatou ʼofa ʼaē kiā Sehova?
9 Te ʼofa kiā Sehova totatou ʼAtua: ʼE tou filifili ke tou tauhi kiā Sehova heʼe tou ʼoʼofa kiā te ia. Ka tou manatuʼi te ʼu fakatokaga ʼaē neʼe fai ki te kau Iselaele, pea ʼe tou tekeʼi anai te ʼu fakahala ʼaē ʼe nātou taki tatou ki te ʼu aga heʼeʼaoga pea mo tou fakafeagai ki te mānumānu koloā ʼa te malamanei. (1 Kolonito 10:11; 1 Timoteo 6:6-10) ʼE tou pipiki maʼu anai kiā Sehova pea mo taupau tana ʼu lēkula. (Sosue 23:8; Pesalemo 119:5, 8) ʼI muʼa ʼo te hū ʼa te kau Iselaele ki te Kele ʼo Te Fakapapau, neʼe fakaloto mālohiʼi fēnei nātou e Moisese: “Sio! Neʼe au akoʼi atu kiā koutou te ʼu pelesepeto pea mo te ʼu tonu faifakamāu, ʼo mulimuli ki tona fakatotonu mai ʼaē e Sehova, toku ʼAtua, ke koutou fai feiā ʼi te loto fenua ʼaē ka koutou ʼolo ʼo toʼo maʼa koutou. Pea ʼe tonu ke koutou taupau maʼu pea mo maʼuliʼi te ʼu meʼa ʼaia, heʼe ko hakotou agapoto ʼaia pea mo ʼatamai ia muʼa ʼo te ʼu mata ʼo te ʼu hahaʼi ʼaē ka logo anai ki te ʼu pelesepeto fuli ʼaia.” (Teutalonome 4:5, 6) ʼE tou fakahā totatou ʼofa kiā Sehova ʼi tatatou fakamuʼamuʼa tona finegalo ʼi totatou maʼuli. ʼE tapuakinaʼi anai tatou mo kapau ʼe tou filifili ke tou fai ia te faʼahi ʼaia.—Mateo 6:33.
10-12. Koteā te ʼu ako ʼaē ʼe tou maʼu ʼi te ʼu meʼa neʼe hoko ʼi te temi ʼo Noe?
10 Tou fakalogo ki te leʼo ʼo te ʼAtua: Ko Noe neʼe ko te “tagata fai faka mafola faitotonu.” (2 Petelo 2:5, MN ) ʼI muʼa ʼo te tō ʼo te Tulivio, neʼe tokaga pe te hahaʼi ki tanatou ʼu gāue pea “neʼe mole nātou fakatokagaʼi” te ʼu fakatokaga ʼa Noe. Neʼe koteā tona fua? Neʼe ‘tō te tulivio pea neʼe ʼave fuli ai ia nātou.’ Neʼe fai mai e Sesu te fakatokaga ʼo ʼuhiga mo totatou temi, ʼe hoko anai te meʼa feiā ʼi “te ʼi henī ʼo te Foha ʼo te tagata.” Ko te meʼa ʼaē neʼe hoko ʼi te temi ʼo Noe ʼe ko he fakatokaga ki te hahaʼi ʼo te temi nei ʼaē ʼe mole nātou fia tokagaʼi te logo ʼa te ʼAtua.—Mateo 24:39, MN.
11 ʼE tonu ke mahino ki te hahaʼi kapau ʼe nātou manukiʼi te ʼu fakatokaga ʼaē ʼe tala e te ʼu kaugana ʼa te ʼAtua iā ʼaho nei, pea ʼe fua kovi anai kiā nātou. Ko te hahaʼi vāvā ʼaia, ʼe ʼui fēnei e te ʼapositolo ko Petelo: “ ʼUhi heʼe mole nātou fia tui, ʼe galo kiā nātou te meʼa ʼaenī: neʼe ʼi ai te ʼu lagi ʼi te ʼu temi ʼāfea, pea mo he kele ʼe māʼopoʼopo lelei ʼi ʼoluga ʼo te vai pea neʼe tuʼu ʼi te lotomalie ʼo te vai ʼuhi ko te folafola ʼa te ʼAtua; pea ko te mālama ʼo te temi ʼaia neʼe fakaʼauha ʼaki te ʼu meʼa ʼaia, ʼi te temi ʼaē neʼe lōfia ai ʼi te vai. ʼAki te folafola pe ʼaia ko te lagi pea mo te kele ʼo te temi ʼaenī kua tānaki ke tutu pea kua taupau ki te ʼaho ʼo te fakamāu pea mo te fakaʼauha ʼo te hahaʼi ʼaē ʼe mole tauhi ki te ʼAtua.”—2 Petelo 3:3-7, MN.
12 Ko te filifili ʼaē neʼe fai e Noe pea mo tona loto fale neʼe mole tatau ia mo te filifili ʼaē neʼe fai e te hahaʼi. “ ʼAki te tui, ko Noe, ʼaē neʼe fakahā age ki ai e te ʼAtua te ʼu meʼa ʼaē neʼe mole heʼeki hā, neʼe ina fakahā tana manavasiʼi fakaʼatua ʼo ina faʼu te aleka.” ʼI tana fakalogo ki te fakatokaga neʼe ina hāofaki ai tona loto fale. (Hepeleo 11:7, MN ) ʼOfa pe ke mole tou tuai ʼi te tokagaʼi ia te logo ʼa te ʼAtua pea mo tou maʼuliʼi.—Sakopo 1:19, 22-25.
13, 14. (a) He koʼe ʼe maʼuhiga ke tou ‘pipiki maʼu kiā Sehova’? (b) ʼE feafeaʼi anai hatatou tuku ki ‘totatou Tufuga Faʼu Ipu’ ko Sehova ke ina fetogi tatou?
13 Tou pipiki maʼu kiā Sehova: Ka tou ‘filifili te maʼuli ke feala hatatou māʼuʼuli,’ ʼe tonu ke tou ʼoʼofa kiā Sehova pea mo fakalogo kiā te ia, pea mo tou toe ‘pipiki maʼu kiā Sehova,’ ʼo tou haga fai tona finegalo. Neʼe ʼui fēnei e Sesu: “ ʼAki takotou faʼa kātaki, ʼe koutou maʼu ai anai tokotou ʼu nefesi.” (Luka 21:19, MN ) ʼE ʼasi anai te meʼa ʼaē ʼi totatou loto, ʼi te tonu ʼaē ka tou fai. ʼE ʼui fēnei iā Tāʼaga Lea 28:14: “Fiafia te tagata ʼaē ʼe ina logoʼi tuʼumaʼu ia te manavasiʼi, kae ki ʼaē ʼe ina fakafefeka tona loto ʼe tō anai ki te malaʼia.” ʼE ʼalutahi te lua koga ʼo te vaega mo te meʼa ʼaē neʼe hoko ki te Falaone ʼo te Esipito ʼāfea. ʼI te fakahoko ʼo te ʼu Tautea e Hogofulu ki Esipito, neʼe fakafefeka e Falaone ia tona loto he neʼe mole manavasiʼi ki te ʼAtua. Neʼe mole ko Sehova ʼaē neʼe ina fakakinauʼi ia Falaone ke talagataʼa kiā te ia, kae neʼe ina fakagafua ki te hau fiatuʼu ʼaia ke ina filifili te meʼa ʼaē ʼe loto kiai. Kae ohage ko tona fakahā e te ʼapositolo ko Paulo ʼo ʼuhiga mo Falaone, neʼe hoko te finegalo ʼo Sehova: “Ko te tupuʼaga la ʼaia ʼo taku tuku ke ke maʼuli, ke ke sio ki toku māfimāfi, pea ke tala toku huafa ʼi te kele kātoa.”—Loma 9:17, MN.
14 Hili te ʼu sēkulō ʼi te ʼosi faka ʼāteaina ʼo Iselaele mai te pule ʼa Falaone, neʼe ʼui fēnei e te polofeta ko Isaia: “Ê Sehova, ko koe tamatou Tāmai. Ko mātou te kele, pea ko koe tomatou Tufuga Faʼu Ipu; pea ko mātou fuli ko te gāue ʼo tou nima.” (Isaia 64:8) ʼE tou kofuʼi māmālie ia te ʼulugaaga foʼou, mo kapau ʼaki tatatou ako takitokotahi pea mo tatatou maʼuliʼi ia tana Folafola ʼe tou tuku ke gāueʼi tatou e Sehova. ʼE lahi age anai tatatou agavaivai pea mo tatatou tali ke tokoniʼi tatou, pea mo faigafua age tatatou pipiki agatonu kiā Sehova heʼe tou faiga fakamalotoloto ke tou fakafiafia tona loto.—Efeso 4:23, 24; Kolose 3:8-10.
“ ʼE Tonu Anai Ke Ke Fakahā”
15. Iā Teutalonome 4:9, koteā te ʼu faʼahi e lua neʼe fakamanatuʼi age e Moisese kiā Iselaele?
15 Ki te kau Iselaele ʼaē neʼe fakatahitahi ʼi te hūʼaga ki te Kele ʼo Te Fakapapau, neʼe ʼui fēnei age e Moisese: “Kae tokaga kiā koe pea mo tou nefesi, ke ʼaua naʼa galo kiā koe te ʼu meʼa ʼaē neʼe sio kiai tou ʼu mata pea ʼaua naʼa mamaʼo mai ai tou loto, ʼi te ʼu ʼaho fuli ʼo tou maʼuli; pea ʼe tonu anai ke ke fakahā ki tou ʼu foha pea mo tou ʼu mokopuna.” (Teutalonome 4:9) Ko faʼahi e lua neʼe tonu ki te kau Iselaele ke nātou fai iā muʼa ʼo tonatou ʼAtua ko Sehova, mo kapau neʼe nātou fia maʼu tana tapuakina pea mo maʼuli fīmālie ʼi te fenua ʼaē neʼe nātou maʼu tofiʼa. Neʼe mole tonu ke galo ia nātou te ʼu gāue taulekaleka ʼaē neʼe fai e Sehova maʼa nātou, pea neʼe tonu ke nātou akoʼi te ʼu meʼa ʼaia ki te ʼu taʼiake ki ʼamuli. ʼE tonu kiā tatou hahaʼi ʼa te ʼAtua iā ʼaho nei, ke tou fai ohage ko nātou, mo kapau ʼe tou fia ‘filifili ia te maʼuli ke feala hatatou māʼuʼuli.’ Koteā te ʼu meʼa ʼaē neʼe tou sio mata kiai, neʼe fai e Sehova maʼa tatou?
16, 17. (a) Moʼo faka mafola ia te logo lelei ʼo te Puleʼaga, koteā ʼaē neʼe lava fakahoko e te kau misionea? (b) Ko ai te ʼu faʼifaʼitaki faʼafai ʼaē ʼe koutou ʼiloʼi?
16 ʼE tou fiafia ʼi te haga ʼa Sehova ʼo tapuakinaʼi tatatou fai faka mafola pea mo tatatou fai ʼo ni ʼu tisipulo. Talu te avahi ʼo te Faleako Faka Tohi-Tapu ʼo Kileate ʼi te taʼu 1943, ko te kau misionea ʼe nātou takitaki te gāue ʼo te fai ʼo ni ʼu tisipulo ʼi te ʼu fenua. ʼO aʼu mai ki te ʼaho nei, ko te kau ako ʼo te uluaki kalasi ʼe nātou faʼafai ʼi te faka mafola ʼo te Puleʼaga, logola tanatou kua mātutuʼa pea mo māhahaki. Ko te faʼifaʼitaki lelei ʼe ko Mary Olson ʼaē neʼe maʼu pepa mai Kileate ʼi te taʼu 1944. Neʼe kamata tana gāue misionea ʼi Uruguay, ki muli age ʼi Colombie pea ʼi te temi nei ʼi Puerto Rico. Logola tona kua vaivai matuʼa, kae ʼe kei fiafia pe te Tuagaʼane ko Olson ʼi tana fai faka mafola. ʼI tana poto ʼi te lea faka Sepania, ʼe ina fakatuʼutuʼu ʼi te vāhaʼa fuli ke kau ki te minisitelio ʼo te kau fai faka mafola ʼo te kolo.
17 Ko te Tuagaʼane vītua ko Nancy Porter, neʼe maʼu pepa mai te Faleako ʼo Kileate ʼi te taʼu 1947, pea ʼe kei pionie nei ʼi Bahamas. ʼE ko te tahi ʼaia misionea ʼe maʼumaʼua ʼi te gāue fai faka mafola. ʼI te fakamatala ʼo tona maʼuli,a ʼe ʼui fēnei e te Tuagaʼane ko Porter: “Neʼe ko he fiafia makehe kiā au taku akoʼi ki ʼihi te ʼu moʼoni ʼo te Tohi-Tapu. Neʼe tokoni mai kiā au ke au tokaga fakalelei ki taku tauhi ki te ʼAtua pea mo au maʼuli fīmālie.” Ka manatuʼi e te Tuagaʼane ko Porter pea mo ʼihi ʼu kaugana agatonu tonatou maʼuli ki muʼa atu, ʼe mole galo ia nātou te ʼu meʼa ʼaē neʼe fai e Sehova maʼa nātou. E feafeaʼi kiā tatou? ʼE tou fakafetaʼi koa ki te ʼu tapuakina ʼa Sehova neʼe ina fai ʼi te faka mafola ʼo te Puleʼaga?—Pesalemo 68:11.
18. Koteā te ako ʼe tou maʼu ʼi tatatou lau te ʼu hisitolia ʼa te kau misionea?
18 ʼE tou fiafia ʼaupito ki te ʼu gāue ʼaē neʼe fai e te ʼu tēhina mo tuagaʼane lolotoga ni ʼu taʼu pea ʼe kei nātou lolotoga hoko atu aipe. Kapau ʼe tou lau tonatou ʼu hisitolia, pea ʼe tou lotomālohi anai heʼe tou sio ki te ʼu tapuakina neʼe fai e Sehova maʼa te ʼu tēhina mo tuagaʼane agatonu ʼaia, pea ʼe toe mālohi ai tatatou faiga ʼaē ke tou tauhi kiā Sehova. ʼE koutou lau tuʼumaʼu koa te ʼu hisitolia taulekaleka ʼaia neʼe tā ʼi Te Tule Leʼo pea mo metitāsio kiai?
19. E feafeaʼi he fakaʼaogaʼi fakalelei e te ʼu mātuʼa Kilisitiano ia te ʼu hisitolia ʼaē ʼe fakamatala ʼi Te Tule Leʼo?
19 Neʼe fakamanatuʼi e Moisese ki te kau Iselaele ke ʼaua naʼa galo ia nātou te ʼu meʼa fuli ʼaē neʼe fai e Sehova maʼa nātou, pea ke ʼaua naʼa nātou fakamamaʼo te ʼu meʼa ʼaia ʼi ʼonatou loto ʼi tonatou maʼuli. ʼOsi ʼaia, neʼe ina toe ʼui fēnei: “ ʼE tonu anai ke ke fakahā ki tou ʼu foha pea mo tou ʼu mokopuna.” (Teutalonome 4:9) ʼE tou lotomālohi mokā tou lau ia te ʼu hisitolia ʼaia. ʼE ʼaoga ki te tuputupu ʼa te tamaliki ke nātou maʼu he ʼu faʼifaʼitaki lelei. Ko te ʼu tuagaʼane selipatea ʼe nātou maʼu te ʼu ako mai te ʼu hisitolia ʼo te ʼu tuagaʼane finematuʼa agatonu ʼaē ʼe fakamatala ʼi Te Tule Leʼo. ʼE feala ki te ʼu tēhina pea mo tuagaʼane ke nātou fakalahi tanatou faka mafola ia te logo lelei mo kapau ʼe nātou gāue ʼi he telituale ʼi tonatou fenua, ʼe nonofo ai ni hahaʼi matāpule. ʼU mātuʼa Kilisitiano, he koʼe ʼe mole koutou fakamatala age ki takotou ʼu fānau te maʼuli ʼa te kau misionea agatonu ʼo Kileate pea mo ʼihi tēhina mo tuagaʼane, ke feala hanatou fia gāue temi kātoa maʼa Sehova?
20. Koteā ʼaē ʼe tonu ke tou fai moʼo “filifili ia te maʼuli”?
20 E feafeaʼi hatatou “filifili ia te maʼuli”? ʼE tou fakaʼaogaʼi lelei anai ia totatou loto faʼitaliha moʼo fakahā kiā Sehova ʼe tou ʼoʼofa kiā te ia, pea mo haga gāue mālohi ʼi tana selevisi ʼo mulimuli pe ki tona finegalo. Ohage ko tona ʼui e Moisese, “heʼe [ko Sehova] ia tou maʼuli pea mo te loaloaga ʼo tou ʼu ʼaho.”—Teutalonome 30:19, 20.
[Kiʼi nota]
a Vakaʼi te alatike “Fiafia Mo Loto Fakafetaʼi Logope Te Kafo Mamahi,” neʼe tā ʼi Te Tule Leʼo ʼo te ʼaho 1 ʼo Sūnio 2001, pasina 23 ki te 27.
ʼE Kei Koutou Manatuʼi Koa?
• Koteā ʼaē neʼe koutou ako mai te ʼu hahaʼi ʼaē neʼe kehekehe tanatou ʼu filifili?
• Ko te ʼu faʼahi fea ʼaē ʼe tonu ke tou fai moʼo “filifili ia te maʼuli”?
• Koteā te ʼu faʼahi e lua ʼaē ʼe fakaloto mālohiʼi tatou ke tou fai?
[Paki ʼo te pasina 22]
“Neʼe au tuku atu ki ʼokotou muʼa te maʼuli pea mo te mate”
[Paki ʼo te pasina 25]
Neʼe hāofaki ia Noe pea mo tona famili he neʼe nātou fakalogo ki te leʼo ʼo te ʼAtua
[Paki ʼo te pasina 26]
Mary Olson
[Paki ʼo te pasina 26]
Nancy Porter