ʼE Tou Lava Fakaōvi Feafeaʼi Kiā “Ia ʼAē ʼe Fagono Ki Te Faikole”

“Ia koe ʼaē ʼe fagono ki te faikole, ʼe ʼolo atu anai kiā te koe te hahaʼi ʼo te kakano fuli pe.”​—Pesalemo 65:⁠2.

1. Koteā ʼaē ʼe kehe ai te tagata pea mo te ʼu meʼa fuli ʼaē neʼe fakatupu e te ʼAtua, pea ko te faigamālie fea ʼaē ʼe tou maʼu ai?

ʼI TE ʼu meʼa fuli ʼaē neʼe fakatupu e te ʼAtua, ʼe gata pe ko te tagata ʼaē ʼe feala ke atolasio ki te Tupuʼaga. ʼE gata pe ki te tagata ʼaē ʼe ina logoʼi te ʼaoga ʼaē kiā ia te ʼu meʼa fakalaumālie pea mo ina fia maʼu te ʼu meʼa ʼaia. ʼE tou maʼu ai te faigamālie fakaofoofo ke tou felogoi takitokotahi mo tatatou Tāmai ʼaē ʼi selo.

2. Koteā te ʼu fua kovi ʼo te agahala ki te ʼu felogoi ʼa te tagata mo tona Tupuʼaga?

² Neʼe fakatupu e te ʼAtua te tagata ʼaki te fealagia ʼaē ke fakaōvi ki tona Tupuʼaga. Neʼe fakatupu haohaoa ia Atama pea mo Eva. Neʼe feala ai hanā fakaōvi faʼifaʼitaliha ki te ʼAtua ohage ko te fakaōvi ʼa he tamasiʼi ki tana tāmai. Kae neʼe puli te pilivilesio lahi ʼaia ʼi tanā agahala. Neʼe talagataʼa ia Atama mo Eva ki te ʼAtua pea neʼe mole kei nā felogoi lelei ai mo ia. (Senesi 3:​8-13, 17-24) Ko tona faka ʼuhiga koa ʼe mole kei lava felogoi te hōloga ʼo Atama mo te ʼAtua? Kailoa, ʼe tali pe e Sehova ke nātou fakaōvi kiā te ia, mo kapau foki ʼe nātou mulimuli ki he ʼu fakamaʼua. Koteā te ʼu fakamaʼua ʼaia?

Te ʼu Fakamaʼua Ke Tou Fakaōvi Ai Ki Te ʼAtua

3. ʼE tonu ke fakaōvi feafeaʼi te ʼu hahaʼi agahala ki te ʼAtua, pea ko te faʼifaʼitaki fea ʼaē ʼe ina fakahā te faʼahi ʼaia?

³ Ko te meʼa ʼaē neʼe hoko ki te ʼu foha e toko lua ʼo Atama, ʼe tokoni mai ke tou ʼiloʼi te ʼu meʼa ʼaē ʼe fakamaʼua e te ʼAtua ki he tagata agahala ʼe fia fakaōvi kiā te Ia. Ko Kaino mo Apele neʼe nā faiga ke nā fakaōvi ki te ʼAtua ʼo nā momoli he ʼu sākilifisio kiā te ia. Neʼe tali te mōlaga ʼa Apele, kae neʼe mole tali ʼaē ʼa Kaino. (Senesi 4:​3-5) Koteā ʼaē neʼe nā kehekehe ai? ʼE ʼui fēnei iā Hepeleo 11:4: “Aki te tui, nee momoli ki te Atua e Apele he sakilifisio nee leleiʼage i te sakilifisio a Kaino, nee ina tali ai te fakamooni, e ko he tagata agatonu.” Koia ʼe hā lelei mai ʼe maʼua ke kita tui ke feala ai hakita fakaōvi ki te ʼAtua. ʼE tou mahino ki te tahi fakamaʼua ʼi te ʼui fēnei ʼa Sehova kiā Kaino: “Kapau ʼe ke fai te meʼa ʼaē ʼe lelei, ʼe mole hoko anai koa he hikihiki?” Ei, neʼe feala ke fakaōvi ia Kaino ki te ʼAtua mo kanapaula neʼe haga fai e Kaino te meʼa ʼaē ʼe lelei. Kae neʼe fakafisi ia Kaino ki te tokoni ʼa te ʼAtua, neʼe ina matehi ia Apele, pea neʼe kapu leva ia ia. (Senesi 4:​7-12) Koia ʼi te kamata ʼo te malamanei, neʼe fakahā lelei ai te maʼuhiga ʼaē ke kita fakaōvi ki te ʼAtua ʼaki te tui pea mo fai he ʼu gāue ʼe lelei.

4. Koteā ʼaē ʼe tonu ke tou fakamoʼoni kiai mo kapau ʼe tou fia fakaōvi ki te ʼAtua?

⁴ Kapau ʼe tou fia fakaōvi ki te ʼAtua pea ʼe tonu ke tou fakamoʼoni ki totatou ʼuhiga agahala. Ko te tagata fuape ʼe agahala, pea ʼe ko te agahala ʼaē ʼe ina tāʼofi te hahaʼi ke nātou fakaōvi ki te ʼAtua. Neʼe tohi fēnei e te polofeta ko Selemia ʼo ʼuhiga mo Iselaele: “Neʼe mātou agahala . . . Neʼe ke tāʼofi te lava fakaōvi atu kiā te koe ʼaki he ʼao mātolu, ke mole aʼu atu te faikole.” (Tagilāulau 3:​42, 44) Logola te faʼahi ʼaia, ʼi te hisitolia ʼo te tagata, neʼe fakahā e te ʼAtua tana tali te ʼu faikole ʼa nātou ʼaē ʼe fakaōvi kiā te ia ʼi te tui pea ʼaki he loto ʼe lelei, ʼo nātou mulimuli ki tana ʼu fakatotonu. (Pesalemo 119:145) Ko ai ia nātou ʼaia, pea koteā te ako ʼe feala ke tou tāʼofi mai tanatou ʼu faikole?

5, 6. Koteā ʼaē ʼe feala ke tou ako mai te fakaōvi ʼa Apalahamo ki te ʼAtua?

⁵ Neʼe kau ʼi te hahaʼi ʼaia ia Apalahamo. Neʼe tali e te ʼAtua tana fakaōvi kiā te ia, he neʼe ina fakahigoaʼi ia Apalahamo ko “toku kaumeʼa.” (Isaia 41:8) Koteā te ako ʼe feala ke tou tāʼofi mai te fakaōvi ʼa Apalahamo ki te ʼAtua? Neʼe faifehuʼi te pateliaka agatonu ʼaia kiā Sehova ʼo ʼuhiga mo tona hāko, ʼo ina ʼui fēnei: “Koteā ʼaē ka ke foaki mai anai, he koʼeni ʼe au mavae kae mole haku fānau?” (Senesi 15:​2, 3; 17:18) ʼI te tahi lakaga, neʼe ina fakahā tana tuʼania ʼaē peʼe ko ai ka hāofaki anai ʼi te fakamāuʼi e te ʼAtua ia te kau agakovi ʼi te ʼu kolo ko Sotoma pea mo Komola. (Senesi 18:​23-33) Neʼe toe kolekole e Apalahamo ʼo ʼuhiga mo te tahi atu hahaʼi. (Senesi 20:​7, 17) Pea ohage ko Apele, neʼe fakaōvi ia Apalahamo ki te ʼAtua ʼi te ʼu temi ʼaē neʼe ina momoli ai te ʼu sākilifisio kiā Sehova.​—Senesi 22:​9-14.

⁶ ʼI te ʼu lakaga fuli ʼaia, neʼe palalau faʼitaliha ia Apalahamo kiā Sehova. Kae neʼe ina fai ʼaki te agavaivai, ʼuhi ko tona tuʼulaga iā muʼa ʼo tona Tupuʼaga. Koutou tokagaʼi tana ʼu palalau fakaʼapaʼapa, ʼaē ʼe tou maʼu iā Senesi 18:27: “Fakalelei mai ʼi taku haga palalau atu kiā Sehova, ia au ʼaē ko te efu pea mo te lefulefu.” Ko he aga lelei ia ʼe tonu ke tou faʼifaʼitakiʼi!

7. Koteā ʼaē neʼe palalau kiai te kau pateliaka ʼi tanatou faikole kiā Sehova?

⁷ Ko te ʼu pateliaka neʼe nātou faikole ʼo ʼuhiga mo te tahi ʼatu ʼu faʼahi, pea neʼe fakalogo ia Sehova ki tanatou ʼu faikole. Neʼe fai e Sakopo te kole ohage ko hana fai he fakapapau. ʼI tana ʼosi kole ʼaē ke tokoni te ʼAtua kiā ia, neʼe fakapapau fēnei: “Ko te ʼu meʼa fuli ʼaē ka ke foaki mai, ʼe au foaki atu anai tona vahe hogofulu.” (Senesi 28:​20-22) Ki muli age, ʼi tana ʼamanaki felāveʼi mo tona tēhina, neʼe kole mamahi e Sakopo kiā Sehova ke puipui ia ia, ʼo ina ʼui fēnei: “ ʼE au kole atu, ke ke fakahāo au mai te nima ʼo toku tēhina, mai te nima ʼo Esau, heʼe au mataku ia ia.” (Senesi 32:​9-12) Neʼe fakaōvi te pateliaka ko Sopo kiā Sehova, ʼo ina momoli te ʼu sākilifisio maʼa tona famili. ʼI te agahala ʼa te ʼu kaumeʼa e toko tolu ʼo Sopo ʼi te ʼu palalau neʼe nātou fai, neʼe faikole ia Sopo maʼa nātou, pea “neʼe tali e Sehova te kole ʼa Sopo.” (Sopo 1:5; 42:​7-9) Ko te ʼu fakamatala ʼaia ʼe tokoni mai ke tou ʼiloʼi te ʼu faʼahi ʼe feala ke tou palalau kiā Sehova ʼi tatatou faikole. ʼE tou toe mahino ai ʼe lotolelei ia Sehova ke ina tali te ʼu faikole ʼa nātou ʼaē ʼe fakaōvi kiā te ia ʼo mulimuli ki tona ʼu fakamaʼua.

ʼI Te Fuakava ʼo Te Lao

8. ʼI te fuakava ʼo te Lao, neʼe feafeaʼi te fakahā kiā Sehova ʼi te faikole te ʼu faʼahi ʼo ʼuhiga mo te hahaʼi?

⁸ ʼI te ʼosi fakamavae e Sehova ia te puleʼaga ʼo Iselaele mai Esipito, neʼe ina foaki kiā nātou te fuakava ʼo te Lao. ʼI te Lao neʼe fai te fakatuʼutuʼu moʼo fakaōvi ki te ʼAtua ʼaki te kalasi ʼo te kau pelepitelo ʼaē neʼe fakanofo. Ko ʼihi Levite neʼe nātou fai te ʼu gāue ʼa te kau pelepitelo maʼa te hahaʼi. ʼO ʼuhiga leva mo te ʼu faʼahi maʼuhiga ʼo te fenua, ko he tahi neʼe ina fakafofoga te hahaʼi​—ʼi ʼihi temi neʼe ko te hau peʼe ko he polofeta​—ʼo ina fakahā te faʼahi ʼaia ki te ʼAtua ʼi te faikole. (1 Samuele 8:​21, 22; 14:​36-41; Selemia 42:​1-3) Ohage la, ʼi te fakatapuʼi ʼo te fale lotu, neʼe fakaōvi te Hau ko Salomone kiā Sehova ʼaki he faikole fakamalotoloto. Pea neʼe fakahā e Sehova tana tali te faikole ʼa Salomone, ʼo ina fakafonu te fale lotu ʼaki Tona kolōlia, pea mo ʼui fēnei: “ ʼE fakalogo [anai] toku ʼu taliga ki te faikole ʼaē ka fai ʼi te potu ʼaenī.”​—2 Fakamatala 6:12–7:​3, 15.

9. Koteā ʼaē neʼe fakamaʼua ke feala he fakaōvi kiā Sehova ʼi te sagatualio?

⁹ ʼI te Lao ʼaē neʼe foaki ki Iselaele, neʼe fakahā ai e Sehova te fakamaʼua ke feala he fakaōvi kiā te ia ʼi te sagatualio. Neʼe koteā te fakamaʼua ʼaia? ʼI te uhu fuli pea mo te afiafi fuli, neʼe tonu ke momoli he ʼu sākilifisio manu pea neʼe tonu ki te pelepitelo lahi ke ina tutu te ʼīsēsō magoni iā muʼa ʼo Sehova. Ki muli age, ko te kau lagolago pelepitelo neʼe nātou toe fai te gāue ʼaia, gata pe ʼi te ʼAho ʼo te Faifakalelei. Kapau neʼe mole fai e te kau pelepitelo te faʼahi maʼuhiga ʼaia, neʼe mole tali e Sehova tanatou gāue.​—Ekesote 30:​7, 8; 2 Fakamatala 13:⁠11.

10, 11. Koteā ʼaē ʼe fakahā mai neʼe tali e Sehova te ʼu faikole ʼaē ʼe fai e te hahaʼi takitokotahi?

¹⁰ ʼI te Iselaele ʼo te temi muʼa, neʼe feala pe koa ke nātou fakaōvi ki te ʼAtua ʼaki pe te hahaʼi ʼaē neʼe hinoʼi kiai? Kailoa ia, heʼe fakahā ʼi te Tohi-Tapu ko Sehova neʼe ina tali te ʼu faikole ʼaē neʼe fai e te hahaʼi takitokotahi. ʼI te faikole ʼa Salomone ʼi te fakatapuʼi ʼo te fale lotu, neʼe faikole kiā Sehova, ʼo ina ʼui fēnei: “Tatau aipe pe koteā te kole, pe ko te fakakolekole ki te ʼofa ʼaē ʼe fai e he tagata peʼe ko tau hahaʼi kātoa ʼo Iselaele, . . . ʼi te temi ʼaē ka ina folahi moʼoni tona ʼu ʼalofi nima ʼo haga ki te fale ʼaenī, ʼofa pe ke ke logo mai lagi.” (2 Fakamatala 6:​29, 30) ʼE fakahā mai ʼi te tohi ʼa Luka, ʼi te temi ʼaē neʼe tutu ai e Sakalia, te tāmai ʼo Soane Patita, ia te ʼīsēsō ʼi te sagatualio, ko te kau atolasio ʼa Sehova tokolahi neʼe mole ko he kau pelepitelo neʼe nātou “faikole i tua.” ʼE hā mai, neʼe ko he agamāhani ʼa te hahaʼi te fakatahitahi ʼi tuʼa ʼo te sagatualio moʼo faikole, kae lolotoga tutu te ʼīsēsō maʼa Sehova ʼi te ʼaletale aulo.​—Luka 1:​8-10.

¹¹ Ka fakaōvi te hahaʼi kiā Sehova ʼo mulimuli ki tona ʼu fakamaʼua, pea ʼe fiafia ʼi te ʼu faikole ʼa nātou ʼaē neʼe nātou fakafofoga te puleʼaga pea mo te hahaʼi takitokotahi ʼaē neʼe nātou fia fakaōvi kiā te ia. Iā ʼaho nei, ʼe mole kei tou māʼuʼuli ʼi te fuakava ʼo te Lao. Logola te faʼahi ʼaia, kae ʼe feala ke tou maʼu he ʼu ako maʼuhiga ʼo ʼuhiga mo te faikole mai te faʼahiga fakaōvi ʼa te kau Iselaele ʼi te temi muʼa ki te ʼAtua.

Te Fakaōvi Kiā Sehova ʼi Te Temi ʼo Te Kau Kilisitiano

12. Koteā te fakatuʼutuʼu maʼa te kau Kilisitiano ke nātou fakaōvi kiā Sehova?

¹² ʼI te temi nei, ʼe tou mulimuli ki te fakatuʼutuʼu neʼe fai e Kilisito. ʼE mole kei ʼi ai he fale lotu maʼa he kau pelepitelo ʼe nātou fakafofoga te hahaʼi kātoa ʼa te ʼAtua peʼe ke tou haga kiai mokā tou faikole ki te ʼAtua. Kae ʼe kei ʼi ai te fakatuʼutuʼu ʼa Sehova ke tou fakaōvi kiā te ia. Koteā te fakatuʼutuʼu ʼaia? ʼI te taʼu 29 ʼo totatou temi, ʼi te fakanofo ʼa Kilisito ʼaki te laumālie maʼoniʼoni pea mo hinoʼi ai ko te Pelepitelo Lahi, neʼe kamata ai te gāue ʼo te fale lotu fakalaumālie.a Ko te fale lotu fakalaumālie ʼaia neʼe ko te fakatuʼutuʼu foʼou moʼo fakaōvi kiā Sehova ʼi te tauhi ʼo fakatafito ki te sākilifisio faifakalelei ʼo Sesu Kilisito.​—Hepeleo 9:​11, 12.

13. ʼO ʼuhiga mo te faikole, koteā he faʼahi ʼe tatau ai te fale lotu ʼi Selusalemi pea mo te fale lotu fakalaumālie?

¹³ Ko ʼihi agaaga ʼo te fale lotu ʼi Selusalemi ʼe nātou fakatātā lelei te ʼu agaaga kehekehe ʼo te fale lotu fakalaumālie, ʼo kau kiai mo te ʼu agaaga ʼo ʼuhiga mo te faikole. (Hepeleo 9:​1-10) Ohage la, koteā ʼaē neʼe ina fakatātā ia te ʼīsēsō ʼaē neʼe momoli, ʼi te uhu pea mo te afiafi, ʼi te ʼaletale ʼo te ʼīsēsō ʼi te Potu Taputapu ʼo te fale lotu? Ohage ko tona ʼui ʼi te tohi ʼo Apokalipesi, “ko te ʼīsēsō ʼe ina fakatātā te ʼu faikole ʼa te kau maʼoniʼoni.” (Apokalipesi 5:​8, MN; 8:​3, 4) Neʼe tohi fēnei e Tavite ʼaki te takitaki ʼa te laumālie: “ ʼOfa pe ke teuteuʼi taku faikole ohage ko he ʼīsēsō ʼi ʼou muʼa.” (Pesalemo 141:2) Koia ʼi te fakatuʼutuʼu faka Kilisitiano, ko te ʼīsēsō magoni neʼe ina fakatātā lelei te ʼu faikole pea mo te ʼu fakavikiviki ʼaē ʼe tali e Sehova.​—1 Tesalonika 3:⁠10.

14, 15. Koteā ʼaē ʼe feala ke tou ʼui ʼo ʼuhiga mo te fakaōvi kiā Sehova (a) ʼa te kau fakanofo? (b) ʼa te “tahi ʼu ōvi”?

¹⁴ Ko ai ʼaē neʼe feala ke fakaōvi ki te ʼAtua ʼi te fale lotu fakalaumālie ʼaia? ʼI te fale lotu ʼāfea, neʼe ko te kau pelepitelo pea mo te kau Levite ʼaē neʼe nātou maʼu te pilivilesio ke nātou tauhi ʼi te malaʼe ʼaē neʼe tuʼu ʼi loto ʼo te fale lotu, kae neʼe gata pe ki te kau pelepitelo ʼaē neʼe feala ke nātou hū ki te Potu Taputapu. Ko te kau Kilisitiano fakanofo ʼaē ʼe nātou maʼu te ʼamanaki ki te maʼuli ʼi selo, ʼe ko nātou ʼāteaina pe ʼaē ʼe nātou maʼu te ʼaluʼaga fakalaumālie ʼaē neʼe fakatātā e te malaʼe ʼi te loto fale lotu pea mo te Potu Taputapu, ʼo feala ai kiā nātou ke nātou faikole pea mo fakavikiviki ki te ʼAtua.

¹⁵ E feafeaʼi kiā nātou ʼaē ʼe nātou maʼu te ʼamanaki ʼaē ke nātou māʼuʼuli ʼi te kele, te “tahi ʼu ōvi”? (Soane 10:​16, MN ) Neʼe fakahā e te polofeta ko Isaia ko te hahaʼi ʼo te ʼatu ʼu puleʼaga ʼe nātou ʼōmai anai ʼo atolasio kiā Sehova “ ʼi te temi fakaʼosi ʼo te ʼu ʼaho.” (Isaia 2:​2, 3) Neʼe ina toe tohi ko te kau “matāpule” ʼe nātou fakatahitahi anai kiā Sehova. Moʼo fakahā tana tali ʼaki he lotolelei ia tanatou fakaōvi age kiā te ia, neʼe ʼui fēnei e te ʼAtua: “ ʼE au fakafiafia anai nātou ʼi toku fale faikole.” (Isaia 56:​6, 7) ʼE fakahā iā Apokalipesi 7:​9-15 (MN), te tahi ʼu faʼahi, ʼe talanoa ʼo ʼuhiga mo “te toe hahaʼi tokolahi” mai “te ʼu fenua fuli” ʼe nātou fakatahitahi moʼo atolasio pea mo faikole ki te ʼAtua “ ʼi te ʼaho mo te po,” ʼo nātou tutuʼu ʼi tuʼa atu ʼo te malaʼe ʼo te fale lotu fakalaumālie. ʼE ko he fakaloto fīmālie te ʼiloʼi ʼaē ko te ʼu kaugana fuli ʼa te ʼAtua iā ʼaho nei ʼe feala ke nātou fakaōvi faʼifaʼitaliha ki te ʼAtua, ʼo nātou falala kātoa ʼe fakalogo ki tanatou ʼu faikole!

Ko Te ʼu Faikole Fea ʼAē ʼe Tali?

16. Koteā ʼaē ʼe feala ke tou ako mai te ʼu ʼuluaki Kilisitiano ʼo ʼuhiga mo te faikole?

¹⁶ Ko te ʼu ʼuluaki Kilisitiano neʼe ko te ʼu hahaʼi faikole. Neʼe koteā ʼaē neʼe nātou faikole kiai? Ko te kau tagata ʼāfea Kilisitiano neʼe nātou kole tana takitaki moʼo filifili he ʼu tagata ke foaki age kiā nātou he ʼu maʼua. (Gaue 1:​24, 25; 6:​5, 6) Ko Epafalase neʼe faikole maʼa tona ʼu tēhina. (Kolose 4:12) Ko nātou ʼo te kokelekasio ʼi Selusalemi neʼe nātou faikole maʼa Petelo ʼi tona pilisoniʼi. (Gaue 12:5) Ko te ʼu ʼuluaki Kilisitiano neʼe nātou kole ki te ʼAtua ke ina foaki kiā nātou te lototoʼa ʼi te hoko ʼo te fakataga, ʼo nātou ʼui fēnei: “Sehova, tokagaʼi tanatou ʼu fakamatakutaku, pea faka fealagia ki tau ʼu kaugana ke nātou haga tala tau folafola ʼaki he lototoʼa kātoa.” (Gaue 4:​23-30, MN ) Ko te tisipulo ko Sakopo neʼe ina uga te kau Kilisitiano ke nātou faikole ki te ʼAtua ke nātou maʼu te poto mokā hoko he ʼu faigataʼaʼia. (Sakopo 1:5) ʼE koutou faikole koa kiā Sehova ʼo ʼuhiga mo te ʼu faʼahi ʼaia?

17. Ko te ʼu faikole ʼa ai ʼaē ʼe tali e Sehova?

¹⁷ ʼE mole tali e te ʼAtua te ʼu faikole fuli. ʼE tou lava ʼiloʼi papau feafeaʼi ʼe ina tali anai tatatou ʼu faikole? Ko te hahaʼi agatonu ʼi te temi muʼa, ʼaē neʼe fakalogo e te ʼAtua ki tanatou faikole neʼe nātou fakaōvi kiā te ia ʼaki he loto moʼoni pea mo faitotonu. Neʼe nātou fakahā te tui pea mo fakahā tanatou tui ʼaki he ʼu gāue lelei. ʼE tou lava tui papau ko Sehova ʼe fakalogo anai kiā nātou ʼaē ʼe fakaōvi feiā kiā te ia iā ʼaho nei.

18. Kapau ʼe loto e te kau Kilisitiano ke logoʼi tanatou ʼu faikole, koteā ʼaē ʼe tonu ke nātou fai?

¹⁸ ʼE ʼi ai te tahi fakamaʼua. Neʼe fakamahino e te ʼapositolo ko Paulo te faʼahi ʼaia, ʼo ina ʼui fēnei: “ ʼAki ia ia ʼe tou . . . fakaōvi ki te Tāmai ʼi he laumālie ʼe tahi.” Ko ai ʼaē neʼe talanoa kiai ia Paulo ʼi tana tohi ʼaē “ ʼaki ia ia”? Neʼe talanoa ia kiā Sesu Kilisito. (Efeso 2:​13, 18, MN ) Ei, ʼe feala ke tou fakaōvi faʼifaʼitaliha ki te Tāmai ʼaki pe ia Sesu.​—Soane 14:6; 15:16; 16:​23, 24.

19. (a) Neʼe liliu feafeaʼi te momoli ʼo te ʼīsēsō ʼi Iselaele ko he meʼa fakalialia kiā Sehova? (b) ʼE tou lava ʼiloʼi papau feafeaʼi ko tatatou ʼu faikole ʼe hage ko he ʼīsēsō magoni kiā Sehova?

¹⁹ Ohage ko tatatou ʼui ki muʼa atu, ko te ʼīsēsō ʼaē neʼe momoli e te kau pelepitelo Iselaele ʼe ina fakatātā te ʼu faikole ʼa te ʼu kaugana agatonu ʼa te ʼAtua ʼaē ʼe tali. Kae ʼi te tahi temi, ko te ʼīsēsō ʼaē neʼe momoli e te kau Iselaele neʼe ko he meʼa fakalialia kiā Sehova. Neʼe hoko te faʼahi ʼaia ʼi te temi ʼaē neʼe tutu ai e te kau Iselaele te ʼīsēsō ʼi te fale lotu kae ʼi te temi pe ʼaia neʼe nātou tulolo iā muʼa ʼo te ʼu tamapua. (Esekiele 8:​10, 11) ʼO toe feiā iā ʼaho nei, ko te faikole ʼa nātou ʼaē ʼe nātou lau ʼe nātou tauhi kiā Sehova kae nātou fai he ʼu aga ʼe mole ʼalutahi mo tana ʼu lao, ʼe hage ia ko he meʼa fakalialia kiā te ia. (Tāʼaga Lea 15:8) Koia tou haga taupau ke maʼa totatou maʼuli ʼi te ʼu faʼahi fuli, ke hage tatatou ʼu faikole ko he ʼīsēsō magoni ki te ʼAtua. ʼE fiafia ia Sehova ʼi te ʼu faikole ʼa nātou ʼaē ʼe nātou mulimuli ki tona ʼu ala faitotonu. (Soane 9:31) Kae kei toe te tahi ʼu fehuʼi ʼe tonu ke tou tali kiai. ʼE tonu ke tou tutuʼu feafeaʼi mokā tou faikole? ʼE feala ke tou faikole kiteā? Pea ʼe tali feafeaʼi e te ʼAtua ki tatatou ʼu faikole? ʼI te alatike ka hoa mai, ʼe tou vakaʼi anai te ʼu fehuʼi ʼaia pea mo te tahi ʼatu ʼu fehuʼi.

[Kiʼi nota]

ʼE Feala Koa Hakotou Fakamahino?

• ʼE lava tali feafeaʼi e te ʼAtua ke fakaōvi age kiā te ia he ʼu hahaʼi agahala?

• ʼI tatatou ʼu faikole, ʼe tou lava faʼifaʼitakiʼi feafeaʼi te ʼu pateliaka?

• Koteā ʼaē ʼe tou ako mai te ʼu faikole ʼa te ʼu ʼuluaki Kilisitiano?

• Ko te temi fea ʼaē ʼe hage ai tatatou ʼu faikole ko he ʼīsēsō magoni ki te ʼAtua?

[Paki ʼo te pasina 23]

He koʼe neʼe tali e te ʼAtua ia te mōlaga ʼa Apele kae mole ina tali ʼaē ʼa Kaino?

[Paki ʼo te pasina 24]

“Ia au ʼaē ko te efu pea mo te lefulefu”

[Paki ʼo te pasina 25]

“ ʼE au foaki atu anai tona vahe hogofulu”

[Paki ʼo te pasina 26]

Ko takotou ʼu faikole ʼe hage koa ko he ʼīsēsō magoni kiā Sehova?