Te ʼu Fehuʼi ʼa Te Kau Lautohi
ʼE Tali Koa e Te Kau Fakamoʼoni ʼa Sehova Ia Te Tauhi ʼĀfea?
Ko te kau Fakamoʼoni ʼa Sehova ʼe natou fakaʼuhigaʼi ia te Tohi-Tapu ko te Folafola ʼa te ʼAtua, pea ʼe natou tali lualua ia te Tauhi ʼĀfea pea mo te Tauhi Foʼou ʼe ko he ʼu koga maʼuhiga ʼo te Tohi-Tapu. Kae ʼe natou mata feʼaugaʼia ke fakahigoaʼi ia te ʼu koga lualua ʼaia ʼo te Tohi-Tapu, ʼe ko “Te ʼu Tohi Fakahepeleo” pea mo “Te ʼu Tohi Fakakeleka,” heʼe ko te Fakahepeleo pea mo te Fakakeleka neʼe ko te ʼu ʼuluaki lea tāfito ʼaia ʼaē neʼe tohi ʼaki ia te Tauhi ʼĀfea pea mo te Tauhi Foʼou.
Tahi ʼaē meʼa, ko ʼihi ʼaē ʼe natou lau ko nātou ko te kau Kilisitiano, ʼe mole natou faʼa tali leleiʼi ia te Tauhi ʼĀfea. ʼE natou ʼui, ʼe talanoa ai ki he ʼAtua ʼe ʼitaʼita, ʼe ina tali ia te ʼu tau, mo te ʼu fai fakapō, pea mo te ʼu fihi ʼaē ʼe fakafeagai ki te ʼu aga ʼo te ʼAtua ʼofa ʼaē ʼe talanoa kiai ʼi te Tauhi Foʼou. Peʼe natou ʼui kapau ko te Tauhi ʼĀfea ʼe talanoa tāfito ia ʼo ʼuhiga mo te lotu Fakasutea, pea ʼe mole ʼi ai hona ʼaoga ki te kau Kilisitiano. Kae ʼo mulimuli ki te fakatotonu ʼa te ʼAtua ʼaē ʼe tou maʼu iā Teutalonome 12:32, ʼaē ke mole hilifaki he meʼa ki tana folafola peʼe ke ʼaua naʼa toʼo keheʼi he meʼa mai tana folafola, ʼe ko he ʼu tupuʼaga lelei koa ʼaia ke fakaʼaogaʼi pē ia he tahi koga ʼo te Tohi-Tapu kae siʼaki te tahi age koga?
ʼI te taʼu 50 ʼo totatou temi, ʼi te ʼaʼahi ʼaē e te ʼapositolo ko Paulo ia te hahaʼi ʼo Tesalonika mo Keleka, “neʼe ina fakamahino kiā nātou ia te Tohi-Tapu, ʼo fakamatalatala pea mo fakamoʼoni ʼaki he ʼu koga tohi neʼe tonu kiā Kilisito ke mamahi pea mo fakatuʼuake mai te mate.” (Gāue 17:1-3) Ko ʼihi ʼi te nofoʼaki neʼe natou liliu ko ni Kilisitiano, pea ki muli age neʼe vikiʼi nātou e Paulo, ʼo ʼui māʼana: “ ʼI takotou maʼu te folafola ʼa te ʼAtua ʼaē neʼe kotou logoʼi iā mātou, neʼe kotou tali ʼo mole hagē ko he folafola ʼa te tagata, kae neʼe kotou tali ʼaki tona ʼuhiga totonu, ʼaē ko te folafola ʼa te ʼAtua.” (1 Tesalonika 2:13) ʼI te temi ʼaē neʼe ʼaʼahi ai nātou e Paulo, ʼi te ʼu tohi e 27 ʼo te ʼu Tohi Fakakeleka Fakakilisitiano, neʼe lagi ko te Evaselio pē ʼa Mateo neʼe kua ʼosi tohi. Koia ko “te Tohi-Tapu” ʼaē neʼe fakaʼaogaʼi e Paulo moʼo fakamoʼoni “ ʼaki te ʼu koga tohi” neʼe mahino ko he ʼu koga tohi mai te ʼu Tohi Fakahepeleo.
ʼI tona fakahagatonu, ko te kau faitohi ʼo te ʼu Tohi Fakakeleka Fakakilisitiano neʼe tuʼa 320 tanatou talanoa fakahagatonu ki te ʼu koga tohi ʼaē ʼi te ʼu Tohi Fakahepeleo pea mo tuʼa teau tupu tanatou fakaʼaogaʼi pē ia te manatu ʼo he tahi age ʼu koga tohi. Koteā tona tupuʼaga? “Heʼe ko meʼa fuli ʼaē neʼe tohi ʼi te temi muʼa, neʼe tohi ia moʼo akoʼi ʼo tātou, koteʼuhi ke tou maʼu te ʼamanaki ʼaki tatatou faʼa kātaki pea mo te fakalotofīmālie ʼaē ʼe haʼu mai te Tohi-Tapu.” (Loma 15:4) ʼE hā mai, ko nātou ʼaē iā ʼaho nei ʼe natou tali te Tohi-Tapu kātoa, ʼe natou maʼu ʼaupitō ia tona ʼu fua lelei ʼi tanatou fai ia te faʼahi ʼaia.
Ko te ʼu Tohi Fakakeleka Fakakilisitiano, ʼaē ʼe fakatafito ki Te ʼu Tohi Fakahepeleo, ʼe ko he fakakātoa ʼaia ʼo te Folafola ʼa te ʼAtua heʼe ko te ikuʼaga ʼo te fakahā māmālie ʼo te ʼu fakatuʼutuʼu ʼa te ʼAtua. Koia ʼaē ʼe mole pulinoa ai ia te maʼuhiga ʼo Te ʼu Tohi Fakahepeleo. Ko Herbert H. Farmer, polofesea ʼo te ʼu meʼa fakaʼatua ʼi te Univelesitē ʼo Cambridge, ʼe ina ʼui ko te ʼu Evaselio “ ʼe mole feala ke tou mahino kiai mo kapau ʼe mole tou toe lau ia te hisitolia ʼo te hahaʼi ʼaē ʼi te fuakava ʼāfea, ohagē ko tona fakamatala ʼi te Tauhi ʼĀfea.”
ʼE mole he ʼaoga ke fetogi ia te Folafola ʼa te ʼAtua. Ko “te ala ʼo te kau faitotonu ʼe hagē ko te mālama gigila ʼaē ʼe fakahaʼuhaʼu tona mālama ʼo aʼu ki te mafoa lelei ʼo te ʼaho.” (Tāʼaga Lea 4:18) ʼAki te hilifaki ʼo Te ʼu Tohi Fakakeleka ki te Tohi-Tapu, neʼe fakahā māmālie e te ʼAtua peʼe feafeaʼi te fakahoko ʼo tana fakatuʼutuʼu, kae mole ina pulihi ia te maʼuhiga ʼo Te ʼu Tohi Fakahepeleo. ʼE natou kau fuli ki “te folafola ʼa Sehova [ʼaē] ʼe tuʼu ʼo talu ai.”—1 Petelo 1:24, 25.