Ko Sehova ʼe Ina Foaki “Te Laumālie Māʼoniʼoni Kiā Nātou ʼAē ʼe Natou Kole Kiā Te Ia”
“Kapau ko koutou, logopē takotou agakovi, ʼe kotou popoto ʼi te foaki ki ʼakotou ʼu fānau he ʼu meʼa ʼofa ʼe lelei, ʼe feafeaʼi leva lā te lahi ake ia ʼo te foaki e te Tamai ʼaē ʼi selō te laumālie māʼoniʼoni kiā nātou ʼaē ʼe natou kole kiā te ia!”—Luka 11:13, MN.
1. Ko te temi fea ʼaē ʼe ʼaoga tāfito ai kiā tātou ia te laumālie māʼoniʼoni?
‘ ʼE MOLE au lava tauʼi ʼaki toku mālohi tokotahi. Hoki feala pē ke au ʼutakiʼi te fihifihia ʼaia ʼaki te tokoni mai ʼo te laumālie māʼoniʼoni!’ Neʼe kua kotou fai koa he ʼu taʼi palalau feiā? Tokolahi te kau Kilisitiano neʼe kua natou fai te ʼu palalau feiā. Neʼe lagi kotou palalau feiā ʼi takotou ʼosi ʼiloʼi ʼaē ʼe kotou maʼu he mahaki ʼe kovi. Peʼe lagi ʼi te ʼosi mate ʼo tokotou hoa. Peʼe lagi ʼi te agamāhani neʼe kotou fiafia pea kua kotou taʼomia ʼi hokotou lotovaivai. ʼI te ʼu temi mamahi ʼo te maʼuli, neʼe lagi kotou logoʼi ʼe kei kotou māʼuʼuli ʼuhi pē ko te laumālie māʼoniʼoni ʼo Sehova neʼe ina foaki atu “te mālohi ʼaē ʼe fakalaka ʼi te mālohi māhani.”—2 Kolonito 4:7-9, MN; Pesalemo 40:1, 2.
2. (a) Ko te ʼu fihifihia fea ʼaē ʼe tonu ke tauʼi e te kau Kilisitiano moʼoni? (b) Ko te ʼu fehuʼi fea ʼaē ʼe tou vakaʼi anai ʼi te ʼalatike ʼaenī?
2 ʼI te ʼaho fuli ʼe tau ia te kau Kilisitiano moʼoni mo te ʼu fihifihia lahi pea mo te ʼu fakafeagai ʼo te mālama heʼe lotu ʼaenī. (1 Soane 5:19) ʼO mole gata ai, ko te ʼu tisipulo ʼa Kilisito ʼe tauʼi e Satana te Tēvolo, ʼaē ko tana fakatuʼutuʼu ke ina tauʼi mālohi ia nātou ʼaē ʼe natou “taupau te u fekau a te Atua pea mo taupau te fakamooni a Sesu.” (Apokalipesi 12:12, 17) Koia, ʼe mole tou punamaʼuli, ʼe ʼaoga tāfito kiā tātou ʼi te temi nei ia te laumālie ʼo te ʼAtua. Koteā ʼaē ʼe tou lava fai ke lahi tatatou maʼu tuʼumaʼu ia te laumālie māʼoniʼoni ʼo te ʼAtua? Pea he koʼē ʼe tou tui papau ko Sehova ʼe lotolelei ʼo foaki mai te mālohi ʼaē ʼe ʼaoga kiā tātou ʼi te ʼu temi fihifihia? ʼE tou maʼu anai te ʼu tali ki te ʼu fehuʼi ʼaia ʼi te ʼu lea fakatātā e lua ʼa Sesu.
Kotou Faikole Tuʼumaʼu
3, 4. Ko te lea fakatātā fea ʼaē neʼe fai e Sesu, pea neʼe ina fakapipiki feafeaʼi ki te faikole?
3 ʼI te tahi ʼaho, neʼe fehuʼi fēnei e te tahi tisipulo ʼa Sesu: “ ʼAliki, ako mai kiā mātou te faikole.” (Luka 11:1, MN ) Moʼo tali ki te kole ʼa tana kau tisipulo, neʼe fai e Sesu te ʼu lea fakatātā e lua. Ko te ʼuluaki lea fakatātā ʼe talanoa ʼo ʼuhiga mo he tagata ʼe tali kāiga, pea ko te lua lea fakatātā ʼe talanoa ʼo ʼuhiga mo he tamai ʼe fakalogo ki tona foha. Tou vakaʼi takitahi te ʼu lea fakatātā ʼaia e lua.
4 Neʼe ʼui fēnei e Sesu: “Ko ai ʼaē iā koutou, mo kapau ʼe ʼi ai hona kaumeʼa, ʼe mole ʼalu anai ki ai ʼi te māʼupō ʼo ʼui age: ‘Kautagata, mai muʼa he ʼu foʼi pane e tolu, heʼe koʼenī toku kaumeʼa neʼe tau mai tona fagona kiō ʼoku pea ʼe mole au maʼu haku meʼa mo ʼona tali ʼaki?’ Pea ʼe tali mai anai e ia ʼaē ʼi te loto fale: ‘Tuku tau fakakinakina mai kiā te au. Ko te matapā kua ʼosi kalavī, pea kua ʼi te moeʼaga taku ʼu kiʼi tamaliki pea mo au; pea ʼe mole kei au faʼa tuʼu atu ʼo foaki atu he meʼa.’ ʼE au tala atu kiā koutou: tatau aipē peʼe mole tuʼu ake ʼo foaki age he meʼa kiā te ia heʼe ko tona kaumeʼa, kae tuʼu ake anai ia, koteʼuhi ko tana haga kole fakakinau pea ʼe ina foaki age anai ia meʼa fuli ʼe ʼaoga kiā te ia.” ʼOsi ʼaia pea fakamahino age e Sesu te faka ʼuhiga ʼo te lea fakatātā ʼaia ʼo ʼuhiga mo te faikole, ʼo ʼui maʼana: “Koia ʼe au tala atu ai kiā koutou: Ke kotou haga kole, pea ʼe foaki atu anai kiā koutou; ke kotou haga kumi, pea ʼe kotou maʼu anai; ke kotou haga fisifisi pea ʼe avahi atu anai kiā koutou. Heʼe ko ʼaē ʼe ina kole ʼe foaki age anai kiā te ia, ko ʼaē ʼe ina kumi ʼe ina maʼu anai, pea ko ʼaē ʼe ina fisifisi ʼe avahi anai ia kiā te ia.”—Luka 11:5-10, MN.
5. Koteā te ako ʼe tou tāʼofi mai te lea fakatātā ʼo te tagata kole fakakinau ʼo ʼuhiga mo tātou mokā tou faikole?
5 Ko te lea fakatātā maʼuhiga ʼaia ʼo he tagata ʼe kole fakakinau tana meʼa, ʼe hā mai ai te faʼahiga tagata ʼaē ʼe tonu ke tou liliu mokā tou faikole. Kotou fakatokagaʼi, neʼe ʼui e Sesu, neʼe liu foaki ai ki te tagata te meʼa ʼaē neʼe ina kole “koteʼuhi ko tana haga kole fakakinau.” (Luka 11:8, MN ) Ko te kupusiga palalau “haga kole fakakinau” ʼe tou maʼu tuʼa tahi ʼi te Tohi-Tapu. Neʼe fakaliliu mai te kupu faka Keleka ʼaē ko tona faka ʼuhiga ko te “matasoka.” ʼI te agamāhani, ʼe faka ʼuhiga te kupu matasoka ki he aga ʼe kovi. Kae kā tou matasoka peʼe tou fakakinau ki he meʼa ʼe lelei, ʼe feala ke liliu ko he kalitātē. Ohagē lā ko te tagata tali kāiga ʼo te lea fakatātā. Neʼe mole ufiufi ia ʼi te kole fakakinau ʼo te meʼa ʼaē neʼe loto kiai. Kapau ʼi henī neʼe fakahā mai e Sesu ke tou faʼifaʼitakiʼi te tagata tali kāiga, pea ʼe tonu foki mo tatatou ʼu faikole ke fai tuʼumaʼu. Ko Sehova ʼe loto ke tou ‘haga kole, ke tou haga kumi, ke tou haga fisifisi.’ Pea ʼe ina ‘foaki anai te laumālie māʼoniʼoni kiā nātou ʼaē ʼe natou kole age.’
6. ʼI te temi ʼo Sesu, neʼe faka ʼuhigaʼi feafeaʼi te agaʼi fenua ʼaē ko te tali kāiga?
6 Ko Sesu ʼe mole ina fakahā mai pē peʼe tonu ke feafeaʼi tatatou faikole—ʼaē ke tou haga kole fakakinau—kae ʼe ina toe fakahā mai foki, pe koʼē ʼe tonu ke tou fai feiā. Ke tou mahino lelei ki te ako ʼaē ʼe hā mai ʼi te lea fakatātā ʼaia, ʼe tonu ke tou vakaʼi pe neʼe feafeaʼi te hahaʼi ʼaē neʼe fakalogo ki te lea fakatātā ʼa Sesu ʼo te tagata tali kāiga fakakinau, ʼo ʼuhiga mo te agaʼi fenua ʼaē ko te tali kāiga. ʼE hā ʼi te ʼu tuʼuga vaega faka Tohi-Tapu, ʼi te temi ʼo te kau Pateliaka, neʼe maʼuhiga ki te hahaʼi ia te tali kāiga, tāfito lā mo kapau ʼe fai ki te ʼu kaugana ʼa te ʼAtua. (Senesi 18:2-5; Hepeleo 13:2) Kapau neʼe mole tali kāiga he tahi pea neʼe valokiʼi ia. (Luka 7:36-38, 44-46) ʼI tatatou kua mahino ki te faʼahi ʼaia, tou toe vakaʼi age te hisitolia ʼa Sesu.
7. He koʼē ko te tagata tali kāiga ʼo te lea fakatātā ʼa Sesu neʼe mole ufiufi ʼi te fakaʼala ʼo tona kaumeʼa?
7 Ko te tagata tali kāiga ʼo te lea fakatātā neʼe ina tali te fagona ʼi te vaelua mālie ʼo te pō. Neʼe fia foaki e te tagata tali kāiga he meʼa kai ki te tagata haʼu, kae neʼe ‘mole . . . maʼu hana meʼa mo ʼona tali ʼaki.’ Koia neʼe tonu ke ina foimo fai he puleʼaki fakavilivili kiai! Neʼe tonu ke ina maʼu he moʼi pane, tatau aipē peʼe fihifihia hana faiga ki te faʼahi ʼaia. Koia neʼe ʼalu ai leva ki te ʼapi ʼo tona kaumeʼa pea matasoka atu ʼo lagaʼi ake ʼi tana moe. Neʼe pāui fēnei te tagata tali kāiga: “Kautagata, mai muʼa he ʼu foʼi pane e tolu.” ʼE ina kolekole fakakinau ʼo aʼu ki te foaki age ʼo te meʼa ʼaē ʼe loto kiai. Kae ki muli age, ʼaki te ʼu foʼi pane ʼaē kua ina maʼu, kua feala ke ina fai he tali kāiga lelei.
Kā Lahi Hona ʼAoga —Pea Ke Lahi Mo Tona Kole
8. Koteā ʼaē kā ina uga anai tātou ke tou kole tuʼumaʼu ia te laumālie māʼoniʼoni?
8 Koteā ʼaē ʼe hā mai ʼi te lea fakatātā ʼo ʼuhiga mo te tupuʼaga ʼaē ke tou haga faikole tuʼumaʼu? Neʼe haga kole e te tagata he moʼi pane he neʼe mahino kiā ia neʼe ʼaoga ʼaupitō moʼo fai ʼo tona maʼua ʼaē ko te tali kāiga. (Isaia 58:5-7) Kana neʼe mole ʼi ai he moʼi pane, neʼe mole lelei tana tali kāiga. ʼO toe feiā pē, ʼuhi heʼe tou ʼiloʼi ko te maʼu ʼo te laumālie ʼo te ʼAtua ʼe ʼaoga ʼaupitō moʼo fakahoko totatou minisitelio ʼi totatou ʼuhiga Kilisitiano moʼoni, ʼe tou faikole tuʼumaʼu ki te ʼAtua, ʼo kole ia te laumālie ʼaia. (Sakalia 4:6) ʼE faigataʼa anai mo kapau ʼe mole tou maʼu te laumālie. (Mateo 26:41) ʼE kotou mahino koa ki te ako fakaʼosi maʼuhiga ʼaē ʼe tou lava tāʼofi mai te lea fakatātā ʼaia? Kapau kiā tātou ʼe tonu ke tou maʼu fakavilivili te laumālie ʼo te ʼAtua, pea ʼe mahino ia ʼe tou haga kole anai te laumālie ʼaia.
9, 10. (a) Kotou fakahā ʼaki he faʼifaʼitaki pe koʼē ʼe ʼaoga ke tou haga kole fakakinau ki te ʼAtua tona laumālie. (b) Ko te fehuʼi fea ʼe tonu ke tou fai takitokotahi, pea koteā tona tupuʼaga?
9 Ke kotou maʼuliʼi te ako ʼaē ʼe maʼu mai te lea fakatātā ʼaia, kotou fakakaukauʼi age he tahi ʼi tokotou fāmili ʼe laga hona mahaki ʼi te vaelua mālie ʼo te pō. ʼE kotou fakaʼala anai koa he tōketā ke tokoni atu? Kailoa, mo kapau ʼe mole faʼa kovi tona mamahi. Kae kapau ʼe mahaki mafu, ʼe mole kotou ufiufi anai ʼi te pāui ki he tōketā. Koteā tona tupuʼaga? Heʼe kotou tau mo te fihifihia ʼe tonu ke foimo maʼu he puleʼaki kiai. ʼE mahino kiā koutou, ʼe ʼaoga ʼaupitō he tokoni lelei. Heʼe kapau ʼe mole kotou kumi he tokoni pea ʼe feala anai ke hoko he tuʼutāmaki. ʼO toe feiā, ʼe tau tuʼumaʼu ia te kau Kilisitiano moʼoni mo he tuʼutāmaki ʼe tonu ke foimo maʼu he puleʼaki kiai. Ko Satana ʼe feʼaluʼaki ohagē ko “he laione gugulu,” ʼo ina faigaʼi ke ina kai tātou. (1 Petelo 5:8, MN ) Ke tou nofo ʼalaʼala ʼi te faʼahi fakalaumālie, ʼe ʼaoga ʼaupitō kiā tātou ia te tokoni ʼa te laumālie ʼo te ʼAtua. ʼE feala ke tou tuʼutāmakiʼia mo kapau ʼe mole tou kole ke tokoni mai te ʼAtua. Koia, tou haga kole fakakinau ki te ʼAtua ia tona laumālie māʼoniʼoni. (Efeso 3:14-16) Hoki tou fai ia te faʼahi ʼaia, pea ʼe tou maʼu anai te mālohi ʼaē ʼe ʼaoga moʼo ‘ ʼūtakiʼi ʼo aʼu ki te fakaʼosi.’—Mateo 10:22; 24:13.
10 Koia ʼe maʼuhiga ai ke tou fai takitokotahi ʼi te temi nei ia te fehuʼi ʼaenī: ‘ ʼE au faikole tuʼumaʼu koa?’ Tou manatuʼi, kā tou mahino kātoa ʼe ʼaoga te tokoni ʼa te ʼAtua kiā tātou, pea ko tatatou ʼu faikole ki te laumālie māʼoniʼoni ʼe liliu anai ʼo tuputupu ake.
Koteā ʼAē Kā Ina Uga Tātou Ke Tou Faikole ʼAki He Loto Falala?
11. Koteā te fakamahino ʼaē neʼe fai e Sesu ʼo ʼuhiga mo te faikole ʼi te lea fakatātā ʼo he tamai pea mo tona foha?
11 Ko te lea fakatātā ʼa Sesu ʼo te tagata tali kāiga fakakinau, ʼe ina faka maʼuhigaʼi ia te faʼahiga tagata ʼaē ʼe tonu ke tou liliu ʼo hoko ki ai mokā tou faikole—te tagata tui. Ko te lua lea fakatātā ʼe ina faka maʼuhigaʼi te faʼahiga aga ʼa ia ʼaē ʼe fagono ki te ʼu faikole—ia Sehova ʼAtua. Neʼe kole fēnei e Sesu: “ ʼIo, ko ai te tamai ʼaē iā koutou, kapau ʼe kole age kiā te ia e tona foha he ika, pea ina ʼavage anai kiā te ia he gata kā mole ko he ika? Peʼe kapau, ʼe ina kole age kiā te ia he foʼi moa, pea ina ʼavage anai kiā te ia he sekolopio?” Neʼe fakamahino e Sesu te faʼahiga maʼuliʼi ʼo tana lea fakatātā, ʼo ʼui maʼana: “Koia kapau ko koutou, logopē takotou agakovi, ʼe kotou popoto ʼi te foaki ki ʼakotou ʼu fānau he ʼu meʼa ʼofa ʼe lelei, ʼe feafeaʼi leva lā te lahi ake ia ʼo te foaki e te Tamai ʼaē ʼi selō te laumālie māʼoniʼoni kiā nātou ʼaē ʼe natou kole kiā te ia!”—Luka 11:11-13, MN.
12. ʼE faka maʼuhigaʼi feafeaʼi ʼi te lea fakatātā ʼo te tamai ʼe fakalogo ki te kole ʼo tona foha, ia te lotolelei ʼa Sehova ʼo tali ki tatatou ʼu faikole?
12 ʼAki te faʼifaʼitaki ʼaia ʼo he tamai ʼe tali ki te kole ʼo tona foha, neʼe fakahā e Sesu te meʼa ʼaē ʼi te loto ʼo Sehova ʼo ʼuhiga mo nātou ʼaē ʼe faikole age kiā te ia. (Luka 10:22) ʼUluaki, kotou fakatokagaʼi tona kehekehe. ʼO mole hagē ko te tagata ʼo te ʼuluaki lea fakatātā ʼaē neʼe mole foimo tali ki te kole ʼa te tagata tali kāiga fakakinau, ko Sehova ʼe hagē ia ko he tamai fakakelekele ʼofa, ʼe tali fakafiafia ki te kole ʼe fai age e hana tamasiʼi. (Pesalemo 50:15) ʼE toe fakahā e Sesu ia te lotolelei ʼaē ʼa Sehova kiā tātou, ʼi tana fakatatau he tamai fakakelekele ki te Tamai ʼaē ʼe ʼi selō. ʼE ina ʼui, kapau ko he tamai fakakelekele logolā tana “agakovi” ʼuhi ko tona ʼuhiga agahala, kae ʼe foaki meʼa ʼofa ki tona foha, ʼe feafeaʼi age lā ki tatatou ʼamanaki ki tatatou Tamai ʼaē ʼe ʼi selō, ʼaē ʼe lotoʼofa, ʼe ina foaki mai anai tona laumālie māʼoniʼoni ki tana ʼu kaugana fakakelekele!—Sakopo 1:17.
13. Koteā ʼaē ʼe tou lava falala kiai mokā tou faikole kiā Sehova?
13 Koteā te ako kiā tātou? ʼE tou lava falala mokā tou kole ia te laumālie māʼoniʼoni ʼo tatatou Tamai ʼaē ʼe ʼi selō, ʼe lotolelei ke ina foaki mai te meʼa ʼaē ʼe tou kole age. (1 Soane 5:14) Kā tou haga tuʼumaʼu age kiā te ia ʼi te faikole, ʼe mole ʼui mai anai e Sehova: “Tuku tau fakakinakina mai kiā te au. Ko te matapā kua ʼosi kalavī.” (Luka 11:7, MN ) Kae ʼe ʼui mai e Sesu: “Ke kotou haga kole, pea ʼe foaki atu anai kiā koutou; ke kotou haga kumi, pea ʼe kotou maʼu anai; ke kotou haga fisifisi pea ʼe avahi atu anai kiā koutou.” (Luka 11:9, 10, MN ) ʼEī, ko Sehova “ ʼe ina tali mai anai ʼi te ʼaho ʼaē ʼe tou pāui age ai.”—Pesalemo 20:9; 145:18.
14. (a) Ko te manatu hala fea ʼaē ʼe hoha kiai ʼihi mokā natou tau mo he ʼu fihifihia? (b) Kā tou tau mo te ʼu fihifihia, he koʼē ʼe feala ke tou faikole kiā Sehova ʼaki he loto falala?
14 Ko te lea fakatātā ʼa Sesu ki te tamai ʼofa, ʼe ina toe faka maʼuhigaʼi ko te agaʼofa ʼo Sehova ʼe lahi age ʼi te agaʼofa ʼa he ʼu mātuʼa fakakelekele. Koia, ʼaua naʼa tou manatu ʼi he temi ko te ʼu fihifihia ʼaē ʼe tau mo tātou, ʼe ko he ʼita ʼaia ʼa te ʼAtua kiā tātou. ʼE ko totatou fili lahi ko Satana, ʼaē ʼe loto ke tou manatu feiā. (Sopo 4:1, 7, 8; Soane 8:44) ʼE mole ʼi ai he vaega faka Tohi-Tapu moʼo tauteaʼi te ʼu taʼi manatu ʼaia. ʼE mole ʼahiʼahiʼi tātou e Sehova “ ʼaki he ʼu meʼa ʼe kovi.” (Sakopo 1:13, MN ) ʼE mole ina tuku mai he fihifihia ʼe hagē ko he gata peʼe ko he ʼahiʼahi ʼe hagē ko sekolopio. Ko tatatou Tamai ʼaē ʼe ʼi selō ʼe ina foaki “te ʼu meʼa lelei . . . kiā natou ʼe natou kole [age] kiā te ia.” (Mateo 7:11, MN; Luka 11:13) ʼIo, kapau ʼe lahi tatatou loto fakafetaʼi ki te agaʼofa ʼa Sehova pea mo tana fia tokoni mai kiā tātou, pea ʼe lahi age anai tatatou fia faikole ʼaki he loto falala. Kapau ʼe tou fai feiā, pea ʼe toe feala foki anai ke tou fakahā te manatu ʼaē neʼe maʼu e te tagata fai pesalemo: “Neʼe logo moʼoni ia te ʼAtua; neʼe tokaga ki te leʼo ʼo taku faikole.”—Pesalemo 10:17; 66:19.
ʼE Liliu Feafeaʼi Te Laumālie Māʼoniʼoni Ko Totatou Tokoni
15. (a) Ko te fakapapau fea ʼaē neʼe fai e Sesu ʼo ʼuhiga mo te laumālie māʼoniʼoni? (b) Koteā te faʼahiga tokoni ʼe fai mai e te laumālie māʼoniʼoni?
15 ʼI muʼa pē ʼo te mate ʼa Sesu, neʼe liuliuga tana fakapapau ʼaē neʼe ina fai ʼi tana ʼu lea fakatātā. ʼI tana palalau ʼo ʼuhiga mo te laumālie māʼoniʼoni, neʼe ina ʼui fēnei ki tana kau ʼapositolo: “ ʼE au fai anai he kole ki te Tamai, pea ʼe ina foaki atu anai kiā koutou he tahi tokoni ke nofo mo koutou ʼo talu ai.” (Soane 14:16, MN ) Koia neʼe fakapapauʼi mai e Sesu ko te tokoni, peʼe ko te laumālie māʼoniʼoni, ʼe nofo anai mo tana kau tisipulo ʼi te temi kā haʼu, ʼo feiā mo totatou temi. ʼE hā feafeaʼi ʼe tou maʼu te tokoni ʼaia iā ʼaho nei? Ko te laumālie māʼoniʼoni ʼe tokoni mai ke tou ʼūtakiʼi te ʼu fihifihia kehekehe. ʼO feafeaʼi? Neʼe tau te ʼapositolo ko Paulo mo te ʼu fihifihia, pea neʼe ina fakahā ʼi tana tohi ki te kau Kilisitiano ʼo Kolonito, te tokoni age ʼa te laumālie ʼo te ʼAtua kiā te ia. Tou vakaʼi fakanounou te ʼu manatu ʼaē neʼe ina tohi.
16. ʼE feafeaʼi he tatau ʼo totatou ʼaluʼaga pea mo ʼaē ʼa Paulo?
16 ʼUluaki, neʼe tala fakahagatonu e Paulo ki tona ʼu tehina mo tuagaʼane neʼe nofo mo “te tala [ʼi tona] kakano,” ko he fihifihia. ʼOsi ʼaia, neʼe ina ʼui fēnei: “Neʼe tuʼa tolu taku faikole ki te ʼAliki [ko Sehova] ke ina toʼo keheʼi te meʼa ʼaia iā te au.” (2 Kolonito 12:7, 8, MN ) Logolā neʼe kolekole e Paulo ki te ʼAtua ke ina toʼo tona mamahi, kae neʼe nofo pē mo ia. Lagi ʼe kotou tau mo he fihifihia feiā iā ʼaho nei. Ohagē ko Paulo, ʼe lagi kotou faikole tuʼumaʼu pea ʼaki he loto falala, ʼo kole kiā Sehova ke ina toʼo he fihifihia. Logolā kua kotou kolekole liuliuga, kae ʼe mole puli tokotou fihifihia. Ko tona faka ʼuhiga koa, ʼe mole tali e Sehova takotou ʼu faikole pea ko tona laumālie ʼe mole tokoni atu kiā koutou? Kailoa ia! (Pesalemo 10:1, 17) Kotou fakatokagaʼi te manatu neʼe ʼui e te ʼapositolo ko Paulo ki muli age.
17. Neʼe tali feafeaʼi e Sehova ki te ʼu faikole ʼa Paulo?
17 Moʼo tali ki te ʼu faikole ʼa Paulo, neʼe ʼui fēnei age e te ʼAtua kiā te ia: “Ko toku ʼofa makehe ʼe feʼauga kiā koe; heʼe ko toku mālohi ʼe lolotoga fakaliliu ʼo haohaoa ʼi te vaivai.” Neʼe ʼui fēnei e Paulo: “Koia ʼe lelei age ke au faka kolōliaʼi ʼo ʼuhiga mo toku ʼu vaivaiʼaga, ke nofo te mālohi ʼo Kilisito ʼi ʼoluga ia te au.” (2 Kolonito 12:9, MN; Pesalemo 147:5) Koia, neʼe mahino kiā Paulo ʼaki ia Kilisito, ko te puipui mālohi ʼo te ʼAtua neʼe mafola kiā te ia ohagē he falelā. Iā ʼaho nei, ʼe tali mai e Sehova ki tatatou ʼu faikole ohagē pē ko tana fai ʼaē kiā Paulo. ʼE ina folahi tana puipui ohagē ko he malumaluga ki tana ʼu kaugana.
18. He koʼē ʼe feala ke tou ʼūtakiʼi he ʼu fihifihia?
18 ʼE moʼoni, ʼe mole feala ki he falelā ke ina fakagata ia te tō ʼa te ʼua peʼe ko te agi ʼa te matagi, kae ʼe ko he puipuiʼaga mai te ʼu meʼa ʼaia. ʼO toe feiā pē, ko te malumaluga ʼaē ʼe tou maʼu ʼaki “te mālohi ʼo Kilisito” ʼe mole ina fakagata te ʼu fihifihia ʼaē ʼe hoko kiā tātou peʼe ko te ʼu faigataʼaʼia. Kae ʼe ina foaki te puipui ʼi te faʼahi fakalaumālie moʼo tauʼi te ʼu meʼa fakatupu tuʼutāmaki ʼo te mālamanei pea mo te ʼu fakafeagai mai ia Satana, te pule ʼo te mālamanei. (Apokalipesi 7:9, 15, 16) Tahi ʼaē meʼa, tatau aipē peʼe kotou tau mo he fihifihia ʼe mole feala ke ‘toʼo keheʼi iā koutou,’ kae ʼe feala hakotou tui papau ko Sehova ʼe ina ʼiloʼi lelei takotou ʼu faiga pea ʼe ina tali anai ‘ki takotou tagi.’ (Isaia 30:19; 2 Kolonito 1:3, 4) Neʼe tohi fēnei e Paulo: “Ko te ʼAtua ʼe agatonu, ʼe mole ina tuku anai ke fakahalaʼi koutou ʼo laka age ʼi te meʼa ʼaē ʼe kotou lava tali, kae ʼaki te fakahala ʼe ina toe foaki atu anai mo he faigamālie ke kotou hao ai, ke feala hakotou ʼūtakiʼi.”—1 Kolonito 10:13, MN; Filipe 4:6, 7.
19. Koteā ʼaē ʼe kotou fakatotonu ke kotou fai, pea koteā tona tupuʼaga?
19 ʼE tou fakamoʼoni, ko “te u aho fakamuli” ʼo te mālama heʼe lotu ʼaenī ʼe ko “he u temi faigataa.” (2 Timoteo 3:1) Logolā te faʼahi ʼaia, kae maʼa te ʼu kaugana ʼa te ʼAtua, ko te ʼu temi faigataʼaʼia ʼaia ʼe feala pē hanatou kātakiʼi. He koʼē ʼe natou lava fai ia te faʼahi ʼaia? ʼUhi ko te tokoni pea mo te puipui ʼo te laumālie māʼoniʼoni ʼo te ʼAtua, ʼaē ʼe foaki lahi e Sehova mo he lotolelei kiā nātou fuli ʼaē ʼe natou kole tuʼumaʼu age pea mo he loto falala kiā te ia. Koia ʼofa pē, ke tou fakatotonu ke tou haga kole te laumālie māʼoniʼoni ʼaia ʼi te ʼaho fuli.—Pesalemo 34:6; 1 Soane 5:14, 15.
ʼE Kotou Tali Feafeaʼi Anai?
• Koteā ʼaē ʼe ʼaoga ke tou fai moʼo maʼu ia te laumālie māʼoniʼoni ʼo te ʼAtua?
• He koʼē ʼe tou lava falala ko Sehova ʼe tali mai anai ki tatatou ʼu kole age ia te laumālie māʼoniʼoni?
• ʼE tokoni feafeaʼi mai ia te laumālie māʼoniʼoni ke tou ʼūtaki he ʼu fihifihia?
[Paki ʼo te pasina 9]
Koteā te ako ʼe tou maʼu mai te lea fakatātā ʼa Sesu ʼo ʼuhiga mo te tagata tali kāiga?
[Paki ʼo te pasina 10]
ʼE kotou koleʼi tuʼumaʼu koa ia te laumālie māʼoniʼoni ʼo te ʼAtua?
[Paki ʼo te pasina 11]
Koteā te ako ʼo ʼuhiga mo Sehova ʼe tou maʼu mai te lea fakatātā ʼo ʼuhiga mo he tamai ʼofa?