Ko Sesu Kilisito Ia Te Tagata Misionea Lahi Tokotahi

“Ko au ko tana fakafofoga, pea ko Ia ʼaia neʼe ina fekauʼi mai au.”—SOANE 7:29.

1, 2. Koteā te fakaʼuhiga ʼo te kupu misionea, pea ko ai ʼaē ʼe feala ke fakahigoaʼi ko te Tagata Misionea lahi tokotahi?

KOTEĀ ʼaē ʼe kotou manatu kiai mokā kotou logo ki te kupu “misionea”? Ko ʼihi ʼe natou manatu anai ki te kau misionea ʼo te Keletiate, ʼaē ko te tokolahi iā nātou ʼe natou lagolago ki te ʼu gāue fakapolitike pea mo te ʼu gāue fakapaʼaga ʼi te ʼu fenua ʼaē ʼe natou gāue ai. Kae ʼi tokotou ʼuhiga kau Fakamoʼoni ʼa Sehova, ʼe lagi kotou manatu anai ki te kau misionea ʼaē ʼe fekauʼi e te Kolesi Pule ke natou ʼolo ʼo fakamafola ia te logo lelei ʼi te ʼu fenua kehekehe ʼo te kele. (Mat. 24:14) Ko te kau misionea ʼaia ʼe natou fakaʼaogaʼi fakamālotoloto ia tonatou temi pea mo tonatou mālohi ki te gāue maʼuhiga ʼaē ko te tokoni ʼo te hahaʼi ke natou fakaovi kiā Sehova ʼAtua pea mo natou felōgoi lelei mo ia.—Sake 4:8.

² Ko te ʼu kupu “misionea” pea mo “te ʼu misionea” ʼe mole tou maʼu ʼi te Tohi-Tapu Les Saintes Écritures — Traduction du monde nouveau. Kae, ʼi te nota ʼi te lalo pāsina ʼo te koga tohi ʼo Efesi 4:11, ʼe tou maʼu te kupu Fakakeleka ʼaē neʼe fakaliliu ʼaki te kupu “te kau fakamafola evaselio” pea ʼe feala ke toe fakaliliu ʼaki te kupu “te ʼu misionea.” Ko Sehova ʼe ko te Tagata Evaselio lahi, kae ʼe mole feala ke ʼui ko te Tagata Misionea lahi tokotahi, he neʼe mole ʼi ai he tahi neʼe ina fekauʼi mai ia ia ke ina fai te gāue ʼaia. Pea ʼo ʼuhiga mo tana Tamai ʼaē ʼe ʼi selō, neʼe ʼui fēnei e Sesu Kilisito: “Ko au ko tana fakafofoga, pea ko Ia ʼaia neʼe ina fekauʼi mai au.” (Soa. 7:29) ʼI tona ʼofa lahi ʼaē ki te mālamanei, neʼe fekauʼi mai e Sehova tona ʼAlo ʼulu tokotahi ke haʼu ki te kele. (Soa. 3:16) ʼE feala ke fakahigoaʼi ia Sesu ko te Tagata Misionea lahi tokotahi, ʼaē ʼe lelei tokotahi, ʼuhi he neʼe fekauʼi mai ia ki te kele moʼo “fakamoʼoni ki te moʼoni.” (Soa. 18:37) Neʼe tokaga kātoa ki te fakamafola ʼo te logo lelei ʼo te Puleʼaga, pea ko te ʼu lelei ʼo tana minisitelio ʼe kei ʼaoga pē kiā tātou iā ʼaho nei. Ohagē lā, ʼe tou lava fakaʼaogaʼi ia tana ʼu faʼahiga fai fakamafola ʼi tatatou minisitelio, tatau aipē peʼe tou kau ki te gāue fakamisionea peʼe kailoa.

3. Koteā te ʼu fehuʼi ʼaē kā tou vakaʼi anai ʼi te ʼalatike ʼaenī?

³ Ko te gāue ʼa Sesu ʼi tona ʼuhiga kaugā fai fakamafola ʼo te Puleʼaga, ʼe malaga ai te ʼu fehuʼi ʼaenī: Ko te ʼu ʼaluʼaga fea neʼe felāveʼi mo Sesu ʼi te kele? He koʼē neʼe lelei ia tana faiakonaki? Pea koteā ʼaē neʼe fua lelei ai tana minisitelio?

Neʼe Tonu Ke Lotolelei ʼo Fakamafola ʼi Ni ʼu ʼAluʼaga Foʼou

4-6. Ko te ʼu fetogi fea ʼaē neʼe hoko kiā Sesu ʼi tona fekauʼi mai ʼaē ki te kele?

⁴ Ko te kau misionea pea mo ʼihi Kilisitiano ʼo te temi nei ʼaē ʼe ʼolo ki te ʼu telituale ʼaē ʼe ʼaoga tāfito kiai he kau fai fakamafola, ʼe tonu anai ke natou fakamāmāhani ki te faʼahiga maʼuli ʼo te ʼu telituale ʼaia. Kae neʼe kehekehe ʼaupitō ia te maʼuli ʼaē ʼo Sesu ʼi te kele pea mo tona maʼuli ʼaē ʼi selō, ʼaē neʼe maʼuli ai mo tana Tamai pea mo te kau ʼāselo ʼaē neʼe natou tauhi ʼaki he loto ʼe maʼa kiā Sehova. (Sopo 1:6; 2:1) Neʼe kehekehe ia mo tana haʼu ʼo maʼuli mo te hahaʼi agahala ʼi he mālama heʼe maʼa! (Mko. 7:20-23) Neʼe toe kātakiʼi e Sesu ia te loto maheka ʼaē neʼe femaʼuʼaki e tana ʼu tisipulo. (Luka 20:46; 22:24) ʼIo, neʼe ina tali lelei ia te ʼu meʼa fuli ʼaē neʼe hoko kiā ia ʼi te kele.

⁵ Neʼe mole kamata palalau fakamilakulo leva ia Sesu ʼi tana ʼi te kele; neʼe kamata akoako palalau ʼi tana kei tamasiʼi. Neʼe ko he toe fetogi lahi ʼuhi neʼe ko ia ʼaē neʼe ina foaki te ʼu fakatotonu ki te kau ʼāselo ʼi te lagi! ʼI te maʼuli ʼa Sesu ʼi te kele, lagi neʼe palalau ki te lea e tahi ʼi “te ʼu lea ʼo te hahaʼi.” Ko he lea neʼe kehekehe ʼosi ia mo te ‘ ʼu lea ʼa te kau ʼāselo.’ (1 Ko. 13:1) Kae ʼo ʼuhiga mo tana ʼu palalau lelei neʼe heʼeki ʼi ai he tagata neʼe kua palalau ohagē ko Sesu.—Luka 4:22.

⁶ Kotou fakatokagaʼi te tahi age ʼu ʼaluʼaga neʼe ko he toe fetogi lahi maʼa te ʼAlo ʼo te ʼAtua ʼi tana haʼu ʼaē ki te kele. Logolā ko Sesu neʼe mole ina maʼu ia te agahala ʼaē mai iā Atama, kae neʼe maʼuli ia Sesu ohagē ko he tagata, ohagē ko nātou ʼaē kā liliu anai ki muli age ko tona ʼu “tehina,” peʼe ko te ʼu tisipulo fakanofo. (Lau ia Hepeleo 2:17, 18.) ʼI te pō fakaʼosi ʼo tona maʼuli ʼi te kele, neʼe mole kole e Sesu ki tana Tamai ʼaē ʼe ʼi selō ke ina fekauʼi mai “he ʼu lēsio ʼāselo ʼe fakalaka ʼi te hogofulu-mā-lua,” kae kotou fakakaukauʼi age muʼa ia te ʼu ʼāselo ʼaē neʼe pule kiai ʼi tona ʼuhiga Alekaselo ko Mikaele! (Mat. 26:53; Suta 9) ʼEī, neʼe fai e Sesu he ʼu milakulo; kae ko te ʼu gāue ʼaē neʼe ina fai ʼi te kele neʼe veliveli age ia mo kapau ʼe fakatatau ki te ʼu gāue ʼaē neʼe feala ke ina fai ʼi te lagi.

7. Koteā ʼaē neʼe fai e te kau Sutea ʼi te temi ʼaē neʼe ʼaoga ai ke natou mulimuli ki te Lao?

⁷ Lolotoga tona maʼuli ʼaē ʼi selō ʼi tona ʼuhiga “Folafola,” neʼe lagi ko Sesu ia te tagata fakahoko palalau ʼa te ʼAtua, ʼaē neʼe ina takitaki ia te kau Iselaele ʼi te toafa. (Soa. 1:1; Ek. 23:20-23) Logolā ‘neʼe natou tali te Lao ʼaē neʼe fakahā age e te kau ʼāselo kae neʼe mole natou taupau.’ (Gāue 7:53; Hep. 2:2, 3) ʼI te ʼuluaki sēkulō, ko te kau takitaki lotu Sutea neʼe mole natou mahino ki te ʼuhiga moʼoni ʼo te Lao. Ohagē lā, tou tokagaʼi age muʼa ia te lao ʼo ʼuhiga mo te Sāpato. (Lau ia Maleko 3:4-6.) Ko te kau sekelipa pea mo te kau Faliseo “neʼe [natou] lotonoa ki te ʼu meʼa ʼaē ʼe maʼuhiga ake ʼo te Lao, ʼaē ko te faitotonu pea mo te manavaʼofa pea mo te agatonu.” (Mat. 23:23) Kae neʼe mole manatu leva ia Sesu ʼe mole kei feala honatou tokoniʼi pea mo ina tuku te fakahā ʼo te moʼoni.

8. Neʼe feafeaʼi ia te fakahā e Sesu ia tana faʼifaʼitakiʼi te aga ʼaē ʼo tana Tamai ki te malamanei?

⁸ Neʼe lotolelei ia Sesu, he neʼe ʼofa ki te hahaʼi pea neʼe fia tokoni ʼaupitō kiā nātou. ʼI te temi fuli pē neʼe ina maʼu ia te manatu ʼaē ke fakahā kiā nātou ia te evaselio. Pea ʼuhi ko tana nofo agatonu ʼaē kiā Sehova ʼi tana ʼi te kele, “neʼe liliu [ai] ia ko te tafitoʼaga ʼo te haofaki heʼegata kiā nātou fuli ʼaē ʼe talagafua kiā te ia.” Tahi ʼaē, “mai tona ʼaluʼaga ʼaē neʼe mamahi ʼi te temi ʼaē neʼe ʼahiʼahiʼi ai ia ia, ʼe feala hana tokoni kiā nātou ʼaē ʼe ʼahiʼahiʼi.”—Hep. 2:18; 5:8, 9.

Neʼe Ko He Tagata Faiako Neʼe Akoʼi Lelei

9, 10. Koteā te faʼahiga ako ʼaē neʼe maʼu e Sesu ʼi muʼa ʼo tona fekauʼi mai ki te kele?

⁹ Ko te kau Kilisitiano iā ʼaho nei, ʼi muʼa ʼo tonatou fekauʼi ki te gāue fakamisionea, ʼe fai e te Kolesi Pule ia te fakatuʼutuʼu moʼo akoʼi muʼa ʼo nātou. Neʼe fai koa e he tahi ia te ako ʼa Sesu Kilisito? ʼEī, kae neʼe mole kau ia ki te ʼu faleako ʼo te kau Lapi ʼi muʼa ʼo tona fakanofo ʼaē ko te Mēsia; pe neʼe akoʼi ia e he kau takitaki lotu ʼiloa. (Soa. 7:15; Vakaʼi ia Gāue 22:3.) Kae he koʼē neʼe faiva ia Sesu ʼi te faiako?

¹⁰ ʼO hilifaki ki te ʼu meʼa ʼaē neʼe ako e Sesu mai tana faʼē ko Malia, pea mo tana tamai tauhi ko Sosefo, ko te ako ʼaē neʼe ina maʼu tāfito ki tana minisitelio neʼe haʼu ia mai te Matapuna lahi. ʼO ʼuhiga mo te faʼahi ʼaia, neʼe ʼui fēnei e Sesu: “Neʼe mole au palalau ʼi toku loto tokotahi, kae ko te Tamai ʼaē neʼe ina fekauʼi mai au, neʼe ina foaki totonu mai kiā te au te fakatotonu ʼo ʼuhiga mo te meʼa ʼaē ʼe tonu ke au ʼui pea mo te meʼa ʼaē ʼe tonu ke au fakahā.” (Soa. 12:49) Kotou fakatokagaʼi neʼe akoʼi fakalelei age ki te ʼAlo ia te ʼu manatu ʼaē kā ina fakaako ki ʼihi. ʼI muʼa ʼo tana haʼu ki te kele, ʼe mahino papau ia neʼe lahi ia tana fakalogo ki te ako ʼo tana Tamai. Neʼe mole he tahi age ako ʼe lelei ʼaupitō neʼe feala ke ina maʼu!

11. Neʼe faʼifaʼitakiʼi feafeaʼi e Sesu ia te ʼu felōgoi ʼaē neʼe maʼu e tana Tamai pea mo te mālamanei?

¹¹ Mai te temi ʼaē neʼe fakatupu ai te ʼAlo, neʼe felōgoi lelei mo tana Tamai. Lolotoga ʼo tona maʼuli ʼaē ʼi te lagi, neʼe sio ia Sesu ki te felōgoi ʼa te ʼAtua mo te mālamanei ʼaki te ʼu gāue ʼaē neʼe ina fai maʼa nātou. Neʼe tatau ia te ʼofa ʼaē ʼo te ʼAlo ʼo te ʼAtua ki te mālamanei pea mo ʼaē ʼo tana Tamai, ʼo feala hana ʼui fēnei: “Ko te ʼu meʼa ʼaē neʼe au ʼofa kiai neʼe ko te ʼu meʼa ʼaē neʼe nofo mo te ʼu foha ʼo te tagata.”—Taag. 8:22, 31.

12, 13. (a) Koteā te ako ʼaē neʼe maʼu e Sesu ʼi tana sio ki te aga ʼo tana Tamai ki te kau Iselaele? (b) Neʼe fakaʼaogaʼi feafeaʼi e Sesu te ako ʼaē neʼe ina maʼu?

¹² ʼE toe kau ki te ako ʼaē neʼe maʼu e te ʼAlo, ia tana sioʼi ʼaē pe neʼe fakatokatoka feafeaʼi e tana Tamai ia te ʼu ʼaluʼaga faigataʼa. Ohagē lā, kotou fakatokagaʼi te aga ʼaē ʼa Sehova ki te kau Iselaele agapauʼu. ʼE ʼui fēnei ia Nehemia 9:28: “Mole tuai ki tanatou mālōlō, neʼe natou toe kamata fai te meʼa ʼaē ʼe kovi ʼi ʼou muʼa [Sehova], pea neʼe ke tuku ia nātou ki te nima ʼo tonatou ʼu fili, ke pule kiā nātou. Pea ʼosi ʼaia pea natou toe maliu mai pea mo kalaga kiā te koe ke ke tokoni age, pea ko koe mai te lagi neʼe ke logo, pea mo tuʼa lahi ia tau haofaki ia nātou ʼuhi ko te lahi ʼo tou loto fakamolemole.” Ko te kaugā gāue ʼa Sesu mo Sehova, pea mo sio ki tana aga, neʼe toe manavaʼofa ai mo ia ki te hahaʼi ʼo tona telituale.—Soa. 5:19.

¹³ Ko te ako ʼaia neʼe maʼu e Sesu, neʼe hā ʼi tana manavaʼofa ki tana ʼu tisipulo. ʼI te pō ʼi muʼa ʼo tona mate, ko te kau ʼapositolo fuli ʼaē neʼe ʼofa mamahi ki ai neʼe natou “liʼaki . . . ia ia . . . kae natou feholaki.” (Mat. 26:56; Soa. 13:1) Māʼiapē lā mo te ʼapositolo ko Petelo neʼe fakafisi tuʼa tolu kiā Kilisito! Kae neʼe tuku aipē e Sesu ia te faigamālie ki tana ʼu tisipulo ke natou toe liliu mai kiā te ia. Neʼe ina ʼui fēnei kiā Petelo: “Kae neʼe au kole mamahi maʼa koe ke ʼaua naʼa lotovaivai tau tui; pea ko koe, mokā ke ʼosi liliu mai, fakamālohiʼi tou ʼu tehina.” (Luka 22:32) Neʼe liliu leva ia te kau “ ʼapositolo pea mo te kau polofetā,” ko te Iselaele fakalaumālie pea ko te ʼu maka fakatafito ʼo te kaupā ʼo te Selusalemi Foʼou ʼe natou fakahigoa ki te ʼu toko 12 kau ʼapositolo agatonu ʼo te ʼAkeno, ia Sesu Kilisito. ʼI totatou temi, ko te kau Kilisitiano fakanofo pea mo tonatou ʼu kaugā gāue ia te “tahi ʼu ovi,” ʼe natou tuputupu ʼi tanatou gāue fakamafola ʼo te Puleʼaga ʼaki te takitaki ʼa te ʼAtua pea mo tona ʼAlo ʼofaina.—Efe. 2:20; Soa. 10:16; Fakh. 21:14.

Neʼe Feafeaʼi Te Faiakonaki ʼa Sesu?

14, 15. Ko te ʼu ʼaluʼaga fea ʼaē neʼe kehekehe ai te faiako ʼa Sesu pea mo ʼaē ʼa te kau sekelipa pea mo te kau Faliseo?

¹⁴ Neʼe fakahoko feafeaʼi e Sesu ki tana ʼu tisipulo ia te ako ʼaē neʼe ina maʼu? Kā tou fakatatau ia te faiako ʼa Sesu pea mo ʼaē ʼa te kau takitaki lotu Sutea, ʼe tou sio ai ki te māʼoluga ʼo te faʼahiga faiako ʼa Sesu. Ko te kau sekelipa pea mo te kau Faliseo ‘neʼe natou meʼa noaʼi ia te Folafola ʼa te ʼAtua ʼuhi ko tanatou talatisio.’ Kae neʼe mole palalau Sesu ia ʼaki tana manatu ʼa ia totonu; neʼe ina akoʼi tuʼumaʼu ia te Folafola ʼa te ʼAtua. (Mat. 15:6; Soa. 14:10) Ko te faʼahi ʼaia, ʼe tonu mo tātou ke tou faʼifaʼitakiʼi.

¹⁵ ʼE ʼi ai te tahi ʼaluʼaga neʼe kehekehe ai te faiako ʼa Sesu pea mo ʼaē ʼa te kau takitaki lotu. ʼO ʼuhiga mo te kau sekelipa pea mo te kau Faliseo, neʼe ina ʼui fēnei: “Kotou fai pea mo tauhi ia meʼa fuli ʼe natou ʼui atu kiā koutou, kae ʼaua naʼa kotou fai ʼo mulimuli ki ʼanatou gāue, heʼe natou ʼui kae mole natou fai.” (Mat. 23:3) Neʼe maʼuliʼi e Sesu te ʼu meʼa ʼaē neʼe ina akoʼi ki ʼihi. Tou vakaʼi te faʼifaʼitaki ʼe tou maʼu ai ia te fakamoʼoni ʼo te faʼahi ʼaia.

16. He koʼē ʼe feala ke kotou ʼui neʼe ʼalutahi ia te maʼuli ʼo Sesu mo te ʼu palalau ʼaē ʼe tuʼu iā Mateo 6:19-21?

¹⁶ Neʼe fakalotomālohiʼi e Sesu tana kau tisipulo ke natou “tānaki . . . he ʼu koloa ʼi selō.” (Lau ia Mateo 6:19-21.) Neʼe ʼalutahi koa ia te maʼuli ʼo Sesu mo te tokoni ʼaia? ʼEī, neʼe moʼoni tana ʼui fēnei ʼo ʼuhiga mo ia totonu: “ ʼE maʼu te ʼu tafu ʼo te ʼu lenato pea mo te ʼu fātaʼi ʼo te ʼu manulele ʼo te lagi, kae mole he potu ʼo te Foha ʼo te tagata ke ʼuluga ai tona ʼulu.” (Luka 9:58) Neʼe fakafaigafua e Sesu ia tona maʼuli. Neʼe tokaga tāfito ʼo fakamafola ia te logo lelei ʼo te Puleʼaga, pea neʼe ina fakahā te ʼuhiga moʼoni ʼo te mole hoha ki te tānaki ʼo te ʼu koloa ʼi te kele. Neʼe fakahā e Sesu ia te maʼuhiga age ʼo te tānaki ʼo he ʼu koloa ʼi selō, ʼaē “ ʼe mole kaina ai e te ane pea mo te ukaukamea, pea ʼe mole puhi ai pea mo kaihaʼa e te kau kaihaʼa.” ʼE kotou mulimuli koa ki te tokoni ʼa Sesu ke kotou tānaki he ʼu koloa ʼi selō?

Te ʼu Kalitātē ʼAē Neʼe Tupu Ai Ia Te Leleiʼia ʼo Sesu e Te Hahaʼi

17. Ko te ʼu kalitātē fea ʼaē neʼe tupu ai te liliu ʼa Sesu ko he tagata fai fakamafola evaselio lahi?

¹⁷ Ko te ʼu kalitātē fea ʼaē neʼe tupu ai te liliu ʼo Sesu ko he tagata fai fakamafola evaselio lahi? Ko te tahi ʼi te ʼu kalitātē ʼaia neʼe hā ʼi tana aga ki te hahaʼi ʼaē neʼe tokoni ki ai. ʼI te ʼu kalitātē lelei ʼo Sehova ʼaē neʼe faʼifaʼitakiʼi e Sesu, neʼe ʼi ai te agavaivai, mo te ʼofa, mo te manavaʼofa. Kotou tokagaʼi neʼe ko te ʼu kalitātē ʼaia ʼaē neʼe tupu ai te ʼofainaʼi ʼo Sesu e te tokolahi.

18. He koʼē ʼe tou lava ʼui neʼe agavaivai ia Sesu?

¹⁸ ʼI tana tali te fakatotonu ʼaē ke haʼu ki te kele, “neʼe . . . meʼa noaʼi [e Sesu] ia ia totonu, pea mo liliu ai ko he kaugana, ʼo hā ohagē he tagata.” (Filp. 2:7) Neʼe ko hana agavaivai ʼaia. Tahi ʼaē, neʼe mole fakatō laloʼi e Sesu ia te hahaʼi. Neʼe mole ina maʼu ia te taʼi manatu ʼaenī: ‘ʼE au haʼu mai te lagi, pea ʼe tonu ke kotou fakalogo mai.’ Neʼe mole hagē ia ko te kau mēsia loi, heʼe ko Sesu neʼe mole puhi fakatagi ia moʼo fakahā ko ia te Mēsia moʼoni. ʼI ʼihi temi neʼe ina fakahā ki te hahaʼi ke ʼaua naʼa natou fakahā ki ʼihi, pe ko ai ia ia peʼe ko te ʼu meʼa ʼaē neʼe ina fai. (Mat. 12:15-21) Neʼe loto e Sesu kapau ʼe fia mulimuli ia te hahaʼi iā te ia, pea ke natou fai ʼuhi ko te ʼu meʼa ʼaē neʼe natou sio mata kiai. ʼI tapuakina lahi neʼe maʼu e tana ʼu tisipulo ʼi te mole fakamaʼua age e tonatou ʼAliki ke natou haohaoa hagē ko te kau ʼāselo ʼaē neʼe fakatahi mo ia ʼi selō!

19, 20. Neʼe uga feafeaʼi e te ʼofa pea mo te manavaʼofa ia Sesu ke tokoni ki te hahaʼi?

¹⁹ Neʼe toe fakahā e Sesu Kilisito ia tona ʼofa—ko te kalitātē tāfito ʼaia ʼo tana Tamai ʼaē ʼe ʼi selō. (1 Soa. 4:8) Neʼe akoʼi e Sesu ki te hahaʼi ia te ʼofa. Ohagē lā, kotou vakaʼi age muʼa ia tana ʼu palalau ʼaē neʼe ina fai ki te pule kei tūpulaga. (Lau ia Maleko 10:17-22.) Neʼe “ ʼofa [ia Sesu] kiā te ia” pea neʼe fia tokoni kiā te ia, kae neʼe mole fia liʼaki e te pule tūpulaga ʼaia tona ʼu koloa fuli kae liliu ko he tisipulo ʼa Kilisito.

²⁰ ʼI te ʼu kalitātē ʼaē neʼe leleiʼia ai Sesu e te hahaʼi neʼe ko tona manavaʼofa. Ohagē pē ko te tagata agahala fuli, ko nātou ʼaē neʼe natou tali tana faiako neʼe natou mafasia ʼi te ʼu fihifihia. ʼI tana mahino ki te faʼahi ʼaia, neʼe faiakonaki Sesu kiā nātou ʼaki ia te manavaʼofa pea mo te ʼofa. Tou toʼo te faʼifaʼitaki: ʼI te tahi ʼaluʼaga, ʼi te maʼumaʼua ʼo Sesu pea mo tana kau ʼapositolo, neʼe mole maʼu ai honatou temi ke natou kakai ai. Kae neʼe koteā ʼaē neʼe fai e Sesu ʼi tana sio ki te fakamāʼopoʼopo mai ʼa te hahaʼi tokolahi? “Neʼe ʼofa mamahi kiā nātou, koteʼuhi neʼe natou hagē ni faga ovi ʼe mole ʼi ai honatou tagata tauhi. Pea neʼe lahi te ʼu meʼa neʼe ina kamata akonakiʼi kiā nātou.” (Mko. 6:34) Neʼe tokagaʼi e Sesu ia te ʼaluʼaga fakaʼofaʼofa ʼo te hahaʼi ʼo tona telituale, pea neʼe ina fakaʼaogaʼi tona mālohi moʼo akoʼi nātou pea mo fai ni ʼu milakulo ke fua lelei kiā nātou. Ko ʼihi neʼe natou fakaovi mai kiā te ia ʼuhi ko tona ʼu kalitātē lelei, neʼe natou lotomālohi ʼi tana ʼu palalau, pea neʼe natou liliu ko tana ʼu tisipulo.

21. Koteā ʼaē kā tou vakaʼi anai ʼi te ʼalatike kā hoa mai?

²¹ ʼE kei lahi age te ʼu manatu ʼe feala ke tou ako ʼo ʼuhiga mo te minisitelio ʼa Sesu ʼi te kele, pea ʼe tou vakaʼi anai te faʼahi ʼaia ʼi te ʼalatike kā hoa mai. Ko te tahi age ʼu ʼaluʼaga fea ʼe feala ai ke tou faʼifaʼitakiʼi ia Sesu Kilisito, te Tagata Misionea lahi tokotahi?

ʼE Kotou Tali Feafeaʼi Anai?

• Koteā te ako ʼaē neʼe maʼu e Sesu ʼi muʼa ʼo tana haʼu ki te kele?

• Ko te ʼu faʼahi fea ʼo te faiako ʼa Sesu neʼe māʼoluga ai ʼi ʼaē ʼa te kau sekelipa pea mo te kau Faliseo?

• Ko te ʼu kalitātē fea ʼaē neʼe tupu ai te leleiʼia ʼo Sesu e te hahaʼi?

[Paki ʼo te pasina 19]

Neʼe feafeaʼi te akoʼi ʼo te hahaʼi e Sesu?