Ko Sesu ʼe Ko Te ʼAtua Māfimāfi Koa?

Te ʼu tali ʼaē ʼe fai māhani:

▪ “ ʼEī, ko Sesu ʼe ko te ʼAtua Māfimāfi.”

▪ “Ko Sesu neʼe ko te ʼAtua ʼi te temi ʼaē neʼe maʼuli kakano ai.” Koteā ʼaē neʼe ʼui e Sesu?

▪ “Kapau neʼe kotou ʼoʼofa kiā te au, kanaʼaua lā ʼe kotou fakafiafia ʼi taku ʼalu ʼaē ki te Tamai, heʼe ko te Tamai ʼe lahi age iā te au.” (Soane 14:28) Neʼe ʼui e Sesu ko ia pea mo tana Tamai ʼe mole nā tatau.

▪ “ ʼE au hake ki taku Tamai pea ko takotou Tamai, pea ki toku ʼAtua pea ko tokotou ʼAtua.” (Soane 20:17) Neʼe mole ʼui e Sesu ko ia ko te ʼAtua kae neʼe ina ʼui ko ia ʼe kehe ia ʼi te ʼAtua.

▪ “Neʼe mole au palalau ʼi toku loto tokotahi, kae ko te Tamai ʼaē neʼe ina fekauʼi mai au, neʼe ina foaki totonu mai kiā te au te fakatotonu ʼo ʼuhiga mo te meʼa ʼaē ʼe tonu ke au ʼui pea mo te meʼa ʼaē ʼe tonu ke au fakahā.” (Soane 12:49) Ko te ʼu akonaki ʼaē neʼe fai e Sesu neʼe mole haʼu ia mai iā te ia; neʼe haʼu ia mai te Tamai.

NEʼE ʼui e Sesu ko ia te ʼAlo ʼo te ʼAtua kae mole ko ia te ʼAtua Māfimāfi. Kanapau lā ko Sesu neʼe ko te ʼAtua, pea ko ai ʼaē neʼe faikole ki ai ʼi te temi ʼaē neʼe maʼuli ai ʼi te kele? (Mateo 14:23; 26:26-29) ʼE mahino ia ʼe ko he manatu fakapotopoto te ʼui ʼaē neʼe palalau ia Sesu ki he tahi kehe!

ʼI te temi ʼaē neʼe kole age e te ʼu tisipulo e toko lua ʼa Sesu ia he tuʼulaga makehe ʼi tona Puleʼaga, neʼe ina tali fēnei: “Ki te heka ʼaē i toku toʼomataʼu pea mo toku toʼohema, ʼe mole ʼaʼaku ia tona foaki, kae ʼe ʼa nātou ia ʼaē neʼe kua teuteuʼi kiai e taku Tamai.” (Mateo 20:23) Neʼe loiʼi koa nāua e Sesu ʼi tana ʼui neʼe mole feala ke ina foaki age te meʼa ʼaē neʼe nā kole age? Kailoa ia! Kae neʼe ina fakamoʼoni ʼaki he agavaivai ʼe gata pē ki te ʼAtua ʼaē ʼe tonu ke ina fai ia te ʼu tonu ʼaia. Neʼe toe fakamahino e Sesu ʼe ʼi ai te ʼu faʼahi neʼe mole ʼiloʼi e ia pea mo te kau ʼāselo, kae ʼe gata pē ki tana Tamai ʼaē ʼe ina ʼiloʼi.—Maleko 13:32.

Neʼe veliveli age koa ia Sesu ʼi te ʼAtua ʼi te temi pē ʼaē neʼe maʼuli ai ʼi te kele ʼi tona ʼuhiga tagata? Kailoa. Māʼiapē lā ʼi te hili ʼo tona mate pea mo tona fakatuʼuake, ʼe ʼui ʼi te Tohi-Tapu ko Sesu ʼe fakalogo aipē ki te ʼAtua. ʼE fakamanatuʼi mai e te ʼapositolo ko Paulo “ko te pule ʼo Kilisito, ko te ʼAtua.” (1 Kolonito 11:3) ʼE ʼui ʼi te Tohi-Tapu, ʼi te temi kā haʼu, “kā fakalogo anai ia meʼa fuli kiā te ia, pea ko te ʼAlo ʼe toe fakalogo anai mo ia kiā Ia ʼaē neʼe ina tuku ia meʼa fuli kiā te ia, ke liliu te ʼAtua ko meʼa fuapē maʼa te hahaʼi fuapē.”—1 Kolonito 15:28.

ʼE hā lelei mai ko Sesu ʼe mole ko te ʼAtua Māfimāfi. Ko tona tupuʼaga lā ʼaia ʼo tana ʼui ʼo ʼuhiga mo tana Tamai ko “toku ʼAtua.”—Fakahā 3:2, 12; 2 Kolonito 1:3, 4.a

[Nota]

[Paki ʼo te pasina 7]

Neʼe ʼui e Sesu ʼe ʼi ai te ʼu faʼahi neʼe mole ʼiloʼi e ia pea mo te kau ʼāselo, kae ʼe gata pē ki tana Tamai ʼaē ʼe ina ʼiloʼi