Ko Te Kau Faitotonu ʼe Natou Fakavikiviki Anai Ki Te ʼAtua ʼo Talu Ai

“ ʼE manatuʼi anai ia te tagata faitotonu. . . . Ko tana faitotonu ʼe tuʼu anai ʼo talu ai.”—PES. 112:6, 9.

1. (a) Koteā te kā haʼu fakafiafia ʼe ʼamanaki kiai ia nātou fuli ʼaē ʼe faitotonu kiā mata ʼo Sehova? (b) Ko te fehuʼi fea ʼaē ʼe lagaʼi?

ʼI KĀ haʼu taulekaleka ʼe ʼamanaki kiai ia te hahaʼi fuli ʼaē ʼe faitotonu kiā mata ʼo te ʼAtua! ʼE natou fiafia anai ʼo talu ai, ʼi tanatou ako ia te tahi age ʼu meʼa ʼo ʼuhiga mo te ʼu kalitātē fakatalakitupua ʼo Sehova. ʼE mahu anai ʼi tonatou loto ia te fia fakavikiviki, ʼi te lahi age ʼo tanatou ako ia te ʼu gāue ʼaē neʼe fai e te ʼAtua. Ko te faʼahi tāfito ʼe tonu ke fai, pea ke feala ai he maʼu ia te kā haʼu fakakolōlia ʼaia, ʼe ko te “faitotonu,” ʼaē ʼe fakamaʼuhigaʼi iā Pesalemo 112. Kae ko te ʼAtua māʼoniʼoni pea mo faitotonu ko Sehova, ʼe lava feafeaʼi hana fakaʼuhiga ia he hahaʼi agahala ko ni hahaʼi faitotonu? Peʼe tou faiga lahi ke tou fai ia te meʼa ʼaē ʼe lelei, kae ʼe tou tōtō pē, pea ʼi ʼihi temi ʼe tou fai ia te ʼu hala mamafa.—Loma 3:23; Sake 3:2.

2. Koteā ia te ʼu milakulo e lua neʼe fai e Sehova ʼi tona ʼofa?

² ʼI tona ʼofa, neʼe fai e Sehova ia te puleʼaki lelei. ʼO feafeaʼi? ʼUluaki, neʼe ina fai ia te milakulo, ʼo ina tuku ifo ia te maʼuli ʼo tona ʼAlo ʼofaina ʼi selō ki te fatu ʼo te taʼahine tāupoʼou, ke feala hana tupu ake ko he tagata haohaoa. (Luka 1:30-35) Pea ʼi te ʼosi matehi ʼo Sesu e tona ʼu fili, neʼe fai e Sehova ia te tahi milakulo fakaofoofo. Neʼe fakatuʼuake e Sehova ia Sesu mai te mate, ko he laumālie fakakolōlia.—1 Pet. 3:18.

3. He koʼē neʼe fiafia ia te ʼAtua ʼi tana fakapale ia tona ʼAlo ʼaki ia te maʼuli ʼi selō?

³ Neʼe fakapale e Sehova ia Sesu ʼaki te meʼa neʼe mole maʼu e tona ʼAlo ʼi tona maʼuli ʼi muʼa ʼo tana hifo mai ki te kele—ia te maʼuli tuputupua ʼi selō. (Hep. 7:15-17, 28) Neʼe fiafia Sehova ʼi tana fai ia te faʼahi ʼaia, he neʼe taupau aipē e Sesu ia tana agatonu logolā ia te ʼu ʼahiʼahi fakamataku. ʼAki te agatonu ʼaia ʼa Sesu, neʼe maʼu ai e Sehova ia te tali ʼe lelei tokotahi pea mo kātoa, ki te loi ʼaē ʼa Satana, ʼi tana ʼui ʼaē ʼe tauhi pē ia te hahaʼi ki te ʼAtua heʼe natou fia maʼu he meʼa kae mole ko tonatou ʼofa lahi ʼaē kiā te ia.—Taag. 27:11.

4. (a) ʼI tana toe liliu ki selō, koteā ʼaē neʼe fai e Sesu maʼa tātou, pea neʼe koteā te tali ʼa Sehova kiai? (b) Koteā takotou manatu ʼo ʼuhiga mo te ʼu meʼa ʼaē neʼe fai e Sehova pea mo Sesu maʼa koutou?

⁴ ʼI selō, neʼe toe fai e Sesu te tahi age meʼa. Neʼe ‘hā iā muʼa ʼo te ʼAtua maʼa tātou’ mo te maʼuhiga ʼaē ʼo “tona taʼataʼa.” Ko totatou Tamai ʼofa ʼaē ʼi selō, neʼe ina tali lelei ia te mōlaga maʼuhiga ʼa Sesu ohagē ko he “sākilifisio fai fakalelei ʼo ʼuhiga mo ʼatatou agahala.” Koia, ʼaki ‘he ʼu leʼo ʼo loto ʼe maʼa’ ʼe feala ai hatatou foaki ia he “tauhi taputapu ki te ʼAtua maʼuli.” ʼE ko he tupuʼaga ʼaia ʼo hatatou kau mo tātou, ki te tala ʼo te ʼu ʼuluaki palalau ʼaē iā Pesalemo 112: “Kotou fakavikiviki kiā Sah”!—Hep. 9:12-14, 24; 1 Soa. 2:2.

5. (a) Koteā ʼaē ʼe tonu ke tou fai ke tou taupau totatou ʼuhiga faitotonu iā muʼa ʼo te ʼAtua? (b) Neʼe feafeaʼi ia te tohi ʼo te Pesalemo 111 pea mo te Pesalemo 112?

⁵ Ke tou taupau totatou ʼuhiga faitotonu iā muʼa ʼo te ʼAtua, ʼe tonu ke tou haga tui ki te taʼataʼa ʼaē neʼe liligi e Sesu. ʼE mole tonu ke fakalaka he ʼaho kae neʼe mole tou fakamālo kiā Sehova ʼo ʼuhiga mo tona toe ʼofa lahi ʼaia kiā tātou. (Soa. 3:16) ʼE toe ʼaoga foki ke tou haga ako ia te Folafola ʼa te ʼAtua pea mo tou faiga lahi ke tou maʼuliʼi ia te logo ʼaē ʼe tuʼu ai. ʼE maʼu ʼi te Pesalemo 112 ia te tokoni lelei maʼa nātou fuli ʼaē ʼe natou fia taupau ia he leʼo ʼo loto ʼe maʼa iā muʼa ʼo te ʼAtua. ʼE fakakātoa e te pesalemo ʼaia ia te Pesalemo 111. ʼE nā kamata toko lua ʼaki ia te ʼu palalau ʼaenī: “Kotou fakavikiviki kiā Sah!” peʼe “ ʼAleluia!” pea hoa kiai ia laini e 22, ʼe tahi kamata ʼaki ia te ʼu mataʼi tohi takitahi e 22 ʼo te alphabet Fakahepeleo.a

Ko He Fakatafito ʼo Te Fiafia

6. ʼE tapuakinaʼi feafeaʼi ia “te tagata” ʼaē ʼe manavasiʼi ki te ʼAtua, ʼaē ʼe talanoa ki ai iā Pesalemo 112?

⁶ “Fiafia te tagata ʼaē ʼe manavasiʼi kiā Sehova, ʼaē ʼe fiafia lahi ʼi tana ʼu fakatotonu. ʼE liliu anai tona hōloga ʼi te kele, ʼo mālohi. Ki te taʼiake ʼo te ʼu hahaʼi agatonu, ʼe tapuakina anai.” (Pes. 112:1, 2) Kotou tokagaʼi ʼe ʼuluaki talanoa muʼa ia te tagata fai pesalemo ki “te tagata” pea fetogi leva ʼo talanoa ki “te ʼu hahaʼi agatonu” ʼi te koga fakaʼosi ʼo te vaega 2. ʼE hā mai ai, ko te Pesalemo 112 ʼe feala ke fakaʼuhiga ki he kūtuga, ʼe faʼufaʼu e ni hahaʼi tokolahi. ʼO mulimuli pē ki te manatu ʼaia, ko te ʼapositolo ko Paulo, ʼaki ia te takitaki ʼa te laumālie, neʼe ina fakaʼuhiga ia te Pesalemo 112:9 ki te kau Kilisitiano ʼo te ʼuluaki sēkulō. (Lau ia 2 Kolonito 9:8, 9.) ʼE fakamatala lelei e te pesalemo ʼaia peʼe feafeaʼi he lava fakafiafia ʼa te ʼu tisipulo ʼa Kilisito ʼi te kele iā ʼaho nei!

7. He koʼē ʼe tonu ke manavasiʼi ia te ʼu kaugana ʼa te ʼAtua kiā te ia, pea ʼe tonu ke feafeaʼi takotou manatu ʼo ʼuhiga mo te ʼu fakatotonu ʼa te ʼAtua?

⁷ Ohagē ko tona fakahā ʼi te Pesalemo 112:1, ko te kau Kilisitiano moʼoni ʼaia, ʼe natou fiafia lahi ʼi tanatou haʼele ʼi te “manavasiʼi kiā Sehova.” Ko tanatou manavasiʼi ʼaia naʼa natou fakalotomamahiʼi ia te ʼAtua, ʼe tokoni kiā nātou ke natou tauʼi ia te laumālie ʼo te mālama ʼa Satana. ʼE ‘natou fiafia lahi’ ʼi tanatou ako ia te Folafola ʼa te ʼAtua pea mo mulimuli ki tana ʼu fakatotonu. ʼE kau kiai ia te fakatotonu ʼaē ke fakamafola ia te logo lelei ʼo te Puleʼaga ʼi te kele kātoa. ʼE natou faiga ke natou fai ni ʼu tisipulo ʼi te hahaʼi ʼo te ʼu puleʼaga fuli pē, pea mo natou fakatokaga ki te hahaʼi agakovi ia te hoko mai ʼo te ʼaho fakamāu ʼa te ʼAtua.—Esk. 3:17, 18; Mat. 28:19, 20.

8. (a) Neʼe fakapale feafeaʼi ia te hahaʼi ʼaē ʼe natou faʼafai ʼi tanatou tauhi ki te ʼAtua iā ʼaho nei? (b) Ko te ʼu tapuakina fea ʼi te kā haʼu ʼaē ʼe fakatalitali kiai ia nātou ʼaē ʼe ʼamanaki maʼuli ʼi te kele?

⁸ ʼUhi ko tanatou fakalogo ki te ʼu fakatotonu ʼaia, ko te ʼu kaugana ʼa te ʼAtua ʼi te kele iā ʼaho nei kua natou toko fitu miliona tupu. Ko ai ʼaē ʼe feala ke ina fakafisi ki te liliu ʼa te hahaʼi ʼa te ʼAtua ʼo ‘mālolohi ʼi te kele’? (Soa. 10:16; Fakh. 7:9, 14) Pea ʼe toe “tapuakina” lahi anai nātou mokā fakahoko e te ʼAtua ia tana fakatuʼutuʼu! ʼI tonatou ʼuhiga kūtuga, ko nātou ʼaē ʼe ʼamanaki maʼuli ʼi te kele, ʼe puipui anai nātou ʼi te “mamahi lahi” ʼaē kā hoko mai, pea ʼe natou faʼufaʼu anai ia “te kele foʼou” ʼaē kā “nofo ai [anai ia] te faitotonu.” ʼAki te temi, ko nātou ʼaē kā hao ʼi Halamaketone, ʼe “tapuakina anai” nātou ʼo lahi age. ʼE natou teuteu anai ke natou tali ia te ʼu toko lauʼi miliona hahaʼi ʼaē kā fakatuʼuake. ʼI ʼamanaki fakafiafia leva! Ki muli age, ko nātou ʼaē ‘ ʼe natou fiafia lahi’ ʼi te ʼu fakatotonu ʼa te ʼAtua, ʼe natou kaku anai ki te ʼuhiga haohaoa pea mo natou maʼu anai ʼo talu ai, ia “te ʼāteaina fakakolōlia ʼa te fānau ʼa te ʼAtua.”—2 Pet. 3:13; Loma 8:21.

Tou Fakaʼaogaʼi Fakapotopoto Ia Te ʼu Koloa

9, 10. Neʼe fakaʼaogaʼi feafeaʼi e te kau Kilisitiano moʼoni ia tonatou ʼu koloa fakalaumālie, pea ʼe feafeaʼi anai ia te tuʼu ʼo talu ai ia tanatou faitotonu?

⁹ “ ʼI tona ʼapi ʼe maʼu ai ia te ʼu meʼa maʼuhiga pea mo te ʼu koloa; pea ko tana faitotonu ʼe tuʼu anai ia ʼo talu ai. Neʼe hā ia ʼi te ʼu fakapōʼuli ohagē ko he mālama maʼa te hahaʼi agatonu. ʼE agaʼofa, pea mo manavaʼofa, pea mo faitotonu.” (Pes. 112:3, 4) ʼI te temi muʼa, ko ʼihi ʼi te ʼu kaugana ʼa te ʼAtua neʼe ʼiloa he neʼe natou maʼu koloa. Pea ʼi te tahi age ʼaluʼaga, ko nātou ʼaē ʼe leleiʼia e te ʼAtua ʼe natou liliu moʼoni ʼo maʼu koloa, logolā ʼe mole ko he ʼu koloa fakasino. Ko te meʼa ʼaē ʼe hoko, ko nātou ʼaē ʼe natou fakamālalo ifo nātou iā muʼa ʼo te ʼAtua, ʼe lagi natou māsisiva pea mo fehiʼaʼinaʼi, ohagē pē ko nātou ʼaē ʼi te temi ʼo Sesu. (Luka 4:18; 7:22; Soa. 7:49) Kae tatau aipē peʼe lahi peʼe veliveli te ʼu koloa ʼa he tahi, kae ʼe feala ke maʼu koloa ʼi te faʼahi fakalaumālie.—Mat. 6:20; 1 Tim. 6:18, 19; lau ia Sake 2:5.

¹⁰ Ko te kau Kilisitiano fakanofo, pea mo tonatou ʼu kaumeʼa, ʼe mole natou taupau pē maʼa nātou ia tonatou ʼu koloa fakalaumālie. Kae ʼe natou “hā” ʼi te mālama fakapōʼuli ʼa Satana “ohagē ko he mālama maʼa te hahaʼi agatonu.” ʼE natou fai ia te faʼahi ʼaia, ʼaki tanatou tokoni ʼaē ki te hahaʼi ke natou maʼu ia te ʼu fua lelei mai te ʼu koloa fakalaumālie ʼo te poto pea mo te ʼatamai mālama ʼo ʼAtua. Neʼe faiga ia te kau fakafeagai, ke natou fakagata ia te gāue fai fakamafola ʼo te Puleʼaga kae neʼe mole hona fua. Kae ko te ʼu fua ʼo te ʼu gāue faitotonu ʼaia ʼe ‘tuʼu anai ʼo talu ai.’ ʼI tanatou faʼa kātaki ʼo taupau ia tanatou faitotonu, ʼe maʼu e te ʼu kaugana ʼa te ʼAtua ia te fakapapau ʼaē ke natou māʼuʼuli ʼo heʼegata, ke natou ‘tutuʼu ʼo talu ai.’

11, 12. Ko te ʼu faʼahi fea ʼaē ʼe fakaʼaogaʼi ai e te hahaʼi ʼa te ʼAtua ia tonatou ʼu koloa?

¹¹ Ko te hahaʼi ʼa te ʼAtua, ia te kalasi ʼo te tagata kaugana fakanofo pea mo nātou ʼaē ʼe natou faʼufaʼu ia te “hahaʼi tokolahi,” neʼe natou fakahā ia tanatou loto fia foaki ʼo te ʼu koloa fakamālama. ʼE ʼui fēnei iā Pes. 112:9: “Neʼe mole lauʼia ia te ʼu meʼa ʼaē neʼe ina tufa; neʼe ina foaki ki te kau māsisiva.” ʼI te agamāhani, ko te kau Kilisitiano moʼoni iā ʼaho nei ʼe natou foaki meʼa ʼofa ki tonatou ʼu tehina Kilisitiano pea mo te hahaʼi ʼo te ʼu vāhaʼa fale ʼaē ʼi te faigataʼaʼia. ʼE natou toe fakaʼaogaʼi mo te falā moʼo lagolago ki te ʼu gāue ʼaē ʼe fai mokā hoko he ʼu tuʼutāmaki. ʼE toe maʼu mai ai ia te fiafia, ohagē pē ko tona ʼui e Sesu.—Lau ia Gāue 20:35; 2 Kolonito 9:7.

¹² ʼO mole gata ai pē, kotou toe fakakaukauʼi age muʼa ki te falā ʼaē neʼe fakaʼaogaʼi moʼo tā ia te nusipepa ʼaenī iā lea e 172, pea ʼe lahi ia te ʼu lea ʼe palalau kiai ia te hahaʼi ʼe māsisiva. Pea ki te nusipepa ʼaenī, kua toe feala pē foki ke maʼu ʼi te lea ʼa te kau tuli pea mo te kau kivi.

Tou Agaʼofa Pea Mo Faitotonu

13. Ko ai ia te ʼu faʼifaʼitaki lelei ʼo ʼuhiga mo te foaki ʼaki te agaʼofa, pea ʼe tou lava faʼifaʼitakiʼi feafeaʼi ia nāua ʼaia?

¹³ “ ʼE agalelei ia te tagata ʼaē ʼe agaʼofa pea mo foaki.” (Pes. 112:5) Neʼe lagi kua kotou tokagaʼi, ko te hahaʼi ʼaē ʼe natou tokoni ki te tahi ʼu hahaʼi ʼe mole natou agaʼofa tuʼumaʼu. Ko ʼihi ʼe natou foaki meʼa ʼofa moʼo fakahā ʼe natou maʼu meʼa peʼe ko ʼihi ʼe natou foaki fakakinau. ʼE mole ko he meʼa fakafiafia mokā tokoni atu ia he tahi kae ʼe kita logoʼi ʼi tana aga ʼe kita mālalo age iā ia, peʼe kua kita liliu ko he kavega. Kae ʼe kita fiafia mokā tokoni mai he tahi ʼe agaʼofa. Ko Sehova ʼe ko te faʼifaʼitaki lahi tokotahi ʼo te agaʼofa, ia Ia ʼAē ʼe Ina Foaki fakafiafia. (1 Tim. 1:11; Sake 1:5, 17) Neʼe faʼifaʼitakiʼi lelei e Sesu Kilisito ia te agaʼofa ʼo tana Tamai. (Mko. 1:40-42) Koia, ke fakaʼuhiga e te ʼAtua ʼe tou faitotonu, ʼe tonu mokā tou tokoni ki totatou tatau ʼi te faʼahi fakalaumālie pea tāfito ʼi tatatou minisitelio, ke tou foaki ia te tokoni ʼaia ʼaki he loto fiafia pea ʼaki he agaʼofa.

14. Ko te ʼu faʼahi fea ʼaē ʼe feala ai ke tou ‘tōkakaga ki tatatou ʼu gāue ʼaki te faitotonu’?

¹⁴ “ ʼE tokaga ki tana ʼu gāue ʼaki te faitotonu.” (Pes. 112:5) Ohagē ko tona fakakikite, ko te kalasi ʼo te tagata tauhi ʼapi agatonu ʼe tokaga ki te ʼu lelei ʼo te Pule, ʼo mulimuli ki te faitotonu ʼa Sehova. (Lau ia Luka 12:42-44.) ʼE hā ia te faʼahi ʼaia ʼi te takitaki ʼaē ʼe foaki e te kau tagata ʼāfea ʼaki ia te Tohi-Tapu, ʼaē ʼe natou vakaʼi ʼi ʼihi temi ia te ʼu agahala mamafa neʼe hoko ʼi te kōkelekāsio. Ko te fai ʼo te ʼu meʼa ʼaki ia te faitotonu, ʼe toe hā ʼi te takitaki ʼa te kalasi ʼo te kaugana ʼaē ʼe fakatafito ki te Tohi-Tapu, ʼo ʼuhiga mo te gāue ʼaē ʼe tonu ke fai ʼi te ʼu kōkelekāsio, mo te ʼu fale misionea, pea mo te ʼu Petele. ʼE mole gata pē ki te kau tagata ʼāfea ʼaē ʼe fakamaʼua ke natou faitotonu, ʼe toe fakamaʼua foki ia te kalitātē ʼaia ki te tahi ʼu Kilisitiano mokā natou felōgoi iā nātou, ʼo fēia mokā natou felōgoi mo te hahaʼi ʼaē ʼe mole Kilisitiano, ʼo kau kiai ia te faʼahi ʼo te gāue.—Lau ia Mikea 6:8, 11.

Te ʼu Tapuakina Maʼa Te Kau Faitotonu

15, 16. (a) ʼE malave feafeaʼi ki te hahaʼi faitotonu ia te ʼu logo kovi ʼo te mālamanei? (b) Koteā ʼaē kua fakatotonu kiai ia te ʼu kaugana ʼa te ʼAtua ke natou haga fai?

¹⁵ “Heʼe mole lūmāʼea anai ʼi he temi. ʼE manatuʼi anai ia te tagata faitotonu ki he ʼu temi ʼe mole ʼiloʼi hona gataʼaga. ʼE mole mataku anai ia ʼi he ʼu logo ʼe kovi. ʼE mālohi ia tona loto, ʼo falala kiā Sehova. ʼE tui papau ia tona loto; ʼe mole mataku anai ia, ʼo aʼu ki tana mamata ki tona ʼu fili.” (Pes. 112:6-8) Neʼe mole heʼeki tou logo ki he ʼu logo fēia ʼe kovi ʼaupitō, ohagē lā ko te ʼu tau, te ʼu fai fakapō, te ʼu mahaki foʼou pea mo te ʼu mahaki ʼāfea kua toe ʼasi, te agamālohi, te masiva pea mo te maumauʼi ʼo totatou kele ʼuhi ko tona ʼulihi e te tagata. Ko nātou ʼaē ʼe faitotonu kiā mata ʼo te ʼAtua, māʼiapē lā mo nātou ʼe mole natou hao mai te ʼu fua kovi ʼo te ʼu logo ʼaia, kae ʼe mole nātou mātataku ki te kā haʼu. Ko tonatou loto ʼe “mālohi” pea mo “tui papau” ʼi tanatou mamata ki te kā haʼu ʼaki he loto falala, heʼe natou ʼiloʼi kua ovi mai ia te mālama foʼou faitotonu ʼa te ʼAtua. Kapau ʼe hoko mai he tuʼutāmaki, pea kua natou popoto ʼi tona tauʼi heʼe natou falala ʼe tokoni mai Sehova kiā nātou. ʼE mole heʼeki ina tuku tana hahaʼi faitotonu ke natou “lūmāʼea”—ʼe ina foaki tana tokoni pea mo tona mālohi ke natou kātakiʼi ia te ʼu ʼaluʼaga ʼaia.—Filp. 4:13.

¹⁶ Ko te hahaʼi faitotonu ʼa te ʼAtua, ʼe natou toe kātakiʼi tonatou fehiʼaʼinaʼi pea mo te ʼu loi ʼaē ʼe fakamafola e tonatou ʼu fili, kae neʼe mole feala ki te ʼu faʼahi ʼaia ke natou tāʼofi ia te kau Kilisitiano moʼoni pea ʼe mole natou lavaʼi anai ʼi he temi. Ko te ʼu kaugana ʼa te ʼAtua ʼe natou mālolohi aipē pea mo tui papau ki te gāue ʼaē neʼe foaki age e Sehova kiā nātou, ke natou fakamafola ia te logo lelei ʼo te Puleʼaga pea mo fai ni ʼu tisipulo ki te hahaʼi fuli ʼaē ʼe natou fia logo kiai. ʼE mahino ia, ʼe ʼāʼāsili age anai ia te fakafeagai ʼaē ʼe fai ki te hahaʼi faitotonu ʼi te ovi mai ʼo te fakaʼosi. ʼE iku anai ia te taʼi fehiʼa ʼaia ki te ʼohofi fakamālamanei ʼa Satana te Tēvolo, ʼi tona ʼuhiga Koke ʼo Makoke. Koia, ʼe tou ‘mamata leva anai ki totatou ʼu fili’ mokā fakaʼauha kātoa anai nātou. ʼE ko he meʼa lelei anai hatatou sisio ki te fakatapuhā kātoa ʼo te huafa ʼo Sehova!—Esk. 38:18, 22, 23.

‘ ʼE Malaga Ake ʼi Te Kolōlia’

17. ʼE feafeaʼi ki te tagata faitotonu hana “malaga ake anai ʼi te kolōlia”?

¹⁷ ʼE ko he meʼa fakafiafia anai ia he fakavikiviki kiā Sehova ʼi te logotahi, ʼe mole kei ʼi ai leva he fakafeagai mai te Tēvolo pea mo tona mālama! Ko te fiafia ʼaia ʼe maʼu anai ʼo talu ai ʼe nātou fuli ʼaē ʼe natou taupau ia tonatou ʼuhiga faitotonu iā muʼa ʼo te ʼAtua. ʼE mole natou tō fakaufiufi anai, koteʼuhi ʼe toe fakapapau e Sehova, ko te “tala” ʼo tana hahaʼi faitotonu “ ʼe malaga ake anai ʼi te kolōlia.” (Pes. 112:9) Ko te tagata faitotonu ʼa Sehova ʼe fakafiafia anai ʼi te mālo, ʼi tana sio ki te fakaʼauha ʼo te ʼu fili fuli ʼo te pule faʼitaliha ʼa Sehova.

18. ʼE fakahoko feafeaʼi anai ia te ʼu palalau fakaʼosi ʼo te Pesalemo 112?

¹⁸ “ ʼE sio anai ia te tagata agakovi pea ʼe mahino ia ʼe ina logoʼi anai he ʼita. ʼE makiki anai tona ʼu nifo pea mo malu ifo moʼoni anai. Ko te holi ʼo te kau agakovi ʼe puli anai ia.” (Pes. 112:10) Ko nātou fuli ʼaē ʼe natou haga fakafeagai ki te hahaʼi ʼa te ʼAtua kua ovi mai pē ia te temi ʼaē kā natou “malu ifo” anai ʼo ʼuhiga mo tonatou ʼu holi pea mo tanatou fehiʼa. Ko tonatou holi ʼaē ke natou sisio ki te fakagata ʼo tatatou gāue ʼe puli anai mo nātou ʼi te “mamahi lahi” ʼaē kā hoko mai.—Mat. 24:21.

19. Koteā ʼaē ʼe feala ke tou tui papau kiai?

¹⁹ ʼE kotou kau anai koa ʼi te hahaʼi fiafia ʼaē kā hao anai ʼi te mālo lahi ʼaia? Peʼe kapau lā ʼe kotou mamate ʼuhi ko te mahaki peʼe ko te ʼu vaivaiʼia matuʼa ʼi muʼa ʼo te fakaʼosi ʼo te mālama ʼa Satana, ʼe kotou kau anai koa ʼi “te kau faitotonu” ʼaē kā fakatuʼuake? (Gāue 24:15) ʼE feala hakotou ʼio kiai, mo kapau ʼe kotou haga tui ki te sākilifisio faitotogi ʼa Sesu pea mo faʼifaʼitakiʼi ia Sehova, ohagē ko nātou ʼaē neʼe fakatā e “te tagata” faitotonu iā Pesalemo 112. (Lau ia Efesi 5:1, 2.) ʼE sio anai Sehova ki te faʼahi ʼaia, ko te “manatuʼi” ʼo te ʼu hahaʼi ʼaia pea mo tanatou ʼu gāue faitotonu ʼe mole galoʼi anai ʼi he temi. ʼE fakamanatuʼi anai nātou pea mo ʼofainaʼi nātou e Sehova ʼo talu ai.—Pes. 112:3, 6, 9.

[Nota]

Te ʼu Fehuʼi Ke Tou Metitāsioʼi

• Koteā ni ʼu tupuʼaga ke tou kalaga ai “ ʼAleluia”?

• Koteā ia te ʼu fetogi ʼe hoko nei ʼe fiafia ʼaupitō ai ia te kau Kilisitiano moʼoni?

• Ko te hahaʼi loto fia foaki feafeaʼi ʼaē ʼe ʼofa ki ai Sehova?

[Paki ʼo te pasina 25]

Ke tou taupau totatou ʼuhiga faitotonu iā muʼa ʼo te ʼAtua, ʼe tonu ke tou fakahā ia tatatou tui ki te taʼataʼa ʼaē neʼe liligi e Sesu

[Paki ʼo te pasina 26]

Ko te ʼu meʼa ʼofa ʼe foaki ʼaki he lotolelei ʼe feala ke tokoni ki te ʼu tehina ʼaē neʼe hoko kiā nātou he tuʼutāmaki pea mo tufa te ʼu tohi Fakatohi-tapu