ʼE Hoko Moʼoni Ia Te Folafola ʼa Sehova
“Neʼe mole he folafola neʼe mole hoko ʼi te ʼu folafola lelei fuli ʼaē neʼe tala atu e Sehova, tokotou ʼAtua. Neʼe hoko fuli ia maʼa koutou.”—Sosue 23:14.
1. Neʼe ko ai ia Sosue, pea koteā ʼaē neʼe ina fai ʼi te temi fakaʼosi ʼo tona maʼuli?
NEʼE ko he kamutoa mālohi pea mo toʼa, ko he tagata tui pea mo agatonu. Neʼe lagolago kiā Moisese pea neʼe fili ia ia e Sehova ke ina taki te puleʼaga ʼo Iselaele ʼi he toafa fakamataku ki he fenua ʼe mahu ai te huʼa pipi pea mo te meli. ʼI te temi fakaʼosi ʼo te maʼuli ʼo Sosue, ko te tagata fakaʼapaʼapaʼia ʼaia, neʼe ina fai ia tana akonaki tauʼinē fakaloto mālohi ki te ʼu tagata matuʼatuʼa ʼo Iselaele. ʼE mahino ia, ko te akonaki ʼaia neʼe ina fakaloto mālohiʼi te tui ʼa nātou ʼaē neʼe fakalogo kiā te ia. ʼE feala mo koutou ke kotou toe lotomālohi ʼaki te akonaki ʼaia.
2, 3. ʼI te temi ʼaē neʼe palalau ai ia Sosue ki te ʼu tagata matuʼatuʼa ʼo Iselaele, neʼe feafeaʼi te ʼaluʼaga ʼo Iselaele, pea koteā ʼaē neʼe ʼui e Sosue?
2 Kotou fakakaukauʼi age muʼa ia te meʼa ʼaē neʼe hoko, ohagē ko tona fakahā mai ʼi te Tohi-Tapu: “Hili te ʼu ʼaho loaloaga ki te kua foaki e Sehova ia te mālōlō ki Iselaele mai tonatou ʼu fili fuli ʼi ʼonatou tafaʼaki, ʼi te temi ʼaē neʼe kua matuʼa ai ia Sosue pea mo lahi ʼona ʼaho, neʼe pāui e Sosue ia Iselaele kātoa, mo tana ʼu tagata matuʼatuʼa, mo tana kau pule, mo tana kau tuʼi fakamāu pea mo tana kau ofisie, pea mo ina ʼui kiā nātou: ‘Ko au ʼaenī kua au matuʼa pea mo lahi ʼoku ʼaho.’ ”—Sosue 23:1, 2.
3 Neʼe kua fakaovi ia Sosue ki tona taʼu 110, pea neʼe maʼuli ʼi te temi maʼuhiga ʼo te hisitolia ʼo te ʼu kaugana ʼa te ʼAtua. Neʼe sio ki te ʼu gāue lalahi ʼa te ʼAtua, pea neʼe sio ki te fakahoko ʼo te ʼu tuʼuga fakapapau neʼe fai e Sehova. Koia, ʼaki te ʼu meʼa ʼaē neʼe kua hoko kiā te ia, neʼe tui papau ai ki te ʼu palalau ʼaenī neʼe ina fai: “ ʼE kotou ʼiloʼi papau ʼaki tokotou loto kātoa pea mo tokotou nefesi kātoa, neʼe mole he folafola neʼe mole hoko ʼi te ʼu folafola lelei fuli ʼaē neʼe tala atu e Sehova, tokotou ʼAtua. Neʼe hoko fuli ia maʼa koutou. Neʼe mole hana folafola e tahi ʼi te ʼu folafola ʼaia neʼe mole hoko.”—Sosue 23:14.
4. Ko te ʼu fakapapau fea ʼaē neʼe fai e Sehova ki te kau Iselaele?
4 Ko te ʼu palalau fea ʼa Sehova ʼaē neʼe hoko moʼoni ʼi te temi ʼo Sosue? ʼE tou vakaʼi anai ia te ʼu fakapapau e tolu neʼe foaki e Sehova ki te kau Iselaele. ʼUluaki, ʼe haofaki anai e te ʼAtua ia nātou mai tonatou maʼuli pōpula. Lua, ʼe ina puipui anai nātou. Tolu, ʼe tokoni anai kiā nātou. Neʼe toe fai e Sehova he ʼu fakapapau fēia ki tana hahaʼi ʼi te temi nei, pea ʼe tou sisio ʼi totatou temi ki te hoko moʼoni ʼo tana ʼu fakapapau ʼaia. Kae ʼi muʼa ʼo hatatou vakaʼi te ʼu gāue ʼa Sehova ʼi totatou temi, ʼe tou vakaʼi anai ia tana ʼu gāue ʼaē neʼe ina fai ʼi te temi ʼo Sosue.
Ko Sehova ʼe Ina Haofaki Tana Hahaʼi
5, 6. Neʼe haofaki feafeaʼi e Sehova te kau Iselaele mai Esipito, pea koteā ʼaē neʼe fakahā ai ʼo ʼuhiga mo ia?
5 ʼI te temi ʼaē neʼe tagi ai te kau Iselaele ki te ʼAtua ʼuhi ko tonatou maʼuli pōpula ʼi Esipito, neʼe logoʼi e Sehova tanatou ʼu tagi. (Ekesote 2:23-25) ʼO ovi ki te fuʼu ʼakau ʼaē neʼe ulo, neʼe ʼui fēnei e Sehova kiā Moisese: “ ʼE au hifo moʼo haofaki [taku hahaʼi] mai te kau Esipito pea mo fakahake ia nātou ki he fenua lelei pea mo lahi, ki he fenua ʼe tafe ai te huʼa pipi pea mo te meli.” (Ekesote 3:8) Neʼe lagi ko he meʼa fakafiafia te sio ʼaē ki te fakahoko e Sehova ia tana fakapapau ʼaia! ʼI te temi ʼaē neʼe mole tuku ai e Falaone ke mavae ia Iselaele mai Esipito, neʼe fakahā age e Moisese ko te ʼAtua ʼe ina fakaliliu anai ke huʼa toto ia te vai ʼo te Nile. Pea neʼe hoko moʼoni ia te folafola ʼa Sehova. Neʼe liliu te Vaitafe ʼo te Nile ko te huʼa toto, ʼo mamate ai te ʼu ika, pea neʼe mole kei feala he ʼinu ʼo te vai ʼo te liuʼa. (Ekesote 7:14-21) Kae neʼe loto fefeka aipē ia Falaone, pea neʼe fakahoko e Sehova te tahi ʼu malaʼia e hiva, ʼo ina fakahā fakatomuʼa ia te malaʼia takitahi ʼaē kā hoko. (Ekesote, kāpite 8-12) ʼI te ʼosi ʼo te hogofulu malaʼia ʼaē neʼe mate ai te kau ʼuluaki tupu ʼo Esipito, neʼe fakatotonu ai leva e Falaone ke mavae te kau Iselaele ʼi Esipito.—Ekesote 12:29-32.
6 Ko te haofaki ʼaia neʼe ko he faigamālie kiā Sehova ke ina vaheʼi ia Iselaele ko hona puleʼaga neʼe ina fili. Neʼe ko he faigamālie ʼaia ke vikiʼi ai ia Sehova ko te ʼAtua ʼe ina fakahoko tana ʼu fakapapau, ʼe hoko moʼoni ia tana folafola. Neʼe fakahā ai te māʼoluga ʼo Sehova ʼi te ʼu ʼatua ʼo te ʼu puleʼaga. ʼI tatatou lau te hisitolia ʼo te haofaki ʼaia ʼo te kau Iselaele, ʼe ko he faʼahi ʼe ina fakaloto mālohiʼi ai tatatou tui. Kotou fakakaukauʼi age muʼa mo kanapau lā neʼe hoko kiā tātou he meʼa fēia! Neʼe sio ia Sosue ko Sehova neʼe “Māʼoluga ʼAupitō ʼi te kele kātoa.”—Pesalemo 83:18.
Ko Sehova ʼe Ina Puipui Tana Hahaʼi
7. Neʼe puipui feafeaʼi e Sehova te kau Iselaele mai te foʼi kautau ʼa Falaone?
7 ʼE feafeaʼi ʼo ʼuhiga mo te lua fakapapau, ʼaē ʼe puipui anai e Sehova tana hahaʼi? Neʼe kau te fakapapau ʼaia ʼi te fakapapau ʼaē ʼa Sehova ke ina haofaki te kau Iselaele mai Esipito pea mo fakahū nātou ki te Kele ʼo Te Fakapapau. Kotou manatuʼi, ko te Falaone ʼitaʼita neʼe ina tuli ia te kau Iselaele ʼaki tana foʼi kautau mālohi, pea mo tanatou ʼu sāliote e lauʼi teau. Neʼe lagi falala fau ia Falaone ki tona mālohi, tāfito lā ʼi te temi ʼaē neʼe kua hagē ai mole kei ʼi ai he holaʼaga ʼo te kau Iselaele, heʼe ʼi ʼonatou muʼa neʼe ko te tai pea ʼi muli neʼe ko te ʼu moʼuga! ʼI te temi leva ʼaia neʼe kua tonu ai ki te ʼAtua ke ina fai he puleʼaki moʼo puipui ia tana hahaʼi, pea neʼe ina fakatuʼu he ʼao ʼi te vaha ʼo te kau Iselaele pea mo te kau Esipito. ʼI te faʼahi ʼo te kau Esipito neʼe fakapōʼuli; kae neʼe mālama ʼi te faʼahi ʼo te kau Iselaele. ʼI te fakatuai e te ʼao ia te ʼomai ʼa te kau Esipito, neʼe hiki e Moisese tana ʼakau pea neʼe ava ai te Tai Kula, ʼo maʼu ai te holaʼaga ki te kau Iselaele, kae neʼe ko he hele ia ki te kau Esipito. Neʼe fakaʼauha kātoa e Sehova te foʼi kautau mālohi ʼa Falaone, ʼo ina puipui ai Tana hahaʼi mai te tuʼutāmaki neʼe ʼamanaki hoko kiā nātou.—Ekesote 14:19-28.
8. Ko te puipui fea ʼaē neʼe maʼu e te kau Iselaele (a) ʼi te toafa (b) pea ʼi te temi ʼaē neʼe natou hū ai ki te Kele ʼo Te Fakapapau?
8 ʼI tanatou kua fakalaka ʼi te Tai Kula, neʼe feʼoloʼaki te kau Iselaele ʼi he fenua neʼe ko he “toafa lahi fakamataku pea mo lahi ai te faga gata kafo kona pea mo te ʼu sekolopio; ʼi te kele kaka.” (Teutalonome 8:15, La Bible en français courant) Neʼe toe puipui aipē e Sehova ia tana hahaʼi ʼi te fenua ʼaia. Pea neʼe feafeaʼi ki te temi ʼaē neʼe natou hū ai ki te Kele ʼo Te Fakapapau? Neʼe fakafeagai kiā nātou ia te foʼi kautahi mālohi ʼa te kau Kanaane. Kae neʼe ʼui fēnei e Sehova kiā Sosue: “Tuʼu ake ki ʼaluga pea ke fakalaka ʼi te Solotane ʼaenī, ia koe pea mo tau hahaʼi fuli ʼaenī, ʼo hū ki te fenua ʼaē ʼe au foaki kiā nātou, ia te ʼu foha ʼo Iselaele. ʼE mole lava tuʼu anai he tahi ʼi ʼou muʼa ʼi tou temi maʼuli. Ohagē pē ko taku nofo mo Moisese, ʼe au nofo anai mo koe. ʼE mole au mavae anai iā te koe pea ʼe mole au liʼaki kātoa anai koe.” (Sosue 1:2, 5) Ko te ʼu folafola ʼaia ʼa Sehova neʼe hoko moʼoni. Iā teitei taʼu e ono, neʼe mālo ia Sosue ʼi te ʼu hau e toko 31 pea neʼe lahi te ʼu fenua ʼi te Kele ʼo Te Fakapapau neʼe pule kiai. (Sosue 12:7-14) Neʼe hoko tanatou ʼu mālo ʼaia ʼuhi pē ko te puipui ʼaē neʼe natou maʼu mai ia Sehova.
Ko Sehova ʼe Tokoni Ki Tana Hahaʼi
9, 10. Neʼe tokoni feafeaʼi ia Sehova ki tana hahaʼi ʼi tanatou nonofo ʼaē ʼi te toafa?
9 Tou vakaʼi age leva te tolu fakapapau—ko Sehova ʼe tokoni anai ki tana hahaʼi. Mole faʼa fualoa ki tonatou haofaki ʼaē mai Esipito, neʼe fēnei te fakapapau ʼa te ʼAtua ki te kau Iselaele: “Koʼenī ʼe au fakatō ifo te pane mai te lagi maʼa koutou; pea ʼe tonu anai ki te hahaʼi ke natou hū ki tuʼa ʼo tae ʼo tahi fakafuafua pē ki te ʼaho.” Ohagē pē ko tana ʼui, neʼe foaki e te ʼAtua ia te ‘pane ʼaia mai te lagi.’ “ ʼI te temi ʼaē neʼe sio kiai te ʼu foha ʼo Iselaele, neʼe natou kamata feʼuiʼaki: ‘Koteā koa te meʼa ʼaenī?’ ” Neʼe ko te mane, te pane ʼaē neʼe fakapapauʼi age e Sehova kiā nātou.—Ekesote 16:4, 13-15.
10 Lolotoga taʼu e 40 ʼi tanatou nonofo ʼi te toafa, neʼe tokaga ia Sehova ki te kau Iselaele, ʼo ina foaki age tanatou meʼa kai pea mo tanatou meʼa ʼinu. Neʼe toe tokaga ki tonatou ʼu mutuʼi meʼa ke mole popo pea mo tonatou ʼu vaʼe ke mole fufula. (Teutalonome 8:3, 4) Neʼe sio ia Sosue ki te ʼu meʼa fuli ʼaia. ʼO mulimuli pē ki te ʼu meʼa ʼaē neʼe ina fakapapauʼi age kiā nātou, neʼe haofaki e Sehova tana hahaʼi, mo ina puipui nātou, pea mo tokoni kiā nātou.
ʼE Haofaki e Sehova Tana Hahaʼi ʼi Totatou Temi
11. Koteā ʼaē neʼe hoko ʼi Brooklyn ʼi New York ʼi te taʼu 1914, pea neʼe ko te temi ʼo tea ʼaia ʼaē kua hoko mai?
11 ʼE feafeaʼi ki totatou temi? ʼI te Feliaono ʼuhu, ʼi te ʼaho 2 ʼo ʼOketopeli 1914, ko Charles Taze Russell ʼaē neʼe ina takitaki te kau Ako Tohi-Tapu ʼi te temi ʼaia, neʼe haʼu ki te fale kai ʼo te Petele ʼi Brooklyn, ʼi New York. Neʼe ina ʼui fakafiafia fēnei: “Mālo tokotou maʼuli.” Pea ʼi muʼa ʼo tana heka, neʼe ina tala fakafiafia age, “Kua ʼosi te temi ʼo te kau Senitile; kua ʼosi tonatou temi mālo.” Kua toe hoko mai te temi ʼaē kā haga ai ia Sehova, te Tuʼi ʼo te ʼatulaulau, ʼo haofaki tana hahaʼi. Pea neʼe ina fakahoko te faʼahi ʼaia!
12. Ko te haofaki fea ʼaē neʼe hoko ʼi te taʼu 1919, pea neʼe koteā tona ʼu fua?
12 Hili pē taʼu e nima kiai, pea neʼe haofaki e Sehova tana hahaʼi mai “Papiloni Lahi,” te mālohi faka mālamanei ʼo te ʼu lotu hala. (Fakahā 18:2) ʼE mole kaugamālie ia nātou ʼaē iā tātou kua mātutuʼa neʼe natou sisio ki te haofaki fakafiafia ʼaia. Kae, ʼe tou sisio lelei pē ki tona ʼu fua. Kua toe fakatuʼu e Sehova te tauhi maʼa pea mo faka logo tahiʼi ia nātou ʼaē ʼe natou fiafia ʼi te tauhi age kiā te ia. Neʼe fakakikite te faʼahi ʼaia e te polofetā ko Isaia: “ ʼE hoko moʼoni anai, ʼi te temi fakaʼosi ʼo te ʼu ʼaho, ko te moʼuga ʼo te fale ʼo Sehova ʼe fakatuʼu maʼu anai ʼi te tumutumu ʼo te ʼu moʼuga, pea ʼe mahino papau ia ʼe māʼoluga ake anai ia ʼi te ʼu moʼuga liliki; pea ko te ʼu fenua fuli ʼe natou ʼolo anai kiai.”—Isaia 2:2.
13. Koteā te tuputupu neʼe kotou sisio kiai ʼi te lotolotoiga ʼo te hahaʼi ʼa Sehova?
13 Ko te ʼu folafola ʼa Isaia neʼe hoko moʼoni. ʼI te taʼu 1919, neʼe kamata e te toe ʼo te kau fakanofo ia te fagonogono faka mālamanei, ʼo tupu ai te toe fakatuʼu ke māʼoluga ia te tauhi ʼo te ʼAtua moʼoni. ʼI te ʼu taʼu 1930, neʼe kua hā lelei te tānaki ʼo te “tahi ʼu ovi.” (Soane 10:16) ʼI te kamata, neʼe ko te ʼu toko lauʼi afe, ki muli age neʼe ko te toko lauʼi teau afe, pea ʼi te temi nei ko te ʼu toko lauʼi miliona kua natou kau ki te tauhi maʼa! ʼI te meʼa ʼaē neʼe hā ki te ʼapositolo ko Soane, ʼe talanoa ʼo ʼuhiga mo nātou ʼe ko “he toe hahaʼi tokolahi, ʼe mole feala hona lau e he tahi, mai te ʼu fenua fuli pea mo te ʼu telepī pea mo te ʼu hahaʼi pea mo te ʼu lea fuli.” (Fakahā 7:9) Koteā ʼaē neʼe kotou sisio kiai ʼi tokotou temi? Neʼe toko fia ia te kau Fakamoʼoni ʼa Sehova ʼi te temi ʼaē neʼe kotou kamata ako ai te moʼoni? Iā ʼaho nei, ko te toko 6 700 000 tupu ʼaē ʼe natou tauhi kiā Sehova. ʼI tana haofaki tana hahaʼi mai Papiloni Lahi, neʼe ʼavahi ai e Sehova te ala ke tuputupu fakatalakitupua tana hahaʼi, ʼaē ʼe tou sisio nei kiai ʼi te mālamanei kātoa.
14. Ko te haofaki fea ʼaē kei toe ke hoko mai?
14 ʼE toe te tahi haofaki ke fakahoko e Sehova, ko te haofaki ʼe kau kiai te hahaʼi fuli ʼo te kele. ʼE ʼamanaki ke fakahā e Sehova tona ʼuhiga māfimāfi ʼi te temi ʼaē kā ina fakaʼauha ai anai ia nātou fuli ʼaē ʼe fakafeagai kiā te ia, pea mo ina haofaki ai anai tana hahaʼi ʼo fakahū nātou ki he mālama foʼou ʼe fakatuʼu ai anai te faitotonu. ʼI meʼa fakafiafia hatatou sisio ki te fakagata ʼo te agakovi pea mo te kamataʼaga ʼo te mālama foʼou ki te hisitolia kātoa!—Fakahā 21:1-4.
ʼE Puipui e Sehova Tana Hahaʼi ʼi Totatou Temi
15. He koʼē neʼe ʼaoga ke puipui e Sehova tana hahaʼi ʼi te temi nei?
15 Ohagē ko te faʼahi neʼe kua tou talanoa kiai, neʼe ʼaoga ki te kau Iselaele ʼo te temi ʼo Sosue ke puipui nātou e Sehova. Kei ʼaoga koa ki te hahaʼi ʼa Sehova ʼaē ʼi te temi nei ia tana puipui? ʼEī! Neʼe fakatokaga fēnei e Sesu ki tana ʼu tisipulo: “ ʼE ʼave anai koutou ki te mamahi pea ʼe matehi anai koutou, pea ʼe fehiʼaʼinaʼi anai koutou e te ʼu puleʼaga kātoa ʼuhi ko toku huafa.” (Mateo 24:9) Talu mai fualoa, ko te kau Fakamoʼoni ʼa Sehova ʼi te mālamanei neʼe natou ʼūtakiʼi te fakafeagai mālohi pea mo te ʼu fakataga fakamataku. Kae neʼe tokoni aipē ia Sehova ki tana hahaʼi. (Loma 8:31) Ko tana Folafola ʼe ina fakapapauʼi mai, ʼe mole he meʼa—‘he mahafu ʼe fakafeagai kiā tātou’—ʼe ina fakagata anai tatatou faka mafola ia te Puleʼaga pea mo tatatou akoʼi ʼaē ia te hahaʼi.—Isaia 54:17.
16. Ko te fakamoʼoni fea kua kotou maʼu ʼe fakahā ai te puipui ʼa Sehova ia tana hahaʼi?
16 Logolā tonatou fehiʼaʼinaʼi ʼi te mālamanei, kae neʼe tuputupu aipē ia te ʼu kaugana ʼa Sehova. ʼE tuputupu te kau Fakamoʼoni ʼa Sehova ʼi te ʼu fenua e 236—ʼo fakamoʼoni ai ko Sehova ʼe nofo mo tātou, ʼo ina puipui tātou mai iā nātou ʼaē ʼe natou fia fakaʼauha tātou peʼe fia fakagata tatatou gāue. ʼE kei kotou manatuʼi koa te ʼu higoa ʼo te ʼu pule faka politike mālohi peʼe ko te kau takitaki faka lotu ʼaē neʼe natou gaohi koviʼi te hahaʼi ʼa te ʼAtua ʼi tanatou kei māʼuʼuli? Koteā ʼaē neʼe hoko kiā nātou? Kua natou ʼifea ʼi te temi nei? Tokolahi ia nātou kua natou mamate, ohagē pē ko Falaone ʼi te temi ʼo Moisese pea mo Sosue. Pea ʼe feafeaʼi ki te ʼu kaugana ʼa te ʼAtua ʼo te temi nei ʼaē kua mamate agatonu? ʼE taupau lelei nātou ʼi te ʼatamai ʼo Sehova. ʼE ko he faʼahi lelei ʼaia ke natou nonofo ai. ʼE mahino ia, ʼo ʼuhiga mo te puipui, kua hoko moʼoni ia te folafola ʼa Sehova.
Ko Sehova ʼe Tokoni Ki Tana Hahaʼi Iā ʼAho Nei
17. Ko te fakapapau fea ʼaē neʼe foaki e Sehova ʼo ʼuhiga mo te meʼa kai fakalaumālie?
17 Neʼe tokoni ia Sehova ki tana hahaʼi ʼaē neʼe nonofo ʼi te toafa, pea ʼe toe tokoni ki tana hahaʼi iā ʼaho nei. ʼE fafaga tātou ʼi te faʼahi fakalaumālie e “te tagata kaugana agatonu mo poto.” (Mateo 24:45) ʼE tou maʼu te ʼatamai mālama ʼo ʼuhiga mo te ʼu moʼoni fakalaumālie ʼaē neʼe nofo fakalilo lolotoga te ʼu sēkulō. Neʼe ʼui fēnei e te ʼāselo kiā Taniela: “Taupau fakalilo te ʼu folafola pea mo fakamaʼu te tohi, ʼo aʼu ki te temi fakaʼosi. Ko te tokolahi ʼe natou ʼolo anai ʼi hē mo hē, pea ko te ʼatamai mālama moʼoni ʼe mahu anai.”—Taniela 12:4.
18. He koʼē ʼe feala ke tou ʼui kua mahu iā ʼaho nei te ʼatamai mālama moʼoni?
18 ʼE tou māʼuʼuli nei ʼi te temi fakaʼosi, pea kua mahu te ʼatamai mālama moʼoni. ʼI te mālamanei, ko te laumālie māʼoniʼoni neʼe ina takitaki te hahaʼi ʼaē ʼe natou manako ki te moʼoni, ke natou maʼu ia te ʼatamai mālama ʼo te ʼAtua moʼoni pea mo tana ʼu fakatuʼutuʼu. Kua mahu iā ʼaho nei te ʼu Tohi-Tapu, pea mo te ʼu tohi faka Tohi-Tapu moʼo tokoni ki te hahaʼi ke natou mahino ki te ʼu moʼoni maʼuhiga ʼaē ʼe tou maʼu ʼi te Tohi-Tapu. Ohagē lā, tou vakaʼi age muʼa te tānakiʼaga ʼo te ʼu kupu tāfito ʼo te tohi Koteā ʼAē ʼe Akoʼi Moʼoni Mai ʼi Te Tohi-Tapu? a ʼE tou maʼu ʼi te tānakiʼaga ʼaia ia te ʼu kāpite ʼaenī: “Koteā Te Moʼoni ʼo ʼUhiga Mo Te ʼAtua?,” “ ʼE ʼIfea Koa Te Kau Mate?,” “Koteā Koa Ia Te Puleʼaga ʼo Te ʼAtua?,” pea “He Koʼe Koa ʼe Fakagafua e Te ʼAtua Te ʼu Mamahi?” Neʼe ko he ʼu fehuʼi fēia neʼe fai e te hahaʼi talu mai fualoa. ʼI te temi nei kua faigafua tatatou maʼu te ʼu tali ki te ʼu fehuʼi ʼaia. Logolā te mole ʼiloʼi e te hahaʼi ia te ʼu tali ki te ʼu fehuʼi ʼaia lolotoga ni ʼu sēkulō pea mo te ʼu ako faka ʼapositā ʼaē neʼe fai e te Keletiate, kae ʼe mālohi age pē te Folafola ʼa te ʼAtua, ʼo tokoni kiā nātou fuli ʼaē ʼe natou fia tauhi kiā Sehova.
19. Ko te ʼu fakapapau fea ʼaē neʼe kua kotou sio mata kiai kua fakahoko, pea koteā te manatu ʼe kotou maʼu kiai?
19 ʼAki te ʼu faʼahi ʼaē neʼe kua tou sio mata kiai, kua feala ke tou ʼui fēnei: “Neʼe mole he folafola neʼe mole hoko ʼi te ʼu folafola lelei fuli ʼaē neʼe tala atu e Sehova, tokotou ʼAtua. Neʼe hoko fuli ia maʼa koutou. Neʼe mole hana folafola e tahi ʼi te ʼu folafola ʼaia neʼe mole hoko.” (Sosue 23:14) Ko Sehova ʼe ina haofaki, mo puipui, pea mo tokoni ki tana ʼu kaugana. ʼE feala koa hakotou fakahā he fakapapau neʼe mole ina fakahoko ʼi tona temi totonu? Kailoa. ʼE tou falala kātoa ki te moʼoni ʼo te Folafola ʼa te ʼAtua.
20. He koʼē ʼe feala ke tou loto falala ki te kā haʼu?
20 ʼE feafeaʼi ki te kā haʼu? ʼE ʼui mai e Sehova, ko te tokolahi iā tātou ʼe feala hanatou falala ke natou māʼuʼuli ʼi he kele kua fakaliliu ko he palatiso taulekaleka. Ko te tokosiʼi iā tātou ʼe natou maʼu te ʼamanaki ke natou kaugā hau ʼi selō mo Kilisito. Tatau aipē pe koteā tatatou ʼamanaki, ʼe tonu ke tou nonofo agatonu ohagē ko Sosue. ʼE hoko mai anai te ʼaho ʼaē kā hoko moʼoni ai tatatou ʼamanaki. Pea ʼe tou manatuʼi ai anai te ʼu fakapapau fuli ʼaē neʼe fai mai e Sehova, pea mo tou ʼui fēnei anai: “Neʼe hoko fuli.”
[Kiʼi nota]
a Neʼe tā e te kau Fakamoʼoni ʼa Sehova.
ʼE Feala Koa Hakotou Fakamahino?
• Ko te ʼu fakapapau fea ʼa Sehova ʼaē neʼe sio kiai Sosue neʼe fakahoko?
• Ko te ʼu fakapapau fea ʼa te ʼAtua ʼaē neʼe kua kotou sisio kiai kua fakahoko?
• Koteā ʼaē ʼe feala ke tou tui papau kiai ʼo ʼuhiga mo te folafola ʼa te ʼAtua?
[Paki ʼo te pasina 23]
Neʼe haofaki e Sehova tana hahaʼi
[Paki ʼo te pasina 23]
Neʼe puipui feafeaʼi e Sehova tana hahaʼi ʼi te Tai Kula?
[Paki ʼo te pasina 24]
Neʼe tokoni feafeaʼi ia Sehova ki tana hahaʼi ʼaē neʼe nonofo ʼi te toafa?
[Paki ʼo te pasina 25]
ʼE tokaga ia Sehova ki tana hahaʼi iā ʼaho nei