ʼE Maʼuli Te Folafola ʼa Sehova
Ko He ʼu Puani ʼAoga ʼo Te ʼu Tohi ʼa Soane Pea Mo Suta
ʼE MAHINO ia, ko te ʼu tohi e tolu ʼa Soane neʼe fai ʼi te taʼu 98 ʼo totatou temi ʼi Efesi, pea ʼe ko te ʼu tohi fakamuli ʼaia ʼo te ʼu tohi ʼaē ʼe tuʼu ʼi te Tohi-Tapu. ʼI te ʼu ʼuluaki tohi e lua, ʼe fakalotomālohiʼi ia te kau Kilisitiano ke natou haga haʼele ʼi te mālama pea mo tauʼi ia te ʼapositasia. ʼI te tolu tohi, ʼe mole talanoa pē ia Soane ke haʼele ia te kau Kilisitiano ʼi te moʼoni kae ʼe ina toe fakalotomālohiʼi nātou ke natou gāue ʼi te logotahi.
ʼI tana tohi ʼaē neʼe ina fai ʼi Palesitina, lagi ʼi te taʼu 65 ʼo totatou temi, ko Suta, ia te tehina mataʼi tama ʼo Sesu, neʼe ina fai ia te fakatokaga ki tona ʼu kaumeʼa Kilisitiano ʼo ʼuhiga mo te hahaʼi agakovi ʼaē neʼe hū ki te kōkelekāsio, pea mo ina foaki he ʼu tokoni ʼo ʼuhiga mo te tauʼi ʼo te ʼu fakaneke kovi. Kapau ʼe tou tokagaʼi ia te logo ʼaē ʼi te ʼu tohi e tolu ʼa Soane pea mo te tohi ʼa Suta, ʼe feala ke tokoni mai ke tou nofo mālolohi ʼi te tui logolā ia te ʼu fihifihia.—Hep. 4:12.
TOU HAGA HAʼELE ʼI TE MĀLAMA PEA ʼI TE ʼOFA PEA ʼAKI TE TUI
Ko te ʼuluaki tohi ʼa Soane neʼe ina fai kiā nātou fuli ʼaē ʼe natou fakatahi mo Kilisito, pea neʼe ina foaki ai he tokoni lelei maʼa te kau Kilisitiano, ke natou fakafeagai ki te ʼapositasia pea mo nofo mālolohi ʼi te tui pea mo lagolago ki te faitotonu. Neʼe ina fakahā ia te maʼuhiga ʼaē ke natou haga haʼele ʼi te mālama pea ʼi te ʼofa pea ʼaki te tui.
Neʼe tohi fēnei e Soane: “Kapau ʼe tou haʼele ʼi te mālama ohagē ko [te ʼAtua] totonu ʼe ʼi te mālama, ʼe tou kau ai mo tātou.” Pea ʼuhi ʼaē ko te ʼAtua ʼe ko te Matapuna ʼo te ʼofa, neʼe ʼui fēnei e te ʼapositolo: “Tou haga feʼofaʼofani.” Ko “te ʼofa ʼaē ki te ʼAtua” ʼe ina uga tātou ke tou “maʼuliʼi tana ʼu fakatotonu,” pea ʼe tou mālo ʼi te mālamanei ʼaki “tatatou tui” ʼaē kiā Sehova ʼAtua, mo tana Folafola, pea mo tona ʼAlo.—1 Soa. 1:7; 4:7; 5:3, 4.
Te ʼu Tali Ki Te ʼu Fehuʼi Fakatohi-tapu:
2:2; 4:10—ʼE liliu feafeaʼi ia Sesu ko ‘he sākilifisio faifakalelei’? Ko te kupu faifakalelei ko tona fakaʼuhiga “fakafīmālie.” Neʼe foaki e Sesu tona maʼuli ko he sākilifisio faifakalelei, ko tona fakaʼuhiga, ʼi tana foaki ʼaia ia tona maʼuli, neʼe ina fakafīmālie, pe neʼe ina tali ia te fakamaʼua ʼaē ke faitotonu kātoa. ʼO fakatafito ki te sākilifisio ʼaia, ʼe feala ke folahi e te ʼAtua ia tona manavaʼofa, pea ʼe feala ke ina fakamolemole ia te ʼu agahala ʼo nātou ʼaē ʼe tui kiā Sesu.—Soa. 3:16; Loma 6:23.
2:7, 8—Ko te fakatotonu fea ʼaē neʼe ʼui e Soane ko he fakatotonu “ ʼāfea” pea mo “foʼou”? Neʼe talanoa Soane ki te fakatotonu ʼo ʼuhiga mo te ʼofa fakasākilifisio fakatautēhina. (Soa. 13:34) Neʼe ina ʼui e “ ʼāfea” he neʼe foaki e Sesu ia te fakatotonu ʼaia iā taʼu e 60 ʼi muʼa atu ʼo te tohi e Soane ia tana ʼuluaki tohi. Koia neʼe maʼu e te kau Kilisitiano ia te fakatotonu ʼaia “mai te kamataʼaga” ʼo tonatou maʼuli Fakakilisitiano. ʼE toe “foʼou” ia te fakatotonu ʼaia he fakalaka ia ʼi te ‘ ʼofa ʼa he tahi ki tona tehina ohagē ko ia totonu’ pea ʼe ko he ʼofa fakasākilifisio ia.—Lev. 19:18; Soa. 15:12, 13.
3:2—Koteā ʼaē “neʼe mole heʼeki fakahā” age ki te kau Kilisitiano fakanofo, pea ko ai ʼaē kā sisio anai “ki ai”? Ko te meʼa ʼaē neʼe mole heʼeki fakahā age kiā natou, ʼe ko tonatou agaaga ʼaē kā natou maʼu anai mokā fakatuʼuake nātou ki selō ʼaki he ʼu sino fakalaumālie. (Filp. 3:20, 21) Kae ko te meʼa ʼaē ʼe tonu ke natou ʼiloʼi ʼe ko “te temi pē ʼaē ʼe hā ai [te ʼAtua], ʼe [natou] hagē anai ko ia, heʼe [natou] sisio anai ki ai,” ʼi tona ʼuhiga “Laumālie.”—2 Ko. 3:17, 18.
5:5-8—ʼE lava feafeaʼi ki te vai, mo te taʼataʼa, pea mo te laumālie ke natou fakamoʼoni ko ‘Sesu ʼe ko te ʼAlo ʼo te ʼAtua’? Ko te vai neʼe ko he fakamoʼoni heʼe ʼi te temi ʼaē neʼe papitemaʼi ai Sesu ʼi te vai, neʼe fakahā age e Sehova totonu ia Tona ʼofa ʼaē kiā ia he neʼe ko Tona ʼAlo. (Mat. 3:17) Ko te taʼataʼa ʼo Sesu, peʼe ko tona maʼuli ʼaē neʼe ina foaki ohagē “ko he totogi ʼe tatau maʼa te hahaʼi fuli,” neʼe toe fakamoʼoni ai ko Sesu ʼe ko te ʼAlo ʼo te ʼAtua. (1 Tim. 2:5, 6) Pea ko te laumālie māʼoniʼoni neʼe ina fakamoʼoni ko Sesu ʼe ko te ʼAlo ʼo te ʼAtua ʼi te temi ʼaē neʼe hifo mai kiā te ia ʼi tona papitema, ʼo feala ai ke “fakalaka ʼi te fenua ʼo ina fai te ʼu aga ʼe lelei pea mo fakamālōlō ia nātou fuli ʼaē neʼe gaohi koviʼi e te Tēvolo.”—Soa. 1:29-34; Gāue 10:38.
Te ʼu Puani ʼe Tou Lava Tāʼofi:
2:9-11; 3:15. Kapau ʼe tuku e he Kilisitiano ia he meʼa peʼe ko he tahi ke ina maumauʼi ia tona ʼofa fakatautēhina, ʼe lolotoga haʼele ia ʼi te fakapōʼuli fakalaumālie, ʼo mole ina ʼiloʼi ia tona ala.
TOU HAGA “HAʼELE ʼI TE MOʼONI”
ʼE kamata e Soane ia tana lua tohi, ʼo ina ʼui fēnei: “Te matuʼa ki te fafine ʼaē neʼe filifili pea mo tana fānau.” Neʼe fiafia ʼi tana maʼu “ ʼihi ʼo [tana] fānau ʼe natou lolotoga haʼele ʼi te moʼoni.”—2 Soa. 1, 4.
ʼI tana ʼosi foaki he ʼu tokoni ke maʼu ia te ʼofa, neʼe tohi fēnei e Soane: “Koʼenī ia te fakaʼuhiga ʼo te ʼofa, ke tou haga haʼele ʼo mulimuli ki tana ʼu fakatotonu.” Neʼe toe fai e Soane ia te fakatokaga ʼo ʼuhiga mo “te fakahala . . . pea mo te fakafeagai . . . kiā Kilisito.”—2 Soa. 5-7.
Te ʼu Tali Ki Te ʼu Fehuʼi Fakatohi-tapu:
1, 13—Ko ai ia “te fafine ʼaē neʼe filifili”? Neʼe lagi talanoa ia Soane ki he fafine, ʼo ina fakahigoaʼi ko Kyria, ʼe ko te kupu Fakakeleka moʼo fakaliliu ia te kupu “fafine.” Pe neʼe lagi ina fai he ʼu palalau fakatā moʼo palalau ki te kōkelekāsio ke mole mahino ia te hahaʼi fakataga. Kapau koia, ko tana fānau ʼe lagi ko te hahaʼi ʼo te kōkelekāsio ʼaia pea ko “te fānau ʼo [tona] tuagaʼane” ʼe lagi ko te hahaʼi ʼo te tahi age kōkelekāsio.
7—Koteā ia te “haʼele mai” ʼa Sesu ʼaē ʼe talanoa kiai ʼi henī ia Soane, pea neʼe feafeaʼi ki te kau fakahalahala ia tanatou “mole . . . fakamoʼoni” kiai? Ko te “haʼele mai” ʼa Sesu ʼe mole ko tana haʼele mai ʼi te kā haʼu, ʼi hona ʼaluʼaga fakapulipuli. Kailoa, kae neʼe ko tana haʼele mai ʼi te kakano pea mo tona fakanofo ko te Kilisito. (1 Soa. 4:2) Ko te kau fakahalahala ʼe mole natou fakamoʼoni ki tana haʼele mai ʼaia ʼi te kakano. Lagi mole natou tui neʼe maʼuli Sesu peʼe natou fakafisi ki tona fakanofo ʼaki ia te laumālie māʼoniʼoni.
Te ʼu Puani ʼe Tou Lava Tāʼofi:
2, 4. Ko tatatou ʼiloʼi ʼaē ia “te moʼoni,” ia te ʼu akonaki fuli Fakakilisitiano ʼaē ʼe tuʼu ʼi te Tohi-Tapu, pea mo tatatou mulimuli kiai, ʼe maʼuhiga ke feala ai hotatou haofaki.—3 Soa. 3, 4.
8-11. Kapau ʼe mole tou loto ke puli iā tātou ia te “ ʼofa makehe, te manavaʼofa pea mo te tokalelei mai te ʼAtua ia te Tamai pea mai iā Sesu Kilisito,” pea mo tatatou fakatahitahi mo totatou ʼu tehina mo tuagaʼane, ʼe tonu ke tou “tōkakaga” ki totatou ʼaluʼaga fakalaumālie pea ke mole tou fakatahi mo nātou ʼaē ʼe mole ‘nonofo maʼu ʼi te akonaki ʼa Kilisito.’—2 Soa. 3.
TOU LILIU KO “HE ʼU KAUGĀ GĀUE ʼI TE MOʼONI”
Ko te tolu tohi ʼa Soane neʼe ina fai ki tona kaumeʼa lelei ko Kaiusi. Neʼe ina tohi fēnei: “ ʼE mole au maʼu he fiafia ʼe lahi age ʼi te meʼa ʼaenī: ko taku logo ʼaē ʼe haga haʼele taku ʼu fānau ʼi te moʼoni.”—3 Soa. 4.
Neʼe vikiʼi e Soane ia Kaiusi ki tana “fai he gāue agatonu” ʼi tana tokoni ki te ʼu tehina ʼaē neʼe mole natou feʼiloʼiʼaki. Neʼe ʼui fēnei e te ʼapositolo: “ ʼE maʼua ke tou tali te ʼu taʼi tagata ʼaia ʼaki he tali kāiga, ke tou liliu ai ko he ʼu kaugā gāue ʼi te moʼoni.”—3 Soa. 5-8.
Te ʼu Tali Ki Te ʼu Fehuʼi Fakatohi-tapu:
11—He koʼē ʼe fai e ʼihi ia he aga ʼe kovi? ʼI tanatou mole mālolohi ʼi te faʼahi fakalaumālie, neʼe mole kei sisio ʼihi ki te ʼAtua ʼaki tonatou ʼatamai. ʼUhi ʼaē ʼe mole natou sisio mata ki te ʼAtua, koia ʼe natou fai pē tanatou aga ohagē ʼe mole sio ifo kiā nātou.—Esk. 9:9.
14—Ko ai “te ʼu kaumeʼa”? Ko te kupu “te ʼu kaumeʼa” ʼi henī ʼe mole fakaʼuhiga pē kiā nātou ʼaē ʼe natou felōgoi leleiʼaki. ʼE talanoa ʼi henī ia Soane ʼo ʼuhiga mo te ʼu tehina fuli pē.
Te ʼu Puani ʼe Tou Lava Tāʼofi:
4. Ko nātou ʼaē kua fotufotuʼa ʼi te faʼahi fakalaumālie ʼi te kōkelekāsio, ʼe natou fiafia lahi mokā natou sisio kiā nātou ʼaē ʼe foʼofoʼou mai ʼe natou “haga haʼele . . . ʼi te moʼoni.” Pea ʼi toe fiafia lahi ʼe maʼu e te ʼu mātuʼa, mokā natou lava tokoni ki tanatou fānau ke natou liliu ko he ʼu fānau ʼe natou kaugana kiā Sehova!
5-8. Iā nātou ʼaē ʼe natou gāue kinakina maʼa tonatou ʼu tehina ʼuhi ko tonatou ʼofa ʼaē kiā nātou pea mo Sehova, ʼe kau ai ia te ʼu tehina taupau feʼoloʼaki, ia te kau misionea, nātou ʼaē ʼe gāue ʼi te ʼu Petele peʼe ʼi te ʼu filiale, pea mo nātou ʼaē ʼe pioniē. ʼE tāu mo feʼauga ke tou faʼifaʼitakiʼi ia tanatou tui, pea ʼe tuha ke tou lagolago kiā nātou ʼaki te ʼofa.
9-12. ʼE tonu ke tou faʼifaʼitakiʼi ia te agatonu ʼo Temetelio kae mole ko te faʼa palalau ʼa Tiotefeso, ʼaē neʼe fasituʼu.
“KOTOU NONOFO ʼI TE ʼOFA ʼO TE ʼATUA”
Neʼe ʼui e Suta ʼo ʼuhiga mo nātou ʼaē neʼe hū ki te kōkelekāsio “ ʼe natou muhumuhu, ʼe natou meo ʼo ʼuhiga mo te ʼu meʼa ʼe hoko kiā nātou ʼi te maʼuli, ʼo natou fai ʼo mulimuli pē ki tonatou ʼu holi ʼo nātou.” ʼE natou “lau he ʼu palalau fialahi, pea natou fakamaʼuhigaʼi te hahaʼi” ke natou maʼu mai ai ni ʼu koloa.—Suta 4, 16.
ʼE lava tekeʼi feafeaʼi e te kau Kilisitiano ia te ʼu fakaneke kovi? Neʼe tohi fēnei e Suta: “Kau ʼofaina, kotou manatuʼi te ʼu folafola ʼaē neʼe tala ʼi te temi muʼa e te kau ʼapositolo ʼo totatou ʼAliki ko Sesu Kilisito.” Neʼe ina toe ʼui fēnei: “Kotou nonofo ʼi te ʼofa ʼo te ʼAtua.”—Suta 17-21.
Te ʼu Tali Ki Te ʼu Fehuʼi Fakatohi-tapu:
3, 4—He koʼē neʼe uga e Suta ia te kau Kilisitiano ke natou “tau mālohi ʼo ʼuhiga mo te tui”? Heʼe ko ‘te ʼu tagata neʼe mole pipiki ki te ʼAtua neʼe natou hū ki te kōkelekāsio.’ Ko te ʼu tagata ʼaia neʼe natou ‘fetogi ia te ʼofa makehe ʼo te ʼAtua moʼo takuʼaki ia tanatou ʼu aga heʼeʼaoga.’
20, 21—ʼE lava feafeaʼi hatatou “nonofo ʼi te ʼofa ʼo te ʼAtua”? ʼE tou lava fai ia te faʼahi ʼaia mokā ʼe tou fai ia te ʼu ʼaluʼaga ʼaenī e tolu: (1) tou lagaʼi ia tātou totonu ʼi tatatou “tui māʼoniʼoni ʼaupitō” ʼaki hatatou ako fakalelei ia te Folafola ʼa te ʼAtua pea mo tou faʼafai ʼi te gāue fai fakamafola; (2) tou faikole ‘ ʼaki ia te laumālie māʼoniʼoni,’ peʼe tou fakalogo ki tana takitaki; pea (3) tou tui ki te fakatuʼutuʼu ʼaē ʼe ina fakafealagia ia te maʼuli heʼegata: te sākilifisio faitotogi ʼa Sesu Kilisito.—Soa. 3:16, 36.
Te ʼu Puani ʼe Tou Lava Tāʼofi:
5-7. ʼE feala koa ke hao ia te kau agakovi mai te fakamāu ʼa Sehova? ʼO mulimuli ki te ʼu faʼifaʼitaki e tolu ʼaē ʼe talanoa kiai Suta, ʼe mole feala hanatou hao.
8-10. ʼE tonu ke tou mulimuli ki te faʼifaʼitaki ʼa Mikaele ia te ʼalekaselo pea mo tou fakahā ia te fakaʼapaʼapa ki te pule ʼaē neʼe fakatuʼu e te ʼAtua.
12. Ko te kau ʼapositā ʼaē ʼe hagē ʼe natou ʼofa kiā tātou, kae ʼe natou fakatupu kovi ki tatatou tui ohagē pē ko te fakatupu kovi ʼa he ʼu maka ʼe ū ʼi te lalo tai ki te ʼu vaka peʼe ko te hahaʼi ʼaē ʼe māʼaʼanu ʼi te tai. Ko te kau faiakonaki hala ʼe hagē ʼe natou fia foaki lahi, kae ʼe mole natou maʼu ia he ʼu manatu fakalaumālie ohagē ko he ʼu ʼao ʼe mole honatou vai. Ko nātou ʼaia ʼe mole natou fua ohagē pē ko te ʼu fuʼu ʼakau ʼaē kua mamate ʼi te fakaʼosi ʼo te fasigā taʼu fakatō lau. ʼE fakaʼauha anai nātou, ohagē ko te taʼaki ʼo te ʼu fuʼu ʼakau. ʼE ko he agapoto hatatou fakamamaʼo mai te kau ʼapositā.
22, 23. Ko te kau Kilisitiano moʼoni ʼe natou fehiʼa ki te meʼa ʼaē ʼe kovi. ʼI tanatou faiga ke natou haofaki “nātou ʼaē ʼe lotolotolua” mai te afi ʼo te fakaʼauha heʼegata, ko te hahaʼi fotufotuʼa ʼi te kōkelekāsio, tāfito te kau taupau ʼaē neʼe fakanofo, ʼe natou tokoni kiā nātou ʼi te faʼahi fakalaumālie.
[Paki ʼo te pasina 30]
Ko te vai, te laumālie pea mo te taʼataʼa neʼe natou fakamoʼoni ko “Sesu ʼe ko te ʼAlo ʼo te ʼAtua”