Kotou Faʼafai Ki Te Fai ʼo Te ʼu Gāue Lelei!

“[Ko Sesu] neʼe ina foaki ia ia totonu maʼa tātou ke haofaki ai tātou mai te ʼu faʼahiga agaaga kehekehe fuli ʼo ʼuhiga mo te meʼa noaʼi ʼo te lao pea mo fakamaʼa māʼana totonu ia he hahaʼi ʼe natou faʼafai ki te fai ʼo he ʼu gāue lelei.”—TITO 2:14.

1. Koteā ʼaē neʼe hoko ʼi te fale lotu ʼi te tau mai ʼaē ʼa Sesu ʼi te ʼaho 10 ʼo Nisani 33 ʼo totatou temi?

KO TE ʼaho 10 ʼo Nisani ʼo te taʼu 33 ʼo totatou temi, ʼi muʼa pē ʼo te Pāsikate. Ko te kau ʼatolasio e tokolahi ʼe natou fakatalitali fakafiafia ʼi te fale lotu ʼi Selusalemi ki te toʼotoʼoga ʼaia. Koteā ʼaē kā hoko mokā tau mai anai Sesu kiai? Ko te ʼu tagata faitohi e toko tolu ʼo te ʼu Evaselio ko Mateo, mo Maleko pea mo Luka, ʼe natou fakamoʼoni fuli ki te kapu tuʼa lua ʼaē e Sesu ʼi te fale lotu ia te hahaʼi faifakatau pea mo totogi koloa. Neʼe ina tokatokahi te ʼu laupapa ʼa te hahaʼi fetogi paʼaga pea mo te ʼu hekaʼaga ʼa te hahaʼi fakatau lupe. (Mat. 21:12; Mko. 11:15; Luka 19:45) Neʼe mole fakasiʼisiʼi ifo te faʼafai ʼaē ʼa Sesu talu mai te ʼu taʼu e tolu ʼaē neʼe ina kamata fai ai te faʼahi ʼaia.—Soa. 2:13-17.

2, 3. ʼE tou ʼiloʼi feafeaʼi ko te faʼafai ʼa Sesu neʼe mole gata pē ʼi tana fakamaʼa ia te fale lotu?

² ʼE fakahā ʼi te fakamatala ʼa Mateo, ko te faʼafai ʼa Sesu ʼi te ʼaluʼaga ʼaia neʼe mole gata pē ʼi tana fakamaʼa ia te fale lotu. Neʼe ina toe fakamālōlō te kivi pea mo te ketu ʼaē neʼe fakaovi age kiā te ia. (Mat. 21:14) ʼE toe talanoa ʼi te fakamatala ʼa Luka ki te tahi ʼu gāue neʼe fai e Sesu. “[Ko Sesu] neʼe faiakonaki ʼi te ʼaho fuli pē ʼi te fale lotu.” (Luka 19:47; 20:1) Neʼe toe hā tāfito ia te faʼafai ʼa Sesu ʼi tana minisitelio.

³ Ki muli age, ko te ʼapositolo ko Paulo neʼe faitohi kiā Tito pea neʼe ina fakamahino ki ai, ko Sesu “neʼe ina foaki ia ia totonu maʼa tātou ke haofaki ai tātou mai te ʼu faʼahiga agaaga kehekehe fuli ʼo ʼuhiga mo te meʼa noaʼi ʼo te lao pea mo fakamaʼa māʼana totonu ia he hahaʼi ʼe natou faʼafai ki te fai ʼo he ʼu gāue lelei.” (Tito 2:14) Ko te ʼu faʼahi fea iā ʼaho nei, ʼe feala ai ke tou “faʼafai ki te fai ʼo he ʼu gāue lelei”? Pea ʼe lava fakalotomālohiʼi feafeaʼi tātou e te ʼu faʼifaʼitaki ʼa te ʼu hau agatonu ʼo Suta?

Ko Te Faʼafai Ki Te Fai Fakamafola Pea Mo Te Faiako

4, 5. Neʼe fakamoʼoni feafeaʼi e te ʼu hau e toko fā ʼo Suta ia tanatou faʼafai ʼo ʼuhiga mo te fai ʼo te ʼu gāue lelei?

⁴ Ko Asa, mo Sosafate, mo Esekiasi, pea mo Sosiasi, ko nātou fuli ʼaia neʼe natou fai te ʼu gāue moʼo molehi kātoa ʼi Suta ia te tauhi taulāʼatua. Ko Asa “neʼe ina toʼo te ʼu ʼaletale matāpule pea mo te ʼu koga meʼa māʼoluga pea mo ina maumauʼi te ʼu pou taputapu pea mo maumauʼi te ʼu ʼakau taputapu.” (2 Fkma. 14:3) Ko Sosafate, ʼi tana faʼafai maʼa te tauhi kiā Sehova, “neʼe ina toʼo ʼi Suta ia te ʼu koga meʼa māʼoluga pea mo te ʼu pou taputapu.”—2 Fkma. 17:6; 19:3.a

⁵ ʼI te ʼosi ʼo te ʼu ʼaho e fitu ʼo te Pāsikate ʼaē neʼe fakatuʼutuʼu e Esekiasi ʼi Selusalemi, “ko te kau Iselaele fuli ʼaē neʼe kau kiai neʼe natou ʼolo ki te ʼu kolo ʼo Suta, pea neʼe natou maumauʼi ia te ʼu pou taputapu, mo taʼaga te ʼu ʼakau taputapu, mo maumauʼi ia te ʼu koga meʼa māʼoluga pea mo te ʼu ʼaletale ʼi Suta kātoa pea mo Pesamino, ʼi Efalaime pea mo Manase, ʼo aʼu ki tona fakaʼosi.” (2 Fkma. 31:1) Ko te tūpulaga ko Sosiasi neʼe fakanofo ke hau ʼi tona taʼu valu pē. ʼE ʼui fēnei ʼi te Tohi-Tapu: “ ʼI te valu taʼu ʼo tana pule, ʼi tana kei tamasiʼi, neʼe ina kamata kumi te ʼAtua ʼo Tavite tana kui; pea ʼi te hogofulu-mā-lua taʼu ʼo tana pule, neʼe ina kamata fakamaʼa ʼi Suta pea mo Selusalemi te ʼu koga meʼa māʼoluga, mo te ʼu pou taputapu, mo te ʼu pāki ʼaē neʼe togi pea mo te ʼu fakatātā ukamea.” (2 Fkma. 34:3) Koia, ko te ʼu hau ʼaia e toko fā, neʼe natou faʼafai ʼo ʼuhiga mo te fai ʼo te ʼu gāue lelei.

6. He koʼē ʼe feala ke fakatatau tatatou fai fakamafola ki te gāue ʼaē neʼe fai e te ʼu hau agatonu ʼo Suta?

⁶ Iā ʼaho nei, ʼe tou toe fai mo tātou ia te gāue fēia moʼo tokoni ki te hahaʼi ke natou ʼāteaina mai te ʼu akonaki fakalotu hala, ʼaē ʼe kau kiai te tauhi taulāʼatua. Ko tatatou fai fakamafola ʼi te ʼu ʼapi, ʼe ko he fealagia ʼaia ke tou felāveʼi ai mo te ʼu faʼahiga hahaʼi kehekehe. (1 Tim. 2:4) ʼE manatuʼi e te taʼahine ʼo te fenua ʼo Asia ia te fai e tana faʼē ʼi tonatou ʼapi, ia te ʼu toʼotoʼoga iā muʼa ʼo te ʼu tuʼuga pāki. Neʼe fakakaukauʼi e te taʼahine ʼe mole feala ki te ʼu pāki fuli ʼaia ke natou fakafofoga ia te ʼAtua moʼoni, koia neʼe faikole tuʼumaʼu ai ke ina ʼiloʼi pe ko ai te ʼAtua moʼoni. Neʼe ina tali te fai fakamafola ʼa te ʼu Fakamoʼoni e lua, ʼaē neʼe nā lotolelei ke nā tokoni kiā ia ke ina ʼiloʼi ia te huafa lahi ʼo te ʼAtua moʼoni ko Sehova. Pea neʼe loto fakafetaʼi lahi ʼi tana ʼiloʼi ʼaē ia te hala ʼo te tauhi ki te ʼu taulāʼatua! ʼI te temi nei, ʼe ina fakahā ia he faʼafai ʼe lelei ʼaki tana kau tuʼumaʼu ʼaē ki te gāue fai fakamafola, ʼo tokoni ki te hahaʼi ʼi te faʼahi fakalaumālie.—Pes. 83:18; 115:4-8; 1 Soa. 5:21.

7. Koteā ʼaē ʼe feala ke tou fai moʼo faʼifaʼitakiʼi te kau faiako ʼo te temi hau ʼo Sosafate ʼaē neʼe fakalaka ʼi te fenua?

⁷ ʼI tatatou fai fakamafola ʼi te ʼu ʼapi, ʼe feafeaʼi tatatou fai ia te telituale ʼaē neʼe hinoʼi mai ke tou fai? ʼE lelei ke tou tokagaʼi, ʼi te tolu taʼu ʼo tona temi hau, neʼe fekauʼi e Sosafate te ʼu tama ʼaliki e toko nima, mo te ʼu Levite e toko hiva pea mo te ʼu pelepitelō e toko lua. Neʼe ina fakatotonu kiā nātou ʼaia ke natou fakalaka ʼi te ʼu kolo fuli ʼo akoʼi ki te hahaʼi te ʼu lao ʼa Sehova. Neʼe fua lelei tanatou gāue ʼaia, he neʼe liliu te ʼu puleʼaga ʼaē ʼi ʼonatou tafaʼaki ʼo manavasiʼi kiā Sehova. (Lau ia 2 Fakamatala 17:9, 10.) ʼE feala ke tou palalau mo ni hahaʼi kehekehe ʼo he loto fale mo kapau ʼe tou fetofetogi te ʼu hola pea mo te ʼu ʼaho ʼaē ʼe tou ʼolo kiō nātou.

8. ʼE lava feafeaʼi hatatou fakalahi age tatatou fai fakamafola?

⁸ Tokolahi ʼi te ʼu kaugana ʼa te ʼAtua ʼo totatou temi, neʼe natou lotolelei ke natou mavae ʼi ʼonatou ʼapi, ʼo ʼolo ʼo gāue ʼi te ʼu potu ʼaē ʼe ʼaoga tāfito kiai he kau Fakamoʼoni faʼafai. ʼE feala koa ke kotou fai ia te faʼahi ʼaia? Ko ʼihi iā tātou ʼaē ʼe mole lava ʼolo ki he tahi ʼu koga meʼa, ʼe lagi tou faiga anai ke tou fakamafola ki te hahaʼi ʼo totatou telituale ʼaē ʼe mole lea tahi mo tātou. Ko Ron ʼi tona taʼu 81 neʼe ina akoako te ʼu fai fakamālo iā lea e 32, ʼuhi ʼaē ko tana felāveʼi ʼi tana telituale mo te ʼu hahaʼi mai te ʼu fenua kehekehe! Mole heʼeki faʼa fualoa, neʼe felāveʼi mo te taumātuʼa Afelika ʼi te ala pea neʼe fakamālo kiā nāua ʼaki tanā lea, te Yoruba. Neʼe nā fehuʼi age kiā Ron, pe neʼe kua ʼalu ki Afelika. ʼI tana tali age kailoa, neʼe nā fehuʼi age pe koʼē ʼe ina ʼiloʼi tanā lea. Neʼe maʼu ai e Ron ia te faigamālie ke fai fakamafola kiā nāua. Neʼe nā toʼo ai te ʼu nusipepa pea mo nā ʼavage tonā tuʼasila, ʼo foaki ai e Ron ki te kōkelekāsio ʼaē ʼe ina gāueʼi te telituale ʼe nofo ai te taumātuʼa, ke feala he fai ʼo hanā ako Tohi-Tapu.

9. ʼI tatatou minisitelio, he koʼē ʼe maʼuhiga ke tou lau te ʼu vaega ʼi te Tohi-Tapu? Kotou tuku mai he faʼifaʼitaki.

⁹ Ko te kau faiako ʼaē neʼe tonu ke fakalaka ʼi te fenua ʼo mulimuli ki te fakatotonu ʼa Sosafate, neʼe natou ʼave mo “te tohi ʼo te lao ʼa Sehova.” ʼI te mālamanei kātoa, ʼe tou faiga ke tou akoʼi te hahaʼi ʼaki te Tohi-Tapu, heʼe ko te Folafola ʼa te ʼAtua. ʼE tou fakahā ʼi tatatou minisitelio ia te maʼuhiga ʼo te Tohi-Tapu, ʼaki tatatou faiga tāfito ke tou lau age te ʼu manatu ʼaē ʼe tuʼu ʼi loto. Neʼe fakamahino age e te fafine kiā Linda, ʼaē ko te Fakamoʼoni, ko tona ʼohoana ʼe mahaki mafu, pea ʼe ʼaoga ke tokaga ki ai. Neʼe tagi fēnei age ia te fafine: “ ʼE mole au ʼiloʼi pe koteā ʼaē neʼe au fai ke fakagafua ai e te ʼAtua ke hoko te meʼa ʼaenī kiā au.” Neʼe tali fēnei age e Linda: “ ʼE feala lā ke au fakahā atu te moʼoni ʼaenī?” Pea neʼe ina lau age iā Sake 1:13 pea mo ina ʼui fēnei age: “Ko te ʼu mamahi fuli ʼaē ʼe hoko kiā tātou pea mo nātou ʼaē ʼe tou ʼoʼofa ai ʼe mole ko he tautea mai te ʼAtua.” ʼI tana logo ki te faʼahi ʼaia, neʼe fāʼufua e te fafine ia Linda ʼi te lahi ʼaupitō ʼo tana loto fakafetaʼi. Neʼe ʼui fēnei e Linda: “Neʼe feala ke au fakalotofīmālieʼi te fafine ʼaki taku fakaʼaogaʼi ia te Tohi-Tapu. ʼI ʼihi temi ko te ʼu vaega ʼaē ʼe tou lau ʼi te Tohi-Tapu, ʼe ko he ʼu vaega neʼe mole heʼeki logo kiai ia ia ʼo te loto fale.” Neʼe iku ia te fai palalau ʼaia ki te fai tuʼumaʼu ʼo te ako Tohi-Tapu mo te fafine.

ʼU Tūpulaga ʼAē ʼe Faʼafai ʼi Te Tauhi

10. Neʼe liliu feafeaʼi ia Sosiasi ko he faʼifaʼitaki lelei maʼa te kau Kilisitiano tūpulaga iā ʼaho nei?

¹⁰ ʼO ʼuhiga mo te faʼifaʼitaki ʼa Sosiasi, ʼe tou tokagaʼi neʼe nofo ʼi te tauhi moʼoni talu mai tana kei tūpulaga pea neʼe taʼu 20 tana tauʼi ia te tauhi taulāʼatua. (Lau ia 2 Fakamatala 34:1-3.) ʼE hahaʼi te kau tūpulaga iā ʼaho nei ʼe natou toe faʼafai fēia ʼi tanatou minisitelio.

11-13. Koteā te ʼu ako ʼe tou lava tāʼofi mai te kau tūpulaga ʼo totatou temi ʼaē ʼe natou faʼafai ʼi tanatou tauhi kiā Sehova?

¹¹ Ko Hannah, ʼaē ʼe maʼuli ʼi Pilitānia, neʼe taʼu 13 pea neʼe ina lolotoga ako ia te lea Fakafalani ʼi te faleako, ʼi te temi ʼaē neʼe logo ai ki te fakatuʼutuʼu ʼe fai ʼo ʼuhiga mo te kūtuga ʼe palalau Fakafalani ʼi te kolo ʼe ovi age kiō ia. Neʼe lotolelei tana tamai ke kaugā ʼolo mo Hannah ki te ʼu fono ʼaē neʼe fai ai. ʼI te temi nei, kua taʼu 18 ia Hannah pea ʼe faʼafai ʼi te fai fakamafola ʼi te lea Fakafalani, ʼi tana selevisi pioniē kātoa. ʼE feala koa mo koutou ke kotou ako ia he tahi lea pea mo tokoni ki te hahaʼi ke natou ʼiloʼi ia Sehova?

¹² Ko Rachel neʼe fiafia ʼaupitō ʼi tana sioʼi ia te foʼi ʼata viteo Poursuivez des objectifs qui honorent Dieu (Kotou fai he ʼu fakatuʼutuʼu ʼe fakakolōliaʼi ai ia te ʼAtua). ʼO ʼuhiga mo te faʼahiga manatu ʼaē neʼe ina maʼu ʼi tana kamata tauhi kiā Sehova ʼi te taʼu 1995, ʼe ina ʼui fēnei: “Neʼe au manatu ʼe au tuputupu anai ʼi te moʼoni.” ʼE ina toe ʼui fēnei: “ ʼI taku ʼosi sioʼi te foʼi ʼata ʼaia, kua au mahino leva ʼi te temi nei neʼe au maʼuli fakafīfīmālie pē lolotoga ni ʼu taʼu. Neʼe tonu ke au faiga lahi maʼa te moʼoni pea ke au fakakaukauʼi pea mo fakamālotoloto ʼi taku selevisi pea mo taku ako tokotahi.” ʼI te temi nei, kua tokagaʼi e Rachel kua tauhi kiā Sehova ʼaki he faʼafai ʼe lahi age. Neʼe koteā te fua ʼo te faʼahi ʼaē neʼe hoko kiā ia? “Neʼe lelei age taku ʼu felōgoi ʼaē mo Sehova. Neʼe lelei age taku ʼu faikole, neʼe loloto age taku ako pea mo ʼaoga tāfito age ki toku maʼuli, pea neʼe lahi age taku tui ʼaē ki te ʼu fakamatala ʼi te Tohi-Tapu. Neʼe lahi age taku fiafia ʼi te minisitelio ʼi taku sio ʼaē ki te fakalotofīmālie ʼo te hahaʼi e te ʼu folafola ʼa Sehova.”

¹³ Ko Luke, ko te tūpulaga neʼe lotomālohi ʼaki tana sioʼi ia te tahi age foʼi ʼata viteo, Les jeunes sʼinterrogent... Que vais-je faire de ma vie ? (ʼE feʼekeʼaki ia te kau tūpulaga: ʼE au fakaʼaogaʼi feafeaʼi anai toku maʼuli?) ʼI tana ʼosi sioʼi te foʼi ʼata ʼaia, ʼe tohi fēnei e Luke: “Neʼe uga ai au ke au fakakaukauʼi toku maʼuli.” ʼE ina ʼui fēnei: “ ʼI te temi muʼa, neʼe fakaneke au ke au faiga ki he maʼuli fīmālie fakapaʼaga ʼaki haku tokaga muʼa ʼo fai he ʼu ako lalahi pea hoki au tokaga leva ki muli age ʼo fai he ʼu fakatuʼutuʼu fakalaumālie. Ko te ʼu taʼi fakaneke ʼaia ʼe mole kotou tuputupu ai anai ʼi te faʼahi fakalaumālie; kae ʼe kotou vaivai ai anai.” ʼU tehina mo tuagaʼane tūpulaga, he koʼē ʼe mole kotou vakaʼi peʼe feala hakotou fakaʼaogaʼi te meʼa ʼaē ʼe kotou ako ʼi te faleako moʼo fakalahi takotou minisitelio, ohagē ko tona fai e Hannah? Pea he koʼē koa ʼe mole kotou faʼifaʼitakiʼi ia Rachel, ʼo kotou faʼafai ʼi te fakahoko ʼo he ʼu fakatuʼutuʼu ʼe natou fakamaʼuhigaʼi moʼoni ia te ʼAtua? Kotou muliʼi ia te faʼifaʼitaki ʼa Luke, ʼo kotou tekeʼi ia te ʼu fakahala ʼaē ʼe feala ke liliu moʼoni ko he ʼu hele maʼa te kau tūpulaga e tokolahi.

Kotou Faʼafai ʼo Manatuʼi Te ʼu Fakatokaga

14. Ko te faʼahiga tauhi fea ʼaē ʼe tali e Sehova, pea he koʼē ʼe ko he meʼa faigataʼa te puipui ʼo te faʼahi ʼaia iā ʼaho nei?

¹⁴ ʼE tonu ke maʼa te hahaʼi ʼa Sehova mo kapau ʼe natou loto ke ina tali tanatou tauhi. ʼE fai e Isaia ia te fakatokaga ʼaenī: “Kotou fakamamaʼo, kotou fakamamaʼo, kotou mavae mai ai, ʼaua naʼa kotou fāfā ki he meʼa ʼe heʼemaʼa; kotou mavae mai te lotolotoiga ʼo ia, ke kotou maʼa, ia koutou ʼaē ʼe kotou fua te ʼu ʼipu ʼa Sehova.” (Isa. 52:11) Lolotoga te ʼu taʼu ʼi muʼa ʼo te tohi e Isaia ia te ʼu palalau ʼaia, neʼe fai e te Hau agatonu ko Asa ia te gāue lahi moʼo molehi kātoa ia te aga heʼeʼaoga ʼi Suta. (Lau ia 1 Hau 15:11-13.) Hili kiai ni ʼu sēkulō, neʼe ʼui e te ʼapositolo ko Paulo kiā Tito, ko Sesu neʼe ina sākilifisioʼi ia ia totonu ke liliu ai tana ʼu tisipulo ʼo maʼa ʼi te faʼahi fakalaumālie, ko ‘hana hahaʼi ʼo ia totonu, ʼe natou faʼafai ki te fai ʼo he ʼu gāue lelei.’ (Tito 2:14) Iā ʼaho nei, ʼi he sōsiete ʼe lahi ai te aga heʼeʼaoga, ʼe faigataʼa, tāfito maʼa te kau tūpulaga, hanatou nonofo maʼa. Ohagē lā, ko te ʼu kaugana fuli ʼa te ʼAtua, tūpulaga ʼo fēia mo te hahaʼi mātutuʼa, ʼe tonu ke natou nonofo tōkakaga ke ʼaua naʼa natou heʼemaʼa ʼi te ʼu pāki ʼaē ʼe hā ai te ʼu felāveʼi fakasino heʼeʼaoga ʼi te ʼu panō fakahāhā, ʼi te televisio, ʼi te ʼu ʼata, pea tāfito ʼi te Neti.

15. Koteā ʼaē ʼe feala ke tokoni mai ke tou fehiʼa ki te meʼa ʼaē ʼe kovi?

¹⁵ Ko tatatou faʼafai ʼo manatuʼi ia te ʼu fakatokaga ʼa te ʼAtua ʼe tokoni mai ke tou fēhihiʼa ki te meʼa ʼaē ʼe kovi. (Pes. 97:10; Loma 12:9) ʼE tonu ke tou fakalialia ki te ʼu pāki ʼaē ʼe hā ai te ʼu felāveʼi fakasino heʼeʼaoga, ke feala ohagē ko tona ʼui e te tahi tehina, ke tou ʼāteaina mai te fakahala mālohi ʼaia. Ohagē lā, moʼo veteki ia he ʼu manete ʼe fepipikiʼaki, ʼe tonu ke fakaʼaogaʼi ia he meʼa ʼe mālohi age ʼi te mālohi ʼo te ʼu manete. ʼO toe fēia pē, ʼe ʼaoga he toe faiga mālohi moʼo tauʼi ia te hele ʼaē ʼo te ʼu pāki ʼe hā ai he ʼu felāveʼi fakasino heʼeʼaoga. Kae ʼi tatatou mahino ʼaē ʼe feala ke fua kovi ʼaupitō kiā tātou tatatou sisio ki te ʼu pāki ʼaia, ʼe tokoni mai anai ke tou fēhihiʼa kiai. Ko te tehina neʼe faiga mālohi ke ina liʼaki tana sio ʼaē ki te ʼu pāki ʼo te ʼu felāveʼi fakasino heʼeʼaoga ʼi te Neti. Neʼe ina fetogi te tuʼuʼaga ʼo tona olotinatea, ʼo ina tuku ki he faʼahi ʼe sio kiai tona fāmili kātoa. Pea neʼe ina fakatotonu ke ina fakamaʼa ia tona maʼuli pea mo faʼafai ki te fai ʼo he ʼu gāue lelei. Kae neʼe ʼi ai te tahi meʼa neʼe ina fai. ʼI te temi ʼaē neʼe tonu ke ina fakaʼaogaʼi ai ia te Neti ʼuhi ko tana gāue, neʼe ina fakatotonu hoki ina fakaʼaogaʼi pē ʼi te temi ʼaē ʼe nofo ai tona ʼohoana ʼi ʼona tafa.

Te Maʼuhiga ʼo Te Aga ʼAē ʼe Lelei

16, 17. ʼE malave feafeaʼi ia tatatou aga ʼaē ʼe lelei kiā nātou ʼaē ʼe sisio mai kiā tātou? Kotou tuku mai he faʼifaʼitaki.

¹⁶ ʼE malave ki te hahaʼi ia te faʼifaʼitaki lelei ʼaē ʼe natou fakatokagaʼi ʼi te ʼu talavou pea mo te ʼu finemui ʼaē ʼe tauhi kiā Sehova. (Lau ia 1 Petelo 2:12.) Ko te tagata neʼe ʼalu ki te Petele ʼi Lonitoni, pea neʼe ʼaho kātoa tana nofo ai, ʼo faʼu ia te masini tā tohi, pea neʼe fetogi kātoa ai ia tana manatu ʼaē ʼo ʼuhiga mo te kau Fakamoʼoni ʼa Sehova. Ko tona ʼohoana, ʼaē ʼe ina ako te Tohi-Tapu mo te kau Fakamoʼoni ʼo te kolo, neʼe ina tokagaʼi ia te fetogi ʼaia neʼe hoko ki tona ʼohoana. ʼI muʼa atu, neʼe mole loto ia ke ʼolo age te kau Fakamoʼoni ki tona ʼapi. Kae ʼi tana liliu mai tana gāue ʼaia ʼi te Petele, neʼe palalau lelei tuʼumaʼu ki te agalelei ʼaē neʼe fai age kiā te ia. Neʼe ina vikiʼi ia te mole gutu tauvele ʼa he tahi, mo tanatou faʼa kātaki pea neʼe ina logoʼi ia te maʼuli tokalelei ʼaē ʼe maʼu iā nātou. Neʼe punamaʼuli tāfito ki te ʼu tehina mo tuagaʼane ʼaē kei tūpulaga ʼi tanatou faʼafai ʼi tanatou gāue pea mole totogi nātou, ʼo natou lotolelei ʼo foaki tonatou temi pea mo tonatou mālohi moʼo tokoni ki te tala ʼo te logo lelei.

¹⁷ ʼE toe fēia mo te ʼu tehina mo tuagaʼane ʼaē ʼe natou gāue ʼi te mālama moʼo taupau tonatou fāmili, ʼe natou faʼa gāue. (Kol. 3:23, 24) ʼI te agamāhani, ʼe falala te ʼu pātolō ki tanatou gāue lelei pea ʼe mole natou fia fakamavae nātou, koia lā ʼaē ʼe taupau ai e te ʼu tehina mo tuagaʼane tanatou ʼu gāue.

18. ʼE lava feafeaʼi hatatou “faʼafai ki te fai ʼo he ʼu gāue lelei”?

¹⁸ ʼE tou fakahā tatatou faʼafai maʼa te fale ʼo Sehova, ʼaki tatatou falala kiā Sehova, mo tatatou fakalogo ki tana ʼu fakatotonu, pea mo tatatou tōkakaga ki tatatou ʼu fale fono. Pea ʼe tou fia kau mālohi ki te fakamafola ʼo te Puleʼaga pea mo te fai ʼo he ʼu tisipulo, ʼo mulimuli pē ki totatou ʼu fealagia. Peʼe tou tūpulaga peʼe tou mātutuʼa, kae ko tatatou faiga fakamālotoloto ke tou mulimuli ki te ʼu lēkula maʼa ʼaē ʼe pipiki ki tatatou tauhi, ʼe tapuakina lahi ai anai tātou. Pea ʼe ʼiloa tuʼumaʼu aipē anai tātou, ko he hahaʼi ʼe “faʼafai ki te fai ʼo he ʼu gāue lelei.”—Tito 2:14.

[Nota]

ʼAki te ʼu faʼifaʼitaki ʼo te temi muʼa pea mo totatou temi, koteā ʼaē neʼe kotou ako ʼo ʼuhiga

• mo te fakahā ʼo takotou faʼafai ʼi takotou fai fakamafola pea mo faiako?

• mo te “faʼafai ki te fai ʼo he ʼu gāue lelei” ʼa te kau Kilisitiano tūpulaga?

• mo te ʼāteaina mai te ʼu agamāhani ʼe kovi?

[Paki ʼo te pasina 17]

ʼE kotou fakaʼaogaʼi māhani koa ia te Tohi-Tapu ʼi takotou minisitelio?

[Paki ʼo te pasina 18]

Ko takotou ako ia he tahi age lea ʼi takotou kei ako, ʼe feala ke tokoni atu ke kotou fakalahi takotou minisitelio