Kotou Taupau “He Maea ʼe Kau Tolu” ʼi Te Nofo ʼOhoana
“Ko he maea ʼe kau tolu, ʼe mole motu vave anai.”—TNK. 4:12.
1. Ko ai koa ʼaē neʼe ina fakatapuʼi te ʼuluaki ʼohoana?
ʼI TANA kua ʼosi fakatupu ia te ʼu fuʼu ʼakau pea mo te ʼu manu, neʼe fakatupu leva e Sehova ʼAtua ia te ʼuluaki tagata ko Atama. Ki muli age, neʼe fakamoe e te ʼAtua ia Atama, pea neʼe Ina fakaʼaogaʼi te hui vakavaka ʼi te ʼu hui vakavaka ʼo Atama moʼo faʼu ʼaki ai hona tokoni haohaoa. ʼI te sio ʼaē ʼa Atama ki te fafine ʼaia, neʼe ʼui māʼana: “Ko ia ʼaenī ko te hui ʼo toku hui pea mo te kakano ʼo toku kakano.” (Sen. 1:27; 2:18, 21-23) Neʼe fakahā e Sehova ia tana leleiʼia tana fakatupu ʼaia ʼo te fafine, ʼo ina fakatapu ai te ʼuluaki ʼohoana pea mo ina tapuakina nāua.—Sen. 1:28; 2:24.
2. Koteā ʼaē neʼe fai e Satana ke mole kei felōgoi lelei ia Atama mo Eva?
2 Meʼa fakaʼofaʼofa, mole tuai pea neʼe tuʼutāmakiʼia te fakatuʼutuʼu ʼa te ʼAtua ʼaē ko te nofo ʼohoana. ʼO feafeaʼi? Ko te laumālie agakovi, ʼaē neʼe fakahigoaʼi ko Satana, neʼe ina kākāʼi ia Eva ke ina kai ia te fuaʼi ʼakau ʼo te fuʼu ʼakau pē e tahi ʼaē neʼe tapuʼi age ki te taumātuʼa. Mole faʼa fualoa kiai, pea kau ia Atama mo tona ʼohoana ki te talagataʼa ʼaē ki te ʼu lao faitotonu ʼa te ʼAtua pea mo tana takitaki lelei. (Sen. 3:1-7) ʼI te temi ʼaē neʼe fakalavelave ai e Sehova ki te taumātuʼa peʼe koteā te meʼa ʼaē neʼe nā fai, neʼe hā lelei ai neʼe mole kei nā felōgoi lelei. Neʼe tukugākoviʼi e Atama ia tona ʼohoana, ʼo ʼui māʼana: “Ko te fafine ʼaē neʼe ke foaki mai ke maʼuli mo au, neʼe ina foaki mai te fua ʼo te fuʼu ʼakau pea neʼe au kai au.”—Sen. 3:11-13.
3. Koteā te manatu hala ʼaē neʼe kua maʼu e ʼihi Sutea?
3 Talu mai ni ʼu sēkulō, neʼe fakaʼaogaʼi e Satana ia te ʼu kākā kehekehe moʼo fakamāvete ia te ʼu taumātuʼa. Ohagē lā, ʼi ʼihi temi neʼe ina fakaʼaogaʼi te kau takitaki lotu moʼo fakamafola ia he manatu ʼo ʼuhiga mo te ʼohoana ʼe mole fakatafito ki te Tohi-Tapu. Ko ʼihi kau takitaki Sutea neʼe natou meʼa noaʼi ia te ʼu lēkula ʼa te ʼAtua, ʼo natou fakagafua ki te ʼu tagata ʼohoana ke natou māvete mo ʼonatou ʼohoana ʼuhi pē ko he ʼu kiʼi meʼa noa, ohagē lā neʼe lahi fau te konakonaʼi ʼo he meʼa kai. Kae neʼe ʼui fēnei e Sesu: “Ko ʼaē ʼe māvete mo tona ʼohoana, gata pē mokā ʼe tupu mai he folonikāsio, pea toe ʼohoana ia mo he tahi fafine, ʼe tono ia.”—Mat. 19:9.
4. Kua feafeaʼi ia te tuʼutāmakiʼia ʼo te nofo ʼohoana iā ʼaho nei?
4 ʼE kei faiga aipē ia Satana ke ina maumauʼi ia te felōgoi ʼa te taumātuʼa. Ko te ʼu tagata kua natou nonofo pē mo ʼihi tagata, mo te kua maʼuli fakatahi pē ʼa te hahaʼi tagata pea mo te hahaʼi fafine kae mole natou ʼohoana, pea mo te kua faigafua ʼo te māvete pē ʼa te ʼu taumātuʼa, ʼe ko he fakamoʼoni ʼo te iku lelei ʼo tana faiga ʼaia. (Lau ia Hepeleo 13:4.) ʼI totatou ʼuhiga Kilisitiano, koteā ʼaē ʼe tou lava fai moʼo tekeʼi ia te manatu hala ʼaē kua mafola ʼo ʼuhiga mo te ʼohoana? Tou vakaʼi age muʼa ia te ʼu puani ʼaē ʼe fiafia ai he nofo ʼohoana.
Tou Fakamuʼamuʼa Ia Sehova ʼi Te Nofo ʼOhoana
5. Koteā te fakaʼuhiga ʼo te kupusiga palalau “maea ʼe kau tolu” mokā ʼe fakaʼaogaʼi ki te nofo ʼohoana?
5 Ke fiafia te maʼuli ʼo he taumātuʼa, ʼe tonu ke nā felōgoi lelei mo Sehova. ʼE ʼui fēnei ʼi tana Folafola: “Ko he maea ʼe kau tolu, ʼe mole motu vave anai.” (Tnk. 4:12) Ko te “maea ʼe kau tolu” ʼe ko he palalau fakatā. Kā fakaʼaogaʼi ia te lea fakatā ʼaia ki te nofo ʼohoana, ʼe fakaʼuhiga ki te taumātuʼa, ia te ʼu maea e lua, ʼaē ʼe fī fakatahi mo te tolu maea ʼaē ko Sehova ʼAtua. Ko tanā logotahi ʼaē mo te ʼAtua ʼe feala ki tonā maʼuli fakataumātuʼa ke mālohi ʼi te faʼahi fakalaumālie moʼo tauʼi te ʼu fihifihia, pea ko te kalavī ʼaia ke maʼu ai he fiafia ʼe lahi age ʼi te nofo ʼohoana.
6, 7. (a) Koteā ʼaē ʼe lava fai e he ʼu Kilisitiano ke natou ʼiloʼi papau ʼe natou felōgoi lelei mo te ʼAtua ʼi tonatou maʼuli fakataumātuʼa? (b) Koteā ʼaē neʼe leleiʼia tāfito e te tuagaʼane ʼi tona ʼohoana?
6 Kae koteā ʼaē ʼe lava fai e he taumātuʼa ke nā ʼiloʼi papau ko tanā nofo ʼohoana ʼe hagē ko te maea kau tolu? Neʼe hiva fēnei e te tagata fai pesalemo ko Tavite: “Neʼe au fiafia, Ê toku ʼAtua, ʼi te fai ʼo tou finegalo, pea ko tau lao ʼe nofo ʼi toku loto.” (Pes. 40:8) ʼO toe fēia mo totatou ʼofa ʼaē ki te ʼAtua, ʼe ina uga kita ke tou tauhi kiā te ia ʼaki he loto kātoa. Koia, ko te taumātuʼa ʼe tonu ke nā fakatuputupu hanā ʼu felōgoi takitokotahi mo Sehova pea ke nā fiafia ʼi te fai ʼo tona finegalo. ʼE tonu foki ki te taumātuʼa ke nā fefakalotomālohiʼaki ʼo ʼuhiga mo tonā ʼofa ʼaē ki te ʼAtua.—Taag. 27:17.
7 Kapau ko te lao ʼa te ʼAtua ʼe tuʼu moʼoni ʼi totatou ʼu loto, pea ko te ʼu kalitātē ohagē ko te tui, te falala pea mo te ʼofa ʼe hā anai pea mo tokoni anai ki te fakatuputupu ʼo te felōgoi fakataumātuʼa. (1 Ko. 13:13) Ko te tuagaʼane ʼe higoa ko Sandra, kua taʼu 50 tana kua ʼohoana, ʼe ina ʼui fēnei: “Ko te ʼu meʼa ʼaē ʼe au leleiʼia tāfito ʼi toku ʼohoana ʼe ko tana takitaki fakalaumālie pea mo tana ʼu tokoni, mo tona ʼofa ʼaē kiā Sehova, ʼaē ʼe mālohi age ia ʼi tona ʼofa ʼaē kiā au.” ʼU tagata ʼohoana, ʼe feala koa ke palalau fēia ʼo ʼuhiga mo koutou?
8. Koteā ʼaē ʼe ʼaoga moʼo maʼu ia ‘he totogi lelei’ ʼi te nofo ʼohoana?
8 ʼI tokotou ʼuhiga taumātuʼa, ʼe kotou fakamuʼamuʼa koa te ʼu gāue fakalaumālie pea mo te ʼu gāue ʼo te Puleʼaga ʼi tokotou maʼuli? Tahi ʼaē, ʼe kotou fakaʼuhigaʼi moʼoni koa ia tokotou ʼohoana ko he tahi ʼe tauhi fakatahi mo koutou kiā Sehova? (Sen. 2:24) Neʼe ʼui fēnei e te Hau poto ko Salomone: “ ʼE lelei age he toko lua ʼi he tokotahi, heʼe lelei tonā totogi ʼi tanā gāue kinakina.” (Tnk. 4:9) ʼIo, ko he tagata mo he fafine ʼe tonu ke nā gāue kinakina ke feala hanā maʼu ia ‘he totogi lelei’ ʼi hanā logotahi ʼofa pea mo tologa ʼe nā maʼu ai ia te tapuakina ʼa te ʼAtua.
9. (a) Koteā te ʼu maʼua ʼo te ʼu tagata ʼohoana? (b) Iā Kolose 3:19, ʼe tonu ke gaohi feafeaʼi e te tagata ia tona ʼohoana?
9 ʼE ʼiloʼi anai peʼe felōgoi lelei ia te taumātuʼa mo te ʼAtua mo kapau ʼe nā mulimuli ki Tana ʼu lēkula. ʼE fakamaʼua ʼuluaki ki te ʼu tagata ʼohoana ke natou tōkakaga ki te maʼuli fakasino pea mo fakalaumālie ʼo tonatou ʼu loto fale. (1 Tim. 5:8) ʼE fakalotomālohiʼi foki nātou ke natou tōkakaga ki te ʼu meʼa ʼaē ʼe ʼaoga ki ʼonatou hoa. Iā Kolose 3:19, ʼe tou lau fēnei: “ ʼU tagata ʼohoana, kotou haga ʼoʼofa ki ʼokotou ʼohoana pea ke ʼaua naʼa kotou ʼiʼita kiā nātou.” ʼE ʼui e te tagata sivi Tohi-Tapu ʼo ʼuhiga mo te kupusiga palalau “ ʼiʼita” ʼe fakaʼuhiga “foaki age kiā nātou he ʼu palalau kona, peʼe fakamamahi, pea ʼe mole ʼofa, mo tokaga, mo puipui, pea mo tokoni kiā nātou.” ʼE hā lelei, ʼe mole tuha anai ia te taʼi aga ʼaia ʼi he loto fale Kilisitiano. Kapau ko he tagata ʼohoana ʼe pule ʼaki te ʼofa, pea ʼe lotolelei pē anai tona ʼohoana ke fakaʼapaʼapa age kiā te ia.
10. Koteā te aga ʼaē ʼe tonu ke fakahā e te ʼu fafine Kilisitiano?
10 Ko te ʼu fafine Kilisitiano ʼaē ʼe natou fakamuʼamuʼa ia Sehova ʼi tonatou maʼuli fakataumātuʼa ʼe tonu foki ke natou mulimuli ki te ʼu lēkula ʼa te ʼAtua. Neʼe ʼui fēnei e te ʼapositolo ko Paulo: “Ke fakalogo te ʼu fafine ki ʼonatou ʼohoana ohagē ko hanatou fakalogo ki te ʼAliki, heʼe ko te tagata ʼe pule ki tona ʼohoana ʼo toe hagē pē ko Kilisito ʼe pule ki te kōkelekāsio.” (Efe. 5:22, 23) Neʼe kākāʼi e Satana ia Eva, ʼo ina fakamafola te loi ʼaē ʼe nā fiafia anai ʼo talu ai mo kapau ʼe nā māʼuʼuli faʼifaʼitaliha mai te ʼAtua. ʼE hā lelei ʼi te temi nei, kua maʼu ia te loto faʼifaʼitaliha ʼi te ʼu ʼohoana. Kae ki te ʼu fafine ʼaē ʼe manavasiʼi ki te ʼAtua, ko te fakalogo ʼaē ki tonatou pule ʼofa ʼe mole ko he meʼa mamafa ia. ʼE natou manatuʼi neʼe fakatuʼutuʼu e Sehova ke liliu ia Eva ko he “tokoni” ki tona ʼohoana, ʼaē neʼe fakafuafua e te ʼAtua ko he tuʼulaga lelei kiā ia. (Sen. 2:18) Ko he fafine Kilisitiano ʼe kaugā gāue lelei mo te fakatuʼutuʼu ʼaia neʼe fai e te ʼAtua, ʼe ko “he fakapale” moʼoni ia ki tona ʼohoana.—Taag. 12:4.
11. Koteā ʼaē neʼe mahino kiai ia te tehina neʼe tokoni ki tona maʼuli fakataumātuʼa?
11 Ko te tahi tokoni ke felōgoi lelei ai he taumātuʼa mo te ʼAtua ʼe ko hanā ako fakatahi ia te Folafola ʼa te ʼAtua. Ko Gerald, ʼaē kua taʼu 55 nei tana kua ʼohoana, ʼe ina ʼui fēnei: “Ko te fakatuʼutuʼu maʼuhiga ke fiafia ai he ʼohoana ʼe ko tata lautohi pea mo ako fakatahi ia te Tohi-Tapu.” ʼE ina toe ʼui fēnei: “ ʼI tata fai fakatahi ia te ʼu faʼahi ʼaia, tāfito lā ia te ʼu gāue fakalaumālie, ʼe fakatuputupu ai te feʼofaʼofaniʼaki ʼa te taumātuʼa pea mo tanā felōgoi ʼaē mo Sehova.” Ko te ako fakatahi ia te Tohi-Tapu ʼe tokoni ki te fāmili ke ina taupau maʼu ia te ʼu lēkula ʼa Sehova, pea ʼe mālohi ai tana felōgoi mo Ia, pea mo haga tuputupu aipē.
12, 13. (a) He koʼē ʼe maʼuhiga ʼaupitō ke faikole fakatahi ia te taumātuʼa? (b) Koteā ʼihi gāue fakalaumālie ʼe fakatupu mālohi ai ki te maʼuli ʼo he taumātuʼa?
12 Ko te ʼu taumātuʼa ʼaē ʼe natou maʼuli fiafia ʼe natou toe faikole fakatahi foki. Kā ‘fakahā’ e he tagata ʼohoana ia ‘tona loto’ ʼaki ni ʼu kolekole ʼo ʼuhiga mo he ʼu ʼaluʼaga makehe ʼe hoko kiā nāua, ʼe mahino ia ʼe fakamālohiʼi ai tona maʼuli fakataumātuʼa. (Pes. 62:8) Ohagē lā, ʼe lagi faigafua age anai he fakatokatoka ʼo hokotou fihifihia fakataumātuʼa mo kapau neʼe kua kotou kole fakatahi ki te Māfimāfi ia tana tokoni pea mo tana takitaki! (Mat. 6:14, 15) ʼO mulimuli ki te ʼu manatu ʼaē neʼe nā kole ʼi te faikole, ʼe lelei anai ki te taumātuʼa ke nā fai he fakatokatoka moʼo nā fetokoniʼaki pea mo nā “haga fekātakiʼaki pea mo fefakamolemoleʼaki ʼaki he lotolelei.” (Kol. 3:13) ʼE nā fakahā ia tana falala ki te ʼAtua mo kapau ʼe nā manatuʼi ia te faikole ʼaia. Neʼe ʼui fēnei e te Hau ko Tavite: “ ʼAki he loto falala, ko te ʼu mata ʼo te hahaʼi fuli ʼe natou sio kiā te koe.” ’(Pes. 145:15) Kā tou falala ki te ʼAtua ʼo faikole ki ai, pea ʼe siʼisiʼi ai totatou loto hoha, heʼe tou ʼiloʼi ʼe ‘tokaga ia kiā tātou.’—1 Pet. 5:7.
13 Ko te tahi kalavī ke felōgoi ai he taumātuʼa mo Sehova ʼe ko te kau ki te ʼu fono pea mo gāue fakatahi ʼi te minisitelio. ʼI tatatou ʼu fono, ʼe logo ai ia te ʼu taumātuʼa ki te ʼu tokoni moʼo tekeʼi ia te ʼu aga fakakākā ʼaē ʼe fakaʼaogaʼi e Satana moʼo fakamaveuveu ia te ʼu fāmili. (Efe. 6:11, kiʼi nota.) Pea ko te taumātuʼa ʼaē ʼe gāue fakatahi tuʼumaʼu ʼi te minisitelio ʼe nā ako ai ke nā “liliu ʼo mālolohi, tāʼofi maʼu.”—1 Ko. 15:58.
Kā Hoko He ʼu Fihifihia
14. Ko te ʼu faʼahi fea ʼaē ʼe feala ke hoha ai te maʼuli ʼo he taumātuʼa?
14 Koia, ko te ʼu tokoni ʼaē kua tou talanoa kiai ʼe mole ko he ʼu tokoni foʼou, kae he koʼē ʼe mole kotou palalau fakahagatonu ki te faʼahi ʼaia mo tokotou hoa? Kotou vakaʼi peʼe ʼi ai he ʼu faʼahi ʼo tokolua maʼuli fakataumātuʼa ʼe ʼaoga ke fetogi. Kae ʼe toe fakahā mai pē ʼi te Tohi-Tapu, māʼiapē lā mo nātou ʼaē ʼe felōgoi lelei mo te ʼAtua ʼi tonatou maʼuli fakataumātuʼa, ʼe natou “maʼu anai te ʼu mamahi ʼi tonatou kakano.” (1 Ko. 7:28) ʼUhi ko te ʼuhiga heʼe haohaoa ʼo te tagata, mo te ʼu fakahala ʼo te mālama heʼe lotu ʼaenī, pea mo te ʼu hele ʼa te Tēvolo, ʼe feala pē ke hoha ia te maʼuli fakataumātuʼa ʼa te ʼu kaugana agatonu ʼa te ʼAtua. (2 Ko. 2:11) Kae ʼe fakafealagia mai pē e Sehova ke tou tauʼi totatou ʼu hoha ʼaia. ʼEī, ʼe feala pē ke tauʼi ia te loto hoha. Neʼe puli ia te faga manu ʼa te tagata agatonu ko Sopo, tana ʼu tagata faifekau, pea mo tana fānau. Kae ʼe ʼui fēnei mai ʼi te Tohi-Tapu: “ ʼI te ʼu faʼahi fuli ʼaia neʼe mole agahala ia Sopo pea neʼe mole ina tuku he meʼa ʼe kovi ki te ʼAtua.”—Sopo 1:13-22.
15. Koteā ʼaē ʼe lava fai e te hahaʼi ʼuhi ko tanatou loto hoha, pea koteā ʼaē ʼe lava fai e te ʼu taumātuʼa ke ʼaua naʼa hoko te faʼahi ʼaia?
15 Pea tahi, neʼe ʼui fēnei age e te ʼohoana ʼo Sopo: “ ʼE kei ke taupau maʼu pē koa tau agatonu? Laukovi ki te ʼAtua pea ke mate!” (Sopo 2:9) ʼIo, kā hoko he ʼu tuʼutāmaki peʼe ko he tahi ʼu fihifihia, ko te lotomamahi ʼaē ʼe tupu mai te ʼu ʼaluʼaga ʼaia ʼe feala ai ki he tahi ke ina fai he ʼu tonu peʼe ko he ʼu aga ʼe mole kei ina fakakaukauʼi tona ʼu fua. ʼE ʼui fēnei e te tagata poto: “Ko te fakamālohi ʼe feala ke ina fakaliliu ʼo vale te tagata ʼaē ʼe poto.” (Tnk. 7:7) Kapau ko tokotou ʼohoana ʼe palalau ʼita atu ʼuhi ko he ʼaluʼaga faigataʼa ʼe tau mo tokotou maʼuli fakataumātuʼa, ʼaua naʼa kotou ʼiʼita mo koutou. Kapau ʼe kotou toe liufaki ki ai tana faʼahiga palalau atu, ʼe feala pē anai ke kolua fai he ʼu palalau ʼe toe fakaʼāsili age anai takolua kē. (Lau ia Pesalemo 37:8.) Koia ʼaua naʼa kotou tokagaʼi ia “te ʼu palalau noa” ʼaē ʼe tupu mai he loto hoha peʼe ko he lotovaivai.—Sopo 6:3.
16. (a) ʼE feafeaʼi te maʼuliʼi ʼo te ʼu palalau ʼa Sesu ʼaē iā Mateo 7:1-5 ʼi te maʼuli fakataumātuʼa? (b) He koʼē ʼe maʼuhiga ke tou aga fakapotopoto ʼi te nofo ʼohoana?
16 ʼE mole faiga anai ia te tagata peʼe ko te fafine ke haohaoa tonā ʼohoana. ʼE lagi ko he tahi ʼi te taumātuʼa ʼe ina tokagaʼi he faʼahi ʼe tōtō ai tona ʼohoana pea mo manatu fēnei: ‘ ʼE feala ke au fetogi ia ia.’ ʼAki te ʼofa pea mo te faʼa kātaki, ʼe lagi kotou lava tokoni māmālie ki tokotou ʼohoana ke fetogi tana aga ʼaia. Kae ʼaua naʼa galo kiā koutou, neʼe fakatatau e Sesu he tahi ʼe ina fia fakatonutonuʼi he ʼu kiʼi hala ʼa he tahi ki he tahi ʼe sio ki he “mohuku” ʼi te mata ʼo tona tehina kae ʼe mole sio ia ki te “lalago” ʼaē ʼi tona ia mata ʼo ia totonu. Neʼe tokoniʼi fēnei tātou e Sesu: “Tuku takotou fakamāu, koteʼuhi ke ʼaua naʼa fakamāuʼi koutou.” (Lau ia Mateo 7:1-5.) ʼE mole fakaʼuhiga leva ki te ʼu taumātuʼa ke natou meʼa noaʼi te ʼu kihiʼi hala. Ko Robert ʼaē kua teitei taʼu 40 tana kua ʼohoana, neʼe ina ʼui fēnei: “ ʼE lagi tonu anai ki he taumātuʼa ke nā fai ni ʼu fetogi ʼi tonā maʼuli, ke nā fefalalaʼaki pea mo nā fepalalauʼaki fakahagatonu, pea mo nā tali lelei tanā ʼu fefakatokagaʼaki ʼaia.” Koia kotou aga fakapotopoto. ʼAua naʼa kotou faiga fau ke maʼu e tokotou ʼohoana ia te ʼu kalitātē ʼaē ʼe kotou fakaʼamu kiai, kae ke kotou leleiʼia tona ʼu kalitātē ʼaē ʼe kotou sio kiai ʼe ina maʼu ʼi tokolua maʼuli.—Tnk. 9:9.
17, 18. Kā lahi fau te loto hoha, ʼe tou lava kumi tokoni kifea?
17 ʼE feala ke hoko he ʼu fihifihia mokā ʼe fetogi te ʼu ʼaluʼaga ʼi te maʼuli. ʼE feala ki he taumātuʼa ke nā tau mo ni ʼu fihifihia mokā nā maʼu hanā fānau. ʼE lagi feala ke mahaki he tahi ʼi te taumātuʼa peʼe ko he tamasiʼi. ʼE lagi ʼaoga anai ke tokaga te taumātuʼa ki he ʼu mātuʼa kua mātutuʼa. Pea ko te ʼu fānau ʼaē kua lalahi ʼe feala ke natou mavae ʼi te loto fale. ʼE feala ki ʼihi fetogi ke hoko mai ʼuhi ko he ʼu pilivilēsio peʼe ko he ʼu gāue fakateokalatike. ʼE feala ki te ʼu fetogi ʼaia ke hoko ai he ʼu loto hoha pea mo he tuʼania ʼi te felōgoi ʼa te taumātuʼa.
18 Koteā ʼaē ʼe feala ke kotou fai mo kapau kua kotou fiu ʼi te ʼu tokakovi ʼaē ʼe hoko ʼi tokotou maʼuli fakataumātuʼa? (Taag. 24:10) ʼAua naʼa kotou lotovaivai! Heʼe ko te meʼa ʼaē ʼe ʼamanaki kiai ia Satana ke situʼa ia he tahi ʼi te ʼu kaugana ʼa te ʼAtua ki te tauhi maʼa. Pea ʼe fiafia anai ia mo kapau ʼe fai e he taumātuʼa ia te faʼahi ʼaia. Koia, kotou faigaʼi ke maʼu ʼi tokolua maʼuli fakataumātuʼa ia te maea kau tolu. ʼE maʼu ʼi te Tohi-Tapu ia te ʼu tuʼuga fakamatala ʼo nātou neʼe nonofo agatonu logolā te ʼu fihifihia ʼaē neʼe hoko. Ohagē lā, ʼi te tahi ʼaluʼaga, neʼe fakahā e Tavite ia tona lotomamahi kiā Sehova, ʼo ina ʼui fēnei: “Fakahā mai te ʼofa, Ê ʼAtua, koteʼuhi neʼe kumi e te tagata kelekele ke ina . . . fakamamahiʼi au.” (Pes. 56:1) Neʼe heʼeki kotou logoʼi koa hokotou fakamamahiʼi e he “tagata kelekele”? Kapau ʼe kotou lotomamahi ʼuhi ko he tahi pē peʼe ko he tahi ʼe felōgoi lelei pē mo koutou, kotou manatuʼi neʼe maʼu e Tavite ia te mālohi ʼaē ke ina ʼūtakiʼi tona ʼu mamahi, pea ʼe feala anai mo koutou. Neʼe ʼui fēnei e Tavite: “Neʼe au fakafehuʼi ia Sehova, pea neʼe tali mai kiā te au, pea ʼi toku ʼu mataku fuli neʼe ina haofaki au.”—Pes. 34:4.
Te Tahi ʼu Tapuakina
19. ʼE feafeaʼi hatatou tekeʼi ia te ʼu fakahala ʼaē ʼa Satana kiā tātou?
19 ʼI te ʼu temi fakaʼosi ʼaenī, ʼe ʼaoga ki te ʼu taumātuʼa ke natou “haga fefakalotofīmālieʼaki pea mo . . . fefakalotomālohiʼaki.” (1 Tes. 5:11) ʼAua naʼa galo iā koutou, ʼe lau pē e Satana ʼe mālualoi tatatou agatonu ʼaē kiā Sehova. Pea ʼe ina faigaʼi anai ʼaki he ʼu ʼaluʼaga kehekehe, ʼo kau ai mo te veteki ʼo te ʼohoana, ke ina maumauʼi ia tatatou agatonu ʼaē ki te ʼAtua. Ke tou lava tekeʼi ia te ʼu fakahala ʼaē ʼa Satana kiā tātou, ʼe tonu ke tou falala kātoa kiā Sehova. (Taag. 3:5, 6) Neʼe ʼui fēnei e Paulo: “ ʼE au maʼu te mālohi kiā meʼa fuli, ʼuhi ko ia ʼaē ʼe ina foaki mai te mālohi.”—Filp. 4:13.
20. Ko te ʼu tapuakina fea ʼe kita maʼu ʼi tatatou felōgoi lelei mo te ʼAtua ʼi totatou maʼuli fakataumātuʼa?
20 ʼE lahi ia te ʼu tapuakina ʼaē ʼe tou maʼu mokā ʼe tou felōgoi lelei mo te ʼAtua ʼi totatou maʼuli fakataumātuʼa. Neʼe ko he faʼahi neʼe lagi hoko kiā Joel pea mo tona ʼohoana, ʼaē kua nā ʼohoana talu mai taʼu e 51. ʼE ina ʼui fēnei: “ ʼE au fakafetaʼi tuʼumaʼu kiā Sehova ʼo ʼuhiga mo toku ʼohoana pea mo te fiafia ʼi tamā fakatahi. Neʼe ko hoku tokoni lelei.” Koteā ʼaē neʼe tokoni ke nā felōgoi loaloaga fēia? “Neʼe mā faigaʼi ʼi te temi fuli pē ke mā fefakahāʼaki ia te agalelei, te faʼa kātaki, pea mo te feʼofaʼaki.” ʼE mole ʼi ai anai he tahi iā tātou ʼe ina fai fakalelei anai ia te faʼahi ʼaia ʼi te tuʼu ʼaenī. Kae tou faʼa kātaki ʼo maʼuliʼi ia te ʼu pelesepeto ʼo te Tohi-Tapu pea mo tou felōgoi lelei mo Sehova ʼi totatou maʼuli fakataumātuʼa. Kapau ʼe tou fai ia te faʼahi ʼaia, pea ʼe hagē anai ia totatou maʼuli fakataumātuʼa “ko he maea ʼe kau tolu, ʼe mole motu vave anai.”—Tnk. 4:12.
ʼE Kei Kotou Manatuʼi Koa?
• Koteā te fakaʼuhiga ʼo te felōgoi lelei mo Sehova ʼi he maʼuli ʼo he taumātuʼa?
• Koteā ʼaē ʼe tonu ke fai e he taumātuʼa mokā ʼe nā tau mo ni ʼu fihifihia?
• ʼE tou ʼiloʼi feafeaʼi peʼe felōgoi lelei ia he taumātuʼa mo te ʼAtua ʼi tonā maʼuli?
[Paki ʼo te pasina 22]
Ko te faikole fakatahi ʼa he taumātuʼa ʼe tokoni kiā nāua ke nā fakatokatoka ia tonā ʼu fihifihia