ʼE Tonu Koa Ke Tou Māʼuʼuli Maʼa Te Tuʼu Pē ʼAenī?
“ ʼE MOLE au fakakaukauʼi au ki toku kā haʼu. ʼE hoko vave mai pē ia.” Ko te ʼu palalau ʼaia ʼaē ʼe tou tau logo kiai, neʼe fai e te tagata poto ʼiloa ko Albert Einstein. Tokolahi te hahaʼi ʼe natou manatu fēia. ʼE lagi natou ʼui fēnei: “Koteā te tupuʼaga ʼo hakita hoha ʼo ʼuhiga mo te kā haʼu?” Peʼe kua lagi kotou logo ki te ʼui fēnei a te hahaʼi: “Tou haga fai tātou tatatou ʼu gāue māhani.” “Tou māʼuʼuli tātou maʼa te tuʼu pē ʼaenī.” “ ʼAua naʼa kotou manatu ki te ʼapogipogi.”
ʼE mahino ia, ko te ʼu palalau ʼaia ʼe mole ko he ʼu palalau foʼou. “Kotou kakai, mo ʼiʼinu, pea mo fakafiafia. ʼE mole he tahi age ʼu meʼa ʼe maʼuhiga age.” Neʼe ko te tākuga lea ʼaia ʼo te kau Epikula ʼi te temi muʼa. Ko ʼihi hahaʼi ʼo te temi ʼo te ʼapositolo ko Paulo neʼe natou manatu fēia. Neʼe natou ʼui fēnei: “Tou kakai pea mo tou ʼiʼinu, heʼe tou mamate anai ʼapogipogi.” (1 Kolonito 15:32) Maʼa nātou, ʼe mole he tahi age maʼuli ʼi te maʼuli nounou ʼaenī, koia neʼe natou lagolago ai ki te manatu ʼaē ke tou fai te ʼu meʼa fuli pē ʼaē ʼe feala ke tou fai ʼi te maʼuli ʼi te temi nei.
Maʼa te toko lauʼi miliona hahaʼi ʼi te kele, ko te fai ʼo te ʼu meʼa fuli pē ʼi te maʼuli ʼaenī ʼe mole faka ʼuhiga ia ki te kumi ʼo he ʼu fakafiafia. ʼUhi ko te ʼu ʼaluʼaga fakaʼofaʼofa ʼaē ʼe māʼuʼuli ai te tokolahi, kua liliu ai tonatou maʼuli ʼi te temi nei ko he tau ke feala hanatou māʼuʼuli, ʼe mole gata anai ʼi he temi pea ʼe fakamamahi. Koteā te tupuʼaga ʼo hanatou manatu ai ki te kā haʼu, ki te “ ʼapogipogi” ʼaē ʼe hagē kā faigataʼa pea mole hona ʼamanaki?
ʼE Tonu Koa Ke Tou Fai He ʼu Fakatuʼutuʼu Ki Te Temi Kā Haʼu?
Māʼia pē lā mo te hahaʼi ʼaē ʼe mole faʼa kovi fau tonatou maʼuli, kiā nātou ʼe mole he ʼaoga ʼo te fai ʼo he ʼu fakatuʼutuʼu ki te temi kā haʼu. ʼE lagi natou feʼekeʼaki fēnei: “Koteā te tupuʼaga ʼo hatatou hoha kiai?” ʼE lagi manatu e ʼihi ko nātou ʼaē neʼe natou fai he ʼu fakatuʼutuʼu, ki muli age ʼe mole iku lelei pea ʼe natou lotomamahi ai. Māʼia pē lā mo te pāteliaka ko Sopo ʼi te temi muʼa, neʼe lotomamahi ʼaupitō ʼi tana sio ki te “maumau” ʼo tana ʼu fakatuʼutuʼu, ʼo puli ai te ʼu faʼahi ʼaē neʼe feala ke ina maʼu ai he maʼuli fakafiafia maʼa ia pea mo tona fāmili ʼi te kā haʼu.—Sopo 17:11; Tagata Tānaki 9:11.
Ko te tagata fai tuketuke Ekosi ko Robert Burns neʼe ina fakatatau totatou maʼuli faigataʼa ki te kiʼi kumā ʼaē ʼe maʼuli ʼi te ʼu tū vao, ʼaē neʼe maumauʼi hala e Burns tona nofoʼaga ʼaki te mataʼi hele ʼo tana sāliote fuli kele. Neʼe hola te kumā moʼo haofaki tona maʼuli, ʼi te kua maumau kātoa ʼo tona maʼuliʼaga. Neʼe manatu fēnei e te tagata fai tuketuke: ‘ ʼE moʼoni, neʼe tuʼa lahi tatatou mole lava maʼu he puleʼaki moʼo fakatokatoka ni ʼu ʼaluʼaga, māʼiapē lā mo te ʼu fakatuʼutuʼu ʼaē neʼe fakakaukauʼi lelei, ʼe tau tō noa.’
ʼE mole ʼaoga koa ke fai he ʼu fakatuʼutuʼu ki te kā haʼu? Kapau ʼe mole tou fai he ʼu fakatuʼutuʼu lelei, pea ʼe feala ke ʼi ai hona ikuʼaga fakamataku, mokā hoko mai he ʼu ʼafā peʼe ko he tahi age ʼu tuʼutāmaki. ʼE moʼoni, neʼe mole ʼi ai he tahi neʼe ina lava tāʼofi te hoko mai he ʼafā, ohagē ko te ʼafā ko Katrina. Kae neʼe feala ke fai he fakasiosio fakatomuʼa pea mo he ʼu fakatuʼutuʼu moʼo fakasiʼisiʼi te ʼu maumau ʼaē neʼe hoko ki te kolo pea mo te hahaʼi.
Koteā takotou manatu? ʼE fakapotopoto koa hatatou maʼuli maʼa te tuʼu pē ʼaenī kae mole tou tokagaʼi ia te temi kā haʼu? Tou vakaʼi pe koteā ʼaē ʼe ʼui ʼo ʼuhiga mo te faʼahi ʼaia ʼi te ʼalatike kā hoa mai.
[Paki ʼo te pasina 3]
“Kotou kakai, mo ʼiʼinu, pea mo fakafiafia. ʼE mole he tahi age ʼu meʼa ʼe maʼuhiga age”
[Paki ʼo te pasina 4]
Neʼe feala ʼapē ke fakasiʼisiʼi te ʼu maumau ʼaē neʼe hoko ʼaki te ʼafā ko Katrina mo kanapau lā neʼe fai he fakasiosio fakatomuʼa pea fai he ʼu fakatuʼutuʼu kiai?
[Credit Line]
U.S. Coast Guard Digital