Ko Noe Pea Mo Te Tulivio—ʼE Ko He Fakamatala Moʼoni, Kae Mole Ko He Fāgana
ʼE KOTOU fakaʼamu koa ki he mālama ʼe lelei age—ki he mālama ʼe māʼuʼuli ai te hahaʼi ʼi te tokalelei ʼaki he loto tahi? Ki he mālama ʼe mole kei ʼi ai he tau, he fai fakapō, pea mo he ʼu mamahi? Kapau koia, ʼe feala ke kotou maʼu he fakalotomālohi ʼi te fakamatala ʼe lagi kotou ʼiloʼi lelei. ʼE ko te fakamatala ʼo Noe, neʼe ko he tagata agalelei ia neʼe ina faʼu ia te ʼaleka moʼo haofaki ia ia pea mo tona kiʼi fāmili mai te tulivio fakamālamanei ʼaē neʼe mamate ai te kau agakovi.
ʼE mole lahi he ʼu hisitolia ʼe ʼiloa fēia. Ko te fakamatala ʼo ʼuhiga mo te meʼa ʼaē neʼe hoko kiā Noe ʼe maʼu ʼi te Tohi-Tapu, ʼi te tohi ʼo Senesi, ʼi te kāpite 6 ki te kāpite 9, pea ʼe toe fakamatala ʼi te Coran pea mo te ʼu fāgana ʼa te hahaʼi tokolahi ʼi te kele kātoa. Neʼe hoko moʼoni koa ia te Tulivio, peʼe ko he fāgana pē ia ʼe ina fakalotomālohiʼi ia te hahaʼi ke natou fai ia te meʼa ʼaē ʼe totonu? Ko te kau teolosia pea mo te kau popoto ʼe natou fakafihiʼi ia te faʼahi talu mai ni ʼu sēkulō. Kae, ʼe fakahā lelei mai ʼi te Tohi-Tapu, ia te Folafola ʼa te ʼAtua—ʼe ko he fakamatala moʼoni, kae ʼe mole ko he fāgana. Tou tokagaʼi ia te ʼu tupuʼaga ʼe feala ke tou tui papau ai ʼe moʼoni ia te fakamatala ʼo te koga tohi ʼo Senesi.
ʼE ina fakahā lelei mai kiā tātou ia te taʼu, mo te māhina, mo te ʼaho pea mo te temi ʼaē neʼe kamata ai te Tulivio, pea mo te koga meʼa ʼaē neʼe tau ai te ʼaleka, pea mo te temi ʼaē neʼe fakahifo ai te ʼu vai ʼi te kele. ʼE tou toe maʼu ai mo te ʼu tahi fakamahino lelei ʼo ʼuhiga mo te ʼaleka—tona pāki, mo tona ʼu fakafuafua lelei, pea mo te ʼu meʼa gāue ʼaē neʼe fakaʼaogaʼi ki tona faʼu. ʼE mole tatau ia mo te ʼu fāgana ʼi te agamāhani ʼe mole lelei tanatou ʼu fakamahino.
Ko koga tohi e lua ʼo te Tohi-Tapu ʼo ʼuhiga mo te ʼu hōloga ʼe nā fakamoʼoni ko Noe neʼe ko he tahi neʼe maʼuli moʼoni. (1 Fakamatala 1:4; Luka 3:36) Neʼe fai e Esitalasi pea mo Luka, ia te lisi ʼo te ʼu hōloga ʼaia, ʼo nā fai he ʼu kumi loloto. Neʼe tohi e Luka ia te hōloga ʼo Sesu Kilisito ʼo aʼu kiā Noe.
Neʼe fai e te ʼu polofetā ko Isaia pea mo Esekiele pea mo te ʼu ʼapositolo ko Paulo pea mo Petelo ia te ʼu fakamatala ʼo ʼuhiga mo Noe pea mo te Tulivio.—Isaia 54:9; Esekiele 14:14, 20; Hep 11:7; 1 Petelo 3:19, 20; 2 Petelo 2:5.
Neʼe talanoa ia Sesu Kilisito ki te Tulivio, ʼo ina ʼui fēnei: “Ohagē pē ko te meʼa ʼaē neʼe hoko ʼi te ʼu ʼaho ʼo Noe, ʼe toe fēia pē anai ʼi te ʼu ʼaho ʼo te Foha ʼo te tagata: neʼe natou kakai, neʼe natou ʼiʼinu, ko te hahaʼi tagata neʼe ʼohoana, pea ko te hahaʼi fafine neʼe foaki ke ʼohoanaʼi, ʼo aʼu ki te ʼaho ʼaē neʼe hū ai ia Noe ki te ʼaleka, pea neʼe haʼu te tulivio ʼo ina fakaʼauha ia nātou fuli.” (Luka 17:26, 27) Kanapaulā neʼe mole hoko moʼoni ia te Tulivio, kanaʼaua lā ʼe mole ʼi ai he ʼuhiga ʼo te fakamatala ʼa Sesu ʼo ʼuhiga mo “te ʼu ʼaho ʼo te Foha ʼo te tagata.”
Neʼe fakakikite e te ʼapositolo ko Petelo ʼe ʼomai anai ‘he hahaʼi manukinuki’ ʼo natou vāʼi te ʼu fakamatala ʼaē ʼe tuʼu ʼi te Tohi-Tapu. Neʼe tohi fēnei e te ʼapositolo ko Petelo: “Ohagē pē ko tonatou holi, ʼe puli kiā nātou te meʼa ʼaenī . . . te mālama ʼo te temi [ʼo Noe], ʼi te temi ʼaē neʼe lōfia ai ʼi te vai.” ʼE tonu koa ke tou lītuʼa ki “te meʼa ʼaenī”? Kailoa ia! Neʼe hoko atu fēnei e te ʼapositolo ko Petelo: “Ko te lagi pea mo te kele ʼo te temi ʼaenī kua tānaki ki te afi pea kua tāʼofi ki te ʼaho ʼo te fakamāu pea mo te fakaʼauha ʼo te hahaʼi ʼaē ʼe mole tauhi ki te ʼAtua.”—2 Petelo 3:3-7.
ʼE toe hā mai ʼi henī, ʼe fakaʼauha anai e te ʼAtua ia te hahaʼi agakovi, pea ʼe ʼi ai mo te hahaʼi kā hao anai. ʼAki tatatou faʼifaʼitakiʼi ia te maʼuli ʼo Noe, ʼe lagi feala pē ke tou kau ʼi te kau faitotonu ʼaē kā haofaki anai ʼo natou hū ki he mālama ʼe lelei age.